Hidaare

Ha wodiyan daro asay, ubba qassi tamaaridaageeti Geeshsha Maxaafay yootiyo zoree maaddenna goosona. Eti, harati neeppe aadhdhiyaabadan neeni qoppikko, he asati banttawu goꞌettanawu nena naaqqana yaagoosona. SHin, Seexaanaa alamee minttettido qofay ay kaalettidee? Ba xallaa siiqiya asay ufayttii? Eta so asay ufayttii? Etassi tumu laggeti deꞌiyoonaa? Eti Xoossaayyo mata dabbo gididonaa? Neeni akeekido, aybippenne loꞌꞌo ayfiyaa demissiyay awugee—ha saꞌaa aadhdhida eratettaa kaalliyoogeeyye, Xoossaa Qaalan deꞌiya aadhdhida eratettaa kaalliyoogee? (1 Qor. 3:19) Ha saꞌay aadhdhida eranchchadan xeelliyo asatu zoriyaa kaalliya asay, ogiyaa balidi banaara biya ura likke ogiyaa oychchiya asa mala. Yesuusi he wode deꞌiya “eranchcha” asata xeelliyaagan, “Eti qooqe kaalettiya qooqeta; qooqee qooqe kaalettikko, naa77aikka ollan kunddana” yaagiis. (Maa. 15:14) Tumukka ha saꞌaa aadhdhida eratettaa kaalliyoogee Xoossaa sinttan eeyyatetta. w19.05 24-25 ¶14-16

Mata wodeppe haa simmin, Godaa Kahuwaa bonchchiyo wode oyttaa miyaanne woyniyaa uyiya asaa qooday layttan layttan gujji gujjidi bees. Hegaabay nuna qofissana bessii? Bessenna. “Godai baageeta erees.” (2 Xim. 2:19) Yihoowappe attin, Godaa Kahuwaa bonchchiyo wode asaa qoodiyaageeti tiyettidaageeti oonakkonne erokkona. Yaatiyo gishshawu, oyttaa miyaanne woyniyaa uyiya asaa qoodan ayyaanan tiyettidabadan qoppidi miyaanne uyiya asatikka deꞌoosona. Leemisuwawu, issi wode oyttaa miyaanne woyniyaa uyiya asati guyyeppe aggidosona. Unꞌꞌettiyoogaa gaasuwan harati saluwan Kiristtoosaara haarana gi qoppidi hegaadan oottennan aggokkona. Ayyaanan tiyettidaageetuppe saꞌan attidaageeti aappunakko nuuni aybanne erennaagee qoncce. Yesuusi tiyettidaageeta saluwaa efaanawu yiyo wode eti saꞌan ubbasan deꞌana. Tiyettidaageetuppe wurssetta gallassatun amaridaageetu xallay saꞌan attanaagaa Geeshsha Maxaafay yootees. (Ajj. 12:17, NW) Gidikkonne, gita waayee doommiyo wode etappe saꞌan woqqay deꞌanaakko Geeshsha Maxaafay yootenna. w20.01 29-30 ¶11-13

Yihooway ba naata ay keenaa siiqiyaakko Yesuusi bayida naꞌaa taarikiyan qonccissiis. (Luq. 15:11-32) He leemisuwan qonccida aaway ba naꞌay simmidi yaanaagaa hidootan naagiyoogaa mule aggibeenna. Naꞌay soo simmiyo wode, aaway ufayttidi mokki ekkiis. Nuuni Yihoowappe haakkikkonne nu nagaraappe simmiyo wode, siiqiya nu Aaway nuna mokki ekkanawu giigi uttidoogaa ammanettana danddayoos. Addaame gaasuwan yiida qohuwaa ubbaa nu Aaway xayssana. Addaamee makkali simmin, asaa giddoppe Yihooway ba Naꞌaara saluwan kawonne qeese gididi haarana 144,000 asata dooriis. Yesuusinne aara haariyaageeti azazettiya asay ooratta alamiyan wottiyoobi baynnaageeta gidanaadan maaddana. Eti azazettiyoogan wurssettaa paaciyaa aadhdhi simmin, Xoossay etawu merinaa deꞌuwaa immana. Hegaappe simmin, nu Aaway nagari baynna attumanne macca naatun saꞌay kummidoogaa beꞌidi ufayttana. Hegee keehi ufayssiya wode gidana! w20.02 6-7 ¶17-19

Nuuni ubbaykka nuna hagaadan oychchana koshshees: ‘Taani Kiristtaane gidanawu laamettiyoobay haratussi beettiyaaba xallaara gayttidabeeyye, woy ta wozanaaninne qofan tumuppe Kiristtaane gidaydda deꞌiyaanaa?’ Hegeetu giddon dummatettay deꞌana bessees. Yesuusi Maatiyoosa 12:43-45n yootidoban oottana koshshiyaabaa qonccissiis. He qaalati ha keehi koshshiyaabaa tamaarissoosona: Iita qofata xayssiyoogaa xallay gidenna; nuuni Xoossaa ufayssiya qofatun eta laammana koshshees. Nuuni garssa asatettan laamettana danddayiyoo? Xoossaa Qaalay hagaadan gees: “Tumu xillotettaaninne geeshshatettan Xoossaa leemisuwan merettida ooratta asatettaa maayite.” (Efi. 4: 24) Ee, nuuni garssa asatettan laamettana danddayoos, shin hegaadan oottiyoogee metiyaaba. Nuuni iita amuwaa eqettiyoogaappenne iitabaa oottiyoogaa aggiyoogaappe aadhdhiyaabaa oottana bessees. Nuuni nu ‘wozanaaninne qofan muleera’ laamettana koshshees. Hegee nuuni amottiyooban, nu eeshshaaninne nuuni issibaa oottiyo ogiyan laamettiyoogaa xaaxi waaxees. Hegee ubbatoo baaxetana koshshiyaaba. w19.06 9-10 ¶6-7

Looxanne A soo asaa ashshanawu kiitanchchata kiittiyoogan Yihooway ayyo qarettiyoogaa bessiis. SHin Looxee kiyennan “takkiis.” He kiitanchchati A kushiyaa oyqqidi inne A soo asay katamaappe baqatanaadan maaddidosona. (Doo. 19:15, 16, NW) He wode I deriyaakko baqatanaadan he kiitanchchati yootidosona. SHin, Looxee Yihoowayyo azazettiyoogaappe, matan deꞌiya katamaa baanawu oychchiis. (Doo. 19:17-20) Yihooway danddayan I yootiyoobaa siyiis, qassi Looxee he katamaa baanaadan eeno giis. Looxee guyyeppe he sohuwan deꞌanawu yayyidi, Yihooway I baanaadan koyro yootido deretiya sohuwaa biis. (Doo. 19:30) Yihooway Looxa keehi danddayiis! Looxeegaadan, nuuyyo ayyaanaaban so asa gididaageetikka loꞌꞌo gidennabaa kuuyananne bantta bolli gita metota ehaana danddayoosona. Hegaa malabay merettikko, nuuni waatanee? I ba zeridoogaa cakkiiddi deꞌiyoogaa ayyo yootanawu nuuni paacettana danddayoos, qassi hegee tuma. (Gal. 6:7) Gidikkonne, nuuni hegaappe loꞌꞌobaa oottana danddayoos. Yihooway Looxa maaddidoogaadan nuuni A maaddana danddayoos. w19.06 20-21 ¶3-5

Nu morkketi nu goynuwaa muleera teqqiyo wode, Yihoowawu haggaazennaadan nuna yashissanawu koyoosona. Eti nu goynuwaa muleera teqqiyoogaa bolli, nubaa worddobaa aassana, sunttati nu keettaa qoridi koyanaadan kiittana, nuna shilootan essanawu giddana, woy qassi nuuppe amaridaageeta qashissana danddayoosona. Eti nuuppe amaridaageeta qashissidoogee nuuni yayyanaadan oottees giidi qoppoosona. Nuuni etanne eti nu bolli oottiyoobaa yayyikko, nuuni Yihoowawu kaseegaadan haggaaziyoogaa aggana woy qassi haggaaziyoogaa mule essana danddayoos. Nuuni Wogaabaa 26:36, 37n odettida asatu mala gidana koyokko. Yashshay nuuni Yihoowawu kaseegaadan haggaaziyoogaa agganaadan woy qassi haggaaziyoogaa mule essanaadan oottana mala koyokko. Nuuni wozanappe Yihoowan ammanettoos, qassi yayyokko. (Maz. 27:1) Nuuni Yihoowa kaaletuwaa woosan oychchoos. Nu Xoossay nuna maaddiyo gishshawu, nuuni nu Xoossawu ammanettidi goynnennaadan keehi wolqqaama kawotettaykka teqqana danddayennaagaa nuuni eroos. Yedetay nuuni Yihoowayyo haggaazanawu yayyennaadaaninne kaseegaappe aaruwan haggaazanawu murttanaadan maaddana danddayees. w19.07 9-10 ¶6-7

Erissiyo ashkkara gidanawu koyiya ura hanno gakkanawu neeni demmabeennaba gidikkokka, koyiyoogaa aggoppa. Erissiyo ashkkara oottiyaageeti moliyaa oyqqiya asa mala giidi Yesuusi yootidoogaa hassaya. Moliyaa oyqqiyaageeti ayba molenne oyqqennan daro saatiyaa wurssana danddayoosona. Eti darotoo qamma bilahe woy wonttimaatti oottoosona, qassi issi issitoo haahosaa boosona. (Luq. 5:5) Hegaadan, issi issi Kiristtaaneti dumma dumma wodiyaaninne sohuwan, danddayan sabbakiyoogan daro saatiyaa oottoosona. Aybissi? Yaatiyoogan, eti daro asaa demmoosona. Hegaadan minnidi oottiyaageeti nu yootiyoobaa siyanawu koyiya asaa darotoo demmiyo gishshawu anjjettidosona. Neeni asaa demmana danddayiyo wodiyan woy eta demmana danddayiyo sohuwan sabbakanawu baaxetana danddayay? Geeshsha Maxaafaa xannaꞌissiyoogee danddayaa koshshiyoy aybissee? Tamaaree Geeshsha Maxaafay tamaarissiyoobaa eranaadaaninne siiqanaadan nuuni maaddana bessees. Tamaaree Geeshsha Maxaafaa xaafissida Yihoowa eranaadaaninne siiqanaadan nuuni maaddana koshshees. w19.07 18-19 ¶14-15

Nuuppe issoti issoti kase oottido nagaraa gaasuwan nuna mooranchchadan xeelliyoogaa agganawu baaxetiyoogee koshshennan aggenna. Ne hanotay hegaa mala gidikko, Kiristtoosa wozuwaa yarshshuwaabaa xannaꞌa. He minttettiya qofaa xannaꞌikko, wotti dentti qoppikko, qassi woossikko, koshshennan nuna mooranchchadan xeelliyoogaa aggana danddayoos. Yihooway atto giichchido nagarawu nurkka nuna qaxxayiyoogaa aggana danddayoos. Nuuni PHawuloosappe tamaarana danddayiyo harabaa qoppa. Issoti issoti Yihoowayyo kaseegaappe aaruwan oottanawu, banttana dureyana danddayiya oosuwaa aggennan waayi aggana. Yaatikko, nuuni demmana danddayiiddi aggidobaa amottiyoogaa aggikko, guyyeera deꞌiyaabaa dogoos. (Qoo. 11:4-6; Era. 7:10) Nuuni Yihoowawu oottidobati woy kase genccido metotikka ‘guyyeera deꞌiyaabata.’ Yihooway nuna kase ay keena maaddidaakko qoppiyo wode, nuuni kaseegaappe aaruwan nu Aawaakko shiiqana danddayoos. SHin, nuuni Yihoowawu oottidobay gidana giidi mule qoppana koyokko.—1 Qor. 15:58. w19.08 3 ¶5-6

Nuuni awan deꞌikkokka, awudenne Xoossaa woossana danddayoos. Nu woosaa siyanawu I awudenne wode xayenna; I ubbatoo nu woosaa siyees. Yihooway nu woosaa siyiyoogaa nuuni nashshiyo wode, akko shiiqoos. Mazamuraawee, “I ta cenggurssaa . . . siyido gishshau, taani GODAA siiqais” yaagiis. (Maz. 116:1) Nu Aaway nu woosaa siyiyoogaa xalla gidennan, nu woosaa zaarees. Kiitettida Yohaannisi, “Xoossai koyiyoogaadan, ainne nuuni a woossikko, i [siyees]” yaagiis. (1 Yoh. 5:14, 15) Nuuni naagido ogiyan Yihooway nu woosaa zaarennan aggana danddayiyoogee qoncce. I nuuyyo aybi loꞌꞌokko erees; yaatiyo gishshawu, issi issitoo zaarenna woy qassi nu naaganaadan I koyees. (2 Qor. 12:7-9) Yihooway nuussi koshshiyaabaa kunttees. Aawati ubbay oottanaadan I koyiyoobaa ikka oottees. (1 Xim. 5:8) I ba naatuyyo deꞌuwaassi koshshiyaabaa immees. Nuuni miyoobawu, maayiyoobawu woy deꞌiyoosawu hirgganaadan koyenna. (Maa. 6:32, 33; 7:11) Yihooway siiqiya Aawaa gidiyo gishshawu, sinttappe nuuyyo koshshiyaabay deꞌanaadankka oottees. w20.02 5 ¶10-12

Saluwaa biyo hidootay deꞌiyo ubbay ‘ammanettida wozannaama ashkkaraa’ yara gidenna. (Maa. 24:45-47) Koyro xeetu layttaagaadan, Yihoowaynne Yesuusi ha wodiyankka guutta asatun darota miziiddi, woy tamaarissiiddi deꞌoosona. Koyro xeetu layttan, Giriikettuwan Xaafettida Geeshsha Maxaafaa xaafanaadan Yihooway ayyaanan tiyettidaageetuppe amaridaageeta goꞌettiis. Ha wodiyankka, Xoossaa asawu “qumaa koshshiyo wodiyan” immanaadan tiyettida amarida Kiristtaanetu xallay sunttettidosona. Yihooway ba asaappe dariya baggawu saꞌan merinaa deꞌuwaa immanawunne amaridaageeti Yesuusaara saluwan haaranaadan kuuyiis. Yihooway ‘Ayhuda bitaniyan’ leemisettida ba ashkkaratakka ‘tammu asatun’ leemisettida ba ashkkaratakka woytana; qassi I eti ubbay issi mala higgiyaa azazettanaadaaninne ammanettidi deꞌanaadan koyees. (Zak. 8:23) Ubbay banttana ziqqi oottidi deꞌana bessees. Ubbay maayettidi issippe awu oottana bessees. Qassi ubbay gubaaꞌiyan sarotettay deꞌanaadan baaxetana bessees. Wurssetta gallassay wurana haniyo ha wodiyan, Yihoowayyo ubbatoo haggaaziyaageetanne ‘issi wude’ gididi Kiristtoosa kaalliyaageeta gidoos. w20.01 31 ¶15-16

Nu dabboti tumaa eranaadan wolqqanttokko, shin eti Geeshsha Maxaafay yootiyoobaa yuushshi qoppanaadan minttettana danddayoos. (2 Xim. 3:14, 15) Loꞌꞌo leemiso gida. Darotoo, nu dabboti nuuni haasayiyoobaappe aaruwan nuuni oottiyoobaa akeekoosona. Ne dabbota maaddanawu baaxetiyoogaa aggoppa. Yihooway hegan nuussi leemiso gidees. I asay mishiraachchuwaa siyidi deꞌuwaa demmanaadan ‘zaari zaaridi’ odissiis. (Erm. 44:4) Qassi, harata aggennan maaddanaadan kiitettida PHawuloosi Ximootiyoosassi yootiis. Aybissi? Yaatikko, inne I yootiyoobaa siyiyaageeti attiyo gishshataassa. (1 Xim. 4:16) Nuuni nu dabbota siiqiyo gishshawu, Xoossaa Qaalan deꞌiya tumaa eti eranaadan koyoos. w19.08 14 ¶2; 16-17 ¶8-9

Issi uri nuna zorikko, geella nuuni akeekibeenna iita balaa balido gishshawu I zoriyoogaa hassayana koshshees. Hegaa mala wodiyan, issi uri nuussi zoriyaa immiyo wode, nu he zoriyaa sohuwaara eqettennan waayi aggana. Nuuni zoriyaa immida uraa woy I zorido ogiyaa borennan waayi aggana. Gidoppe attin, nuuni nuna ziqqi oottikko, bessiyaagaadan xeellanawu baaxetana. Bana ziqqi oottiya uri zoriyaa gishshawu galatees. Leemisuwawu, neeni shiiquwan deꞌiyaabadan qoppa. Neeni amarida asatuura haasaya simmin, etappe issoy nena xeegidi asaappe gaxi kessidi ne achchan qumay deꞌiyoogaa yootees. Neeni yeellatanaagee qoncce. SHin I woy A hegaa neeyyo yootidoogawu galatikkii? Issi uri tawu sohuwaara yootidaba gidernneeshsha gaana danddayaasa! Hegaadankka, nuuyyo zoree koshshiyo wode issi ishay woy michchiyaa nuussi zoriyaa immikko, nuna ziqqi oottananne galatana koshshees. He uraa nuuni nu laggedan xeelloosippe attin, morkkedan xeellokko.—Lee. 27:5, 6; Gal. 4:16. w19.09 5 ¶11-12

Yihooway aayeessi so giddon keehi koshshiya aawatettaa immiis; qassi A ba naata tamaarissiyo amarida maataa iyyo immiis. Issi aayyiyaa oottiyoobaynne haasayiyoobay I naata eta deꞌo layttan maaddana woy qohana danddayees. (Lee. 22:6) Aayeti Yesuusa aayee Mayraamippe ay tamaarana danddayiyaakko akeekite. Mayraama Geeshsha Maxaafaa loyttada erawusu. A Yihoowa wozanappe bonchchada, qassi assi mata dabbo gidada deꞌaasu. A Yihooway koyiyoobaa oottiyoogee I deꞌuwan ubbabay laamettanaadan oottikkonne, yaatanawu eeno gaasu. (Luq. 1:35-38, 46-55) Aayetoo, daro ogiyan Mayraami leemisuwaa kaallana danddayeeta. Waatidi? Koyroogee, intte intterkka Geeshsha Maxaafaa xannaꞌiyoogaaninne ubbatoo woossiyoogan Yihoowaara dabbotidi deꞌana koshshees. Naaꞌꞌanttoogee, Yihoowa ufayssanawu intte deꞌuwan issi issibaa laammanawu eeno gaana koshshees. w19.09 18 ¶17-19

Yohaannisi sinttanaabaa xeelliyaagan ufayssiya ajjuutaa beꞌiis. He ajjuutan, Xoossaa ashkkaratu somꞌꞌuwan wurssetta maatafaa wottana gakkanaashin iita waayiyaa carkkoy carkkennaadan teqqana mala kiitanchchatussi odettiis. (Ajj. 7:1-3) Yesuusaara saluwan haarana 144,000ti he citan deꞌoosona. (Luq. 12:32; Ajj. 7:4) Hegaappe simmin, Yohaannisi hara citaabaa qonccissiis; he keehi daro asaabaa hagaadan giis: “Hegaappe guyyiyan, zare ubbaappe, qommo ubbaappe, yara ubbaappenne dumma dumma biitta qaala ubbaappe ooninne qoodanau danddayenna zawai bainna daro asaa taani be7aas. He asai . . . , kawotaa araataa sinttaaninne Dorssaa sinttan eqqiis.” (Ajj. 7:9-14) Xoossaayyo suure ogiyan goynniya daro asay sinttappe deꞌanaagaa eriyoogan Yohaannisi keehi ufayttennan waayi aggana! He ajjuutay Yohaannisa ammanoy minnanaadan oottidoogaa nuuni ammanettana danddayoos. Nuuni he ajjuutay polettiyo wodiyan deꞌiyo gishshawu, hegee nu ammanuwaa hegaappe aaruwan minttana koshshees! Daro waayiyaappe paxa attanawunne saꞌan merinawu deꞌanawu hidootiya miilooniyan qoodettiyaageeti shiiqiyoogaa nuuni beꞌoos. w19.09 26 ¶2-3

Alamiyaa haariyaageeti kasetidi odettida “ubbabai saro; aibikka hanenna” giyo awaajjuwaa yooti simmoosona gaada qoppa. Eti ha alamee saro giidi ceeqettana danddayoosona. Kawotettati alamiyaa metuwaa ubbaa xayssana danddayoosona giidi nuuni qoppanaadan eti koyoosona. SHin, kaallidi hananabaa eti mule teqqokkona! ‘Gita Baabiloona’ xayana! (Ajj. 17:5, 15-18) “Xoossai qoppidoogaa eti oottanaadan, eta wozanan Xoossai amuwaa [wottana].” I qoppidobay aybee? Kiristtaane giyo haymaanootiyaa gujjin, worddo haymaanootiyaa ubbaa xayssanawu I qoppiis. ‘Tammu kacee’ deꞌiyo “zo7o do7aa” wozanan Xoossay ba qofaa wottana. Tammu kacee, “do7aa,” hegeekka Kawotettatu Issippetettaa maaddiya kawotettata ubbaa bessiyaaba. (Ajj. 17:3, 11-13; 18:8) He kawotettati worddo haymaanootiyaa xayssiyo wode, hegee gita waayiyaa doomettawu malaata gidana. Hegee qoppennan haniya, ubba qassi saꞌan deꞌiya ubbaa qohiya daganttiyaaba gidana. w19.10 14 ¶1, 3

Koyro xeetu layttan, Diyotirefeesi Kiristtaane gubaaꞌiyan aawatettay deꞌiyoogeeta qanaatiis. I gubaaꞌiyaa giddon “halaqa gidanau” koyiyo gishshawu, kiitettida Yohaannisa suntaanne aawatettay deꞌiyo hara ishanttu sunttaa mooriis. (3 Yoh. 9, 10) Nuuni Diyotirefeesaagaadan oottana xayikkonne, nuuni koyiyo aawatettay issi Kiristtaaniyawu imettiyo wode, ubba qassi nuuni aagaadan woy aagaappe aaruwan oottana danddayoos giidi qoppiyo wode qanaatiyoogaa doommana danddayoos. Qanaatee kattaa woriya sharafa mala. He zerettay nu wozanan xaphuwaa yeddikko shoddanawu metana danddayees. Otoroynne ba xalla siiqiyoogaa mala iita eeshshati qanaatee yaa daranaadan oottoosona. Qanaatee siiquwaa, qaretaanne kehatettaa mala loꞌꞌo eeshshati diccennaadan cuullana danddayees. Qanaatee nu wozanan aaciyoogaa akeekikko, hegaa nuuni eesuwaara shoddana koshshees. w20.02 15 ¶6-7

Kiitettida PHawuloosi issi qommo wayssiya paacee bana gakkidoogaa yootiis. I he paacee “Seexaanaa kiitanchchai” ‘dechchiyoogaa’ woy qinxxalliyan baqqiyoogaa mala gidiyoogaa yootiis. PHawuloosa bollaa caddi oyqqida aguntta mala gidida he metuwaayyo gaasoy Seexaanaanne dayddanttata waayi gidana. Gidoppe attin, eti PHawuloosa metuwaa akeekido wode, hegee yaa iitanaadan malennan waayi aggana. Hegee issi uri agunttay bollan gelanaadan yaa naaqqiyoogaa mala. PHawuloosi waatidee? Koyro, PHawuloosi aguntta malabaa Yihooway xayssanaadan koyiis. I, “Hegaa taappe shaakkana mala, taani Godaa heezzutoo woossaas” yaagiis. SHin, PHawuloosi woossikkonne, he caddi oyqqiya aguntta malabay xayibeenna. Hegaa giyoogee Yihooway PHawuloosa woosaa zaaribeenna giyoogee? Zaaribeenna giyoogaa gidenna. A woosaa I zaariis. Yihooway he metuwaa xayssana xayikkonne, PHawuloosi hegaa genccanaadan wolqqaa immiis. Yihooway, “Ta wolqqai daafuran polettees” yaagiis. (2 Qor. 12:8, 9) Xoossay maaddin, PHawuloosi ufayttidinne woppu giidi deꞌiis!—Pili. 4:4-7. w19.11 9 ¶4-5

Yihooway nuna medhdhido gishshawunne nuussi deꞌuwaa immido gishshawu, nuuni A xalaalawu goynnana bessees. (Ajj. 4:11) SHin nuna metiyaabay deꞌees. Nuuni Yihoowa siiqiyaabanne bonchchiyaaba gidikkonne, nu harabaa xoqqu oottidi xeelliyoogee Yihoowa siiqennaadaaninne A xallawu goynnennaadan diggana danddayees. Geeshsha Maxaafan Xoossawu aqiyoogaa giyoogee A wozanappe siiqiyoogaa bessiyaaba. Nuuni Yihoowa xallawu aqiyo wode, A xalaalawu goynnoos. Nuuni ooninne woy aybinne nu wozanan Yihoowawu immana bessiyo sohuwaa ekkanaadan eeno gookko. (Kes. 34:14) Nuuni Yihoowa siiqiyo loꞌꞌo gaasoy deꞌees. Ayssi giikko, nuuni abaa tamaarido tumay hegawu denddo. Nuuni A loꞌꞌo eeshshata nashshoos. Yihooway siiqiyoobaanne ixxiyoobaa nuuni eroos; qassi nuuyyookka aagaadan siyettees. I asawu halchchidobaa akeekoosinne hegaara maayiyaabaa oottoos. Nuuni A dabbo gidanaadan I eeno giidoogaa gita maatadan qoppoos. (Maz. 25:14) Nuna Medhdhidaagaabaa nu tamaariyo ubbabay akko kaseegaappe aaruwan shiiqanaadan oottees.—Yaaq. 4:8. w19.10 26 ¶1-3

Ha wodiyan, nu ishanttanne michchontta dumma dumma metoy gakkees. Leemisuwawu, daroti meretay woy asay gattiyo daafaban qohettoosona. Hegaa malabay gakkiyo wode, nuuppe amaridaageeti daafaban qohettida nu laggeta nu son mokkana danddayennan aggokko. Harati qassi miishshan maaddana danddayoosona. Gidoppe attin, Yihooway nu ishanttanne michchontta maaddanaadan nuuni ubbay woossana danddayoos. Issi ishay woy michchiyaa hidootaa qanxxidoogaa nuuni akeekikko, woyganaakko woy waatanaakko erennan aggana danddayoos. Gidikkonne, nuuni ubbaykka maaddana danddayoos. Leemisuwawu, nu laggiyaara issippe aattiyo wodiyaa bazzana danddayoos. I woy A haasayiyo wode nuuni kehatettan ezggana danddayoos. Qassi nuuni dosiyo minttettiya xiqisiyaa yootana danddayoos. (Isi. 50:4) Keehi koshshiyaabay ne laggetussi neeni koshshiyo wode eta maaddanawu koyiyoogaa. Nuuni ha wodiyan nu ishanttuuranne michchonttuura dabbotaa minttanawunne hegaa naagidi deꞌanawu murttana bessees. He dabbotay ha alamee xayana wode xallan gidennan, merinawu deꞌiyaaba! w19.11 7 ¶18-19

He yarshshoy issi uri ba Xoossaa Yihoowa siiqiyo gishshawu, ba dosan yarshshiyooba. Yarshshida uri, A so asaynne qeeseti yarshshettida mehiyaa ashuwaa moosona. SHin, ashuwaappe amaridaagee Yihoowa xallawu imettees. Issi mehiyaappe Yihooway handdaa loꞌꞌobadan xeellees. Qassi kilahota gujjin, mehiyaa ashuwaappe amaridaagee dumma gidiyoogaa I yootiis. (Wog. 3:6, 12, 14-16) Hegaa gishshawu, issi Israaꞌeela asi ba dosan he ashotuppe yarshshiyo wode, Yihooway keehi ufayttees. Hegaa Yihoowawu immida Israaꞌeela asi I baassi deꞌiya keehi loꞌꞌobaa Xoossawu immanawu koyidoogaa bessees. Hegaadan, Yesuusi Yihoowa siiqiyo gishshawu, Yihoowawu haggaazanawu bawu danddayettida ubbabaa oottiyoogan, ba dosan baassi deꞌiya keehi loꞌꞌobaa Yihoowawu immiis. (Yoh. 14:31) Xoossaa sheniyaa oottiyoogee Yesuusa ufayssees. (Maz. 40:8) Yesuusi ba dosan haggaaziyoogaa beꞌidi Yihooway keehi ufayttiis! w19.11 22-23 ¶9-10

Xoossay usuppun “gallassi” medhdhi simmidi, I saꞌan medhdhiyoogaa aggidoogaa Xoossaa Qaalay yootees. (Doo. 2:2) SHin, Yihooway oottiyoogaa dosees; qassi hara ogetun I “ubba wode oottees.” (Yoh. 5:17) Yihooway usuppun “gallassatun” oottidi laappuntta ‘gallassan’ shemppiis; qassi Israaꞌeelati laappuntta gallassaa ubban shemppanaadankka yootiis. Xoossay Sambbatay A giddooninne Israaꞌeelatu giddon malaata gidiyoogaa yootiis. (Kes. 31:12-14) Naata, ashkkarata, ubba qassi meheta gujjin, ooninne he gallassi oottana bessenna. (Kes. 20:10) Hegee asay ayyaanaaban xeelaa wottanaadan maaddees. Haymaanootiyaa kaalettiya daroti Yesuusi saꞌan deꞌiyo wode Sambbataa higgiyawu azazettiyoogaa xeelliyaagan bessenna wogata kessidosona. Eti Sambbata gallassi, maanawu banggaa tiyaa duuttiyoogee woy sahettida asa pattiyoogee bala yaagoosona. (Mar. 2:23-27; 3:2-5) Hegee Xoossaa qofaa gidenna; qassi Yesuusi I yootiyoobaa siyiyaageetussi hegaa loytti qonccissiis. w19.12 3-4 ¶8-9

Nuuni Yihoowabaa loyttidi tamaariyo wode, kaseegaappe aaruwan A leemisuwaa kaallana. Daawiti saluwan deꞌiya ba Aawaa loyttidi erido gishshawu, haratuura gayttidaagan A leemisuwaa kaalliis. Daawiti hegaadan loyttidi Yihoowaara dabbotido gishshawu, Israaꞌeelati A keehi siiqidosona, qassi Yihooway Israaꞌeelan kawotida hara kawotuyyo A loꞌꞌo leemisodan goꞌettiis. (1 Kaw. 15:11; 2 Kaw. 14:1-3) Nuuni tamaariyoobay aybee? Nuuni ‘Xoossaa milatanawu’ koyiyo wode, A naata gidiyoogaa bessoos. (Efi. 4:24; 5:1) Nuuni Yihoowabaa tamaariyoogaa mule aggana koshshenna. (Era. 3:11) Keehi koshshiyaabay, abaa ay keena eridoo giyoogaa gidennan, nu eridobaa oottiyoogaa. Nuuni eridobaa oosuwan peeshshanawunne siiqiya nu Aawaa leemisuwaa kaallanawu baaxetikko, I nuukko shiiqiyoogaa aggenna. (Yaaq. 4:8) Xoossay bana loytti eranawu baaxetiyaageeta mule aggennaagaa ba Qaalan yootiis. w19.12 20 ¶20; 21 ¶21, 23

Yaaqoobi ba naata ubbaa siiqikkonne, ba 17 laytta naꞌaa Yooseefa keehi siiqees. Yaatin Yooseefa ishantti waanidonaa? Eti A qanaatidosona; qassi he qanaatee eti A ixxanaadan oottiis. Yooseefi bana ba ishanttun ixissiyaabaa aybanne oottibeenna. Gidikkokka, eti Yooseefa aylletettawu bayzzidosona; qassi eta aaway keehi siiqiyo naꞌaa iita doꞌay miis giidi bantta aawawu worddotidosona. Qanaatee eti bantta son saroy xayana mala oottanaadaaninne bantta aawaa azzanttanaadan oottiis. (Doo. 37:3, 4, 27-34) Geeshsha Maxaafan, qanaatee issi asi Xoossaa Kawotettaa laattennaadan oottiya, hayquwaa kaalettiya ‘asatettaa oosotuppe’ issuwaadan qoncciis. (Gal. 5:19-21) Darotoo qanaatee morkkettanaadan, palamettanaadaaninne hanqqettanaadan oottiya keehi iita eeshsha. Yooseefa ishanttu hanotay qanaatee waatidi so asaa dabbotaa moorananne etawu saruwaa xayssana danddayiyaakko bessees. Nuuni Yooseefa ishanttuugaadan oottennaba gidikkonne, nu ubbaykka nagaranchcha, qassi nuussi cimmiya wozanay deꞌees. Issi issitoo nuuni harata qanaatana danddayiyoy hegaassa. w20.02 14 ¶1-3

Issi wode Yihooway Muuse bolli deꞌiya geeshsha ayyaanaappe ekkidi Xoossaa dunkkaaniyaa matan eqqida Israaꞌeela cimatussi immiis. Hegaappe takkennan, dunkkaaniyaakko yibeenna naaꞌꞌu cimati geeshsha ayyaanaa ekkidoogaanne hananabaa yootiyaageeta gididoogaa Muusee siyiis. He naaꞌꞌu cimati hananabaa yootennaadan diggana mala Yaasu Muusa oychchido wode Muusee waatidee? Ha naaꞌꞌu cimatussi Yihooway oottidoban Muusee qanaatibeenna. I bana ziqqi oottidi eti maataa demmidoogan ufayttiis. (Qoo. 11:24-29) Muusee oottidobaappe ay tamaariyoo? Neeni gubaaꞌe cima gidikko, wozanappe dosiyo issi aawatettaa hara uri oottana mala loohissanaadan oyshetta eray? Nena Muuseegaadan ziqqi oottikko, wodeppe he aawatettaa hara uri ekkana mala A loohissanaadan nena oychchikko guuxxays gaada qoppakka. Ubba ne ishaa maaddiyoogee nena ufayssana. w20.02 15 ¶9; 17 ¶10-11

Harggee nuuni qofan qohettanaadaaninne aynne maaddennabadan qoppanaadan oottana danddayees. Nuuni harggiyo wode woy harata maaduwaa oychchiyo wode darotoo azzanoos. Nuuni harggiyoogaa harati erenna wodekka, kase oottiyoobaa oottana danddayenna gishshawu yeellatana danddayoos. Unꞌꞌettanaadan oottiya hegaa mala wodiyan, Yihooway nuna minttettees. Waatidi? Nuuni harggiyo wodekka, Yihoowayyo alꞌꞌo gidiyoogaa hassayanaadan oottiya daro loꞌꞌobaa Geeshsha Maxaafan I nuussi yootiis. (Maz. 31:19; 41:3) Nu harggiyaa gaasuwan nuna unꞌꞌissiyaabaa nuuni genccanaadan ayyaanay denttettin xaafettida he qaalatu baggaara Yihooway nuna maaddana. Neeni harggiyo wode, nena gakkiyaabaa Yihooway eriyoogaa ammanetta. Nena aybi gakkiiddi deꞌiyaakko neeni maara akeekanaadan I maaddana mala woossa. Yaatada Yihooway neeyyo yootiyo minttettiyaabaa Geeshsha Maxaafaappe koya. Yihooway ba ashkkarata keehi xoqqu oottidi xeelliyoogaa bessiya paydota pilgga. Neeni yaatiyo wode, Yihooway ammanettidi baayyo oottiya ubbawu keha gidiyoogaa akeekana.—Maz. 84:11. w20.01 15-16 ¶9-10; 17 ¶12

Yisaaqi dure asa gidiyo gishshawu Pilisxxeema asati A qanaatidosona. (Doo. 26:12-14) I ba dorssaanne miizzaa wudiyaa ushshiyo haattaa ollaa eti biittaa zaaridi baridosona. (Doo. 26:15, 16, 27) Pilisxxeematuugaadan, ha wodiyan issi issi asay baappe duretiya asata qanaatees. Eti haratussi deꞌiyaabaa koyiyoogaa xalla gidennan, etawu deꞌiyaabay xayanaadankka koyoosona. Daro asay Yesuusa dosiyo gishshawu Ayhuda haymaanootiyaa kaalettiyaageeti A qanaatidosona. (Maa. 7:28, 29) Yesuusi Xoossay kiittin yiis; qassi tumaa tamaarissiis. Gidikkonne, haymaanootiyaa kaalettiyaageeti A sunttaa mooranawu zigiridosona. (Mar. 15:10; Yoh. 11:47, 48; 12:12, 13, 19) Nuuni ha taarikiyaappe ay tamaarana danddayiyoo? Eta loꞌꞌo eeshshaa gishshawu gubaaꞌiyan deꞌiya ishanttinne michchontti dosiyoogeeta qanaatennaadan nuuni naagettoos. Nuuni ubba etaagaadan siiquwaa bessanawu baaxetana koshshees.—1 Qor. 11:1. w20.02 15 ¶4-5

Neeni 2,500 gidiya layttappe kase Parsse biittan deꞌiyaabadan qoppa; qassi neeni issi allaalliyaabaa kawuwaa haasayissanawu koyadasa. SHin kawuwaa haasayissanaappe kase, I neeyyo paqqadana koshshees. Paqqadettennan A haasayissanawu malikko, neeni hayqqana danddayaasa! Yihooway he Parsse kawuwaa mala gidenna gishshawu nuuni keehi galatoos! Nuuni awudenne A haasayissana danddayoos. I nuuni aara laꞌatettan haasayanaadan koyees. Leemisuwawu, Yihooway Medhdhidaagaa, Ubbaa Danddayiyaagaa, Ubbaa Haariyaagaa geetettiya bonchcho sunttatun xeegettikkokka, meeze gidida “Aawau” giyo siiqo qaalan A xeeganaadan nuna shoobbiis. (Maa. 6:9) Yihoowakko keehi shiiqidabadan nuussi siyettanaadan I koyiyoogee nuuni ufayttanaadan oottees! Nu deꞌuwawu Pulttoy Yihoowa gidiyo gishshawu nuuni A nu ‘Aawaa’ giidi xeegiyoogee bessiyaaba. (Maz. 36:9) I nu Aawaa gidiyo gishshawu, nuuni awu azazettanawu bessees. I nuna oychchiyoobaa nuuni oottiyo wode, daro anjjota demmana. (Ibr. 12:9) Saluwan gidin woy saꞌan demmiyo merinaa deꞌoy he anjjotuppe issuwaa. w20.02 2 ¶1-3

Nu halchchoy Geeshsha Maxaafaa xannaꞌiyaageeti ayyaanaaban diccanaadan maaddiyoogaa. (Efi. 4:13) Issi uri Geeshsha Maxaafaa xannaꞌanawu maayettiyo wode, xannaꞌiyoogee A loytti goꞌꞌiyoogan I keehi ufayttana danddayees. SHin, I Yihoowa siiqiyo siiqoy gujjiyo wode, gubaaꞌiyaa yara gididaageeta gujjin, harata I waati maaddanaakko qoppiyoogaa doommana danddayees. (Maa. 22:37-39) Hanotay injjetiyo wode, Kawotettaa oosuwaa miishshan maaddiyoogee maata gidiyoogaa yootanawu mammottoppa. Metoy merettiyo wode waatanaakko ne xinaatiyaa tamaarissa. Leemisuwawu, xammaqettibeenna aassiya ne xinaatee, gubaaꞌiyan deꞌiya issi uray bana yiilloyidoogaa neessi yootiis gaada qoppa. Ooni likkekko woy ooni mooridaakko yootiyoogaappe, I waatanaadan Geeshsha Maxaafay yootiyaakko ayyo qonccissa. I he ishawu atto giidi he yohuwaa dogana danddayees. Woy I hegaadan oottana danddayennaba gidikko, ashkketettaaninne siiquwan ‘ba ishaa balaappe zaaranawu’ halchchidi A haasayissana koshshees. (Maatiyoosa 18:15⁠ra geeddarssa.) Ne xinaatee haasayanabaa kasetidi giigettanaadan maadda. w20.01 5-6 ¶14-15

Nuuni mooridobawu woossiyo wode, seeraa ekkiyo wodenne he balaa zaarettidi oottennaadan naagettanawu minni oottiyo wode Yihoowa maarotaa nashshiyoogaa bessoos. Nuuni yaatiyo wode woppaa demmana. ‘Yihooway wozanay meꞌꞌidoogeetussi mataana gidiyoogaanne bantta ayyaanan liiqidaageeta I ashshiyoogaa’ eriyoogee keehi minttettees! (Maz. 34:18) Nuuni wurssettay matido wodiyan deꞌiyo gishshawu, hirgganaadan oottiyaabati yaa darana danddayoosona. Neeni hirggiyo wode maaduwawu sohuwaara Yihoowakko woossa. Geeshsha Maxaafaa loyttada xannaꞌa. Haanni, Kiitettida PHawuloosanne Kawuwaa Daawita hanotaappe tamaara. Neeni hirgganaadan oottidabaa shaakka eranawu maaddana mala saluwan deꞌiya ne Aawaa oychcha. (Maz. 139:23) Neeni darin danddayenna woy mule danddayenna toohota Yihooway tookkanaadan ootta. Neeni yaatikko, “Tana hirggai woriyo wode, neeni tana woppu oottada ufaissaasa” giidi yexxida Mazamuraawiyaa mala gidana danddayaasa.—Maz. 94:19. w20.02 24 ¶17; 25 ¶20-21

“Xoossaa Ayyaanai de7ees” geetetti birshshettida Giriiketto qaalay “Xoossay shemppidoogaa” giyoogaa. Geeshsha Maxaafaa xaafiyaageetu qofan Xoossay ba qofaa wottanawu ba ayyaanaa goꞌettiis. Nuuni Geeshsha Maxaafaa nabbabiyo wodenne nabbabidobaa wotti dentti qoppiyo wode, Xoossaa kaaletoy nu qofaaninne nu wozanan gelees. Hegee nuuni Yihoowa ufayssana mala nu deꞌuwaa laammanaadan oottees. (Ibr. 4:12) Gidoppe attin, nuuni geeshsha ayyaanaappe loytti goꞌettana mala Geeshsha Maxaafaa ubbatoo nabbabanawunne nabbabidobaa loyttidi wotti denttidi qoppanawu wodiyaa bazzana bessees. Yaatiyo wode nuuni haasayiyoobaaninne oottiyooban Xoossaa Qaalaa kaalloos. Nuuni, haratuura issippe Xoossawu goynnana koshshees. (Maz. 22:22) Yihoowa ayyaanay shiiqotun deꞌees. (Ajj. 2:29) Nuuni nu ishanttuuranne michchonttuura shiiqiyo wode, geeshsha ayyaanaa demmanawu woossoos, Xoossaa Qaalay denddo gidido Kawotettaa mazamureta yexxoos, qassi geeshsha ayyaanan sunttettida ishantti Geeshsha Maxaafaa qofay deꞌiyo haasayata haasayiyo wode siyoos. SHin geeshsha ayyaanaappe loytti goꞌettanawu, nuuni shiiquwan oyshaa zaaranawu giigettana koshshees. w19.11 11 ¶13-14