Usuppune

Hachchi gallassaa xiqisiyan deꞌiya qofay woygiyoogee? Yesuusi qonccissidoogaadan, hagaa mala siiqoy issi Kiristtaanee baappe aaruwan hara uraa siiqanaadan ubba qassi koshshikko, ba mala Kiristtaaniyaa gishshawu hayqqanawukka eeno gaanaadan oottees. Siiqoy keehi koshshiyaaba gidiyoogaa Xoossaa Qaalay nuna tamaarissees. Leemisuwawu, kaallidi deꞌiya xiqiseti daro asay keehi dosiyoogeetuppe amaridaageeta: “Xoossai siiqo.” (1 Yoh. 4:8) “Neeni ne shooruwaa ne huuphedan siiqa.” (Maa. 22:39) “Siiqoy daro nagaraa [kammees.]” (1 PHe. 4:8) “Siiqoi mulekka xayenna.” (1 Qor. 13:8) Hageetinne hara xiqiseti ha ufayssiyaa eeshshaa bessiyoogee keehi koshshiyaaba gidiyoogaa loytti qonccissoosona. Siiquwawu pulttoy Yihoowa; Yihoowa ayyaanay deꞌiyoogeetinne I anjjidoogeetu xalaalay issoy issuwaara siiqettana danddayoosona. (1 Yoh. 4:7) Yesuusi bana siiqiyaageetu xallay issoy issuwaara tumuppe siiqettanaagaa yootidoy hegaassa. Yesuusi kasetidi yootidoogaadan, tumuppe A kaalliyaageeti issoy issuwaara mintti siiqettiyoogan daro asay eta shaakki erees. w23.03 27-28 ¶5-8

Neeni kaseegaappe aaruwan haratussi atto gaana koshshii? Etabay Geeshsha Maxaafan odettido haratussi coo atto giidaageetubaanne atto gibeennaageetubaa nabbabiyoogaaninne hegaa wotta dentta qoppiyoogan doommana danddayaasa. Yesuusi oottidobaa qoppa. I haratussi atto gaanawu eeno giis. (Luq. 7:47) Qassi I eta mooruwan gidennan, eti oottana danddayiyooban xeelaa wottiis. SHin, Yesuusa wode deꞌida Parisaaweti ‘hara asa ubbaa karoosona.’ (Luq. 18:9) He hanotata wotta dentta qoppa simmada, nena hagaadan oychcha: ‘Taani haratubaa qoppiyoobay aybee? Taani xeelaa wottiyo eta eeshshati awugeetee?’ Neeni issi urawu atto gaanawu metootikko, he urawu deꞌiya loꞌꞌo eeshshata ubbaa xaafanawu mala. Yaatada, nena hagaadan oychcha: ‘Yesuusi he uraa waati xeellii? I awu atto gaanee?’ Nuuni yaatikko, nu qofaa laammana danddayoos. Nuuni nuna yiilloyida urawu atto gaanawu koyro heeran metootana danddayoos. SHin nuuni nu eeshshaa giigissanawu aggennan baaxetikko, sinttanawu kaseegaappe aaruwan atto gaana. w22.04 23 ¶6

Ajjuutaa maxaafay Xoossaa morkketa qonccissiya amarida doꞌatubaa yootees. Leemisuwawu, ‘abbaappe kiyiya issi doꞌay’ deꞌees. “Ayyo tammu kaceenne laappun huuphee de7ees.” (Ajj. 13:1) He doꞌaa kaallidi ‘hara doꞌay saꞌaappe kiyees.’ He doꞌay miimminttiyaadan haasayeesinne “tamaa saluwaappe” wottees. (Ajj. 13:11-13) Kaallidi dumma “zo7o do7aa” beꞌoos; qassi hegaa shaaramuxiyaa togga uttaasu. Ha heezzu doꞌati Xoossaa Yihoowawunne A Kawotettawu daro wodiyawu morkke gididi deꞌiyaageeta qonccissoosona. Hegaa gishshawu, nuuni eta eriyoogee keehi koshshiyaaba. ( Ajj. 17:1, 3) Nuuni he doꞌatinne shaaramuxiyaa ay qonccissiyaakko akeekana koshshees. Hegaa akeekiyo loꞌꞌo ogee Geeshsha Maxaafay bana barkka qonccissanaadan oottiyoogaa. Ajjuutaa maxaafan odettida malaatatuppe daroti Geeshsha Maxaafan deꞌiya hara maxaafatun qonccidosona. w22.05 8-9 ¶3-4

Nuuppe amaridaageeti cimatettaa gaasuwan woy harggiyaa gaasuwan, koyiyoogaa keenaa Yihoowayyo haggaazana danddayenna gishshawu hidootaa qanxxoos. Neeni oottana danddayennabaa gaasuwan issi issitoo hidootaa qanxxikko, nena hagaadan oychcha, ‘Yihooway taappe koyiyoobay aybee?’ Neeni haꞌꞌi oottana danddayiyoobaa oottanaadan Yihooway koyees. Ha hanotaa qoppa. Layttay 80 gidido issi michchiyaa hidootaa qanxxawusu, ayssi giikko, iyyo layttay 40 gidido wode haggaaziyoogaa keenaa haꞌꞌi haggaazana danddayukku. A baassi danddayettida keenaa oottikkonne, Yihooway hegan ufayttenna gaada qoppawusu. SHin hegee tumee? Ane hagaa qoppa. Ha michchiyaa iyyo layttay 40 gidido wode baassi danddayettida keenaa oottaasu, qassi haꞌꞌi iyyo layttay 80 gidido wodekka baayyo danddayettida keenaa oottiyoogaa mule aggabeykku. Nuuni nuussi danddayettida keenaa oottikko, Yihooway nunan keehi ufayttana. (Maatiyoosa 25:20-23​ra gatta xeella.) Nuuni oottana danddayennabaa qoppiyoogaa aggidi oottana danddayiyoobaa qoppikko, ufayttoos. w22.04 10 ¶2; 11 ¶4-6

Ajjuutaa shemppo 21y, 144,000ta keehi loꞌꞌiya ‘Ooratta Yerusalaamo’ geetettiya katameera geeddarssees. Ha katamiyaa “Dorssai kiittido tammanne naa77atu sunttai xaafettido” 12 shuchchatun baasettaasu. ( Ajj. 21:10-14; Efi. 2:20) Ha katamiyaa hara katamaa mala gidukku. Katamee wogga ogee geeshsha worqqa, 12 penggeti inqquwaa giyo alꞌꞌo shuchchan oosettidosona, dirssaynne hiixettida shuchchay bonchchettida shuchchatun alleeqettiis, qassi “geesai, gomppainne xoqqatettai issi mala.” (Ajj. 21:15-21) SHin Yohaannisi issibay baynnaagaa akeekiis! Yohaannisi hagaadan giis: “Godai, Ubbaappe Wolqqaama Xoossainne Dorssai katamee Beeta Maqidase gidiyo gishshau, taani he katamen Beeta Maqidase be7abeikke. Katameeyyo poo7iya awi woi agini koshshenna. Aissi giikko, Xoossaa bonchchoi he katamen poo7ees; Dorssaikka he katameeyyo xomppe.” (Ajj. 21:22, 23) Ooratta Yerusalaame yarati Yihoowaara deꞌana.—Ibr. 7:27; Ajj. 22:3, 4. w22.05 17-18 ¶14-15

Yihooway nuna Medhdhidaagaa, nuuyyo Higgiyaa Immiyaagaanne nu Daanna xalla gidennan, saluwan deꞌiya nu siiqo Aawa. (Maz. 100:3; Isi. 33:22) Nuuni A bolli nagaraa oottidi zilꞌꞌettidi wozanappe simmiyo wode, nuuyyo atto giyo maatay awu deꞌees, qassi I yaatanawu koyees. (Maz. 86:5) Yihooway hananabaa yootiya Isiyaasa baggaara siiqiyoogaa bessiya ha qofaa yootiis: “Intte nagarai baaraadan zo77ikkokka, shachchaadan booxxana.” (Isi. 1:18) Nuuni ubbay nagaranchcha gidiyo gishshawu, harata yiilloyiyaabaa haasayoosinne oottoos. (Yaaq. 3:2) SHin, hegaa giyoogee nuuni etaara dabbotaa minttana danddayokko giyoogaa gidenna. Nuuni atto giyaageeta gidikko, hegaadan oottana danddayoos. (Lee. 17:9; 19:11; Maa. 18:21, 22) Nuuni guuttaban issoy issuwaa qohiyo wode, Yihooway nuuni atto gaanaadan koyees. Nuuni yaatanaadan oottiya gaasoy deꞌees. Qassi Yihooway darotoo nuuyyo “coo” atto gees.—Isi. 55:7. w22.06 8 ¶1-2 w22.06 8 ¶1-2

Nuna haratuura geeddarssiyoogaappe naagettiyoogee koshshiyaaba gidikkonne, Yihoowayyo haggaaziya haratuppe darobaa tamaarana danddayoos. Leemisuwawu, ane Yesuusa hanotaa qoppoos. I wottiyoobi baynnaagaa gidikkonne, A loꞌꞌo eeshshatuppenne I oottido loꞌꞌobatuppe nuuni tamaarana danddayoos. (1 PHe. 2:21) Nuuni danddayiyoogaa keenaa A leemisuwaa kaallanawu loytti baaxetikko, Yihoowayyo loytti haggaazoos. Nuuni Xoossaa Qaalaappe ammanettida attuma asatunne macca asatu taariketa demmana danddayoos; eti nagaranchcha gidikkonne, nuuni eta milatana danddayoos. Yihooway ‘ta wozanadan oottiyaagaa’ giido Kawuwaa Daawitabaa qoppa. (Oos. 13:22) SHin Daawiti gita nagarata oottiis. Yaatikkonne, I nuuyyo loꞌꞌo leemiso. Aybissi? I gaaso shiishshanawu malibeenna gishshataassa. I baassi imettida wolqqaama zoriyaa ekkiis, qassi I oottidoban wozanappe azzaniis. Hegaappe denddidaagan, Yihooway ayyo atto giis.—Maz. 51:3, 4, 10-12. w22.04 13 ¶11-12

Geeshsha Maxaafay hayqoy morkke gidiyoogaa yootees. (1 Qor. 15:25, 26) Nuuni woy nu siiqiyo uri keehi sahettiyo wode, hayquwaabaa qoppidi hirggana danddayoos. Nuuni hayquwaa yayyiyoy aybissee? Nuuni merinawu ufayttidi deꞌanaadan oottidi Yihooway nuna medhdhido gishshataassa. (Era. 3:11) SHin, hayquwaa yayyiyoogee nu deꞌuwaa naaganaadan nuna maaddana danddayees. Hegee nuuni bollawu maaddiya qumaa maanaadaaninne ispporttiyaa oottanaadan, koshshikko dottoriyaa maaduwaa oychchanaadaaninne xaliyaa goꞌettanaadan, qassi qohiyaabaappe naagettanaadan nuna denttettana danddayees. Nuuni nu deꞌuwaa xoqqu ootti xeelliyoogaa Seexaanay erees. Hegaa gishshawu, I nuuni paxa deꞌanawu Yihoowaara dabbotido dabbotaakka aggana giidi yootees. (Iyy. 2: 5) Seexaanay keehi baliis! SHin, Seexaanawu ‘hayquwaa kaalettiyo wolqqay deꞌiyo’ gishshawu, I Yihoowa nu agganaadan oottanawu nuuni hayquwaa yayyiyoogaa goꞌettanawu malees.—Ibr. 2:14, 15, NW. w22.06 18 ¶15-16

Nu oosoy teqettiyo wode, guutta citatun nu ishanttuura shiiqana danddayoos. Awudeegaappenne aaruwan nuuni sarotettan deꞌiyoogee keehi koshshiyaaba. Issoy issuwaara gidennan, Seexaanaara olettite. Ne ishaa mooruwaa atto ga, woy merettida metuwaa sohuwaara giigissanawu baaxeta. (Lee. 19:11) Issoy issuwaa maaddite. (Tii. 3:14) Haggaazo citay issi michchiyo maaddidoogan he haggaazo citan deꞌiya ubbay goꞌettiis. Eti so asaadan, issoy issuwaara keehi matattidosona. (Maz. 133:1) Sunttati nu oosuwaa teqqikkokka, daro shaꞌu ishanttinne michchontti Yihoowawu haggaazoosona. Etappe amaridaageeti bantta ammanuwaa gishshawu qashettidosona. Nuuni etassinne eta soo asaassi woossana danddayoos; qassi etikka qashettanaagaa erikkonne he ishanttussinne michchenttussi ayyaanaaban, asatettaabaaninne higgiyaara gayttidaban koshshiyaaban maaddanawu baaxetiyaageetussikka woossana danddayoos. (Qol. 4:3, 18) Ne woosay ha ishanttanne michchontta ubbaa maaddana danddayiyoogaa mule dogoppa!—2 Tas. 3:1, 2; 1 Xim. 2:1, 2. w22.12 26-27 ¶15-16

Naati darotoo banttana yelidaageetu hanotaa kaalloosona. Yelidaageeti ubbay nagaranchcha gidiyoogee tuma. (Roo. 3:23) Gidikkonne, yelidaageeti bantta naatussi loꞌꞌo leemiso gidanawu banttawu danddayettida ubbabaa oottana koshshees. Issi aaway hagaadan giis: “Naati ubbabaa xunxxiya ispponjje mala.” I gujjidi hagaadan giis: “Eti oottanaadan nuuni eta tamaarissiyoobaa nuuni oottenna wode eti nuussi yootoosona.” Yaatiyo gishshawu, nu naati Yihoowa siiqanaadan koyikko, nuuni A siiqiyo siiqoy minonne qoncce gidana koshshees. Yelidaageeti bantta naati Yihoowa siiqanaadan tamaarissana danddayiyo daro ogeti deꞌoosona. Layttay 17 gidido Andriwu giyo naꞌay hagaadan giis: “Woossiyoogee keehi koshshiyaaba gidiyoogaa tana yelidaageeti ubbatoo tana tamaarissidosona. Ubba galla qammi, taani buzo woosaa woossikkonne, ta aaway tanaara woossees. . . . Taani haꞌꞌi metootennan woossays, qassi Yihoowa tana siiqiya ta Aawadan xeellays.” Yelidaageetoo, intte Yihoowa siiqiyoogee intte naatikka A siiqanaadan maaddana danddayiyoogaa ubbatoo hassayite. w22.05 28 ¶7-8

Xinqqatiyawu giigettanawu oottana koshshiya koyrobay nu nagaraappe wozanappe simmiyoogaa. (Oos. 2:37, 38) Wozanappe nagaraappe simmiyoogee wozanappe laamettanaadan oottees. Neeni pokkobaa oottiyoogaa, tambbuwaa cuwayiyoogaa woy iita haasayaa haasayiyoogaa mala, Yihoowa ufayssennabaa oottiyoogaa aggadii? (1 Qor. 6:9, 10; 2 Qor. 7:1; Efi. 4:29) Laamettanawu ubbatoo baaxeta. Maaduwaanne kaaletuwaa demmanawu nena Geeshsha Maxaafaa xannaꞌissiyaagaa woy gubaaꞌe cimata oychcha. Neeni so asaara issippe deꞌiya yelaga gidikko, neeni xammaqettennaadan diggana danddayiya iita eeshshata xoonanaadan maaddana mala nena yelidaageeta ubbatoo oychcha. Neeni ayyaanaaban loꞌꞌobaa meeze oottiyoogee keehi koshshiyaaba. Ayyaanaabaa meezetuppe issoy Kiristtaane shiiqota shiiqiyoogaanne shiiquwan qofaa yootiyoogaa. (Ibr. 10:24, 25) Qassi, neeni sabbakiyoogaa doommiyo wode, hegaa ubbatoo ootta. w23.03 10-11 ¶14-16

Doomettaabaa 3:14, 15n odettidaageetu giddon “shooshshaynne” shooshshaa “zerettay deꞌoosona.” Tumu shooshshay Yihooway Edene gannatiyan yootidobaa akeekana danddayenna. Yaatiyo gishshawu, Yihooway pirddaa yootidoy qoppana danddayiya meretaassa. Yaatin he shooshshay oonee? Ajjuutaa 12:9y he shooshshay oonakko loytti qonccissees. He xiqisee “beni shooshshai” Seexaanaa Dabloosa gidiyoogaa yootees. Issi uraa keehi milatanawu baaxetiyo gishshawu ayyo naata geetettana danddayiyaageeta Geeshsha Maxaafay issi issitoo zerettaa yaagees. Yaatiyo gishshawu, Seexaanaagaadan Xoossaa Yihoowanne A asaa eqettiya kiitanchchatinne asay shooshshaa zerettata. Nohe wode saluwan deꞌiyo sohuwaa aggidi yiida kiitanchchata gujjin bantta aawaa Dabloosaagaa mala eeshshay deꞌiyo iita asatikka shooshshaa zeretta.—Doo. 6:1, 2; Yoh. 8:44; 1 Yoh. 5:19; Yih. 6. w22.07 14-15 ¶4-5

Kiitettida PHawuloosi ba ishantta keehi siiqees. A daro metoy gakkiis. Yaatiyo gishshawu, I ba mala Kiristtaaneta metoy gakkiyo wode etawu qarettana danddayees. Issi wode, PHawuloosa miishshay metido gishshawu, I baassinne ba laggetussi koshshiyaabaa kunttanawu oosuwaa koyana koshshiis. (Oos. 20:34) PHawuloosi dunkkaaniyaa sikkees. I Qoronttoosa gakkido wode, aagaadan dunkkaaniyaa sikkiya Aqiilaranne PHirisqqiliira koyro oottiis. SHin ‘sambbata ubban’ I Ayhudatuyyoonne Giriiketuyyo sabbakiis. Hegaappe simmin, Sillaasinne Ximootiyoosi yaa gakkido wode PHawuloosi “qaalaa yootuwaa toliis.” (Oos. 18:2-5) PHawuloosi Yihoowawu haggaaziyoogee ba deꞌuwan waanna halchcho gidiyoogaa mule dogibeenna. PHawuloosi minnidi haggaaziyoogaaninne ba deꞌuwawu koshshiyaabaa kunttiyoogan loꞌꞌo leemiso gidiyo gishshawu, ba ishanttanne michchontta minttettana danddayiis. Deꞌuwan gakkiya metoynne so asawu koshshiyaabaa kunttiyoogee A ishanttinne michchontti ‘keehi koshshiyaabaa,’ hegeekka Yihoowa goynuwaara gayttida ubbabaa xaasayi xeellanaadan oottenna mala I eta hassayissiis. w22.08 20 ¶3

Ha wodiyan Kawotettaa mishiraachchoy saꞌa ubban odettanaadan Xoossay koyees. (1 Xim. 2:3, 4) He oosoy Yihoowaba, qassi keehi koshshiyaaba gidiyo gishshawu, hegaa kaalettanaadan I ba siiqiyo Naꞌaa sunttiis. Nuna Yesuusi kaalettiyo gishshawu wurssettay yaanaappe kase Yihooway koyiyoogaadan sabbakuwaa oosoy polettanaagaa nuuni ammanettana danddayoos. (Maa. 24:14) Hegaa nuuni ammanettana danddayiyoy aybissee? I saluwaa baanaappe kase, bana kaalliya ammanettida amaridaageetuura Galiilan deꞌiya issi deriyan shiiqiis. I etayyo hagaadan giis: “Maata ubbai saluwaaninne sa7an taayyo imettiis.” Yaagi simmidi I woygidaakko akeeka: “Hegaa gishshau, intte biidi, asa ubbaa tana kaalliyaageeta oottite.” (Maa. 28:18, 19) Yaatiyo gishshawu, Yesuusawu imettida aawatettaappe issoy sabbakiyo oosuwaa kaalettiyoogaa. Yesuusi kaalettin nu wodiyaa gakkanaashin he sabbakuwaa oosoy loytti oosettana. w22.07 8 ¶1, 3; 9 ¶4

Hayqqanaappe kase ‘loꞌꞌobaa oottida’ xilloti eta sunttay deꞌo maxaafan xaafetti uttido gishshawu, eti ‘deꞌanawu denddana.’ Hegaa giyoogee, Yohaannisa 5:29n ‘loꞌꞌobaa oottidaageeta’ geetettidaageetinne Oosuwaa 24:15n ‘xillota’ geetettidaageeti issi mala asata giyoogaa. Nuuni akeekidobay Roome 6:7n deꞌiya qofaara maayettiyaaba. Xiqisee hagaadan gees: “Issi urai haiqqiyo wode nagaraa wolqqai a haarenna.” Yaatiyo gishshawu, he xilloti hayqqiyo wode Yihooway eta nagaraa atto gees, shin eti hayqqanaappe kase ammanetti oottido ubbabaa I dogenna. (Ibr. 6:10) Hayquwaappe denddana he xilloti, eta sunttay deꞌo maxaafan xaafettidi deꞌanaadan eti ubbatoo ammanettidi deꞌana koshshiyoogee qoncce. w22.09 18 ¶13, 15

Ammanettiya asa gidiyoogan hananabaa yootiya Daaneeli keehi loꞌꞌo leemiso. I omoodettidi Baabiloonen deꞌiyaaba gidikkonne, loꞌꞌo sunttay deꞌiyo ammanettiya asa gidiyoogaa bessiis. I Yihooway maaddin Baabiloona Kawuwaa Naabukadanaxoora aymuwaa birshshido wode, asay kaseegaappe aaruwan an ammanettiis. (Dane. 4:20-22, 25) Daro layttappe guyyiyan, Daaneeli Baabiloone kawo keettaa godaa bollan xaafettida xuurabaa suure birshshiyoogan ammanettida asa gidiyoogaa zaarettidi bessiis. (Dane. 5:5, 25-29) Guyyeppe, Meedoona asa gidida Daariyoosinne sunttettida A oosanchchati Daaneelan ‘dumma’ ayyaanay deꞌiyoogaa akeekidosona. Eti Daaneeli ‘ammanettiya asa gidido gishshawu, A bolli ayba balanne demmibookkona.’ (Dane. 6:3, 4) Nuna hagaadan oychchana danddayoos: ‘Taani ammanettiya asa gidiyoogan erettiyaanaa?’ Nuuni ammanettiya asa gidiyo wode Yihooway sabettanaadan oottoos. w22.09 8-9 ¶2-4

Likke gididabaanne gidennabaa xeelliyaagan Yihooway kessido maaraa kaalliyoogee nuna goꞌꞌees. Hegaadan giyoy aybissee? Keettaa keexxiya dirijjiteti ubbay bantta maaraa kessiyaakko aybi hananaakko qoppa. Hegee maaray mankkay xayanaadan oottees. Qassi dottoretinne narsseti asaa akkamiyo wode maarata ubbaa kaallana xayikko, sahettiya amaridaageeti hayqqana danddayoosona. Ammanttiya maarati qohuwaappe naagiyoogee qoncce. Hegaadankka, likke gididabaanne gidennabaa xeelliyaagan Xoossay kessido maarati nuna naagoosona. Yihooway I kessido maaraadan deꞌanawu baaxetiyaageeta anjjees. I hagaadan giis: “Xilloti biittaa laattananne yan merinau de7ana.” (Maz. 37:29) Ubba asay Xoossay kessido maarata kaalliyo wode issippetettay, sarotettaynne ufayssay deꞌanaagaa qoppa! Neeni hegaadan ufayssiya deꞌuwaa deꞌanaadan Yihooway koyees. Nuuni ubbay xillotettaa siiqiyo loꞌꞌo gaasoy deꞌiyoogee qoncce! w22.08 27-28 ¶6-8

Nuna wolqqaama paacee gakkiyo wode Yihoowawunne A dirijjitiyawu ammanettanawu metootana danddayoos. Nuuni hegaa mala paaciyaa waati xoonana danddayiyoo? Nuuni yuushshi qoppananne ammanuwan minnana koshshees. Nuuni woppu giyo wode, loytti qoppiyo wodenne issibaa Yihoowaagaadan xeelliyo wode, yuushshi qoppiyaageeta gidoos. Nuuni yaatiyo wode, issibaa yuushshi qoppennan coo oottokko. Nu mala Kiristtaanee, geella aawatettay deꞌiyo issi uri nena nuna naaqqidabadan neessi siyettana danddayees. He ishay nena naaqqidoy eriiddi waayi gidana. (Roo. 3:23; Yaaq. 3:2) Gidikkonne, I oottidobay nena yiilloyana danddayees. Neeni hagaadan qoppana danddayaasa: ‘Issi ishay hagaadan oottiyaaba gidikko, hagee tumuppe Xoossaa dirijjitee?’ Nuuni hegaadan qoppanaadan Seexaanay koyees. (2 Qor. 2:11) Nuuni hegaadan qoppikko, Yihoowanne A dirijjitiyaa aggana danddayoos. Yaatiyo gishshawu, nuuni uluwan lancciya oyqqennaadan naagettana koshshees. w22.11 20 ¶1, 3; 21 ¶4

Yihooway maalaalissiya merinaa deꞌuwaa hidootaa nuussi immiis. Amaridaageeti hayqqenna ayyaana mereta gididi saluwan deꞌanawu hidootoosona. (1 Qor. 15:50, 53) SHin daroti sahoy xayin ufayttiiddi saꞌan merinawu deꞌanawu hidootoosona. (Ajj. 21:3, 4) Nuuni merinawu deꞌanawu hidootiyoy saluwan gidin saꞌan, nu hidootay nuussi keehi alꞌꞌo. Nuuyyo hidootay deꞌanaadan oottiday Yihoowa gidiyo gishshawu hegee polettanaagaa ammanettana danddayoos. (Roo. 15:13) I qaalaa gelidoogaanne ba gelido qaalaa ubbatoo naagiyoogaa eroos. (Qoo. 23:19) Yihooway ba gelido qaalaa ubbaa polanawu awu koshshaykka wolqqaykka deꞌiyoogaa nuuni ammanoos. Saluwan deꞌiya nu Aaway nuna siiqees, qassi nuuni an ammanettanaadan koyees. Nuuni nu hidootaa Yihoowan wottiyo wode, waayiyaa genccana danddayoos; qassi sinttappe nuna aybi gakkikkonne xala gidananne ufayttana danddayoos. w22.10 24 ¶1-3

Asay siyanawu koyenna gishshawu, eti waayettanaadan Yihooway paqqadanaagaa Isiyaasi kasetidi yootiis. (Isi. 30:5, 17; Erm. 25:8-11) Qassi, Baabilooneti eta omooddidi efiido wode hegaadan haniis. SHin, Ayhudatuppe ammanettida amaridaageeti etaara deꞌoosona; qassi eti Yerusalaame guyye simmidi yan deꞌanaadan Yihooway oottanaagaa Isiyaasi etawu yootiis. (Isi. 30:18, 19) Hanidabaykka hegaa. Baabiloone omooduwaappe Yihooway eta laꞌa kessiis. SHin, eti sohuwaara laꞌa kiyibookkona. “GODAI intteyyo kehanau naagees” giya qofay ammanettidaageeti laꞌa kiyanaappe kase amarida wodee aadhdhanaagaa qonccissiyaaba. Israaꞌeelati, etappe amaridaageeti Yerusalaame simmanaadan paqqadettana gakkanawu, Baabiloone omooduwan 70 layttaa takkidosona. (Isi. 10:21; Erm. 29:10) Israaꞌeelati bantta biitti simmido wode, azzanidi yeekkiyoogaa aggidi keehi ufayttidi yeekkidosona. w22.11 9 ¶4

Koyro xeetu layttan deꞌida kiitettidaageeti Yesuusabaa sabbakiyoogan eta gakkida yedetaa genccidosona; hegaara issi malabay ha wodiyan daro biittatun deꞌiya nu ishanttanne michchontta gakkiiddi deꞌees. Ayhuda xoqqa pirdda keettaa daannati eta, “Yesuusa sunttaa naa77anttuwaa mulekka denttoppite” giidi darotoo azazidosona. (Oos. 4:18-20; 5:27, 28, 40) SHin maatan etappe aadhdhiyaagee, ‘wonggeliyaa mishiraachchuwaa asaassi yootanaadaaninne Yesuusabaa markkattanaadan eta azazidoogaa’ eti eroosona. (Oos. 10:42) Yaatiyo gishshawu, kiitettidaageetu gishshaa haasayiya PHeexiroosinne Yohaannisi, eti daannatuppe aattidi Xoossawu azazettanaagaanne Yesuusabaa yootiyoogaa aggennaagaa xalatettan yootidosona. (Oos. 5:29) Kiitettidaageeti ammanettidi deꞌidoogaa gaasuwan shocetti simmidi, ‘Yesuusa sunttaa gishshawu, eti kawuyyanawu bessiyoogaa akeekido gishshawu ufayttiiddi’ Ayhuda xoqqa pirdda keettaappe kiyidosona; qassi eti sabbakiyoogaa aggibookkona!—Oos. 5:41, 42. w22.10 12-13 ¶2-4

Nuuni Yihoowaabaa tamaariyoogaa doommiyo wode, Geeshsha Maxaafaa koyro timirttetu xallaa tamaarida. Kiitettida PHawuloosi Ibraawe Kiristtaanetussi xaafido dabddaabbiyan, hegee ‘koyro timirtte’ gidiyoogaa yootiis. I ‘biron doommiyo’ wode tamaariyoobay maaddenna giidi yootibeenna; shin I hegee guutta naꞌay diccanaadan maaddiya maattaa mala gidiyoogaa yootiis. (Ibr. 5:12; 6:1) SHin ubba Kiristtaaneti koyro timirttetuppe aadhdhiya Xoossaa Qaalan deꞌiya ciimma tumaa ubbatoo tamaaranaadan I minttidi yootiis. Neeni Geeshsha Maxaafaa koyro timirtteta tamaaranawu keehi koyay? Neeni Yihoowabaanne A halchchuwaabaa ubbatoo tamaaranawu koyay? SHin nuuppe daroti xannaꞌanawu metootoos. Neeni shin? Timirtte keettan neeni loytti nabbabiyoogaanne xannaꞌiyoogaa tamaaradii? Neeni xannaꞌiyoogan ufayttay, qassi hegaappe darobaa tamaariyaabadan qoppay? Woy, xannaꞌiyoogan taani gooba gidikke gaada qoppay? Yaatikko, hegaadan qoppiyay ne xalla gidakka. Yihooway nena maaddana. I wottiyoobi baynna ooppenne aadhdhiya asttamaare. w23.03 9-10 ¶8-10

Nuuni ashkke gidikko, Xoossaa Qaalay nuna laammanaadan eeno gaana. Nuuni balaa koyiyoogaanne otorettiyoogaa aggiyo wode xallan Geeshsha Maxaafay maarotaabaa, qaretaabaanne siiquwaabaa yootiyoobay nuuni laamettanaadan oottana. Nuuni harata oyqqiyo ogee, Xoossaa Qaalay nuna laammanaadan eeno giidaakkonne bessana danddayees. Parisaaweti Xoossaa Qaalay bantta qofaa laammanaadan eeno gibeenna gishshawu, ‘nagari baynna asaa bolli pirddidosona.’ (Maa. 12:7) Hegaadankka, nuuni qoppiyoobaynne harata oyqqiyo ogee Xoossaa Qaalay nuna laammanaadan nuuni koyiyaakkonne bessees. Leemisuwawu, nuuni darotoo haratuyyo deꞌiya loꞌꞌobaa yootiyooyye eta balaa yootiyoo? Nuuni maaranawunne atto gaanawu giigi uttidooyye boranawunne lancciyaa uluwan oyqqanawu koyiyoo? Nuuni he oyshatussi zaariyoobay nuuni nabbabiyoobay nu qoppiyoobaanne oottiyoobaa laammanawu eeno giidaakkonne bessees.—1 Xim. 4:12, 15; Ibr. 4:12. w23.02 12 ¶13-14

Armmaatiyaasa Yooseefa leemisuwaa qoppite. Ayhudatu giddon I keehi bonchchettida asa. I Ayhuda xoqqa pirdda keettan, Sanhedirina yame. Gidikkonne, Yesuusi saꞌan haggaaziyo wode Yooseefi xala gidenna. I “Aihudatuyyo yayyido gishshau, asi erennan Yesuusa kaalliyaagaa” gidiyoogaa Yohaannisi yootiis. (Yoh. 19:38) Yooseefi Kawotettaa mishiraachuwaa siyanawu koyikkonne, I Yesuusa ammaniyoogaa harati eranaadan koyibeenna. I Yesuusi erissiyo ashkkara gidiyoogaa harati erikko, eti bana bonchchiyoogaa aggana giidi yayyennan waayi aggana. Gaasoy aybakka gidin, Yesuusi hayqqi simmin “Yooseefi xalidi PHilaaxoosakko biidi, Yesuusa a[n]haa ekkanau” oychchidoogaa Geeshsha Maxaafay yootees. (Mar. 15:42, 43) Haꞌꞌi Yooseefi Yesuusi erissiyo ashkkara gidiyoogaa haratuppe genttanawu malibeenna. Yooseefaagaadan neeni asawu yayya eray? w23.01 30 ¶13-14

Solomoni haariyo wode Israaꞌeelati sarotettaaninne ishaluwan deꞌiyoogaa Saaba kawiyaa siyaasu. Hegaa beꞌanawu Yerusalaame gakkanawu A adussa ogiyaa manddarada yaasu. (1 Kaw. 10:1) A Solomona kawotettaabaa loytta beꞌa simmada qommoora deꞌiyaagaadan gaasu. SHin Solomona haaruwaa wode hanidabay, Yihooway ba Naꞌaa Yesuusa haaruwaa wode asawu oottanabawu leemiso. Yesuusi Solomonappe ubbaban aadhdhees. Nagaranchcha gidida Solomoni moorido gita mooruwan guyyeppe Xoossaa asaa bolli metoy gakkiis. SHin Yesuusi aynne moori erenna; qassi I wottiyoobi baynna ogiyan haarees. (Luq. 1:32; Ibr. 4:14, 15) Kiristtoosi ammanettidi haarettennaadan oottiya nagaraa woy harabaa mule oottennaagaa bessiis. I nu Kawo gidiyoogee nuussi gita maata. w22.12 11 ¶9-10

Asappe asaa oyqqiya harggee nuuni deꞌiyo heeran aakkikko waatana koshshii? Nu kushiyaa meecettiyoogaa, asaakko matattennaagaa, maskkiyaa wottiyoogaanne asaappe shaahettidi deꞌiyoogaa mala, kawotettaa sunttati yootiyo kaaletota nuuni azazettana koshshees. Nuuni hegaadan oottiyo wode, Xoossay immido deꞌuwaa imotaa keehi nashshiyoogaa bessoos. Qoppibeennabay merettiyo wode nu laggetuppe woy nu shoorotuppe woy oduwaappe tuma gidennabaa issi issitoo siyana danddayoos. Nuuni siyido “ubbabaa” ammaniyoogaa aggidi, kawotettatinne dottoreti yootiyo tuma gididabaa siyana koshshees. (Lee. 14:15) Oosuwaa Kaalettiya Citaynne macara biiroti gubaaꞌe shiiquwaanne sabbakiyo oosuwaara gayttidaagan kaaletuwaa yootanaappe kasetidi tuma gididabaa eranawu baaxetoosona. Ha kaaletota kaalliyoogan nunakka haratakka qohuwaappe naagoos. Qassi harati Yihoowa Markkatubaa loꞌꞌobaa qoppanaadan maaddana danddayoos.—1 PHe. 2:12. w23.02 23 ¶11-12

Israaꞌeelati Hidootaa Biittaa gelido wode dumma dumma heeran deꞌidosona. Issi heeran deꞌiya Israaꞌeelati hara heeran deꞌiya Israaꞌeelatussi qoppiyoogaa sohuwaara aggana danddayoosona. SHin dumma dumma wodetun, Xoossaa Qaalaa nabbabiyo wodenne qonccissiyo wode Israaꞌeelati issippe shiiqidi siyanaadan Yihooway hanotaa injjeyiis. (Zaa. 31:10-12; Nah. 8:2, 8, 18) Ammanettida issi Israaꞌeela bitanee Yerusalaame gakkidi, Yihoowawu goynniya dumma dumma biittaappe yiida daro miiloone asaa beꞌiyo wode awu aybi siyettanaakko qoppa! Yihooway hegaa mala hanotaa injjeyiyoogan ba asay issuwaa gididi deꞌanaadan oottiis. Guyyeppe, Kiristtaane gubaaꞌee eqqido wode, dumma dumma qaalaa haasayiya attumaageetinne maccaageeti gubaaꞌiyan deꞌoosona. Etappe amaridaageeti erettida asa, harati qassi hegaa mala asa gidokkona; amaridaageeti dure harati qassi hiyyeesa. SHin eti issuwaa gididi tumu Xoossawu goynnidosona. Mati ammanidaageeti Xoossaa Qaalaa akeekana danddayiyoy Yihoowawu goynniya harati maaddiyo wodenne issippe shiiqiyo wode xallaana.—Oos. 2:42; 8:30, 31. w23.02 3 ¶7

Yihooway baassi azazettiyaageetuyyo “merinaa de7uwaa” immanawu qaalaa geliis. (Roo. 6:23) Yihooway nuussi immanabaa wotti dentti qoppiyoogee nuuni A wozanappe siiqanaadan maaddees. Ane hagaa qoppite: Saluwan deꞌiya nu Aaway nuna keehi siiqiyo gishshawu appe mule shaahettokko. Xoossay nuussi merinaa deꞌuwaa immanawu qaalaa gelidoogee ha wodiyan gakkiya metuwaa genccanaadan nuna maaddees. Nu morkketi nuna woranawu yashissikkokka, nuuni Yihoowawu haggaaziyoogaa mule aggokko. Aybissi? Issi gaasoy nuuni Yihoowawu ammanettidi hayqqikko, I nuna hayquwaappe denttanaagaanne nuuni zaarettidi hayqqennaagaa eriyo gishshataassa. (Yoh. 5:28, 29; 1 Qor. 15:55-58; Ibr. 2:15) Yihooway deꞌuwawu Pulttonne merinawu deꞌiyaagaa gidiyo gishshawu, nuuni merinawu deꞌanaadan oottana danddayiyoogaa eroos. (Maz. 36:9) Yihooway ubbatoo deꞌiyaagaanne ubbatoo deꞌanaagaa Geeshsha Maxaafay qonccissees.—Maz. 90:2; 102:12, 24, 27. w22.12 2 ¶1-3

Nuuni Yihoowa asay nuna metoy gakkiyo wode maalaalettokko. Geeshsha Maxaafay hagaadan gees: “Nuuni Xoossaa kawotettaa gelanau daro waayettana bessees.” (Oos. 14:22) Qassi, “haiqoinne kayyoi woi waasoinne sahoi de7enna” ooratta alamee yaana gakkanaashin, nuna gakkiya amarida metoti muleera xayennaagaa eroos. (Ajj. 21:4) Nuna metoy gakkennaadan Yihooway teqqenna. SHin, he metuwaa genccanaadan I nuna maaddees. Kiitettida PHawuloosi Roomen deꞌiya Kiristtaanetussi yootidobaa akeeka. I bananne ba ishantta gakkida daro metota koyro yootiis. Kaallidi I hagaadan giis: “Nuuni nuna siiqida aani ha yoho ubban poli xoonida.” (Roo. 8:36, 37) Hegaa giyoogee nuuni metuwaa gencciiddi deꞌiyo wodekka Yihooway nuna maaddana danddayees giyoogaa. w23.01 14 ¶1-2