Ichchashe

Ximootiyoosi Yihoowawu loytti haggaazanaadan oottidabay aybee? Awu Xoossaa ufayssiya loꞌꞌo eeshshati deꞌiyoogaa. (Pili. 2:19-22) Ximootiyoosi bana ziqqi oottiyaagaa, ammanettiyaagaa, minni oottiyaagaanne aawatettaa poliyaagaa gidiyoogaa kiitettida PHawuloosi abaa yootidobaappe akeekana danddayoos. I ishanttussi keehi qarettiis. Hegaappe denddidaagan, PHawuloosi Ximootiyoosa siiqiis; qassi gita aawatettaa awu immanawu mammottibeenna. Hegaadankka, nuuni Yihooway siiqiyo eeshshati deꞌiyoogeeta gidiyo wode, I nuna siiqana, qassi nuuni gubaaꞌiyawu loytti oottana. (Maz. 25:9; 138:6) Yaatiyo gishshawu, neeni giigissana koshshiya eeshshaabaa qoppa. Neeni giigissana koyiyo issi eeshshaa doora. Ne mala Kiristtaanetuyyo loytta qarettana danddayaasa. Woykko kaseegaappe aaruwan haratuura saruwan deꞌiyaagaanne atto giyaagaa gidanawu baaxetana danddayaasa. Neeni giigissana danddayiyoobata mata laggee yootanaadan oychchiyoogee nena maaddana danddayees.—Lee. 27:6. w22.04 23 ¶4-5

Yihooway nuuni ufayttanaadan koyees. Ufayssay Yihoowa geeshsha ayyaanaa ayfiyaa macara gidiyo gishshawu, nuuni hegaa eroos. (Gal. 5:22) Ekkiyaagaappe immiyaagee ufayttiyo gishshawu, nuuni loytti haggaaziyo wodenne nu ishantta dumma dumma ogetun maaddiyo wode wozanappe ufayttoos. (Oos. 20:35) Ha gallassaa xiqisee yootiyoogaadan, kiitettida PHawuloosi nuuni ufayttidi deꞌanaadan maaddiya naaꞌꞌubata yootiis. Koyruwan, nuuni danddayiyoogaa keenaa Yihoowawu immana koshshees. Nuuni danddayiyoogaa keenaa ayyo loytti immikko ufayttana. (Maa. 22:36-38) Naaꞌꞌanttuwan, nuna haratuura geeddarssiyoogaappe naagettana koshshees. Nu payyatettaa, nu loohidobaa woy nu eraa gaasuwan, nuuni oottana danddayiyoobay ayba gidikkonne, Yihoowa galatana koshshees. Qassi amarida ogiyan harati nuuppe haggaazuwan gooba gidikko, eti hegaa Yihoowa sabbanawu goꞌettiyo gishshawu nuuni ufayttana koshshees. w22.04 10 ¶1-2

Gita Baabiloona qoppennan xayana; hegan alamiyaa asay maalaalettana. (Ajj. 18:8-10) Gita Baabilooni bashshay kumetta saꞌaa keehi qohananne metuwaa gattana danddayees; shin Xoossaa asay ufayttanaadan oottiya baa giishin naaꞌꞌu gaasoti deꞌoosona. Daro layttawu Xoossaa Yihoowa morkke gidida worddo haymaanootee merinawu xayana; qassi mata wode ha iita alamiyaa xayuwaappe nuuni attana! Daaneeli tumu ‘eray daranaagaa’ kasetidi yootiis. Ee, eray dariis! Nu wodiyaa xeelliyaagan odettida hiraagaa nuuni haꞌꞌi akeekida. (Dane. 12:4, 9, 10) Ha hiraagati likke gididoogee nuuni Yihoowanne ayyaanaa kaaletuwan xaafettida A Qaalaa wozanappe bonchchanaadan oottees. (Isi. 46:10; 55:11) Yaatiyo gishshawu, Geeshsha Maxaafaa loytta xannaꞌiyoogaaninne harati Yihoowaara dabbotaa minttanaadan maaddiyoogan ne ammanuwaa ubbatoo mintta. An wozanappe ammanettiya ubbaa I naagana, qassi eti “polo sarotettan” deꞌanaadan oottana.—Isi. 26:3. w22.07 6-7 ¶16-17

Ajjuutaa maxaafay Xoossaa Kawotettay saluwan eqqidoogaanne Seexaanay saluwaappe olettidoogaa yootees. (Ajj. 12:1-9) Seexaanay olettidoogee saloy woppu gaanaadan oottikkonne, nuussi metuwaa kaalettiis. Aybissi? Seexaanay yiillotido gishshataassanne ammanettidi Yihoowawu ha saꞌan haggaaziyaageeta qohiyo gishshataassa. (Ajj. 12:12, 15, 17) Seexaanay nuna qohishinkka, nuuni waani Yihoowawu ammanettidi deꞌana danddayiyoo? (Ajj. 13:10) Nuna maaddiya issibay sinttappe aybi hananaakko eriyoogaa. Leemisuwawu, kiitettida Yohaannisi nuuni mata wode demmana anjjotuppe amaridaageeta Ajjuutaa maxaafan yootiis. He anjjotuppe issoy Xoossaa morkketi xayiyoogaa. Ajjuutaa maxaafan koyro payduwan, nuuni nabbabiyo qofay “malaatatun,” hegeekka leemiso hanotan qonccidoogaa nuussi yootees.—Ajj. 1:1, NW. w22.05 8 ¶1-3

Yihoowa ashkkarati awu ammanettidi deꞌiyo gishshawu, Yihoowa morkketi keehi hanqqettana. Hegaappe denddidaagan, issippe denddiya kawotettati kumetta saꞌan deꞌiya Xoossaa asa ubbaa qohana. Geeshsha Maxaafay he qohuwaa Maagooga Googa qohuwaa gees. (Hiz. 38:14, 15) Ha gita qohoy gakkiyo wode Yihooway waatanee? I hagaadan giis: “Ta hanqqoi suullana.” (Hiz. 38:18, 21-23) Ajjuutaa shemppo 19y kaallidi hananabaa yootees. Yihooway Ba asaa naaganawunne eta morkketa xayssanawu Ba Naꞌaa kiittees. ‘Saluwaa olanchchata’ gidida ammanettida kiitanchchatinne 144,000ti Yesuusaara issippe Maagooga Googaara olettana. (Ajj. 17:14; 19:11-15) Ha olay ay kaalettanee? Yihoowa morkke gidida ubba asaynne citati muleera xayana!—Ajj. 19:19-21. w22.05 17 ¶9-10

Addaameenne Hewaana nagaraa ootti simmin darin takkennan, Yihooway eta zaretuyyo hidootay deꞌanaadan oottiya keehi koshshiya hiraagaa yootiis. Doomettaabaa 3:15n deꞌiya he hiraagay hagaadan gees: “Taani nenanne maccaasiyo, ne zerettaanne i zerettaa morkke kessana; i ne huuphiyaa qoxxana; neenikka a qirbbiyaa dukkana.” He hiraagay Geeshsha Maxaafaa koyro maxaafan deꞌees. SHin he hiraagay Geeshsha Maxaafan deꞌiya ubba maxaafatuura gayttees. Eettanawu mixido mittay sussan qashettiyoogaadan, Xoossay Dabloosanne A kaalliyaageeta xayssanawu, ashshiyaagaa kiittanaagaa yootiya Doomettaabaa 3:15n deꞌiya qofay Geeshsha Maxaafan deꞌiya ubba maxaafatu qofaa qachchees. Yihoowa siiqiyaageeti keehi ufayttana! Geeshsha Maxaafaa xannaꞌiyoogee he hiraagay waani polettiyaakkonne nuna waati maaddiyaakko akeekanaadan maaddees. w22.07 14 ¶1-3

Intte naati Yihoowa loytti siiqanaadan maaddanawu koshshiya aadhdhida eratettaa inttessi immanaadan A oychchite. (Yaaq. 1:5) Yihooway ooppenne aaruwan nuna maaddiyaabaa zorees. Hegawu daro gaasoti deꞌoosona. Ane naaꞌꞌata beꞌoos. Koyruwan, aawa gidiyoogaa Yihoowaagaa keena eriya uri baawa. (Maz. 36:9) Qassi naaꞌꞌanttuwan, I aadhdhida eratettan zoriyoobay awudenne nuna goꞌꞌees. (Isi. 48:17) Intte intte naati Yihoowa siiqanaadan oottidi dichchanaadan inttena maaddana danddayiya kumi palahiya ayyaanaabaa qumaa Yihooway ba Qaalaa baggaaranne ba dirijjitiyaa baggaara giigissees. (Maa. 24:45) Leemisuwawu, “So Asaa Maaddiyaabaa” giya kaalli kaalli kiyiya huuphe yohuwan (Amaarattuwaa) maaddiya daro zoriyaa demmana danddayeeta; hegee Beegottite! maxeetiyan daro layttawu kiyiis, qassi ha wodiyan nu websaytiyan deꞌees. Qassi, jw.org saytiyan deꞌiya daro biidoti yelidaageeti bantta naata dichchiyo wode Yihoowa zoriyaa oosuwan peeshshanaadan maaddana danddayoosona.—Lee. 2:4, 5. w22.05 27 ¶4-5

Yihooway atto giyoogan saluwan saꞌan ubbaappe aadhdhees. Koyruwan, I ubbatoo atto gaanawu koyees. Naaꞌꞌanttuwan, I nubaa ubbabaa erees. I nubaa wurssi eriyo gishshawu nuuni tumuppe nagaraappe simmidaakkonne kuuyanawu ayyo maatay deꞌees. Heezzanttuwan, Yihooway nuuyyo atto giyo wode muleera atto gees, qassi hegee nuuni A sinttan nagaraa mule oottibookko giyoogaa mala. Hegee nuussi geeshsha kahay deꞌanaadaaninne nuuni an sabettanaadan oottees. Nuuni nagaranchcha gidiyo gishshawu, ubbatoo nagaraa oottiyoogee tuma. SHin, Geeshsha Maxaafaa Loytti Akeekiyoogaa, (Inggilizettuwaa) Paydo 2, sinttaa 771n deꞌiya qofay nuna minttettana danddayees: “Yihooway maariyaagaa gidiyo gishshawu ba ashkkarati shugo gididobaa erees. Yaatikko, eti nagaranchcha gidiyo gishshawunne moorobaa oottiyo gishshawu ubba wode azzanana koshshenna. (Maz 103:8-14; 130:3) Eti Xoossay koyiyoogaadan deꞌanawu banttawu danddayettida ubbabaa oottikko, ufayttana danddayoosona. (Pili 4:4-6; 1Yoh 3:19-22).” w22.06 7 ¶18-19

Seexaanay goꞌettiyo miishshay nuuni kawotettati gattiyo yedetaa yayyanaadan oottiyoogaa xalla gidenna. Amaridaageeti eti Yihoowa Markka gidiyo wode bantta so asay woyganeeshsha giidi yayyoosona. Eti banttana gakkiya qohuwaappe aaruwan issi issitoo hegaa keehi yayyoosona. Eti bantta soo asaa keehi siiqoosona, qassi bantta soo asay Yihoowa eranaadaaninne A siiqanaadan koyoosona. Eta soo asay tumu Xoossaanne awu goynniyaageeta bonchchennaagaa bessiyaabaa haasayishin eti siyiyo wode azzanoosona. Gidoppe attin, issi issitoo koyro tumaa eqettiya so asay guyyeppe tumaa siyiis. Nu soo asaa yarati nu ooratta ammanuwaa gaasuwan nunaara gayttanawu koyana xayikko shin? Nuuni waatanee? Mazamure 27:10n odettida ufayssiya qofan nuuni minettana danddayoos. Yihooway nuna keehi siiqiyoogaa nuuni hassayikko, nu soo asay nuna eqettikkonne aybi hananeeshsha giidi mule yayyokko. Qassi, Yihooway nu genccaa gishshawu nuna woytanaagaa ammanettana danddayoos. Yihooway nu deꞌuwaassi koshshiya ubbabaa nuussi immana, nuuni woppu gaanaadaaninne ufayttanaadan nuna maaddana, qassi nuuni aara dabbotaa minttidi deꞌanaadan ooppenne aaruwan maaddana! w22.06 16-17 ¶11-13

Yesuusi saꞌan haggaaziyo wode, asay A ushshanchchaa, yoraa, Dabloosa wolqqan oottiyaagaa, Sambbataa higgiyaa naagennaagaa, ubba qassi Xoossaa cayiyaagaa giidi wordduwan mootiis. (Maa. 11:19; 26:65; Luq. 11:15; Yoh. 9:16) Gidikkonne, Yesuusi hanqquwan zaaribeenna. Harati nuna meqetti baynna ogiyan haasayissiyo wode, nuuni etaagaadan zaarennan aggiyoogan Yesuusa milatana koshshees. (1 PHe. 2:22, 23) SHin harati nuna kehatetti baynna ogiyan haasayissiyo wode, keha gidiyoogee metiyaaba. (Yaaq. 3:2) Nuna aybi maaddana danddayii? Neeni haggaaziyo wode issi uri ne bolli iitabaa haasayikko, yiillotennan agganawu mala. Saama giyo issi ishay hagaadan giis, “He uri Xoossaabaa tumaa eriyoogee keehi koshshiyaaba gidiyoogaa qoppanawunne I laamettana danddayiyoogaa hassayanawu malays.” Nuuni injjetenna saatiyan biido gishsha xallawu keettaaway issi issitoo hanqqettees. Nuuni hanqqettida uraa haasayissiyo wode woppu gaanaadaaninne iitabaa woy bonchchennaagaa bessiyaabaa haasayennaadan Yihooway nuna maaddana mala qantta woosaa woossana danddayoos. w22.04 6 ¶8-9

Naati Yihoowakko shiiqanaadan maaddiyo keehi koshshiya issi ogee Geeshsha Maxaafaa etaara xannaꞌiyoogaa. (2 Xim. 3:14-17) Gidoppe attin, yelagati Yihoowaabaa tamaarana danddayiyo hara ogiyaakka Geeshsha Maxaafay yootees. Leemiso maxaafan odettida issi aaway meretan qonccida Yihoowa eeshshaabaa ba naꞌay dogennaadan minttidi hassayissiis. (Lee. 3:19-21) Yelidaageetoo, intte naatuura issi sohuwaa biidi wodiyaa aattiyoogan ufayttennan aggekketa. Yihooway ‘medhdhidobatinne’ A eeshshati waani gayttiyaakko intte naati akeekanaadan maaddanawu he wodiyaa goꞌettite. (Roo. 1:20) Yesuusi tamaarissanawu meretaa waati goꞌettidaakko akeekite. Issi wode I ba erissiyo ashkkarati qooraasetanne ciishshata akeekan xeellanaadan yootiis. (Luq. 12:24, 27-30) I ba erissiyo ashkkarata saluwan deꞌiya eta Aawaa kehatettaa xeelliyaagan keehi maaddiyaabaa tamaarissiis. Yihooway qooraasiyawunne dembban deꞌiya ciishshawu oottiyoogaadan, ammanettida ba ashkkarata mizananne mayzzana. w23.03 20-21 ¶1-4

Nuuni Yesuusa baggaara Yihoowa woossana danddayiyo gishshawu Yihoowa galatoos. Nuuni oychchidobaa Yihooway Yesuusa baggaara nuussi immees. Nuuni Yesuusa sunttan woossiyo woosaa Yihooway siyeesinne zaarees, qassi Yesuusa wozuwaa yarshshuwaa baggaara nu nagaraa atto gees. (Roo. 5:1) Yesuusi “saluwan Ubbaappe Bolla Xoossai uttiyo kawotaa araataappe ushachcha baggaara uttida qeese ubbatu [halaqaa]” gidiyoogaa Geeshsha Maxaafay yootees. (Ibr. 8:1) Yesuusi ‘Aawaa matan nuuyyo gaannatees.’ (1 Yoh. 2:1) Nu shugo miyyiyaa akeekiyaanne ‘nuuyyo gaannatiya’ qeese ubbatu halaqaa Yihooway immido gishshawu A keehi galatoos! (Roo. 8:34; Ibr. 4:15) Nuuni Yesuusa yarshshoy baynnan woosan Yihoowakko shiiqana danddayokko. Yihooway nuussi immido alꞌꞌo imota gidida ba siiqo Naꞌaa gishshawu, neeni Yihoowa wozanappe galatiyoogee qoncce! w22.07 23 ¶10-12

Ammanettiya asi ba gelido qaalaa naaganawunne tumaa haasayanawu baaxetees. (Maz. 15:4) I ammanettiya asa gidiyoogaa asay erees. Nubaa xeelliyaagankka nu ishanttussinne michchonttussi hegaadan siyettanaadan koyoos. Harati nunan ammanettiyo asa gidiyoogaa nuuni oottiyooban bessana koshshees. Ammanettiyoogaa miishshan leemisana danddayoos. Miishshaa minjjiyoogee metiyaaba; shin xayssiyoogee metenna. Yihooway ammanettiyaagaa. “I oottiyo ooso ubbai ammanettiyaagaa.” (Maz. 33:4) Qassi nuuni A milatanaadan I koyees. (Efi. 5:1) Siiqiyaanne ammanettiya ishanttu maabaraa yame gidanaadan Yihooway nuna ehiido gishshawu, A keehi galatoos! Nu ishanttinne michchontti ammanettiyo ura gidiyo aawatettay nu ubbawu deꞌees. Nuuni siiqiyaageeta, nuna ziqqi oottiyaageeta, akeekanchchata, gawaa geeshshatanne nu huuphiyaa naagiyaageeta gidiyo wode, gubaaꞌiyan deꞌiyaageeti issoy issuwaa ammanettanaadan oottoos. Nu Xoossaa Yihoowa milatiyaageetanne awudenne ammanettiyaageeta gidoos. w22.09 8 ¶1-2; 13 ¶17

Nu gubaaꞌiyan daro ishanttinne michchontti deꞌiyaaba gidikkonne, nuuni nurkka attidabadan issi issitoo nuussi siyettana danddayees; qassi hegaa nurkka genccana koshshees giidi qoppiyoogan hidootaa qanxxana danddayoos. Nuussi hegaadan siyettanaadan Yihooway mule koyenna. I Eelaasa waati maaddidaakko akeeka. Yihooway Eelaasi haasayanaadan minttettiis. I naaꞌꞌutoo Eelaasa hagaadan oychchiis: “Hagan ai oottai?” (1 Kaw. 19:9, 13) Eelaasi bawu siyettidabaa yootido wode ubban Yihooway I giyoobaa ezggiis. Yihooway hara daro Israaꞌeelatikka Awu goynniiddi deꞌiyoogaa Eelaasawu yootiis. (1 Kaw. 19:11, 12, 18) Eelaasi bawu siyettidabaa Yihoowawu yootin, Yihooway hegaa zaaridoogaa siyidi woppu giidoogee qoncce. Yihooway Eelaasawu keehi koshshiya daro oosuwaa immiis. Hazaaꞌeeli Sooriyaa bolli kawotanaadan, Yeehu Israaꞌeela bolli kawotanaadan, qassi Elssaaꞌi hananabaa yootiyaagaa gidanaadan tiyana mala Yihooway awu yootiis. (1 Kaw. 19:15, 16) Yihooway he oosota Eelaasawu immiyoogan I loꞌꞌobaa xallaa qoppanaadan maaddiis. Qassi Elssaaꞌi awu mata lagge gidanaadan oottiis. w22.08 8 ¶3; 9 ¶5

Intte gubaaꞌiyaa SHiiquwaa Addaraashay keexetti woy bottokonetti erii? Hegaadan gidikko, he ooratta addaraashan intte koyro shiiqido wodiyaa dogennaagee qoncce. Intte Yihoowa keehi galatideta. Intte keehi ufayttido gishshawu yeekkennaaninne doometta mazamuriyaa yexxanawu metootennan waayi aggana. Loytti keexettida nu SHiiquwaa Addaraashati Yihooway sabettanaadan oottoosona. SHin, nuuni he goyno sohota yiya asata minttettiyo wode, hegaappe aaruwan Yihooway sabettanaadan oottoos. Kiitettida PHawuloosi hachchi gallassaa xiqisiyan deꞌiya qofaa xaafido wode hegaa qoppiis. Kiitettida PHawuloosi ba mala Kiristtaaneta waati minttettanaakko eriyoogan nuussi loꞌꞌo leemiso. I etassi qarettiis. Nuuni PHawuloosa milatiyoogan ha wodiyan nu ishanttanne michchontta minttettana danddayoos.—1 Qor. 11:1. w22.08 20 ¶1-2

Xoossaa sinttan xillo gidanawu koyiya issi Kiristtaanee zalꞌꞌiyaara gayttida ubbaban tumanchcha gidana bessees. Xillo uri suure pirddaakka siiqiyo gishshawu, issi ura bolli pirddaa pacay gakkiyoogaa beꞌiyo wode azzanees. Qassi tumuppe xillo uri ‘ubba wode Yihoowa ufayssanawu’ koyiyo gishshawu, issibaa kuuyiyo wode Yihooway hegaa waati xeelliyaakko qoppees. Yihooway xillotettawu Pultto gidiyoogaa Geeshsha Maxaafay yootees. Hegaappe denddidaagan, I ‘xillotettay deꞌiyoosaa’ geetettiis. (Erm. 50:7, NW) Yihooway medhdhidaagaa gidiyo gishshawu, issibaa xeelliyaagan likke gididabaanne gidennabaa kuuyiyo maatay deꞌiyoy A xalaalaassa. Nuuni nagaranchcha gidiyo gishshawu, likke gididabaanne gidennabaa erana danddayokko. I likke gididabaanne gidennabaa wurssi erees. (Lee. 14:12; Isi. 55:8, 9) Gidikkonne, nuuni Xoossaa leemisuwan merettido gishshawu, I kessido xillotettaa maaraadan deꞌana danddayoos. (Doo. 1:27) Qassi nuuni Xoossay kessido xillotettaa maaraadan deꞌiyoogaa dosoos. Nuuni nu Aawaa siiqiyoogee A milatanawu nuussi danddayettida ubbaabaa oottanaadan denttettees.—Efi. 5:1. w22.08 27 ¶5-6

Nuuni unꞌꞌettiyo woy hidootaa qanxxiyo wode nu metuwaabaa hirggiyoogaa agganawu maaddiyaabaa oottiyoogee koshshana danddayees. Gidikkonne, Yihooway ixxiyoobaa oottiyoogaappe naagettana koshshees. (Efi. 5: 10-12, 15, 16) Kiitettida PHawuloosi Piliphphisiyuusan deꞌiya Kiristtaanetussi xaafido dabddaabbiyan eti ‘tumubaa, geeshshabaa, siiqobaanne loꞌꞌobaa’ ubbatoo qoppanaadan yootiis. (Pil. 4:8) Allaxxiyoobaara gayttidaagan PHawuloosi yaata yaatoppa giidi yootana xayikkonne, nuuni allaxxanawu dooriyoobay nuna maaddana woy qohana danddayiyoogaa yootiis. Ane hagaa mala: “Ubbaa” giya qaalay deꞌiyo sohota kaalliya qaalatun laamma. “Yettata,” “pilimeta,” “maxaafata” woy “biiduwaa kaassata.” Yaatiyoogee, Xoossaa ufayssiyaabaynne ufayssennabay awugaakko neeni eranaadan maaddana danddayees. Aybippenne aadhdhiya, Yihooway kessido maarata nuuni kaallanawu koyoos.—Maz. 119:1-3. w22.10 9 ¶11-12

‘Worddota’ geetettidaageetuppe amaridaageeti hayqqanaappe kase keehi iitabaa oottidosona. Yaatiyo gishshawu, eti Yihooway kessido xillotettaa maaraadan waani deꞌanaakko tamaarana koshshees. Yaatanawu, saꞌan hanno gakkanawu oosettibeenna, awudeegaappenne aadhdhiya tamaarissiyo oosuwaa Xoossaa Kawotettay kaalettana. Worddota geetettidaageeta tamaarissanay oonee? Zaway baynna daro asatanne hayquwaappe denddida xillo asata. Worddota geetettidaageeti eta sunttay deꞌo maxaafan xaafettanaadan eti Yihoowaara dabbotaa minttananne banttana awu sheedhdhana koshshees. Yesuus Kiristtoosinne tiyettidaageeti worddoti tamaaridobaa waati oosuwan peeshshiyaakko saluwan uttidi loytti xeellana. (Ajj. 20:4) Azazettanawu koyennaageeti eta layttay 100 xalla gidikkonne xayana. (Isi. 65:20) Yihoowaynne Yesuusi asaa wozanan deꞌiyaabaa erana danddayiyo gishshawu, ooratta alamiyaa ooninne mooranaadan paqqadokkona.—Isi. 11:9; 60:18; 65:25. w22.09 17 ¶11-12

Ha xiqisiyan ‘deriyaa heemmiyaageeta’ giya qofay harata haariya asata qonccissees. Kiristtaaneti he kawotettatussi azazettana koshshees. Eti sarotettay deꞌanaadaaninne asay higgiyawu azazettanaadan oottoosona, qassi issi issitoo Yihoowa asaa qohuwaappe naagoosona. (Ajj. 12:16) Yaatiyo gishshawu, nuuni etawu giiraa giirananne qaraxaa qanxxana bessees, qassi etawu bessiyaagaadan yayyananne eta bonchchana koshshees. (Roo. 13:7) He kawotettatussi maatay deꞌidoy Yihooway paqqadido gishshataassa. Rooma biittaa asa gidida, Biittaa Haariya PHenxxeniyaa PHilaaxoosi Yesuusa qorido wode, Yesuusi he maaraa qonccissiis. PHilaaxoosi Yesuusa woranawu woy worennan agganawu kuuyana danddayiyoogaa yootido wode, Yesuusi awu hagaadan giis: “Xoossai neeyyo bollappe maataa immibeennabaa gidiyaakko, neeyyo ta bolli maati de7enna shin.” (Yoh. 19:11) PHilaaxoosaagaadan, ha wodiyan asaa haariyaageetu maatawukka zaway deꞌees. w22.10 14 ¶6

Aadhdhida eranchchanne ammanettida kawoy haariyoogaa doommiyo wode deꞌoy ay mala gidanaakko, Kawuwaa Daawiti ayyaanay kaalettin xaafiis. (Maz. 37:10, 11, 29) Sinttappe yaana Gannatiyaabaa nuuni haratuura haasayiyo wode darotoo Mazamure 37:11 nabbaboos. Yesuusi Maatiyoosa 5-7n tamaarissidoban he xiqisiyaappe ekkidi yootidoogee, hegee sinttappe polettanaagaa qonccissiyo gishshawu, hegaadan oottiyoogee bessiyaaba. (Maa. 5:5) SHin Daawiti yootidobay Kawuwaa Solomona wodekka deꞌoy ay malakko qonccissees. Solomoni Israaꞌeela biittaa haariyo wode, “maattainne eessai goggiyo” biittan Xoossaa asay sarotettaaninne ishaluwan deꞌiis. Xoossay hagaadan giis: “Intte ta higgiyan biikko, . . . taani biittau sarotettaa immana; ooninne yashissennan intte xiskkana.” (Wog. 20:24; 26:3, 6) Solomona haaruwaa wode hegee polettiis. (1 Odi. 22:9; 29:26-28) Mazamure 37:10, 11, 29n deꞌiya qofay beni polettiis, qassi sinttappekka polettana. w22.12 10 ¶8

Nuuni tumu Kiristtaaneti kaaletuwaa kaallana koshshees. Geeshsha Maxaafay hagaadan giidi loꞌꞌo zoriyaa zorees: “Neeni olau kiyanaappe kasetada halchchuwaa halchchana koshshees; daro zoriyaageetu zoriyan xoonoi beettees.” (Lee. 24:6) Nuuni sabbakiyoogaaninne tamaarissiyoogan qara gidanaadan ha xiqisiyan deꞌiya maaraa oosuwan peeshshiyoogee waati maaddii? Nu koyiyoogaadan sabbakiyoogaappenne tamaarissiyoogaappe nuussi imettiya kaaletuwaa kaallanawu baaxetana koshshees. Zoriyoogan meezee deꞌiyoogeeti Geeshsha Maxaafaappe haasayaa haasayiyoonne kifileta shiishshiyoogan nuna loohissiyo, Kiristtaane shiiqotuppe loꞌꞌo kaaletuwaa demmoos. Qassi, nuuni Geeshsha Maxaafaa akeekanaadan maaddiya xuufetanne biidota Yihoowa dirijjitee nuussi giigissees. Xoossaa Qaalan deꞌiya keehi loꞌꞌo zoriyaa gishshawu, Yihoowa keehi galatoos! Hegee baynnaakko woni nuuni waananee! Nuuni nu deꞌo ubban Yihooway yootiyo loꞌꞌo zoriyaa oosuwan peeshshana koshshees.—Lee. 3:13-17. w22.10 23 ¶18-19

Nuuni qumaa miyo wodenne hegee gaacettidi nu bollaara walahettiyo wode nu bollay minnees; hegaadankka, nuuni Geeshsha Maxaafaa nabbabiyo wodenne hegaa wotti dentti qoppiyo wode nu ammanoy minnees. Yihooway A Qaalaa nuuni loytti akeekanaadan koyees. Nuuni woossiyoogan, nabbabiyoogaaninne wotti dentti qoppiyoogan yaatana danddayoos. Koyruwan, Xoossaa qofaa akeekanawu nu wozanaa giigissanawu woossoos. Kaallidi, Geeshsha Maxaafaa nabbaboos. Hegaappe simmin, nuuni nabbabidobaa loytti qoppanawu takki goos. Yaatiyoogee ay demissii? Nuuni kaseegaappe aaruwan wotti dentti qoppiyo wode, Xoossaa Qaalaa loytti akeekoos. Geeshsha Maxaafaa nabbabiyoogeenne hegaa wotti dentti qoppiyoogee keehi koshshiyaaba gidiyoy aybissee? Yaatiyoogee, nuuni ha wodiyan Kawotettaa mishiraachchuwaa sabbakanawunne mata wode wolqqaama pirddaa kiitaa yootanawu koshshiya xalatettaa demmanaadan maaddana. Qassi, nuuni ufayssiya Yihoowa eeshshatubaa wotti dentti qoppiyoogee awudeegaappenne aaruwan akko shiiqanaadan maaddana. w22.11 6-7 ¶16-17

Yesuusi bana tumuppe kaalliyaageeti bantta goꞌꞌaa aggibayidi issoy issuwaara siiqettiyoogaa A kaalliyaageetu xallay gidennan, Yihoowawu goynnennaageetikka akeekanaagaa yootiis. Yihoowa asay siiqettiyo siiqoy keehi dumma. Gidikkonne, Yihoowa Markkati nagaranchcha asa. (1 Yoh. 1:8) Hegaa gishshawu, nuuni gubaaꞌiyan deꞌiyaageeta loytti eriyo wode, eta balaa akeekana danddayoos. (Roo. 3:23) Issoti issoti harati oottido balaa gaasuwan Yihoowawu haggaaziyoogaa aggidoogee azzanttiyaaba. Kiitettidaageeta siiqiyoogaa Yesuusi waati bessidee? Qassi, ha wodiyan Yesuusa leemisuwaa kaalliyoogee waani danddayettii? Yihoowa Markkatikka ha oyshatu zaaruwaa loytti qoppiyoogee loꞌꞌo. Yaatiyoogee, harati balabaa oottiyo wodekka nuuni issoy issuwaara mintti siiqettanaadan maaddana danddayees.—Efi. 5:2. w23.03 26-27 ¶2-4

Wurssettay mati mati biyo wode gubaaꞌe giddoppe paacciyaabay gakkanaagaa eroos. Hegee nuuni Yihoowa ammanettiyoogee paacettanaadan oottana danddayees. Yaatiyo gishshawu, nuuni yuushshi qoppiyaageeta gidana bessees. Issi Kiristtaanee nena naaqqidabadan neeyyo siyettikko, uluwan lancciyaa oyqqoppa. Neeyyo seeray imettikko, hegee nena ay keena yeellayidaakko qoppoppa; zoriyaa ekka, qassi koshshiyaaban laametta. Qassi Yihoowa dirijjitee laammiyoobay ne hanotaara gayttiyaaba gidikko, laamettidabaara hasheta, qassi kaaletuwaa kaalla. Neeni ammanettiyoogee paacettiyo wode, Yihoowawunne A dirijjitiyawu ubbatoo ammanettada deꞌa. Woppu ga, loytta qoppa, qassi issibaa Yihoowagaadan xeella. Yihooway maaddanaadan woossa. Qassi gubaaꞌiyan deꞌiyaageetuura dabbotaa mintta. Yaatikko, aybi gakkinkka Seexaanay Yihoowappe woy A dirijjitiyaappe nena shaakkana danddayenna.—Yaaq. 4:7. w22.11 24-25 ¶14-16

Cimati daafabay gakkanaappe kasetidi ishantti giigettanaadan maaddoosona. Qassi, gubaaꞌiyan deꞌiya ubbay qohuwaappe naagettanawunne cimatuura gayttanawu ay oottana koshshiyaakko eriyaakkonne shaakki eroosona. Neeni ay oottana danddayay? Ne heeran daafabay gakkikko, neeni waata maaddana danddayiyaakko cimata oychcha. Bantta keettaa aggi biidaageeti woy daafaban qohettidaageeta maaddiyaageeti amarida wodiyawu ne son shemppanaadan oottana danddayaasa. Metootida aassiyaageetussi koshshiya qumaa, woy harabaa immana danddayaasa. Daafabay gakkidoy neeni deꞌiyo sohuwaappe haakkidi deꞌiya heeraana gidikkokka, maaddana danddayaasa. Waatada? Qohettidaageetussi woossiyoogaana. (2 Qor. 1:8-11) Kumetta saꞌan oosettiya oosuwawu miishshaa immiyoogan, daafaban qohettidaageeta maaddiyo oosuwaa kaafana danddayaasa. (2 Qor. 8:2-5) Daafaban qohettida heeraa neeni baanawu koyikko, qohettidaageeta maaddanawu waatana danddayiyaakko cimata oychcha. Neeni maaddanaadan shoobettikko, loytta maaddanaadan loohissoy neessi imettana danddayees. w22.12 24 ¶8; 25 ¶11-12

Hachchi gallassaa xiqisiyan deꞌiya qofaa hara Geeshsha Maxaafaa birshshettay hagaadan gees: “Hara asaa gakkiya paaciyaappe dumma paacee inttena gakkenna.” Ha qofay Qoronttoosan deꞌiya attumanne macca Kiristtaanetussi odettiis. Kase etappe amaridaageeti shaaramuxiyaageeta, mattuman banttaagaa mala gidida asatuura zinꞌꞌiyaageetanne mattottiyaageeta. (1 Qor. 6:9-11) Eti xammaqetti simmidi iitabaa mule amottibookkona gaada qoppay? Hegaadan gidennan aggana danddayees. Eti ubbay tiyettida Kiristtaaneta gidikkonne, nagaranchcha asa. Eti ubbatoo iita amuwaa agganawu baaxetana koshshidoogee qoncce. Hegee nuna minttettiyaaba. Aybissi? Hegee, neeni baaxetaydda deꞌiyo iita amoy awugaakka gidin, hegaa hara uri xoonidoogaa bessiyo gishshataassa. “Intte ishantti hegaadan waayettiyoogaa eridi, ammanuwan minnidi, aara [eqettana]” danddayeeta.—1 PHe. 5:9. w23.01 12 ¶15

Yesuusi bana kaalliyaageeta Yihooway naaganaadan oychchiis. (Yoh. 17:11) Hegee nuuni xala gidanaadan maaddiyoy aybissee? Yihooway nu morkketu ubbaappe mino gidiyo gishshataassa. (1 Yoh. 4:4) Yihooway ubbabaa beꞌees. Nuuni Yihoowan ammanettikko, yashshaa xoonidi xala gidanaadan I maaddanaagaa ammanettoos. Timirtte keettan woy ooso sohuwan neeni Yihoowa Markka gidiyoogaa haratuyyo yootanawu issi issitoo yayyay? Harati nebaa woyganaakko ga hirggada aassiyaagaa gidanawu woy xammaqettanawu mammottay? Hegaa mala qofay neeni loꞌꞌobaa oottiyoogaa digganaadan oottoppa. Wozanappe Yihoowa woossa. Neeni A sheniyaa oottanawu xalatettaa immanaadan A oychcha. Neeni Yihooway ne woosaa zaariyoogaa beꞌiyo wode, kaseppe aaruwan xalanne mino gidana.—Isi. 41:10, 13. w23.01 29 ¶12; 30 ¶14

Geeshsha Maxaafaa xeelliyaagan Parisaawetussi deꞌiya bala qofaa qonccissanawu Yesuusi, “Nabbabibeekketii?” yaagidi eta oychchiis. (Maa. 12:1-7) He wode, Yesuusi erissiyo ashkkarati Sambbataa bonchchibookkona giidi Parisaaweti mootidosona. Parisaaweti Sambbataa higgee koshshido gaasuwaa akeekibeennaagaanne maariyaageeta gidennaagaa qonccissanawu, Yesuusi naaꞌꞌu Geeshsha Maxaafaa leemisuwaanne Hooseꞌa maxaafaappe ekettida xiqisiyaa etawu yootiis. He asati Xoossaa Qaalaa nabbabiyoogee eti laamettanaadan oottibeennay aybisee? Eti boranawunne otorettanawu koyidi nabbabiyo gishshataassa. Eta hanotay eti nabbabiyoobaa akeekennaadan diggiis. (Maa. 23:23; Yoh. 5:39, 40) Yesuusi Maatiyoosa 19:4-6nkka “Nabbabibeekketii?” giidi hegaara issi mala oyshaa oychchidoogaa akeeka. Eti meretaabaa yootiya taarikiyaa nabbabidaba gidikkonne, he taarikee aqo deꞌuwaa xeelliyaagan Xoossaa qofaa tamaarissiyoogaa ammanibookkona. Nuuni suurebaa qoppidi Geeshsha Maxaafaa nabbabana koshshiyoogaa Yesuusi yootidobaappe tamaaroos. Parisaawetuugaappe dumma hanotan nuuni nuna ziqqi oottiyaageetanne tamaaranawu eeno giyaageeta gidana koshshees. w23.02 12 ¶12-13

Sooninne ooso sohuwan qohiyaabaappe naagettanaadan maaddiya Higgiyaa Yihooway Israaꞌeelatussi immiis. (Kes. 21:28, 29; Zaa. 22:8) Issi uri qoppennan asa worikko hegee daro iitabaa kaalettana danddayees. (Zaa. 19:4, 5) Yelettibeenna naꞌaa qoppennan qohiyaageetikka qaxxayettana bessiyoogaa Higgee yootees. (Kes. 21:22, 23) Yihooway nuuni qohiyaabaappe naagettanaadan koyiyoogaa Geeshsha Maxaafay qoncciyan yootees. Sooninne ooso sohuwan qohiyaabaappe naagettiyoogan Xoossay immido deꞌuwaa imotaa nashshiyoogaa bessoos. Nuuni qarabaa, marzziyaa, woy xale malabaa olanawu koyikko, harata qohenna ogiyan, qassi guutta naati demmennasan olana koshshees. Nuuni tamaa eettiyo, haattaa penttissiyo woy issi issi miishshata goꞌettiyo wode naagettana koshshees. Qassi hegeeta oottiyo wode naagiya woy xeelliya asi baynnan aggidi baana koshshenna. Nuuni kaamiyaa laaggiyoogee metanaadan oottiya xaliyaa mittidaba, ushshaa uyidaba, woy laagganawu daafuridaba gidikko, kaamiyaa laaggana koshshenna. Qassi nuuni laaggiyo wode moobayliyaa goꞌettana bessenna. w23.02 21-22 ¶7-9

Yihooway danddayanchcha, kehanne nubaa akeekiya Asttamaare. I ba tamaaretussi deꞌiya loꞌꞌobaa xeellees. (Maz. 130:3) Qassi I nuuni oottana danddayiyoogaappe aarobaa mule naagenna. Maalaalissiya imota gidida ne guuggiyaa I medhdhidoogaa hassaya. (Maz. 139:14) Nuna Medhdhidaagee nuuni merinawu tamaaranaadaaninne hegan ufayttanaadan koyees. Yaatiyo gishshawu, haꞌꞌi nuuni Geeshsha Maxaafaa tumaa ‘laamotiyoogee’ eratetta. (1 PHe. 2:2) Neeni polana danddayiyoobaa halchcha; qassi ubbatoo Geeshsha Maxaafaa nabbabanne xannaꞌa. (Yaas. 1:8) Yihooway maaddin, neeni nabbabiyoogan keehi ufayttananne kaseegaappe aaruwan abaa tamaarana. Era xallay gidenna. Eratettay neessi koshshiyo waanna gaasoy neeni Yihoowaabaa eranaadan maaddiyoogaa, qassi A siiqiyoogaanne an ammaniyoogaa mala eeshshati neessi deꞌanaadan oottiyoogaa. (1 Qor. 8:1-3) Neeni aggennan tamaariyo wode, Yihooway neessi ammanuwaa gujjanaadan ubbatoo A oychcha. (Luq. 17:5) I hegaa mala woosaa kehatettan zaarees. w23.03 10 ¶11, 13

Erissiyo ashkkarati Yerusalaame xayuwaa naagiyo wode, eti oosoy daridoogeeta gidanaadan Yesuusi koyiis. Yesuusi etawu oosuwaa immiis. Eti “Yerusalaameeninne Yihudaa biitta ubban, Samaariyaaninne sa7aa gaxaa gakkanaashinkka” mishiraachchuwaa yootanaadan I azaziis. (Oos. 1:6-8) Hegee keehi daro ooso! Eti sabbakanawu banttawu danddayettida ubbabaa oottiyoogan bantta wodiyaa akeekan goꞌettidosona. Nuuni oottiyooban naagettanawu, nu wodiyaa waati goꞌettiyaakko loytti qoppana koshshees. ‘Qoppibeennabay’ nuna ubbaa gakkana danddayees. (Era. 9:11, NW) Qoppennan nuuni hayqqana danddayoos. Nuuni Yihooway koyiyoobaa oottiyoogaaninne aara dabbotaa minttiyoogan nu wodiyaa akeekan goꞌettana danddayoos. (Yoh. 14:21) Nuuni ‘qaaxxennan minni eqqananne ubba wode Godaa oosuwaa azallennan oottana’ koshshees. (1 Qor. 15:58) Yaatikko, nu deꞌuwaa wurssettan woy ha alamiyaa wurssettan Yihoowawu loytta oottarkkinaashsha giidi zilꞌꞌettokko.—Maa. 24:13; Roo. 14:8. w23.02 18 ¶12-14