Hosppune

Nena hagaadan oychcha: ‘Taassi zoree imettiyo wode taani waatiyaanaa? Ta mooruwaa sohuwaara ammaniyaanaa woy gaaso shiishshanawu maliyaanaa? Haratun gaasoyanawu eesotiyaanaa?’ Geeshsha Maxaafan etabay odettido ammanettida attumaageetubaanne maccaageetubaa nabbabiyo wode, eti hegaa mala metota waati xoonidaakko akeeka. Issi issi hanotan, nena hagaadan oychcha: ‘Taani ha ammanettida Yihoowa ashkkaraa waata loytta milatana danddayiyaanaa?’ Nu mala Kiristtaanetu hanotaa akeekiyoogankka nuuni goꞌettana danddayoos, eti yelaga woy cima gidana danddayoosona. Leemisuwawu, ne gubaaꞌiyan deꞌiya metuwaa gencciya ammanettida uraabaa qoppana danddayay? Geella hegee laggeti iitabawu denttettiyoogaa, so asappe gakkiya yedetaa woy harggiyaa gidana danddayees. Neeni kaallanawu koyiyo loꞌꞌo eeshshati ha izaawuyyo deꞌiyoogaa akeekadii? I woy A leemiso gidiyoobaa akeekiyoogan nena gakkiiddi deꞌiya metuwaa waata genccanaakko tamaarana danddayaasa. He ishanttinne michchontti ammanuwan nuuyyo keehi loꞌꞌo leemiso gidiyo gishshawu nuuni keehi galatoos!—Ibr. 13:7. w22.04 13 ¶13-14

Nuna metoy gakkiyo wode, siiqiya cimay nuuni haasayiyoobaa siyanawunne nuna minttettanawu wodiyaa bazziyo gishshawu galatoos. Geeshsha Maxaafaa xannaꞌissiyoogan nuussi maadoy koshshikko, meeze deꞌiyo issi aqinye nunaara xannaꞌissanawunne maaddiya qofaa yootanawu eeno giyo wode nuuni ufayttoos. Ha ishanttinne michchontti ubbay nuna maaddiyoogan ufayttoosona. Nu ishantta maaddanawu eeno giyo wode nuunikka ufayttana danddayoos. Hagaaninne hara ogetun nuuni Yihoowawu loytti oottanawu koyikko, yaatanaadan nuna aybi maaddanee? Qoncce gidennabaa halchchoppa. Leemisuwawu, ‘Taani gubaaꞌiyawu loytta oottana koyays’ gaada qoppana danddayaasa. SHin he halchchuwaa waata polanaakko eranawu metootana danddayaasa, qassi he halchchidobaa polidoogaakka erennan aggana danddayaasa. Hegaa gishshawu qoncce gidida halchchuwaa halchcha. He halchchuwaanne hegaa waata polanaakko xaafanakka danddayaasa. w22.04 25 ¶12-13

Yihooway ha wodiyan “zawai bainna daro asaa” shiishshiiddinne eti ba Kawotettawu haarettanaadan loohissiiddi deꞌees. (Ajj. 7:9, 10) Ha alamiyan daro asay ixuwaanne olaa gaasuwan shaahettidaba gidikkonne, ‘zaway baynna daro asay’ ixxiyoogaa agganawu minnidi oottiiddi deꞌees. Eti bantta bisuwaa marasha kessanawu qoxxiiddi deꞌiyoogaa bantta oosuwan bessoosona. (Mik. 4:3) Eti daro asaa hayquwawu gaaso gidida olan hashetiyoogaappe asaa Xoossaabaanne A halchchuwaabaa tamaarissiyoogan asay “tumu de7uwaa” demmanaadan maaddoosona. (1 Xim. 6:19) Xoossaa Kawotettawu eti exatido gishshawu, geella soo asay eta ixxana danddayees woy miishshaa metootana danddayoosona; shin eti banttawu koshshiyaabaa demmanaagaa Yihooway qaalaa geliis. (Maa. 6:25, 30-33; Luq. 18:29, 30) Ha ubbabati Xoossaa Kawotettay beettiyaagaa keenaa qoncce gidiyoogaanne ubbatoo Yihoowa halchchuwaa polanaagaa nuuni ammanettanaadan oottoosona. w22.12 5 ¶13

SHaꞌu layttaa wurssettan, saꞌan deꞌiya ubba asay wottiyoobi baynnaagaa gidana. Addaameppe laattido nagaraa gaasuwan ooninne waayettenna. (Roo. 5:12) Addaame nagaraa gaasuwan gakkida qanggettay muleera attana. Qassi saꞌan deꞌiya asay ‘denddana,’ hegaa giyoogee eti 1,000 layttaa wurssettan wottiyoobi baynnaageeta gidana giyoogaa. (Ajj. 20:5) Seexaanay Yesuusa paaccido wodekka Yesuusi Xoossawu ammanettidi deꞌidoogaa nuuni eroos. SHin Seexaanay wottiyoobi baynna asa ubbaa paacciyo wode eti Yihoowawu ammanettidi deꞌanee? Seexaanay 1,000 layttaa wurssettan ciimma ollaappe birshshettiyo wode, Yihoowawu ammanettiyoogaa ubba asay huuphiyan huuphiyan bessana danddayees. (Ajj. 20:7) Ha wurssetta paaciyaa wode ammanettidaageeti merinaa deꞌuwaanne tumu laꞌatettaa demmana. (Roo. 8:21) Makkalanchchati merinawu xayana.—Ajj. 20:8-10. w22.05 19 ¶18-19

Seexaanay Xoossaa Naꞌaa woranaadan Ayhudatanne Roomata denttettido wode he hiraagay polettiis. (Luq. 23:13, 20-24) Issi uraa qirbbee masunxxiyo wode he uri hemettana danddayennaagaadan, Yesuusikka hayqqidi heezzu gallassa gidiyaagaa duufuwan deꞌiyo wode aybanne oottanawu danddayibeenna. (Maa. 16:21) Doomettaabaa 3:15n deꞌiya hiraagay Yesuusi duufuwan attennaagaa bessees. Ayssi giikko, he hiraagaa maaraadan maccaasee zerettay shooshshaa huuphiyaa qoxxana. Hegaa giyoogee Yesuusi hayquwaappe denddana koshshees giyoogaa. Qassi I hayquwaappe denddiis! Yesuusi heezzantto gallassan hayquwaappe denddidi, hayqqenna ayyaana mereta gidiis. Xoossay keerido wodiyan, Yesuusi Seexaanaa muleera xayssana. (Ibr. 2:14) Kiristtoosinne aara haaranaageeti Xoossaa morkketa woykko shooshshaa zerettaa saꞌaappe muleera xayssana.—Ajj. 17:14; 20:4, 10. w22.07 16 ¶11-12    

Yelidaageetoo, intte naati loꞌꞌo laggeta dooranaadan maaddite. Nu laggeti nuuni loꞌꞌobaa woy iitabaa oottanaadan denttettana danddayiyoogaa Xoossaa Qaalay geeshshidi yootees. Intte naatu laggeta ereetii? Intte naati Yihoowa siiqiyaageetuura laggetanaadan maaddanawu waatana danddayeetii? (1 Qor. 15:33) Inttenaaranne intte naatuura issi issibaa oottanaadan Yihoowaara loꞌꞌo dabbotaa dabbotidaageeta shoobbiyoogan intte naatussi loꞌꞌo laggeti deꞌanaadan maaddana danddayeeta. (Maz. 119:63) Toona giyo aaway hagaadan giis: “Taaninne ta machchiyaa dumma dumma ishanttanne michchontta, yelagatanne gasttata daro layttawu nu soo shoobbida. Nuuni etaara qumaa miidanne so asaa goynuwaa issippe goynnida. Hagee Yihoowa wozanappe siiqiyaageetanne ufayssan awu haggaaziyaageeta eranawu keehi loꞌꞌo oge. . . . Eta deꞌuwan hanidabaa eti yootidoogaappe, eti minnidi oottidoogaappenne bantta goꞌꞌaa aggi bayidoogaappe nu naati darobaa tamaaridosona. Ha ubbabay nu naati Yihoowakko shiiqanaadan maaddiis.” w22.05 29-30 ¶14-15

Cimati nagaraa oottida uraara haasayiyo wode, eta halchchoy nagaraa oottida uraa xeelliyaagan Yihooway kuuyidobaara maayettiyaabaa kuuyiyoogaa. He giigissoy gubaaꞌiyaa waati maaddii? Hegee nagaraa oottidaageeti gubaaꞌiyaa yame gididi deꞌennaadan oottiyo gishshawunne Yihoowa alꞌꞌo ashkkarati qohettennaadan oottiyo gishshawu gubaaꞌiyaa naagees. (1 Qor. 5:6, 7, 11-13; Tii. 3:10, 11) Hegee nagaraa oottida uri nagaraappe simmanaadaaninne Yihooway awu atto gaanaadankka maaddana danddayees. (Luq. 5:32) Cimati nagaraappe simmida urawu woossoosona, qassi I zaarettidi ayyaanaaban minnanaadan Yihooway A maaddana mala oychchoosona. (Yaaq. 5:15) Cimati issi uraa haasayissiyo wode, nagaraappe I simmibeenna gaada qoppa. Yaatikko, gubaaꞌiyaappe I bohettana. Gidoppe attin, he uri I oottidobay bala gidiyoogaa akeekidi ba qofaanne oosuwaa laammikko, Yihooway ayyo atto gees. (Luq. 15:17-24) I gita nagaraa oottikkonne, Yihooway awu atto gees.—2 Odi. 33:9, 12, 13; 1 Xim. 1:15. w22.06 9 ¶5-6

Yihooway maaddin, kumetta saꞌan deꞌiya Kiristtaaneti metiya hanotata xoonidosonanne Dabloosa loytti eqettidosona. (1 PHe. 5: 9) Neenikka yaatana danddayaasa. ‘Xalahe halaqaa oosuwaa xayssanaadan’ Yihooway Yesuusanne aara haariyaageeta mata wode azazana. (1 Yoh. 3:8) Hegaappe simmin, Xoossawu haggaaziya saꞌan deꞌiya asay ‘aybaassikka yayyennanne dagammenna.’ (Isi. 54:14; Mik. 4:4) Gidoppe attin, he wodee gakkanaashin nuuni yayyiyoogaa agganawu loytti baaxetana koshshees. Yihooway ba ashkkarata siiqiyoogaanne naagiyoogaa nuuni ubbatoo loytti ammanettana bessees. I kase ba ashkkarata waati naagidaakko wotti dentti qoppiyoogeenne hegaabaa haasayiyoogee loytti ammanettanawu nuna maaddana. Qassi, nuuni unꞌꞌettanaadan oottiya hanotata genccanaadan I nuna waati maaddidaakko hassayana danddayoos. Yihooway maaddin, nuuni yayyiyoogaa aggana danddayoos!—Maz. 34:4. w22.06 19 ¶19-20

‘Birataappenne urqqaappe merettida misiliyaa tohuwaa yachchan’ leemisettida, alamiyaa wolqqaama kawotettay haꞌꞌi haariiddi deꞌees. Ha Kawotettay Inggilizeenne Amarkkay issippetettaa medhdhidi hashetido Koyro Alamiyaa Olaa wode haariyoogaa doommiis. Naabukadanaxoori aymuwan beꞌido misilee ha kawotettay appe kasetiya kawotettappe dummatiyobaa qonccissees. Aymuwan beꞌido kase kawotettatuppe dumma hanotan, Inggilizenne Amarkkaa Waatta Kawotettay worqqaa woy biraa mala mino biratan gidennan, birataanne urqqaa walahan leemisettiis. Urqqay coo asaa bessiyaaba. (Dane. 2:43) Ha wodiyan qoncciyan nuuni beꞌiyoogaadan, asay dooruwaa wode oottiyoobay, ba maatawu baaxetiyoobay, eqettanawu zattiyoobaynne oosuwaara gayttida maatawu haniyoobay ha kawotettay ba koyiyoobaa polanawu metootanaadan oottiis. w22.07 4-5 ¶9-10

Neeni xammaqettanawu mammotay? ‘Taani xammaqettennan takkiyoy aybissee?’ gaada oychchiyoogee nena maaddana danddayees. (Oos. 8:36) Yesuusi ba Aaway koyiyoobaa oottiyoogaa qumaara geeddarssidoogaa akeeka. Aybissi? Qumay nuussi loꞌꞌo. Nuuni oottanaadan Yihooway oychchiyo ubbabay nuussi loꞌꞌo gidiyoogaa Yesuusi erees. Nuna qohiya aybanne nuuni oottanaadan Yihooway koyenna. Neeni xammaqettanaadan Yihooway koyii? Ee. (Oos. 2:38) Yaatiyo gishshawu, xammaqettanaadan yootiya azazuwaa azazettiyoogee nena maaddanaagaa ammanettana danddayaasa. Neeni malꞌꞌiya qumaa maanawu mammottana xayikko, yaatin xammaqettanawu aybissi mammottay? Issoti issoti xammaqettennan takkiyoy aybissee? Daroti hagaadan zaaroosona: “Taani haꞌꞌi giigettabeykke.” Nena Yihoowawu sheedhdhada xammaqettiyoogee neeni hanno gakkanawu kuuyido ay kuushshaappekka aadhdhiyoogee qoncce. Yaatiyo gishshawu, hegaabaa loytta qoppa, qassi xammaqettanaayyo giigettanawu wodeenne baaxee koshshees. w23.03 7 ¶18-20

Yesuusi geeshsha ayyaanan tiyettido wode, maccaasee zerettawu waannatiyaagaa gidiis. Yesuusi hayquwaappe denddi simmin, Xoossay ‘A huuphiyan bonchchonne saba akiliiliyaa wottiis.’ Qassi, ‘maata ubbaa saluwaaninne saꞌan’ ayyo immiis. He maataappe issoy, ‘xalahe halaqaa oosuwaa xayssiyoogaa.’ (Ibr. 2:7; Maa. 28:18; 1 Yoh. 3:8) Kiitettida PHawuloosi ayyaanan tiyettida Kiristtaane gidida Ayhudatuyyoonne Ayhuda gidennaageetuyyo he zerettawu naaꞌꞌantto shaahoy oonakko qonccissiis. I hagaadan giis: “Intte Kiristtoosabaa gidikko, simmi intte Abrahaama zare; qassi Xoossai sinttappe immana giidi haasayidoogaa laattiyaageeta.” (Gal. 3:28, 29) Yihooway issi Kiristtaaniyaa ayyaanan tiyiyo wode, he uri maccaasee zeretta gidees. Yesuus Kiristtoosinne aara haariya 144,000ti he zeretta. (Ajj. 14:1) Eti ubbay bantta Aawaa Yihoowagaadan qoppanawunne oottanawu baaxetoosona. w22.07 16 ¶8-9

Ha wurssetta gallassatun, metoy nuna gakkanaagaa eroos. (2 Xim. 3:1) Hegaa mala wodetun, nuuni unꞌꞌettananne hidootaa qanxxana danddayoos; ubba qassi metoy bolli bollan gakkiyo wode woy issi kutti daro metoy gakkiyo wode hegaadan hanana danddayoos. Gidikkonne, Yihooway nuna naagiyoogaanne I maaddin, nuna gakkiya ay metuwaakka nuuni xalatettan genccana danddayiyoogaa hassaya. Ammanettida bitaniyaa Iyyooba Yihooway waati maaddidaakko qoppa. Guutta wodiyaa giddon unꞌꞌissiya daro metoy A gakkiis. Issi gallassi, Iyyooba mehe ubbay wuuqettidoogee woy hayqqidoogee, qassi A ashkkaratinne A naati hayqqidoogeekka awu odettiis. (Iyy. 1:13-19) Hegaappe daro takkennan, Iyyoobi kayyottiiddi deꞌiyo wode keehi sakkiyaanne iita masunttay A bolli kiyiis. (Iyy. 2:7) Yihooway Iyyooba naagiis. Yihooway Iyyooba siiqiyo gishshawu I bana gakkida metuwaa genccanaadaaninne ammanettidi deꞌanaadan koshshiyaabaa immiis. w22.08 11 ¶8-10

Seeray nuuni azzananaadan oottana danddayees. Nuussi imettida seeray likke gidennabadaaninne nuussi hanennabadan, woy keehi qohiyaabadan qoppana danddayoos. Hegaappe denddidaagan, keehi koshshiyaabaa, hegeekka Yihooway nuna seeriyoy nuna siiqiyo gishshataassa gidiyoogaa dogana danddayoos. (Ibr. 12:5, 6, 11) Yaatiyo gishshawu, seeraa ekka, yaatada koshshiyaaban laametta. Yesuusi kiitettida haratu sinttan PHeexiroosa darotoo seeriis. (Mar. 8:33; Luq. 22:31-34) Hegee PHeexiroosa keehi yeellayennan waayi aggana! SHin PHeexiroosi Yesuusawu ammanettidi deꞌiis. I seeraa ekkiis, qassi ba mooruwaappe tamaariis. PHeexiroosi ammanettido gishshawu, Yihooway A woytiis; qassi gubaaꞌiyan gita aawatettaa awu immiis. (Yoh. 21:15-17; Oos. 10:24-33; 1 PHe. 1:1) Nuuni ay keena yeellatidaakko qoppiyoogaappe seeraa ekkidi, koshshiyaaban laamettiyoogee nunakka haratakka maaddees. Yaatiyo wode, kaseegaappe aaruwan Yihoowawu oottananne nu ishantta maaddana danddayoos. w22.11 21-22 ¶6-7

Iitabaa woy meqetti baynnabaa Yihooway mule oottennaagaa Abrahaami erees. Kiitettida PHawuloosi yootidoogaadan, Abrahaami ba alꞌꞌo naꞌaa Yisaaqa Yihooway hayquwaappe denttanaagaa eriis. (Ibr. 11:17-19) Hegaa bollikka, Yisaaqi daro deriyawu aawa gidanaagaa Yihooway yootiis; qassi he wode Yisaaqawu naꞌi baa. Abrahaami Yihoowa siiqiyo gishshawu, ba Aaway ubba wode likke gididabaa oottiyoogaa ammanettiis. Hegee deexiyaaba gidikkonne, ammanuwan azazettiis. (Doo. 22:1-12) Nuuni Abrahaama waani milatana danddayiyoo? Aagaadan nuuni ubbatoo Yihoowabaa tamaarana koshshees. Nuuni yaatiyo wode, kaseegaappe aaruwan akko shiiqananne A loytti siiqana. (Maz. 73:28) Nu kahay Xoossaagaadan qoppanawu loohidaagaa gidana. (Ibr. 5:14) Hegaappe denddidaagan, issi uri balabaa oottanaadan nuna paaccanawu maliyo wode nuuni eqettana. Nuuni nu Aawaa azzanttiyaanne nu aara dabbotido dabbotaa mooriya aybanne oottanawu mule qoppokko. w22.08 28-29 ¶11-12

Kiitettida PHawuloosinne Barnnaabaasi Lisxxira, Iqooniyoonenne Anxxookiyaa zaarettidi biido wode ubba gubaaꞌetun ‘cimata’ sunttidosona. (Oos. 14:21-23) He sunttettida cimati ha wodiyan deꞌiya cimatuugaadan gubaaꞌeta minttettidoogee qoncce. Cimatoo, minttettiya ‘shonggaara deꞌiya haasayay’ koshshiyoogeeta maaddanawu giigi uttite. Yihooway maaddin metuwaa genccida ‘shaaraadan daro markkatubaa’ PHawuloosi ba mala Kiristtaaneta hassayissiis. (Ibr. 12:1) PHawuloosi kase metuwaa genccidaageetu taarikee ba ishanttinne michchontti xala gidanaadaaninne ‘deꞌo Xoossay deꞌiyo katamaabaa’ ubbatoo qoppanaadan maaddanaagaa erees. (Ibr. 12:22) Ha wodiyankka hanotay hegaa mala. Yihooway Geedoona, Baaraaqa, Daawita, Sameelanne hara darota maaddido taarikiyaa nabbabiyoogan minettennay oonee?—Ibr. 11:32-35. w22.08 21-22 ¶5-6

Hayquwaappe denddanaageeti pirddettiyoy awude oottidobaanee? Eti hayqqanaappe kase oottidobaanee? CHii! Eti hayqqiyo wode eti kase oottido nagaray atto geetettidoogaa hassaya. Ha sohuwan “bantta oosuwaadan” geetettidaagee eti kase oottidobaa gidana danddayenna. Hegee eti ooratta alamiyan tamaariyoobaa oosuwan peeshshiyoogaa bessiyaaba. Noha, Sameela, Daawitanne Daaneela mala ammanettida asatikka Yesuus Kiristtoosabaa tamaaridi wozuwan ammanana koshshees. Ha asati darobaa tamaarana koshshikko, worddo geetettidaageeti keehi darobaa tamaarana koshshiyoogee qoncce! Ha keehi ufayssiyaabaa oosuwan peeshshennaageeta gakkanabay aybee? Ajjuutaa 20:15y hagaadan gees: “De7o maxaafan ba sunttai xaafettibeenna asi ooninne tama abban yegettiis.” Ee, eti merinawu xayana. Yaatiyo gishshawu, nu sunttay deꞌo maxaafan xayenna hanotan xaafettidaakkonne shaakki eriyoogee keehi koshshiyaaba! w22.09 19 ¶17-19

Payyatettaaranne akkamuwaara gayttidaagan nuuppe daroti Geeshsha Maxaafaappe tamaaridoogaa maaran kuuyoos. (1 Xim. 3:9) Nuuni akkamuwaara gayttidabaa kuuyiyo wodenne nuuni kuuyidobaa haratuyyo yootiyo wode, Piliphphisiyuusa 4:5y yootiyoobaa hassayana koshshees: “Asai ubbai intte ashkketettaa ero.” Nuuni bessiyaagaadan qoppikko ubbatoo nu payyatettaabawu hirggokko. Nu ishanttinne michchontti kuuyiyoobay nuugaappe dummatiyaaba gidikkokka, eta siiqoosinne bonchchoos. (Roo. 14:10-12) Nuuni nu deꞌuwaa naagiyoogaaninne Yihoowawu haggaazanawu nuussi danddayettidabaa oottiyoogan, deꞌuwawu Pultto gidida Yihoowa galatiyoogaa bessoos. (Ajj. 4:11) Nuuni ha wodiyan sahuwaanne hara metota genccana koshshees. SHin nuna Medhdhidaagee nuuni hagaadan deꞌanaadan koyibeenna. Mata wode I sahuwaanne hayquwaa xayssidi merinaa deꞌuwaa nuussi immana. (Ajj. 21:4) He wodee gakkanawu, paxa deꞌidi, saluwan deꞌiya nu siiqo Aawaa Yihoowawu haggaaziyoogee keehi ufayssiyaaba! w23.02 25 ¶17-18

Yihooway ‘deriyaa heemmiyaageetuppe’ xoqqiyaagaa gidiyoogaa loytti bessiis. (Roo. 13:1) Heezzu leemisota beꞌa. Gibxxe kawoy Paarooni Yihoowa asata aylle oottidi haariis, qassi eta yeddanaadan oychchin darotoo yeddennan ixxiis. SHin, Xoossay eta laꞌa kessiisinne Paaroona Zoꞌo Abban xayssiis. (Kes. 14:26-28; Maz. 136:15) Baabiloone Kawoy Belshshaaxaari gibiraa giigissidi, ‘saluwaa Godaa bolli otorettiis,’ qassi Yihoowa aggidi ‘biraappenne worqqaappe oosettida xoossata galatiis.’ (Dane. 5:22, 23) SHin he otorettiya bitaniyaa Xoossay kawushshiis. “He galla qammi” Belshshaaxaari hayqqiis, qassi A kawotettay Meedoonatuyyoonne Parssetuyyo imettiis. (Dane. 5:30, 31) Yihudaa biittaa Kawoy Heeroodisi Agriiphphi Koyroy kiitettida Yaaqooba woriis, qassi PHeexiroosakka woranawu qoppidi qachchiis. Gidikkonne, Heeroodisi ba qoppidobaa polennaadan Yihooway diggiis. “Godaa kiitanchchai a dechchin,” I hayqqiis.—Oos. 12:1-5, 21-23. w22.10 15 ¶12

Nuuni A Qaalaa nabbabiyoogaaninne hegaa wotti dentti qoppiyoogan I yootiyoobaa siyana danddayoos. Yihooway kase bawu ammanettida asaa waati maaddidaakko nabbabiyo wode, nu hidootay kaseegaappe aaruwan minni minni bees. “Xoossaa maxaafai nuuyyo immiyo genccaaninne minttettuwan nuuni demmana giidi ufaissan naagi uttidoogee de7ana mala, Xoossaa maxaafan xaafettida ubbabai nuna tamaarissanau xaafettiis.” (Roo. 15:4) Yihooway ba gelido qaalaa waati polidaakko wotta dentta qoppa. Xoossay Abrahaamayyoonne Saariyyo oottidobaa qoppa. Eti keehi cimido gishshawu, naꞌa yelana danddayokkona. Gidikkonne, eti naꞌa yelanaagaa Xoossay etawu qaalaa geliis. (Doo. 18:10) Abrahaami waatidee? ‘Abrahaami daro zaretuyyo aawa gidanaagaa ammanidoogaa’ Geeshsha Maxaafay yootees. (Roo. 4:18) Abrahaami Yihooway ba gelido qaalaa waati polanaakko erenna; shin Yihooway hegaa polanaagaa I ammanettiis. He ammanettida bitanee hidootaa qanxxibeenna. (Roo. 4:19-21) Yihooway ba gelido qaalaa ubbatoo polanaagaa nuuni ubbatoo ammanettana danddayiyoogaa ha taariketuppe tamaaroos. w22.10 27 ¶13-14

Ayhudati omooduwaappe laꞌa kiyido wode hegee polettiis. Yihooway etawu Gita Asttamaare gidiyoogaa bessiis; qassi I kaalettin, A asay geeshsha goynuwaa zaarettidi essiis. Ha wodiyan, Yihooway nu Gita Asttamaare gidiyo gishshawu nuuni keehi ufayttoos. Nuuni Yihoowappe tamaariya tamaaretu mala gidiyogaa Isiyaasi hagaadan giidi qonccissiis: “Intte aifee intte asttamaariyaa be7ana.” Ha leemisuwan, Asttamaaree ba tamaaretu sinttan eqqidoogaa Isiyaasi yootiis. Ha wodiyan, Xoossay nuna tamaarissiyoogee nuuyyo gita maata. Yihooway nuna waati tamaarissii? I ba dirijjitiya baggaara nuna tamaarissees. Hegaa gishshawu, nuuni A keehi galatoos. Nuuni shiiqotuppe, nu xuufetuppe, JW Brodkastingiyaappenne hara daro ogetuppe metiya wodiyaa ufayssan genccanawu maaddiyaabaa tamaaroos. w22.11 10 ¶8-9

Yerusalaameenne yan deꞌiya beeta maqidasee xayana wodiyaabaanne nuuni deꞌiyo ‘wodiyaa wurssettaabaa’ xeelliyaagan Yesuusi hagaadan giis: “He gallassaanne he saatiyaa Aawaa xalaalaappe attin, harai atto saluwan de7iya kiitanchchata gidin, woi tana Na7aa gidinkka ooninne eriyaabi baawa.” Hegaappe simmin, I ba erissiyo ashkkarati ‘naagettanaadaaninne minnidi deꞌanaadan’ zoriis. (Mar. 13:32-37) Koyro xeetu layttan deꞌida Ayhuda Kiristtaaneti bantta shemppuwaa ashshanawu beegottidi deꞌana koshshiis. Yesuusi bana kaalliyaageetussi hagaadan giis: “Wotaaddaran Yerusalaamee diretti uttidaashin intte be7iyo wode, Yerusalaame xayoi matattidoogaa erana.” He wode eti Yesuusi yootidobawu azazettidi “deriyaakko [baqatana]” koshshiis. (Luq. 21:20, 21) Roomati Yerusalaame xayssiyo wode he azazuwaa siyidaageeti attidosona. Nuuni ha iita alamee xayanawu keehi matido wodiyan deꞌoos. Yaatiyo gishshawu, nuunikka naagettidinne beegottidi deꞌana koshshees. w23.02 14 ¶1-2; 16 ¶3

Yihooway ba ashkkarati tumanchchanne xillo gidanaadan tamaarissees. Hegee eti bonchchettidinne woppu giidi deꞌanaadan maaddees. (Lee. 13:5, 6) Neeni Geeshsha Maxaafaa xannaꞌiyo wode I neeyyo hegaadan oottibeennee? Yihoowa ogee asa ubbawukka neeyyookka keehi loꞌꞌo gidiyoogaa tamaaradasa. (Maz. 77:13) Yaatiyo gishshawu, neeni Yihooway likke giidobaa oottanawu koyaasa. (Maa. 6:33) Neeni tumaa erissanawunne nu Xoossaa Yihoowa xeelliyaagan Seexaanay yootiyoobay worddo gidiyoogaa qonccissanawu koyaasa. Hegaadan waatada oottana danddayay? Neeni deꞌuwaa ogiyaa dooridoogee hagaadan giyoogaa mala: “Taani Seexaanaa wordduwaa ixxays, qassi tumawu exatays. Yihooway tana haaranaadaaninne I likke giidobaa oottanawu koyays.” Hegaadan waata oottana danddayay? Neeni Yihoowawu merinawu haggaazanawu qaalaa gelidoogaa woosan awu yoota simmada xammaqetta. Tumaanne xillotettaa siiqiyoogee xammaqettanawu keehi maaddees. w23.03 3 ¶4-5

Ha alamiyaa asay erenna sarotettay deꞌees. Hegee nuuni woppu gaanaadan oottiya, saluwan deꞌiya nu Aawaara dabbotido gishshawu demmiyo ‘Xoossaa sarotettaa.’ Nuussi Xoossaa sarotettay deꞌiyo wode woppu goos. (Pil. 4:6, 7) Nuuni Yihoowa siiqiyaageetuura laggetiyo wode ufayttoos. Nuuni ‘sarotettaa Xoossaara’ dabbotiyoogankka ufayttoos. (1 Tas. 5:23) Nuuni nu Aawaa eriyo, an ammanettiyoonne awu azazettiyo wode, nuna wolqqaama metoy gakkishinkka Xoossaa sarotettay nuuni woppu gaanaadan oottees. Ubbasaa gakkiya harggiyaa, daafabaa, deretettan woppay xayiyoogaa woy yedetaa mala wolqqaama metoy nuna gakkiyo wode, Xoossaa sarotettaa demmiyoogee tumuppe danddayettiyaabee? He metotuppe issoy nuna gakkiyoogeekka nuuni keehi yayyanaadan oottana danddayees. Hachchi gallassaa xiqisiyan odettidaagaadan, ishanttinne michchontti Yesuusa zoriyaa kaallidoogee ufayssiyaaba. Yihooway maaddin, eti wolqqaama metuwaa gencciyoogan sarotettan deꞌidosona. w22.12 16 ¶1-2

Nuuni nu deꞌuwan gakkiya ubbabaa teqqana danddayokko. Hegaa gishshawu, nuussi deꞌiya haggaazo maataappe denddidaagan, Yihooway nuna xoqqu ootti xeellees giidi nuuni qoppana koshshenna; qassi nuussi baynna haggaazo maatay deꞌiyoogeetuura nuna geeddarssennan aggiyoogee keehi koshshiyaaba. (Gal. 6:4) Nuuni harata maaddiyoonne Yihoowawu haggaaziyo ogeta koyiyoogee keehi koshshiyaaba. Neeni sima deꞌuwaa deꞌikko, qassi koshshenna acuwan gelennan aggikko, Yihoowawu loytta haggaazana danddayaasa. Neeni mata wode gakkana danddayiyo halchchota halchchiyoogee takkada gakkana danddayiyoobata halchchanaadan nena maaddana. Leemisuwawu, neeni takkada gakkanawu halchchidoy ubba wode aqinye gidanaassa gidikko, haꞌꞌi aginan aginan kaafiya aqinye gidana danddayay? Neeni gubaaꞌiyawu oottiyaagaa gidanawu halchchikko, loytta haggaazanawu wodiyaa bazzana danddayay? Neeni haꞌꞌi oottiyoobay sinttappe hara haggaazo maataa demmanaadan nena maaddana danddayees. Neessi imettida ay oosuwaakka loytta oottanawu murtta. w22.04 26 ¶16-17

Yihooway nuuni metuwaa genccanaadaaninne awu haggaaziyoogan ufayttanaadan maaddees. Nuuni nuna qofissidabaa woosan Yihoowawu yootiyo wode, I sohuwaara nuuni hegaa genccanaadan koshshiya wolqqaa immees. Qassi, nu metoy nuuni qoppido wodiyan qaarettana xayikko, hegaa genccanawu koshshiya wolqqaa immanaadan zaari zaaridi Yihoowa oychchana danddayoos. Nuuni yaatanaadan I shoobbees. Isiyaasi yootido ha qofay hegaa qonccissees: “[Yihoowa] shemppissoppite.” (Isi. 62:7) Hegee woygiyoogee? Nuuni Yihoowa shemppissokko giyoogaa mala hanotan, zaari zaaridi A woossana koshshees. Isiyaasi yootidobay Luqaasa 11:8-10, 13n woosaa xeelliyaagan Yesuusi yootido leemisuwaa nuna hassayissees. Ha xiqisiyan, nuuni geeshsha ayyaanaa demmanawu aggennan ‘woossanaadan’ Yesuusi nuna minttettiis. Qassi, nuuni loꞌꞌobaa kuuyanawu maaddiya kaaletuwaa demmanawu Yihoowa woossana danddayoos. w22.11 8 ¶1; 9 ¶6-7

Inttenne intte soo asay yedetawu haꞌꞌi giigettana danddayeeta. Hanana danddayiya iitabaa ubbaa qoppanawu maloppite. Yihoowaara intte dabbotaa minttite, qassi intte naatikka yaatanaadan maaddite. Intte issi issitoo unꞌꞌettikko, inttessi siyettiya ubbabaa Xoossawu yootite. (Maz. 62:7, 8) Intte Yihoowan ammanettiyo gaasuwaa so asay issippe tobbite. Daafabawu intte kasetidi giigettiyoogaadan, yedetawukka kasetidi giigettiyoogeenne Yihoowan ammanettiyoogee intte naati xala gidanaadaaninne woppu gaanaadan maaddana. Xoossay immiyo sarotettay nuuni woppu gaanaadan oottees. (Pili. 4:6, 7) Ha wodiyan nuna qohana danddayiya ubbasaa gakkiya harggee, daafabaynne yedetay deꞌishinkka, he sarotettaa baggaara Yihooway nuuni woppu gaanaadan oottees. I minnidi oottiya cimatu baggaara nuna minttettees. Qassi nuuni ubbay issoy issuwaa maaddanaadan I denttettees. Sarotettay deꞌiyo ha wodiyan haꞌꞌi nuna gakkana wolqqaama metuwawu, ubba qassi ‘gita waayiyawu’ giigettana danddayoos.—Maa. 24:21. w22.12 27 ¶17-18

Nuuni kase gita nagaraa oottido gishshawu zilꞌꞌettiyoogaa agganawu baaxetana koshshees. Wozuwaa yarshshoy nuuni ‘eriiddi oottido nagaraa’ atto giissees giidi mule qoppana koshshenna. (Ibr. 10:26-31) SHin nuuni nu nagaraappe wozanappe simmikko, Yihooway sunttidoogeeta maaduwaa oychchikko, qassi nu eeshshaa laammikko, Yihooway nuussi muleera atto gaanaagaa ammanettana danddayoos. (Isi. 55:7; Oos. 3:19) Wozuwaa yarshshoy nu nagara ubbay atto geetettanaadaaninne nuuni Gannatiyan deꞌanaadan oottees. Yan deꞌoy mule salettiyaaba gidenna. Nuuni ubbatoo loꞌꞌo asaara gayttananne ufayssiya oosuwaa oottana. Ubbaappe aaruwan, saluwan deꞌiya nu Aawaa galla galla loyttidi erananne I nuussi immido ubbaban ufayttana. Nuuni ubbatoo abaanne I medhdhidobata xeelliyaagan tamaarana darobay deꞌees. w22.12 13 ¶17, 19

“Maccaasiyaa” Hewaano gidukku. He hiraagay maccaasee zerettay shooshshaa huuphiyaa ‘qoxxanaagaa’ yootees. SHooshshay iita kiitanchchaa Seexaanaa gidiyo gishshawu, Hewaani zeretta gidida ay asinne A qoxxana danddayenna. Yaatin Seexaanay waani xayanee? Geeshsha Maxaafan deꞌiya wurssetta Ajjuutaa maxaafay maccaasiyaa oonakko loytti qonccissees. (Ajj. 12:1, 2, 5, 10.) A saꞌan deꞌiya maccaasa gidukku. A aginaa bolli eqqada, tammanne naaꞌꞌu xoolintte akiliiliyaa ba huuphiyan wottaasu. He maccaasiyaa keehi dumma naꞌaa, hegeekka Xoossaa Kawotettaa yelaasu. He Kawotettay saluwan deꞌiyo gishshawu, akka saluwan deꞌawusu. He maccaasiyaa ammanettida kiitanchchati deꞌiyo Xoossaa dirijjitiyawu saluwaa baggaa bessiyaaro. (Gal. 4:26) Xoossaa Qaalay maccaasee zerettawu waannatiyaagee oonakko eranaadan maaddees. He zerettay Abrahaama zeretta.—Doo. 22:15-18. w22.07 15-16 ¶6-8

Yihoowa imota gidida Geeshsha Maxaafan A aadhdhida eratettay deꞌees. Geeshsha Maxaafaa zoree asaa keehi maaddees. Geeshsha Maxaafay asay laamettanaadan oottees. Muusee Geeshsha Maxaafan koyro maxaafata xaafido wode, Xoossaa asa gidida Israaꞌeelatussi hagaadan giis: “Ha qaalai intteyyo de7oppe attin, coo mela qaala gidenna.” (Zaa. 32:47) Geeshsha Maxaafaa zoriyaa kaalliyaageeti ufayssiya deꞌuwaa deꞌoosona. (Maz. 1:2, 3) Xoossaa Qaalay daro wodiyaappe kase xaafettikkonne, haꞌꞌikka asaa deꞌoy giiga gidanaadan maaddees. Aadhdhida eratettaa immiya Geeshsha Maxaafay yootiyo maarati ubbatoo maaddoosona; asi deꞌido wode ubban hegeeti maaddidosona. Nuuni Geeshsha Maxaafaa nabbabiyo wodenne nabbabidobaa wotti dentti qoppiyo wode, A xaafissidaagee nuuni Geeshsha Maxaafaa zoriyaa nu deꞌuwan waati oosuwan peeshshanaakko akeekanaadan maaddiya geeshsha ayyaanaa nuussi immees. (Maz. 119:27; Mil. 3:16; Ibr. 4:12) Ee, Geeshsha Maxaafaa xaafissidaagee nena maaddanawu giigi uttiis. Hegee nuuni Geeshsha Maxaafaa ubbatoo nabbabanaadan oottees! w23.02 3 ¶5-6

Laappuntta huuphee Alamiyan Wolqqaama Gidida Inggilizenne Amarkkaa Waatta Kawotettaa gidiyoogaanne ayyo ‘dorssa kace milatiya naaꞌꞌu kacee deꞌiyoogaa, qassi he doꞌay miimminttiyaadan haasayiyoogaa’ nuuni Ajjuutaa shemppo 13​ppe akeekoos. He doꞌay “gita malaatata oottiis; harai atto tamaa saluwaappe asa ubbaa sintti sa7aa wottana gakkanaassi malaatata oottiis.” (Ajj. 13:11-15) Ajjuutaa shemppo 16ynne 19y ha doꞌay “wordduwaa hananabaa yootiyaagaa” gidiyoogaa qonccissees. (Ajj. 16:13; 19:20) Daaneelikka, Alamiyan Wolqqaama Gidida Inggilizenne Amarkkaa Waatta Kawotettay ‘daganttiya bashshaa bashshanaagaa’ yootiis. (Dane. 8:19, 23, 24) Hegee Naaꞌꞌantto Alamiyaa Olaa wode haniis. Inggilizenne Amarkkaa saynttistteti giigissido naaꞌꞌu atome bombbeti wurssettan olay kuuyettanaadan oottidosona. Alamiyan Wolqqaama Gidida Inggilizenne Amarkkaa Waatta Kawotettay ha bombbeta giigissiyoogan, ‘tamay saluwaappe saꞌaa wodhdhanaadan’ oottiis. w22.05 10 ¶9