Hidaare

Cimati galchchaappe kiyidaageetussi qarettiya Yihoowa leemisuwa kaalloosona. Leemisuwawu, beni wode, Yihoowi ba asay Israaꞌeelati bantta nagaran zilꞌꞌettidi laamettana gakkanaashin naagennan I eta maaddiis. Eti bantta nagaran zilꞌꞌettidi laamettana xayikkokka, Yihoowi ba erissidobaa yootiyageeta etakko kiittiis. Hooseꞌi ba machchiya gita nagaraa oottiyogaa aggana xayikkokka, iyyo atto gaanaadaaninne O zaarettidi ekkanaadan Yihoowi awu yootiis. Yaatiyogan Yihoowi qarettiyagaa gidiyogaa ba asaa tamaarissiis. (Hoo. 3:1; Mil. 3:7) Cimati Yihoowa leemisuwa kaalliyogan nagaraa oottida uri simmanaadan wozanappe koyoosona; qassi I metootennan simmanaadan maaddoosona. Bayida naꞌaabaa yootiya leemisuwan A aaway “woxxi biidi A qoommidi yeriis.” (Luq. 15:20) Aaway ba naꞌay maarotaa oychchana gakkanaashin naagibeennaagaa akeeka. Aaway ba naꞌaa siiqiyo gishshawu, woxxidi akko biis. w24.08 28 ¶7-8

Hachchi gallassaa xiqisee qonccissiyogaadan, Yihoowi ba aadhdhida eratettaa ba xalaalawu goꞌettenna. I hegaa haratuyyo kehatettan immees. Yihoowi aadhdhida eratettaa immiyo wode “borennan” immiyogaakka akeeka. Nuuni kaaletuwa A oychchiyo wode yeellatanaadan I mule koyenna. Shin nuuni hegaa demmanawu A woossanaadan I koyees. (Lee. 2:1-6) Nuuni shin waatana danddayiyoo? Nuuni eridobaa haratuyyo yootiyogan Yihoowa milatana danddayiyoo? (Maz. 32:8) Eridobaa harata erissiyo daro injjee Yihoowa asawu deꞌees. Leemisuwawu, nuuni oorattata haggaazuwan darotoo loohissoos. Galchchawu oottiyageetinne haattan muukettida ishantti galchchan banttawu imettiya aawatettaa waati polanaakko eranaadan cimati danddayan maaddoosona. Qassi keexxiyogaaninne bottokoniyogan meezee deꞌiyo ishanttinne michchontti Yihoowa dirijjitee goꞌettiyo keettata keexxanaadan harata loohissoosona. w24.09 28-29 ¶11-12

Ishanttoo, intte cima gidanawu ‘borettennaageeta’ gidana bessees; hegaa giyogee intteyyo loꞌꞌo eeshshay deꞌiyo gishshawu galchchan deꞌiya harati inttebaa loꞌꞌobaa qoppoosonanne ooninne inttena iitaban amassalanaadan oottiya gaasoy baawa giyogaa. (1 Xim. 3:2) Hegaa bollikka, intte galchchaappe kareera deꞌiya asankka nashettiyageeta gidana koshshees. Yihoowawu haggaazenna asay intte ammaniyoban maayettennan aggiyogee tuma. Shin eti intte tumanchchanne loꞌꞌo asa gidiyogaa siranaadan oottiya ayba gaasoynne deꞌana bessenna. (Dane. 6:4, 5) Inttena hagaadan oychchite, ‘Galchchaaninne galchchaappe kareera taayyo loꞌꞌo sunttay deꞌii?’ Intte ‘loꞌꞌobaa dosiyageeta’ gidikko, haratuyyo deꞌiya loꞌꞌo eeshshata akeekeetanne hegawu eta galateeta. (Tii. 1:8) Intte haratuyyo loꞌꞌobaa oottanawu, ubba koshshiyagaappe aarobaa oottanawu keehi koyeeta. Cimati loꞌꞌobaa dosiyogee keehi koshshiyoy aybissee? Eti galchchan deꞌiyageeta minttettanawunne bantta aawatettaa polanawu bantta alꞌꞌo wodiyappe dariya baggaa goꞌettiyo gishshataassa. (1 Phe. 5:1-3) Eti darobaa oottana koshshikkokka, harata maaddiyogan keehi ufayttoosona.—Oos. 20:35. w24.11 20-21 ¶3-5

Galchchawu oottiyageeti keehi koshshiyabata galchchan oottoosona. Kiitettida Phawuloosi ha ammanettida ishantta galatiis. Leemisuwawu, I Piliphphisiyusan deꞌiya Kiristtaanetuyyo xaafido dabddaabbiyan cimatussi xalla gidennan, galchchan oottiyageetussikka sarotaa kiittiis. (Pili. 1:1) Yelaga woy cima gidin haattan muukettida daro ishantti galchchawu oottiyageeta gidiyogan keehi ufayttoosona. Leemisuwawu, Deevani galchchawu oottiyagaa gididi sunttettiyo wode ayyo layttay 18. Shin Luyisi galchchawu oottiyagaa gididoy awu layttay 50ppe aadhdhi simmiina. Galchchawu oottiyagaa gididoogan awu aybi siyettidee? I hagaadan giis: “Galchchan deꞌiya ta ishanttanne michchontta hagaa mala ogiyan maaddiyogan keehi ufayttays. Eti tana keehi siiqiyogaa bessidosona; qassi haꞌꞌi taani eta siiqiyogaa bessana danddayays.” Galchchawu oottiya daroti hegaadan qoppoosona. Intte haattan muukettida ishantta gidikkokka, hanno gakkanawu galchchawu oottiyageeta gidana xayikko hegaa halchchana danddayeetii? w24.11 14 ¶1-3

Yihuuda Kawoy Hizqqiyasi awu layttay 39 gidido wode, wolqqaama sahuwa sahettiis. Hizqqiyasi he sahuwan hayqqanaagaa Xoossay erissidobaa yootiya Isiyasi yootiis. (2 Kaw. 20:1) Hizqqiyasi hegaa siyido wode keehi azzanidi mishettidi yeekkiis. I Yihoowa mintti woossiis. Yihoowi Hizqqiyasa woosaa siyidonne A afuttaa beꞌido wode awu qarettidi hagaadan giis: “Taani ne woosaa siyaas; ne afuttaakka be7aas. Taani nena pattana.” Yihoowi A maaridi awu layttaa gujjanaagaanne Yerusalaame katamaa Asooretu kushiyappe ashshanaagaa Isiyasa baggaara yootiis. (2 Kaw. 20:4-6) Nena oyqqida harggiyappe neeni paxennaba milatikko waatuutii? Neessi siyettiyabaa Yihoowawu yoota. Neeni yeekkaydda woossikkokka I ne woosaa siyana. ‘Gita maarotaa Aawaynne ubbaban minttettiya Xoossay’ nu waaye ubban nuna minttettanaagaa Geeshsha Maxaafay yootees.—2 Qor. 1:3, 4. w24.12 24 ¶15-17

Hayquwappe denddiyageeta mokkiyogee keehi ufayssiyagaa gidana! Yihoowi medhdhido darobata tamaariyogan abaa loyttada eriyogee nena ay keena ufayssanaakkokka qoppa. (Maz. 104:24; Isi. 11:9) Aybinne zilꞌꞌiyabi baynnan Yihoowawu goynniyogee ha ubbabaappe aaruwan keehi ufayssiyaba gidana! Nagaran ‘guutta wodiyawu ufayttana’ gaada sinttappe demmana ha anjjota agganawu koyay? (Ibr. 11:25) Mule koyakka! Ha anjjoti nuuni ha wodiyan aggibayiyo aybippekka aadhdhoosona. Gannate saꞌay ubbatoo hidoota xalla gididi attennaagaa hassaya. Wurssettan, nuuni yan deꞌana. Ha ubbabay hanana danddayiyoy Yihoowi nuna keehi siiqidi ba Naꞌay nuuyyo hayqqanaadan oottido gishshataassa! w25.01 29 ¶12

Yihoowan ammaniya daro asatubaa Ibraawe maxaafay yootees; etappe issoy Muusa; awu mino ammanoy deꞌees. (Ibr. 3:2-5; 11:23-25) Xoossay he bazzuwan malaalissiya ogiyan ba asawu qumaanne haattaa immido gishshawu, Muuse ammanoy hada attibeenna. (Kes. 15:22-25; Maz. 78:23-25) Shin Muuseyyo mino ammanoy deꞌikkokka, malaalissiya ogiyan Israaꞌeelati Gibxxe aylletettaappe laꞌa kiyin issi laytta heerappe simmin, Yihoowi ba asawu ashuwa immanawu yootidoogaa polanaakkonne siriis. Bazzuwan deꞌiya daro miiloone asawu gidiya ashuwa Yihoowi immana danddayiyogaa Muusee qoppibeenna. Yihoowi Muusa, “GODAA kushee qantteeyye?” giidi oychchiis. (Qoo. 11:21-23) Yihoowi Muusa, ‘Taani giidobaa oottana danddayennabadan qoppay?’ giidi oychchidoogaa mala. w25.03 26 ¶1-2

Bashshaa Haattaa wode hanida ubbabay sinttappe hananabaa bessees giyogee likkee? Likke gidenna. Aybissi? Geeshsha Maxaafay hegaabaa yootenna gishshataassa. Yesuusi I simmiyo wodiya ‘Nohe wodiyara’ geeddarissidoogee tuma. Shin I Nohe wode hanida ubbabay, hegeekka Yihoowi markkabiya penggiya gorddidoogee sinttappe hananabaa bessees gibeenna. (Mat. 24:37-39) Nohee Yihoowi yootidobaa siyidi waatidee? I markkabiya keexxiyogan ammanuwa bessiis. (Ibr. 11:7; 1 Phe. 3:20) Hegaadankka, Xoossaa Kawotettaa mishiraachchuwa siyiya asay hegaa ammaniyogaa bantta oosuwan bessana koshshees. (Oos. 3:17-20) Pheexiroosi Noha ‘xillotettaabaa yootidaagaa’ giidi xeesiis. Ha wodiyan kumetta saꞌan deꞌiya asawu nuuni sabbakanawu baaxetoos; qassi hegaa minni oottiiddi deꞌoos. Shin nuuni ay keena baaxetikkokka, wurssettay yaanaappe kase ubba asawu sabbakana danddayokko. w24.05 9-10 ¶3-5

Nuuni Yihoowa dabbotussi kehatettaanne bonchchuwa bessiyo ogeta koyoos. (Roo. 12:10) Waatidi? Hegaadan oottiyo issi ogee Mazamure 15:4n qoncciis; Yihoowa dunkkaaniyan deꞌiya imattay ‘ba caaqqidobay ay deexxinkka polees.’ Nuuni gelido qaalaa polennaagee harata qohiyogee qoncce. (Mat. 5:37) Leemisuwawu, Yihoowi aqo laggeti aqo oyqqiyo wode gelido qaalaa naaganaadan koyees. Yelidaageeti bantta naatussi gelido qaalaa polanawu baaxetiyo wodekka I ufayttees. Nuuni Xoossaanne harata siiqiyo gishshawu, nu gelido qaalaa polanawu nuussi danddayettida ubbabaa oottoos. Nuuni Xoossaa dabbota bonchchiyo hara ogee eta imatuwa mokkiyogaanne etawu kehiyogaa. (Roo. 12:13) Ishanttuuranne michchonttuura wodiya aattiyogee etaaranne Yihoowara dabbotaa minttanaadan maaddees. Qassi nuuni imattaa mokkiyo wode, Yihoowa leemisuwa kaalloos. w24.06 12 ¶15-16

Banttana ziqqi oottiyageetussi Yihoowi tumaa qonccissees. (Mat. 11:25) Nuuni nuna ziqqi oottidoogee tumaa tamaaranaadan maaddiis. (Oos. 8:30, 31) Gidikkonne, otorettennaadan nuuni naagettana koshshees. Otorettiyogee Geeshsha Maxaafay yootiyo maaratuppenne Yihoowa dirijjitee immiyo kaaletuwappe nu qofay aadhdhiyabadan nuuni qoppanaadan oottana danddayees. Nuna ziqqi oottidi deꞌanawu, nuna Yihoowara geeddarssiyo wode nuuni ay keena laafakko hassayana koshshees. (Maz. 8:3, 4) Kaseegaappe aaruwan nuna ziqqi oottanawunne tamaaranawu eeno giyageeta gidanawu Yihoowi maaddanaadan oychchanakka danddayoos. Nuuni Geeshsha Maxaafaappenne Yihoowa dirijjitiyappe tamaaridobay nu qofaa gidennan, A qofaa nashshanaadan nuna maaddana. Neeni Geeshsha Maxaafaa nabbabiyo wode Yihoowi banttana ziqqi oottiyageeta dosiyogaa, qassi otorettiyageeta, ayyiyageetanne axiraariyageeta ixxiyogaa bessiyabaa koya. Qassi haratun neeni erettanaadan oottiya haggaazo maatay neeyyo imettiyo wode nena ziqqi oottada deꞌanawu baaxeta. w24.07 10 ¶8-9

Yesuusi 1919ppe doommidi, sabbakiyo oosuwa darajjayanaadaaninne bana kaalliyageetuyyo ayyaanaabaa qumaa giigissanaadan tiyettida amarida attumaageeta sunttiis. (Luq. 12:42) Yihoowi eta oosuwa anjjiiddi deꞌiyogee qoncce. (Isi. 65:13, 14) Nuuni darajjayettana xayikko, Yesuusi immido oosuwa oottana danddayokko. (Mat. 28:19, 20) Leemisuwawu, ishantti nuuni nu galchchaa haggaazo moottan sabbakanaadan darajjayennaba gidiyakko, ubba asay ba koyidosan sabbakana danddayees. Amarida moottati darotoo oosettana danddayoosona, shin hara moottati mule oosettennan aggana danddayoosona. Darajjayettiyogee demissiyo hara goꞌꞌata qoppana danddayay? Yesuusi saꞌan deꞌiyo wode bana kaalliyageeta darajjayidoogaadan, ha wodiyankka Xoossaa asaa darajjayees. w24.04 8-9 ¶2-4

Qaayeli Addaamessinne Hewaanissi bayra naꞌa. I bana yelidaageetuppe iitabaa oottiyo amuwa laattiis. Hegaa bollikka Geeshsha Maxaafay abaa hagaadan gees: “I oottido oosoi iita.” (1 Yoh. 3:12) Geella Yihoowi ‘Qaayelanne A yarshshuwa ekkibeennay’ hegaassa gidennan aggenna. Ba eeshshaa laammiyogaa aggidi “Qaayeeli keehi yiillotiis; ba som77uwaakka xumissiis.” Yaatin Yihoowi waatidee? Qaayela haasayissiis. (Doo. 4:3-7) Yihoowi Qaayela kehatettan haasayissidoogaanne I loꞌꞌobaa oottikko A anjjanaagaa yootidoogaa akeeka. Qassi Yihoowi Qaayeli hanqqettidoogee iitabaa kaalettiyogaakka yootiis. Qaayeli siyennan ixxidoogee azzanttiyabaa. I ba nagaran zilꞌꞌettidi laamettanawu Yihoowi A maaddanaadan koyibeenna. Qaayeli Xoossay yootiyobaa siyennan ixxido gishshawu, nagaran zilꞌꞌettidi laamettanaadan hara oonanne maaddennan agganawu Yihoowi kuuyidee? Chii. w24.08 10 ¶8

Israaꞌeelati sinttanaa wodiya yeemuwan naagana danddayoosona. Yihoowi anjjin Israaꞌeelati I qaalaa gelido biittan adussa layttaa deꞌana danddayoosona. He biittay keehi loꞌꞌiyanne kumi palahiya kattay mokkiyo biitta! Muusee he biittaabaa etawu hagaadan qonccissiis: “Xoossai intteyyo . . . intte keexxibeenna gitanne lo77o katamati kumido biittaa immana. Intte kunttibeenna duretai kumido keettata, intte bookkibeenna ollata, intte tokkibeenna woinetanne zaitiyaa wogarata intteyyo [immana.]” (Zaa. 6:10, 11) Israaꞌeelati naagettanaadankka Muusee yootiis. Eti ha loꞌꞌiya biittan ubbatoo deꞌanawu Yihoowa higgeta azazettana koshshiis. Yihoowi yootiyobaa siyiyogaaninne ‘aara ohettiyogan eti deꞌuwa dooranaadan’ Muusee mintti yootiis. (Zaa. 30:20) Shin, Israaꞌeelati Yihoowawu azazettibookkona. Hegaa gishshawu, Xoossay guyyeppe Asooreti, qassi Baabilooneti Israaꞌeelata xoonidi, omooddidi efaanaadan oottiis.—2 Kaw. 17:6-8, 13, 14; 2 Odi. 36:15-17, 20. w24.11 9 ¶5-6

Ha wodiyan daroti Yesuusan ammaniyogaa yootoosona; qassi eti A, banttana ashshiyagaa yaagoosona. (Yoh. 6:29) Shin hegaa xallay gidenna. Galiilan deꞌiya daroti koyro heeran Yesuusan ammanidaba gidikkokka, guyyeppe A ammaniyogaa aggidosona. Aybissi? He asatuppe daroti Yesuusi eti koyiyobaa kunttido gishsha xallawu A kaallidosona. Eti I eta pattanaadan, qumaa immanaadaaninne eta ufayssiyabaa yootanaadan koyidosona. Shin Yesuusi ha saꞌaa yiidoy eti koyiyobaa etawu immana xalaalaassa gidennaagaa qonccissiis. I eti tumuppe A kaalliyageeta gidanawu oottana koshshiyabaa tamaarissanawu yiis. Eti akko “yaana” koshshiis; hegeekka I yootiyobaa siyananne I tamaarissido azazo ubbaa naagana koshshiis.—Yoh. 5:40. w24.12 12 ¶12-13

Issi azinay ba machchiyo qohiyogaanne I kahay qumꞌꞌanaadan oottiya hanotan mattumaa gayttanaadan wolqqanttiyogaa agganaadan aybi maaddana danddayii? I Yesuusa leemisuwa kaallanawu baaxetana danddayees. I bana kaalliyageeta oyqqido ogee issi azinay ba machchiyo waati oyqqanaakko loꞌꞌo leemiso gidees. Yesuusi ba kiittidoogeeta oyqqidonne haasayissido ogiyappe azinati tamaarana danddayiyobaa beꞌa. Yesuusi ba kiittidoogeetussi ubbatoo kehiis, qassi eta bonchchuwan oyqqiis. I etawu meqettaa iiti erenna. Yesuusi ba wolqqaa bessiyogan eti awu yayyanaadan oottibeenna. Shin I bana ziqqi oottidi etawu haggaaziis. (Yoh. 13:12-17) I bana kaalliyageetussi hagaadan giis: “Taani ashkkenne ziqqi giyagaa gidiyo gishshawu, . . . taappe tamaarite; yaatikko, intte gazddana.” (Mat. 11:28-30) Yesuusi ashkke gidiyogaa akeekite. Ashkke uri shugo gidenna. I bana naagana danddayiya mino asa. Yiilloyiyabay merettiyo wode I woppu geesinne ba yiilluwa mittana danddayees. w25.01 10 ¶10-11

Ha iita alamiya wurssettay mati mati biyo wode, kaseegaappe aaruwan miishshay metana danddayiyogaa nuuni eroos. Polotikaa hanotay laamettiyogee, olay, meretay gattiyo daafabay woy ubbasaa gakkiya ooratta harggee duussay alꞌꞌanaadan woy qassi nuuni nu oosuwa, nu aquwa woy nu keettaa xayanaadan oottana danddayees. Yihoowan ammanettiyogaa bessiyabaa kuuyanaadan nuna aybi maaddana danddayii? Nena qofissidabaa Yihoowawu yootiyogee keehi koshshiyaba. Hegee nena keehi maaddana. Loꞌꞌobaa kuuyanawu koshshiya hayyuwa demmanawu, qassi woppu gaanaadaaninne keehi hirggennaadan maaddana mala Yihoowa woossa. (Luq. 12:29-31) Deꞌuwassi koshshiyabatun neeni woppu gaada deꞌanaadan maaddana mala A mintta woossa. (1 Xim. 6:7, 8) Neeni miishshaa metootiyo wode waatanaakko yootiya qofaa nu xuufetuppe pilgga. Miishshaa metuwabaa yootiya jw.org saytiyan deꞌiya biidotinne xuufeti banttana maaddidoogaa daroti yootoosona. w25.03 28-29 ¶10-11

Hara biittaa asay Xoossaa asa gidiyo wodee gakkiis. Kiitettida Pheexiroosi Qornneliyosawu sabbakanaadan Xoossay azaziis; Qornneliyosi hara biittaa asatuppe Kiristtaane gidida koyro asa. Ayhudati darotoo hara biittaa asatuura gayttanawu koyenna gishshawu, Pheexiroosi hara biittaa asatuyyo sabbakanawu ba qofaa laammana koshshiis. Pheexiroosi Xoossay hara biittaa asaa xeelliyo ogiya akeekido wode ba qofaa laammiis. Yaatiyo gishshawu, Qornneliyosi Pheexiroosi baakko yaanaadan oychchin, “aynne sirennan” biis. (Oos. 10:28, 29) I Qornneliyosayyonne A soo asaayyo sabbakin eti haattan muukettidosona. (Oos. 10:21-23, 34, 35, 44-48) Unddenna layttaappe simmin, Pheexiroosi ba mala Kiristtaaneti issi ‘qofan deꞌanaadan’ minttettiis. (1 PHe. 3:8) Geeshsha Maxaafaappe tamaarido Yihoowa qofaadan nuuni qoppikko, nu ishanttuuranne michchonttuura issi qofan deꞌana danddayoos. w25.03 9-10 ¶7-8

Issibaa xeelliyagan alamiya xeelaynne qofay wottiyobi baynna Xoossaa qofaara mule gayttenna. (Lee. 17:15) Yaatiyo gishshawu, nuuni bala qofaa shaakki eridi hegaappe haakkiyogee keehi koshshiyaba. Eqettiyageeti nuuni xala gidiyogaanne Yihoowawu haggaaziyogaa agganaadan oottenna mala nuuni nasagettana koshshees. Kiitettida Phawuloosi Ibraawe Kiristtaaneti ayyaanaaban kayma gidanaadan zoridobaa nuunikka oosuwan peeshshana koshshees. Hegee tumaa loytti eriyogaaranne Yihoowagaadan qoppiyogaara gayttidaba. Nuuni haattan muuketti simmidikka hegaadan ubbatoo oottana koshshees. Nuuni tuman ay keena wodiya takkikkokka, Xoossaa Qaalaa ubbatoo nabbabananne xannaꞌana koshshees. (Maz. 1:2) Ubbatoo Geeshsha Maxaafaa xannaꞌiyogee nu ammanoy minnanaadan maaddana; hegee Ibraawe Kiristtaanetussi deꞌanaadan Phawuloosi yootido eeshsha.—Ibr. 11:1, 6. w24.09 10 ¶7-8

Nuuni Yihoowara loytti dabbotikko, awu ammanetti deꞌanawu metootokko. Yooseefi hegaadan oottiis. I pokkobaa oottennan ixxiis. Yooseefi Xoossaara loytti dabbotido gishshawu A azzanttanawu koyibeenna. (Doo. 39:9) Nuuni Yihoowara loytti dabbotanawu wodiya bazzidi woossananne A Qaalaa xannaꞌana koshshees. Yaatikko nuuni aara dabbotaa minttoos. Yooseefaagaadan, nuunikka Yihoowara loytti dabbotikko, A azzanttiyabaa aybanne oottanawu koyokko. Yihoowi deꞌo Xoossaa gidiyogaa dogidaageeti sohuwara appe haakkana danddayoosona. Israaꞌeelati bazzuwan deꞌiyo wode hanidabaa beꞌa. Yihoowi deꞌiyogaa eti eriyaba gidikkokka, I etassi koshshiyabaa kunttanaagaa siriyogaa doommidosona. (Kes. 17:2, 7) Hegaappe denddidaagan, eti Xoossaa bolli makkalidosona. Nuuni eta iita leemisuwa kaallanawu koyennaagee qoncce.—Ibr. 3:12. w24.06 24 ¶14-15

Nuuni wurssetta gallassatun deꞌiyo gishshawu, yeekkanaadan oottiyabati gujji gujji baanaagee qoncce. Nuuni yeekkiyo wode beꞌidi Yihoowi azzanees. Nu afuttay tumuppe Yihoowa sinttan alꞌꞌo. Hegaa gishshawu, unꞌꞌissiyabay nuna gakkiyo wode nuuyyo siyettiya ubbabaa woosan Yihoowawu yootana koyiyogee qoncce. Galchchan deꞌiya nuna siiqiya ishanttuppenne michchonttuppe mule haakkana koshshenna. Geeshsha Maxaafaa nabbabiyogan Yihoowappe minttettuwa demmoos. Nuuni ubbatoo ammanettidi genccikko, Yihoowi nuna woytanaagaa eroos. Qassi nuuni azzanidi, harati kaddiininne hidootaa qanxxidi afuxxido afutta ubbaa I sinttappe quccanawu qaalaa geliis. (Ajj. 21:4) He wode nuuni ufayssa afuttaa afuxxana. w24.12 20 ¶3; 25 ¶19

Yihoowi nuuni A Markkata gidanaadan dooriis; qassi nuuni xala gidanaadan maaddanawu qaalaa geliis. (Isi. 43:10, 11) I hegaadan oottiyo oyddu ogeta ane beꞌoos. Koyruwan, nuuni mishiraachchuwa yootiyo wode ubban Yesuusi nunaara deꞌees. (Mat. 28:18-20) Naaꞌꞌanttuwan, nuna maaddanaadan Yihoowi kiitanchchata sunttiis. (Ajj. 14:6) Heezzanttuwan, nuuni tamaaridobaa hassayanaadan maaddiya geeshsha ayyaanaa Yihoowi nuussi immees. (Yoh. 14:25, 26) Oyddanttuwan, issippe sabbakanaadan Yihoowi nuussi ishanttanne michchontta immiis. Yihoowinne siiqiya ishanttinne michchontti nuna maaddiyo gishshawu, xala gidanawunne ubbatoo sabbakanawu koshshiya ubbabay nuussi deꞌees. Shin son daro asaa demmabeenna gishshawu hidootaa qanxxikko hagaadan oychchana danddayaasa: ‘Ta moottan asay haꞌꞌi awan deꞌii?’ (Oos. 16:13) ‘Eti ooso sohuwan deꞌiyonaa, woy giyaa biidonaa?’ Yaanikko daro asaa demmanawu ogiyappe ogiyan markkattana danddayay? w24.04 17 ¶10-11

Intte azina gidiiddi cima gidanawu koyikko, intte soo asawukka loꞌꞌo sunttay deꞌana koshshees. Hegaa gishshawu, intte ‘intte keettaa asaa loytti ayssiyageeta’ gidana koshshees. Hegaa giyogee intte soo asawu koshshiyabaa siiquwan kunttananne soo asawu loꞌꞌobaa kuuyana koshshees giyogaa. Intte so asaa goynuwa kaaletteeta, eti Kiristtaane shiiqota shiiqanaadan ootteeta, qassi eti haggaazuwan banttawu danddayettida ubbabaa oottanaadan maaddeeta. Intte aawa gidikko, layttay 18 gakkibeenna intte naati intteyyo ‘azazettiyageetanne bonchchiyageeta’ gidana koshshees. (1 Xim. 3:4) Intte eta siiquwan tamaarissananne loohissana koshshees. Intte eti ufayttanaadan, qassi hara naatuugaadan miiccanaadaaninne kaaꞌanaadan koyiyogee qoncce. Shin eti intteyyo azazettiyageeta, harata bonchchiyageetanne loꞌꞌo eeshshay deꞌiyogeeta gidanaadankka intte eta tamaarissana koshshees. Hegaa bollikka, intte intte naati Yihoowara loytti dabbotanaadan, Geeshsha Maxaafay yootiyo maarata oosuwan peeshshanaadaaninne haattan muukettanawu baaxetanaadan inttessi danddayettida ubbabaa oottana koshshees. w24.11 22 ¶10-11

Nuuni kaseegaappe aaruwan Yihoowawu haggaaziyo wode, I nuna maaddiyogaa loytti akeekoosinne kaseegaappe aaruwan an ammanettoos. (1 Qor. 3:9) Shin Yihoowi neeni oottiyobaa haratuugaara geeddarssennaagaanne neeni A siiqiyo siiquwa eriyogaa hassaya. A alꞌꞌo imota gidida wozuwa neeni wozanappe nashshiyogaa I beꞌiyo wode keehi ufayttees. (1 Sam. 16:7; Mar. 12:41-44) Wozuwappe denddidaagan nu nagaray atto geetettiis, Yihoowara dabbotidanne merinawu deꞌiyo hidootaa demmida. Ha anjjota nuussi immanaadan denttettida Yihoowa siiquwa ubbatoo nashshiyageeta gidoos. (1 Yoh. 4:19) Nuna keehi siiqidi ba deꞌuwa nu gishshawu immida Yesuusakka nashshiyageeta gidoos! w25.01 31 ¶16-18

Mazamure 73 xaafidaagawu siyettidabaa qoppa. Yihoowawu haggaazennaba gidikkokka payya, durenne unꞌꞌettennaba milatiya asata I beꞌiis. (Maz. 73:3-5, 12) Eta deꞌuwan ubbabay injjetidaba milatiyogaa beꞌidi Yihoowawu haggaazanawu baaxetiyogee maaddennabadan qoppiis. I ha iita qofan ‘gallassa kumettaa’ metootiis. (Maz. 73:13, 14) I iitabaa qoppiyogaa agganawu waatidee? Mazamuraawee Yihoowa geeshsha sohuwakko biis. (Maz. 73:16-18) I yan Yihoowa asaara shiiqido gishshawu suurebaa qoppiis. Issoti issoti ishalo deꞌuwa deꞌiyaba gidikkokka, etawu hidooti baynnaagaa I akeekiis. Hegaappe denddidaagan, I unꞌꞌettiyogaa aggiisinne Yihoowawu haggaazanawu kuuyidoogee keehi loꞌꞌo kuushsha gidiyogaa ammanettiis. Qassi ubbatoo Yihoowawu haggaazanawu murttiis.—Maz. 73:23-28. w24.10 27 ¶11-12

Yihoowi nuuni A “markkata” gidanaadan dooriis. (Isi. 43:10-12) Oosuwa Kaalettiya Citay amarida layttaappe kase issi dabddaabbiyan hagaadan giis: “Nuussi deꞌana danddayiya ay bonchchuwappekka aadhdhiyagee Yihoowa Markkata geetetti xeegettiyogaa.” Aybissi? Issi leemisuwa beꞌa. Balabaa oottadasa giidi issi uri nena mootidabadan qoppa. He mootoy worddo gidiyogaanne hegaa malabaa neeni mule oottabeenna loꞌꞌo asa gidiyogaa haratussi yootiya issi uri neeyyo koshshiis. Neeni oona dooruutee? Neeni eriyonne ammanettiyo, qassi harati A ammananaadan oottiya loꞌꞌo sunttay deꞌiyo ura dooriyogee qoncce. Yihoowi tumu Xoossay A xalaala gidiyogaa nuuni haratussi yootana mala A markkata gidanaadan nuna dooriyogan I nuna loytti eriyogaanne ammanettiyogaa bessiis. Nuuni A markkata gidiyogaa keehi nashshiyo gishshawu demmido injje ubban A sunttaa haratussi erissoosinne A xeelliyagan odettida iitabay ubbay worddo gidiyogaa bessoos. Yaatiyogan, Yihoowa Markkata geetettiyo nu bonchcho sunttaadan deꞌoos!—Roo. 10:13-15. w24.05 18 ¶13

Yesuusi harata haggaaziyogan keehi ufayssiis. Issi wode Yesuusi Xoossaabaa asaa tamaarissiisinne koshshiya hara ogetun eta maaddiis. I maalaalissiya ogiyan qumaa giigissin A kaalliyageeti qumaa asawu gishidosona. Yaatiyogan harata waati maaddanaakko bana kaalliyageeta tamaarissiis. (Mar. 6:41) Hagaadan oottiyogan harata haggaaziyogee keehi koshshiyaba gidiyogaa eta bessiis. Yesuusi kiittidoogeeti asa ubbay miidi kallana gakkanaashin qumaa gishiyogan Yesuusaara hashetidoogan ay keena ufayttidaakko qoppite. (Mar. 6:42) Yesuusi ba koyiyobaappe haratuugaa kaseyidoy he wode xalaala gidenna. I ha saꞌan deꞌido wode ubban hegaadan oottiis. (Mat. 4:23) Yesuusi harata tamaarissiyogaaninne koshshiyaban eta maaddiyogan keehi ufayttiis. w24.11 16 ¶10-11

‘Wurssetta gallassatun’ ha alamiya hanotay iiti iiti biyo wode, nuuni nu ishanttanne michchontta koshshiyaban maaddana danddayiyogee qoncce. Qassi nu ishanttanne michchontta minttettananne etawu siiquwa bessana danddayoos. Nuuni yaatana danddayiyo issi ogee eti shiiquwa yiyo wode eta minttettiyabaa haasayiyogaa. Yaatiyo gishshawu, nuuni shiiquwan nu ishanttanne michchontta minttettanawunne etawu siiquwa bessanawu koyoos. Cimati bantta ishanttinne michchontti waayettiyo wode eta minttettoosona. Meretay gattiyo daafabay woy akkamuwara gayttidabay deꞌikko, cimati bantta ishanttanne michchontta maaddanawu sohuwara issi issibaa giigissoosona. Eti ayyaanaabankka maaddoosona. Ishanttinne michchontti issi cimay eta kehatettan haasayissiyogaa, eti yootiyobaa siyiyogaanne etawu siyettiyabaa akeekanawu baaxetiyogaa erikko eti A maaduwa oychchanawu yayyokkona. He eeshshati ishanttinne michchontti cimay banttana siiqiyogaa akeekanaadan maaddees; yaatiyo gishshawu, eti cimay Geeshsha Maxaafaappe yootiyo ay kaaletuwakka azazettanawu metootokkona.—1 Tas. 2:7, 8, 11. w24.06 29 ¶12-13

Yihoowi ba Naꞌay waayettiyogaa beꞌidi kelttiya gelennan aggidoogee awu aybinne siyettibeenna giyogee? Chii. Issi hanotaa xeelliyagan nuussi siyettiyabay deꞌanaadan oottidi I nuna medhdhiis. Qassi I nuna ba leemisuwan medhdhido gishshawu ayyokka siyettiyabay deꞌees giyogaa. Geeshsha Maxaafay I ‘lanccidoogaanne hanqqettidoogaa’ woy azzanidoogaa yootees. (Maz. 78:40, 41) Asay Yesuusa tuggayidi woriyogaa beꞌidi Yihoowi azzanidoogee qoncce! Yihoowagaadan ooninne, haray atto nu mata dabbo woy lagge gidinkka nuna siiqana danddayennaagaa wozoy qonccissees. (Roo. 8:32, 38, 39) Nuuni nuna siiqiyogaappekka aaruwan Yihoowi nuna siiqiyogee qoncce. Merinawu deꞌana koyay? Neeni merinawu deꞌanaadan neegaappe aaruwan Yihoowi koyees. Ne nagaray atto geetettanaadan koyay? Ne nagaray atto geetettanaadan neegaappe aaruwan Yihoowi koyees. Nuuni an ammaniyogaaninne awu azazettiyogan he alꞌꞌo imotaa nashshiyogaa bessanaadan I koyees. Wozoy Yihoowi nuna keehi siiqiyogaa bessiya alꞌꞌo imota.—Era. 3:11. w25.01 22-23 ¶8-9

Nuuni ubbay issi issitoo nu beꞌiyoban, siyiyobaaninne nu qofan ammanettidi kuuyoos. Shin nuuni beꞌiyobaynne siyiyobay nuna issi issitoo cimmana danddayees. Nuuni cimettenna wodiyankka beꞌiyogan xalaala deꞌikko, Xoossaa sheniya woy zoriya sheneho gaana danddayoos. (Era. 11:9; Mat. 24:37-39) Shin nuuni ammaniyogaadan deꞌikko, ‘Godaa ufayssiyabaa’ kuuyana danddayoos. Xoossaa zoriya kaalliyogee nuuni woppu gaanaadaaninne tumuppe ufayttanaadan oottees. (Maz. 16:8, 9; Isi. 48:17, 18) Qassi nuuni ubbatoo ammaniyogaadan deꞌikko merinaa deꞌuwa demmana. (2 Qor. 4:18) Nuuni ubbay nuna hagaadan oychchana koshshees. Taani issibaa kuuyiyo wode aybin ammanettiyanaa? Taani beꞌiyoba xalaalan ammanettiyanaayye, Yihoowa zoriya kaalliyanaa? w25.03 20-21 ¶3-4

Nuuni ubbay harati ayyaanaa gannatiya yaanawu koyanaadan oottana danddayiyobay deꞌees. Yaatanawu nuuni Yihoowa milatana koshshees. I asay ba dirijjitiya yara gidanaadan giddenna. I asaa siiquwan baakko ‘ehees.’ (Yoh. 6:44; Erm. 31:3) Yihoowa siiquwabaanne ufayssiya A eeshshatubaa erida ashkke asati akko shiiqoosona. Nu loꞌꞌo eeshshaaninne oosuwan asay ayyaanaa gannatiya yaanawu koyanaadan waati maaddana danddayiyoo? Issi ogee nu mala Kiristtaaneta siiqiyogaanne etawu kehiyogaa. Oorattati nu galchchaa shiiqota shiiqiyo wode geella beni Qoronttoosan shiiqota shiiqida ammanennaageetudan qoppanaadan koyoos. Eti hagaadan giidosona: “Xoossai tumu intte giddon de7ees.” (1 Qor. 14:24, 25; Zak. 8:23) Yaaniyo gishshawu nuuni hachchi gallassaa xiqisiya zoriya ubbatoo kaallana koshshees. w24.04 23-24 ¶16-17