Ha Bukleetiya Waati Goꞌettiyoo?

Ha bukleetiyan, hachchi hachchissi issi xiqiseenne hegaa qonccissiya qofay deꞌees. He xiqisiyanne qofaa ay saatiyankka nabbabana danddayikkonne, maallado nabbabiyogee keehi loꞌꞌo gidiyogaa daroti akeekidosona. Yaatiyogan, eti gallassa kumettaa he qofaa wotti dentti qoppoosona. Gallassaa xiqisiya so asay issippe tobbiyogee keehi goꞌꞌees. Kumetta saꞌan deꞌiya Beeteele keettaa asay qanꞌꞌiya miyo wode gallassaa xiqisiya tobbees.

Bukleetiyan deꞌiya qofay Hosppune 2023​ppe Laappune 2024 gakkanaashin deꞌiya Wochchiyo Keelaappe (w) ekettiis. Wochchiyo Keelay awudeegaakko qonccissiya payduwappe kaallidi deꞌiya paydoy, koyroogee sinttaa, hankkoy qassi menttota bessees. (Xadeera deꞌiya qonccissuwa beꞌa.) Gujo qofaa he xannaꞌiyo huuphe yohuwappe demmana danddayettees.