Tisaase

Nuuni haasayiyooban naagettana xayikko, hegee daro metuwaa gattana danddayees. Leemisuwawu, nu oosoy muleera teqettido biittan deꞌiya issi uraara neeni gayttikko, nu oosoy he biittan waani oosettiyaakko ubbabaa oychchanawu maluutee? Neeni eta qohanawu koyada oychchennaagee qoncce. Nuuni nu ishantta siiqiyo gishshawu, eta gakkiyaabaa eranawu koyoos. Qassi nuuni etawu woossiyo wode, shaakki eridobaa woossanawu koyoos. SHin, hegaa mala wodiyan nuuni haasayiyooban naagettidi coꞌꞌu gaana koshshees. Nuuni he ishay xuurabaa odanaadan iisettikko, A siiqennaagaa bessoos. Nuuni he biittan deꞌiya ishanttanne michchontta siiqennaagaakka bessoos; ayssi giikko, he ishay yootiyoobay eti qohettanaadan oottana danddayees. Nu oosoy muleera teqettido biittan deꞌiya ishanttunne michchonttu metoy yaa daranaadan koyiya uri nu giddon baynnaagee qoncce. Qassi, nuuni hegaa mala biittatun haggaazikko, yan deꞌiya Yihoowa Markkatu haggaazuwaa woy ayyaanaabaa oosuwaa xeelliyaagan ubbabaa yootanawu koyokko. w20.03 21 ¶11-12

Xoossay asay hayqqanaadan halchchibeenna. SHin Addaameenne Hewaana merinawu deꞌanawu, “Lo77uwaanne iitaa erissiya mittaa teeraappe mooppa; aissi giikko, neeni appe miido gallassi tumu haiqqana” yaagidi eta azazida Yihoowawu eti azazettana koshshiis. (Doo. 2:16, 17) He wode Seexaanay metoy merettanaadan oottiis. I shooshshan eqqidi Hewaaniyyo, hachchi gallassa xiqisiyan deꞌiya qofaa yootiis. A he wordduwaa ammanada mittaa teeraappe miidoogee azzanttiyaaba. Hegaappe simmin, I keettaawaykka he mittaa teeraappe miis. (Doo. 3:6) Nagaraynne hayqoy hegan doommiis. (Roo. 5:12) Xoossay yootidoogaadan, Addaameenne Hewaana hayqqidosona. Gidoppe attin, Seexaanay hayquwaabaa worddotiyoogaa aggibeenna. Guyyeppe, I hara worddota yootiyoogaa doommiis. He worddotuppe issoy ashoy hayqqiyo wode, appe shaahettidi, geella ayyaana alamiyan paxa deꞌiyaabi deꞌees giyo timirttiyaa. Dumma dumma hanotan odettiya he worddoy ha wodiyaa gakkanaassi zawi baynna asay cimettanaadan oottiis.—1 Xim. 4:1. w19.04 14-15 ¶3-4

Naati issibaa kuuyanawu, woy daafabaa akeekanawunne appe naagettanawu yuushshi qoppiyoogaa tamaaribookkona. Hegaa gishshawu, qohanawu cimmiyaageetun naati sohuwaara cimettoosona. Mattumaara gayttidaagan naata qohiyaageeti qohettiyoogee naatu bala, he qohuwaa genttana bessees, mattumaara gayttidaban qohettidoogaa naati yootikko ooninne eta siyenna woy etawu qoppenna, woykko daro gasttatinne naati issoy issuwaa siiqiyoogaa bessanawu mattumaa gayttoosona giyoogaa mala wordduwaa tamaarissoosona. Hegaa mala worddoti naatu qofaanne eti tumaa akeekiyo ogiyaa daro layttawu geellayana danddayoosona. Hegaa mala naati qohettidabadan, tunidabadaaninne banttassi siiqoy woy minttettoy bessennabadan qoppiiddi diccana danddayoosona. Mattumaara gayttidaagan qohoy gakkidoogeeti daro layttawu waayettana danddayiyoy aybissakko nuuni akeekanaadan ha qofay maaddees. Nuuni ‘siiqoy baynna,’ qassi ‘iita asatinne balettiyaageeti kaseppe iiti iiti biyo’ ha wurssetta wodiyan deꞌoos.—2 Xim. 3:1-5, 13. w19.05 15 ¶7-8

Yesuusi ayba ogetun tamaarissidee? Koyruwan, I haasayiyooban asaa tamaarissiis. I Xoossaabaa tumaa haasayido gishshawu, deꞌuwawu halchchoy aybakko tamaarissido gishshawunne asaa metuwaa ubbaa Xoossaa Kawotettay giigissanaagaa yootido gishshawu, I haasayidobawu wolqqay deꞌees. (Luq. 24:19) Yesuusi leemiso gidiyoogankka tamaarissiis. Yesuusi deꞌido deꞌuwan, ba erissiyo ashkkarati waanidi deꞌana koshshiyaakko bessiis. (Yoh. 13:15) Yesuusi awude tamaarissidee? I saꞌan haggaaziyo wode tamaarissiis. (Maa. 4:23) I hayquwaappe denddi simmidi takkennankka bana kaalliyaageeta tamaarissiis. Leemisuwawu, I ba erissiyo ashkkarati 500⁠ppe dariyaageeti issippe deꞌishin qonccidi, eti asaa ‘bana kaalliyaageeta oottana’ mala eta azaziis. (Maa. 28:19, 20; 1 Qor. 15:6) Yesuusi gubaaꞌiyawu huuphe gidiyo gishshawu, I hayquwaappe denddidi saluwaa bi simmidikka ba erissiyo ashkkarata tamaarissiyoogaa aggibeenna. Leemisuwawu, tiyettida Kiristtaaneta minttettanaadaaninne zoranaadan Kiristtoosi kiitettida Yohaannisawu 96 M.L. heeran azazuwaa immiis.—Qol. 1:18; Ajj. 1:1. w19.05 3 ¶4-5

Ha wodiyan, deꞌuwaassi koshshiya miishshaa demmanawu daro asay minnidi oottana koshshees. Nu ishanttuppe daroti bantta soo asawu koshshiya qumaa, maayuwaanne deꞌiyoosaa giigissanawu daro saatiyawu oottoosona. Hara daroti oosuwawu galla galla baanawunne soo simmanawu daro saatiyaa hemettoosona. Qassi daroti bantta soo asawu koshshiyaabaa kunttanawu deexxiya wolqqa ooso oottoosona. Ha minni oottiya ishanttinne michchontti soo simmiyo wode daafuroosona! Hegaappe denddidaagan, daroti xannaꞌanawu dosokkona. Gidikkonne, Xoossaa Qaalaanne nu xuufeta wozanappe xannaꞌanawu nuuni wodiyaa bazzana koshshees. Nuuni Yihoowaara dabbotidi deꞌanawunne merinaa deꞌuwaa demmanawu koyikko, hegee keehi koshshiyaaba! (1 Xim. 4:15) Amaridaageeti xiskki simmidi son cenggurssi siyettenna wodiyan loytti wotti dentti qoppana danddayiyo wode, xannaꞌanawu ubba galla kasetidi denddoosona. Harati omarssi soo simmiyo wode xannaꞌanawu, qassi Geeshsha Maxaafaaninne nu xuufetun nabbabidobaa wotti dentti qoppanawu bantta qofay shaahettenna wodiyaa goꞌettoosona. w19.05 26 ¶1-2

Ha laamee eesuwaara woy baaxetennan haniyaaba gidenna. Nuuni daro layttawu “minnidi” baaxetanawu koshshennan aggenna. (2 PHe. 1:5) Nuuni garssa asatettan laamettanawu wozanappe baaxetana koshshees. Nuuni oottana koshshiya koyroogee woosaa. Nuuni mazamuraawiyaagaadan, “Abeet Xoossau, geeshsha wozanaa ta giddon medhdha; ammanettiya ayyaanaa ta giddon ooraxissa” yaagidi woossana koshshees. (Maz. 51:10) Nuuni wozanaaninne qofan laamettananne maaduwaa demmanawu Yihoowa oychchana koshshiyoogaa akeekana bessees. Nuuni oottana koshshiya naaꞌꞌanttobay wotti dentti qoppiyoogaa. Nuuni galla galla Xoossaa Qaalaa akeekan nabbabiyo wode, nabbabidobaa loytti qoppiyoogee laammana koshshiya qofatanne nuuyyo siyettiyaabaa nuuni shaakki eranaadan maaddees. (Maz. 119:59; Ibr. 4:12; Yaaq. 1:25) Nuuni asa eratettan omoodettidoogaa bessiyaabi deꞌikko shaakki erana koshshees. Nuuni shugo gididobay aybakko akeekananne hegaa xoonanawu minttidi baaxetana koshshees. w19.06 8 ¶1; 10 ¶10; 12 ¶11-12

Neeni issibaa oottanawu kuuyiyo wode, neeni kuuyidobaa oottanawu wodiyaa bazza, qassi he wodiyaa laammoppa. Oosuwaa doommanawu injje wodiyaa naagoppa; injje wodee beettennan aggana danddayees. (Era. 11:4) Pattennabay ne wodiyaa wurssennaadaaninne keehi koshshiyaabaa oottiyo wolqqaa xayssennaadan naagetta. (Pili. 1:10, NW) Danddayettikko, ne oottiyoobaa haraati xubbenna wodiyaa doora. He wodiyan harati ne qofay shaahettanaadan oottenna mala yoota. Silkkiyaa gorddanawunne imeeliyaa woy sooshal miidiya simmada xomoosanawu kuuya. Ne kuuyidobawu neeni demmanabay manddariyoosa gakkiyoogaa mala. Ne manddariyoosa gakkanawu wozanappe koyikko, yaa gakkanawu dumma dumma ogiyaara baana koshshikkonne neeni biyoogaa aggakka. Hegaadankka, nuuni kuuyidobay demissiyo loꞌꞌobaa qoppikko, nu wora simmanaadan oottiyaabay gayttiyo wode hidootaa qanxxokko.—Gal. 6:9. w19.11 30 ¶17-18

Xammaqettanawu neeni kuuyanaadan denttettiyay ayba gidana koshshii? Neeni Geeshsha Maxaafaa loytta xannaꞌiyo gishshawu Yihoowabaa, hegeekka A eeshshaabaanne A ogiyaabaa darobaa eradasa. Neeni abaa tamaaridobay nena denttettiisinne A keehi siiqanaadan oottiis. Xammaqettanawu neeni kuuyanaadan denttettiya waanna gaasoy Yihoowa siiqiyoogaa gidana koshshees. Neeni xammaqettanawu kuuyanaadan oottiya hara gaasoy Geeshsha Maxaafan deꞌiya tumaa ammanido gishshataassa. Erissiyo ashkkara oottanaadan Yesuusi azazido wode yootidobaa qoppa. (Maa. 28:19, 20) Yesuusi giidoogaadan, xammaqettiyaageeti “Aawaa sunttan, Na7aa sunttaaninne Geeshsha Ayyaanaa sunttan” xammaqettana bessees. Hegee woygiyoogee? Yihoowabaa, A Naꞌaa Yesuusabaa, qassi geeshsha ayyaanaabaa Geeshsha Maxaafay yootiyo tumaa ne kumetta wozanappe neeni ammanana bessees giyoogaa. Ha tumay keehi maaddeesinne ne wozanaa denttettana danddayees. w20.03 9 ¶8-9

Yihooway kiitanchchata kiittidoy Looxeyyo akeekissuwaa yootanaassa xalla gidennan, Sadooma bolli yiya bashshaappe I baqatanaadan maaddanaassa. (Doo. 19:12-14, 17) Hegaadan, nuuni nu ishay bana metuwan yeggiya issibaa oottishin beꞌikko, I naagettanaadan nuuni yootiyoogee koshshana danddayees. I Geeshsha Maxaafaappe imettida zoriyaa eesuwan oosuwan peeshshana xayikkonne, nuuni danddayanchcha gidana koshshees. He naaꞌꞌu kiitanchchatu mala gida. Nuuni hidootaa qanxxidi nu ishaappe haakkennan koshshiyaaban A maaddana koshshees. (1 Yoh. 3:18) Nuuni A kushiyaa oyqqida giyoogaa mala hanotan, I bawu imettida loꞌꞌo zoriyaa oosuwan peeshshana mala A maaddiyoogee koshshana danddayees. Yihooway Looxee nagaranchcha gidiyoogan xeelaa wottana danddayees. SHin guyyeppe, kiitettida PHeexiroosi Looxa geeshsha asa gaanaadan I ayyaanan denttettiis. (Maz. 130:3) Nuuni Yihooway Looxe hanotaa xeellido ogiyaa kaallana danddayiyoo? Nuuni nu ishanttussinne michchonttussi deꞌiya loꞌꞌo eeshshan xeelaa wottikko, kaseegaappe aaruwan nuuni eta danddayana. Yaatikko, eti nuuni immiyo maaduwaa metootennan ekkana danddayoosona. w19.06 21 ¶6-7

Neeni deꞌiyo biittaa kawotettay nu goynuwaa muleera teqqikko, neeni Yihoowassi laꞌatettan haggaazana danddayiyo biitti baanawu qoppana danddayaasa. Hegee neeni buzo kuuyiyoobappe attin, ooninne neeyyo kuuyana danddayenna. Waatanaakko kuuyanaappe kase, koyro xeetu layttan deꞌida Kiristtaaneti yedetay gakkido wode oottidobaa issi uri xannaꞌana danddayees. Yerusalaamen deꞌiya erissiyo ashkkarati Yihudaanne Samaariyaa, ubba qassi haakkidi deꞌiya Pinqqe, Qophphiroosanne Anxxookiyaa biidosona. (Maa. 10:23; Oos. 8:1; 11:19) Gidoppe attin, koyro xeetu layttan deꞌida Kiristtaaneta hara wolqqaama yedetay gakkidi qohi simmin, sabbakiyo oosuwaa asay eqettiyo heeraappe kiitettida PHawuloosi beennan agganawu kuuyiis. I kawotettaa mishiraachchuwaa yootanawunne wolqqaama yedetay gakkido katamatun deꞌiya ishantta minttettanawu ba shemppuwaa aattidi immiis. (Oos. 14:19-23) Nuuni ha taariketuppe ay tamaariyoo? Harasaa biyoogaa xeelliyaagan so asawu huuphe gidida uri buzo kuuyana bessees. I kuuyanaappe kase, ba soo asaa hanotaanne harasaa biyoogee eta bolli gattana danddayiyo loꞌꞌobaanne iitabaa xeelliyaagan, woossidi akeekan qoppana koshshees. Nuuni harati kuuyiyoobaa gaasuwan eta bolli pirddana koshshenna. w19.07 10 ¶8-9

“Biidi, asa ubbaa tana kaalliyaageeta oottite” giidi Yesuusi nuussi yootiis. (Maa. 28:19) Qassi issi tamaariyaa Yesuusi ba erissiyo ashkkaratuppe ay koyiyaakko tamaarissiyoogaa xalla gidennan, I hegeeta ba deꞌuwan waati oosuwan peeshshanaakkokka tamaarissana koshshees. I Geeshsha Maxaafay yootiyo maarata oosuwan peeshshanawu baaxetiyo wode nuuni danddayan A maaddana bessees. Amarida tamaareti bantta qofaanne eeshshaa guutta aginatun laammidosona; haratussi daro wodiyaa koshshiis. Peerun deꞌiya issi misoonaawee danddayanchcha gididoogan loꞌꞌo ayfiyaa demmiis. I hagaadan giis: “Raꞌula giyo Geeshsha Maxaafaa xinaatiyaa taani naaꞌꞌu maxaafata xannaꞌissaas. SHin, haꞌꞌikka A wolqqaama metoti gakkoosona. A aqo deꞌuwan ubbatoo metoy deꞌees, I hanqqetissiyaabaa darotoo haasayees, qassi A iita eeshshaa gaasuwan A naati A bonchchokkona. SHin, I shiiqota ubbatoo yiyo gishshawu, taani anne A soo asaa maaddanawu aggennan baas. Taani aara gayttoosappe heezzu layttappe dariya wodee aadhdhi simmin, I xammaqettana danddayiis.” w19.07 15 ¶3; 19 ¶15-17

PHawuloosi Piliphphisiyuusan deꞌiya Kiristtaanetussi xaafido wode, I oottiiddi deꞌiyo ubbabaa qoppa. I Roomen issi keettan qashetti uttiis. I sabbakanawu kiyana danddayeenna. Gidikkonne, A oychchanawu yiyaageetussi markkattiyoogaaninne haahuwan deꞌiya gubaaꞌetussi dabddaabbiyaa xaafiyoogan oosoy daridoogaa gididi deꞌiis. Ha wodiyankka hegaadan, sooppe kiyana danddayenna daro Kiristtaaneti bantta soo yiyaageetussi mishiraachchuwaa yootanawu banttawu danddayettida ubbabaa oottoosona. Yesuusaagaadan, ba deꞌo wode ubban minni oottana bessiyoogaa PHawuloosi eriis. Hegaa gishshawu, I Kiristtaanetu deꞌuwaa wottaara geeddarssiis. (1 Qor. 9:24-27) Issi wottanchchay ba wottaa wurssanaagaa xallaa qoppees; qassi haraban qofay shaahettanaadan oottenna. Leemisuwawu, woxxiya uri suuqetinne qofay shaahettanaadan oottiya harabati deꞌiyo ogiyaara woxxana danddayees. Issi wottanchchay suuqiyan deꞌiyaabaa beꞌanawu eqqees gaada qoppay? I xoonana koyikko hegaadan oottenna. Nuunikka deꞌuwaa wottan, nu qofay shaahettanaadan oottiyaabatuppe naagettana koshshees. Nuuni PHawuloosi oottidoogaadan ubbatoo nu gakkanaassa qoppikko, qassi minnidi Yihoowawu haggaazikko, woytuwaa demmana! w19.08 3 ¶4; 4 ¶7

Nuuni Xoossawu azazettanawu kuuyido wode, nu deꞌoynne nu ammanoy laamettiis. Nu dabboti hegaa meezetanawu metootana danddayoosona. Nuuni etaara haymaanoote baalata bonchchennaagaa, qassi polotikan walahettennaagaa eti koyro beꞌoosona. Issi issi dabboti koyro nuna hanqqettana danddayoosona. (Maa. 10:35, 36) SHin, nuuni eti laamettennabadan mule qoppana koshshenna. Nuuni ammaniyoobaa eti akeekanaadan maaddiyoogaa aggikko, hegee eti merinaa deꞌuwaa demmanawu bessokkona giidi pirddiyoogaara issi mala. Yihooway nuussi pirddiyo oosuwaa immibeenna, I he oosuwaa Yesuusawu immiis. (Yoh. 5:22, 23) Nuuni danddayanchcha gidikko, nu dabboti guyyeppe nuuni yootiyoobaa siyana danddayoosona. Paacee gakkiyo wodekka, nuuni kuuyidobaa nu dabboti laamissanaadan eeno geennan etawu kehana koshshees. (1Qor. 4:12 b) Nuuni Yihoowawu haggaaziyoogee ay keena gitabaakko nu dabboti loytti akeekiyoogee wodiya ekkana danddayees. w19.08 17 ¶10, 13; 18 ¶14

Nena gakkida paaciyaa hassayada, “Taani ta wolqqaana gidiyaakko hegaa genccana danddayikke” gaada qoppa eray? Nuuppe daroti hegaadan qoppi eroos. Neeni wolqqaama harggee sakkin woy ne siiqiyo uri hayqqin genccada aattennan aggakka. Neeni he paaciyaabaa qoppiyo wode, Yihoowa geeshsha ayyaanay neeyyo ‘ubbaappe aadhdhiya wolqqaa’ immido gishsha xallawu hegaa genccidoogaa akeekaasa. (2 Qor. 4:7-9) Ha iita alamiyaa qohuwaa eqettanawukka nuuyyo geeshsha ayyaanaa maadoy koshshees. (1 Yoh. 5:19) Qassi, nuuni “iita ayyaana wolqqatuura” baaxetana bessees. (Efi. 6:12) Paacciyaabay deꞌishinkka nuuni oottana koshshiya ubbabaa oottanaadan nuuyyo wolqqaa woy minotettaa immiyoogan, Yihoowa geeshsha ayyaanay nuna maaddees. Kiitettida PHawuloosi paace gakkishinkka aggennan Yihoowawu haggaazidoy, qassi ba oosuwaa polidoy ‘Kiristtoosa wolqqan’ ammanettido gishshataassa gidiyoogaadan awu siyettiis.—2 Qor. 12:9. w19.11 8 ¶1-3

Geeshsha Maxaafay Yesuusi neeyyo oottido tumubaa qonccissiya maxaafa. Yesuusa siiqiyoogaa tamaariyoogee neeni kaseegaappe aaruwan Yihoowa siiqanaadan oottana. Aybissi? Yesuusi ba Aawaa eeshshaa wottiyoobi baynna ogiyan kaallido gishshataassa. Hegaa gishshawu, kaseegaappe aaruwan Yesuusabaa neeni tamaariyo wode, Yihoowa loyttada erananne nashshana. Hiyyeesa, hargganchchanne daafuranchcha gidido gishshawu asay karido asatuyyo Yesuusi ay keenaa qarettidaakko qoppa. Ne galla galla deꞌuwaassi I immiyo zoriyaa, qassi neeni he zoriyaa kaalliyo wode ne deꞌoy ay keenaa giiga gidiyaakko qoppa. (Maa. 5:1-11; 7:24-27) Nu nagaray atto geetettana mala Yesuusi yarshshettidoogaa neeni wotta dentta qoppiyo wode, A siiqiyo siiqoy kaseegaappe aaruwan minnana. (Maa. 20:28) Yesuusi ne gishshawu hayqqanawu eeno giidoogaa neeni akeekiyoogee, ne nagaraappe simmanaadaaninne Yihoowa maarotaa oychchanaadan nena denttettennan aggenna. (Oos. 3:19, 20; 1 Yoh. 1:9) Neeni Yesuusanne Yihoowa kaseegaappe aaruwan siiqiyo wode, neegaadan eta siiqiya asatuura gidanawu kaseegaappe aaruwan koyana. w20.03 5-6 ¶10-12

Issi Kiristtaanee gubaaꞌiyan issibaa I ooppenne loytti oottana danddayiyaabadan qoppiyoogaa doommana danddayees. Woy qassi issi Kiristtaane machchiyaa, ‘Ha oosuwaa ta azinay hara ishaappe keehi loyttidi oottana!’ gaada qoppana danddayawusu. SHin nuuni tumuppe nuna ziqqi oottikko, hegaa mala otoro qofaappe naagettana. Harati maataa demmido wode Muusee oottidobaappe nuuni tamaarana danddayoos. Muusee Israaꞌeela deriyaa kaalettiyo ba aawatettaa nashshiis. Gidoppe attin, Muusee oottiiddi takkido amaridabaa harati oottanaadan Yihooway eeno giido wode, Muusee waanidee? I qanaatibeenna. (Qoo. 11:24-29) I bana ziqqi oottiyo gishshawu asaayyo pirddiyo oosuwan harati bana maaddanaadan eeno giis. (Kes. 18:13-24) Hegaappe guyyiyan, Israaꞌeelati he oosuwaa oottana danddayiya daro attuma asa demmido gishshawu, pirddaa demmanawu keehi daro wodiyaa naagana koshshenna. Israaꞌeela deriyaa giddon daro maataa demmiyoogaappe aaruwan, hara asaa maaddiyoogee Muusa qofissidoogaa hagee bessees. Hagee nuuyyo keehi loꞌꞌo leemiso! Yihooway nunan goꞌettanaadan koyikko, nuuyyo daro eray deꞌiyoogaappe aaruwan nuna ziqqi oottiyoogee keehi koshshiyaaba gidiyoogaa hassayoos. w19.09 5-6 ¶13-14

Kawotettati Gita Baabiloono xayssanawu gaasoyana danddayiyoobaa nuuni erokko. Kawotettatuyyo sarotettay deꞌennaadan digganawunne kawotettati oottiyooban gelanawu alamiyaa haymaanooteti ubbatoo baaxetoosona giidi kawotettati yootana danddayoosona. Woy he haymaanooteti daro duretettaanne aquwaa dagayidosona giidi kawotettati yootana danddayoosona. (Ajj. 18:3, 7) Kawotettati worddo haymaanootiyaa bolli denddiyo wode, he haymaanootiyaa kaalliya ubba asaa waayi xayssana. SHin, kawotettati haymaanooteta muleera xayssanaba milatees. He haymaanooteti xayi simmin, kase he haymaanootetu yame gididaageeti, he haymaanooteeta kaalettiyaageeti etawu oottanawu gelido qaalaa polana danddayennaagaa akeekana. Gita Baabilooni xayoy daro wodiyaa ekkennaagaa nuuni eroos. (Ajj. 18:10, 21) Yihooway ba ‘doorido asatanne’ tumu haymaanootiyaa ashshanawu waayiyaa ‘gallassatu qoodaa guuttanaagaa’ yootiis.—Mar. 13:19, 20. w19.10 15 ¶4-5

Aayetoo, hanqqettiyaanne ba naata cayiya aaway woy aayyiyaa inttena dichchennan aggokkona. Hegaa gishshawu, naata hegaadan dichchiyoogee likke giidi qoppana danddayeeta. Intte intte naata Yihooway koyiyo ogiyan waati dichchanaakko eri simminkka, ubba qassi intte daafuriyo wodenne eti inttessi azazettenna wode, woppu giyoogeenne intte naata danddayiyoogee metana danddayees. (Efi. 4:31) Intteyyo hegaadan siyettiyo wode Yihooway inttena maaddanaadan oychchiyoogee keehi koshshiyaaba. (Maz. 37:5) Issi issi aayeta metana danddayiya harabay bantta naata siiqiyoogaa etawu qonccissanawu metootiyoogaa. He aayetuppe daroti diccido keettan eta yelidaageeti bantta naatuura wozanappe waayi siiqettana. Intte hegaa mala hanotan diccikko, inttena yelidaageeti oottidoogaa mala balaa intte oottana koshshenna. Yihooway koyiyoobawu haarettiya issi aayyiyaa ba naatuyyo siiquwaa waata qonccissanaakko tamaariyoogee iyyo koshshana danddayees. Laamettiyoogee O metana danddayees. SHin A laamettana danddayaawusu; hegee anne I soo asay kaseegaappe aaruwan ufayttanaadan oottana. w19.09 18-19 ¶19-20

Yihoowayyo goynniiddi aquwaa shiishshanawu daro wodiyaa wurssiya uri, naaꞌꞌu godatuyyo haarettanawu malees giyoogaa. I goynniyoy Yihoowa xallaassa gidenna. Koyro xeetu laytta M.L. wurssettan, Lodooqiyaa giyo kataman deꞌiya gubaaꞌiyaa yameti ceeqettidi hagaadan giidosona: “Taani dure; mehiyaasa; tana ainne koshshenna.” SHin eti Yihoowanne Yesuusa xeelan “metootiya asa, qarettiya asa, hiyyeesa, qooqenne kallottida asa.” Yesuusi eta zoridoy eti dure gidiyo gishshataassa gidennan, miishshaa eti keehi siiqiyoogee Yihoowaara dabbotido dabbotaa moorido gishshataassa. (Ajj. 3:14-17) Nuuni miishshaa siiqiyoogaa doommidoogaa akeekikko, nu qofaa eesuwan giigissana bessees. (1 Xim. 6:7, 8) Nuuni hegaadan oottana xayikko, harabaa keehi siiqiyoogaa doommana; qassi nu goynuwaa Yihooway ekkenna. I “qanaatiya Xoossaa.”—Zaa. 4:24. w19.10 27 ¶5-6

“Kaalettin” geetetti birshshettida Giriiketto qaalay “sugin biyoogaa” giyoogaa. Oosuwaa maxaafaa xaafida Luqaasi, carkkoy ‘efiyoosaa yeddi bayiyo’ markkabiyaa qonccissanawu, PHeexiroosi goꞌettidoogaa mala Giriiketto qaalaa goꞌettiis. (Oos. 27:15) Kiitettida PHeexiroosi Geeshsha Maxaafaa xaafidaageeta geeshsha ayyaanay ‘kaalettidoogaa’ xaafiyo wode, markkabiyaa laaguwaabaa asay qoppanaadan oottiya qaalaa goꞌettidoogaa issi Geeshsha Maxaafaa eranchchay yootiis. Markkabee biyoosaa gakkanaadan carkkoy sugiyoogaadan, Geeshsha Maxaafaa xaafeti xaafanaadan geeshsha ayyaanay kaalettidoogaa PHeexiroosi yootiis. Geeshsha Maxaafaa xaafeti ‘eta sharay xoqqu giido’ markkabe mala gidiyoogaakka he eranchchay yootiis. Yihooway I oottana koshshiyaabaa oottiis. I ‘carkkuwaa’ woy geeshshaa ayyaana immiis. Geeshsha Maxaafaa xaafeti eti oottanaadan imettida oosuwaa oottidosona. Eti he ayyaanaa kaaletuwaa kaallidosona. Abban beetay denddikkonne, issi markkabee ba biyoosaa gakkanawu likke ginaara carkkiya carkkuwaa goꞌettana danddayees. Hegaadan, Xoossay qaalaa gelido ooratta alamiyaa gelana gakkanawu nuuni metoy deꞌishinkka Yihoowawu ubbatoo haggaazanaadan geeshsha ayyaanay maaddees. w19.11 9 ¶7-9

Nuussi issi issitoo hidootaa qanxxidabadan siyettana danddayees. SHin nuuni ubba wode nu metuwaabaa qoppana koshshenna. Nuuni hegaa qoppikko, Yihooway nuussi qaalaa gelido loꞌꞌobaa ubbaa dogana danddayoos. (Ajj. 21:3, 4) Nuuni keehi hidootaa qanxxidi, shuggananne Yihoowawu haggaaziyoogaa aggana danddayoos. Amarkkan deꞌiya issi michchiyaa keehi sahettiya ba azinawu koshshiyaabaa kunttaydda ba ammanuwaa waata naagada deꞌidaakko beꞌa. A hagaadan gaasu: “Issi issitoo nu hanotay nuuni unꞌꞌettanaadaaninne hidootaa qanxxanaadan oottees; shin nu hidootay mino. Nu ammanuwaa minttanawunne nuna minttettanawu Yihooway nuussi immiyo ubbabawu keehi galatays. Ha zoreenne minttettoy nuussi koshshees. Hegee nuuni aggennan Yihoowawu haggaazanaadaaninne genccanaadan maaddees.” Ha michchiyaa yootidobaappe nuuni hidootaa qanxxissiyaabaa xoonana danddayiyoogaa tamaaroos! Waanidi? Nena gakkiya metoy Seexaanaappe yiyoogaa hassaya. Yihooway nena minttanaagaa ammanetta. Qassi I immiyo ayyaana qumaa nashsha. w19.11 16 ¶9-10

Cimati Geeshsha Maxaafaa maaraa oosuwan peeshshiyoogee keehi koshshiyaaba. Issi cimay gubaaꞌiyan deꞌiyaageetu “xuuraa” yootana bessennaagaa akeekees. I yootikko, harati an ammanettokkona, qassi A loꞌꞌo sunttay moorettana. Gubaaꞌiyan aawatettay deꞌiyoogeeti “naa77a haasayennaageeta” woy cimmennaageeta gidana koshshees. (1 Xim. 3:8) Hegaa giyoogee eti cimmana woy zigirana koshshenna giyoogaa. Issi cimay ba keettayiyo siiqikko, A erana koshshennabaa iyyo yootenna. Issi machchiyaa ba keettaaway xuurabaa bawu yootanaadan isettennan aggiyoogan ba keettaawawu loꞌꞌo sunttay deꞌanaadan maaddana danddayawusu. Issi machchiyaa ha zoriyaa oosuwan peeshshiyo wode, ba azinaa kaafiyoogaa xalla gidennan, xuurabaa ba azinawu yootidaageeta bonchchiyoogaakka bessawusu. Ubbaappe aaruwan, A gubaaꞌiyan sarotettaynne issippetettay deꞌanaadan maaddiyo gishshawu, Yihoowa ufayssawusu.—Roo. 14:19. w20.03 22 ¶13-14

Xoossaa dunkkaanee Siinaa Deriyaa matan 1512n K.K. tolettido wode, Muusee Aarooninne A naati qeese gidanaadan sunttettido wogaa kaalettiis. (Kes. 40:17; Wog. 9:1-5) Mati qeese gididi sunttettidaageetun Yihooway ufayttidoogaa waati bessidee? Aarooninne Muusee asaa anjjido wode, yarshshiyoosaa bollan deꞌiya yarshshuwaa muleera maanaadan Yihooway saluwaappe tamaa yeddiis. (Wog. 9:23, 24) Saluwaappe wodhdhida tamay ay qonccissii? Qeese gidanaadan doorettida Aaroonaaninne A attuma naatun ufayttidoogaanne eta sunttidoogaa bessanawu Yihooway saluwaappe he tamaa yeddiis. Qeeseta Yihooway sunttidoogaa bessiya he qoncce naqaashaa Israaꞌeelati beꞌido wode, eti he qeesetuura hashetana koshshiyoogaa akeekidosona. Israaꞌeelatu qeesetettan Yihooway ufayttidoogee ha wodiyan nuussi keehi koshshiyoy aybissee? He qeesetettay hegaappe aadhdhiya qeesetettawu eeshsho gidido gishshataassa. Qeesenne kawo gididi Qeese Ubbatu Halaqaa gitaa, Kiristtoosaara saluwan oottana 144,000ti deꞌoosona. (Ibr. 4:14; 8:3-5; 10:1) Yihooway ha wodiyan ba dirijjitiyaa kaalettiiddinne darissidi anjjiiddi deꞌiyoogaa akeekana danddayoos. w19.11 23 ¶13; 24 ¶14, 16

Kiitettida PHawuloosi Qoronttoosan deꞌiyo wode, Aqiilaaranne PHirisqqiliira takkiis; qassi “A oosoinne eta oosoi issi mala dunkkaane siho gidiyo gishshau, etaara uttidi, issippe oottiis.” PHawuloosi “qamminne gallassi” oottiis giyoogee I aggennan oottiis giyoogaa gidenna. I dunkkaaniyaa sikkiyo oosuwaa Sambbatan oottibeenna. Aagaadan Sambbatan oottenna Ayhudatussi sabbakanawu I he gallassaa goꞌettiis. (Oos. 13:14-16, 42-44; 16:13; 18:1-4) PHawuloosi oosuwaa oottees; shin geeshsha gidida “Xoossaa wonggeliyaa mishiraachchuwaa” ubbatoo yootees. (Roo. 15:16; 2 Qor. 11:23) I haratikka ubbatoo sabbakanaadan minttettiis. Aqiilinne PHirisqqila PHawuloosaara “Kiristtoos Yesuusa oosuwaa . . . issippe” oottidosona. (Roo. 12:11; 16:3) PHawuloosi Qoronttoosan deꞌiyaageeti “Godaa oosuwan oottiyo darobay” deꞌiyoogeeta gidanaadan minttettiis. (1 Qor. 15:58, NW; 2 Qor. 9:8) Kiitettida PHawuloosi, “Oottanau koyenna urai ooninne mooppo” giidi xaafanaadankka Yihooway A denttettiis.—2 Tas. 3:10. w19.12 5 ¶12-13

Yihooway koyro azinaanne machchiyo naata yeliyo koshshay etawu deꞌanaadan oottidi medhdhiis. Azinaynne machchiyaa naata yelanawu koyikko, ooni kuuyana koshshii? Mati aqo oyqqidaageeti sohuwaara yelana bessees giidi issi issi wogatun asay qoppees. Sohuwaara naata yelanaadan eta soo asaynne harati azinaanne machchiyo ammanttanawu malana danddayoosona. Isiyaa biittan deꞌiya Jetiro giyo issi ishay, “Gubaaꞌiyan, naati deꞌiyo amarida azinatinne machchoti harati naata yelanaadan minttettoosona” yaagiis. Isiyaa biittan deꞌiya Jefiri giyo hara ishay, “naꞌi baynna azinaynne machchiyaa cimiyo wode eta heemmiya asi baawa giidi issoti issoti etawu yootiyoogaa” akeekiis. SHin, azinaynne machchiyaa naata yelanaakko agganaakko banttawu kuuyana koshshees. Hegee eti kuuyiyoobanne eta aawatetta. (Gal. 6:5.) Laggetinne so asay mati aqo oyqqidaageeti ufayttanaadan koyiyoogee qoncce. SHin naꞌa yeliyoogee woy aggiyoogee azinaynne machchiyaa kuuyiyooba gidiyoogaa ubbay hassayana koshshees.—1 Tas. 4:11. w19.12 22 ¶1-3

Xoossaa ne aawaadan xeellanawu neeni metootay? Issoti issoti Yihoowaara banttana geeddarissidi pattennabadan qoppoosona. Eti Ubbaa Danddayiya Xoossay etayyo qoppiyoogaa siroosona. SHin siiqiya nu aaway nuussi hegaadan siyettanaadan koyenna. I nuuyyo deꞌuwaa immiis; qassi aara nuuni dabbotanaadan koyees. Kiitettida PHawuloosi ha tumaa yooti simmidi, Yihooway “nuuppe ooyyoonne haaho” gidennaagaa, Ateenan I yootiyoobaa siyiyaageetuyyo qonccissiis. (Oos. 17:24-29) Issi naꞌi siiqiyaanne qoppiya aawaara haasayiyoogaadan, Xoossay nuuni ubbay aara haasayanaadan koyees. Harati qassi eta aaway darin woy mule siiqennanne kehenna gishshawu, Yihoowa bantta Aawaadan xeellanawu metootoosona. Issi michchiyaa hagaadan gaasu: “Ta aaway tana guutti cayees. Taani Geeshsha Maxaafaa xannaꞌiyoogaa doommido wode, saluwan deꞌiya Aawaakko shiiqidabadan qoppiyoogee tawu keehi metiyaaba. SHin, taani Yihoowa era simmin ubbabay laamettiis.” Neeyyo hegaadan siyettii? Yaatikko, Yihooway ooppenne aadhdhiya Aawa gidiyoogaa neenikka erana danddayiyoogaa ammanetta. w20.02 3 ¶4-5

Nuuni gitatiyo wode, nu oottiyoobay pattennaba nuussi milatiyo wodekka, Yihoowa haggaazuwan oottiyo aybakka I xoqqu ootti xeelliyoogaa Yesuusi tamaarissiis. (Maz. 92:12-15; Luq. 21:2-4) Hegaa gishshawu, neeni oottana danddayiyooban xeelaa wotta. Leemisuwawu, Yihoowabaa yootana, ne ishanttussi woossana, qassi ammanettidi deꞌanaadan harata minttettana danddayaasa. Yihooway neeni aara issippe oottanaadan koyiyoy, neeni oottiyoobaa danddayiyo gishshataassa gidennan, neeni eeno gaada ayyo azazettiyo gishshataassa. (1 Qor. 3:5-9) Baayyo oottiyaageeta wozanappe nashshiya Xoossaa Yihoowawu nuuni goynniyoogee keehi bessiyaaba! Nuuni A sheniyaa polanaadan I nuna medhdhiis; qassi tumu goynoy nuuni nu deꞌuwan ufayttanaadan oottees. (Ajj. 4:11) Ha alamee nuna pattennabadan xeellikkonne, Yihooway nuna hegaadan xeellenna. (Ibr. 11:16, 38) Harggee, gidiya miishshaa demmanawu metootiyoogee woy cimatettay nuuni hidootaa qanxxanaadan oottiyo wode, saluwan deꞌiya nu Aawaa siiquwaappe nuna aybinne shaakkana danddayennaagaa hassayoos.—Roo. 8:38, 39. w20.01 18 ¶16; 19 ¶18-19

Nuuni nu huuphiyaa ziqqi oottiyoogaaninne nuussi deꞌiyaaban ufayttiyoogan qanaatiyaa eqettana danddayoos. Ha eeshshati nuussi deꞌikko, nuuni qanaatokko. Nuna ziqqi oottiyoogee nubaa bessiyaagaappe aaruwan qoppennaadan maaddana. Bana ziqqi oottiya uri haratu ubbaappe aaruwan tawu bessees giidi qoppenna. (Gal. 6:3, 4) Bawu deꞌiyaaban ufayttiya uri bana haraatuura geeddarssenna. (1 Xim. 6:7, 8) Bana ziqqi oottiyaanne bawu deꞌiyaaban ufayttiya asi issi uri loꞌꞌobaa demmidoogaa beꞌiyo wode hegan ufayttees. Qanaatennaadan, nuna ziqqi oottanaadaaninne nuussi deꞌiyaaban ufayttanaadan Xoossaa geeshsha ayyaanaa maadoy nuussi koshshees. (Gal. 5:16; Pili. 2:3, 4) Yihoowa geeshsha ayyaanay nu giddon deꞌiya qofaanne nu koshshaa qoranaadan nuna maaddees. Xoossay maaddin, nu qoppiyoonne nuussi siyettiya qohiyaabaa aggidi minttettiyaabaa qoppana danddayoos.—Maz. 26:2. w20.02 15 ¶8-9

Xammaqetta simmada nena sheedhdhiyo wode gelido qaalaa naaganaadan, qassi ne gubaaꞌiyaakko shiiqada deꞌanaadan Yihooway koyees. Gubaaꞌiyan deꞌiya ne ishanttinne michchontti neeyyo ayyaanaaban so asa. Ubbatoo shiiquwaa shiiqiyoogan etaara dabbotaa minttada deꞌaasa. Galla galla Xoossaa Qaalaa nabbabanne hegaa wotta dentta qoppa. (Maz. 1:1, 2) Neeni Geeshsha Maxaafaappe amarida qofaa nabbaba simmada, amarida wodiyaa hegaa takki gaada loytta qoppa. He wode ne nabbabidobay ne wozanaa denttettana. Ubbatoo ‘woossa.’ (Maa. 26:41) Neeni wozanappe woossiyoogee Yihoowakko kaseegaappe aaruwan shiiqanaadan maaddana. ‘Kasetada Xoossaa Kawotettaa koya.’ (Maa. 6:33) Sabbakiyo oosuwaa ne deꞌuwan sinttayiyoogan hegaadan oottana danddayaasa. Ubbatoo sabbakiyoogee ne ammanoy minnidi deꞌanaadan oottana; qassi harati merinaa deꞌuwaa hidootaa demmanaadan maaddana danddayees. Ha ceega alamiyan nena gakkana danddayiya ay metoykka “ha77issau” gakkiya ‘guuttaba.’ (2 Qor. 4:17) SHin, neeni ne huuphiyaa sheedhdhiyoogeenne xammaqettiyoogee haꞌꞌi loꞌꞌo deꞌuwaa deꞌanaadan, qassi sinttappe “tumu de7uwaa” demmanaadan oottana. Hegawu goꞌꞌi deꞌii? Ee, deꞌees!—1 Xim. 6:19. w20.03 13 ¶19-21

Neeni xannaꞌissiyo uri ba deꞌuwan laamettennaagaa gidikko, nena hagaadan oychcha: ‘Taani xannaꞌissiyoogaa aggana koshshii?’ Neeni hegaa kuuyanaappe kase, he uraa abbiyaa yuushsha qoppana koshshees. Ayyaanaaban dicciyoogee issi issi asawu haratuugaappe daro wodiyaa ekkana danddayees. Nena hagaadan oychcha: ‘Ta xinaatee ba abbiyaa keenaa dicciiddi deꞌii?,’ ‘I tamaariyoobata “akeekiyoogaa” woy oosuwan peeshshiyoogaa doommidee?’ (Maa. 28:20) Issi issi xinaateti Hizqqeela wode deꞌida Israaꞌeelatu mala gidiyoogee azzanttiyaaba. Etabaa Yihooway Hizqqeelawu hagaadan giis: “Be7a, neeni etayyo issi siiqo mazamuriyaa lo77o cenggurssan yexxiyaanne diittaa loittidi diixxiya asa mala. Aissi giikko, eti neeni odiyoogaa siyoosona; shin issuwaakka oottokkona.” (Hiz. 33:32) Issi ura xannaꞌissiyoogaa agganaagaa yootiyoogee nuna metana danddayees. Giddoppe attin, “wodee wuriis.” Nuuni dichchaa bessenna xinaatiyaa xannaꞌissiiddi daro wodiyaa wurssiyoogaappe ‘merinaa deꞌuwaa’ demmanawu suure wozanaa koshshay deꞌiyo hara uraa koyana koshshees.—Oos. 13:48. w20.01 6 ¶17; 7 ¶20

Azazettiya asay saꞌan merinawu deꞌanaagaa Geeshsha Maxaafay yootiyo tumaa banttana Kiristtaane giyaageeti tamaarissokkona. (2 Qor. 4:3, 4) Ha wodiyan, banttana Kiristtaane giyaageetu giddon deꞌiya daro haymaanooteti loꞌꞌo asa ubbay hayqqiyo wode saluwaa bees giidi tamaarisoosona. SHin, qoodan guutta Geeshsha Maxaafaa Tamaareti 1879⁠ppe doommidi attamissiyo Wochiyo Keelan qoncciya timirttiyaappe hegee dummatees. Eti Xoossay zaarettidi saꞌaa Gannate oottanaagaanne miilooniyan qoodettiya azazettiya asay saluwan gidennan, ha saꞌan deꞌanaagaa akeekidosona. Gidoppe attin, he azazettiya asay oonakko loytti shaakkanawu etawu daro wodiyaa koshshiis. Geeshsha Maxaafaa Tamaareti ‘saꞌaappe wozettana’ amarida asay Yesuusaara saluwan haaranaagaakka Geeshsha Maxaafaappe akeekidosona. (Ajj. 14:3) He citay saꞌan deꞌiyo wode Xoossaayyo ammanettidi oottida, minnidi oottiyaanne ayyo aqida 144,000 Kiristtaaneta. w19.09 27 ¶4-5