Isiine

Yesuusi oottido maalaalissiyaabata gujjin, I haasayidonne oottido ubbabay I ba Aawaa qofaa wottiyoobi baynna hanotan qonccissiyoogaa hassaya. (Yoh. 14:9) Yesuusi oottido malaalissiyabatuppe ay tamaariyoo? Yesuusinne A Aaway nuna keehi siiqoosona. Yesuusi saꞌan deꞌiyo wode metootidaageeta maaddanawu maalaalissiyaabaa oottiyo wolqqaa goꞌettiyoogan asaa keehi siiqiyoogaa bessiis. Issi wode, ayfee xeellenna naaꞌꞌu asati Yesuusi eta maaddanaadan mintti woossidosona. (Maa. 20:30-34) Yesuusi “etau qarettidi” eta pattidoogaa akeeka. Yesuusi wozanappe qarettidoogee I namisettidaageeta mizanaadaaninne inchchirichchay oyqqido bitaniyaa pattanaadan oottiis; hegee asaa I keehi siiqiyoogaa bessees. (Maa. 15:32; Mar. 1:41) ‘Qarettiya’ Xoossaa Yihoowaynne A Naꞌay nuna keehi siiqiyoogaanne eti nu waayiyan azzaniyoogaa ammanettana danddayoos. (Luq. 1:78; 1 Phe. 5:7) Eti asaa gakkiya qohuwaa ubbaa xayssanawu yeemuwan naagoosona! w23.04 3 ¶4-5

Seexaanaa alamiyan daro asay qoppiyo bala qofaa nabbabiyoogaappenne siyiyoogaappe naagettanawu nuussi danddayettida keenaa baaxetana danddayoos. Nuuni Geeshsha Maxaafaa nabbabiyoogaaninne xannaꞌiyoogan loꞌꞌobaa qoppana danddayoos. Qassi shiiqota shiiqiyoogeenne haggaaziyoogee nuuni qoppiyooban naagettanaadan oottees. Nuuni danddayiyoogaappe aaruwan paacettanaadan paqqadennaagaa Yihooway qaalaa geliis. (1 Qor. 10:12, 13) Nuuni ubbay ha waayissiya gallassatun Yihoowayyo ammanettidi deꞌanawu kaseegaappe aaruwan woossana koshshees. Yihooway nuuni woossiyo wode ‘nu metuwa awu yootanaadan’ koyees. (Maz. 62:8) I oottiyo ubbabaa gishshawu Yihoowa sabba, qassi A galata. Haggaazuwan xala gidanawu maaddanaadan A woossa. Nena gakkiya meto ubbaa genccanawunne paace ubbaa eqettanawu maaddanaadan A mintta woossa. Neeni ubbatoo Yihoowa woossiyoogaa aybinne woy ooninne teqqanaadan oottoppa. w23.05 7 ¶17-18

Nuuni gubaaꞌe shiiqota shiiqiyoy aybissee? Waanna gaasoy, Yihoowa sabbanaassa. (Maz. 26:12; 111:1) Qassi ha wayssiya wodiyan nuuni issoy issuwaa minttettanawukka shiiqota shiiqoos. (1 Tas. 5:11) Nuuni shiiqotun qofaa yootiyo wode he naaꞌꞌubatakka oottoos. SHin qofaa yootanawu nuuni metootanaadan oottana danddayiyaabati deꞌoosona. Nuuni qofaa yootanawu yayyana danddayoos woy gujjidi qofaa yootanawu koyikkonne, issi issitoo ishantti nuuni kushiyaa denttiyo wode nuna oychchennan aggana danddayoosona. Nuna aybi maaddana danddayii? PHawuloosi nuuni ubbatoo “issoi issuwaa” minttettana koshshiyoogaa odiis. Nu ammanuwaabaa qonccissiya qantta qofaa yootiyoogeekka harata minttettana danddayiyoogaa hassayikko, nuuni kushiyaa denttidi zaaranawu darin yayyennan aggana danddayoos. Nuuni darotoo zaarana xayikkonne, gubaaꞌiyan deꞌiya harati zaaridoogan ufayttana danddayoos.—1 PHe. 3:8. w23.04 20 ¶1-3

Kawoy erissuwaa yootiis! Baabiloonen 70 gidiya layttawu omooduwan takkida Ayhudati laꞌa kiyidi bantta biittaa Israaꞌeela guyye simmidosona. (Izi. 1:2-4) Hegaa oottana danddayiyay Yihoowa xalaala. Baabilooneti omooddidoogeeta coo laꞌa kessi erokkona. (Isi. 14:4, 17) SHin Baabiloone kawotettay kunddin ooratti kawo gididaagee Ayhudati kiyidi baana danddayiyoogaa yootiis. Ubba Ayhudati, ubba qassi so asaa ayssiyaageeti Baabilooneppe kiyanawu woy yan takkanawu kuuyana koshshiis. Hegee kuuyanawu keehi deexxiyaaba gidana danddayees. Adussa ogiyaa hemettanawu daroti keehi cimennan aggokkona. Qassi Ayhudatuppe daroti Baabiloonen yelettido gishshawu yaappe hara sohuwan mule deꞌi erokkona. Eti Israaꞌeela biittaa bantta mayzza aawati deꞌido biittadaanappe attin, bantta biittadan qoppokkona. Amarida Ayhudati Baabiloonen keehi duretennan aggokkona; hegaa gishshawu injjetiya bantta keettaa woy bantta oosuwaa aggiyoogeenne meezetibeenna biittan deꞌanaagee etassi metiyaaba gidana danddayees. w23.05 14 ¶1-2

Xoossaa Qaalay nuuni ubbatoo genccanaadan, qarettanaadaaninne siiqanaadan minttettees. Luqaasa 21:19y hagaadan gees: “Danddayan intte intte shemppuwaa ashshana.” Qolasiyaasa 3:12y hagaadan gees: “Qaretaa . . . maayite.” Qassi 1 Tasalonqqe 4:9, 10y hagaadan gees: “Intte intte huuphen issoi issuwaa siiqanaadan, Xoossai inttena [tamaarissiis.] . . . SHin nu ishatoo intte, hegaappe gujji gujjidi eta siiqana mala, inttena woossoos.” Ha xiqiseti xaafettidoy kasekka gencciya, qarettiyaanne siiqiya erissiyo ashkkaratussa. SHin, eti ubbatoo he eeshshata bessana koshshiis. Nuunikka yaatana koshshees. Hegawu nena maaddana mala, beni Kiristtaaneti ha eeshshata waati bessidaakko pilggoos. Yaatida he erissiyo ashkkaratu leemisuwaa neeni waata kaallana danddayiyaakko, qassi gita waayiyawu neeni waana giigetta uttanaakko beꞌa. Yaatikko, gita waayee doommiyo wode neeni waata genccanaakko erana, qassi aggennan genccanawu murttana. w23.07 3 ¶4, 8

Nuuni tiyettidaageeta woy ‘hara dorssata’ gidin, ‘Geeshshatettaa Ogiyan’ aggennan hemettana koshshees. Hegee nuuni ayyaanaabaa gannatiyan deꞌanaadaaninne Kawotettay sinttappe ehaana anjjota demmanaadan oottana. (Yoh. 10:16) Daro miiloone attuma asati, macca asatinne naati 1919 M.Lppe doommidi worddo haymaanootiyaa xaaxa waaxa qonccissiya Gita Baabiloonippe kiyidi leemiso hanotan odettida ogiyan hemettiyoogaa doommidosona. Ayhudati Baabilooneppe aggidi kiyido wode, ogiyan eta xubbiyaabay xayidoogaa Yihooway akeekiis. (Isi. 57:14) Ha wodiyan deꞌiya ‘Geeshshatettaa Ogee’ shin? Yihooway 1919​ppe kase deꞌiya daro xeetu layttatun Gita Baabiloonippe kiyiyo ogiyaa giigissanaadan maaddanawu Xoossawu yayyiya asata goꞌettiis. (Isiyaasa 40:3​ra gatta xeella.) Eti suure wozanay deꞌiyo asay guyyeppe worddo haymaanootiyaappe kiyidi Yihoowa asaara awu goynnanaadan koshshiyaabaa oottidosona. w23.05 15-16 ¶8-9

Yihooway nuuni eeno giidi ufayssan awu haggaazanaadan koyees. (2 Qor. 9:7) Yaatin nuuni ayyaanaabaa halchchuwaa polanawu koyennaba gidikko, hegaa polanawu baaxetana koshshii? Kiitettida PHawuloosa hanotaa qoppa. I hagaadan giis: “Ta bollaa yimppada haarissais.” (1 Qor. 9:25-27) PHawuloosi Yihooway koyiyoobaa oottanawu koyibeenna wodekka bana seeridi hegaa oottiis. PHawuloosa haggaazuwan Yihooway ufayttidee? Ee, ufayttiis! Qassi I baaxetido gishshawu Yihooway A anjjiis. (2 Xim. 4:7, 8) Hegaadankka, nuuni nu halchchuwaa polanawu keehi koyenna wodetunkka hegaa polanawu baaxetiyoogaa Yihooway beꞌidi ufayttees. Nuuni oottiyoobaa ubbatoo dosennan aggana danddayikkonne, hegaa nuuni A siiqidi oottiyoogaa I eriyo gishshawu ufayttees. Yihooway PHawuloosa anjjidoogaadan nu baaxiyaa gishshawu nunakka anjjana. (Maz. 126:5) Qassi Yihooway nuna anjjidoogaa nuuni akeekiyo wode keehi koyiyoogaa doommana danddayoos. w23.05 29 ¶9-10

Kiitettida PHawuloosi Yihoowa gallassan xayiyaageeta xiskkiya asatuura geeddarssiis. Eti bantta yuushuwan haniiddi deꞌiyaabaa woy wonttiiddi deꞌiyoogaa akeekokkona. Hegaa gishshawu, gitabay haniyo wode eti akeekana danddayokkona woy hegawu bessiyaabaa oottokkona. Ha wodiyan daro asay ayyaanaaban xiskkiis. (Roo. 11:8) Nuuni ‘wurssetta gallassan’ deꞌiyoogaanne gita waayee matidoogaa bessiyaabata eti ammanokkona. (2 PHe. 3:3, 4) SHin ubba galla nuuni beegottidi deꞌiyoogee keehi koshshiyaaba. (1 Tas. 5:6) Yaatiyo gishshawu, nuuni yayyana bessenna. Aybissi? Nuuni polotikaa woy deretettaa allaalletun gelenna gishshataassa. Yihoowa gallassay mati mati biyo wode nuuni issi baggawu exatanaadan asay iisettana. SHin nuuni waataneeshsha giidi hirggana bessenna. Xoossaa ayyaanay nuuni woppu giidi deꞌanaadaaninne loꞌꞌobaa kuuyanaadan maaddana danddayees.—Luq. 12:11, 12. w23.06 10 ¶6-7

Samssoona giyo sunttaa siyiyo wode neeni qoppiyoobay aybee? I keehi mino asa gidiyoogaa qoppennan aggakka. Hegee tuma. SHin Samssooni metuwaa kaalettiya iitabaa kuuyiis. Gidikkonne, Yihooway Samssooni awu haggaazanawu oottido ubbabaa qoppiis. Qassi Xoossay Samssooni ammanettidi oottidobay nu goꞌꞌaassi Geeshsha Maxaafan xaafettanaadan oottiis. Yihooway ba asaa Israaꞌeelata maaddanawu maalaalissiyaabata oottanaadan Samssoona goꞌettiis. Samssooni hayqqin daro xeetu layttaappe guyyiyan, Yihooway kiitettida PHawuloosi ammanuwan mino gididaageeta xaafiyo wode Samssoona sunttaakka xaafanaadan denttettiis. (Ibr. 11:32-34) Samssoona taarikee nuna minttettana danddayees. I waayissiya wodetunkka Yihoowan ammanettiis. Samssoona leemisuwappe nuuni minttettuwa demmana, qassi hara maaddiyabaa tamaarana danddayoos. w23.09 2 ¶1-2

Nuuni Yihoowa darotoo woossiyoogaaninne nuna qofissida ubbabaa awu yootiyoogan kaseegaappe aaruwan genccana danddayoos. (1 Tas. 5:17) Geella haꞌꞌi nena wolqqaama metoy gakkibeennaba gidana danddayees. SHin neeni hanqqettiyo wode, haniyoobaa xayiyo wode, woy ay oottanaakko erennan aggiyo wode ubban maaduwaa demmanawu Yihoowa woossay? Ha wodiyan nena gakkiya guutta metuwawu maaduwaa demmanawu Yihoowa woossikko, sinttappe nena wolqqaama metoy gakkiyo wode yaatanawu mammottakka. He wode I nena awude, qassi waati maaddanaakko loytti eriyoogaa ammanettaasa. (Maz. 27:1, 3) Ha wodiyan nuna gakkiya metuwaa nuuni genccikko, sinttappe gita waayiyaa wodekka genccana danddayoos. (Roo. 5:3) Nuuni hegaadan gaana danddayiyoy aybissee? Daro ishanttinne michchontti issi metuwaa gencciyo wode ubban hegee hara metuwaa genccanaadan eta maaddiyoogaa yootoosona. Eti issi metuwaa Yihooway maaddin gencciyo wode, Yihooway eta maaddanawu koyiyoogaa kaseegaappe aaruwan ammanoosona. Qassi ammanoy eti hara metuwaa genccanaadan maaddiis.—Yaaq. 1:2-4. w23.07 3 ¶7-8

Yihoowa ashkketettaynne qaretay hanotaadan hananaadan A denttettees. Leemisuwawu, Sadooman deꞌiya iita asaa xayssido wode Yihooway ashkke gidiyogaa bessiis. Xillo gidida Looxee deretiya heeraakko baqatanaadan Yihooway ba kiitanchchatu baggaara yootiis. Looxee yaa baanawu yayyiis. Hegaa gishshawu, inne A soo asay Yihooway xayssanawu kuuyido Xoohaara giyo guutta katamaakko baqatanaadan paqqadana mala oychchiis. Yihooway ba kaaletuwaa kaallanaadan Looxa iisettana danddayees. SHin, Looxee Xoohaara baanaadan Yihooway paqqadiis; qassi he katamaakka xayssibeenna. (Doo. 19:18-22) Daro xeetu layttappe simmin, Yihooway Nanawen deꞌiya asawu qarettiyoogaa bessiis. Yihooway Nanawen deꞌiya iita asaynne eta katamay xayanaagaa odanaadan hananabaa yootiya Yoonaasa kiittiis. SHin Nanawen deꞌiyaageeti bantta nagaraappe simmido wode Yihooway etawu atto giis, qassi he katamaa xayssibeenna.—Yona. 3:1, 10; 4:10, 11. w23.07 21 ¶5

Yoꞌaasha taarikiyaappe nu ay tamaarana danddayiyoo? I biittaa giddo xaphuwaa loytti yeddibeenna tuuqettidi eqqida mittaa mala. A maaddiya Yoodaahee hayqqi simmin Yoꞌaashi kaddidaageeti yootiyoobaa siyiyoogaa doommido gishshawu, Yihoowawu ammanettiyoogaa aggiis. Nuuni Xoossawu azazettanaadan nu so asaynne gubaaꞌiyan deꞌiya harati leemiso gidiyo gishsha xallawu Xoossawu azazettana koshshennaagaa ha taarikee bessees. Nuuni Yihoowa dabbo gididi deꞌanawu ubba wode xannaꞌiyoogan, wotti dentti qoppiyoogaaninne woossiyoogan kaseegaappe aaruwan A siiqananne bonchchana koshshees. (Erm. 17:7, 8; Qol. 2:6, 7) Yihooway nuuni danddayiyoogaappe aarobaa oottanaadan koyenna. Eranchchaa 12:13y I nuuppe koyiyoobaa qonccissees; hagaadan gees: “Xoossaassi yayya; a azazuwaa naaga. Aissi giikko, hegee asassi waanna ooso.” Nuuni Xoossawu yayyikko, sinttappe haniyaabay ayba gidinkka, Yihoowawu ammanettidi deꞌoos. Nuuni Yihoowaara dabbotido dabbotaa aybinne moorana danddayenna. w23.06 19 ¶17-19

Paydo 5y doommiiddi hagaadan gees: “Araatan uttidaagee . . . yaagiis.” (Ajj. 21:5a) Ajjuutaa maxaafan Yihooway haasayido heezzu wodetuppe hagee issuwa. Qassi hagaa yootiday Yihoowappe attin, kiitanchchaa woy Yesuusakka gidenna! Hagee I kaallidi yootiyobaa nuuni ammanettana danddayiyogaa bessees. Aybissi? Yihooway “worddotenna” gishshataassa. (Tii. 1:2) Yaatiyo gishshawu, Ajjuutaa 21:5, 6n odettidabay polettiyogee attenna. Xoossay hagaadan giis: “Taani ubbabaa ooraxissais.” Yihooway hegaa sinttappe oottana. Shin I qaalaa gelidobaa polanaagaa ammanettiyo gishshawu, I hegaa oottiiddi deꞌiyabadan yootiis.—Isi. 46:10. w23.11 3-4 ¶7-8

Kiitettida Pheexiroosi ba shugo miyyiyaara baaxetees. Ane amarida leemisota beꞌa. Geeshsha Maxaafay kasetidi yootiyoogaadan Yesuusi keehi waayettidi hayqqanaagaa Pheexiroosawu yootido wode, I Yesuusa seeriis. (Mar. 8:31-33) Pheexiroosinne kiitettida harati ubbaappe aadhdhiyaagee oonakko darotoo palamettidosona. (Mar. 9:33, 34) Yesuusi hayqqanaappe kase qammi Pheexiroosi issi bitaniyaa hayttaa shocidi qanxxi yeggiis. (Yoh. 18:10) He qammi Pheexiroosi yayyido gishshawu ba laggiyaa Yesuusa erikke giidi heezzutoo kaddiis. (Mar. 14:66-72) Hegee I mishettidi yeekkanaadan oottiis. Yesuusi keehi azzanida Pheexiroosan hidootaa qanxxibeenna. Yesuusi hayquwaappe denddi simmidi haꞌꞌikka Pheexiroosa siiqiyoogaa qonccissiis. Yesuusi ba dorssata ashkketettan heemmanaadan Pheexiroosa shoobbiis. (Yoh. 21:15-17) Pheexiroosi eeno giis. Qassi Phenxxaqosxxe gallassan Yerusalaamen deꞌiyo gishshawu geeshsha ayyaanan tiyettida koyroogeetuppe issuwaa gidiis. w23.09 22 ¶6-7

Kiitettida Pheexiroosi ba mala cimati ‘Xoossaa dorssaa wudiyaa heemmanaadan’ zoriis. (1 Phe. 5:1-4) Neeni cima gidikko, ne ishanttanne michchontta siiqiyoogaanne heemmanawu koyiyoogaa eroos. Gidikkonne, neessi oosoy keehi dariyo gishshawu woy neeni keehi daafuriyo gishshawu ha aawatettaa polana danddayennabadan issi issitoo qoppana danddayaasa. Yaatin neeni waatana danddayay? Ne wozanaabaa Yihoowawu yoota. Pheexiroosi hagaadan giis: “Ooninne maaddiyaabaa gidikko, Xoossai ayyo immiyo wolqqan maaddo.” (1 Phe. 4:11) Ne ishanttanne michchontta gakkiiddi deꞌiya metoy ha wodiyan xayana danddayennaba gidana danddayees. Shin “heemmiyaageetu halaqai,” Yesuus Kiristtoosi neeni danddayiyoogaappe aaruwan eta maaddana danddayiyoogaa hassaya. I ha wodiyankka ooratta alamiyankka hegaadan oottana danddayees. Yihooway cimati bantta ishantta siiqanaadan, heemmanaadaaninne ‘dorssaa wudiyawu leemiso’ gidanaadan koyees. w23.09 29-30 ¶13-14

Nuuni Yihoowa higgeta sheneho giyaageetu qofaa eqettana koshshees. Yihoowa higgeta sheneho giya asaadan qoppikko, nuunikka Yihoowanne A higgeta xaasayi xeelliyoogaa doommana danddayoos. (1 Qor. 3:19) “Ha sa7aa aadhdhida eratettai” darotoo asay Xoossawu azazettennaadan oottees. PHerggaamoonaaninne Tiyaaxiroonan deꞌiya amarida Kiristtaaneti pokkobaa oottiyaanne eeqawu goynniya asatu oosuwaa kaallidosona. He naaꞌꞌu gubaaꞌetikka pokkobaa oottiyoogaa coꞌꞌu giidi xeellido gishshawu Yesuusi eta seeriis. (Ajj. 2:14, 20) Ha wodiyan deꞌiya asati nuuni bala qofaa kaallanaadan oottanawu malana danddayoosona. So asaynne nuna eriyaageeti nuuni zozza gididabadaaninne Yihoowa higgiyawu azazettanawu koshshennabadan ammanttanawu malana danddayoosona. Leemisuwawu, nuuni kandduwan geeshsha gididi deꞌiyoogee keehi koshshennabadaaninne Geeshsha Maxaafay yootiyo kandduwaa maarati wodee aadhdhiichchidobadan yootana danddayoosona. Yihooway immiyo kaaletoy keehi qoncce gidenna giidi issi issitoo nuuni qoppana danddayoos. Nuuni “Xoossaa maxaafan xaafettidaagaa” bolli harabaa gujjanawu paacettana danddayoos.—1 Qor. 4:6. w23.07 16 ¶10-11

Yesuusa aayee Mayraamissi minttettoy koshshiis. A azinaa gelabeykku, shin shahaaraasu. A naata dichcha erukku, shin Mase gidana naꞌaa dichchana koshshiis. A mule inddaa gaytta erukku, shin shahaaridoogaa Yooseefawu yootana koshshiis. Qassi yaatiyogee keehi deexxiyaba. (Luq. 1:26-33) Minttettuwa Mayraama waata demmadee? A haratu maaduwa oychchaasu. Leemisuwawu, A ha aawatettaa xeelliyagan harabaakka yootanaadan Gabreela oychchaasu. (Luq. 1:34) Hegaappe simmin darin takkennan, “deree dariyo” Yihudaa biittan deꞌiya Elssaabeexo giyo ba dabbiyo oychchanawu baasu. Elssaabeexa Mayraamo galataasu, qassi Mayraami uluwan deꞌiya naꞌaabaa Yihoowa ayyaanay denttettin minttettiya hiraagaa yootaasu. (Luq. 1:39-45) Mayraama Yihooway ‘ba kushiyan wolqqaama oosuwa oottidoogaa’ yootaasu. (Luq. 1:46-51) Gabreelanne Elssaabeexi baggaara Yihooway Mayraamo minttettiis. w23.10 14-15 ¶10-12

Kiristtoosi erissiyo ashkkaratuppe amaridaageeti geeshsha ayyaanan tiyettidosona; qassi eti Yihoowara dumma dabbotaa dabbotidosona. Ha 144,000ti saluwan Yesuusaara qeese gididi oottana. (Ajj. 14:1) Xoossaa dunkkaaniyan Geeshsha Sohoy eti saꞌan deꞌiyo wode ayyaanaaban Xoossaassi naatu mala gidiyogaa qonccissees. (Roo. 8:15-17) Xoossaa dunkkaaniyan Ubbaappe Aadhdhiya Geeshsha Sohoy Yihooway deꞌiyo saluwa qonccissees. Geeshsha Sohuwa Ubbaappe Aadhdhiya Geeshsha Sohuwappe shaakkiya “magalashoi” Yesuusa bollaa qonccissees; he bollay I ayyaana beeta maqidasiyan gita Qeese Ubbatu Halaqa gididi saluwa gelennaadan diggiis. Yesuusi ba bollaa asawu yarshsho oottidi immiyogan, tiyettida Kiristtaaneti ubbay saluwa biyo ogiya dooyiis. Eti saluwan woytuwa demmanawu bantta bollaa aggana koshshees.—Ibr. 10:19, 20; 1 Qor. 15:50. w23.10 28 ¶13

Geedooni Efireema asati A borido wode, woppu giidi zaariis. (Daan. 8:1-3) I hanqquwan zaaribeenna. Eti yiillotidi yootiyoobaa siyiyoogaaninne eta kehatettan haasayissiyoogan I bana ziqqi oottiyoogaa bessiis. Hegee eti woppu gaanaadan oottiis. Akeekanchcha cimati harati eta boriyo wode loytti ezggiyoogaaninne woppu giidi zaariyoogan Geedoona milatoosona. (Yaaq. 3:13) Yaatiyoogan, eti gubaaꞌiyan sarotettay deꞌanaadan oottoosona. Geedooni Midiyaamata xoonido gishshawu harati A sabbido wode, I Yihooway sabettanaadan oottiis. (Daan. 8:22, 23) Cimati Geedoona waani milatana danddayiyoonaa? Eti oottidobawu Yihooway sabettanaadan oottana koshshees. (1 Qor. 4:6, 7) Leemisuwawu, issi cimay gooba asttamaare gidiyo gishshawu harati A galatiyo wode, I kaaletoy Xoossaa Qaalan deꞌiyoogaanne nuuni ubbay Yihoowa dirijjitiyaappe tamaariyoogaa yootana danddayees. Cimati Yihoowa bonchchissiya ogiyan tamaarissiyaakko woy harata maalaalissanawu koyidi tamaarissiyaakkonne loytti qoppana danddayoosona. w23.06 4 ¶7-8

Nuuni woossidobaa demmana xayikko hagaadan giidi nuna oychchana danddayoos: ‘Taani woossiyobay likkee?’ Darotoo nuuni nuussi keehi loꞌꞌobaa eroos giidi qoppana danddayoos. Shin nuuni woossiyobay tumuppe nuna maaddiyaba gidennan aggana danddayees. Issi metuwabaa woossiyo wode, he metuwa giigissanawu nuuni woosan oychchidoogaappe aadhdhiya keehi loꞌꞌobay deꞌana danddayees. Qassi nuuni woossiyo issi issibay Yihoowa sheniyara maayettennaba gidana danddayees. (1 Yoh. 5:14) Leemisuwawu, bantta naꞌay tumaa keettaappe kiyennaadan Yihoowa woossida yelidaageetubaa beꞌa. He woosay likke milatana danddayees. Shin Yihooway awu goynnanaadan nuuppe oonanne giddenna. I nu naata gujjin, nuuni ubbay awu goynnanawu dooranaadan koyees. (Zaa. 10:12, 13; 30:19, 20) Hegaa gishshawu, yelidaageeti bantta naꞌay Yihoowa siiqanaadaaninne A dabbo gidanaadan loytti tamaarissanawu maaddana mala Yihoowa woossana danddayoosona.—Lee. 22:6; Efi. 6:4. w23.11 21 ¶5; 23 ¶12

Harata minttettiyogee nuuni eta siiqiyogaa bessiyo keehi loꞌꞌo oge gidiyoy aybissee? Geeshsha Maxaafaabaa yootiya issi xuufee qonccissiyogaadan, “minttettite” giyagawu Phawuloosi goꞌettido qaalay “issi uraa waayee gakkiyo wode woppu gaanaadan maaddanawu A miyyiyan gidiyogaa qonccissees.” Hegaa gishshawu, nuuni waayee gakkiyo ishaa minttettiyo wode, I ammanettidi ubbatoo Yihoowawu haggaazanaadan maaddoos. Qassi nuuni nu ishaa minttettiyo wode A siiqiyogaa bessoos. (2 Qor. 7:6, 7, 13) Qarettiyogeenne minttettiyogee issoy issuwara gayttidaba. Ayssi giikko, qarettiya uri harata minttettanwunne eta metoy gakkiyo wode maaddanawu baaxetiyo gishshataassa. Yaatiyo gishshawu, nuuni koyro qarettoos, yaatidi maaddoos. Phawuloosi Yihoowabaa qonccissidoban hegee waani gayttiyakko akeekana danddayoos. Yihooway “maarotettaa Aawaanne minttetto ubbaa Xoossaa” gidiyogaa I yootiis.—2 Qor. 1:3. w23.11 9-10 ¶8-10

Kiristtoosa kaalliyageeti ubbay banttana waayee gakkanaagaa eroosona. Kiitettida Phawuloosi giidobaa beꞌa. Tasalonqqen deꞌiya Kiristtaanetussi hagaadan giis: “Nuuni inttenaara de7iiddi, nuuni waayettanaagaa kasetidi intteyyo yootida; qassi . . . hegaadan haniis.” (1 Tas. 3:4) Hegaa bollikka, Qoronttoosan deꞌiya Kiristtaanetussi I hagaadan giis: ‘Nu ishatoo, nuuni waayettido waayiya inttena hassayissanawu koyoos; nu waayee nuna worees giidi hirggida.’ (2 Qor. 1:8; 11:23-27) Ha wodiyan deꞌiya Kiristtaanetikka banttana waayee gakkanaagaa eroosona. (2 Xim. 3:12) Laggetinne dabboti ne bolli qilliiccennan aggokkona. Eti ne bolli iitabaa oottennan waayi aggana. Woy neeni ammanettiya ura gidiyo gishshawu, nena ootissiyagee woykko nenaara oottiyagee ne bolli yedetaa gattidee? (Tii. 2:10) Neeni ne hidootaabaa haratussi yootido gishshawu, sunttati ne bolli yedetaa gattidonaa? Nuna gakkana danddayiya waayee ayba gidikkonne, Phawuloosi nuuni ufayttana koshshiyogaa yootiis. w23.12 10-11 ¶9-10

Yaaqooba daro metoy gakkiis. Yaaqooba naati Simooninne Leewi, bantta soo asaa sunttaanne Yihoowa sunttaa mooriyaabaa oottidosona. Hegaa bollikka, Yaaqoobi siiqiyo A machchiyaa Raaheela naaꞌꞌantto naꞌaa yelaydda hayqqaasu. Qassi wolqqaama koshaa gaasuwan Yaaqoobi ceegatettaa layttan deꞌanawu Gibxxe biitta baana koshshiis. (Doo. 35:16-19; 37:28; 45:9-11, 28) Ha ubba metoti gakkikkonne, Yaaqoobi Yihoowaaninne I gelido qaalan ammanettiyoogaa aggibeenna. Yihoowaykka Yaaqooba nashshiyoogaa bessiis. Leemisuwawu, Yihooway Yaaqoobawu daro aquwaa immiis. Qassi Yaaqoobi daro wodiyaappe kase hayqqiis giidi qoppido ba naꞌaa Yooseefaara zaarettidi gayttido wode, Yihoowa keehi galatidoogee qoncce! Yaaqoobi Yihoowawu mata dabbo gididoogee I bana gakkida metuwaa genccanaadan maaddiis. (Doo. 30:43; 32:9, 10; 46:28-30) Nuunikka Yihoowawu mata dabbo gididi deꞌikko, qoppennan gakkiya metota genccana danddayoos. w23.04 15 ¶6-7

Mazamure 23n Daawiti Yihooway A siiqiyogaa ammanettiyogaa yootiis. Daawiti, ba Henttanchchaa giido Yihoowara loytti dabbotidoogaa qonccissiis. Daawiti Yihooway A kaalettanaadan eeno giido gishshawu woppu giis, qassi kumetta wozanaappe an ammanettiis. Daawiti ba deꞌo laytta ubban Yihooway A siiqanaagaa eriis. I ammanettanaadan oottidabay aybee? Daawiti Yihooway awu koshshiya ubbabaa kunttido gishshawu woppu giidi deꞌiis. Qassi Daawiti Yihooway A dabbo gidiyogaanne A nashshiyogaa eriis. Daawiti sinttappe A gakkanabay ayba gidinkka, Yihooway awu koshshiya ubbabaa muletoo kunttanaagaa ammanettidoy hegaassa. Daawiti Yihooway A siiqiyogaanne awu koshshiyabaa kunttanaagaa ammanettidoogee hirggiyogaa aggidi ufayttanaadaaninne woppu gaanaadan maaddiis.—Maz. 16:11. w24.01 29 ¶12-13

Naaꞌꞌantto Alamiya Olaappe doommidi, Yihoowa asay daro biittatun laꞌatettan sabbakees. Qassi he oosoy kumetta saꞌan oosettiiddi deꞌees. Ha wodiyan Oosuwa Kaalettiya Citaa yarati ubbatoo Kiristtoosa kaaletuwan ammanettoosona. Eti ishanttussi immiyo kaaletoy Yihoowanne Yesuusa qofaa qonccissiya kaaleto gidanaadan koyoosona. Qassi eti woradaa xomoosiyageetu baggaaranne cimatu baggaara galchchatuyyo kaaletuwa immoosona. Ayyaanan tiyettida cimati ‘Kiristtoosa ushachcha kushiyan’ deꞌoosona; qassi eta xeelliyagan odettidabay galchchaa cima gidida ubbaassikka hanees. (Ajj. 2:1) Cimati ubbay nagaranchcha gidiyo gishshawu balana danddayiyogee qoncce. Kiitettidaageetuugaadan, Muuseenne Yaasu issi issitoo balabaa oottidosona. (Qoo. 20:12; Yaa. 9:14, 15; Roo. 3:23) Kiristtoosi ammanettida aylliyanne ayyaanan sunttettida cimata loytti kaalettiiddi deꞌees; qassi I ubbatoo hegaadan oottana. Hegaa gishshawu, aawatettay deꞌiyo he ishanttu baggaara I immiyo kaaletuwan ammanettoos. w24.02 23-24 ¶13-14

Ha wodiyan nuuni Yihoowa keehi galatiyogaanne siiqiyogaa bessiya ogiyan abaa haasayiyogan A ufayssana danddayoos. Nuuni haggaaziyo wode, nu waanna halchchoy asay Yihoowakko loytti shiiqanaadaaninne nu siiqo Aawaabaa nuugaadan akeekanaadan maaddiyogaa gidiyogaa hassayana koshshees. (Yaaq. 4:8) Geeshsha Maxaafay Yihoowa xeelliyagan yootiyobaa, hegeekka A siiquwabaa, suure pirddaabaa, aadhdhida eratettaabaa, wolqqaabaanne ufayssiya A eeshshatubaa haratuyyo yootiyogan ufayttoos. Qassi nuuni Yihoowa milatanawu baaxetiyo wode, A sabboosinne ufayssoos. Yaatiyo wode, ha iita alamiyan deꞌiya asaappe nuuni dummatiyogaa harati akeekananne nuuni dummatiyoy aybissakko oychchana danddayoosona. (Mat. 5:14-16) Nuuni hegaadan oottiyo gaasuwa eti nunaara gayttiyo wode, yootana danddayoos. Hegaa gishshawu, ashkke asati nu Xoossaakko shiiqana danddayoosona. Nuuni ha ogetun Yihoowa sabbiyo wode, A loytti ufayssoos.—1 Xim. 2:3, 4. w24.02 10 ¶7

Intte kayma Kiristtaaneta gidanawu maaddiya hiillata tamaarana koshshees. Hegee galchchan aawatettaa intte ekkanaadan, inttessi woy intte so asawu koshshiyabaa kunttanawu maaddiya oosuwa demmanaadaaninne he oosuwan takkanaadan, qassi haratuura sarotettan deꞌanaadan maaddana. Leemisuwawu, loytti nabbabiyogaanne xaafiyogaa tamaarite. Ufayttiyanne ubbabay awu injjetiyo asi Xoossaa Qaalaa ubbatoo nabbabiyogaanne wotti dentti qoppiyogaa Geeshsha Maxaafay yootees. (Maz. 1:1-3) I Geeshsha Maxaafaa ubba galla nabbabiyogan Yihoowa qofaa erees; hegee I suurebaa qoppanaadaaninne Geeshsha Maxaafay yootiyobaa waati oosuwan peeshshanaakko eranaadan maaddees. (Lee. 1:3, 4) Geeshsha Maxaafaappe tamaarissiyanne zoriya attumaageeti nu ishanttussinne michchonttussi koshshoosona. Intte loytti nabbabiyogaanne xaafiyogaa danddayiyaba gidikko, harata maaddiyanne eta ammanuwa minttiya haasayaanne qofaa giigettana danddayeeta. Intte ammanuwa minttanawunne harata minttettanawu maaddiya masttooshaa xaafana danddayeeta. w23.12 26-27 ¶9-11

Neeni yayyiyo wode, Seexaanay xayiyo wode Yihooway sinttappe oottanabaa loytta qoppa. Killiliya shiiquwan 2014n issi ootti-besuwan, issi aaway 2 Ximootiyoosa 3:1-5n deꞌiya qofaa Gannatiyana gidiyakko woyganaakko ba so asaara tobbiyogaa beꞌida. I hagaadan giis: “Ooratta alamiyan keehi ufayssiya wodee yaana, ayssi giikko asati harata siiqiyageeta, ayyaanaabaa siiqiyageeta, ashkketa, banttana ziqqi oottiyageeta, Xoossaa sabbiyageeta, yelidaageetussi azazettiyageeta, galatiyageeta, ammanettiyageeta, bantta soo asaa siiqiyageeta, maayettiyageeta, haratubaa ubbatoo loꞌꞌobaa haasayiyageeta, bantta huuphiya naagiyageeta, woppu giyageeta, loꞌꞌobaa dosiyageeta, tumubaa haasayiyageeta, eeno giyageeta, ufayttiyobaappe aattidi Xoossaa dosiyageeta, Xoossawu wozanappe aqiyageeta gidana; qassi hageetu mala asatuura dabbotaa mintta.” Ooratta alamiyan deꞌoy ay mala gidanaakko, intte so asaara woy ne mala Kiristtaanetuura haasayay? w24.01 6 ¶13-14

Yihooway ba asan ufayttiyogaa eriyogee keehi minttettiyaba! Geeshsha Maxaafay hagaadan gees: “GODAI ba asan ufaittees.” (Maz. 149:4) Shin amaridaageeti Yihooway banttanan ufayttiyogaa issi issitoo sirana danddayoosona. Geeshsha Maxaafan etabay odettido Yihoowawu ammanettidi haggaazida daroti, Yihooway banttanan ufayttidoogaa ammananawu issi issitoo metootidosona. (1 Sam. 1:6-10; Iyy. 29:2, 4; Maz. 51:11) Geeshsha Maxaafay Yihooway nagaranchcha asatun ufayttana danddayiyogaa loytti qonccissees. Waanidi? Nuuni Yesuus Kiristtoosan ammanidi haattan muukettana koshshees. (Yoh. 3:16) Nuuni yaatiyo wode nu nagaran zilꞌꞌettidi laamettidoogaanne Xoossay koyiyobaa oottanawu ayyo qaalaa gelidoogaa haratussi bessoos. (Oos. 2:38; 3:19) Yihooway nuuni aara dabbotanawu hegaadan oottiyo wode keehi ufayttees. Nuuni awu haggaazanawu gelido qaalaa naaganaayyo nuussi danddayettida ubbabaa oottiyo wode, Yihooway nunan ufaytteesinne nuna ba dabbodan xeellees.—Maz. 25:14. w24.03 26 ¶1-2

Nuuni sabbakiyoogaa agganaadan kawotettaa sunttati azaziyo wodekka ubbatoo sabbakiyoogan erissiyo ashkkaratu leemisuwaa kaallana danddayoos. Nu haggaazuwaa polanawu Yihooway nuna maaddanaagaa ammanettana danddayoos. Yaatiyo gishshawu xalatettaanne aadhdhida eratettaa demmanawu, hegaadankka metuwaa genccanawu maaddanaadan Yihoowa woossa. Nuuppe daroti sahuwan, siiqiyo uri hayqqidoogan, so asaara gayttida metuwan, yedetan, woy hara metotun waayettoos. Qassi ubbasaa gakkiya harggiyaanne olaa malabay nuuni he metota gencciyoogee yaa metanaadan oottiis. Ne wozanaabaa Yihoowawu yoota. Neeni ne mata laggiyawu yootiyoogaadan, ne hanotaa ayyo yoota. Yihooway ‘neessi oottanaagaa’ ammanetta. (Maz. 37:3, 5) Ubba wode woossiyoogee ‘waayiyan genccanaadan’ nuna maaddees. (Roo. 12:12) Yihooway baayyo goynniyaageeti gencciiddi deꞌiyoobaa akeekees, qassi ‘eta waasuwaa siyees.’—Maz. 145:18, 19. w23.05 5-6 ¶12-15

Nuuni gitabaa kuuyiyo wode, ‘Yihooway koyiyobay aybakko’ shaakki eridi hegaara maayettiyabaa oottana koshshees. (Efi. 5:17) Nu hanotaara maayettiya Geeshsha Maxaafay yootiyo maarata nuuni shaakki eriyo wode, he allaalliya xeelliyagan Xoossaa qofay aybakko akeekanawu baaxetoos. Yaatidi he maarata oosuwan peeshshiyo wode, loꞌꞌobaa kuuyana danddayoos. Nu morkkee Seexaanay nuuni ha alamiyaban bichchaaridi Xoossaa haggaazuwawu wode xayanaadan koyees. (1 Yoh. 5:19) Issi Kiristtaanee Yihoowawu haggaazana danddadayiyo daro ogeta qoppiyogaa aggidi miishshaa, timirttiya, woy oosuwa ubbatoo qoppiyogaa doommana danddayees. Issi uri hegaadan oottikko, Yihoowawu haggaazennaageetudan qoppiyogaa bessees. Hegeeti bala gidana xayikkonne, eta nu deꞌuwan mule kaseyana koshshenna. w24.03 24 ¶16-17