Kawotettaabaa Yootiyaageetu Iriporttiyaa

Deꞌuwan Waana Ufayttanaakko Akeekaasu

YESUUSI ba dorssata eriyoogaa yootiis. (Yohaannisa 10:14) Suure wozanay deꞌiyo, qassi saruwaanne xillotettaa dosiya asi Yesuusa kaalliyaageetuura gayttana. Beljjiyeemen deꞌiya issi maccaaseegaadan, hegaa mala asi ba deꞌuwan ufayttana. Hagaappe kaallidi I taarikiyaa beꞌana:

“Yihoowa Markkati ta kariyaa qoxxidoy taani keehi hidootaa qanxxido gishshawu hayqqanawu qoppaydda deꞌishiina. Ha iita alamiyan deꞌiya metoy qaarettana giidi Yihoowa Markkati odidobaa dosaas; shin eti hegaa qaaranay Xoossaa giidoogaa dosabeykke. Woosa keettan asay coo loꞌꞌo milatiyoogaa ixxido gishshawu taani yaa biyoogaa aggoosappe hosppun laytta gidiis. SHin Yihoowa Markkatuura haasayidobaappe tumaa demmidoogaa eraas; qassi Xoossaa erennan loꞌꞌo deꞌuwaa deꞌana danddayennaagaa akeekaas.

“SHin he Yihoowa Markkati guutta gallassatun oychchi simmin etaara gayttana danddayabeennaagan azzanaas. Ubba hidootaa qanxxaas. Galla galla naaꞌꞌu baakko sijaaraa uyiyoogaanne jallissiyaabaa goꞌettiyoogaa doommaas. Qassi ta aawaa aaway hayqqidaagaara gayttanawu koyido gishshawu, iita ayyaanaa oosuwan gelaas. Hegaappe denddidaagan, qamman taani tarkka deꞌiyo wodiyan daydanttati tana qohiyo gishshawu keehi yayyaas! Amarida aginawu hegaadan hanishin deꞌaas. Tarkka deꞌiyoogaa qoppada omarssi omarssi ubbatoo yayyays.

“Issi galla, carkkanawu kiyaas; shin kase meezetido ogiyaa aggada hara ogiyaara hemettaydda keexettiya issi gita keettaakko gakkaas. Yan keexxiya daro asaa beꞌada garamettaas. Mataa shiiqada, Yihoowa Markkati bantta SHiiquwaa Addaraashaa keexxiiddi deꞌiyoogaa akeekaas. Ta so yiida Yihoowa Markkatuura haasayidobaa hassayada, kumetta saꞌan deꞌiya asay ha asaatuugaadan deꞌiyaakko ayba loꞌꞌobee shin gaada qoppaas.

“He Yihoowa Markkati zaarettidi ta so yorkkonaashsha gaada qoppido gishshawu, he addaraashaa keexxiiddi deꞌiya asata haasayissaas. Xoossaa woossaas, yaatin koyro yiidi tana haasayissidaagee tammu gallassappe guyyiyan ta so yiis. Yiidi, nuuni kaseegaadan xannaꞌanaadan oychchiis; taanikka A qofaa maayaas. Qassi gubaaꞌe shiiquwawu addaraashaa baanaadan sohuwaara shoobbiis. Taanikka eeno gaas. Hegaa mala loꞌꞌiyaabaa mule beꞌa erikke! Ufayttiyaanne issoy issuwaa siiqiya asaara gayttanawu keehi daro wodiyawu amottaydda takkaas. Wurssettan, eta demmaas!

“He wodeppe doommada ubbatoo shiiquwaa bays. Heezzu saamintta gidiya wodiyaappe simmin, sijaaraa uyiyo iita meeziyaa aggaas. Iita ayyaana oosuwaara gayttida maxaafatanne muuziqaa ta achchappe diggaas; yaatin daydanttati tana kaseegaadan niqiichchiyoogaa aggidoogaa akeekaas. Geeshsha Maxaafan deꞌiya, Yihooway kessido maaraara maayiya ogiyan deꞌiyoogaa doommido gishshawu, heezzu aginappe guyyiyan mishiraachchuwaa yootiyoogaa doommaas. Usuppun aginappe simmin xammaqettaas. Xammaqettido naaꞌꞌantto gallassan kaafiya aqinye gidada haggaaziyoogaa doommaas.

“Yihooway tawu oottido loꞌꞌobaa ubbaa gishshawu A keehi galatays. Haꞌꞌi ta deꞌuwan tumuppe ufayttays. Ee, Yihoowa sunttay taani baqata attido mino gimbbe. (Leemiso 18:10) Mazamure 84:10 xaafida mazamuraawiyaagaadan taassi siyettees: ‘Taani harasan sha7u gallassaa de7anaappe Xoossaa keettan issi gallassaa de7iyoogee lo77o. Iitatu dunkkaniyan de7anaagaappe ta Xoossaa keettaa penggiyaa naagiyoogee taayyo lo77o.’”

Ha ashkke maccaasiyaa ba deꞌuwan ufayttaasu. Loꞌꞌo wozanaa koshshay deꞌin Yihoowa koyiya ubbay hegaadan ufayttana danddayees.