Xiqimita

Yihooway aadhdhida eratettawu Pultto, qassi I ba aadhdhida eratettaa haratussi kehatettan immees. Nuuni Xoossaa seeraa ekkiyoogee A aadhdhida eratettaa demmiyo issi oge. Qassi he aadhdhida eratettay kandduwaaninne ayyaanaaban nuna qohiyaabaappe naagana danddayees. (Lee. 2:10-12) Hegaa gishshawu, nuuni “merinaa de7uwaa naagiiddi, [nu] huuphiyaa Xoossaa siiquwan” wottoos. (Yih. 21) SHin, nu nagaraappe, nu diccido hanotaappenne hara gaasuwaappe denddidaagan nuuni seeraa ekkanawu woy bessiyaagaadan xeellanawu metootana danddayoos. SHin nuuni Xoossaa seeray goꞌꞌiyoogaa nu deꞌuwan beꞌiyo wode, I nuna ay keena siiqiyaakko akeekoos. Leemiso 3:11, 12y, “Ta na7au, GODAA seeraa karoppa; . . . GODAI ba ufaittiyo uraa seerees” yaagees. Yihooway nuussi keehi loꞌꞌobaa amottiyoogaa ammanettana danddayoos. (Ibr. 12:5-11) Xoossay nuna loytti eriyo gishshawu, A seeray nuuyyo ubbatoo bessiyaabanne koshshiyaaba. w18.03 28 ¶1-2

Kiitettida PHeexiroosi qommoora deꞌiya qofaa wogan dumma dumma gidida Qeeri Isiyan deꞌiya gubaaꞌetussi xaafiis. ‘Tamadan xuuggiya paacee’ eta gakkiiddi deꞌees. He waayissiya wodiyan ubbasan deꞌiya Kiristtaaneti genccanaadan maaddana danddayiyaabay aybee? (1 PHe. 1:1; 4:4, 7, 12) PHeexiroosi Kiristtaane gidida ba ishanttinne michontti eti eriyo laggeta “issoi issuwaa” imattatettan mokkanaadan yootidoogaa hassaya. Imattaa mokkiyoogee eta waati maaddii? Hegee eti issoy issuwaara siiqettanaadan maaddees. Nena gakkidabaa qoppa. Issi uri ba son nena shoobbin keehi ufayssiya wodiyaa aatta eray? Hegee neeni keehi ufayssiyaabaa hassayanaadan oottennee? Issi ura ne gubaaꞌiyaappe neeni shoobbin intte dabbotay minnibeennee? Nu ishanttanne michontta imattiyoogan hara hanotan eriyoogaappe aaruwan nuuni eta eroos. PHeexiroosa wodiyan deꞌida Kiristtaaneti metoy dariyo wode kaseegaappe aaruwan issoy issuwaara siiqettana koshshiis. Ha “wurssetta gallassi” deꞌiya Kiristtaanetu hanotaykka hegaara issi mala.—2 Xim. 3:1. w18.03 14-15 ¶1-3

Geeshsha Maxaafay ayyaanaabaa qoppiya ura nashshees. Roome 8:6y, “Asatettaabaa qoppiyoogee haiquwaa ehees; shin Geeshsha Ayyaanaabaa qoppiyoogee de7uwaanne sarotettaa ehees” yaagidi, ayyaanaabaa qoppiyoogaa goꞌꞌaa yootees. Nuuni ayyaanaabaa mintti qoppiyoogan ha wodiyan nu wozanankka Xoossaarakka sarotettaa, sinttappe qassi merinaa deꞌuwaa demmana. SHin, nuuni keehi qohiya alamiyan deꞌoos. Nuuni asatettaabaa qoppiyoogee kumido alamiyan deꞌiyo gishshawu, ayyaanaabaa qoppanawunne he qofaa naagidi deꞌanawu wozanappe baaxetana koshshees. Nuuni ayyaanaabaa nu wozanan qoppana xayikko, alamee asatettaa qofay nu wozanan kumanaadan oottees. Yihuday issoti issoti ubba “Geeshsha Ayyaanai bainnaageeta” woykko ayyaanaabaa mule qoppennaageeta gidanaagaa yootiis.—Yih. 18, 19. w18.02 19 ¶5, 7; 20 ¶8

Daro dottoretinne narsseti asaappe asaa oyqqiya harggiyan sahettiyaageeta akkamoosona. Eti hegaadan oottiyoy sahettidaageeta maaddanawu koyiyo gishshataassa. Gidoppe attin, yaatiyo wode eti akkamiyoogeetuppe banttana harggee oyqqenna mala naagettana koshshees. Hegaadankka, nuuppe daroti Xoossaa eeshshaappe muleera dummatiya, qohiya qofaynne eeshshay deꞌiyo asatuura deꞌoosinne oottoos. Hegee nuussi metiyaaba gidana danddayees. Ha wurssetta gallassay asay kandduwan keehi moorettido wode. Kiitettida PHawuloosi Ximootiyoosawu xaafido naaꞌꞌantto dabddaabbiyan, Xoossaappe haakkida asaa eeshshaa yootiis. (2 Xim. 3:1-5) Hegaa mala eeshshay keehi daridoogee nuna daganttana danddayiyaaba gidikkonne, hegaa mala eeshshaynne qofay deꞌiyoogeeti nuna qohanakka danddayoosona. (Lee. 13:20) Hegaa gishshawu, nuuni ayyaanaaban harata maaddiyo wode, he iita eeshshatun qohettennaadan nu huuphen naagettana koshshees. w18.01 27 ¶1-2

Hayquwaappe denddida Yesuusi 33 M.Ln, 500⁠ppe dariya attuma asati, macca asatinne geella guutta naatikka issippe shiiqidaageetuyyo qoncciis. I hagaa yootidoy he wodiyaana gidennan aggenna. (1 Qor. 15:6) Erissiyo ashkkara oottanaadan Yesuusi azaziyo wode, A kaalliya xeetan qoodettiya asati siyennan aggokkona. Xammaqettiyoogee Kiristtaane gidiyo qambbaraa tookkiyaageetuppe koyettiyaaba gidiyoogaa Yesuusi hegaadan qonccissiis. (Matt. 11:29, 30) Xoossaa ufayssiya ogiyan ayyo oottanawu koyiya ooninne Yihoowa halchchuwaa polanawu Yesuusawu imettida maataa erananne A maataa bonchchana bessees. Izaawu yaati simmidi xammaqettana danddayees. Xoossaa ufayssiya xinqqatee hegaa xalla. Koyro xeetu layttan, Kiristtoosa kaalliyoogaa doommidaageeti xammaqettiyoogee keehi koshshiyoogaa akeekidoogaa bessiya darobaa Geeshsha Maxaafay yootees. Qassi eti xammaqettanawu coo haganaa sugibookkona.—Oos. 2:41; 9:18; 16:14, 15, 32, 33. w18.03 5 ¶8

Ha wodiyan, alamiyaa worddo haymaanooteta xaaxa waaxida, ‘iita ayyaanati deꞌiyoosa’ gidida gita Baabiloona asaa kandduwaaninne ayyaanaaban bashshido alamiyan, nuuni asa biitta asadan deꞌoos. (Ajj. 18:2) Hegaa gishshawu, nuunikka dummatidi deꞌiyoogaappe denddidaagan, asay ubba nuna borees. (Mar. 13:13) Yaanikko, nuunikka simmi Daaneelaagaadan nu Xoossaa Yihoowakko shiiqidi deꞌoos. Nuuni nu huuphiyaa kawushshidi ayyo ammanettiyoonne azazettiyo wode, nuunikka A sinttan alꞌꞌoba gidoos. (Hag. 2:7) Yelidaageeti Daaneela aawaappenne aayeeppe tamaarana danddayoosona. Waatidi? Daaneeli naatettan deꞌiyo wode Yihudaa biittan iitatettay kumikkonne, he naꞌay Xoossaa siiqiya naꞌa gididi dicciis. Hegee yelidaageeti A loytti loohissoogaa bessiyaaba. (Lee. 22:6) “Ta daannay Xoossaa” giyo birshshettay deꞌiyo Daaneela sunttaykka gidin, A yelidaageeti Xoossaa yayyiyoogaa bessees. Yaaniyo gishshawu, yelidaageetoo, intte naatu hanotan hidootaa qanxxennan, eta danddayan tamaarissite. (Efi. 6:4) Hegaa bollikka, etaara woossite; qassi etawukka woossite. Intte Geeshsha Maxaafaa tumay eta wozanan deꞌanaadan daafuriyo wode, Yihoowappe daro anjjuwaa demmana.—Maz. 37:5. w18.02 5 ¶12; 6 ¶14-15

Immiyoogee Yihoowawu goynniyoogaakka erissiyaaba. Ajjuutan, kiitettida Yohaannisi Yihoowa ashkkarati saluwan hagaadan giyoogaa siyiis: “Nu Godau Xoossau, neeni bonchchuwaa, sabaanne wolqqaa ekkanau bessaasa. Aissi giikko, ubbabaa neeni medhdhadasa; qassi ubbabaikka neeni koyidoogaadan haniisinne de7iis.” (Ajj. 4:11) Nuussi deꞌiyaabaappe aaro loꞌꞌobaa Yihoowayyo immiyoogan bonchchuwaanne sabaa ubbaa I ekkanawu bessees giyoogan maayikkii? Israaꞌeelati layttan layttan heezzutoo baalaa bonchchanawu Yihoowa sinttan beettanaadan Yihooway Muuse baggaara azaziis. He baalatun eti goynniyo wode, Israaꞌeelati “GODAA sintti yiiddi, mela kushe” yookkona. (Zaa. 16:16) Hegaadan ha wodiyan, nuuni uuzettennan immiyoogan nashshiyoogeenne Yihoowa dirijjitiyawu saꞌaa baggay oottiyo oosuwaa maaddiyoogee nu goynuwawu keehi koshshiyaaba. w18.01 18 ¶4-5

Yesuusi gujjidi, “Ta qambbaran waaxettite; . . . ta qambbarai giiga; qassi taani inttena toossidoogeekka kaushsha” yaagiis. (Maa. 11:29, 30) Hegee tuma! Issi issitoo, nuuni shiiquwaa baanawu woy haggaazanawu sooppe kiyiyo wode daafurana danddayoos. SHin simmiyo wode waaniyoo? Gazddoos; qassi nuna gakkiya metuwaa genccanawu giigidaageeta gidoos. Yesuusa qambbaray tumukka giiga! Keelo giyo michchiyo kiroonik faatig sindirom giyo wolqqaa xayssiyaanne daafurssiya harggee, qofan unꞌꞌissiya harggeenne iita huuphe qoxoy sakkees. Gubaaꞌe shiiquwaa baanawu A issi issitoo keehi metootawusu. SHin, issi wode A baaxetada shiiquwaa ba simmada hagaadan gaasu: “Haasayay hidootaa qanxxuwaabaa qonccissiyaaba. Haasayiyaagee siiquwaaninne qaretan qonccissido gishshawu yeekkaas. Hegee taani ubbatoo shiiquwaa baana koshshiyoogaa tana hassayissiis.” A baaxetada shiiquwaa biidoogan ay keena ufayttadeeshsha! w18.01 8-9 ¶6-7

Intte naꞌi xammaqettidi amarida wodiyaappe simmin siriyoogaa doommikko shin? Leemisuwawu, xammaqettida issi pantta yelagay alamiyaabaa amottiyaaba milatana woy Geeshsha Maxaafaa maaraadan deꞌiyoogee goꞌꞌiyoogaa sirana danddayees. (Maz. 73:1, 3, 12, 13) A qofaa suurissana giidi intte oottiyoobay i Yihoowawu haggaazanaadan woy haggaazennaadan oottana danddayees. I guutta naꞌa gidin woy yelagakka gidin, he yohuwan aara palamettoppite. SHin, intte a siiqiyoogaanne maaddanawu koyiyoogaa i eranaadan oottite. Xammaqettida yelagay wozanappe bana Yihoowawu geppidoogee qoncce. Hegee Xoossaa siiqanawunne aybippenne aaruwan a sheniyaa oottanawu gelido qaala. (Mar. 12:30) Yihooway he qaalaa xoqqu ootti xeellees; qassi qaalaa gelida urikka hegaa xoqqu ootti xeellana koshshees.—Era. 5:4, 5. w17.12 22 ¶16-17

Marttiigaadan, Yihoowayyo ammanettida ashkkarati sinttappe asay hayquwaappe denddanaagaa eriyoogaa bessiya daro qofay Xoossaa Qaalan deꞌees. Yihooway Abrahaami daro wodiyaa naagidi demmido ba naꞌaa Yisaaqa waatanaadan yootidaakko qoppa. Yihooway, “Neeni siiqiyo ne mexi issi na7aa Yisaaqa ekkada . . . a xuuggiyo yarshsho oottada taayyo yarshsha” yaagiis. (Doo. 22:2) Abrahaami he azazuwaa siyido wode ayyo siyettidabaa qoppa. Abrahaama zerettaa baggaara asa ubbay anjjettanaagaa Yihooway ayyo qaalaa geliis. (Doo. 13:14-16; 18:18; Roo. 4:17, 18) Yihooway he anjjoy “Yisaaqa baggaara” yaanaagaakka yootiis. (Doo. 21:12) SHin Abrahaami Yisaaqa yarshshikko, hegee waani polettana danddayii? Xoossay Yisaaqa hayquwaappe denttana danddayiyoogaa Abrahaami ammanidoogaa PHawuloosi ayyaanay denttettin yootiis. (Ibr. 11:17-19) Abrahaami ba naꞌay awude denddanaakko erana danddayenna. SHin Yihooway Yisaaqa hayquwaappe denttanaagaa i ammanettiis. w17.12 5-6 ¶12-14

PHawuloosaagaadan, nuunikka deꞌuwaa Xoossay xeelliyo ogiyan xeellanawu baaxetana bessees. Yihooway ‘ooninne ba nagaraappe simmanaadan koyees.’ (2 PHe. 3:9) Nuuni Yihoowa milatanawu asaa siiqana koshshees. Maariyaageeta gidiyoogee nuuni mishettidi sabbakanaadan denttetteesinne he oosuwan ufayttanaadan oottees. Nuuni qohiyaabaappe naagettiyoogaa bessiyaagaadan xeelliyoogankka deꞌuwaa Yihoowagaadan xeelloos. Keexxiyo wodenne giigissiyo wode qohiyaabaappe naagettidi oottana bessees; qassi goyno sohuwaa biiddi kaamiyaa laaggiyo wodekka gidin, awudenne qohiyaabaappe naagettana bessees. Asa deꞌoy, qohiyaabaappe naagettiyoogeenne payyatettay, wode woy miishsha demmiyoogaappe awudenne keehi aadhees. Suure pirddiya nu Xoossay ubba wode likkebaanne oottana bessiyaabaa oottees. Nuuni a milatanawu koyoos. Cimati etinne etaara oottiyaageeti qohiyaabaappe naagettanaadan loytti qoppana bessees. (Lee. 22:3) Naagettiyo maaraa issi cimay nena hassayissikko, i yootiyoobaa siya. (Gal. 6:1) Deꞌuwaa Yihoowagaadan xeella; yaatikko ‘suuttaa gussiyo nagaraappe neeni attana.’—Zaa. 19:10. w17.11 16 ¶11-12

Ayyaanan tiyettida ha wodiyan deꞌiya Kiristtaanetussi, kiitettida PHawuloosaagaadan “bolla de7uwau xeesiyo woituwaa” Xoossaappe ekkiyo gita maatay deꞌees. (Pili. 3:14) Eti saluwaa Kawotettan Yesuus Kiristtoosaara haggaazanawunne asay wottiyoobi baynnaagaa gidanaadan aara oottanawu yeemottoosona. (Ajj. 20:6) Hegee keehi ufayssiya hidoota! Hara dorssatu hidootay etaagaappe dummatees. Hara dorssati saꞌan merinaa deꞌuwaa woytuwaa demmanawu yeemottoosona; hegeekka keehi ufayssiya hidoota! (2 PHe. 3:13) PHawuloosi baagaadan tiyettida Kiristtaaneti ammanettidi deꞌanaadaaninne woytuwaa demmanaadan maaddanawu, ‘Saluwan deꞌiyaagaa qoppite’ yaagidi eta minttettiis. (Qol. 3:2) Eti saluwan demmana alꞌꞌo hidootaa ubba wode qoppana bessees. (Qol. 1:4, 5) Xoossaa ashkkarati ubbay Yihooway etawu giigissido he anjjuwaa ubbatoo wotti dentti qoppiyoogee eta maaddiyoogee qoncce.—1 Qor. 9:24. w17.11 25 ¶1-2

Yihoowayyo ‘Ufayssan Yexxite’ giya maxaafan deꞌiya daro mazamuree woosa meran giigiis. Neeyyo siyettiyaabaa Yihoowawu qonccissanawu he mazamureta yexxana danddayaasa. Hara mazamureti qassi nuna ‘siiquwawunne loꞌꞌo oosuwawu’ denttettoosona. (Ibr. 10:24) Nuuni mazamuriyaa danttuwaakka muuziqaakka loytti eranawu koyoos. Neeni jw.org sayttiyan deꞌiya, cenggurssan giigida mazamureta siyiyoogee hegawu maaddees. Mazamuriyaa son meezetiyoogee yayyennan wozanappe yexxanawu maaddees. Yexxiyoogee nu goynuwan keehippe koshshiyaabaa gidiyoogaa hassaya. Hegee nuuni Yihoowa siiqiyoogaanne nashshiyoogaa bessanawu keehi maaddiyaaba. (Isi. 12:5) Neeni ufayssan yexxiyo wode, haratikka wozanappe yexxanaadan denttettaasa. Yelagata, gasttatanne tumaa mati siyidaageeta gujjin, gubaaꞌiyan deꞌiya ubbay yexxiyoogan Yihoowawu goynnana danddayees. Hegaa gishshawu, wozanappe yexxanawu yayyoppa. Ee, ufayssan yexxa! w17.11 7 ¶18-19

Ha wodiyan daro beteti nu sabbakiyoogee digettido biittatuppe yoosona. Beteta mokkiya biittan deꞌiya Yihoowa Markkati mishettidi sabbakiyo gishshawu, shaꞌan qoodettiya beteti “Kawotettaa qaalaa” biron siyiiddi deꞌoosona. (Maa. 13:19, 23) ‘Deexuwaa tookkida’ daroti nu shiiquwan ayyaanaaban minettoosona; qassi eti sohuwaara, “Xoossai tumu intte giddon de7ees” yaagoosona.” (Maa. 11:28-30; 1 Qor. 14:25) Betetussi sabbakiyaageeti akeekanchanne “cincca” gidana koshshees. (Lee. 22:3) Eta qofissiyaabaa danddayan siya; shin polotikaabaa haasayoppa. Macara biiroynne heeraa sunttati immiyo kaaletota kaalla; nena woy harata qohiyaabaappe naagetta. Haymaanootiyaaranne wogaara gayttidaagan betetu qofaa akeekanne boncha. Leemisuwawu, maccaasay maayiyo giiga maayuwaabay issi issi biittaa asaa keehi qofissees. Yaatiyo gishshawu, betetuyyo sabbakiyo wode, asaa yiilloyennabaa maaya. w17.05 7 ¶17-18

Yihoowa Markka gidenna nu dabbotuura haasayiyo wode geeshsha ayyaanaa ayfiyaa nuuni ayfanaadan maaddiya he ayyaanaa immana mala Yihoowa woossana danddayoos. Eta worddo ammanuwaa ubbaa xeelliyaagan nuuni etaara palamettana koshshenna. Eti haasayidobay woy oottidobay nuna qohikko, kiitettidaageetu leemisuwaa kaallana danddayoos. PHawuloosi hagaadan giis: “Nuna asi cayiyo wode, anjjoos. Nuna yedetti yuuyiyo wodekka danddayoos. Nu bolli iitabaa haasayiyo wode, nuuni lo77o qaalaa zaaroos.” (1 Qor. 4:12, 13) Loꞌꞌo qaalaa haasayiyoogee eqettiya nu dabbotuura sarotettan deꞌanaadan maaddikkonne, nu loꞌꞌo eeshshay hegaappekka aadhiya loꞌꞌobaa demissana danddayees. (1 PHe. 3:1, 2, 16) Yihoowa Markkati bantta aqo deꞌuwan ufayttiyoogaa, bantta naata suure dichiyoogaa, qassi geeshshanne ufayssiya deꞌo deꞌiyoogaa ne dabboti ne deꞌuwan beꞌanaadan ootta. Nu dabboti tumaa siyanawu ixxikkonne, nuuni ammanettidi deꞌiyoogan Yihoowa ufayssiyoogaa eridi ufayttana danddayoos. w17.10 15 ¶13-14   

Ha wodiyan daro asay Xoossaa Qaalaa xannaꞌidi keehi laamettidoogan nuuni garamettana koshshii? Koshshenna! Koyro xeetu layttan deꞌida, saluwaa biyo hidootay deꞌiyo nu ishanttinne michontti hegaadan laamettidosona. (1 Qor. 6:9-11) Kiitettida PHawuloosi Xoossaa Kawotettaa laattenna asatubaa yooti simmidi, ‘Intteppekka issi issi asay kase hegeetu mala’ yaagiis. SHin eti Xoossaa Qaalaanne geeshsha ayyaanaa maaduwan laamettidosona. Issoti issoti tumaa ekki simmidikka, suurissana koshshiyo moorobaa oottidosona. Koyro xeetu layttan gubaaꞌiyaappe bohettida, ayyaanan tiyettida issi Kiristtaaniyaabaa Geeshsha Maxaafay yootees; shin i guyyeppe simmidi gubaaꞌiyaa yara gidiis. (1 Qor. 5:1-5; 2 Qor. 2:5-8) Nu ishatanne michota gakkida metuwaanne eti Xoossaa Qaalay maaddin hegaa xoonidoogaa xannaꞌiyoogee nuna minttettennee? Tumukka, Geeshsha Maxaafan loytti goꞌettanawu koyoos. w17.09 23-24 ¶2-3

Yihooway siiquwawu Pultto. (1 Yoh. 4:7) Ubbaappe aadhiya siiqoy Geeshsha Maxaafaa maaraa kaallidi siiqiyo siiquwaa. Geeshsha Maxaafan he siiqoy Giriikettuwan agaappe giya qaalan qoncciis. He siiqoy issi uraa wozanappe siiqanaadan ootteesippe attin, nuuyyo siyettiyaaba xalla gidenna. Nuuni nu goꞌꞌaa aggibayidi harata siiqiyoogan hegaa bessoos. Harata goꞌꞌiyaabaa oottanaadan nuna denttettiyay he siiquwaa. Hegaa mala siiqoy nuuni deꞌuwan ufayttanaadan maaddees. Yihooway Addaamanne Hewaano medhanaappe kasekka asaa siiqiyoogaa bessiis. I saꞌaa asay coo deꞌiyo soho xalla gidennan, merinawu ufayttidi deꞌiyo soho oottidi medhiis. Yihooway hegaadan medhidoy bawu maadettanaassa gidennan, nuna maaddanaassa. I etawu giigissido Gannatiyan merinawu deꞌiyo hidootay deꞌanaadan saꞌan deꞌiya ba naata anjjiyoogankka ba goꞌꞌaa aggibayiyo siiquwaa bessiis. w17.10 7 ¶1-2

Yaaqoobi gujjidi, “intte asa som77o xeellidi bonchchikko, nagaraa ootteeta” yaagiis. (Yaaq. 2:9) SHin, siiqoy nuuni timirttiyan, zariyan woy deretettan deꞌiya sohuwan asa asappe aynne shaakkennaadan oottees. Asa asappe shaakkennan aggiyoy asa bessanaassa gidana koshshenna. Hegee nuuni wozanappe bessana koshshiyo eeshsha. Hegaa bollikka, ‘siiqoy danddayanchanne keha, qassi otorettenna.’ (1 Qor. 13:4) Kawotettaa mishiraachuwaa nu shoorotussi aggennan yootanawu danddayana, kehananne nu huuphiyaa kawushshana koshshiyoogee tuma. (Maa. 28:19) He eeshshati nuuni gubaaꞌiyan ishanttunne michonttu ubbaara saruwan deꞌanawukka maaddoosona. Hegaa mala siiquwaa bessiyoogee ayba anjjo demissii? Hegee gubaaꞌee Yihoowa bonchissiyaagaanne eranawu koyiya oorattata ufayssiya issippetettay deꞌiyoogaa gidanaadan oottees. Geeshsha Maxaafay ooratta asatettaabaa yootiyoobaa, “Hegaa ubbaa bolli, ubbabaa issippe shiishshi qachchiya siiquwaa maayite” yaagidi kuuyiyoogee bessiyaaba.—Qol. 3:14. w17.08 26 ¶18-19

Bantta nagaraappe simmidi Xoossaa dabbo gidana danddayiyaageetussi nuuni hegaadan qarettana koshshees. Yihooway sinttappe yiya pirddaa wode ooninne xayana mala koyenna. (2 PHe. 3:9) Hegaa gishshawu, Xoossay iitata xayssanaashin, i qarettiyoogaa bessiya kiitaa nuuni aggennan awaajjana bessees. Qarettiyoogan Yesuusikka loꞌꞌo leemiso. I “heemmiya asi bainna dorssadan asai hirggiyo gishshaunne asaa maaddiyaabi bainna gishshau” etawu qarettiis. Azzanttiya eta hanotaa beꞌidi waatidee? I “asaa darobaa tamaarissuwaa doommiis.” (Maa. 9:36; Mar. 6:34) Maati baynna coo asa maaddana koyenna Parssawetu hanotaappe a hanotay keehi dumma. (Maa. 12:9-14; 23:4; Yoh. 7:49) Yesuusadan, asaa maaddanawunne Yihoowaabaa eta tamaarissanawu neeni wozanappe koyanaagee qoncce. w17.09 9 ¶6; 10 ¶9

Yooseefi Gibxxen ollan qashettido wode, he biittan kawuwaappe kaallidi xoqqa maatay deꞌiyo ura gidanaagaa woy i bantta soo asaa koshaappe ashshanaadan Yihooway oottanaagaa qoppidee? (Doo. 40:15; 41:39-43; 50:20) Yihooway oottidobay Yooseefi qoppido ubbabaappe aadhiyoogee qoncce. Cimida Saara naꞌa yelanaadan Yihooway oottana gaada qoppadee? Yisaaqi yelettidoogee Saara qoppana danddayiyo ubbabaappe aadhiyoogee erettidaagaa. (Doo. 21:1-3, 6, 7) Yihooway qaalaa gelido ooratta alamee yaanaappe kase, nu meto ubbaa i maalaalissiya hanotan qaarana giidi naagokko, woy qassi nu deꞌuwan maalaalissiyaabay hananaadan naagokko. SHin ammanettida ba ashkkarata Yihooway beni maalaalissiya ogiyan maaddidoogaa eroos. (Isi. 43:10-13) Nuuni i koyiyoobaa loytti oottanaadan wolqqaa immanawu koshshiya ubbabaa i oottana danddayiyoogaa eroos. (2 Qor. 4:7-9) Nuuni Yihoowawu ammanettidi deꞌikko, xoonettennaba milatiyaabaa nuuni xoonanaadan Yihooway maaddana danddayees. w17.08 11-12 ¶13-14

Kumettaa wodiyaa haggaaziyo wode, neegaadan haggaaziyaageetuura erettaasa; hegee neeni kaymanaadan maaddees. Daroti yelagatettan Yihoowawu loytti oottidoogee aqo deꞌuwan ufayttanaadankka maaddiis. Darotoo, aqo oyqqanaappe kase aqinye gididaageeti bantta aqo laggiyaara aqinye gididi issippe haggaazoosona. (Roo. 16:3, 4) Mazamure 20:4y “[Yihooway] ne wozanaa amuwaa neeyyo immo; ne halchchuwaa ubbaa polo” yaagees. Neeni halchiyo wode, tumuppe oottanabaa qoppa. Yihooway ha wodiyan oottiyobaa, qassi hegaara gayttidaagan neeni oottanabaa qoppa. Yaatada, a ufayssiyaabaa oottanawu halcha. Yihoowawu haggaaziyoogee a bonchissiyaaba gidiyo gishshawu, nena keehi ufayssana. Ee, “GODAN ufaitta; i neeyyo ne wozanaa amuwaa immana.”—Maz. 37:4. w17.07 26 ¶15-18

Issi uri bawu imettida oosuwaa loytti oottikko woy Kiristtaanetuppe koyettiya eeshshaa bessikko awu galatay bessees. Asa hegaadan galatikko, Yihoowa hegaappe aaruwan galatiyoogee bessiyaaba! Maalaalissiya meretan qonccida a gita wolqqaa gishshawu woy ba Naꞌaa wozo yarshsho oottidi immiyoogan asaa siiqido siiquwaa gishshawu, a galatana danddayoos. Mazamure 147 xaafidaagee Yihoowa galatanawu keehi koyiis. Qassi haratikka aara Xoossaa galatanaadan minttettiis. (Maz. 147:7, 12) Ha mazamuriyaa xaafiday oonakko erokko; shin ha mazamuraawee deꞌidoy Baabiloonen omoodettida Israaꞌeelata Yihooway Yerusalaame zaarido wodiyan gidennan aggenna. (Maz. 147:2) Xoossaa asay bantta biitti simmidi zaarettidi tumu goynuwaa goynniyoogaa doommidoogee ha mazamuraawee Yihoowa galatanaadan denttettiis. Neenikka ne deꞌuwan ‘Yihoowa galatanaadan’ oottiya ayba gaasoti deꞌiyoonaa?—Maz. 147:1. w17.07 17 ¶1-3

Yesuusi bana kaalliya daroti ha iita alamiyan banttawu koshshiyaabaa demmanawu metootanaagaa akeekiis. I hegaa “worddo” miishshaa giidoy aybissakko yootibeenna; shin zalꞌꞌee Xoossay koyro halchidoba gidennaagaa Geeshsha Maxaafay yootees. Yihooway Addaameyyoonne Hewaaniyyo koshshiyaabaa ubbaa Edenen palahissidi immiis. (Doo. 2:15, 16) Koyro xeetu layttan deꞌiya, ayyanan tiyettida Kiristtaanetuyyo Yihooway ba geeshsha ayyaanaa immido wode, “eta mehee ubbai issippe de7iyoorippe attin, baassi de7idabaa ooninne babaa gibeenna.” (Oos. 4:32) Hananabaa yootiya Isiyaasi asa ubbay miishsha qanxxennan saꞌan deꞌiyaabaa goꞌettiyo wodiyaabaa kasetidi yootiis. (Isi. 25:6-9; 65:21, 22) SHin hegee gakkanaashin, Yesuusa kaalliyaageeti Xoossaa ufayssiiddi ha alamiyaa ‘worddo miishshan’ banttawu koshshiyaabaa kunttanawu ‘cinccana’ bessees.—Luq. 16:8. w17.07 8 ¶4-6

Yihooway ubbabaa haariyo maataabaa suure qoppana bessiyoogaa koyro xaafettida Geeshsha Maxaafaa shaahotuppe issuwaa gidida Iyyooba maxaafaappe akeekoos. Iyyooba wolqqaama metoy gakkikko, i Xoossaa kaddanaagaa Seexaanay yootidobay he maxaafan deꞌees. Yihooway Iyyooba qohanawu koyibeenna; shin, Seexaanay Iyyooba paaccanaadan eeno giis. Guutta wodiyaa giddon, Iyyooba ashkkaratinne a siiqo naati tammati hayqqiddosona; qassi a aqoy muleera xayiis. Iyyooba bolli he metuwaa gattiday Seexaanaa; qassi i asay hegawu gaasoy Xoossaa giidi qoppanaadan oottiis. (Iyy. 1:13-19) Hegaappe simmin, Seexaanay Iyyoobi wolqqaama harggiyaa hargganaadan oottiis. (Iyy. 2:7) A machiyaanne heezzu worddo laggeti giido qohiyaabay i ubba yaa unꞌꞌettanaadan oottiis. (Iyy. 2:9; 3:11; 16:2) Hanidabay aybee? Seexaanaa mootoy muleera worddo gidiyoogee qoncciis. Iyyoobi Xoossaa mule aggibeenna.—Iyy. 27:5. w17.06 24 ¶9-10

Ha wodiyan so asawu huuphe gididaageeti bantta soo asawu koshshiyaabaa kunttanaadan Geeshsha Maxaafay yootiyo aawatettaa akeekana koshshees. Eti he aawatettaa polanawu minni oottana bessees. SHin, ha wurssetta wodiyan, oosoy keehi unꞌꞌettanaadan oottana danddayees. Darotoo, oosuwaappe ooso koyiya asay darees. Hegaappe denddidaagan, asay ooso demmanawu metootees. Guutta miishshay qanxxettin, gujo saatiyaa oottana koshshiyaabadan qoppiya asay daro. Qassi oottiyoobaappe daro ayfiyaa demmanawu ootissiyaageeti wolqqanttiyoogee asay asatettan, guuggiyaaninne qofan daafuranaadan oottees. Eti oottiyo dirijjitiyawu hegaadan oottanawu koyenna oosanchati oosuwaappe yedetettana danddayoosona. Nuuni Kiristtaane gidiyo gishshawu, koyro ammanettana bessiyoy Yihoowassappe attin, nuna ootissiyaagawu gidenna. (Luq. 10:27) Nuuni koshshiyaabaa kunttanawunne haggaazuwawu nu oosoy maaddees. SHin, nuuni naageettana xayikko, oosoy nu goynnennaadan diggana danddayees. w17.05 23 ¶5-7

Issi issitoo, mati aassiyaagaa gididaageeti bantta naata tumaa tamaarissanawu aassiya kaymati maaddana mala oychoosona. Aaway woy aayyiyaa ba naata hara uri xannaꞌissanaadan kuuyikko, xannaꞌissiya uri aawaanne aayee aawatettaa ekkanawu malana koshshenna. (Eph. 6: 1-4) Aawaynne aayyiyaa tumaa koyenna wode naata Yihoowa Markka gidida issi uri xannaꞌissanaadan oyshettiyo wodee deꞌees. SHin, ayyaanaaban maaddiya Yihoowa Markka gidida uri, eti he naatu aawa woy aayo gidennaagaa hassayana bessees. Qassi hegaadan xannaꞌissiyo wode, eta son aawaara woy aayeera woy hara kayma Yihoowa Markkaara woy qassi asi beꞌana danddayiyo sohuwan xannaꞌissiyoogee loꞌꞌo. Yaatikko, eti oottiyoobay aybakko ooninne bala ogiyan akeekenna. Takkidi aawaynne aayyiyaa Xoossay etayyo immido, bantta naatussi ayyaanaaban koshshiyaabaa kunttiyo aawatettaa polana giidi hidootoos. w17.06 8 ¶15-16

Naati bantta aawaanne aayee wogaa erana xayikko, eta qaalaanne eta ammanuwaabaa tamaaranawu koyennan aggana danddayoosona. Kiristtaane aawatinne aayeti banttawu koshshiyaabaappe aaruwan bantta naati ayyaanaaban minnanaadan oottoosona. (1 Qor. 10:24) Sameela geetettiya ishay hagaadan giis: “Ta machiyaanne taani nu naati ay qaalan ayyaanaaban dicciyaakko akeekiyoogaa beꞌidi, aadhida eratettaa demmanawu woossida.  . . Nu qaalaa goꞌettiya gubaaꞌiyaappe eti maadettiyoobay guutta gidiyoogaa nuuni akeekido wode, he biittaa qaalaa goꞌettiya gubaaꞌiyaa baanawu qofaa qachida. Nuuni ubbatoo issippe shiiquwaa shiiqoosinne haggaazoos. Qassi nu deꞌiyo biittaa ishanttinne michontti nunaara qumaa maanaadaaninne allaxxanaadan shoobbida. Nuuni hegaadan oottidoogee nu naati ishantta eranaadan, qassi etayyo Xoossa xalla gidennan, Aawanne Dabbo gidida Yihoowa eranaadan maaddiis. Hegee eti nu qaalaa loytti eriyoogaappe keehi koshshiyaaba gidiyoogaa akeekida.” w17.05 10 ¶11-13

Mata wode Yihoowa haaruwaa aybippenne aattidi xeelliyaageeti saꞌan kumana. He gallassaa keehi yeemottidi naagoos! Nuuni Debooridaaninne Baaraaqadan, “Abeet GODAU, ne morkketi ubbai hegaadan haiqqona! SHin ne siiqoti maallado mokkiya awaadan phoolona” yaagidi yexxoos. (Daan. 5:31) Yihooway Seexaanaa iita alamiyaa xayssiyoogan he woosaa zaarana! Armmageedoona olay doommiyo wode, morkkiyaa xoonanawu dosidi banttana aatti immiya asati koshshokkona. He wodee nuuni nu ‘sohuwaa sohuwaa oyqqi eqqidi, Yihooway nuna ashshiyoogaa beꞌiyo’ wode. (2 Odi. 20:17) SHin he wode gakkanaassi nuuni Yihoowa halchuwaara maayettiyaabaa oottana danddayiyo darobay deꞌees. ‘Asay dosidi, ba huuphiyaa aattidi immido gishshawu Yihoowa galatite!’ Baaraaqinne Deboora asa sabbiiddi gidennan, Ubbaappe Xoqqa Xoossaa sabbiiddi hegaadan giidi bantta xoonuwaa yettaa yexxiyoogaa doommidosona. (Daan. 5:1, 2) Ha wodiyankka hegaadan, neeni dosada oottiyoogee hegan goꞌettiya ubbay ‘Yihoowa galatanaadan’ denttettana mala amottoos. w17.04 32 ¶17-18

Yooseefi 13 layttan ubban bana gakkida waayiyaa dogana xayikkonne, hegan lanccibeenna. (Doo. 45:5-8) Ubbaappe aaruwan, i haratu balaanne iita oosuwaa gaasuwan Yihoowaappe duuxxibeenna. Yooseefi Yihoowawu ammanettidoogee, Yihooway i naaqettidobaa suurissanawunne anne a so asaa anjjanawu oottidobaa beꞌanaadan oottiis. Nuunikka hegaadan Yihoowaara medhido dabbotaa nashshananne naagana bessees. Nu ishanttu balay nuuni siiqiyoonne awu goynniyo Xoossaappe nuna shaakkanaadan mule eeno gaana koshshenna. (Roo. 8:38, 39) SHin nu mala Kiristtaanee nuna naaqqikko, Yooseefadan yohuwaa Yihoowaagaadan xeellanawu baaxetiiddi, kaseegaappe aaruwan Yihoowaakko shiiqiyaageeta gidoos. Nuuni Geeshsha Maxaafaa maaraadan hanotaa giigissanawu nuuyyo danddayettida ubbabaa oottidi, Yihooway ba koyiyo wodiyaaninne ogiyan hegaa giigissanaagaa ammanettidi ayyo aattidi immana koshshees. w17.04 20 ¶12; 22 ¶15-16

Haanna Xoossawu shiiqettidobaa polaasu. A hegaa polennan agganawu mule qoppabeykku. A Sameela ekkada Seelon gayttiyo dunkkaaniyan Qeese Ubbatu Halaqa gidida Eelakko efaada, hagaadan gaasu: “Taani ha na7aa yelanau woossin, GODAI taani a woossidobaa immiis. Hegaa gishshau, taani GODAAYYO a immaas; i ba de7o laitta ubban GODAAYYO imettiis.” (1 Sam. 1:24-28) Yan “na7ai Sameeli GODAA sinttan dicciis.” (1 Sam. 2:21) Haanna hegaadan oottanawu ay keena metootadeeshsha? A ba guutta naꞌaa keehi siiqawusu; shin a galla galla aara gayttana danddayukku. A ba naꞌaa qoommanawu, aara kaaꞌanawunne ayyo koshshiyaabaa kunttanawu ay keena amottidaakko qoppa; a ba naꞌay dicciyo wode beꞌanawu laamotiyoogee erettidaagaa. Gidikkokka, Haanna Xoossawu shiiqettidoban zilꞌꞌettada hegaa polennan aggabeykku. I wozanay Yihoowan ufayttiis.—1 Sam. 2:1, 2; Maz. 61:1, 5, 8. w17.04 5 ¶7-8

Ha wodee ‘wayssiya wode’ gidanaagaa kaseti odi simmidi, kiitettida PHawuloosi, ‘Iita asatinne balettiyaageeti kaseppe iiti iiti baanaagaa’ yootiis. (2 Xim. 3:2-5, 13) He hiraagay polettishin beꞌabeykkii? Wolqqan gamiya asata, nu zariyaa coo ixxiyaageeta, danobaa oottiyaageeta gujjin, iita asati nuuppe darota qohidosona. Hegeetuppe amaridaageeti qoncciyan iitabaa oottiyaageeta; harati qassi coo geeshsha milatidi iita oosuwaa oottiyaageeta. Hegaa mala iita asati nuna qohanawu qoppennan aggana danddayoosona; shin eti oottiyoobay nunakka qohiyaaba. Eti oottiyo daganttiyaabaa eriyo wode, nu wozanay azzanees. Iitati naata, cima asatanne miyyee baynna harata gamiyoogee nuna daganttees. Iita asati asadan gidennan doꞌadaaninne dayddanttatudan hanoosona. (Yaaq. 3:15) SHin Yihoowa Qaalay mishiraachuwan hegaa mala iita oduwaa eqettees. w17.04 10 ¶4