Laappune

Kiitettida PHeexiroosi ba ishanttussi deꞌiya imotaynne eray ayba gidikkonne, eti bantta mala Kiristtaaneta minttettanawu hegaa goꞌettanaadan eta zoriis. PHeexroosi hagaadan giis: “Intte huuphiyan huuphiyan Xoossaappe . . . aaro kehatettaa ekkidoogaadankka, Xoossaa dumma imuwaa loitti gishiyaageetudan, issoi issuwau oottite.” (1 PHe. 4:10) Harati qanaatana woy hidootaa qanxxana danddayoosona gi yayyidi nuussi deꞌiya imotaa loytti goꞌettennan agganawu mammottana koshshenna. SHin nuuni hegan otorettennaadan naagettana bessees. (1 Qor. 4:6) Nuuyyo deꞌiya era ubbay Xoossay immido imota gidiyoogaa hassayoos. Nuuni he imotaa haratuppe aadhdhiyaaba milatanawu gidennan, gubaaꞌiyaa minttettanawu goꞌettana koshshees. (Pili. 2:3) Nuuni nu wolqqaanne eraa Xoossaa sheniyaa polanawu goꞌettiyo wode keehi ufayttoos, nu ufayttiyoy haratuppe aadhdhiyo gishshataassa gidennan, he imotaa Yihoowa sabbanawu goꞌettiyo gishshataassa. w22.04 11-12 ¶7-9

Yesuusi Geeshsha Maxaafaa dosees, qassi Xoossaa Qaalaa xeelliyaagan awu siyettiyaabay Mazamure 40:8n kasetidi odettiis. Xiqisee hagaadan gees: “Abeet ta Xoossau, taani neeni koyiyoogaa oottanau dosais; ne higgee ta wozanaa giddon de7ees.” Yesuusi Geeshsha Maxaafaa siiqiyo gishshawu, ufayttiisinne aggennan Yihoowawu haggaaziis. Nuunikka Xoossaa Qaalaa nabbabikko, qassi A siiqikko, ufayttananne aggennan Yihoowawu haggaazana danddayoos. (Maz. 1:1-3) Yesuusi yootidobatanne oottidobata kaalliyoogan, Geeshsha Maxaafaa nabbabiyo hiillata loytti goꞌettiyaageeta gidoos. Nuuni woossiyoogan, leddan nabbabiyoogan, oyshata oychchiyoogan, qassi qantta masttooshaa oyqqiyoogan Geeshsha Maxaafaa kaseegaappe aaruwan akeekana danddayoos. Geeshsha Maxaafaa qofay deꞌiyo nu xuufeta goꞌettidi, nuuni nabbabidobaa loytti qoppiyoogan akeekanchcha gidana danddayoos. Qassi nuuni nabbabiyo wode ubban suurebaa qoppiyoogan Xoossaa Qaalay nuna laammanaadan eeno gaana danddayoos. Nuuni yaatanawu nuussi danddayettida ubbabaa oottiyo wode, Geeshsha Maxaafaa nibaabiyaappe loytti goꞌettananne Yihoowakko kaseegaappe aaruwan shiiqana.—Maz. 119:17; Yaaq. 4:8. w23.02 13 ¶15-16

Neeni tamaaranawu koyiyo hiillaa doora, yaatada, hegaa giigissanawu minna ootta. Hegaadan waata oottana danddayay? Neeni gooba asttamaare gidanawu koyadasa gaada qoppa. Nabbabanawunne Tamaarissanawu Keehippe Minna giya brooshuriyaa loytta xannaꞌana danddayaasa. Saaminttawu gidduwan shiiqiyo shiiquwan neessi kifilee imettiyo wode, shiiquwaappe kase ne haasayaa siyidi ne giigissanaabaa yootanaadan issi gooba ishaa oychchana danddayaasa. Neeni minna oottiyaagaanne ammanettiyaagaa gidiyoogaa asay eranaadan ne kifiliyaa kasetada giigetta. (2 Qor. 8:22) Neeni issiban gooba gidanawu halchchada hegaa polanawu metootikko, waatana danddayay? Hidootaa qanxxoppa! Ximootiyoosi haasayaa haasayiyoogaaninne tamaarissiyoogan keehi gooba gididee? Hegaabaa Geeshsha Maxaafay yootenna. SHin Ximootiyoosi PHawuloosa zoriyaa kaallido gishshawu ba aawatetta poliyoogan gooba gidiyoogee qoncce.—2 Xim. 3:10. w22.04 24-25 ¶8-11

Laappun huuphee deꞌiyo doꞌay aybee? Ha doꞌay maahe mala gidikkonne, A tohoy beeriyaagaa mala gidiyoogaanne A doonay gaammuwaagaa mala gidiyoogaa, qassi awu tammu kacee deꞌiyoogaa akeekoos. Daaneela shemppo 7n odettida oyddu doꞌatu hanotaykka hagaa mala. Gidikkonne, hagan Ajjuutaa maxaafan deꞌiya ubbabay oyddu dumma dumma doꞌatubaa gidennan, issi doꞌaabaa qonccissees. Ha doꞌay qonccissiyoy issi kawotetta woy alamiyan wolqqaama gidida issi haaro xalla gidenna. Yohaannisi ha doꞌay “qommo ubbaa, yara ubbaa, dumma dumma biitta qaala ubbaanne zare ubbaa” haariyoogaa yootiis. Hegaa gishshawu, he doꞌay hara ay kawotettappekka aadhdhennan waayi aggana. (Ajj. 13:7) Yaatikko, ha doꞌay asaa hanno gakkanawu haarida kawotetta ubbaa qonccissiyaaba. (Era. 8:9) Hara naqaashay Geeshsha Maxaafan darotoo paydo tammay issibay kumetta gidiyoogaa qonccissees. w22.05 9 ¶6

He maalaalissiya loꞌꞌobatuppe goꞌettanay oonee? Goꞌettiya koyroogeeti Armmageedoonappe attiya zawi baynna daro asatanne ooratta alamiyan yelettana naata. SHin Ajjuutaa shemppo 20y hayqqidaageeti denddanaagaakka yootees. (Ajj. 20:11-13) Ammanettidi kase hayqqida ‘xillotikka,’ Yihoowabaa tamaariyo injjiyaa demmennan hayqqida ‘worddotikka’ saꞌan deꞌanawu denddana. (Oos. 24:15; Yoh. 5:28, 29) Hegaa giyoogee hayqqida asa ubbay SHaꞌu Layttaa Haaruwaa wode denddana giyoogee? Gidenna. Hayqqanaappe kase Yihoowawu haggaaziyo injjiyaa ixxida iitati denddokkona. Eti Yihoowaabaa tamaariyo injjiyaa demmikkonne, Gannate gidida saꞌan deꞌanawu bessennaageeta gidiyoogaa qonccissidosona.—Maa. 25:46; 2 Tas. 1:9; Ajj. 17:8; 20:15. w22.05 18 ¶16-17

Yesuusi ‘ammanettida wozannaama ashkkaraa’ baggaara ha saꞌan geeshsha goynuwaa aassiya issi maalaaliya dirijjitiyaa essiis. (Maa. 24:45) He dirijjitiyaa xeelliyaagan neeyyo aybi siyettii? Geella neeyyookka, hachchi gallassaa xiqisiyan kiitettida PHeexiroosi Yesuusawu giidoogaadan siyettennan waayi aggana. Ha wodiyan nuuni Yihoowa dirijjitiyaa erennaakko, waananawu deꞌiyoo? Kiristtoosi he dirijjitiyaa baggaara nuuni Xoossawu ammanettidi deꞌanaadan nuussi koshshiyaabaa ubbaa immees. Nuuni haggaazuwan qara gidanaadankka I nuna loohissees, qassi Yihoowa ufayssanawu ‘ooratta asatettaa maayanaadan’ nuna maaddees. (Efi. 4:24) Yesuusi wayssiya wodiyan maaddiya kaaletuwaa nuuyyo yootees. Koronaa harggee doommido wode, hegaa mala kaaletoy ay keena maaddiyaakko akeekida. Alamiyan daro asawu kirqqi giido wode, Yesuusi nuuni nu payyatettaa naaganaadan maaddiya qoncce kaaletuwaa immiis. w22.07 12 ¶13-14

Yihooway beni Israaꞌeelati bantta naata ubbatoo abaa tamaarissanaadan azaziis. (Zaa. 6:6, 7) Kumetta gallassi bantta naatuura haasayiyoonne eti Yihoowa siiqanaadan tamaarissiyo daro injjee yelidaageetussi deꞌees. Leemisuwawu, Israaꞌeela biittan issi naꞌay goshshaa oosuwan woy kattaa shiishshiyoogan ba aawaa maaddiyoogan daro wodiyaa aattana danddayees. A michchiyaa sikkiyoogan, daddiyoogaaninne son harabaa oottada ba aayyiyo maaddiyoogan galla galla daro saatiyaa iira aattana danddayawusu. Yelidaageetinne naati issippe oottiyo wode, koshshiya darobaa haasayana danddayoosona. Leemisuwawu, eti Yihoowa loꞌꞌotettaabaanne so asaa I maaddido ogiyaabaa haasayana danddayoosona. Ha wodiyan, deꞌoy kaseegaappe dummatees. Daro biittatun, yelidaageetinne naati gallassa kumettaa issippe wodiyaa aattokkona. Yelidaageeti oosuwan, naati qassi timirtte keettan peꞌoosona. Yaatiyo gishshawu, yelidaageeti bantta naatuura haasayiyo wodiyaa demmanawu baaxetana koshshees.—Efi. 5:15, 16. w22.05 28 ¶10-11

Gita nagaraa oottiyoogee Xoossaa higgiyaa kanttiyoogaa bessiyaaba. Issi Kiristtaanee hegaa mala nagaraa oottikko, ayyo atto gaanaadan Xoossaa Yihoowa woossananne gubaaꞌiyaa cimatussi yootana bessees. (Maz. 32:5; Yaaq. 5:14) Gubaaꞌiyaa cimatussi ayba aawatettay deꞌii? Wozuwaa yarshshuwaa denddo oottidi nagaraa muleera atto giyo maatay deꞌiyoy Yihoowa xalaalaassa. Gidoppe attin, nagaraa oottida uri gubaaꞌiyaa yame gididi deꞌana bessiya bessennaakko Geeshsha Maxaafaa goꞌettidi kuuyiyo aawatettaa Yihooway cimatuyyo immiis. (1 Qor. 5:12) Yaatanawu, kaalliya oyshatu zaaruwaa demmanawu maliyoogee eti oottiyoobatuppe issuwaa: He uri nagaraa oottanawu kasetidi halchchidee? He uri ba oottido nagaraa haratuppe genttanawu malidee? I gita nagaraa daro wodiyawu zaari zaari oottidee? Qassi, I nagaraappe wozanappe simmidoogaa bessiyaabi deꞌii? Yihooway ayyo atto giidoogaa qonccissiyaabi deꞌii?—Oos. 3:19. w22.06 9 ¶4

Yesuusi bana kaalliyaageeti xillotettaa kaallanaadan yootiis. (Maa. 5:6) Hegaa giyoogee, issi uri Xoossaa sinttan likkebaa, loꞌꞌobaanne geeshshabaa oottana koshshees giyoogaa. Neeni tumatettaanne xillotettaa siiqay? Siiqiyoogaa ammanettoos. Neeni wordduwaa, balaanne iita ubbaa ixxaasa. (Maz. 119:128, 163) Worddotiya uri ha alamiyaa haariya Seexaanaa milatees. (Yoh. 8:44; 12:31) Seexaanaa halchchotuppe issoy geeshsha gidida Xoossaa Yihoowa sunttaa mooriyoogaa. Edenen makkalay denddido wodiyaappe doommidi Seexaanay nu Xoossaabaa wordduwaa aassees. I Yihooway ba xallaa siiqiyaagaanne asaa loꞌꞌobaa diggiya maara Haarennaagaa giidi asay qoppanaadan oottanawu baaxetees. (Doo. 3:1, 4, 5) Seexaanay Yihoowa xeelliyaagan yootiyo worddoy asay Yihoowaabaa iitabaa qoppanaadan oottiiddi deꞌees. Asay ‘tumaa’ dosennan aggiyo wode, eti worddobaa ubbaanne iitabaa ubbaa oottanaadan Seexaanay denttettana danddayees.—Roo. 1:25-31. w23.03 2 ¶3

Neeni iita meezeta agganawu baaxetiyo wode, haꞌꞌikka issi issitoo hegeeta oottanawu paacettana danddayaasa. Woy neeni halchchidobay eesuwan polettennaba milatido gishshawu yiillotananne unꞌꞌettana danddayaasa. Neeni genccanaadan aybi maaddanee? Keehi koshshiya eeshsha gidida, Yihoowa siiqiyo siiquwaa. Neeni Yihoowa siiqiyoogee, neessi deꞌiya aybippenne aadhdhiya ufayssiya eeshsha. (Lee. 3:3-6) Neeni Xoossaa mintta siiqiyoogee nena gakkiya metuwaa genccanaadan maaddees. Yihooway ba ashkkaratussi aggenna siiquwaa bessiyoogaa Geeshsha Maxaafay darotoo yootees. Aggenna siiquwaa giyoogee, Yihooway ba ashkkarata mule aggenna woy eta siiqiyoogaa aggenna giyoogaa. Neeni Xoossaa leemisuwan merettadasa. (Doo. 1:26) Neeni aggenna siiquwaa waata bessana danddayay? Ubba wode Yihoowa galata. (1 Tas. 5:18) Galla galla nena hagaadan oychcha: ‘Yihooway tana siiqiyoogaa waati bessidee?’ Yaatada Yihooway neessi oottidobaa dummaya qonccissada woosan A galata. Yihooway nena siiqiyo gishshawu, neessi loꞌꞌobaa oottiyoogaa akeeka. w23.03 12 ¶17-19

Yesuusi kiitettida 12tussikka keha, qassi eta siiqees. Hegaappe nuuni ay tamaariyoo? Harati oottido balaa xalla gidennan, eta balawunne mooruwawu nuuni zaariyo ogeekka meto gidana danddayees. Nu mala Kiristtaanee nuna yiilloyikko, hagaadan giidi oychchana danddayoos: ‘I oottidobay tana keehi hanqqetissidoy aybissee? Hegee taani giigissana koshshiyo ta shugo miyyiyaa bessiyaabee? Tana yiilloyida uraa geella metoy gakkiiddi deꞌiishsha? Taani yiillotanaadan oottiya gaasoy deꞌikkokka, he uraa siiqananne awu coo atto gaana danddayiyaanaa?’ Nuuni issoy issuwaara siiqettiyo wode, Yesuusa tumuppe kaalliyaageeta gidiyoogaa bessoos. Nu mala Kiristtaaniyaa hanotaa akeekanawu baaxetana koshshiyoogaakka Yesuusappe tamaaroos. (Lee. 20:5) Yesuusi asaa wozanan deꞌiyaabaa erees. SHin nuuni erana danddayokko. Gidikkonne, nu ishanttinne michchontti nuna yiilloyiyo wode, nuuni eta danddayana koshshees. (Efi. 4:1, 2; 1 PHe. 3:8) Nuuni etabaa loytti erikko, yaatanawu metootokko. w23.03 30 ¶14-16

Seexaanay nu ammanuwaa shugissanawu nuuni hayqqanaadan oottana danddayiya harggiyaa goꞌettana danddayees. Dottoreti woy ammanenna so asay nuuni Xoossaa higgiyaa kanttidi suuttaa goꞌettanaadan wolqqanttana danddayoosona. Woykko Geeshsha Maxaafay yootiyo maaraara maayettenna akkamuwaa akkamettanaadan nuna ammanttanawu issi uri malana danddayees. Nuuni hayqqanawu koyokko; shin hayqqikkokka, Yihooway nuna siiqiyoogaa aggennaagaa eroos. (Roo. 8:37-39) Yihoowa dabboti hayqqikkokka, eti paxa deꞌiyaabadan I eta hassayees. (Luq. 20:37) I eta hayquwaappe denttanawu laamotees. (Iyy. 14:15) Nuuni “merinaa de7uwaa” demmanaadan Yihooway alꞌꞌo waagaa qanxxiis. (Yoh. 3:16) Yihooway nuna keehi siiqiyoogaanne nuussi qoppiyoogaa eroos. Yaatiyo gishshawu, nuuni sahettiyo wode woy hayquwaa yayyiyo wode, Yihoowa aggiyoogaappe I immiyo minttettuwan, aadhdhida eratettaaninne wolqqan ammanettoos.—Maz. 41:3. w22.06 18 ¶16-17

Geeshsha Maxaafay hagaadan gees: “Aadhdhida eratettaassi doomettai GODAASSI yayyiyoogaa; Geeshsha GODAA eriyoogee akeekiyoogaa.” (Lee. 9:10) Yaatiyo gishshawu, nuuni keehi koshshiya issibaa kuuyiyo wode hegaa xeelliyaagan Yihoowa qofay aybakko akeekana koshshees. Nuuni Geeshsha Maxaafaanne nu xuufeta nabbabiyo wode hegaadan oottana danddayoos. Yaatiyo wode, aadhdhida eratettay deꞌiyoogeeta gidiyoogaa bessoos. (Lee. 2:5-7) Nuussi aadhdhida eratettaa immana danddayiyay Yihoowa xalaala. (Roo. 16:27) Aadhdhida eratettay Yihoowappe yees giyoy aybissee? Koyruwan, Yihooway nuna Medhdhidaagaa gidiyo gishshawu, ba medhdhidobaa xeelliyaagan ubbabaa erees. (Maz. 104:24) Naaꞌꞌanttuwan, Yihooway ubbabaa aadhdhida eratettan oottees. (Roo. 11:33) Heezzanttuwan, Yihooway aadhdhida eratettan zoriyoobay hegaa oosuwan peeshshiyaageeta awudenne maaddees. (Lee. 2:10-12) Nuuni aadhdhida eranchcha gidanawu koyikko, he heezzubata ammanananne nuuni kuuyiyoobaaninne oottiyooban hegeeta kaallanawu eeno gaana koshshees. w22.10 19 ¶3-4

Ajjuutaa shemppo 12n kasetidi odettidoogaadan, Seexaanay olan xoonettiis; qassi inne daydanttati saꞌawu duge olettidosona. Seexaanay keehi hanqqettidi asaa qohiyo gishshawu, hegee ‘saꞌawu aayyeꞌana’ giissiyaabay hananaadan oottiis. (Ajj. 12:9-12) Ha hiraagay nuna waati maaddii? Alamiyaa hanotaynne asaa eeshshay laamettidoogaa nuuni beꞌiyoogee Yesuusi Kawo gididoogaa akeekanaadan nuna maaddees. Yaatiyo gishshawu, asati bantta xallaa siiqiyaageetanne meqetti baynnaageeta gidiyoogaa nuuni beꞌidi yiillotiyoogaappe, Geeshsha Maxaafaa hiraagay polettiiddi deꞌiyoogaa eta hanotay bessiyoogaa nuuni hassayana koshshees. Xoossaa Kawotettay haariiddi deꞌees! (Maz. 37:1) Armmageedoona olay keehi mati mati biyo wode, ha alamiyan unꞌꞌissiyaabay yaa daranaagaa nuuni eroos. (Mar. 13:8; 2 Xim. 3:13) Ha alamiyan metoy darido gaasuwaa nuuni eranaadan saluwan deꞌiya nu siiqo Aaway nuna maaddido gishshawu A keehi galatoos. w22.07 3-4 ¶7-8

Sahuwaa, daafabay gattiyo qohuwaa, olaa, yedetaa, woy hara metota genccanaadan Yihooway nu mala Kiristtaaneta maaddana mala oychchana danddayoos. Qassi maadoy koshshiyoogeeta maaddanawu minnidi oottiya nu ishanttussinne michchonttussi woossana danddayoos. Hegaa mala metoy gakkin waayettiya amaridaageeta neeni erennan waaya aggana. Neeni he ishanttunne michchonttu sunttaa xeesada woossana danddayaasa. Eti genccanaadan Yihooway maaddana mala woossiyoogan, nuuni eta wozanappe siiqiyoogaa bessoos. Nuuni gubaaꞌiyan aawatettay deꞌiyoogeetu sunttaa xeesidi woossiyo wode, eti keehi nashshoosona; qassi nu woossay eta maaddees. Kiitettida PHawuloosi harati assi woossiyoogee koshshiyoogaa akeekiis. I hagaadan giis: “Qassi taani yayyennan wonggeliyaa xuuraa yootanau, Xoossai ta doonaa dooyidi, tau haasayiyoobaa immanaadan, taukka Xoossaa woossite.” (Efi. 6:19) Hegaadan, ha wodiyan aawatettay deꞌiyo minnidi oottiya daro ishantti deꞌoosona. Eta oosuwaa Yihooway anjjanaadan woossiyoogan, nuuni eta siiqiyoogaa bessoos. w22.07 23-24 ¶14-16

Wotaaddarati bantta huuphiyaa qohuwaappe naaganawu birata qophiyaa wottoosona. Nuuni Seexaanaara olettiyo wode, I nuna qohenna mala nu qofaa naagana koshshees. I nuna paaccanawunne nu qofaa mooranawu darobaa oottees. Birata qophee wotaaddaraa huuphiyaa qohuwaappe naagiyoogaadan, nu hidootaykka Yihoowawu ammanettidi deꞌanaadan nu qofaa naagees. Nu hidootay minnana xayikko, qassi nuuni nu koyiyoobaa xallaa qoppikko, merinaa deꞌuwaa hidootaa dogana danddayoos. Beni Qoronttoosan deꞌida, amarida Kiristtaanetu hanotaa beꞌa. Eti Xoossay qaalaa gelido, keehi koshshiya dendduwaa hidootan ammanibookkona. (1 Qor. 15:12) Sinttanaa deꞌuwaa xeelliyaagan hidooti baynna asay haꞌꞌissawu xalla deꞌiyoogaa PHawuloosi yootiis. (1 Qor. 15:32) Ha wodiyan Xoossay qaalaa gelidobaa hidootan naagenna daroti, banttana ufayssanawu banttawu koyiyo ubbabaa oottiyoogan haꞌꞌissa xallawu deꞌoosona. SHin nuuni sinttappe Xoossay ehaanawu qaalaa gelidobatun ammaniyo gishshawu, etappe dummatoos. w22.10 25-26 ¶8-9

Yihooway neeni woossanaadan shoobbees. Nena gakkiya metota I erees; qassi neeni awudenne woossiyo woosaa I siyees. Bawu goynniyaageeti woossiyo woosaa siyiyoogan I ufayttees. (Lee. 15:8) Nerkka attidabadan neessi siyettiyo wode aybaa xeelliyaagan woossana danddayay? Neessi siyettiya ubbabaa awu yoota. (Maz. 62:8) Nena qofissiyaabata, qassi hegeeti neessi aybi siyettanaadan oottidaakko awu yoota. Neeni nerkka attidabadan neessi siyettiyo woy azzaniyo wode waatanaakko eranawu maaddanaadaaninne ne ammanuwaabaa qonccissanawu koshshiya xalatettaa immanaadan Yihoowa oychcha. Ne ammanuwaabaa hiillan qonccissanawu aadhdhida eratettaa demmanawukka oychchana danddayaasa. (Luq. 21:14, 15) Neeni unꞌꞌettikko woy hidootaa qanxxikko, hegaabaa issi kayma Kiristtaaniyaara haasayanawu Yihooway nena maaddanaadan oychcha. Neeni neeyyo siyettiyaabaa yootiyo uri ne odiyoobaa akeekan siyanaadan Yihooway A maaddanaadan oychchana danddayaasa. I ne woosaa waati zaariyaakko akeeka, qassi haratu maaduwaa ekka. Yaatikko, nerkka attidabadan neessi darin siyettenna. w22.08 10 ¶6

Mati eqqida Tasalonqqe gubaaꞌiyaa wolqqaama yedetay gakkiis. Eqettiya asati “issi issi ishantta katamaa halaqatukko” goochchi efiidosona. (Oos. 17:6) Mati Kiristtaane gididaageeti ay keena yayyidaakko qoppite! Eti Yihoowawu minnidi haggaazennan aggana danddayoosona, shin eti yaatanaadan kiitettida PHawuloosi koyibeenna. I ooratta gubaaꞌiyaa maaddiya ura kiittiis. PHawuloosi Tasalonqqe Kiristtaaneta hagaadan hassayissiis: ‘Inttena zoranaadaaninne intte ammanuwan inttena minttanaadan nu ishaa, Ximootiyoosa inttekko kiittida. Ha waayiyaa gaasuwan intteppe ooninne guyye simmenna mala, A kiittida.’ (1 Tas. 3:2, 3) PHawuloosi Lisxxiran deꞌiya ishantta loytti minttettidoogaa Ximootiyoosi beꞌiis. Qassi, Yihooway Lisxxiran deꞌiyaageeta maaddidoogaa Ximootiyoosi akeekiis; yaatiyo gishshawu, I Tasalonqqen deꞌiya mati Kiristtaane gididaageetakka Yihooway maaddanaagaa yootidi eta minttettana danddayees.—Oos. 14:8, 19-22; Ibr. 12:2. w22.08 21 ¶4

Geeshsha Maxaafaa tamaareti, CHarles Tez Raasili kaalettin 1870n Geeshsha Maxaafaa loytti pilggiyoogaa doommidosona. Eti Yesuusa yarshshoy tumuppe asaa waati maaddiyaakko, qassi A hayquwaa waati bonchchanaakko eranawu koyidosona. Daro layttaappe kase eti pilggidobaappe ha wodiyan nuuni goꞌettana danddayoos. Waanidi? Yesuusa yarshshuwaabaa, qassi hegee nuussinne asa ubbawu ay oottanaakko akeekida. (1 Yoh. 2:1, 2) Xoossaa ufayssiya asawu naaꞌꞌu hidootay deꞌiyoogaa, hegeekka amaridaageeti saluwan hayqqenna deꞌuwaa deꞌanaagaa, qassi hara daro asay saꞌan merinawu deꞌanaagaa Geeshsha Maxaafaappe nuuni akeekida. Yihooway nuna ay keena siiqiyaakko, qassi nuuni ubbay Yesuusa yarshshuwaappe ay keena goꞌettiyaakko akeekiyo wode, Yihoowakko kaseegaappe aaruwan shiiqoos. (1 PHe. 3:18) Yaatiyo gishshawu, kase deꞌida ammanettida ishanttuugaadan, Yesuusi bana kaalliyaageeta tamaarissido maaran Godaa Kahuwaa nunaara bonchchanaadan harata shoobboos. w23.01 21 ¶6-7

Yesuusi Xoossaa Kawotettay ehaana anjjotubaa asaa tamaarissiis. Wozoy nuuni Yihoowaaranne Yesuusaara mata dabbo gidanaadan oottido gishshawu, Yihoowa keehi galatoos. Yesuusan ammaniyaageetussi merinawu deꞌiyoonne hayqqida bantta siiqiyoogeetuura zaarettidi gayttiyo hidootaykka deꞌees. (Yoh. 5:28, 29; Roo. 6:23) He anjjota nuuni demmanay nu oottidobaa gishshataassa gidenna; woy Xoossaynne Kiristtoosi nuussi oottidobawu nuuni mule qanxxana danddayokko. (Roo. 5:8, 20, 21) SHin nuuni hegaa ay keena nashshiyaakko bessana danddayoos. Waatidi? Nu aquwa Yihoowa oosuwawu goꞌettiyoogaana. Leemisuwawu, Yihoowa goynuwawu goꞌettiyo keettata keexxiyoogaaninne bottokoniyoogan maaddana danddayoos. w23.01 26 ¶3; 28 ¶5

Xoossaa Kawotettan haariyaageeti, kumetta saꞌan deꞌiya daro biiloone asawu koshshiyaabaa kunttana. Yesuusaagaadan, 144,000ti kawonne qeese gididi oottana. (Ajj. 5:10) Israaꞌeelati Muuse Higgiyawu azazettido wode, eti payya gididi deꞌanaadaaninne Yihoowakko shiiqanaadan qeeseti eta maaddidosona. Higgee “yaana lo77obaa eesho” gidiyo gishshawu, Xoossaa asay payya gididi deꞌanaadaaninne Yihoowakko shiiqanaadan Yesuusaara haariyaageeti maaddana giidi qoppiyoogee bessiyaaba. (Ibr. 10:1) He kawotinne qeeseti saꞌan deꞌiya he Kawotettawu haarettiyaageetuura ayba ogiyan haasayanaakko nuuni haꞌꞌi erokko. Gannate saꞌan deꞌanaageeti koshshiya kaaletuwaa demmanaagaa ammanettana danddayoos.—Ajj. 21:3, 4. w22.12 11 ¶11-13

Harati nunaara Godaa Kahuwaa bonchchanaadan nuuni shoobbiyo issi gaasoy, he baalaa bonchchanawu koyro wodiyawu shiiqiyaageeti Yihoowaynne Yesuusi nuussi oottido ubbabaa eranaadan nuuni koyiyo gishshataassa. (Yoh. 3:16) Godaa Kahuwaa bonchchiyo wode eti beꞌiyoobaynne siyiyoobay, gujjidi tamaaranaadaaninne Yihoowa ashkkara gidanaadan eta maaddana giidi hidootoos. Nuuni Yihoowawu haggaaziiddi aggidaageetakka shoobboos. Xoossay eta haꞌꞌikka siiqiyoogaa eta hassayissanawu nuuni hegaadan oottoos. Daroti shoobettidi yoosona, qassi nuuni eta beꞌiyoogan keehi ufayttoos. Eti Godaa Kahuwaa bonchchanawu shiiqiyoogee, kase Yihoowawu haggaaziyo wode eti ay keena ufayttidaakko hassayanaadan oottees. (Maz. 103:1-4) Asay nu shoobiyaa ekkin aggin, Yihooway shiiqida asa ubban ufayttiyoogaa eriyo gishshawu, eta shoobbanawu nuussi danddayettida ubbabaa oottoos.—Luq. 15:7; 1 Xim. 2:3, 4. w23.01 20 ¶1; 22-23 ¶9-11

Yesuusi hayqqanaappe kase qammi, saluwan deꞌiya ba Aawaa issibaa woossiis. I bana kaalliyaageeta Yihooway naaganaadan woossiis. (Yoh. 17:15, 20) Yihooway ubbatoo ba asawu qoppeesinne eta naagees. Gidikkonne, Yesuusi bana kaalliyaageetu bolli Seexaanay wolqqaama yedetaa gattanaagaa erees. Dabloosi gattiyo iita qohuwaa eqettanawu Yihoowa maadoy etawu koshshiyoogaakka Yesuusi erees. Seexaanay haariyo alamee, ha wodiyan tumu Kiristtaanetu bolli daro metuwaa gattees. Nuuni hidootaa qanxxanaadaaninne Yihoowawu ammanettiyoogee paacettanaadan oottiya metoy nuna gakkees. SHin, nuuni aybiyyoonne yayyana koshshenna. Yihooway nuna naagees. Hegaa giyoogee I nuna gakkiya metuwaa beꞌeesinne nuna maaddanawu koyees giyoogaa. Yihoowa ayfeti ‘ayyo yayyiya asatu bollaana. Hegeenne, eta ashshanaassa.’—Maz. 33:18-20. w22.08 8 ¶1-2

Layttan layttan, Godaa Kahuwaa bonchchanaappe kasenne bonchchi simmin deꞌiya saaminttatun, Yesuusa hayqoy asaa waati maaddiyaakko wotti dentti qoppanawunne woossanawu wodiyaa bazziyoogan Yesuusi nuussi oottidobawu nashshiyoogaa bessoos. Qassi, ha dumma baalan asay nunaara shiiqanaadan shoobboos. Hegaa bollikka, nuuni Godaa Kahuwaa bonchchanawu shiiqiyoogaa aybinne diggennaadan oottanawu murttida. Godaa Kahuwaa bonchchiyo wode, wozoy asawu aybissi koshshidaakko, qassi issi ura hayqoy daro asaa nagaraa waati atto giissiyaakko tamaaroos. He haasayay oyttaynne woynee aybiyyo leemisokko, qassi oyttaa maananne woyniyaa uyana koshshiyaageeti oonakko nuna hassayissana. (Luq. 22:19, 20) Qassi, saꞌan merinawu deꞌanawu hidootiyaageeti sinttappe demmana ufayssiya hidootaabaa nuuni loytti qoppanaadan maaddana. (Isi. 35:5, 6; 65:17, 21-23) Nuuni ha tumaa xaasayi xeellana koshshenna. w23.01 20 ¶2; 21 ¶4

Nu nagaraa gishshawu Xoossay ba Naꞌaa wozo oottidi immiyoogan nuussi merinaa deꞌuwaa hidootay deꞌanaadan oottiis. (Maa. 20:28) Kiitettida PHawuloosi hagaadan giis: “Haiqoi issi asa baggaara ha sa7aa yiidoogaadan, haiqqidaageetu denddoikka qassi issi asa baggaara yiis. Aissi giikko, asai ubbai Addaameera dabbotido gishshau haiqqidoogaadan, Kiristtoosaara dabbotido gishshau, ubbai de7uwaassi denddana.” (1 Qor. 15:21, 22) Yesuusi Xoossaa Kawotettay yaanaadaaninne Xoossaa shenee saꞌan hananaadan woossana mala ba erissiyo ashkkarata tamaarissiis. (Maa. 6:9, 10) Asay saꞌan merinawu deꞌanaadan oottiyoogee Xoossaa halchchotuppe issuwaa. Hegaa polanawu, Yihooway ba Naꞌay Mase Kawotettaa Kawo gidanaadan sunttiis. Xoossaa sheniyaa polanawu, Yesuusaara oottanaadan Xoossay 144,000 asata saꞌaappe shiishshiiddi takkiis.—Ajj. 5:9, 10. w22.12 5 ¶11-12

Nuuni siiqiyo uri hayqqiyo wode, he uraa keehi laamotoos! Nu siiqiyo uri keehi waayettidi hayqqidaba gidikko, koyro heeran keehi azzanana danddayoos. Amarida wodiyaappe guyyiyan, he uri nuna tamaarissidobaa woykko I nuna minttettanawu woy miichchanawu oottidobaa woy giidobaa qoppidi zaarettidi ufayttana danddayoos. Hegaadankka, Yesuusa waayiyaabaanne hayquwaabaa nabbabiyoogee nuuni azzananaadan oottees. Yesuusa wozuwaa yarshshoy ay keena alꞌꞌobakko Godaa Kahoy bonchchettanaappe kasenne bonchchetti simmin deꞌiya saaminttatun wotti dentti qoppoos. (1 Qor. 11:24, 25) SHin Yesuusi saꞌan deꞌiyo wode yootidonne oottido ubbabata wotti dentti qoppiyo wode nuuni keehi ufayttoos. Qassi I haꞌꞌi nuussi oottiiddi deꞌiyoobaanne sinttappe oottanabaa qoppiyoogee nuna minttettees. w23.01 26 ¶1-2

Yesuusi hayqqido wode erissiyo ashkkarati keehi azzanidosona. Eti siiqiyo laggee hayqqidoogaa xalla gidennan, eta hidootaykka xayidabadan etawu siyettiis. (Luq. 24:17-21) SHin, Yesuusi etawu qonccido wode, I Geeshsha Maxaafaa hiraagaa waati polidaakko eti akeekanaadan maaddanawu wodiyaa bazziis. Qassi I etawu keehi koshshiya oosuwaa immiis. (Luq. 24:26, 27, 45-48) Yesuusi saluwaa bi simmin erissiyo ashkkarati azzaniyoogaa aggidi keehi ufayttidosona. Yesuusi paxa deꞌiyoogaanne etawu imettida oosuwaa polanaadan I eta maaddanaagaa eriyoogee eti ufayttanaadan oottiis. Eta ufayssay eti aggennan Yihoowa sabbanaadan maaddiis. (Luq. 24:52, 53; Oos. 5:42) Yesuusi erissiyo ashkkaratu leemisuwaa kaallanawu, Xoossaa Kawotettaa nu deꞌuwan kaseyana koshshees. Nuuni ubbatoo Yihoowawu haggaazanawu genccana koshshikkokka, nu hegaadan oottikko, I nuna anjjanawu qaalaa geliis.—Lee. 10:22. w23.01 30-31 ¶15-16

Nuuni Addaameegaadaaninne Hewaaniigaadan balabaa oottanawu koyokko. Nuuni ubbatoo Yihoowabaa tamaariyoogan, A eeshshata nashshiyoogaaninne A qofaa akeekanawu baaxetiyoogan balabaa oottiyoogaappe naagettana danddayoos. Nuuni yaatiyo wode, Yihoowa loytti siiqana. Ane Abrahaama hanotaa beꞌa. I wozanappe Yihoowa siiqees. Yihooway kuuyidobaa Abrahaami akeekanawu metootido wodekka azazettiis. Qassi I Yihoowa loytti eranawu baaxetiis. Leemisuwawu, Yihooway Sadoomanne Gamoora xayssanawu kuuyidoogaa Abrahaami erido wode, “sa7aa ubbaa pirddiyaagee” xillota iitatuura xayssanakkonne giidi koyro heeran yayyiis. Abrahaamawu hegee hanennabaa milatido gishshawu, daro oyshata Yihoowa bonchchuwan oychchiis. Yihooway danddayan awu zaariis. Yihooway asa ubbaa wozanaa qoriyoogaanne xillota iitatuura I mule qaxxayennaagaa wurssettan Abrahaami akeekiis.—Doo. 18:20-32. w22.08 28 ¶9-10

Biittaa Haariya Nahimee 455 K.K., Yerusalaame dirssaa gimbbiyaa zaaretti gimbbi simmidi, katamaa naagana danddayiya ammanettiya asata koyiis. Nahimee qatuwaa gadaawaa Hanaaniyaanne harata dooriis. Geeshsha Maxaafay Hanaanee “hara ubbaappe aadhdhida ammanettiyaanne Xoossaassi yayyiya asa” gidiyoogaa yootees. (Nah. 7:2, NW) Hanaanee Yihoowa siiqiyoogeenne A azzanttenna mala yayyiyoogee I bawu imettida ay oosuwaakka minni oottanaadan maaddiis. He eeshshati Xoossaa haggaazuwan ammanettiyaageeta gidanaadan nunakka maaddana. Kiitettida PHawuloosi ammanettido, Tikiqoosa giyo ishaa hanotaa beꞌa. PHawuloosi Tikiqoosan ammanettiis; qassi I ‘ammanettida ashkkara’ gidiyoogaa yootiis. (Efi. 6:21, 22) I Efisoonaaninne Qolasiyaasan deꞌiya ishanttussi dabddaabbiyaa gattiyoogaa xalla gidennan, eta minttettana danddayiyoogaakka PHawuloosi ammanettiis. Ha wodiyan nuussi ayyaanaaban koshshiyaabaa kunttiya ammanettida asatubaa Tikiqoosa hanotay nuna hassayissees.—Qol. 4:7-9. w22.09 9-10 ¶5-6

Yooseefa 13 gidiya layttawu wolqqaama metoy gakkiis. Yooseefi Yihooway bana siiqennabadan qoppana danddayees. Maadoy koshshiyo he wodiyan Yihooway A aggidabadankka qoppana danddayees. SHin Yooseefi uluwan lancciyaa oyqqiyoogaappe woppu giyoogan yuushshi qoppiya asa gidiyoogaa bessiis. I ba ishanttu bolli haluwaa kiyiyo injjiyaa demmikkonne, hegaadan oottibeenna; shin eta siiqiyoogaa bessiisinne etawu atto giis. (Doo. 45:4, 5) Yooseefi hegaadan oottidoy loytti qoppiya asa gidiyo gishshataassa. I ubbatoo ba metuwaabaa qoppiyoogaappe Yihooway koyiyoobaa qoppiis. (Doo. 50:19-21) Nuuni ay tamaariyoo? Nena issi uri naaqqikko, Yihoowa bolli lanccoppa woy I nena aggidabadan qoppoppa. Neeni metuwaa genccanaadan I nena ay keena maaddidaakko loytta qoppa. Hegaa bollikka, harati nena naaqqiyo wode siiquwan eta nagaraa kammanawu baaxeta. w22.11 21 ¶4

Yihoowawu deꞌiya maatay hara ubbaagaappekka aadhdhiyoogaa hananabaa yootiya Daaneeli beꞌido ajjuutay qonccissees. Daaneeli beni alamiyan wolqqaama kawotettata hegeetikka, Baabiloone, Meedoonanne Parsse, Giriikenne Roome, qassi ha wodiyan alamiyan wolqqaama kawotetta gidida, Inggilizenne Amarkkaa Waatta Kawotettaa qonccissiya oyddu wolqqaama doꞌata koyro beꞌiis. (Dane. 7:1-3, 17) Kaallidi Daaneeli Xoossaa Yihooway saluwan araatan uttidaagaa beꞌiis. (Dane. 7:9, 10) Ha saꞌaa kawotettatuppe Xoossay kawotettaa ekkidi, hegee bessiyoonne wolqqaama gidida haratussi immana. Oossi immanee? ‘Asa naꞌa milatiya’ Yesuus Kiristtoosayyoonne “Ubbaappe Xoqqiya Xoossaa geeshsha [asata]” geetettida, “meri merinau” haarana 144,000 asatuyyo imettana. (Dane. 7:13, 14, 18) Yihooway “Ubbaappe Xoqqiya Xoossaa.” Daaneeli ajjuutan beꞌidobay I kasetidi yootidobaara maayettiyaaba. Daaneeli, “Saluwaa [Xoossay] . . . kawota kawotettaappe diggees; qassi kawota kawotettan utissees” yaagiis.—Dane. 2:19-21. w22.10 14-15 ¶9-11