Tisaase

Yesuusa kaalliyageeti Xoossaa Qaalaa ammanidi hegaa bantta deꞌuwan oosuwan peeshshanawu minni baaxetidosona. (Yoh. 17:6) Shin eti Yesuusi danobaa oottida asadan mittan kaqettidi hayqqidoy aybissakko akeekana danddayibookkona. Yesuusi bana kaalliyageetussi ammanoy deꞌiyogaanne eti Yihoowa siiqiyogaa xalaala gidennan, eti Xoossaa Qaalaa loytti akeekana koshshiyogaakka eriis. (Luq. 9:44, 45; Yoh. 20:9) Yaaniyo gishshawu eti Xoossaa Qaalaa loytti akeekanaadan maaddiis. I bana kaalliya naaꞌꞌatussi Emaahuusa efiya ogiyan qonccido wode hegaadan waati oottidaakko ane beꞌoos. Yesuusi ba oonatettaa he asatuyyo sohuwara qonccissibeenna. I eta oyshata oychchiis. Aybissi? Geella I eti bantta wozanan deꞌiyabaa yootanaadan koyennan aggenna. Qassi eti hegaadan oottidosona. Yesuusi Israaꞌeelata Rooma haaruwappe laꞌa kessana giidi eti qoppidoogaa awu yootidosona. (Luq. 24:18-27) Yesuusi daro hiraagati polettidoogaa qonccissanawu Geeshsha Maxaafaa goꞌettiis. He galla omarssi, Yesuusi bana kaalliya haratuura gayttidi he hiraagatu birshshettaa etayyokka qonccissiis.—Luq. 24:33-48. w24.10 14 ¶9-10

Yesuusi oottanabaanne haasayanabaa saluwan deꞌiya ba Aawaappe tamaariis. Yihoowa dirijjitee Yesuusa leemisuwa kaalliyogan, nuuni likke gididabaanne likke gidennabaa eranaadan maaddanawu, qassi nu deꞌuwassi koshshiya kaaletuwa immanawu Xoossaa Qaalaa goꞌettees. (2 Xim. 3:16, 17) Nuuni Xoossaa Qaalaa nabbabanaadaaninne hegaa oosuwan peeshshanaadan nuussi darotoo hassayissoy imettees. Nuuni nu xuufeta goꞌettidi, Geeshsha Maxaafaa xannaꞌiyo wode keehi goꞌettoos. Leemisuwawu, nuuni Geeshsha Maxaafay yootiyobaa, nu dirijjitee immiyo kaaletuwara geeddarssana danddayoos. Nuussi imettiya kaaletoy Geeshsha Maxaafaappe gidiyogaa nuuni akeekiyo wode, kaseegaappe aaruwan Yihoowa dirijjitiyan ammanettoos. (Roo. 12:2) Yesuusi “Xoossaa kawotettaa wonggeliyaa mishiraachchuwaa” sabbakiis. (Luq. 4:43, 44) Qassi Yesuusi bana kaalliyageeti Kawotettaa mishiraachchuwa sabbakanaadan azaziis. (Luq. 9:1, 2; 10:8, 9) Ha wodiyan, Yihoowa dirijjitiya yame gidida ubbay, eti deꞌiyoy awan gidinkka, Kawotettaa mishiraachchuwa sabbakoosona. w24.04 9 ¶5-7

Beni Israaꞌeelan Yihoowi ba asawu Muuse baggaara, qassi guyyeppe Yaasu baggaara kaaletuwa immiis. (Yaa. 1:17) Israaꞌeelati he attuma asati Xoossaa Yihoowa gishshaa oottiyabadan xeellido wode anjjettidosona. Daro xeetu layttaappe simmin Kiristtaane galchchay koyro eqqido wode, kiitettida 12ti kaaletuwa immidosona. (Oos. 8:14, 15) Guyyeppe he citaa bolli Yerusalaamen deꞌiya hara cimati gujettidosona. Galchchati he ammanettida attumaageeti immido kaaletuwa kaallido gishshawu, “ammanuwan minnidi, qoodankka gallassappe gallassan dari dari biidosona.” (Oos. 16:4, 5) Ha wodiyankka, nuuni Yihoowa dirijjitee immiyo kaaletuwa kaalliyo wode Yihoowi nuna anjjees. w24.07 10 ¶10

Yihoowi Kawuwa Daawita keehi siiqees. Ubba Yihoowi A, ‘Ta wozanaa ufayssiya asa’ yaagiis. Shin Daawiti wodiraa laammiyogaanne asa woriyogaa mala gita nagaraa oottiis. Muuse Higgiya maaran Daawiti hayqqana bessees. (Wog. 20:10; Qoo. 35:31) Gidikkokka, Yihoowi Daawiti zilꞌꞌettidi laamettanaadan maaddanawu koyiis. Daawiti ba nagaran zilꞌꞌettidi laamettennan deꞌishin, Yihoowi ba erissidobaa yootiya Naataana akko kiittiis. Daawiti gita nagaraa oottidoogaa akeekanaadan maaddanawu Naataani issi leemisuwa awu yootiis. Daawiti Yihoowa keehi azzanttidoogaa akeekidi ba nagaran zilꞌꞌettidi laamettiis. (2 Sam. 12:1-14) I ba oottidoban keehi azzanidoogaa bessiya mazamuriya xaafiis. (Maz. 51, huuphessa qofaa) He mazamuree nagaraa oottida darota minttettiisinne eti zilꞌꞌettidi laamettanaadan denttettiis. Daawiti ba nagaran zilꞌꞌettidi laamettanaadan Yihoowi maaddido ogiya keehi nashshoos. w24.08 10 ¶9

Naata dichchiyogee gita ooso gidiyogaa daroti maayettoosona. Intte aawa woy aayo gidikko, intte naatu ammanuwa minttanawu intte baaxetiyo baaxee galatissiyaba. (Zaa. 6:6, 7) Intte naati dicci dicci biyo wode Geeshsha Maxaafay yootiyo kandduwa maarata gujjin, nu ammanuwabaa oychchana danddayoosona. Intte naati oychchiyobay inttena koyro heeran hirggissana danddayees. Hegaa mala oyshati intte intte naatu ammanoy shuggiiddi deꞌiyabadan qoppanaadan oottana danddayoosona. Shin naati dicci dicci biyo wode bantta ammanuwa minttanawu oyshata oychchana koshshees. (1 Qor. 13:11) Yaatiyo gishshawu intte hirggana koshshenna. Intte naati nu ammanuwa xeelliyagan oychchiyo ubba oyshata eti suurebaa qoppanaadan maaddiyo injjedan xeellana danddayeeta. w24.12 14 ¶1-2

Yihudan deꞌiyageetu bolli gakkiya waayiyappe attanawu Ibraawe Kiristtaanetussi mino ammanoy koshshiis. (Ibr. 10:37, 38) Yesuusi bana kaalliyageeti, olanchchati Yerusalaamo dooddiyogaa beꞌiyo wode deriyakko baqatanaadan yootiis. I zoridobay Yerusalaame kataman woy gaxariyan deꞌiya Kiristtaanetussikka hanees. (Luq. 21:20-24) Olanchchati qohanawu yiyo wode, gaxariyan deꞌiya asay darotoo katamaa baqatees; ayssi giikko katamaa dirssay eta qohuwappe ashshana danddayees. Yerusalaame kataman takkiyogaa aggidi deriyakko baqatiyogee bala qofa milatiyo gishshawu, Yesuusi yootidobaa azazettanaayyo etawu mino ammanoy koshshiis. Ibraawe Kiristtaaneti galchchaa kaalettanawu Yesuusi goꞌettiyogeetunkka ammanettana koshshiis. Bessiya wodiyan qassi maaray mankkay deꞌiyo ogiyan galchchan deꞌiyageeti ubbay Yesuusa azazuwa kaallanaadan aawatettay deꞌiyogeeti qoncce kaaletota yootennan aggokkona.—Ibr. 13:17. w24.09 10 ¶9-10

Yesuusi saꞌan deꞌiyo wode A Aaway awu immido oosuwa wottiyobi baynna ogiyan poliis. (Yoh. 17:4) Shin Yesuusi ‘Yihoowi koyiyobaa oottana danddayiyay ta xalaala’ giidi qoppibeenna. Yesuusi harata loohissiis. Yesuusi bana kaalliyageetun ammanettido gishshawu mishiraachchuwa sabbakanaadaaninne tamaarissanaadan, qassi Yihoowa asaa heemmanaadan aawatettaa etawu immiis. Yesuusi bana kaalliyageetussi koshshiya zoriya siiquwan yootiis. Etappe amaridaageeti I hayquwappe denddidoogaa tumuppe ammanibeennaagaa I akeekido gishshawu, eti tumaa eranaadan maaddiya ogiyan zoriis. (Luq. 24:25-27; Yoh. 20:27) Qassi I eti miishshaa demmanawu baaxetiyogan gidennan, Yihoowa asaa heemmiyogan xeelaa wottanaadan yootiis. (Yoh. 21:15) Hegaa bollikka, eti Yihoowa haggaazuwan oottiyobaa haratuugaara geeddarssennaadan eta hassayissiis. (Yoh. 21:20-22) Qassi amaridaageeti Xoossaa Kawotettaa xeelliyagan qoppiyo bala qofaa suurissiisinne eti mishiraachchuwa yootiyogan xeelaa wottanaadan maaddiis.—Oos. 1:6-8. w24.10 15-16 ¶13-14

Azazettiyogee deꞌuwa demissees. Hidootaa Biitti gelanawu mati uttida Israaꞌeelatuugaadan, nuunikka Xoossay ehaanawu qaalaa gelido ooratta alamiya gelanawu keehi mati uttida. Mata wode, saꞌay zaarettidi gannate gidana. (Isi. 35:1; Luq. 23:43) Dabloosinne daydanttati xayana. (Ajj. 20:2, 3) Yihoowa xeelliyagan worddobaa tamaarissiya haymaanootee deꞌenna. (Ajj. 17:16) Asa kawotettati bantta haariyo asata naaqqiyogee attana. (Ajj. 19:19, 20) Gannatiyan makkalanchchati deꞌokkona. (Maz. 37:10, 11) Gannatiyan deꞌiya asay ubbay Yihoowa higgetuyyo azazettiyo gishshawu issippetettaynne sarotettay deꞌana. Ubba asay siiqettana; qassi issoy issuwan ammanettana. (Isi. 11:9) Nuuni he wodiya yeemuwan naagoos! Hegaa bollikka, nuuni Yihoowawu azazettikko amarida xeetu layttaa xalaalawu gidennan, gannatiyan merinawu deꞌana danddayoos.—Yoh. 3:16. w24.11 9 ¶7

Hachchi gallassa xiqisiyan odettida hiraagay awudeegaappenne aaruwan ha wodiyan polettiiddi deꞌees. Xoossaa Kawotettaa mishiraachchuwabaa yootiyabay 1000ppe dariya qaalan deꞌees, qassi jw.org saytiya baggaara ha wodiyan daro asay Xoossaa Kawotettaabaa yootiya mishiraachchuwa tamaarana danddayees. Shin, Yesuusi bana kaalliyageeti I yaana gakkanaashin “katamata mule yuuyidi” wurssennaagaakka yootiis. (Mat. 10:23; 25:31-33) Yaaniyo gishshawu, Yesuusi asaa bolli pirddanawu yaanaappe kase nuuni ubba asawu sabbakana danddayokko. Ha wodiyan daro asay nuuni laꞌatettan sabbakana danddayenna heeratun deꞌees. Qassi, daqiiqan daqiiqan daro naati yelettoosona. Hegaa gishshawu, nuuni “zare ubbaayyo, qommo ubbaayyo, dumma dumma biittaa qaala ubbaayyo” mishiraachchuwa yootanawu nuussi danddayettida ubbabaa oottiyaba gidikkonne, wurssettay yaanaappe kase ubba asawu sabbakana danddayokko.—Ajj. 14:6. w24.05 10 ¶6-7

Yesuusi haasayiyoban harata minttettiisinne gazddissiis. I bana kaalliyageetu bolli iitabaa haasayibeenna. (Luq. 8:47, 48) I oottidobay azinatuyyo keehi loꞌꞌo leemiso! Yesuusi azinati bantta machchotussi ubbatoo ammanettanaadan azaziis. Issi azinay ba “machchiyo baqqi oyqqana” koshshiyogaa ba Aaway yootidoogaadan ikka yootiis. (Mat. 19:4-6) Hegaa gishshawu, azinaynne machchiya siiqettiyo siiqoy eti issoy issuwa baqqi oyqqidoogaa mala mino gidana bessees. Etappe issoy aqo deꞌuwa qohiyabaa oottikko eti naaꞌꞌaykka qohettoosona. Ba machchiyo keehi siiqiya azinay ubba qommo pornograafiyappe haakkees. I “pattennabaa xeellenna mala” ba ayfiya sohuwara wora zaarees. (Maz. 119:37) Qassi I hara maccaasa xeellidi amottennaadan ba ayfiyara maacettees.—Iyy. 31:1. w25.01 10 ¶12-13

Asay atto giyogee darobaa qonccissiyaba gidana danddayees. Yihoowi nagaranchcha gidida nuuyyo atto giyo ogee nuuni issoy issuwawu atto giyo ogiyappe keehi dummatees. Yihoowagaadan ooninne atto gaana danddayenna. Mazamuraawee Yihoowabaa hagaadan giis: “Nuuni nena bonchchidi azazettana mala, nuuyyo [‘tumuppe,’ NW] atto yaagaasa.” (Maz. 130:4) Ee, Yihoowi ‘tumuppe atto gees.’ Tumuppe atto giyogan Yihoowara laggetiyabi baawa. Geeshsha Maxaafaa xaafidaageeti issi issi sohotun atto giyogaa qonccissanawu goꞌettido Ibraawetto qaalay asay issoy issuwawu atto giyogaa mule qonccissenna. Yihoowi issi urawu atto giyo wode he ura nagaraa muleera quccees. He uri Yihoowara zaarettidi dabbotana danddayees. Yihoowi atto giyo wode ubbatoo muleera atto gees. w25.02 8 ¶1-3

Nuuni sabbakiyo wode asay siyana xayikkokka nu halchchuwa polida. Ayssi giikko, Yihoowinne Yesuusi koyiyobaa nuuni oottido gishshataassa; hegeekka markkattiyo oosuwa. Mishiraachchuwa yootanawu nuuni asa demmennan aggiyo woy nu yootiyobaa asay siyennan ixxiyo wodekka, nuuni saluwan deꞌiya nu Aawaa ufayssiyogaa eriyo gishshawu keehi ufayttoos. (Lee. 27:11) Hara ishay woy michchiya haggaazo moottan siyanawu koyiya uraa demmiyo wodekka nuuni ufayttana danddayoos. Wochchiyo Keelay nu oosuwa, bayida naꞌaa koyiyogan leemisees. Cora asay daro sohotun he naꞌaa koyiis. He naꞌay beettiyo wode A demmida uraa xalla gidennan, ubba asaykka ufayttees. Hegaadankka, galchchan deꞌiya ubbay harati Yesuusa kaalliyageeta gidanaadan hashetidi oottoos. Moottan deꞌiya asa ubbawu sabbakanawu galchchan deꞌiyageeti ubbay hashetana koshshees; qassi issi uri shiiquwa shiiqiyogaa doommiyo wode nuuni ubbay ufayttoos. w24.04 18 ¶13-14

Sinttanaa hidootan nuuni keehi ufayttoos! Yihoowi maaddin daro asay gita waayiyappe kase awu goynnana giidi hidootoos. Qassi, awudeegaappenne aaruwan keehi waayissiya gita waayiya wodekka daro asay Seexaanaa alamiyappe kiyidi nunaara Yihoowawu goynniyogaa nuuni beꞌidi ufayttana! He wodee gakkanaashin nuuni oottiyo keehi koshshiya oosoy deꞌees; he oosuwa mule zaarettidi oottokko. Kumetta saꞌan Xoossaa Kawotettaa mishiraachchuwa sabbakiyo gita maatay nuussi deꞌees. Qassi mata wode hananabaa asawu aggennan yootana koshshees. Ha iita alamee xayanawu keehi matidoogaa asay ubbay erana koshshees. Siiqoy, hegeekka mishiraachchuwa siiqiyogee, asaa siiqiyogee, qassi ubbaappe aaruwan Xoossaa Yihoowanne A sunttaa siiqiyogee Yihoowi, “Oosoy gidana” gaana gakkanaashin yeemuwan, eesuwaninne minnidi aggennan sabbakanaadan oottees. w24.05 19 ¶14-16

Yesuusi hayqqanaappe kasetiya qamman, bana ziqqi oottiyogaa xeelliyagan Pheexiroosanne kiitettida harata gitabaa tamaarissiis. I bana ziqqi oottidi he oosuwa oottiis. Ashkkarati oottiyobaa Yesuusi oottiyogaa kiitettidaageeti beꞌidi malaalettennan aggokkona. Yesuusi bollaara maayidobaa qaari wottidi, pooxaa ekkidi ba xeessan xaaxidi, keriyan haattaa tigidi eta tohuwa meecciyogaa doommiis. (Yoh. 13:4, 5) Yesuusi ba kiittido 12tu tohuwa meecciis. Hegee daro wodiya ekkennan aggenna. I bana kaddana Yihuda tohuwakka meecciis. Shin Yesuusi he ubbabaa bana ziqqi oottidi oottiis. Yaatidi Yesuusi etayyo hagaadan giis: “Taani oottidobaa akeekidetii? Intte tana ‘Asttamaariya,’ qassi ‘Godaa’ yaageeta. Taani Asttamaare, qassi Goda gidiyo gishshawu, intte hegaa giyogee bessiyaba. Hegaa gishshawu, taani Goday, qassi Asttamaaree intte tohuwa meeccido gishshawu, inttekka issoy issuwa tohuwa meeccana koshshees.”—Yoh. 13:12-14. w25.03 10 ¶9-11

Ha alamee nuuni Yihoowara dabbotidi deꞌanawu metootanaadan oottees. Daroti Xoossay deꞌiyogaa ammanokkona. Xoossay koyiyobaa oottennaageeti darotoo injje deꞌuwa deꞌiyaba milatees. Nuuni hegaa beꞌiyo wode nu ammanoy paacettana danddayees. Xoossay deꞌiyogaa nuuni ammanikkokka, I nuna maaddanaagaa siriyogaa doommana danddayoos. Mazamure 73 xaafidaagee issi issitoo hegaadan qoppiis. I Xoossaa higgiya xaasayi xeelliyageeti injje deꞌuwa deꞌiyogaa beꞌiis. Hegaappe denddidaagan, Xoossawu haggaaziyogee aynne maaddenna giidi I qoppiyogaa doommiis. (Maz. 73:11-13) Mazamuraawee ba qofaa laammanaadan maaddidabay aybee? I Yihoowan ammanettiyogaa aggidaageetu bolli gakkanabaa wotti dentti qoppiis. (Maz. 73:18, 19, 27) Xoossawu haggaaziyogee demissiyo goꞌꞌaakka I wotti dentti qoppiis. Nuunikka Yihoowi nuna anjjidobata wotti dentti qoppana danddayoos. w24.06 25 ¶16-17

Beni wode deꞌida amaridaageeti hiyyeesa gidida bantta ishanttussi talꞌꞌido miishshawu dichchaa ekkiyogan eta naaqqidosona. Qassi amarida daannati mattaayiya ekkidi xillo asaa bolli wordduwan pirddidosona. Asay hegaa malabaa oottiyogaa Yihoowi keehi ixxees. (Hiz. 22:12) Nuuni miishshaara gayttidaagan qoppiyo ogiya yiggiyogee loꞌꞌo. Nena hagaadan oychcha: ‘Taani darotoo miishshaabaanne hegan ta shammana danddayiyobaa qoppiyanaa? Taani miishshaa issi urappe talꞌꞌada, he urawu he miishshay koshshenna ga qoppada talꞌꞌido miishshaa zaarennan takkiyanaa? Tawu miishshay deꞌiyogee taani haratuppe aadhdhiyabadan qoppanaadan oottii? Haratussi kehanawu metootiyanaa? Ta ishanttussinne michchonttussi miishshay deꞌiyo gishsha xallawu, eti miishshaa siiqoosona gaada eta bolli pirddiyanaa? Taani hiyyeesata aggada, duretu xalaalaara laggetanawu koyiyanaa?’ Nuuni nu deꞌuwan miishshaa siiqennaadan naagettiyogan Yihoowa dabbo gididi deꞌana danddayoos. Nuuni yaatikko, Yihoowi nuna mulekka yeggenna! w24.06 12-13 ¶17-18

Nuuni paacciya eqettana mala ubbatoo suurebaa oottanawu amottana koshshees. Nuuni ‘iitabaa ixxidi loꞌꞌobaa dosiyo’ wode, suurebaa oottanawu kaseegaappe aaruwan murttoos. (Amo. 5:15) Nuuni mule qoppibeenna woy teqqana danddayenna hanotati nuna gakkiyo wode, nuuni suurebaa amottikko paaciya loytti eqettana danddayoos. Nuuni nuussi danddayettida keenan ayyaanaaban xeelaa wottana koshshees. Nuuni shiiqota shiiqiyo wodenne sabbakiyo wode Yihoowa ufayssanawu kaseegaappe aaruwan amottoos. (Mat. 28:19, 20; Ibr. 10:24, 25) Xoossaa Qaalaa nabbabiyogaaninne xannaꞌiyogan, qassi hegaa wotti dentti qoppiyogan kaseegaappe aaruwan loꞌꞌobaa dosoosinne iitabaa ixxoos. (Yaa. 1:8; Maz. 1:2, 3; 119:97) Yesuusi bana kaalliyageetussi yootidobaa hassaya: “Intte paaciyan gelenna mala . . . mintti woossite.” (Mat. 26:41) Yaatikko, Yihoowa maaduwa demmoosinne A ufayssanawu kaseegaappe aaruwan murttoos.—Yaaq. 4:8. w24.07 17-18 ¶14-16

Neeni harata loohissiyo wode Yihoowa leemisuwa kaallanawu baaxeta. Yihoowi ba aadhdhida eratettaa kehatettan immiyogaa hassaya. Hegaadankka, nuuni nuuyyo deꞌiya eraanne meeziya nu loohissiyogeetuyyo loytti erissanawu koyoos. Nuuni loohissiyo uri sinttappe nu aawatettaa ekkana gi hirggidi harata loohissiyogaa aggana koshshenna. Nuuni hagaadankka qoppana koshshenna: ‘Tana ooninne loohissibeenna! I bawu meezeto.’ Yihoowa asaappe ooninne hegaadan mule qoppana koshshenna. Nuuni loohissiyogeetuyyo nu eridobaa tamaarissiyogaa xalla gidennan, ‘nu deꞌuwakka immiyogan’ ufayttoos. (1 Tas. 2:8) Eti, ‘harata tamaarissanawu danddayiyageeta’ gidanaadan koyoos. (2 Xim. 2:1, 2) Nuuni ubbay nu eridobaa harata kehatettan erissikko, nuunikka haratikka aadhdhida eranchchanne ufayttiyageeta gidana. w24.09 29 ¶12-13

Dumma eri baynnabadan intteyyo siyettikko, hidootaa qanxxoppite. Galchchaa maaddana danddayiyo eeshshay intteyyo deꞌiyogee qoncce. Phawuloosi 1 Qoronttoosa 12:12-30n yootidobaa wotti dentti qoppi simmidi, intte hegaa waati oosuwan peeshshana danddayiyakko akeekanaadan maaddana mala Yihoowa woossite. Yihoowawu oottiya hara ubbatuugaadan inttekka galchchan oottiyobay keehi koshshiyabanne gitaba gidiyogaa Phawuloosi yootidobay qonccissees. Yihoowawu haggaazanawunne intte ishanttanne michchontta maaddanawu inttessi danddayettida ubbabaa oottite. Cimati inttebaa qoppiyogaanne intte oottana danddayiyo aawatettaa immanaagaa ammanettana danddayeeta. (Roo. 12:4-8) Ubba Kiristtaanetikka Yihoowakko shiiqana, harata maaddiyogan ufayttananne Xoossaa ufayssiya ogiyan deꞌana bessees. w24.11 17 ¶12-13

Haanna yeekkanaadaaninne kayyottanaadan oottiya daro metoy O gakkiis. Haanni keettaawaassi hara machchiya deꞌawusu, I sunttay Piniino; qassi A Haanno keehi ixxawusu. Hegaa bollikka, Piniinissi daro naati deꞌoosona; shin Haanna naꞌa yelabeykku. (1 Sam. 1:1, 2) Haanna naꞌa yelana danddayenna gishshawu Piniina O ubbatoo qilliiccawusu. Haanna ‘yeekkana gakkanaassinne qumaa meettaa ixxana gakkanaassi yiillotaasu;’ qassi ba wozanan ‘keehi mishettaasu.’ (1 Sam. 1:6, 7, 10) Haanna woppu gaanaadan maaddidabay aybee? O maaddida issibay Yihoowawu goynnanawu A garuwa biidoogaa. A Yihoowa hagaadan woossaasu: “Tana ne ashkkariyo xeella! Ta mishuwaa be7ada, tana hassaya.” (1 Sam. 1:11) Yihoowi iyyo siyettiyabaa akeekiis, I woosaa siyiisinne guyyeppe A naata yelanaadan oottiis.—1 Sam. 1:19, 20; 2:21. w24.12 21 ¶5-7

Wozoy Yesuusi asawu qoppiyogaa, ubbaappe aaruwan bana kaalliyageetussi qoppiyogaa qonccissees. (Yoh. 13:1) Leemisuwawu, Yesuusi saꞌan oottana koshshiya amaridabati keehi deexxanaagaa, ubba I waayetti hayqqanaagaa eriis. Shin Yesuusi deexxiya he ubbabaa oottidoy Yihoowi A kiittido gishsha xallawu gidennan, asaa keehi siiqiyo gishshataassa. Yesuusi ba kumetta wozanan haratuyyo sabbakiis, eta tamaarissiisinne eta maaddiis. Yesuusi hayqqanaappe kasetiya qammankka wodiya bazzidi ba kiittidoogeetu tohuwa meecciis, eta tamaarissiis, minttettiisinne etawu kaaletuwa yootiis. (Yoh. 13:12-15) Yesuusi mittaa bolli kaqettido wodiyankka, hayqqana haniya panggawu hidootaa yootiisinne ba aayeessi koshshiyabaa kunttiya ura sunttiis. (Luq. 23:42, 43; Yoh. 19:26, 27) Yaaniyo gishshawu, Yesuusi asaa gishshawu hayqqiyogaa xalaala gidennan, saꞌan deꞌido laytta ubban asaa keehi siiqiyogaa bessiis. w25.01 23 ¶11

Yihoowi nuuyyo atto giyo wode nuuni demmiyo laꞌatettaa akeekanaadan maaddanawu Geeshsha Maxaafay issi leemisuwa yootees. Nuuni laattido nagaraa gaasuwan “nagarawu aylle” gidiyogaa Geeshsha Maxaafay yootees. Shin Yihoowi nuuyyo atto giido gishshawu nuuni ‘nagaraa aylletettaappe kiyida’ ashkkaratu mala gidida. (Roo. 6:17, 18; Ajj. 1:5) Yihoowi nuuyyo atto giidoogaa nuuni eriyo wode laꞌa kiyida aylledan ufayttana danddayoos. Yihoowi ba Naꞌaa baggaara wozuwa yarshshuwa qanxxido gishshawu, nuuni leemiso hanotan paxida gaana danddayettees. (1 PHe. 2:24) Nuuni nagaraa oottiyo wode, Yihoowara dabbotido nu dabbotay moorettees. Shin wozuwa yarshshuwappe denddidaagan I nuuyyo atto gees, qassi nuuni aara zaarettidi dabbotana danddayoos. Wolqqaama harggiyappe paxida asi keehi ufayttiyogaadan, nuunikka Yihoowara zaarettidi dabbotido gishshawunne an sabettido gishshawu keehi ufayttoos. w25.02 11 ¶16; 13 ¶17

Taalanttiyabaa qonccissiya leemisuwan, Yesuusi bantta godawu ammanettida naaꞌꞌu aylletubaanne ammanettibeenna issi aylliyabaa yootiis. (Mat. 25:14-30) Ammanettida naaꞌꞌu aylleti ayyaanan tiyettida ammanettida Kiristtaaneta qonccissoosona. Goday Yesuusi eti ‘bantta godaara ufayttanaadan’ shoobbees. Eti koyro dendduwa denddidi saluwan woytuwa ekkana. (Mat. 25:21, 23; Ajj. 20:5b) Azalla ayllee oottido iitabay tiyettidaageeti naagettana koshshiyabaa bessees. Waatidi? Eti ubbatoo minni oottana koshshees. Geelaꞌotubaa yootiya leemisuwagaadan, taalanttiyabaa yootiya leemisuwankka Yesuusi tiyettidaageeti azalla gidanaagaa yootiiddi deꞌenna. Eti minni oottiyogaa aggikko aybi hananaakko I yootiiddi deꞌees. Eti “Xoossai xeesidoogaanne dooridoogaa minttanau” baaxetokkona; qassi saluwa Kawotettaa laattokkona. w24.09 22 ¶10; 23 ¶12-13

Nuuni ubbay nuussinne nu soo asawu koshshiyabaa kunttanawu koyoos. (Era. 7:12; 1 Xim. 5:8) Nuuni ay mala oosuwa oottanaakko dooriyo wode, hegee ay keena miishshaa demissiyakko qoppiyogee qoncce. Shin nu qoppiyobay hegaa xalaala gidikko beꞌiyogaadan deꞌiya asa gidoos. Nuuni ammaniyogaadan deꞌiyageeta gidikko, he oosoy Yihoowara nu dabbotido dabbotaara waani gayttana danddayiyakkokka qoppoos. Nuna hagaadan oychchana danddayoos: ‘He oosoy Yihoowi ixxiyobaara gayttidabee?’ (Lee. 6:16-19) ‘He oosoy ta goynuwawu xube gidii, qassi taani so asaappe adussa wodiyawu haakkanaadan oottii?’ He oyshatussi ee gaada zaarikko, ooso demmiyogee metiyaba gidikkokka he oosuwa oottennan aggiyogee loꞌꞌo. Nuuni ammaniyogaadan deꞌiyo gishshawu, nuussi koshshiyabaa Yihoowi kunttanaagaa aynne sirennaagaa bessiyabaa kuuyoos.—Mat. 6:33; Ibr. 13:5. w25.03 21 ¶5-6

Nuuni nu ishanttanne michchontta Yihoowagaadan xeellanawu ubbatoo baaxetana koshshees. Eta balan, hegeekka eti loddan loddan aggana danddayiyo eeshshan gidennan, eta loꞌꞌo eeshshan ubbatoo xeelaa wottiyogan yaatana danddayoos. Nuuni nu giddon merettana danddayiya ay metuwanne siiquwan giigissana danddayoos. Yaatiyo wode, nuuni hegaadan siiquwa bessanaadan koyiya asaykka ayyaanaa gannatiya yame gidanawu koyana danddayees. Yihoowi nuussi giigissido gannatiya gishshawu merinawu A galatiyageeta gidoos. Gazddanawu, ufayttanawu, woppu gaanawunne sarotettan deꞌanawu koyiya ooninne ayyaanaa gannatiya yaananne hegaappe mule kiyennan deꞌana koshshees! Shin Seexaanay nuna yaappe kessanawu loytti baaxetiyo gishshawu, nuuni keehi naagettana koshshees. (1 Phe. 5:8; Ajj. 12:9) Seexaanay ba halchchuwa polanaadan eeno gookko. Keehi loꞌꞌiya, geeshshanne sarotettay deꞌiyo ayyaanaa gannatee moorettennaadan nuussi danddayettida ubbabaa oottiyageeta gidoos. w24.04 24-25 ¶18-19

Yelidaageetoo, intte naati Yihoowawu haggaazanawu loytti koyanaadan maaddite. Geeshsha Maxaafaa xannaꞌiyogaa, shiiqota shiiqiyogaanne sabbakiyogaa mala intte Yihoowara dabbotidi deꞌanaadan maaddiyabati intte deꞌuwan keehi koshshiyabata gidiyogaa intte haasayiyobaaninne oottiyoban intte naata tamaarissite. Hegee xayikko, intte naati Yihoowa Markka gidiyogee “so asaa haymaanootiya” kaalliyogaa xalla giidi qoppana danddayoosona. Hegaappe denddidaagan, eti Yihoowawu goynniyogee darin koshshennabadan qoppana, woy awu haggaaziyogaa aggana danddayoosona. Issi uri Yihoowawu haggaaziyogaa aggikko, hegee I zaarettidi Yihoowara mule dabbotana danddayenna giyogee? Chii, I zilꞌꞌetti laamettidi Yihoowakko simmana danddayees. Yaatanawu I bana ziqqi oottidi galchchaa cimatuppe maaduwa ekkana koshshees. (Yaaq. 5:14) Zaarettidi Yihoowara dabbotanawu baaxetiyogee bessiyaba! w24.07 24-25 ¶18-19

Aqo oyqqanawu qoppidi issippe aattiyo wodee Yihoowa bonchchissiyagaa gidanaadan waatana danddayeetii? Intte siiqoy gujji gujji biyo wode kaseegaappe aaruwan siiqetteeta. Yihoowa azzanttiya aybanne oottennaadan inttena aybi maaddana danddayii? Pokkobaa haasayennaadan, asi baynnasan issippe takkennaadaaninne likkiyappe aattidi uyennaadan naagettana koshshees. (Efi. 5:3) Hageeti intte inddan gayttanawu keehi qaaqqatanaadaaninne suurebaa oottanawu metootanaadan oottana danddayoosona. Intte issoy issuwa bonchchanawunne Yihoowi kessido maarata kaallanawu waatana danddayiyakko ubbatoo haasayiyogee loꞌꞌo. (Lee. 22:3) Aqo oyqqanawu qoppidi wodiya aattiyageeti issoy issuwa siiqiyo siiqoy gujji gujji biyo wode suure ogiyan intte siiquwa qonccissanawu kuuyana danddayeeta. Shin intte inddan gayttanawu keehi qaaqqatiyo wode loꞌꞌobaa kuuyanawu keehi metootana danddayeeta. (Sii. 1:2; 2:6) Qassi intte siiquwa qonccissiyo wode intte naagettennan aggidi, Yihoowa ufayssennabaa oottana danddayeeta. (Lee. 6:27) Hegaa gishshawu, intte aqo oyqqanawu qoppidi wodiya issippe aattiyogaa doommido heeran, Yihoowi kessido maarata, qassi intte siiquwa bessanawu oottanabatanne oottennabata haasayite.—1 Tas. 4:3-7. w24.05 29 ¶10-11

Nuuni haratussi maadoy koshshiyo wode, ubba qassi meto wodiyan nuuni eta maaddanaagaa eti eranaadan koyoos. (Lee. 17:17) Harati nenan ammanettanaadan waatana danddayay? Leemisuwawu, nu gelido qaalaa naagiyogaaninne pooꞌissennan agganawu nuussi danddayettida ubbabaa oottiyogan ubba wode Yihoowagaa mala eeshshata bessanawu baaxetana danddayoos. Ammanettiya cimati galchchaa maaddoosona. Waatidi? Ishanttinne michchontti banttawu maadoy koshshiyo wode ubban cimatuyyo dawalana danddayiyogaa eriyogee eti darin unꞌꞌettennaadan maaddees. Aassiyageeti cimati eta maaddanawu koyiyogaa eriyo wode eti banttana cimati siiqiyogaa akeekoosona. Cimati bantta qofaappe gidennan, Geeshsha Maxaafaappenne nu xuufetuppe zoriyo wode ishanttinne michchontti etan loytti ammanettoosona. Qassi ishanttinne michchontti bantta xuuraa haratussi yootennanne gelido qaalaa naagiya cimatun ammanettoosona. w24.06 30 ¶14-15

Yihoowi nu meto ubbaa ha wodiyan qaarana giidi qoppokko, shin I nuna ubbaa maaddana. (Maz. 41:3) I ba geeshsha ayyaanaa baggaara nuuni genccanaadan nuussi wolqqaa, hayyuwanne woppaa immees. (Lee. 18:14; 2 Qor. 4:7) Sinttappe saho ubbay xayanaagaa yootiya hidootaa baggaarakka I nuna minttettees. (Isi. 33:24) Nuuni unꞌꞌettiyo wode Geeshsha Maxaafaa baggaara Yihoowi yootiyobay nuna minttetteesinne nuuni woppu gaanaadan maaddees. (Roo. 15:4) Arggo Afirkkan deꞌiya issi michchiya kansseree O oyqqidoogaa erada darotoo yeekkaasu. A hagaadan gaasu: “Tana keehi minttettida xiqisee Isiyaasa 26:3. . . . Ha xiqisee Yihoowi nuuni woppu gaanaadaaninne ay metuwakka genccanaadan maaddana danddayiyogaa yootees.” Hidooti baynnaba milatiya hanotay nena gakkin, nena minttettida xiqisee deꞌii? w24.12 24 ¶17-18

Bayidaageetuura gayttidaagan cimati etawu atto gaanawu baaxetoosona. Yihoowawu haggaaziyogaa aggidaageeti simmanaadan eti koyoosona. (Luq. 15:22-24, 32) Nagaraa oottida uri simmiyo wode, saluwan deꞌiyageetikka, saꞌan deꞌiyageetikka keehi ufayttoosona! (Luq. 15:7) Bantta nagaran zilꞌꞌettidi laamettanawu koyennaageeti galchchaa yame gididi deꞌanaadan Yihoowi koyenna. Gidikkonne, I eta maaddanawu koyees. Eti simmanaadan I koyees. Qassi asay ba nagaran zilꞌꞌetti laamettiyo wode, Yihoowawu siyettiyabaa akeeka. Hoose7a 14:4y hagaadan gees: “Ta hanqqoi etappe simmiis; hegaa gishshau, taani eta makkala hanuwaappe eta pattana; pattada eta wozanappe siiqana.” Cimati Yihoowawu siyettiyabaa akeekiyogee issi uri ba nagaran zilꞌꞌettidi laamettiyogaa doommidoogaa bessiyabaa akeekanawu baaxetanaadan maaddees. Qassi hegee Yihoowawu haggaaziyogaa aggidaageeti sohuwara akko simmanaadan denttettiyaba. w24.08 28 ¶8-9

Amaridaageeti nuuni etawu oottidobaa gishshawu issi issitoo galatokkona. Harati issi issitoo, nuuni eta maaddanawu oottido ubbabaa dogana danddayoosona; woy nuuni eta maaddanawu nu wodiya, nu wolqqaanne nu miishshaa ay keena goꞌettidaakko akeekennan aggana danddayoosona. Hegaadan hanikko, nuuni ufayssaa xayennaadan woy azzanennaadan waatana danddayiyoo? Nuuni keehi ufayttanaadan oottiyay haratussi immiyogaappe attin, eti hegaa ay keena nashshiyona giyagaa gidenna. (Oos. 20:35) Harati nu imotaa nashshennabadan nuuyyo siyettiyo wodekka ufayttiiddi immanawu kuuyana danddayoos. Hegawu nuna aybi maaddana danddayii? Neeni haratuyyo immiyo wode Yihoowa milatiyogaa hassaya. Asay galatiyagaa gidin aggin Yihoowi ubbawu loꞌꞌobaa oottees. (Mat. 5:43-48) Nuunikka “aybanne demmana giidi qoppennan” haratuyyo immikko, nuuni ‘gita woytuwa demmanaagaa’ Yihoowi qaalaa geliis. (Luq. 6:35) Hegaa gishshawu asay nena ubbatoo galatana xayikko azzanoppa. Neeni “ufaissan immiya uraa” gidiyo gishshawu harata maaddanawu oottido loꞌꞌobawu Yihoowi nena woytanaagaa hassaya.—Lee. 19:17; 2 Qor. 9:7. w24.09 29 ¶14-16