Ichchashe
Arbba, Ichchashe 1
Intte biidi, asa ubbaa tana kaalliyaageeta oottite.—Maa. 28:19.
Xoossawu ammanettidi oottiya ashkkarati ubbay banttassi imettida he oosuwaa waatidi loytti oottidi ‘polanaakko’ tamaaranawu koyoosona. (2 Xim. 4:5) Qassi, ha oosoy keehi koshshiyaabaanne, hara ay oosoppenne eesuwan oosettana koshshees. Gidoppe attin, nuuni haggaazuwaa dosikkonne danddayettida keenan daro saatiyaa oottanaagee metiyaaba gidana danddayees. Nu wodiyaanne wolqqaa goꞌettana bessiyo, keehi koshshiya hara oosoti deꞌoosona. Nuuyyoonne nu soo asawu koshshiyaabaa kunttanawu galla galla daro saatiyawu oottiyaageeta gidana danddayoos. Nuuni so asaa aawatettaara, sahuwaara, unꞌꞌissiyaabaara, woy cimatettaa gaasuwan gakkiya metuwaara baaxetiiddi deꞌennan aggokko. Nu hanotay nuuni koyiyoogaa keenaa Yihoowawu haggaazennaadan diggikko, hidootaa qanxxana koshshenna. Kawotettaa ayfiyaa nuuni ubbay issi malaa ayfana danddayennaagaa Yesuusi erees. (Maa. 13:23) Nuuni Yihoowayyo haggaazanawu nuuyyo danddayettidabaa oottiyo ubbabaa I keehi nashshees.—Ibr. 6:10-12. w19.04 2 ¶1-3
Qeeraa, Ichchashe 2
[Daabiloosi] worddanchchanne qassi wordduwaukka aawa.—Yoh. 8:44.
Hayqqidaageeta xeelliyaagan Seexaanay yootiyo worddoti Yihoowa sunttay moorettanaadan oottoosona. He worddotuppe issoy hayqqida uri siꞌooliyaa taman xuugettiiddi waayettees giyo timirttiyaa. He timirtteti Xoossaa sunttay moorettanaadan oottoosona! Waatidi? He timirtteti siiqo Xoossawu Dabloosaagaa mala eeshshay deꞌees giidi asay qoppanaadan oottoosona. (1 Yoh. 4:8) Hegee neeyyo aybi siyettanaadan oottii? Ubbaappe aaruwan, Yihoowayyo aybi siyettanaadan oottii? I iitaba ubbaa ixxees. (Erm. 19:5) Hayquwaa xeelliyaagan Seexaanay odiyo worddoti Kiristtoosa wozuwaa yarshshuwaa asay xaasayanaadan oottoosona. (Maa. 20:28) Seexaanay yootiyo hara worddoy asawu hayqqenna shemppoy deꞌees giyoogaa. Hegee tuma gidiyaakko, asay ubbay merinawu deꞌana shin. Yaaniyaakko, nuuni merinaa deꞌuwaa demmana mala, Kiristtoosi ba deꞌuwaa nuussi wozo yarshsho oottidi immana koshshenna. Kiristtoosa yarshshoy asayyo bessido siiqo ubbaappe aadhdhiya siiquwaa bessiyaaba gidiyoogaa hassaya. (Yoh. 3:16; 15:13) He alꞌꞌo imotaa xaasayiya timirtteta xeelliyaagan Yihoowassinne A Naꞌaassi aybi siyettiyaakko qoppa! w19.04 14 ¶1; 16 ¶8-9
Woggaa, Ichchashe 3
“Godaa wozanaa eriyai oonee? A zoranau danddayiyai oonee?” . . . SHin nuussi Kiristtoosa wozanai de7ees.—1 Qor. 2:16.
Yesuusi tamaarissidobati awan xaafettidonaa? Yesuusi haasayidobaynne saꞌan deꞌiyo wode oottido darobay oyddu Wonggeletun xaafettiis. Giriikettuwan Xaafettida Geeshsha Maxaafaappe attida harata xaafida attuma asata geeshsha ayyaanay kaalettido gishshawunne etawu ‘Kiristtoosa wozanay’ woy qofay deꞌiyo gishshawu, Yesuusi issibaa qoppiyo ogiyaa nuuni akeekanaadan he maxaafati maaddoosona. Yesuusi tamaarissidobay deꞌuwan ubbabawu maaddees. Hegaa gishshawu, ‘Kiristtoosa higgee’ nuuni son, ooso sohuwan woy timirtte keettaaninne gubaaꞌiyan oottiyo ubbabaara gayttidaba. (Gal. 6:2) Nuuni Giriikettuwan Xaafettida Geeshsha Maxaafaa nabbabiyoogaaninne hegaa wotti dentti qoppiyoogan ha higgiyaa tamaaroos. Nuuni geeshsha ayyaanay kaalettin xaafettida Geeshsha Maxaafaa kifiletun deꞌiya he kaaletuwaara, azazuwaaranne maaraara maayiya ogiyan deꞌiyoogan he higgiyawu azazettoos. Nuuni Kiristtoosa higgiyaassi azazettiyo wode, Yesuusi tamaarissido ubbabawu Pultto gidida, nuna siiqiya Xoossaa Yihoowayyo azazettoos.—Yoh. 8:28. w19.05 3 ¶6-7
Saynno, Ichchashe 4
Iita asatinne balettiyaageeti . . . kaseppe iiti iiti boosona.—2 Xim. 3:13.
Seexaanaa halchchoy tumukka iita; qassi asay Dabloosa ufayssiya ogiyan oottiyoogee azzanttiyaaba. SHin, Yihooway Seexaanaappe woy Seexaanay koyiyoobaa oottiyaageetuppe keehi wolqqaama. Yihooway nuuni waayettiyo waayiyaa loytti akeekiyoogaanne nuussi koshshiyaagaadan nuna minttettana danddayiyoogaa ammanettana danddayoos. ‘Xoossay nuna nu huuphen minttettido minttettuwaadan, daro waayiyaa waayettiyaageeta nuunikka minttettanaadan, nu waaye ubban nuna minttettiya, minttetto ubbaa Xoossawu’ haggaaziyoogan nuuni anjjettida. (2 Qor. 1:3, 4) Yelidaageeti aggi bayidoogeetussi woy etaara meezetiyaageeti qohidoogeetussi minttettoy keehi koshshana danddayees. Yihooway nuna muletoo minttettanaagaa nuuni ammanettana danddayiyoogaa Kawuwaa Daawiti erees. (Maz. 27:10) Eta soo asay maara oyqqennaageetuyyo Yihooway Aawa gidanaagaa Daawiti ammanettees. Yihooway baayyo ammanettidi oottiyaageeta goꞌettees. Gubaaꞌiyan deꞌiya nu ishanttinne michchontti nuuyyo so asa mala. Leemisuwawu, Yesuusi banaara Yihoowayyo goynniyaageeti baassi ishantta, michchonttanne aayo gidiyoogaa yootiis.—Maa. 12:48-50. w19.05 15-16 ¶8-9
Masqqaynno, Ichchashe 5
Keehi koshshiyaabaa shaakki erite.—Pili. 1:10, NW.
Nuuni sinttayidi xannaꞌana koshshiyaabay aybee? Nuuni ubba galla Xoossaa Qaalaa xannaꞌanawu wodiyaa bazzana koshshiyoogee qoncce. Nuuni nabbabidobaa wotti dentti qoppanaadaaninne loytti pilgganaadan gubaaꞌiyan saaminttaa Geeshsha Maxaafaa nibaabiyawu giigidabay haꞌꞌi kaseegaappe guutta. Nu halchchoy he saaminttawu immettida xiqiseta nabbabiyoogaa xalla gidennan, hegee nuna denttettin nuuni kaseegaappe aaruwan Yihoowakko shiiqanaagaa gidana bessees. (Maz. 19:14.) Nuuni gubaaꞌe shiiquwan Wochiyo Keelaa xannaꞌiyoogee Geeshsha Maxaafaa akeekanaadan nuna maaddees. Yaatiyo gishshawu, xiqiseta, ubba qassi he huuphe yohoy gubaaꞌiyan xannaꞌettiyo wode nabbabettana xiqiseta loytta akeeka. Xiqisetun deꞌiya qaalay woy qofay menttuwan deꞌiya waanna qofaa waati qonccissiyaakko loytta qoppa. Qassi neeni nabbabiyo wode, xiqisetu qofaa, qassi ne deꞌuwan eta waata oosuwan peeshshana danddayiyaakko takki gaada loytta qoppa.—Yaas. 1:8. w19.05 27 ¶5; 28 ¶9
Oruwaa, Ichchashe 6
Ta qumai tana kiittidaagee koyiyoobaa oottanaagaanne a oosuwaa polanaagaa.—Yoh. 4:34.
Yesuusi ba haggaazuwaa xeelliyo ogiyan nuussi daro loꞌꞌo leemiso. Xoossaa Kawotettaabaa yootiyoogee I ba deꞌuwan aybippenne aaruwan xoqqu oottidi xeelliyooba. I danddayido keenan daro asawu sabbakanawu xeetan qoodettiya kilo meetiriyaa tohuwan hemettiis. I asawu eta son woy hara sohuwan yootiyo ogiyaa ubbatoo koyees. Yesuusi ba deꞌo ubban haggaazuwaa kaseyiis. Nuuni danddayettiyo ay wodekka, qassi awankka asawu mishiraachchuwaa yootiyo oge koyiyoogan, Kiristtoosa leemisuwaa kaallana danddayoos. Nuuni sabbakanawu, nuna ufayssiyaabaa nu dosan aggi bayoos. (Mar. 6:31-34; 1 PHe. 2:21) Gubaaꞌiyan issoti issoti dumma aqinye, ubba wode aqinye, woy kaafiya aqinye gididi oottoosona. Harati qassi hara qaalaa tamaaridosona woy sabbakiyaageeti keehi koshshiyo heeraa biidosona. Gidoppe attin, banttawu danddayettida ubbabaa oottiya ubba wode Kawotettabaa aassiyaageeti sabbakiyo oosuwaappe dariya baggaa oottoosona. Nuuni haggaazana danddayiyoy daro gidin woy guutta gidin, nuuni oottana danddayiyoogaappe aaruwaa Yihooway nuuppe koyenna. w19.04 4 ¶7-8
Hamuusa, Ichchashe 7
Abeet [Yihoowa,] . . . ta doonaappe kiyiya qaalainne ta wozanaa qofai nena ufaissiyaabaa gido.—Maz. 19:14.
Nena hagaadan oychcha: ‘Taani wozanan guuttaakkonne qanaatiyaanaa?’ (1 PHe. 2:1) ‘Ta wogaa, taani tamaaridobaa, woy taayyo deꞌiya aquwaa gaasuwan taani guuttaa otorettiyaanaa?’ (Lee. 16:5) ‘Taayyo deꞌiyaagaa malabay baynnaageeta woy zariyan taappe dummatiyaageeta taani kariyaanaa?’ (Yaaq. 2:2-4) ‘Seexaanaa alamee shiishshiyoobaa taani dosiyaanaa?’ (1 Yoh. 2:15-17) ‘Taani pokkobaaninne danoban allaxxiyoogan ufayttiyaanaa?’ (Maz. 97:10; 101:3; Amo. 5:15) Neeni ha oyshata zaariyo wode, ne laamettana koshshiyaabaa akeekana danddayaasa. Nu akeekin akeekana xayin, nuuni nu laggeta loytti kaalloos. (Lee. 13:20) Ooso sohuwan woy timirtte keettan, Xoossay koyiyoogaadan qoppana mala nuna maaddennaageetuura nuuni gayttana danddayoos. Gidoppe attin, Kiristtaane shiiqotun nuuni loꞌꞌo laggeta demmana danddayoos. SHiiqoti nuna ‘siiquwawunne loꞌꞌo oosuwawu’ denttettana danddayoosona.—Ibr. 10:24, 25. w19.06 12 ¶13-14
Arbba, Ichchashe 8
Moorida urau atto giyoogeekka bonchchissees.—Lee. 19:11.
Nuna ubbaa ha wodiyan gakkiya metotinne unꞌꞌissiyaabati Yihooway halchchidobaa gidennaagaa hassaya. Hegaa gishshawu, Yihoowassi ammanettidi oottiya issi uri unꞌꞌissiyaabay gakkiyo wode yuushshi qoppennan haasayiyoogee erettidaba. (Iyy. 6:2, 3) I Yihoowabaa woy nubaa likke gidennabaa haasayikkonne, nuuni eesuwan A bolli hanqqettana woy I darobaa haasayido gishshawu pirddana koshshenna. Qassi unꞌꞌissiya metuwaa gencciiddi deꞌiya urassi amarida zoree woy maaddiya seeray issi issitoo koshshees. (Gal. 6:1) Cimati hegaa waatidi oottana danddayiyoonaa? Eti Iyyoobi yootiyoobaa keehi qarettidi ezggida Eelihu leemisuwaa kaallana koshshees. (Iyy. 33:6, 7) Eelihu Iyyooba qofaa akeeki simmidi A zoriis. Eelihu leemisuwaa kaalliya cimati loytti ezgganawunne he ura hanotaa akeekanawu baaxetoosona. Yaatidi, eti zoriyo wode, eti yootiyoobaa siyiyaagaa wozanaa kaseegaappe aaruwan denttettana danddayoosona. w19.06 22-23 ¶10-11
Qeeraa, Ichchashe 9
Nuuni asau azazettanaappe Xoossau azazettanau bessees.—Oos. 5:29.
Yedetay deꞌishinkka neeni waatada Yihoowayyo aggennan goynnana danddayay? Ayyaanaabaa qumaa waatidi demmanaakko, shiiqota waatidi shiiqanaakkonne waatidi mishiraachchuwaa sabbakanaakko macara biiroy gubaaꞌe cimatussi kaaletuwaanne maaddiya zoriyaa immana. Macara biiroy cimatuura gayttana danddayennaba gidikko, cimati neeninne gubaaꞌiyan deꞌiya ubbati aggennan Yihoowassi goynnanaadan maaddana. Eti Geeshsha Maxaafaaninne nu xuufetun deꞌiya kaaletuwaara maayettiya azazuwaa nuuyyo immana. (Maa. 28:19, 20; Oos. 5:29; Ibr. 10:24, 25) Yihooway ba ashkkarati bantta ammanuwaa minttidi deꞌanawu koshshiyaabaa immanawu qaalaa geliis. (Isi. 65:13, 14; Luq. 12:42-44) Hegaa gishshawu, A dirijjitee neeni ammanettada deꞌanawu koshshiya ubbabaa immanaagaa ammanettana danddayaasa. Neeni ay oottana danddayay? Nu oosoy muleera teqettikko, ne Geeshsha Maxaafaanne hara xuufeta qottanawu loꞌꞌo sohuwaa koya. Alꞌꞌo xuufeta eesuwaara asi demmana danddayiyo sohuwan wottennaadan naagetta; hegeeti attamettidaageeta woy elektiroonike miishshan deꞌiyaageeta gidana danddayoosona. Nuuni ubbay ammanuwan minnidi deꞌanawu maaddana danddayiyaabaa oottana bessees. w19.07 10 ¶10-11
Woggaa, Ichchashe 10
Taani ai ogiyaaninne amarida asata ashshanau, ubba asatuura ubbaban eta mala gidaas.—1 Qor. 9:22.
Daro shaꞌu layttawu, alamiyaa asaappe dariya baggay haymaanootiyaa kaallees. SHin mata layttatuppe haa simmin, gita laame laamettiis. Haymaanootee baynna asaa qooday dari dari bees. Issi issi biittaa asaappe dariya baggay bawu haymaanootee baynnaagaa yootees. (Maa. 24:12) Aybissi? Issoti issoti banttana ufayssiyaabaa woy bantta metuwaa xallaa qoppana danddayoosona. (Luq. 8:14) Amaridaageeti Xoossi baawa giyaageeta. Harati qassi Xoossan ammanoosona, shin haymaanootee ha wodiyan maaddiyaaba gidenna, qassi saynisiyaaranne asay qoppiyoobaara maayenna giidi qoppoosona. Eti deꞌoy lodda laamiyan yiis giyoogaa laggetuppe, asttamaaretuppe woy televizhiine malabatuppe siyennan aggokkona; shin Xoossaa ammananaadan maaddiya loꞌꞌo qofaa eti darin siyibookkona. Harati qassi miishshanne maata demmanawu yaaretiya, haymaanootiyaa kaalettiyaageeta shenetoosona. Issi issi biittatun, haymaanootiyaa oosuwaa amaridaagaa diggiya higgiyaa kawotettati kessidosona. w19.07 20 ¶1-2
Saynno, Ichchashe 11
Hegaa gishshau, qaaxxennan minnidi eqqite. Intte daafurai Godaa baggaara mela gidennaagaa eridi, ubba wode Godaa oosuwaa azallennan oottite.—1 Qor. 15:58.
Neeni kaseegaappe aaruwan Yihoowa ammananawunne minnada ayyo haggaazanawu asatettan keehi mino gidana koshshenna. Asatettan darin mino gidennaageeti haꞌꞌikka Yihoowawu immanawu banttawu danddayettida ubbabaa oottanawu koyoosona. (2 Qor. 4:16) Neeni Yihoowawu daro layttawu haggaazennan aggakka, qassi neeni haꞌꞌi sahettiyoogee kaseegaadan oottennaadan diggana danddayees. Yaatikko, azzanoppa. Neeni kase ammanettada haggaazidoogaa Yihooway hassayiyoogaanne nashshiyoogaa ammanettana danddayaasa. (Ibr. 6:10) Hegaa bollikka, nuuni Yihoowa wozanappe siiqiyoogaa bessiyaabay ayyo daro oottiyoogaa gidennaagaa hassaya. Nuuni loꞌꞌobaa qoppiyo wodenne nuussi danddayettida ubbabaa oottiyo wode, Yihoowa wozanappe siiqiyoogaa bessoos. (Qol. 3:23) Nuussi danddayettennabaa Yihooway akeekees, qassi nuuyyo danddayettiyaagaappe aaruwaa oottanaadan koyenna.—Mar. 12:43, 44. w19.08 3 ¶6; 5 ¶11-12
Masqqaynno, Ichchashe 12
Asi intte oottiyo lo77o oosuwaa [beꞌana] . . . mala, intte poo7oi asa sinttan poo7o.—Maa. 5:16.
Yihooway ba asay oottiyo “lo77o oosuwaa” goꞌettidi asaa baakko shiishshees. (Maa. 5:14, 15; 1 PHe. 2:12) Ne aqo laggee Yihoowa Markka gidana xayikkonne, I ne gubaaꞌiyaa asaara gayttii? Gubaaꞌiyaa shiiqota nenaara baanaadan ne laggiyaa shoobba. (1 Qor. 14:24, 25) Nu dabboti ubbay nunaara Yihoowawu oottanaadan koyoos. SHin, nu dabboti Xoossawu haggaazanaadan nuuni ay keena baaxetikkonne, eti tumaa siyennan ixxana danddayoosona. Eti hegaadan kuuyikko, nuuni hegee nu mooruwaana giidi qoppana koshshenna. Nu ammaniyoogaadan ammananaadan oonanne giddana danddayokko. SHin, neeni Yihoowawu haggaaziyo gishshawu ay keena ufayttiyaakko ne dabboti beꞌiyoogee eta keehi maaddana danddayees. Etawu woossa. Eta hiillan haasayissa. Eta maaddanawu baaxetiyoogaa aggoppa. (Oos. 20:20, 21) Yihooway ne baaxiyaa anjjanaagaa ammanetta. Qassi ne dabboti neeni yootiyoobaa siyanawu kuuyikko, eti attana! w19.08 18-19 ¶15-17
Oruwaa, Ichchashe 13
Bollaa xomppee aifiyaa; hegaa gishshau, ne aifee payya gidikko, ne bolla ubbai poo7o gidana.—Maa. 6:22.
Yesuusi woyganawu koyidee? I nuuni nu qofay shaahettennan woy wora simmennan issi halchchuwan xeelaa wottana koshshiyoogaa yootiis. Ba haggaazuwan xeelaa wottiyoogan Yesuusi leemiso gidees; qassi I erissiyo ashkkaratikka Yihoowayyo haggaaziyoogaaninne A Kawotettan bantta xeelaa wottanaadan tamaarissiis. Nu deꞌuwan sabbakiyo oosuwan xeelaa wottiyoogan ‘kasetidi, Xoossaa Kawotettaanne A xillotettaa koyiyoogan’ Yesuusa leemisuwaa kaalloos. (Maa. 6:33) Nuuni haggaazuwaa harabaappe aattidi xeelliyo ogiyaappe issoy daro wodiyaa bazzidi asay Yihoowa eranaadaaninne siiqanaadan maaddana mala, keehi koshshennabawu guutta wodiyaa bazziyoogaa. Leemisuwawu, saaminttaa giddon daro wodiyaa haggaazanawu hara oosuwaa saatiyaa giigissana danddayiyoo? Daro wodiyaa wurssiya allaxxiyoobatuppe amaridaageeta poxxana danddayiyoo? w19.04 5-6 ¶12-13
Hamuusa, Ichchashe 14
Taani xoqqu giidanne geeshsha sohuwan de7ais; gidikkonne, bantta oottido nagarau azzanidi simmiyaageetuuranne banttana ziqqi oottiyaageetuura de7ais.—Isi. 57:15.
Mata wodeppe haa simmin, Yihoowayyo daro layttaa haggaazida daro ishanttussinne michchonttussi hara oosoy imettiis. He laamettidabaa meezetanawu daro ishanttussinne michchonttussi keehi deexxiis. Eti he haggaazuwaa dosoosona; etappe daroti daro layttawu hegaa oottidosona. Issoti issoti keehi azzaniiddi ooratta hanotaa meezetidosona. Gidoppe attin, eti laamettidabaa guyyeppe meezetidosona. Aybissi? Eta maaddida waannabay eti Yihoowa siiqiyoogaa. Eti oosuwawu, maatawu woy aawatettawu gidennan, banttana Xoossawu sheedhdhidoogaa eroosona. (Qol. 3:23) Eti banttana ziqqi oottidi ayba ogiyankka Yihoowayyo ubbatoo haggaaziyoogan ufayttoosona. I etawu qoppiyoogaa eriyo gishshawu, eti ‘banttana hirggissiya ubbabaa A bolli olidosona.’ (1 PHe. 5:6, 7) Nuna ziqqi oottiyo eeshshay nuussi deꞌanaadan oottikko, harati nunaara takkanawu ufayttoosona; qassi nuuyyookka goꞌettoos, haratakka goꞌꞌoos. Nuuni deꞌuwan gakkiya metuwaa genccana danddayoos. Ubbaappe aaruwan, saluwan deꞌiya nu Aawaakko shiiqoos. w19.09 6-7 ¶15-17
Arbba, Ichchashe 15
GODAA wogai likke; wozanaa ufaissees. . . . ne higgiyaa naagiyoogan taani daro go7ettais.—Maz. 19:8, 11.
Daawiti ba soo asaa xallawu gidennan, kumetta Israaꞌeelawu huuphe gidanaadan Yihooway sunttiis. Daawiti kawo gidiyo gishshawu awu daro maatay deꞌees. Issi issitoo, I ba maataa bessenna ogiyan goꞌettiis; qassi gita nagara oottiis. (2 Sam. 11:14, 15) SHin, I seeraa ekkiyoogan Yihoowawu haarettiyoogaa bessiis. I woossiyo wode, bawu siyettiyaaba ubbaa Yihoowawu yootiis. Qassi Yihoowa zoriyaa azazettanawu bawu danddayettida ubbabaa oottanawu baaxetiis. (Maz. 51:1-4) Attuma asaa xallaappe gidennan, macca asaappekka zoriyaa siyiyoogankka I bana ziqqi oottiis. (1 Sam. 19:11, 12; 25:32, 33) Daawiti ba mooruwaappe tamaariis; qassi ba deꞌuwan Yihoowawu haggaaziyoogaa aybippenne aadhdhiyaabadan xeelliis. Yihoowawu haarettiyoogee keehi loꞌꞌo gidiyoogaa I eriis. Ha wodiyan, Yihoowayyo haarettiyaageetu giddooninne I siiquwan zoriyoogaa ixxiyaageetu giddon deꞌiya dummatettaa akeekana danddayoos. Yihoowawu haarettiyaageeti “wozanan ufaittidi yexxana.”—Isi. 65:13, 14. w19.09 17 ¶15; 19 ¶21
Qeeraa, Ichchashe 16
Ooninne qoodanau danddayenna zawai bainna daro asaa taani be7aas. He asai . . . kawotaa araataa sinttaaninne Dorssaa sinttan eqqiis.—Ajj. 7:9.
Yihoowa Markkati zaway baynna daro asay “kawotaa araataa sinttaaninne Dorssaa sinttan” saluwan eqqana bessennaagaa 1935n akeekidosona. Eti hegaadan oottiyoy leemiso hanotaana. Zaway baynna daro asay saꞌan deꞌikkonne, eti Yihoowa maataa akeekiyoogaaninne I ubbabaa haariyo maatawu haarettiyoogan ‘kawotaa araataa sinttan eqqana.’ (Isi. 66:1) Eti Yesuusa wozuwaa yarshshuwan ammaniyoogaa oosuwan bessiyoogan “Dorssaa sinttan” eqqana danddayoosona. Hegaadan, Maatiyoosa 25:31, 32y iitata gujjin, “sa7an de7iya asai ubbai” ba bonchcho kawotaa araatan uttida Yesuusa “sintti shiiqana” yaagees. He asa ubbay deꞌiyoy saꞌaanappe attin, saluwaana gidennaagee qoncce. Laamettida ha qofay bessiyaaba. Geeshsha Maxaafay zaway baynna daro asay saluwaa baana geennay aybissakko hegee qonccissees. Yesuusaara ‘saꞌaa haarana’ 144,000tu xallay saluwan merinaa deꞌuwaa demmanaagee kasetidi odettiis.—Ajj. 5:10. w19.09 28 ¶9
Woggaa, Ichchashe 17
Yihoowawu ammanettiyaageetoo, A siiqite!—Maz. 31:23, NW.
Yihoowawu goynniyaageeti worddo haymaanootiyaa yame gidanaadan Yihooway koyenna. SHin, hegaa xallay gidenna. Nuuni Yihoowawu haggaazanawu murttana bessees. Hegaadan oottana danddayiyo naaꞌꞌu ogeta ane beꞌoos. Koyruwan, nuuni Yihooway kandduwawu kessido xillotettaa maaraa ubbatoo mintti kaallana bessees. Ha alamee oottiyo pokkobaa nuuni mule maayettana koshshenna. Leemisuwawu, attuma asay attuma asaaranne macca asay macca asaara aqo oyqqiyoogaanne mattumaa gayttiyoogaa gujjin, pokkoba gidida aybanne nuuni maayettana bessenna. (Maa. 19:4, 5; Roo. 1:26, 27) Naaꞌꞌanttuwan, nuuni nu mala Kiristtaanetuura ubbatoo goynnana koshshees. Nu SHiiquwaa Addaraashan gidin woy koshshiyaaba gidikko, Yihoowa Markkatu keettan gidin woy ubba qassi qosan gidin, awankka shiiqoos. Aybi merettikkonne, nuuni shiiquwaa biyoogaa aggana koshshenna. “Gallassai matattiyoogaa [nu] be7iyo gishshau” nuuni issippe shiiqana koshshees.—Ibr. 10:24, 25. w19.10 16 ¶6-7
Saynno, Ichchashe 18
[Yihooway] A xallawu goynnanaadan koyiya Xoossaa.—Kes. 34:14, NW.
Yihooway nuuni deꞌuwan ufayttanaadan koyees; qassi wodiyaa aattiyoobay nuuni ufayttanaadan maaddana danddayees. Xoossaa Qaalay, “Asassi go77a gidiyaabi aibee giikko, asi ba daafuridobaappe miidinne uyidi ufaittiyoogaa” yaagees. (Era. 2:24) SHin, alamiyan deꞌiya, wodiyaa aattiyoobaappe dariya baggay nuna qohana danddayees. Hegee Xoossaa Qaalan digettidabaa daro asay kaallanaadan woy siiqanaadan oottana danddayees. Nuuni Yihoowa xallawu goynnana koyiyo gishshawu, ‘A masoofiyaappenne xalahetu masoofiyaappe’ maana danddayokko. (1 Qor. 10:21, 22) Issi uraara qumaa miyoogee darotoo laggetettaa bessiyaaba. Nuna danobawu, iita ayyaana oosuwawu, pokkobawu, woy hara iita koshshawu denttettiya, wodiyaa aattiyoobaa nuuni doorikko, Xoossaa morkketi giigissido qumaa moos giyoogaa mala. Hegaappe denddidaagan, nuuni nuna qohiyoogaa xalla gidennan, Yihoowaara dabbotido dabbotaykka moorettanaadan oottoos. w19.10 26 ¶2; 29-30 ¶11-12
Masqqaynno, Ichchashe 19
Geeshsha asati Geeshsha Ayyaanai kaalettin . . . [haasayidosona].—2 PHe. 1:21.
Markkabiyaa laaggiyaagee carkkoy bana maaddanaadan koyikko, I naaꞌꞌubaa oottana bessees. Koyro, I ba markkabiyaa carkkoy carkkiyo ginan essana koshshees. Qassi laaggiyaagee ba markkabiyaa carkkoy carkkiyo sohuwaappe haahuwan essidi aggiigikko, A markkabee sinttawu beenna. Naaꞌꞌantto, I ba sharata baassi danddayettida keenan aassi birshshidi xoqqu oottana koshshees. Carkkoy carkkishinkka, sharatun carkkoy kumana xayikko A markkabee sinttawu beenna. Hegaadan, nuuni Yihoowawu aggennan haggaazana danddayiyoy, geeshsha ayyaanaa maaduwaa demmiyoogaa xallaana. He ayyaanaappe goꞌettanawu, nuuni naaꞌꞌubaa oottana bessees. Koyro, Xoossaa ayyaanay A ashkkarati oottanaadan kaalettiyoobaa nuuni oottana bessees. Naaꞌꞌantto, he oosota nuussi danddayettida keenan loytti oottana bessees. (Maz. 119:32) Wolqqaama yedetaanne waayiyaa ammanettidi genccanaadan geeshsha ayyaanay nuna maddana. w19.11 9 ¶8; 10 ¶11
Oruwaa, Ichchashe 20
Ta sarotettaa intteyyo immais.—Yoh. 14:27.
Yesuusi asa gididi saꞌan deꞌido wurssetta gallassi keehi waayettiis. I takkennan, nagaranchchatu kushiyan meqetti baynna hayquwaa hayqqana. SHin, Yesuusi hirggidoy I guutta wodiyaappe guyyiyan hayqqiyo gishsha xallaassa gidenna. I ba Aawaa keehi siiqeesinne A ufayssanawu koyees. Yesuusi bana he waayee gakkishin ammanettidi kanttikko, Yihoowa sunttay geeyanaadan oottanaagaa erees. Yesuusi asaakka siiqees; qassi I hayqqana gakkanawu ammanetti deꞌiyoogaa xallan, nuuni merinaa deꞌuwaa hidootan naagana danddayiyoogaa erees. Yesuusi keehi unꞌꞌettikkokka, I sarotettan deꞌiis. Issi urawu Yihoowaara dabbotido alꞌꞌo dabbotay woppu gaanaadan oottiya ‘Xoossaa sarotettaa’ demissees. He sarotettay Yesuusi unꞌꞌettennaadan maaddiis. (Pili. 4:6, 7) Nuna ubbaa Yesuusi genccido metuwaa malay gakkibeenna; shin Yesuusa kaalliyaageeta ubbaa paacee gakkana. (Maa. 16:24, 25; Yoh. 15:20) Yesuusaagaadan, issi issitoo nuuni waayettana danddayoos. w19.04 8 ¶1-3
Hamuusa, Ichchashe 21
Ayyaanaa taamaa toyssoppite.—1 Tas. 5:19, NW.
Nuna hagaadan oychchana danddayoos: ‘Taani Yihoowa dirijjitiyaa bagga gidiyoogaa nashshiyaanaa?’ Yihooway ha wodiyan ba asaa anjjiiddi deꞌiyoogaa bessiya qoncce naqaashaa nuussi immiis. Nuuni galatanaadan oottiya darobay deꞌees. (1 Tas. 5:18) Yihooway goꞌettiiddi deꞌiyo dirijjitiyaa nuuni waati maaddana danddayiyoo? Nu xuufetun, gubaaꞌe, woradaanne killiliyaa shiiqotun nuuni Geeshsha Maxaafaappe tamaariyoobaa oosuwan peeshshiyoogan hegaadan maaddoos. Hegaa bolli qassi, sabbakanawunne tamaarissanawu nuussi danddayettida ubbabaa oottiyoogan maaddiyoogaa bessana danddayoos. (1 Qor. 15:58) Nu yarshshuwaa Yihooway ekkanaadan nuuni koyoos. Nuuni Yihoowa galatanawu ayyo haggaazoos. Nu kumetta wozanaappe Yihoowa siiqiyo gishshawu nuussi deꞌiya keehi loꞌꞌobaa ayyo ubbatoo immoos. Qassi ha wodiyan I goꞌettiiddi deꞌiyo dirijjitiyaa maaddanawu nuuyyo danddayettida ubbabaa oottoos. Hageeta oottiyoogan, Yihoowa Markkata gididi awu haggaaziyo maataa xoqqu ootti xeelliyoogaa bessoos! w19.11 25 ¶17-18
Arbba, Ichchashe 22
Tana ammaniya urai . . . hagaappe aadhdhiya oosuwaa oottana.—Yoh. 14:12.
Yesuusi I oottidoogaadan nuuni maalaaliyaabaa oottana danddayiyoogaa yootibeenna. SHin A kaalliyaageeti I oottido sohuwaappe daro sohuwan, daro asawu qassi daro wodiyawu sabbakanaagaanne tamaarissanaagaa yootiis. Neeyyo oosoy deꞌikko, nena hagaadan oychcha: ‘Taani ta ooso sohuwan mino oosanchcha gidiyoogan erettiyaanaa? Ta oosuwaa koshshiyo wodiyan wurssiyaanaa, qassi loyttada oottiyaanaa?’ Neeni ee gaada zaarikko, nena ootissiyaagee nenan ammanettana danddayees. Ne ooso sohuwan deꞌiya asay mishiraachchuwaa siyanawu kaseegaappe aaruwan koyana danddayees. Ne sabbakiyoonne tamaarissiyo ogiyaa xeelliyaagan nena hagaadan oychcha: ‘Taani haggaazuwan minnada oottiyoogan erettiyaanaa? Koyro haasayissanawu loytta giigettiyaanaa? Eranawu koyiya asaa eesuwaara zaaretta oychchiyaanaa? Qassi dumma dumma ogetun ubbatoo haggaaziyaanaa?’ Neeni ee gaada zaarikko, haggaazuwan neeni ufayssaa demmana. w19.12 5 ¶14-15
Qeeraa, Ichchashe 23
Intte huuphiyan huuphiyan intte maccaasaa intte huuphedan siiqanau bessees; maccaasa ubbaikka bantta azinaa azinaa bonchchanau bessees.—Efi. 5:33.
Naata yelanawu kuuyiya azinaynne machchiyaa keehi koshshiya naaꞌꞌubata haasayana koshshees: Koyroogee, eti naata yelana koyiyoy awudee? Naaꞌꞌanttoogee, eti aappun naata yelanawu koyiyoonaa? Azinaynne machchiyaa hegaabaa haasayana koshshiyo loꞌꞌo wodee awudee? Qassi ha naaꞌꞌu allaalleti keehi koshshiyoy aybissee? Darotoo, azinaynne machchiyaa naata yelanaakko yelennaakko eti aqo oyqqanaappe kase haasayana koshshees. Aybissi? Hegaa xeelliyaagan eta naaꞌꞌaa qofaykka issi mala gidana koshshiyo gishshataassa. Qassi, eti he aawatettawu giigidaakkonne qoppana koshshees. Naata yelidi aawanne aayo gidiyoogee daro wodiyaanne wolqqaa wurssiyo gishshawu amarida azinatinne machchoti naata yelennan baa giishin issi laytta woy naaꞌꞌu laytta takkanawu kuuyoosona. Guutta wodiyawu takkiyoogee aqo deꞌuwaa meezetiyo wodiyaa demmanaadaaninne issoy issuwaara keehi matattanaadan maaddees giidi eti qoppoosona. w19.12 23 ¶4-5
Woggaa, Ichchashe 24
Tumu laggee metuwaa wodessi yelettida ishaa.—Lee. 17:17, NW.
Kumetta alamiyan, Yihoowa ashkkaratuppe darota eti unꞌꞌettanaadan woy azzananaadan oottiya daro metoy eta gakkees. Hegaa ne gubaaꞌiyan akeekadii? Issi issi Kiristtaaneti keehi sahettoosona woy eti siiqiyo uri hayqqidoogaa gaasuwan azzanoosona. Harati qassi so asaa yaraappe issoy woy mata laggee Yihoowawu haggaaziyoogaa aggido gishshawu keehi azzanoosona. Meretay gattido daafabaa gaasuwan harati waayettiiddi deꞌoosona. Hegaa mala ishanttussinne michchonttussi ubbawu minttettoy koshshees. Nuuni eta waati maaddana danddayiyoo? Ammanettida lagge gida. Ammanettida laggeti bantta ishanttanne michchontta maaddanawu bantta goꞌꞌaa aggibayoosona. Leemisuwawu, eesuwan goobidi worana danddayiya harggee Pitera giyo ishaa oyqqidoogaa dottoree awu yootiis. A machchiyaa Katriina hagaadan gaasu: “Nu gubaaꞌiyan deꞌiya issi azinaynne machchiyaa Pitera harggiyaabaa nuuni erido aakime keetti nuna efoosona. Nuussi eta maadoy koshshiyo wode ubban, ha metuwaa genccanaadan nuna maaddanawunne nunaara takkanawu eti sohuwaara qofaa qachchidosona.” Metuwaa genccanaadan nuna maaddiya tumu laggeti nuussi deꞌiyoogee keehi minttettiyaaba! w20.01 8 ¶1; 9 ¶5; 10 ¶6
Saynno, Ichchashe 25
Eta ubban Geeshsha Ayyaanai [kumin,] dumma dumma qaalan [haasayidosona].—Oos. 2:4.
Neeni PHenxxaqosxxe gallassi 33 M.Ln, issi pooqiyan shiiqida erissiyo ashkkaratu giddon deꞌiyaabaa gidikko geeshsha ayyaanan tiyettidoogee qoncce. (Oos. 2:5-12) SHin geeshsha ayyaanan tiyettiya ubbay, maalaaliya hanotaaninne issi wodiyan tiyettiyoonaa? CHii. Issi uri tiyettidaagaa awude gidana danddayiyaakko ane beꞌoos. He gallassi geeshsha ayyaanan tiyettidaageeti 120 gidiya Kiristtaanetu xalla gidokkona. He gallassi guuttaa takkidi, 3,000 gidiya haratikka geeshsha ayyaanan tiyettidosona. Eti xammaqettido wode tiyettidosona. (Oos. 2:37, 38, 41) SHin hegaappe kaalliya layttatun, ayyaanan tiyettida Kiristtaaneti ubbay xammaqettiyo wode ayyaanan tiyettibookkona. Samaariyaa asati xammaqetti simmin amarida wodee aadhdhin ayyaanan tiyettidosona. (Oos. 8:14-17) Qassi hegaappe keehi dumma ogiyan, Qornneliyoosinne A soo asay ubbay xammaqettanaappe kase ayyaanan tiyettidosona.—Oos. 10:44-48. w20.01 20-21 ¶2-4
Masqqaynno, Ichchashe 26
Taani ne sunttaa eta erissaas.—Yoh. 17:26.
Oyddu Wonggeletu xallan, Yesuusi Yihoowa qonccissanawu ‘Aawaa’ giyo qaalaa 165 gidiya sohuwan goꞌettiis. Yesuusi Yihoowabaa darotoo haasayidoy aybissee? Issi gaasoy Yihooway siiqiya Aawa gidiyoogaa asay ammananaadan oottanaassa. (Yoh. 17:25, 26) Yihooway ba Naꞌaa Yesuusa oyqqido ogiyaappe nuuni abaa ay tamaariyaakko qoppa. Yihooway Yesuusa woosaa ubbatoo siyees. I Yesuusa woosaa siyiyoogaa xalla gidennan zaarees. (Yoh. 11:41, 42) Yesuusa gakkida paacee ayba gidikkokka, I bana ba Aaway siiqiyoogaanne maaddiyoogaa yootiis. (Luq. 22:42, 43) Yihooway siiqiya Aawa gidiyo gishshawu, I maaddanaagaa Yesuusi ammanettanaadan oottiis. (Maa. 26:53; Yoh. 8:16) Yihooway Yesuusa qoho ubbaappe naagana xayikkokka, I genccanaadan maaddiis. Ay qohoynne guutta wode xallaassa gidiyoogaa Yesuusi eriis. (Ibr. 12:2) Yihooway Yesuusi yootiyoobaa siyiyoogan, koshshiyaabaa awu kunttiyoogan, A loohissiyoogaaninne maaddiyoogan awu qoppiyoogaa bessiis.—Yoh. 5:20; 8:28. w20.02 3 ¶6-7, 9
Oruwaa, Ichchashe 27
Ubbabaa Xoossaa bonchchuwaassi oottite. . . . Xube gidoppite.—1 Qor. 10:31, 32.
Nuuni issi meeziyaadan woy wogaadan oottanawu woy qassi oottennan agganawu kuuyiyo wode, nuuni kuuyiyoobay haratu kahaa, ubba qassi nu mala Kiristtaanetu kahaa ay keena qohana danddayiyaakko qoppana koshshees. Nuuni oossinne mule xube gidanawu koyokko! (Mar. 9:42) Qassi Yihoowa Markka gidennaageeta koshshennan yiilloyenna mala naagettana koyoos. Nuuni eta bonchchuwan haasayissanaadan siiqoy denttettees, hegee Yihoowa bonchchissees. Nuuni asaara ooyettennaagee woy eta wogaa borennaagee erettidaba. Siiquwawu wolqqay deꞌiyoogaa hassaya! Nuuni asaassi qoppiyoogaaninne eta bonchchiyoogan siiquwaa bessiyo wode, nuna eqettiyaageetu wozanaakka shugissana danddayoos. Neeni Yihoowa Markka gidiyoogaa heeraa asaa erissa. (Isi. 43:10) Neeni Xoossaa Yihoowawu goynniyoogaa ne dabbotinne ne shooroti erikko, hanqqetissiya hanotay merettiyo wode metootennan giigissana danddayaasa. Hayquwaa xeelliyaagan nuuni erido tumawu exatanawu mule yeellatennaageeta gidoos.—Roo. 1:16. w19.04 17-18 ¶14-16
Hamuusa, Ichchashe 28
Yesuusi kiittido ubbaappe taani laafa; . . . Yesuusi kiittidoogaa geetettada xeesettanaukka bessikke.—1 Qor. 15:9.
Yesuusi kiittido 12ti I saꞌan haggaaziyo wode A kaallidosona; shin Yesuusi hayqqidi denddana gakkanaashin Kiitettida PHawuloosi Kiristtaane gidibeenna. PHawuloosi guyyeppe “Aihuda gidenna asaayyo Yesuusi kiittidoogaa” gididi sunttettikkonne, I Yesuusi kiittido 12ppe issuwaa gidiyo dumma maataa demmibeenna. (Roo. 11:13; Oos. 1:21-26) PHawuloosi he 12 asatanne eti Yesuusawu mata lagge gididi ufayttidoogan qanaatiyoogaappe bawu deꞌiyaaban ufayttidi deꞌiis. Nuuni deꞌiyaaban ufayttiyaageetanne nuna ziqqi oottiyaageeta gidikko, Yihooway haratussi immido maataa PHawuloosaagaadan bonchchiyaageeta gidana. (Oos. 21:20-26) Yihooway Kiristtaane gubaaꞌiyan sunttettida attumaageetuyyo aawatettay deꞌanaadan oottiis. Eti nagaranchcha gidikkonne, I eta ‘imotadan’ xeellees. (Efi. 4:8, 11) Nuuni he sunttettida attumaageeta bonchchiyoonne eti immiyo kaaletuwaa nuna ziqqi oottidi kaalliyo wode Yihoowakko matattidi deꞌananne nu mala Kiristtaanetuura sarotettan deꞌana. w20.02 17 ¶13-14
Arbba, Ichchashe 29
Xoossai koiro nuna siiqido gishshau, nuuni a siiqoos.—1 Yoh. 4:19.
Neeni Yihoowa Markkatuura xannaꞌiyoogan, Geeshsha Maxaafaa keehi nashshiyaagaa gidana danddayaasa. Qassi Yesuusa siiqiyaagaa gidana danddayaasa. Haꞌꞌi Yihoowa Markkata erada neeni etaara wodiyaa aattiyoogaa dosana danddayaasa. SHin neeni dosiyo he loꞌꞌobati neeni nena Yihoowawu sheedhdhada xammaqettanawu koyanaadan oottennan aggana danddayees. Neeni xammaqettanaadan denttettana waanna gaasoy neeni Xoossaa Yihoowa siiqiyo siiquwaa. Hara aybippenne aaruwan neeni Yihoowa siiqiyo wode, Yihoowawu haggaaziyoogaa aybinne woy ooninne digganaadan oottakka. Neeni Yihoowa siiqiyoogee xammaqettanaadan nena denttettana, qassi xammaqetta simmada ayyo ammanetta deꞌanaadankka maaddana. Yesuusi nuuni Yihoowa nu kumetta wozanaappe, nu kumetta shemppuwaappe, nu kumetta qofaappenne nu kumetta wolqqaappe siiqana koshshiyoogaa yootiis. (Mar. 12:30) Hegaadan kumetta hanotan Yihoowa siiqanawunne bonchchanawu waata tamaarana danddayay? Yihooway nuna ay keenaa siiqiyaakko nuuni qoppiyoogee, nuunikka A siiqanaadan maaddana. w20.03 4 ¶4-5
Qeeraa, Ichchashe 30
Ne oottiyo ooso ubbaa pola.—2 Xim. 4:5.
Nu haggaazuwaa loytti poliyoogaa giyoogee woygiyoogee? Nu haggaazuwaa loyttidi polanawu nuuyyo danddayettida ubban sabbakananne tamaarissana koshshees. SHin, nu haggaazuwaa loytti poliyoogee daro saatiyaa sabbakiyoogaa xallaa bessiyaaba gidenna. Nuuni sabbakanaadan oottiya gaasuwaa Yihooway xoqqu oottidi xeellees. Nuuni Yihoowanne nu shooruwaa siiqiyo gishshawu, kumetta shemppuwaappe haggaazoos. (Mar. 12:30, 31; Qol. 3:23) Kumetta shemppuwaappe Xoossawu haggaaziyoogee, nu wolqqaa goꞌettidi nuuyyo danddayettida ubban ayyo haggaaziyoogaa giyoogaa. Sabbakiyoogee maata gidiyoogaa nuuni akeekikko, nuussi danddayettida keenan mishiraachchuwaa daro asawu yootoos. Nuuni koyiyoogaa keena wodiyawu haggaazennan aggana danddayoos. Gidikkonne, hegee nuuni oottanawu dosiyooba. Asaa wozanaa denttettiya ogiyan mishiraachchuwaa yootanawu kaseegaappe aaruwan qara gidanawu baaxetoos. Nuuni sabbakiyo oosuwaa nu deꞌuwan kaseyiyaageeta gidoos. w19.04 2 ¶3; 3 ¶4, 6
Woggaa, Ichchashe 31
Tumatetti aani [baawa].—Yoh. 8:44.
Seexaanaa worddoti kayyoynne metoy asaa bolli daranaadan oottoosona. Naꞌi hayqqin kayyottiiddi deꞌiya aawaassinne aayeessi he naꞌa geella saluwan kiitanchcha gidanaadan Xoossay ekkiis geetettidi odettana danddayees. Seexaanay yootiyo ha worddoy eta kayyuwaappe guuttaa shemppisiiyye woy yaa kayyottanaadan oottii? Woosa keettay ba timirtteta eqettiyaageeta mittaa bolli kaqqidi xuuggiyoogaanne asaa barchchiyaa bessiyo hegaa malabaa likke gaanawu siꞌooliyaa tamaa worddo timirttiyaa goꞌettiiddi takkiis. Isppaanish Inkiyuzishin giyo shilootaa xeelliyaagan xaafettida maxaafay yootiyoogaadan, woosa keettaa timirttiyaa eqettiyaageeti hayqqanaappe kase bantta nagaraappe simmidi siꞌooliyaa tamaappe attana mala, “toꞌennan eexxiya siꞌooliyaa tamay ay malakko he asati xeelli beꞌanaadan” giidi, ha meqetti baynna pirddaa pirddoos giidi amaridaageeti ammanennan waayi aggana. Daro biittatun deꞌiya asati hayqqida bantta mayzzatussi goynnanaadan, eta bonchchanaadan, woy eti anjjana mala koyanaadan banttana giddidobadan qoppoosona. Harati qassi bantta mayzzatu qixaatiyaappe attanawu giidi eta ufayssanawu koyoosona. Seexaanaa worddoti denddo gidido ammanoti tumuppe minettanaadan oottennaagee azzanttiyaaba. Eti asay coo hirgganaadan woy ubba qassi yayyanaadan oottoosona. w19.04 14 ¶1; 16 ¶10