Naase

Qommoora odettida mazamuriyan deꞌiya keehi koshshiya naaꞌꞌubata akeeka: (1) Xillo asaa metoy gakkees. (2) Nu metuwaappe Yihooway nuna ashshees. Yihooway nuna waati ashshii? Issi ogee nuuni ha alamiyan deꞌiyo deꞌuwaa bessiyaagaadan xeellanaadan maaddiyoogaa. Yihooway nuuni awu haggaaziyoogan ufayttanaagaa yootikkonne, ha wodiyan metoy nuna gakkenna giidi yootibeenna. (Isi. 66:14) Yihooway nuuni merinawu ufayttidi deꞌanaadan koyiyo sinttanaa hidootaa ubbatoo qoppanaadan I nuna minttettees. (2 Qor. 4:16-18) He wodee gakkanaashin, awu haggaazanaadan I nuna ubbatoo maaddees. (Zil. 3:22-24) Beni wodiyankka ha wodiyankka ammanettidi Yihoowawu haggaazidaageetuppe nuuni ay tamaarana danddayiyoo? Qoppibeenna metoy nuna gakkana danddayees. SHin nuuni Yihoowan ammanettiyo wode, I nuna ubbatoo maaddana.—Maz. 55:22. w23.04 14-15 ¶3-4

Deriya haariyageetussi azazettiyogee metiyo wodiyankka azazettida Yooseefappenne Mayraamippe nuuni tamaarana danddayoos. (Luq. 2:1-6) Mayraama shahaarin uddufun aginaa heera gidido wode azazettiyogaara gayttidaagan onne Yooseefa paacee gakkiis. Rooma biittaa haariya, Augisxxoosi asay mazggabettanaadan azaziis. Yooseefinne Mayraama Beetaliheeme manddarana koshshiis; he deretiya ogee 150 kilo meetire. Ubbaappe aaruwan he ogee Mayraamissi injjetenna. Mayraamissinne uluwan deꞌiya shahaarawu eti hirggennan aggokkona. Mayraama manddariyo wode yelikko shin? I uluwan deꞌiyagee sinttappe Mase gidana naꞌa. Yaatin eti kawoy kessido higgiyawu azazettennan aggana danddayiyonaa? Yooseefinne Mayraama hirgganaadan oottiya gaasoy deꞌikkonne, eti higgiyawu azazettidosona. Eti azazettido gishshawu Yihooway eta anjjiis. Mayraama saruwan Beetaliheeme gakkaasu, naꞌaa yelaasu, ubba qassi Geeshsha Maxaafaa hiraagay polettanaadan oottaasu!—Mik. 5:2. w23.10 8 ¶9; 9 ¶11-12

Neeni shiiqotun qofaa yootanawu keehi yayyikko waatuutee? Daroti neegaadan yayyoosona. Loytta giigettiyogee nena maaddana danddayees. (Lee. 21:5) Neeni xuufiyaa loytta giigettikko, qofaa yootanawu metootennan aggana danddayaasa. Qassi qantta qofaa yoota. (Lee. 15:23; 17:27) Qanttan zaariyoogee neeni darin yayyennaadan oottees. Xuufiyaappe nabbabennan qanttan zaariyoogan neeni loytta giigettidoogaanne xuufiyaa qofaa loytta akeekidoogaa bessana danddayaasa. Neeni ha qofatuppe amaridaageeta oottanawu malikkonne, issitooppe woy naaꞌꞌutooppe daruwaa zaaranawu haꞌꞌikka yayyikko shin? Neeni zaaranawu neessi danddayettida ubbabaa oottiyoogaa Yihooway nashshees. (Luq. 21:1-4) Neeni danddayiyoogaappe aaruwaa oottanaadan Yihooway koyenna. (Pili. 4:5) Neeni danddayiyoobaa oottanawu murtta, hegaa oottanawu halchchuwaa kessa, qassi Yihooway maaddanaadan woossa. He halchchoy neeni koyro heeran qanttabaa zaaranaadan maaddana danddayees. w23.04 21 ¶6-8

Kiitettida PHawuloosi nuna giigi uttidanne ola miishshaa maayida wotaaddaratuura geeddarssiis. Issi wotaaddaray olay deꞌiyo wode ubban olettanawu giigi uttiis giidi asay qoppees. Nu hanotaykka hegaa mala. Ammanuwaanne siiquwaa tiran wottiyo ola miishshadan maayiyoogaaninne hidootaa birata qophedan huuphiyan wottiyoogan Yihoowa gallassawu giigi uttidaageeta gidoos. Tiran wottiyo ola miishshay issi wotaaddaraa wozanaa qohuwaappe naagees. Hegaadankka, ammanoynne siiqoy nu leemiso wozanaa qohuwaappe naagees. Ha eeshshati nuuni aggennan Xoossawu haggaazanaadaaninne Yesuusa leemisuwaa kaallanaadan maaddana. Ammanoy nu kumetta wozanaappe Yihoowa koyiyoogan I nuna woytanaagaa ammanettanaadan oottees. (Ibr. 11:6) Hegee nuuni metuwaa genccana koshshikkokka, nuna kaalettiya Yesuusawu ammanettidi deꞌanaadan oottees. Yedetay woy miishshaa metoy deꞌishinkka ha wodiyan ammanettidi deꞌidaageetuppe tamaariyoogan metuwaa genccanawu nu ammanuwaa minttana danddayoos. Hegaa bollikka, nuuni Kawotettaabaa kaseyanawu bantta deꞌuwaa sima oottidaageetu leemisuwaa kaallikko, miishshaanne aquwaa likkiyaappe aattidi siiqiyoogee kaalettiyo qohuwaappe naagettana danddayoos. w23.06 10 ¶8-9

Huuphiyaa naagiyoogee issi uri ba qofaanne ba oosuwaa naagiyoogaa qonccissees. Ubba nu halchchidobay polanawu deexxiyaba woy nu hegaa polanawu koyennaba gidikko, nu huuphiyaa naagiyogee halchchidobaa polanawu nuna denttettana koshshees. Huuphiyaa naagiyoogee ayyaanaa ayfiyaa macara gidiyo gishshawu, kaseegaappe aaruwan neeni ne huuphiyaa naaganaadan maaddana mala geeshsha ayyaanaa Yihooway immanaadan woossana koshshiyoogaa hassaya. (Luq. 11:13; Gal. 5:22, 23) Ubbabay injjetana gakkanaashin naagoppa. Ha alamiyan, nuussi ubbabay injjetana danddayenna. Nuuni ubbabay injjetana gakkanaashin naagikko, nu halchchuwaa mule polana danddayokko. Nu halchchidobay polanawu keehi metiyaaba milatiyo gishshawu hegaa polanawu keehi koyennan aggana danddayoos. Ne hanotay hegaadan gidikko, shaakkada guuttaa guuttaa oottana danddayay? Neeni loꞌꞌo eeshshay neessi deꞌanaadan halchchikko, koyro heeran guuttabata oottiyoogan hegaa bessana danddayaasa. Neeni kumetta Geeshsha Maxaafaa nabbabanawu halchchikko, amarida daqiiqaa nabbabanawu prograamiyaa kessiyoogan doommana danddayay? w23.05 29 ¶11-13

Ha wurssetta gallassatun nuuni ubbay ‘Geeshshatettaa Ogiyan’ aggennan hemettanaadan maaddanawu ayyaanaabaa qumaa ubbatoo giigissanaadan Yihooway ba dirijjitiyaa goꞌettees. (Isi. 35:8; 48:17; 60:17) Issi uri Geeshsha Maxaafaa xannaꞌiyoogaa doommidoy awude gidikkonne, ‘Geeshshatettaa Ogiyan’ hemettiyoogaa doommiis gaana danddayoos. Amaridaageeti guuttasaa hemettidi aaho ogiyaappe kiyidosona. Harati qassi bantta zawaa gakkanaashin aggennan hemettanawu murttidosona. He zaway aybee? ‘Geeshshatettaa Ogee’ saluwaa biyo hidootay deꞌiyoogeeta saluwan deꞌiya ‘Xoossaa gannatiyawu’ efees. (Ajj. 2:7) He aaho ogee saꞌaa laattiyo hidootay deꞌiyoogeeta, ubba asay wottiyoobi baynnaagaa gidiyo Kiristtoosa 1,000 layttaa haaruwaa wurssettawu efees. Neeni ha wodiyan he aaho ogiyan hemettaydda deꞌikko, guyye xeelloppa. Qassi ooratta alamiyaa gelin ne hemetay wurana gakkanaashin hemettiyoogaa aggoppa! w23.05 17 ¶15; 19 ¶16-18

Yihooway neessi oottido ubbabaa loytta qoppikko neeni A galatana, qassi nena awu sheedhdhana. (Maz. 116:12-14) Yihooway ‘loꞌꞌo imo ubbaanne kumetta woyto ubbaa’ Immiyagaa gidiyogaa Geeshsha Maxaafay yootees. (Yaaq. 1:17) He imota ubbaappe aadhdhiyagee A Naꞌaa, Yesuusa yarshshuwa. Ane hagaa qoppa! Wozoy neeni Yihoowara dabbotaa minttanaadan oottiis. Qassi I merinaa deꞌuwa hidootay neeyyo deꞌanaadan oottiis. (1 Yoh. 4:9, 10) Nena Yihoowawu sheedhdhiyogee I qonccissido aybippekka aadhdhiya siiquwa gishshawunne I nena anjjido ubbabaa gishshawu galatiyogaa bessiyo keehi loꞌꞌo oge.—Zaa. 16:17; 2 Qor. 5:15. w24.03 5 ¶8

Nuuni ha wodiyan deꞌiya asaa iita kandduwaa beꞌiyo wode Looxeegaadan nuussi siyettees. Saluwan deꞌiya nu Aaway iita kandduwaa ixxiyoogaa I eriyo gishshawu, ‘higgiyawu azazettenna shaaramuxiya asati oottiyooban I keehi unꞌꞌettiis.’ (2 PHe. 2:7, 8) Looxee Xoossaa wozanappe bonchchidonne siiqido gishshawu he wode deꞌiya asaa iita kandduwaa ixxiis. Nuunikka Yihooway kessido kandduwaa maaraa darin bonchchenna woy mule azazettenna asaa giddon deꞌoos. Hegaa malabay deꞌishinkka, nuuni nu Xoossaa loytti siiqiyo wodenne wozanappe A bonchchiyo wode kandduwan geeshsha gididi deꞌana danddayoos. Leemiso maxaafan deꞌiya minttettiya qofaa baggaara Yihooway nuuni kandduwan geeshsha gididi deꞌanaadan nuna maaddees. Ubba Kiristtaaneti attumaageeti, maccaageeti, yelagatinne cimatikka hegan deꞌiya loꞌꞌo zoriyaa pilggiyoogan loytti goꞌettana danddayoosona. Nuuni Yihoowawu yayyikko iitaa oottiyaageetuura laggetokko. w23.06 20 ¶1-2; 21 ¶5

Geella so asaappe nena yedetay gakkennan aggenna; woy Xoossaa Kawotettaa ne deꞌuwan kaseyanawu daro miishshaanne aquwa agga bayadasa. (Mat. 6:33) Yaanikko, Yihooway neeni awu oottido ubbabaa dogennaagaa ammanettana danddayaasa. (Ibr. 6:10) Yesuusi hagaadan giidi yootidobay tuma gidiyogaa ne deꞌuwan beꞌennan aggakka: “Taani intteyyo tumaa odays, tana kaalliyo gishshawunne mishiraachchuwa gishshawu keettaa woy ishata woy michchota woy aayyiyo woy aawaa woy naata woy gadiya aggida ooninne, asay naaqqishinkka, ha wodiyan keettata, ishata, michchota, aayota, naatanne gadiya 100 kushe dariyagaa demmana, qassi sinttappe yaana wodiyan merinaa deꞌuwa demmana.” (Mar. 10:29, 30) Neeni demmido anjjoy ne agga bayido ubbabaappe keehi aadhdhees.—Maz. 37:4. w24.03 9 ¶5

Yihudan deꞌiya Kiristtaaneti keehi namisettido wode, Anxxookiyaa gubaaꞌiyan deꞌiya ishantti “bantta wolqqaa keenaa miishshaa peeridi, Yihudan de7iya bantta ishanttussi maaduwaa yeddanau qofaa qachchidosona.” (Oos. 11:27-30) Namisan qohettida ishantti deꞌiyoy haahosan gidikkokka, Anxxookiyaa Kiristtaaneti eta maaddanawu qofaa qachchidosona. (1 Yoh. 3:17, 18) Ha wodiyan nu mala Kiristtaaneti daafaban qohettidoogaa eriyo wode, nuunikka qarettiyoogaa bessana danddayoos. Geella nuuni oottana danddayiyoobay deꞌiyaakkonne cimata oychchiyoogan, kumetta saꞌan oosettiya oosuwawu miishshaa immiyoogan woy daafaban qohettidaageetussi woossiyoogan sohuwaara maaddoos. Deꞌuwawu koshshiyaabaa demmanawu nu ishanttussinne michchonttussi maadoy koshshana danddayees. Nu Kawoy, Kiristtoos Yesuusi asaa pirddanawu yiyo wode nuuni qarettiyoogaa akeekidi ‘Kawotettaa laattite’ giidi nuna shoobbanaadan koyoos.—Mat. 25:34-40. w23.07 4 ¶9-10; 6 ¶12

Yesuusi hanotaadan haniyoogan Yihoowa milatiis. I ‘bayida dorssawu, Israaꞌeela asawu’ sabbakanaadan ha saꞌaa kiitettiis. Gidoppe attin, I asawu sabbakido wode hanotaadan haniyoogaa bessiis. Leemisuwawu, Israaꞌeela asa gidenna issi maccaasiyaa ‘xalahee pala ohetta oyqqido’ ba naꞌiyo pattanaadan Yesuusa mintta woossaasu. Yesuusi qarettidi he maccaasiyaa oychchidoogaadan I naꞌiyo pattiis. (Maa. 15:21-28) Ane hara leemisuwaa beꞌa. Yesuusi haggaazuwaa doommido wode hagaadan giis: “Tana kaddiya oonanne taanikka . . . a kaddana.” (Maa. 10:33) Yaatin heezzutoo A kaddida Pheexiroosa I kaddidee? Chii, kaddibeenna. Pheexiroosi ba oottidoban keehi azzanidoogaanne ammanettida asa gidiyoogaa Yesuusi eriis. Yesuusi hayquwaappe denddi simmidi Pheexiroosawu qoncciis, qassi awu atto giidoogaanne A siiqiyoogaa yootennan aggenna. (Luq. 24:33, 34) Xoossaa Yihoowaynne Yesuus Kiristtoosi hanotaadan haniyageeta. Nuuni shin? Yihooway nuunikka hanotaadan hananaadan koyees. w23.07 21 ¶6-7

Xoossay Gannatiya ehaanawu gelido qaalaa polanaagaa siriya asatussi nu ay yootana danddayiyoo? Koyruwan, he qaalaa geliday Yihoowa. Ajjuutaa maxaafay hagaadan gees: “Araatan uttidaagee, ‘Taani ubbabaa ooraxissais’ yaagiis.” Ba gelido qaalaa polanawu Yihoowayyo aadhdhida eratettay, wolqqaynne koshshaykka deꞌees. Naaꞌꞌanttuwan, Yihooway I qaalaa gelidobay polettennan attennaagaa erees. I hagaadan giidoy hegaassa: “Taani haasayiyoogee ammanettiyaagaanne tuma. . . . Polettiis.” Heezzanttuwan, Yihooway issibaa oottiyogaa doommikko polennaadan A teqqana danddayiyabi baawa. I “Taani Alifaanne Omeegaa” yaagidoy hegaassa. (Ajj. 21:6) Yihooway yaatiyogan Seexaanay worddanchcha gidiyogaa bessana; Yihooway ba halchchuwa polennaadan Seexaanay diggana danddayenna. Shin issi uri, “Hagee mule polettana danddayennaba,” giikko Ajjuutaa 21:5, 6 nabbabada qonccissa. Yihooway sanadiyan paramiyogaadan, qaalaa gelidobay polettanaagaa nu ammanettanaadan woygidaakko bessa.—Isi. 65:16. w23.11 7 ¶18-19

Abrahaami naꞌa yelennan ayyo layttay 75 gidido wode, Yihooway hagaa qaalaa geliis. Abrahaami Yihooway yootidobay polettishin beꞌidee? Ubbabay polettishin beꞌibeenna. Abrahaami Efiraaxiisa SHaafaa pinni simmidi, 25 layttaa naagidi A naꞌay Yisaaqi maalaaliya hanotan yelettin beꞌiis; qassi 60 layttaappe guyyiyan A naꞌaa naati Eesawinne Yaaqoobi yelettidosona. (Ibr. 6:15) SHin Abrahaami A zerettati gita kawotetta gididoogaanne Hidootaa Biittaa laattidoogaa mule beꞌibeenna. Gidoppe attin, he ammanettida bitanee bana medhdhidaagaara dabbotaa minttiis. (Yaaq. 2:23) Abrahaami hayquwaappe denddiyo wode, A ammanuwaanne danddayaa gaasuwan ha saꞌaa kawotetta ubbay anjjettidoogaa eridi keehi ufayttana! (Doo. 22:18) Hegaappe nu ay tamaariyoo? Nuuni Yihooway gelido qaala ubbay ha wodiyan polettin beꞌennan aggana danddayoos. SHin nuunikka Abrahaamaagaadan danddayanchcha gidikko, Yihooway ha wodiyaaninne I qaalaa gelido ooratta alamiyan nuna darissidi woytanaagaa ammanettana danddayoos.—Mar. 10:29, 30. w23.08 24 ¶14

Kawuwaa Ooziyaani yelagatettan deꞌiyo wode bana ziqqi oottiya asa. I ‘tumu Xoossawu yayyiyoogaa’ tamaariis. Ooziyaani 68 layttaa deꞌiis, qassi A deꞌo layttan darotoo Yihooway A anjjiis. (2 Odi. 26:1-4) Ooziyaani morkketuppe darota xooniisinne Yerusalaame qohettennaadan loytti naagiis. (2 Odi. 26:6-15) Ooziyaani he ubbabaa oottanaadan Xoossay A maaddido gishshawu ufayttidoogee qoncce. (Era. 3:12, 13) Kawuwaa Ooziyaani darotoo harata azazees. Geella hegee I Yihoowa azazuwaa azazettana koshshenna giidi qoppanaadan oottennan aggenna. Issi galla Ooziyaani Yihoowa beeta maqidasiyaa gelidi otoruwan ixaanaa cuwayiyoosan ixaanaa cuwayanawu maliis, hegee kawoti oottanaadan paqqadettibeennaba. (2 Odi. 26:16-18) Qeese Ubbatu Halaqay Azaariyaasi A zorido gishshawu, Ooziyaani keehi hanqqettiis. Azzanttiyaabay, Ooziyaani ammanettidi deꞌibeenna gishshawu, Yihooway A gogaa harggiyan qaxxayiis. (2 Odi. 26:19-21) I ubbatoo bana ziqqi oottidaba gidiyaakko A deꞌoy ayba loꞌꞌo gidaneeshsha! w23.09 10 ¶9-10

Kiitettida Pheexiroosi tiyettida Kiristtaane gidi simmidikka, ba shugo miyyiyaa xoonanawu baaxetana koshshiis. Xoossay Pheexiroosa Ayhuda gidenna Qornneliyoosakko 36 M.Ln kiittiis. Xoossay yan Qornneliyoosa geeshsha ayyaanan tiyiis; hegee ‘Xoossay asa somꞌꞌo xeellennaagaanne’ Ayhuda gidennaageeti Kiristtaane gubaaꞌe yara gidana danddayiyoogaa qoncciyan bessiyaaba. (Oos. 10:34, 44, 45) Hegaappe simmin Pheexiroosi Ayhuda gidenna asatuura qumaa miyoogaa doommiis; hegee I kase mule ootti erennabaa. Shin amarida Ayhuda Kiristtaaneti, Ayhudatinne, Ayhuda gidennaageeti issippe maana koshshenna giidi qoppidosona. Hegaadan qoppiya amaridaageeti Anxxookiyaa yiido wode, Pheexiroosi Ayhuda gidenna ba ishanttuura qumaa miyoogaa aggiis. I yaatidoy Ayhuda Kiristtaaneta hanqqetissennaadan yayyido gishshawu gidennan aggenna. Kiitettida Phawuloosi Pheexiroosi oottidobaa beꞌidi haratu ubbaa sinttan A seeriis. (Gal. 2:13, 14) Hegaadan baliiddikka Pheexiroosi ammanettidi deꞌiis. w23.09 22 ¶8

Neeni nena loytta qoriyoogee ne shugo miyyiyaa neeni akeekanaadan oottana danddayikkonne, hidootaa qanxxoppa. “Godai [Yesuusi] keha” gidiyo gishshawu neeni hegaa giigissanaadan maaddana. (1 PHe. 2:3) Kiitettida Pheexiroosi hagaadan giis: ‘Xoossay ba huuphen nena loyttananne minttana. Qassi I nena wolqqanttana.’ Pheexiroosi koyro heeran Yesuusaara issippe gidiyoogee awu bessennabadan qoppiis. (Luq. 5:8) Shin, Yihoowaynne Yesuusi siiquwan maaddido gishshawu Pheexiroosi ammanettidi Yesuusa kaalliis. Yaatiyo gishshawu, Pheexiroosi “Nu Godaanne nuna ashshiya Yesuus Kiristtoosa merinaa kawotettaa geliyo” maataa demmiis. (2 PHe. 1:11) Hegee keehi ufayssiya anjjo! Neeni Pheexiroosaagaadan ammanettada deꞌikko, qassi Yihooway nena loohissanaadan eeno giikko, neenikka merinaa deꞌuwaa woytuwaa demmana. Neeni ‘ne ammanuwawu polo gidiya ne shemppuwaa atotettaa ekkana.’—1 PHe. 1:9. w23.09 31 ¶16-17

Beni dunkkaaniyan issi dabaabay deꞌees, hegee direttida aaho soho; yan qeeseti bantta aawatettaa poloosona. Naasiyappe merettida, xuuggiyo yarshshuwa yarshshiyosaynne qeeseti bantta oosuwa polanaappe kase meecettanawu goꞌettiyo naasiyappe oosettida meechcha keree dabaaban deꞌees. (Kes. 30:17-20; 40:6-8) Ha wodiyan Tiyettida ishanttuppe attidaageeti saꞌan deꞌiya ayyaana beeta maqidasiya giddo dabaaban ammanettidi haggaazoosona. Xoossaa dunkkaaniyan deꞌiya meechcha keree etikka, ubba Kiristtaanetikka kandduwaninne ayyaanaaban geeshsha gididi deꞌanaadan hassayissees. Yaatin ‘zawi baynna daro asay’ Yihoowawu awan goynnanee? Eti “Xoossaa kawotaa araataa sinttan eqqidi,” “qamminne gallassi a Beeta Maqidasiyan [Xoossaayyo]” oottiyogaa kiitettida Yohaannisi beꞌiis; eti hegaadan oottiyoy saꞌan deꞌiya kare dabaabaana. (Ajj. 7:9, 13-15) Yihooway ayyaana beeta maqidasiyan nuuni ayyo goynniyo gita maataa immido gishshawu A keehi galatoos! w23.10 28 ¶15-16

Yihooway cimatu baggaara nuna minttettees. (Isi. 32:1, 2) Yaakko neeni unꞌꞌettiyo wode, nena qofissidabaa cimatuyyo yoota. Cimatu maaduwa ekkanawu mammottoppa. Yihooway eta baggaara nena minttettana danddayees. Geeshsha Maxaafay yootiyo nu hidootay merinawu saluwan deꞌiyogaa woy gannate saꞌan merinawu deꞌiyoogaa gidin nuna minttettana danddayees. (Roo. 4:3, 18, 19) Nu hidootay nuuni metuwa genccanaadan, mishiraachchuwa sabbakanaadaaninne gubaaꞌiyan dumma dumma aawatettaa polanaadan nuussi wolqqaa immees. (1 Tas. 1:3) He hidootay kiitettida Phawuloosikka minnanaadan maaddiis. I ‘unꞌꞌettiis, siriis, yedetettiis,’ qassi harati A “oli bayidosona.” Qassi I hayqqiichchi attiis. (2 Qor. 4:8-10) Phawuloosi ba hidootaa ubbatoo qoppido gishshawu genccanawu minotettaa demmiis. (2 Qor. 4:16-18) Phawuloosi ubbatoo saluwan demmana merinaa deꞌuwa hidootaabaa qoppiis. Phawuloosi he hidootaa wotti dentti qoppidoogee A qofay ‘gallassi gallassi ooraxxanaadan’ oottiis. w23.10 15-16 ¶14-17

Woossiyo wode hagee Yihooway ne woosaa zaariyo wodekkonne qoppa. Nu woosawu sohuwara zaaruwa demmana koshshiyabadan qoppana danddayoos. Shin, Yihooway nuna maaddanawu keehi loꞌꞌo wodiya eriyogee tuma. (Ibr. 4:16) Nuuni woossidobaa sohuwara demmana xayikko, ‘Yihooway zaaranawu koyibeenna’ giidi qoppana danddayoos. Shin ‘I zaariyo wodee gakkibeennaba’ gidana danddayees. Leemisuwawu, issi yelaga ishay ba harggiyappe paxanawu woossiis. Shin awu harggee kehibeenna. Yihooway maalaalissiya ogiyan A pattiyakko, Seexaanay he ishay Yihoowawu haggaaziyogaa aggibeennay Yihooway A pattido gishshassa giidi yootana danddayees. (Iyy. 1:9-11; 2:4) Qassi Yihooway hargge ubbaa xayssiyo wodiya keeri uttiis. (Isi. 33:24; Ajj. 21:3, 4) He wode gakkanaashin, Yihooway nuna maalaalissiya ogiyan pattanaadan naagokko. Yaatiyo gishshawu, he ishay wolqqaanne sarotettaa demmidi ba sahuwa genccanawunne ubbatoo Xoossawu ammanettidi haggaazanawu Yihoowa woossana danddayees. w23.11 24 ¶13

Samssooni gita mooruwaa moorikkonne hidootaa qanxxibeenna. I Pilisxxeematuura olettanawu gaasuwaa koyiis; hegee I oottanaadan Yihooway koyiyooba. (Daan. 16:28-30) Samssooni, ‘Pilisxxeematu bolli haluwaa taani kessanaadan tana minttarkkii!’ giidi Yihoowa mintti woossiis. Tumu Xoossay Samssoona woosaa siyidi I dumma wolqqaa zaaretti demmanaadan oottiis. Hegaappe denddidaagan, Samssooni he wode worido Pilisxxeema asay I kase worido asaappe keehi dariis. Samssooni balidobay keehi azzanttiyaabaa kaalettikkokka, I Yihooway koyiyoobaa oottanawu baaxetiyoogaa aggibeenna. Nuuni balikkokka, nuussi zoree imettikkokka woy maatay nuuppe halikkokka, hidootaa qanxxana koshshenna. Yihooway nuuyyo atto gaanawu giigi uttidoogaa hassaya. (Maz. 103:8, 9) Nuuni balikkonne, Yihooway Samssoonawu oottidoogaadan A sheniyaa polanaadan nuuyyo wolqqaa immana danddayees. w23.09 6 ¶15-16

Neeni gencciyo wode Yihoowan sabettaasa. Hegaa giyogee neeni waayettiyogan Yihooway ufayttees giyogaa gidenna. Neeni ammanettada gencciyo gishshawu I ufayttees giyogaa. Nuuni gencciyogan Yihooway ufayttiyogaa eriyogee keehi minttettiyaba! (Maz. 5:12) Abrahaami paaciya genccidoogaanne I Yihoowan sabettidoogaa hassaya. Yihooway A ba dabbodan xeelliisinne xillo asadan qoodiis. (Doo. 15:6; Roo. 4:13, 22) I nunakka aagaadan xeellana danddayees. Yihooway nunan ufayttiyoy nuuni awu oottidoban woy nuussi deꞌiya maatan gidenna. Waayiya ammanettidi gencciyo wode Yihooway nunan ufayttees. Qassi nu layttay, nu hanotay woy nu eray ayba gidikkonne nuuni ubbay genccana danddayoos. Neeni haꞌꞌi waayiya gencciyogan Yihoowawu ammanettada deꞌay? Yaatikko, Yihooway ufayttiyogaa hassaya. Xoossay nunan ufayttidoogaa akeekiyo wode nuuni hidootan naagido anjjota demmanaagaa eroos. w23.12 11 ¶13-14

Issi Kiristtaane ishay haratuura loytti haasayiyagaa gidana koshshees. Hegaa giyogee I haratu qofaa ezggananne akeekana koshshees giyogaa. (Lee. 20:5) I hara asay haasayiyo ogiya, somꞌꞌuwan beettiyabaanne hanotaa akeekana danddayees. Asaara wodiya issippe aattennaba gidikko, hegaadan oottana danddayekketa. Intte darotoo asaara gayttanawu imeeliya woy kiitaa xaafiyabanne hara elektiroonike miishshata goꞌettiyaba gidikko, asaara issisan gayttidi haasayanawu metootana danddayeeta. Yaatiyo gishshawu, asaara issisan gayttidi haasayanawu baaxetite. (2 Yoh. 12) Qassi issi kayma Kiristtaanee baassinne ba so asawu koshshiyabaa kunttana bessees. (1 Xim. 5:8) Ooso demmanawu maaddiya hiillaa tamaariyogee awudekka loꞌꞌo. (Oos. 18:2, 3; 20:34; Efi. 4:28) Minni oottitenne doommidobaa polite; yaatiyo wode harati hegaa akeekananne intte oosuwa nashshana. Intte yaatikko, oosuwa demmananne oosuwan takkana danddayeeta. w23.12 27 ¶12-13

Geeshsha Maxaafay ‘Yihoowa gallassaa’ yootiyo wode, Yihooway ba morkketa xayssiyoonne ba asaa ashshiyo wodiyaa qonccissees. Beni wode, Yihooway amarida dereta qaxxayiis. (Isi. 13:1, 6; Hiz. 13:5; Sof. 1:8) Ha wodiyan, ‘Yihoowa gallassay’ Gita Baabilooni xayuwan doommidi Armmageedoona olan kuuyettees. He ‘gallassan’ attanawu nuuni haꞌꞌi giigettana koshshees. Qassi nuuni ‘gita waayiyawu’ “giigi uttana” koshshiyoogaa Yesuusi tamaarissiis, hegee aggennan oottana bessiyaabaa qonccissees. (Maa. 24:21; Luq. 12:40) Kiitettida PHawuloosi Tasalonqqen deꞌiya Kiristtaanetuyyo ayyaanay kaalettin xaafido koyro dabddaabbiyan eti Yihoowa pirddaa gallassawu giigi uttanaadan maaddanawu amarida leemisota goꞌettiis. PHawuloosi Yihoowa gallassay he wode yeennaagaa erees. (2 Tas. 2:1-3) Gidikkonne, I ba ishantti he gallassay wontto yiyaabadan qoppidi giigettanaadan zoriis, qassi nuunikka he zoriyaa oosuwan peeshshana danddayoos. w23.06 8 ¶1-2

Jaappaanen Tookkiyon, 1978n keehi adussa pooqee gimbbettiis. He kataman darotoo biittay qaaxxiyo gishshawu asay hegee kunddennan waani minni eqqidee giidi qoppees. Kunddennan minni eqqanaadan oottidabay aybee? He pooqee biittay qaaxxiyo wode kunddenna mala keehi minonne hegaa mala wodetun aynne hanennaadan oottidi manddiiseti gimbbidoogaa. Kiristtaaneti he pooqiyaa mala. Aybin? Issi Kiristtaanee minni eqqidaagaanne hanotaadan haniyaagaa gidana bessees. I mino gidana koshshees, qassi Yihoowa higgetanne I kessido maarata ubbatoo azazettanawu murttidaagaa gidana bessees. I ‘ero giyaagaanne’ Yihoowawu ammanettiyaagaa. Hara baggaara qassi danddayettiyo woy koshshiyo wode I ‘ashkke’ woy hanotaadan haniyaagaa gidana bessees. (Yaaq. 3:17) Bessiyaagaadan qoppiya issi Kiristtaanee zozza gidenna woy maaraa xaasayi xeellenna. w23.07 14 ¶1-2

Yesuusi Seexaanaa Dabloosa eqettana koshshiis; Seexaanay Yesuusi nagaraa oottanaadan paacciisinne ammanettiyogaa agganaadan yootiis. (Mat. 4:1-11) Seexaanay Yesuusa nagaran yegganawu murttiis; gaasoykka Yesuusi nagaraa oottikko wozuwa qanxxana danddayenna. Yesuusi saꞌan haggaaziyo wode hara paaciyakka gencciis. A morkketi A bolli yedetaa gattidosonanne woranawu malidosona. (Luq. 4:28, 29; 13:31) I bana kaalliyageetu balaakka danddayana koshshiis. (Mar. 9:33, 34) Yesuusi shilootan eqqido wode harati A barchcheyidosonanne boridosona. Hegaappe simmin eti A keehi tuggayidinne kawushshidi woridosona. (Ibr. 12:1-3) I bana gakkida wurssetta waayiya Yihoowa naagoy baynnan genccana koshshiis. (Mat. 27:46) Yesuusi bana wozo oottidi immanawu keehi waayettidoogee tuma. I ba dosan nuussi oottido ubbabaa nuuni qoppiyo wode A wozanappe siiqoos. w24.01 10-11 ¶7-9

Danddayay nuuni haratuura loytti laggetanaadan maaddees. Danddayay harati haasayiyo wode nuuni loytti ezgganaadan maaddees. (Yaaq. 1:19) Danddayay nuuni haratuura sarotettan deꞌanawukka maaddees. Nuuni danddayanchcha gidikko, unꞌꞌettiyo wode issibaa eesuwaara oottokko, qassi iitabaa haasayokko. Nuussi he eeshshay deꞌikko issi uri nuna qohiyo wode eesuwaara hanqqettokko. Nuuni haluwaa kessennan aggidi ‘issoy issuwawu atto yaagoos.’ (Qol. 3:12; Efi. 4:32) Danddayay nuuni loꞌꞌobaa kuuyanaadankka maaddana danddayees. Dirbbiyoogaappe woy eesotiyoogaappe nuuni doorana danddayiyoobaa wodiyaa bazzi pilggidi, kehiyaagaa doorana koshshees. Leemisuwawu, nuuni ooso koyiiddi deꞌiyaaba gidikko kaseti demmido oosuwaa oottanawu koyana danddayoos. Gidoppe attin, nuuni danddayanchcha gidikko ha oosoy nu soo asaanne nuuni Yihoowaara dabbotido dabbotaa waati qohiyaakko qoppoos. Nuuni danddayanchcha gidiyoogan iitabaa kuuyiyoogaappe naagettana danddayoos. w23.08 22 ¶8-9

Neeni iita amuwa eqettana koshshiyo gishshawu hidootaa qanxxiyaba gidikko, neeni nena Yihoowawu sheedhdhiyo wode gelido qaalaa loytta qoppiyogee paacciyabaa eqettanawu neeni murttido murttiya minttees. Waatidi? Neeni nena Yihoowawu sheedhdhiyo wode nena agga bayaasa. Hegaa giyogee Yihoowa ufayssenna koshshaanne halchchuwa ixxaasa giyogaa. (Mat. 16:24) Yaatiyo gishshawu nena paacee woy metoy gakkiyo wode neeni waatanaakko hirggana koshshenna. Neeni oottanabaa kasetada kuuyadasa, hegeekka Yihoowawu ammanettada deꞌanawu kuuyido kuushsha. Neeni Yihoowa ufayssanawu ubbatoo murttadasa. Neeni Iyyooba leemisuwa kaallana danddayaasa. Keehi waayissiyabay A gakkikkokka, I hagaadan giis: ‘Taani suure gidiyogaa aggikke.’—Iyy. 27:5. w24.03 9 ¶6-7

“Siiqo Xoossai,” Yihooway nunaara deꞌees! (2 Qor. 13:11) I nu ubbawu qoppees. Nuna ‘aggenna A siiqoy dooddanaagaa’ ammanettoos. (Maz. 32:10) I nuna keehi siiqiyogaa nu loytti qoppiyo wode I nuussi keehi qoppiyogaanne akko keehi shiiqidoogaa akeekoos. Yayyennan A woossananne A siiqoy nuussi keehi koshshiyogaa ayyo yootana danddayoos. I nu hanotaa akeekiyogaanne nuna maaddanawu giigi uttidoogaa nu ammanettiyo gishshawu nuna qofissiya ubbabaa ayyo yootana danddayoos. (Maz. 145:19) Meeggiya gallassi nuna hoꞌꞌettiya tamaagaadan, metoynne waayee gakkiyo wode Yihoowa siiqoykka nuna minttettana danddayees. Yaatiyo gishshawu minttettuwanne sarotettaa demmanaadan oottiya Yihoowa siiquwan ufaytta. I nena siiqiyogaadan neenikka, “Taani GODAA siiqais” gaana danddayaasa!—Maz. 116:1. w24.01 31 ¶19-20

Yesuusi Xoossaa sunttay Yihoowa gidiyogaa asawu yootiyogaappe aadhdhiyabaa oottiis. Yesuusi tamaarissido Ayhudati Xoossaa sunttaa kasekka eroosona. Shin Yesuusi ‘abaa markkattiyogan’ keehi loꞌꞌo leemiso. (Yoh. 1:17, 18) Leemisuwawu, Ibraawettuwan Xaafettida Geeshsha Maxaafay Yihooway maariyanne qarettiya Xoossaa gidiyogaa qonccissees. (Kes. 34:5-7) Yesuusi bayida naꞌaabaanne aawaabaa yootido leemisuwan hegaa kaseegaappe aaruwan qonccissiis. Aaway soo simmida ba naꞌaa beꞌidi “I biron haahuwan de7ishin,” akko woxxidi biidi A qoommidoogaanne awu wozanappe atto giidoogaa nuuni nabbabiyo wode Yihooway maariyagaanne qarettiyagaa gidiyogaa loytti akeekoos. (Luq. 15:11-32) Yihooway ay mala Xoossakko akeekanaadan Yesuusi harata maaddiis. w24.02 10 ¶8-9

Yihooway unꞌꞌettidaageeta gazddisseesinne minttettees. Haratussi qarettiyogaaninne eta minttettiyogan Yihoowa leemisuwa waati kaallana danddayiyoo? Nuuni yaatana danddayiyo issi ogee, haratussi qarettanawunne eta minttettanawu maaddiya eeshshati nuussi deꞌanaadan baaxetiyogaa. He eeshshatuppe amaridaageeti awugeetee? Nuuni ubba galla siiqettanaadaaninne ‘issoy issuwa minttettanaadan’ aybi maaddanee? (1 Tas. 4:18) Nuuni qarettiyageeta, ishanttudan siiqettiyageetanne kehiyageeta gidana koshshees. (Qol. 3:12; 1 PHe. 3:8) Ha eeshshati nuna waati maaddiyonaa? Nuuni nu ishanttussi qarettiyabanne wozanappe etawu qoppiyaba gidikko, waayee eta gakkiyo wode loytti minttettoos. Yesuusi giidoogaadan, “doonai wozana giddon kumidabaa haasayees. Lo77o asi ba lo77o minjjaappe lo77obaa kessees.” (Maa. 12:34, 35) Maadoy koshshiyo nu ishanttanne michchontta minttettiyogee nuuni eta siiqiyogaa bessiyo keehi loꞌꞌo oge. w23.11 10 ¶10-11

Nuuni Geeshsha Maxaafaa hiraagaa akeekanawu maaduwaa oychchana koshshees. Ha leemisuwaa beꞌa. Neeni erenna issi sohuwaa baydda deꞌiyaabadan qoppa, shin nenaara biya ne laggee he sohuwaa loytti erees. Neeni deꞌiyo sohuwaanne oge ubbay awa efiyaakko I erees. Ne laggee nenaara baanawu maayettidoogan ne ufayttanaagee qoncce. Yihooway maaddiya he laggiyaa mala. I nu sinttanaabaa loytti erees. Hegaa gishshawu, nuuni Geeshsha Maxaafaa hiraagaa akeekanawu nuna ziqqi oottidi Yihooway nuna maaddanaadan oychchana koshshees. (Dane. 2:28; 2 PHe. 1:19, 20) Loꞌꞌo aawaagaadan, Yihooway ba naati sinttappe ufayssiya deꞌuwaa deꞌanaadan koyees. (Erm. 29:11) SHin aawaagaappe dumma hanotan Yihooway sinttappe hananabaa nuussi yootana danddayees, qassi I ubbatoo likke. Gitabati polettanaappe kase nuuni eranaadan Yihooway hiraagati ba Qaalan xaafettanaadan oottiis.—Isi. 46:10. w23.08 8 ¶3-4