Usuppune

Geeshsha Maxaafay “tumu pirddaa” giyo qaalaa Xoossay likke giyoobaa oottiyoogaanne asa asappe shaakkennan hegaa oottiyoogaa bessiyaabaa qonccissanawu goꞌettiis. Yesuusi tumu pirddaa oosuwan waati qonccissidaakko ane qoppa. I saꞌan deꞌiyo wode, Ayhuda haymaanootiyaa kaalettiyaageeti Ayhuda gidennaageeta ixxoosona, Ayhuda haymaanootiyaabaa tamaaribeennaageetuppe eti aadhdhiyaabadan qoppoosonanne macca asaa karoosona. SHin Yesuusi ubba asaa muletoo issuwaa issuwaappe shaakkennan xeelliis. I bana ammanida Ayhuda gidennaageeti bana kaallanaadan eeno giis. (Maa. 8:5-10, 13) I duriyaanne hiyyeesaa shaakkennan ubbawu sabbakiis. (Maa. 11:5; Luq. 19:2, 9) I maccaasaa meqetti baynna hanotan mule oyqqi erenna. Ubba qassi, I harati pattennabadan xeelliyoogeeta gujjin, maccaasaa bonchchiisinne etawu kehiis. (Luq. 7:37-39, 44-50) Eti dure woy hiyyeesa gidin woykko eti ay haymaanoote yara gidinkka, asa asappe shaakkennan aggiyoogaaninne siyanawu koyiya ubba asawu sabbakiyoogan nuuni Yesuusa leemisuwaa kaallana danddayoos. Maccaasaa bonchchuwan oyqqiyoogan Kiristtaane attuma asati Yesuusa leemisuwaa kaalloosona. w19.05 2 ¶1; 5 ¶15-17

Ammanettida cimati ha wodiyan maadoy koshshiyoogeeta minttettanawu Geeshsha Maxaafaa goꞌettiyo wode, hegaadan qaretan liiqo qaalaa goꞌettana danddayoosona. Mattumaara gayttidaagan qohettidaageeta minttettana danddayiyaageeti cimatu xallee? CHii. Nuussi ubbawu ‘issoy issuwaa minttettiyo’ aawatettay deꞌees. (1 Tas. 4:18) Maadoy koshshiyo michchontta kayma michchontti loytti maaddana danddayoosona. Ba naꞌaa minttettiya aayen Xoossaa Yihooway bana leemisidoogee bessiyaaba. (Isi. 66:13) Unꞌꞌettidaageeta minttettida maccaasatubay Geeshsha Maxaafan odettiis. (Iyy. 42:11) Kiristtaane maccaasati waayettiya bantta mala michchontta minttettiyoogaa beꞌiyoogee Yihoowa keehi ufayssees! Issi issi hanotan, issi cimay woy naaꞌꞌu cimati ayyaanaaban kayma michchiyaa waayettaydda deꞌiya michchiyo maaddana danddayiyaakkonne buzo oychchana danddayoosona. Nuuni issi ishaa woy michchiyo maaddanawu maliyo wode, yootana koyennabaa yootanaadan eta oychchana koshshenna.—1 Tas. 4:11, NW. w19.05 16-17 ¶10-12

Gubaaꞌiyaa cimati issi uri gita nagaraa oottidoogaa shaakkanawu baa giishin naaꞌꞌu markka koshshiyoy aybissee? Geeshsha Maxaafay hegee bessiyaaba gidiyoogaa yootiyo gishshataassa. Gita nagaraa oottiis giidi issi ura mootin, I hegaa ammanana xayikko, cimati pirddaa konttiyaa essanaappe kase naaꞌꞌu markkay markkattana koshshees. (Zaa. 19:15; 1 Xim. 5:19) Issi uri he mootuwaa kashi giikko, cimati markkati yootiyoobaa siyoosona. Mootiyaageenne baa giishin hara issi asi, mootiyo uri mattumaara gayttidaagan naꞌa qohidoogaa yootikko, pirddaa konttiyaa essanawu cimatussi gidiya naqaashay dees. Naaꞌꞌantto markki beettibeennaagee mootiya uri ammanettennaagaa giyoogaa gidenna. Issi uri mattumaara gayttidaagan naata qohidoogaa shaakkanawu naaꞌꞌu markki xayikkonne, mootiyo uri geella harata keehi qohiyaabaa oottidoogaa cimati eroosona. Qohettidaageeta cimati aggennan minttettoosonanne maaddoosona. Hegaa bollikka, mattumaara gayttidaagan naꞌa qohiis giidi mootiyo uri gubaaꞌiyaa qohennaadan cimati ubbatoo naagana bessees.—Oos. 20:28. w19.05 11 ¶15-16

Naati waati xannaꞌanaakko tamaarssiyoogee keehi koshshiyaaba. Leemisuwawu, eti gubaaꞌe shiiqotussi waati giigettanaakko woy timirtte keettan denddida oyshata waati pilgganaakko tamaarana koshshees. (Ibr. 5:14) Eti son Geeshsha Maxaafaa qofaa xannaꞌiyoogan amarida wodiyaa aattiyaaba gidikko, gubaaꞌiyan, woradaaninne gita shiiqotun tamaariyo, biiduwan darotoo shiiqana danddayennaageeta eti akeekanawu metootokkona. Yelidaageeti issi kutti bantta naatuura ay keena xannaꞌanaakko eta layttaadaaninne eta eeshshaadan kuuyana bessiyoogee qoncce. Nuuni Geeshsha Maxaafaa xannaꞌissiyoogeetikka, waati xannaꞌanaakko tamaarana koshshees. Eti koyro Geeshsha Maxaafaa xannaꞌiyoogaa doommiyo wode, bantta xinaatiyawu woy gubaaꞌe shiiquwawu zaaruwaa giigettidi malaatiyoogaa beꞌiyoogee nuna ufayssees. SHin nuuni Geeshsha Maxaafaa xannaꞌissiyoogeeti waati pilgganaakko, qassi buzo waati loytti xannaꞌanaakko eta tamaarissana koshshees. Yaatiyoogan, metoy merettiyo wode eti waatana bessiyaakko gubaaꞌiyan deꞌiya harata oychchiyoogaappe nu xuufeta pilggiyoogan banttana maaddiya qofaa waati demmanaakko eti erana. w19.05 26 ¶2; 28 ¶10-11

Seexaanay nu qofaa laammanawu murttiis. Nuuni Xoossaa Qaalaadan qoppiyoogaa mooranawu I daro hiillata goꞌettees. Seexaanay Edene ataakiltte sohuwan Hewaano, “Xoossai tumu . . .  giidee?” yaagidi oychchidoogaa mala oyshaa aggennan oychchees. (Doo. 3:1) Seexaanay haariyo alamiyan, kaallidi deꞌiyaageetu mala nu ammaniyoobaa siranaadan oottiya oyshata darotoo siyoos: ‘Attumay attumaa woy maccay maccaa ekkiyoogaa woy geliyoogaa Xoossay tumu paqqadennee? Neeni suuttaa akkamuwawu goꞌettennaadan Xoossay tumu koyii? Neeni siiqiyo bohettidaageetuura ne laggetennaadan siiqiya Xoossay tumu koyii?’ Nuuni ammaniyoobati tuma gidiyoogaa ammanettana koshshees. Nu ammanuwaa xeelliyaagan keehi koshshiya oyshatuyyo nuuni zaaruwaa demmana xayikko, nuuni ammaniyoobay tumeeshsha giidi siriyoogaa doommana danddayoos. Hegaadan siriyoogee wurssettan nu qofaa geellayananne nu ammanuwaa moorana danddayees. w19.06 12-13 ¶15-17

Yihooway nuna keehi siiqees. (Yoh. 3:16) Nuuni nuna siiqiya Aawaa milatana koyoos. Hegaa gishshawu, ubba asawu ‘qarettiyoogaanne ishanttudan siiqettiyoogaa’ bessanawu baaxetoos; ubba qassi “nunaara ammanuwan de7iyaageetuyyo” hegaadan oottoos. (Gal. 6:10) Ayyaanaaban nuuyyo so asa gididaageeta unꞌꞌissiyaabay gakkiyo wode, nuuni eta maaddanawu koyoos. Aqo laggee hayqqido ura nuuni waati minttettana danddayiyoo? Neeni haasayissanawu metootana woy haasayissiyoobaa erennan aggana danddayikkonne, koyro oottana koshshiyaabay eta haasayissiyoogaa. Azinay qoppennan hayqqido Pawula hagaadan gaasu: “Hayqoy asay keehi seelettanaadan oottiyoogaa taani akeekaas. Eti hara ura hanqqetissiyaabaa haasayana danddayoos giidi unꞌꞌettoosona. SHin, asay aybanne haasayennan aggiyoogee aybippenne aaruwan iitaba.” Azzanida uri nuuni eratettan haasayanaadan nuuppe naagennan aggana danddayees. Pawula hagaadan gaasu: “Ta laggeti tana, ‘Ne azinay hayqqido gishshawu keehi azzanida’ yaagiyo wode taani eta galatays.” w19.06 20 ¶1; 23 ¶14

Nu oosoy muleera teqettikkonne, nuna eqettiyaageeti akeekenna ogiyan cimati shiiqota giigissana. Intte guutta citan shiiqanaadan eti kaaletuwaa immana danddayoosona; qassi shiiquwaa saatiyaanne sohuwaa eti darotoo laammana danddayoosona. Sabbakiyo oosuwaa xeelliyaagan, hanotay sohuwaappe sohuwan dummatana. SHin, nuuni Yihoowa siiqiyo gishshawunne A Kawotettaabaa haratussi yootiyoogan ufayttiyo gishshawu sabbakanawu ogiyaa koyana. (Luq. 8:1) Kase Sooviyeete giyo kawotettan Yihoowa Markkati sabbakiyoogaa xeelliyaagan yootaydda Emili B. Barano giyo taarikiyaa eranchchiyaa hagaadan gaasu: “Yihoowa Markkati sabbakana danddayennaagaa kawotettay yootido wode, eti bantta shoorotuura, banttanaara tamaariyaageetuuranne bantta laggetuura haasayiyoogaa doommidosona. Hegaa gaasuwan qasho keetti eta gelissido wode, Yihoowa Markkati qashettida haratuyyo sabbakidosona.” Nu oosoy muleera teqettidaba gidikkonne, nu ishantti sabbakiyoogaa aggibookkona. Neeni deꞌiyo biittan sabbakiyo oosoy muleera teqettikko, neeni eta leemisuwaa kaallanaadan amottoos. w19.07 11 ¶12-13

Haymaanootee baynna asay Xoossaa siiqanaadaaninne Kiristtoosi erissiyo ashkkara gidanaadan waati maaddana danddayiyoo? Koyruwan, issi urawu sabbakiyo wode, he uri zaariyoobay I diccido heeraadan gidana danddayiyoogaa nuuni akeekana bessees. Leemisuwawu, nuuni sabbakiyo wode, Awurooppaa biittaa asay Isiyaa biittaa asaagaadan siyennan aggana danddayees. Aybissi? Awurooppan daroti Geeshsha Maxaafaabaa eroosona; qassi Xoossay ubbabaa medhdhidoogaa siyidosona. SHin, Isiyaa biittan daro asay Geeshsha Maxaafaabaa eriyoobay guutta woy aybanne erenna; qassi eti Medhdhidaagaa waayi ammanana. Yaatiyo gishshawu, loꞌꞌobaa qoppiyaagaa gida. Layttan layttan, haymaanootee baynna asay Yihoowa Markka gidiiddi deꞌees. Daroti xoqqa kandduwaa maaraa kaalliyaageetanne asa bessanawu haymaanootiyaa asay haniyoobaa dosennaageeta. Harati qassi, darin kandduwaa maaraa kaallennaageetanne etappe daroti eti aggana koshshiyo iita meezeti deꞌiyoogeeta. Yihooway maaddin, “merinaa deꞌuwaa demissiya suure wozanaa koshshay” deꞌiyoogeeta demmanaagaa nuuni ammanettana danddayoos.—Oos. 13:48, NW; 1 Xim. 2:3, 4. w19.07 20-21 ¶3-4

Nuuni merinawu deꞌanawu hidootiyoy saluwaana gidin woy gannate gidida saꞌaana gidin, nuuni ubbatoo nu gakkanasawu baaxetana koshshees. Nuuni gencciiddi deꞌiyo metoy ayba gidikkonne, kasebaa qoppana koshshenna; qassi Yihoowawu haggaaziyoogaa nuna aybinne digganaadan oottana bessenna. (Pili. 3:16) Nuuni Yihooway qaalaa gelidobati polettin beꞌanawu daro wodiyawu naagiiddi deꞌennan woy cimanne wolqqi baynnaageeta gidennan aggokko. Nuuni daro layttawu metuwaanne yedetaa gencciiddi deꞌiyaageeta gidana danddayoos. Hanotay ayba gidikkonne, “issibaukka hirggoppite.” Inttessi koshshiyaabawu ubbawu Xoossaa mintti woossite, qassi intte qoppana danddayiyo aybippenne aadhdhiya sarotettaa I inttessi immana. (Pili. 4:6, 7) Wottaa wurssanawu keehi matido wode wurssiyoogaa xallaa qoppiya wottanchchaadan, nuunikka nu wottaa wurssanawu keehi matido wode Yihooway qaalaa gelido maalaalissiyaabatu xallaa qoppoos. Yaatanawu, haꞌꞌi nuussi danddayettida ubbabaa aggennan oottanawu koyoos. w19.08 7 ¶16-17

Keehi azzanida urawu nuuni woyganaakko erennan aggana danddayoos. Woyganaakko nuuyyo erettennaba gidinkka, nuuni yeekkiyoogaa eti beꞌikko, etassi nuuni qarettiyoogaa eti erana. Yesuusawu lagge gidida Alꞌꞌaazari hayqqido wode, Mayraama, Marttanne harati bantta siiqiyo ishawunne laggiyawu yeekkidosona. Yesuusi oyddu gallassay aadhdhin gakkidi, Alꞌꞌaazara sohuwaara denttanaagaa erikkonne, ikka “afuxxiis.” (Yoh. 11:17, 33-35) Yesuusi yeekkidoogee A Aawaayyo siyettiyaabaa qonccissees. Yesuusi yeekkiyoogaa so asay beꞌido wode, I eta siiqiyoogaakka eti akeekana danddayoosona; hegee Mayraamonne Martto minttettidoogee erettidaba. Hegaadan, nu ishantti nuuni eta siiqiyoogaanne etawu qoppiyoogaa akeekiyo wode, eti banttarkka deꞌennaagaanne etawu qoppiyaanne eta maaddiya laggeti eta matan deꞌiyoogaa eroosona. Kayyottida nu mala Kiristtaaniyaa minttettiyo hara ogee loyttidi ezggiyoogaa. Ne ishay baassi siyettiyaabaa yootanaadan eeno ga; qassi I haasayiyo ‘xala qaalan’ yiillotoppa. (Iyy. 6:2, 3) Yihoowa Markka gidenna dabboti wolqqanttiyoogaa gaasuwan I unꞌꞌettiiddi deꞌiyaagaa gidana danddayees. Hegaa gishshawu aara issippe woossa. Ayyo minotettaanne woppaa immanaadan ‘woosaa siyiyaagaa’ woossa.—Maz. 65:2 w19.04 18-19 ¶18-19

Nuuni haggaaziyoy Beeteeleena woy harasaana gidin, nuuni oottiyo sohuwaanne yan deꞌiya asaa kaseegaappe aaruwan siiqiyoogaa tamaarana danddayoos. Hegaa gishshawu, nuussi imettida oosuwaa nuuni aggana koshshikko keehi azzanoos. Nuuni nu ishanttanne michchontta laamotoos, qassi nuuni yedetaa gaasuwan aggidi baana koshshikko, etassi keehi hirggoos. (Maa. 10:23; 2 Qor. 11:28, 29) Qassi, harasaa biyoogee keehippe metiyaaba gidana danddayees; ayssi giikko yan nuuni ooratta wogaa meezetana koshshennan aggenna. Nuuni yiido sohuwaa simmikkokka, nuuyyo hegaadan siyettana danddayees. Amaridaageetussi hanotay laamettidoogaa gaasuwan qoppennan miishshaa metoy eta gakkana danddayees. Eti woppu geennan aggananne hidootaa qanxxana danddayoosona. Eta aybi maaddana danddayii? Yihoowakko shiiqidi deꞌiyoogaa. (Yaaq. 4:8) Hegaadan waati oottana danddayiyoo? ‘Woosaa siyiyaagan’ ammanettiyoogaana. (Maz. 65:2) Yihooway “nuuni woossiyoobaa woi qoppiyoobaa ubbaappe keehi darissi oottanau” danddayees. (Efi. 3:20, 21) Yihooway nuussi immiyoy nuuni woosan oychchidobaa xalla gidenna. I nuuni mule qoppi erenna ogiyan nu metuwaa qaarana danddayees. w19.08 21 ¶5-6

Amarida asay alamiyaa niyukileere olay woy meretay gattiyo daafabay xayssana giidi ammanees. SHin, Geeshsha Maxaafay hegaadan tamaarissenna. Loꞌꞌobaa ehaana olay mata wode denddanaagaa Geeshsha Maxaafay tamaarissees. He olay Armmageedoona geetettees, qassi Geeshsha Maxaafay he olaabaa yootiyoobay nuna ufayssiyaaba. (Ajj. 1:3) Armmageedoona olay asaa ashshanaappe attin, xayssenna! Waatidi? Armmageedoona olay asaa haaruwaa xayssiyoogan, asaa ashshanaagaa Geeshsha Maxaafay yootees. He olay iitata xayssiyoogaaninne xilloti paxa deꞌanaadan oottiyoogan asaa ashshana. Qassi I saꞌay xayennaadan naagiyoogan asaa ashshana. (Ajj. 11:18) “Armmageedoona” giyo qaalay Geeshsha Maxaafan issisan deꞌees; hegee Ibraawettuwan “Magiddo Deriyaa” giya qaalaappe yiis. (Ajj. 16:16) Magiddoy beni Israaꞌeelan deꞌiya katama. (Yaas. 17:11) SHin, Armmageedooni saꞌan deꞌiya ay sohuwawunne suntta gidenna. Hegee ‘saꞌaa kawoti ubbay’ Yihoowaara eqettanawu issippe shiiqiyo hanotaa bessiyaaba.—Ajj. 16:14. w19.09 8 ¶1-3

He maccaaseessi maadoy keehi koshshiis. A paxanawu koyiyo gishshawu daro dottoretukko baasu. A 12 laytta waayettidaba gidikkonne, ooninne O pattibeenna. Higgee yootiyoogaadan A tuna. (Wog. 15:25) Gidoppe attin, waayettiyaageeta Yesuusi pattana danddayiyoogaa A siyido gishshawu Yesuusa koyanawu baasu. A Yesuusa demmido wode, A afalaa macaraa bochchaasu; bochchin I bollaappe goggiya suuttay sohuwaarakka aggi bayiis! SHin Yesuusi oottidobay O pattiyoogaa xalla gidenna. I O oyqqido hanotan O siiqiyoogeenne bonchchiyoogee iyyo akeekettiis. He maccaasiyaa shemppo demmidoogeenne minettidoogee qoncce. (Luq. 8:44-48) He maccaasiyaa Yesuusakko biidoogaa akeeka. A akko baanawu keehi baaxetaasu. Ha wodiyankka hegaa mala; nuuni Yesuusakko ‘yaanawu’ baaxetana bessees. Ha wodiyan, Yesuusi baakko ‘yiya’ hargganchchatu sahuwaa maalaalissiya hanotan pattenna. SHin I nuna, “Taakko haa yiite; taani inttena shemppissana” yaagidi haꞌꞌikka shoobbees.—Maa. 11:28. w19.09 20 ¶2-3

Hananabaa yootiya Zakkaariyaasi hegaara issi malabaa kasetidi yootiis. I hagaadan giis: “He gallassatun dumma dumma qaalan haasayiya kawotettatu ubbaappe tammu asati yiidi, issi Aihuda bitaniyaa maayuwaa macaraa oiqqidi, ‘Xoossai inttenaara de7iyoogaa nuuni siyido gishshau, ane nuunikka nenaara boos’ yaagana.” (Zak. 8:23) Qaala ubbaappe asay shiiqana mala, Kawotettaa mishiraachchoy daro qaalan odettana bessiyoogaa Yihoowa Markkati akeekidosona. Ha wodiyan nuuni xeetan qoodettiya qaalatun awudeegaappenne aaruwan birshshiiddi deꞌoos. Zaway baynna daro asaa ubba biittaappe shiishshiyoogan Yihooway ha wodiyan maalaalissiyaaba oottiyoogee qoncce. Geeshsha Maxaafaynne Geeshsha Maxaafaa qofay deꞌiyo xuufeti keehi daro qaalan deꞌiyo gishshawu, he citaa yameti kumetta saꞌaappe yiidaageeta gidikkonne, Yihoowayyo issippetettan goynnoosona. Yihoowa asay minnidi sabbakiyoogaaninne bantta ishantta siiqiyoogan loytti erettees. Hegee ammanuwaa keehi minttiyaaba!—Maa. 24:14; Yoh. 13:35. w19.09 30-31 ¶16-17

Asay ammanettido ubbabay gita waayiyaa wode xayuwaa doommiyoogaa beꞌidi eti dagammana. Asi deꞌido awudeegaappenne keehi iita wodiyan, eti hayqqana danddayiyo gishshawu unꞌꞌettananne hirggana. (Sof. 1:14, 15) He wode, Yihoowa asaassikka deꞌoy keehi metennan waayi aggana. Nuuni ha alamiyaa bagga gidenna gishshawu, keehi metootana danddayoos. Nuussi koshshiya amaridabati deꞌennan aggana danddayoosona. ‘Ammanettida wozannaama ashkkaray’ nuuni gita waayiyaa wode ammanettidi deꞌanawu giigettanaadan nuna maaddiis. (Maa. 24:45) Hegaa daro ogiyan oottiis; shin 2016-2018 gakkanawu giigida nu gita shiiqotu baggaara tamaarissido issi leemisuwaa ane qoppa. He gita shiiqotu wode shiiqida haasayati Yihoowa gallassay matiyo wode nuussi koshshiya eeshshata bessanaadan nuna minttettidosona. w19.10 14 ¶2; 16 ¶10; 17 ¶12

Nuuni qumaa mitti simmidi, he qumay nu bollaa waati goꞌꞌanaakko woy qohanaakko doorana danddayokko. Loꞌꞌo qumay nuuni payya gidanaadan oottana danddayees; moorettida qumay nuuni sahettanaadan oottees. Hegee kaalettiyoobaa nuuni eesuwaara akeekennan aggana danddayoos; shin hegee amarida wodeppe guyyiyan erettees. Hegaadan, nuuni wodiyaa aattiyoobaa dooriyo wode, nu guuggiyan gelissiyoobaa doorana danddayoos. Guyyeppe, wodiyaa aattanawu nuuni dooridobay nu qofaa moorana danddayees. Wodiyaa aattanawu dooriyo loꞌꞌobay nuna minttettana danddayees; qassi wodiyaa aattanawu dooriyo iitabay nuna qohees. (Yaaq. 1:14, 15) Hegee kaalettiyoobaa nuuni eesuwaara akeekennan aggana danddayoos; shin hegee amarida wodeppe guyyiyan erettees. Geeshsha Maxaafay kaallidi deꞌiyaagaadan giyoy hegaassa: “Inttena intterkka cimmoppite. Ooninne Xoossaa bolli qilliiccanau danddayenna; aissi giikko, asi ba zeriyoogaa zaarettidi cakkana. Ba asatettaa amuwan zeriyaabaa gidikko, asatettaa amuwaappe haiquwaa cakkana.” (Gal. 6:7, 8) Nuuni Yihooway ixxiyoobaa minttettiyaaban wodiyaa aattiyoogaa ixxiyoogee keehi koshshiyaaba!—Maz. 97:10. w19.10 30 ¶12-14

Yihooway ba Naꞌaa nu gishshawu wozo oottidi immiyoogan ba siiquwaa qonccissiis. (Yoh. 3:16) Nuuni Yihoowaagaadan siiqiyaageeta waani gidana danddayiyoo? Nuuni nu ishanttanne nu michchontta ubbaa alꞌꞌobadan xeelloos; qassi Yihoowakko simmiya ‘bayida dorssaa’ ufayssan mokki ekkoos. (Maz. 119:176; Luq. 15:7, 10) Nu ishanttussinne nu michchonttussi maadoy koshshiyo wode, eta maaddanawu nuuni nu wodiyaanne nu wolqqaa goꞌettiyoogan eta siiqiyoogaa bessoos. (1 Yoh. 3:17) Yesuusi I erissiyo ashkkarati bantta goꞌꞌaa aggi bayiyo siiquwaa bessanaadan azaziis. (Yoh. 13:34, 35) Yesuusa azazoy ooratta, ayssi giikko, Xoossay Israaꞌeelatuyyo immido higgiyan odettibeenna ogiyan nuuni siiquwaa bessanaadan yootees: Nu mala Kiristtaaneta nuuni Yesuusi nuna siiqidoogaadan siiqana bessees. Hegawu nu goꞌꞌaa aggi bayiyo siiquwaa koshshees. Nuuni nuna siiqiyoogaappe aaruwan nu ishanttanne michchontta siiqana koshshees. Yesuusi nuuyyo oottidoogaadan, nu dosan nu shemppuwaa etayyo aattidi immiyoogaa keena nuuni eta keehi siiqana bessees. w19.05 4 ¶11-13

Geeshsha ayyaanaa maaduwaa demmanawu, nuuni aggennan woossana bessees. (Luq. 11:13) Yihooway nuussi geeshsha ayyaanaa immiyoy aybissakko akeekanaadan Yesuusi Luqaasa 11:5-9n yootido leemisoy nuna maaddees. Leemisuwan odettida bitanee ba imattaa loytti mokkanawu koyiis. I qamma bilahe yiida imattawu qumaa immana koshshiyaabadan awu siyettiis; shin immanawu ayyo aybinne baawa. Bitanee watiwatidi oyttaa oychchido gishshawu A shooroy immidoogaa Yesuusi yootiis. Yesuusi tamaarissanawu koyidobay aybee? Nagaranchcha asi watiwatidi oychchiya ba shooruwaa maaddanawu eeno giikko, geeshsha ayyaanaa demmanawu aggennan oychchiyaageeta saluwan deꞌiya keha Aaway hegaappe aaruwan maaddanaagaa ammanettoos! Yaatiyo gishshawu, nuuni geeshsha ayyaanaa demmanawu woossiyo wode, Yihooway nu woosaa zaaranaagaa ammanettoos. (Maz. 10:17; 66:19) Seexaanay nuna qohiyoogaa mule aggana xayikkonne, nuuni genccana danddayiyoogaa ammanettana danddayoos. w19.11 13 ¶17-19

Yesuusinne I kiittidoogeeti issi issitoo shemppana koshshiyoogaa Yesuusi akeekiis. Gido shin, he wodenne ha wodiyan deꞌiya daro asay Yesuusi yootido leemisuwan odettida dure bitaniyaa mala. He bitanee bana hagaadan giidi ammanttiis: “SHemppa, ma, uya, ufaitta.” (Luq. 12:19; 2 Xim. 3:4) I deꞌuwan keehi koshshiyaabay shempponne ufayssaa giidi qoppiis. Hegaappe dumma hanotan, Yesuusinne I kiittidoogeeti deꞌuwan keehi koshshiyaabay banttana ufayssiyoogaa giidi qoppibookkona. Ha wodiyan, nuuni oosuwaappe shemppiyo wodiyaa shemppo xallaassa gidennan, haratussi markkattiyoogaanne gubaaꞌe shiiqota shiiqiyoogaa mala loꞌꞌobaa oottanawu goꞌettiyoogan, Yesuusa leemisuwaa kaallanawu baaxetoos. Erissiyo ashkkara oottiyoogeenne shiiquwaa shiiqiyoogee nuussi keehi koshshiyaaba. Hegaa gishshawu, nuuyyo danddayettida ubban hegeeta Yihoowawu oottiyoogaa aggokko. (Ibr. 10:24, 25) Nuuni manddariyo wodekka, nu biidosan shiiqota ubbatoo shiiqoos; qassi nunaara gayttiya asawu Geeshsha Maxaafaabaa yootoos.—2 Xim. 4:2. w19.12 7 ¶16-17

Yihooway nuuni waani deꞌanaakko kuuyanaadan nuussi paqqadiis. Loꞌꞌobaa waati dooranaakko I nuna tamaarissees, qassi A ufayssiyaabaa nuuni kuuyikko nuussi injjetanaadan I nuna maaddees. (Maz. 119:173) Hegaa gishshawu, nuuni Geeshsha Maxaafaappe tamaarido aadhdhida eratettaa oosuwan peeshshiyo wode loꞌꞌobaa kuuyoos. (Ibr. 5:14.) SHin, nuuni loꞌꞌobaa kuuyiyo wodekka, nu oottanawu doommidoogaa poliyoogee nuussi metiyaaba gidana danddayees. Ane amarida leemisota beꞌoos: Issi yelaga ishay kumetta Geeshsha Maxaafaa nabbabanawu kuuyees. I amarida saaminttawu loytti nabbabees; shin simmidi aggi bayees. Issi michchiyaa ubba wode haggaaziyaaro gidanawu kuuyaasu; shin doommana wodiyaa ubbatoo sinttawu sugawusu. Cimati gubaaꞌiyan deꞌiya ishanttanne michchontta eta soo biidi oychchanawu issippe kuuyidosona; shin daro aginay aadhdhi simminkka eti hegaa doommibookkona. Ha hanotati ubbay dumma dumma; shin eta ubbaa hanotaa issi mala oottiyaabay deꞌees. He asati kuuyidosona; shin eti kuuyidobaa oottibookkona. w19.11 26 ¶1-2

Yesuusi nu wodiyaa ‘Nohe wodiyaara’ geeddarssiis; qassi nuuni deꞌiyoy genccanawu ‘wayssiya wodiyaana’ gidiyoogee qoncce. (Maa. 24:37; 2 Xim. 3:1) Hegaa gishshawu, aqo oyqqida issoti issoti Yihoowa haggaazuwan loytti oottana mala naata takkidi yelanawu kuuyidosona. Akeekanchcha aqo laggeti naata yelanaakko agganaakko, qassi aappun naata yelanaakko kuuyiyo wode, etawu ‘woqqu miishshaa koshshiyaakko’ qoppoosona. (Luq. 14:28, 29) Keettaa keexxanawu koyiya uradan eti banttawu gidiya miishshay deꞌiyaakkonne qoppoosona. Naata yelidi dichchanawu miishshay koshshiyoogaa yelidaageeti eroosona. Hegaa bollikka, naata yelidi dichchanawu miishshaa xalaala gidennan, wodiyaakka wolqqaakka wurssiyoogaa eti akeekoosona. Hegaa gishshawu, azinaynne machchiyaa kaallidi deꞌiya oyshata qoppiyoogee keehi koshshiyaaba: ‘Nuuni nu soo asassi koshshiyaabaa kunttanawu naaꞌꞌaykka oottana koshshii? Nu soo asawu tumuppe koshshiyaabati aybakko nuuni maayettiyoo? Nuuni naaꞌꞌaykka oottikko, nu naata naaganay oonee? Eti qoppiyoobaaninne oottiyooban O leemisuwaa kaallanaadan nuuni koyiyoo?’ Azinatinne machchoti ha oyshata takki giidi haasayiyo wode, hachchi gallassaa xiqisiyan deꞌiya zoriyaa qoppoosona. w19.12 23-24 ¶6-7

Kiitettida PHawuloosi ba deꞌuwawu hirgganaadan oottiyaabay bolli bollan A gakkiis. (2 Qor. 11:23-28) I agunttadan bana ‘caddi oyqqiyaabaa’ gencciis; hegee issi qommo hargge gidennan waayi aggana. (2 Qor. 12:7) Qassi issi wode aara oottiya ishay “Deemaasi ha wodiyaa sa7aa dosidi” A aggidi biido gishshawu, I keehi azzaniis. (2 Xim. 4:10) PHawuloosi kehatettan harata maaddida tiyettida xala Kiristtaane gidikkokka, ikka issi issitoo azzaniis. (Roo. 9:1, 2, NW) PHawuloosi koshshiya minttettuwaanne maaduwaa demmiis. Waatidi? Yihooway A minttettanawu ba geeshsha ayyaanaa goꞌettidoogee qoncce. (2 Qor. 4:7) Yihooway hara Kiristtaanetu baggaarakka A minttettiis. PHawuloosi ba mala Kiristtaanetuppe issoti issoti bana ‘daro maaddidoogaa’ woy keehi minttettidoogaa yootiis. (Qol. 4:11) I sunttan xeesidi yootidoogeetuppe amaridaageeti Arisxxirokoosa, Tikiqoosanne Marqqoosa. w20.01 8 ¶2-3

Kiristtaaneti geeshsha ayyaanan tiyettiyo wode, eti ‘naaꞌꞌantto yelettoosona.’ ‘Naaꞌꞌantto yelettiyo wode’ woy ‘geeshsha ayyaanaappe yelettiyo wode’ aybi siyettiyaakko ayyaanan tiyettibeenna urawu hegaa qonccissana danddayettennaagaa Yesuusikka yootiis. (Yoh. 3:3-8) Kiristtaaneti tiyettiyo wode, dumma ogiyan qoppiyoogaa waani doommiyoonaa? He Kiristtaaneta Yihooway tiyanaappe kase, eti saꞌan merinawu deꞌanawu hidootan naagoosona. Yihooway iitatettaa ubbaa xayssidi saꞌaa gannate oottiyo wodiyaa eti yeemuwan naagoosona. Hayqqida so asaa yaray woy laggee denddiyo wode eti mokkiyoogaabaa qoppennan waayi aggana. SHin eti tiyetti simmidi, dumma ogiyan qoppiyoogaa doommoosona. Aybissi? Saꞌan merinawu deꞌiyoogee loꞌꞌo gidenna giidi eti qoppiyoogaa doommibookkona. Eti dumma ogiyan qoppiyoogaa doommidoy unꞌꞌettido gishshataassa woy keehi waayettido gishshataassa gidenna. Merinawu saꞌan deꞌanaagee salettiyaaba gi eti qoppido gishshataassa gidenna. Eta qofaynne eti hidootan naagiyoobay laamettanaadan Yihooway ba geeshsha ayyaanaa goꞌꞌettiis. w20.01 22 ¶9-11

Muuse higgiyan, sunttettida cimati Yihoowawu goynniyoogaara gayttida yoho xalla gidennan, Yihoowawu goynniyoogaara gayttibeennabankka pirddoosona. SHin, Kiristtoosa higgiyawu azazettiya cimatu aawatettay ayyaanaabaara gayttidaagan oosettida nagaraa kaalliyoogaa. (Gal. 6:2) Kawotettaa sunttati pitaabeeriyaaranne danobaara gayttidabaa pirddanaadan Xoossay etayyo aawatettaa immidoogaa he cimati eroosona. Hegee kawotettaa sunttati qaxxayiyoogaa woy qashissiyoogaa malabaa xaaxi waaxees. (Roo. 13: 1-4) Gubaaꞌiyan deꞌiya issi uri gita nagaraa oottiyo wode cimatu aawatettay aybee? Eti he allaalleta qoranawunne kuuyanawu Geeshsha Maxaafaa goꞌettoosona. Kiristtoosa higgiyawu denddoy siiqo gidiyoogaa eti hassayoosona. Oosettida nagaraa gaasuwan gubaaꞌiyan deꞌiya issi uri qohettikko, A maaddanawu waatana koshshii? giidi qoppanaadan cimata siiqoy denttettees. Nagaraa oottida ura xeelliyaagan, hagaadan giidi oychchanaadan siiqoy cimata denttettees: I ba nagaraappe simmidee? I Yihoowaara dabbotido dabbotaa zaarettidi minttanaadan nuuni A maaddana danddayiyoo? w19.05 7 ¶23-24

Yesuusi hachchi gallaassa xiqisiyan deꞌiya qofaa yootido wode, ba Aaway A deꞌuwaa Pulttonne deꞌuwawu koshshiyaabaa Immiyaagaa gidiyoogaa akeekiis. Yesuusi ba Aawan muleera ammanettiis; qassi Yihooway asatettan awu koshshiyaabaa immiis. Ubbaappe aaruwan, Yihooway Yesuusassi ayyaanaaban koshshiyaabaa kunttiis. (Maa. 4:4) Yihooway ayyaanaaban nuussikka koshshiyaabaa kunttees. I ba Qaalaa baggaara babaa tumubaa, ba halchchuwaabaa, ufayssiya deꞌuwaabaanne sinttanaabaa qonccissiis. Nuna yelidaageeti woy harati abaa nuna tamaarissanaadan goꞌettiyoogan I nuna maaddiis. Qassi siiqiya gubaaꞌe cimatu baggaaranne hara kayma ishanttunne michchonttu baggaara nuna kehatettan maaddiiddi deꞌees. Gujjidikka, ayyaanaaban nu so asa gidida nu ishanttuuranne michchonttuura issippe tamaariyo gubaaꞌe shiiqotu baggaara Yihooway nuna tamaarissees. Ha ogetuuninne hara ogetun, Yihooway nuussi ubbawu aawaadan qoppiyoogaa bessees.—Maz. 32:8. w20.02 3 ¶8; 5 ¶13

Nuuni issoy issuwaa qanaatikko nu giddon sarotettay deꞌenna. Nuuni nu wozanaappe qanaatiyaa shoddana, qassi harati qanaatanaadan oottiyoogaappe naagettana koshshees. Harati qanaatiyaa eqettanaadan maaddanawu nuuni ay oottana danddayiyoo, qassi sarotettay deꞌanaadan waatana danddayiyoo? Nu xeelaynne nu oottiyoobay harata keehi qohana woy maaddana danddayees. Ha alamee nuuni nuussi deꞌiya aquwaa bessanaadan koyees. (1 Yoh. 2:16) SHin, hegaa mala xeelay qanaatiyaa denttettees. Nuuni nuussi deꞌiyaabaa woy nu shammanawu qoppidobaa ubbatoo haasayennaba gidikko, harati qanaatiyoogaappe naagettanaadan oottoos. Gubaaꞌiyan nuussi aawatettay deꞌikko, nuuni ashkke gidiyoogee harati qanaatiyoogaappe naagettanaadan oottiyo hara oge. Ubbatoo nuuni oottiyoobaa haasayiyaabaa gidikko, qanaatee dicciyo biittaa araddissoos. SHin, nuuni harata siiqiyoogaa bessiyo wodenne eti oottido loꞌꞌobaa nashshiyo wode, eti banttawu deꞌiyaaban ufayttanaadan, qassi gubaaꞌiyan issippetettaynne sarotettay deꞌanaadan oottoos. w20.02 18 ¶15-16

Yihooway medhdhidobaa baggaara abaa tamaarana danddayaasa. (Ajj. 4:11) I medhdhido maatan mittan, qassi mehiyan doꞌan qonccida A aadhdhada eratettaa wotta dentta qoppa. Ne bollay merettido maalaalissiya ogiyaabaa amaridabaa tamaara. (Maz. 139:14) Biilooniyan qoodettiya xoolinttetuppe issuwaa xalla gidida awawu Yihooway immido wolqqaabaa qoppa. (Isi. 40:26) Neeni yaatiyo wode, kaseegaappe aaruwan Yihoowa bonchchana. SHin Yihooway aadhdhida eranchchanne wolqqaama gidiyoogaa eriyoogee neeni aara dabbotiyo dabbotawu doometta xalla. Neeni Yihoowa siiqiyo siiquwaa minttanawu, kaseegaappe aaruwan abaa erana koshshees. Yihooway nena wozanappe siiqiyoogaa neeni ammanana koshshees. “Neeni a koyikko, i neeyyo beettana.” (1 Odi. 28:9) Yihooway, “Taani inttena taakko shiishshaas” giis. (Erm. 31:3) Yihooway neeyyo oottido ubbabaa neeni loytta akeekiyo wode, neeni A kaseegaappe aaruwan siiqana. w20.03 4 ¶6-7

Kiitettida PHawuloosi ba deꞌuwan sabbakiyo oosuwaa kaseyiyoogan loꞌꞌo leemiso. I naaꞌꞌantto misoonaawe oosuwawu Qoronttoosa katamaa biido wode, ayyo keehi guutta miishshay deꞌiyo gishshawu, dunkkaaniyaa sikkiyo oosuwaa oottana koshshiis. I Qoronttoosa asatuyyo mishiraachchuwaa “coo” yootana mala, ha oosuwaa bawu koshshiyaabaa kunttanawu oottiis. (2 Qor. 11:7) PHawuloosi amarida oosuwaa oottana koshshikkonne, I haggaazuwaa ubbatoo kaseyiis; qassi Sambbata ubban sabbakiis. PHawuloosi ba hanotay injjetin, sabbakiyo oosuwaa kaseppe aaruwan oottiis. I “Aihudatussi Yesuusi ba huuphen Kiristtoosa gididoogau qaalaa yootuwaa toliis.” (Oos. 18:3-5; 2 Qor. 11:9) Guyyeppe, I Roome kataman ba son naaꞌꞌu laytta qashettido wode, bana oychchanawu yiidaageetussi markkattiisinne dabddaabbeta xaafiis. (Oos. 28:16, 30, 31) PHawuloosi ba qofaa haggaazuwaappe aybinne shaakkennaadan murttiis. w19.04 4 ¶9