Meto Wode Ufayttada Deꞌa

“[Yihoowakko] baqati attiya ubbati ufaittona; eti ubbaton ufaissan yexxona.”—MAZAMURE 5:11.

1, 2. (a) Ha wodiyan keehippe metootanaadan oottiya issi issibati aybee? (b) Ubba asaa bolli gakkiya metuwaappekka haray, tumu Kiristtaaneti genccana bessiyo metoy aybee?

ASAA naatu bolli gakkiya metoy Yihoowa Markkatu bollikka gakkees. Xoossaa asatuppe darota danoy, olaynne hara pirdda pacay qohees. Meretan gakkiya daafay, hiyyeesatettaynne hayqoy daro unꞌꞌuwaa gattees. Kiitettida PHauloosi: “Mereta ubbai issippe hanno gakkanaassi, maccaasa leessoi oiqqin ooliyoogaadan, sahuwan ooliyoogaa nuuni eroos” yaagi xaafidoogee bessiyaaba. (Roome 8:22) Polotettaa pacay gattiyo iitabaykka nu bolli gakkiiddi deꞌees. Beni Kawuwaa Daawitaagaadan, nuuni: “Ta iitatettai di7uwaadan tana muukkiis; denddenna gita toohuwaadan taayyo deexxees” yaagana danddayoos.—Mazamure 38:4.

² Ubba asaa bolli gakkiya metuwaappekka haray, tumu Kiristtaane gidiyoogan gakkiya metoykka deꞌees. (Luqaasa 14:27) Ee; Yesuusaagaadan i erissiyo ashkkarata asay ixxeesinne yedettees. (Maatiyoosa 10:22, 23; Yohaannisa 15:20; 16:2) Hegaa gishshau, ooratta alamiyan demmana anjjuwaa naagiyo wode, nuuni Kiristtoosa kaallanau keehippe baaxetananne genccana koshshees.—Maatiyoosa 7:13, 14; Luqaasa 13:24.

3. Kiristtaaneti Xoossaa ufayssanau meto deꞌuwaa deꞌana koshshennaagaa waati eriyoo?

³ Hegee tumu Kiristtaaneti bantta deꞌuwan ufayttokkona giyoogee? Wurssettay gakkanaashin nu deꞌoy azzanuwaaninne kayyuwan kumana koshshii? Yihooway qaalaa gelidobay polettanaashin nuuni ufayttanaadan i koyiyoogee qoncce. Tumatettan goynniyaageeti ufayttiyaageeta gidiyoogaa Geeshsha Maxaafay darosan yootees. (Isiyaasa 65:13, 14 nabbaba.) Mazamure 5:11, “[Yihoowakko] baqati attiya ubbati ufaittona; eti ubbaton ufaissan yexxona” yaagees. Ee; meto wodiyankka, garssa sarotettaanne woppatettaa demmiyoogeenne keehippe ufayttiyoogee danddayettiyaaba. Nuna metoy gakkishinkka ufayttiyaageeta gidanau Geeshsha Maxaafay waatidi maaddana danddayiyaakko ane beꞌoos.

Yihoowa—“Ufayttiya Xoossaa”

4. Harati a sheniyau haarettennan ixxiyo wode Xoossau aybi siyettii?

⁴ Leemisuwau Yihoowa qoppa. I Ubbaa Danddayiya Xoossaa gidiyoogaadan, ubbabaa haarees. Ayyo aybinne paccenna; qassi o maadoykka ayyo koshshenna. SHin au gita wolqqay deꞌiyaaba gidikkonne, ayyaana mereta gidida, a naatuppe issoy makkalidi Seexaanaa gidido wode, i azzanennan aggenna. Guyyeppe hara kiitanchatikka Seexaanaagaadan makkalido wode Xoossay azzanidoogee qoncce. Saꞌan merettida mereta ubbaappe aadhiya, Addaameenne Hewaana Xoossaayyo zokkuwaa zaarido wode ayyo siyettidabaakka qoppa. He wodeppe doommidi, biilooniyan qoodettiya eta zerettati Yihoowa haaruwaa ixxidosona.—Roome 3:23.

5. Yihoowa wozanay keehippe seelettanaadan oottiday aybee?

⁵ Seexaanay doommido makkalay hanno gakkanaukka deꞌees. Yihooway eeqaa goynuwaa, makkalaa, asaa woriyoogaanne shori baynna kandduwaa 6,000u laytta gidiya wodiyau beꞌiis. (Doomettaabaa 6:5, 6, 11, 12) Hegaa bollankka, gene qofan worddotiyoogaanne sunttaa mooriyoogaa i siyiis. Tumuppe Xoossau goynniyaageetikka issi issitoo a azzanissidosona. Hegaa mala hanotatuppe issuwaa Geeshsha Maxaafay: “Eti bazzon a bolli woqqutoo makkalidonaa! Mela bazzon woqqutoo lanccissidonaa! Eti zaari zaaridi, Xoossaa paaccidosona; Israa7eela Geeshshaa hanqqetissidosona” yaagidi qonccissees. (Mazamure 78:40, 41) Yihooway ba asay bana aggiyo wode, keehippe azzaniyoogee qoncce. (Ermmaasa 3:1-10) Iitabay haniyoogee tuma; hegee qassi Yihooway ba wozanan keehippe seelettanaadan oottees.—Isiyaasa 63:9, 10 nabbaba.

6. Xoossay azzanttiya hanotaa waatidi danddayii?

⁶ Gidikkonne, Yihooway azzaniyoogeenne seelettiyoogee i tangguwaa ekkennaadan oottenna. Metoy merettiyo wode, he metoy kaalettiyo iitabay darennaadan Yihooway sohuwaara tangguwaa ekkiis. Wurssettan ba halchoy polettana mala, i adussa wodiyan polettiya tangguwaakka ekkiis. Yihooway ekkido suure tangguwaa beꞌiyo wode, ubbabaa haariyo a maatay qoncciyoonne ammanettida a ashkkarati anjjuwaa demmiyo wodiyaa i ufayssan naagees. (Mazamure 104:31) Ee, Yihooway keehippe cayettidaba gidikkokka, i ubbatookka “ufayttiya Xoossaa.”—1 Ximootiyoosa 1:11, NW; Mazamure 16:11.

7, 8. Nuna metoy gakkiyo wode, Yihoowa leemisuwaa kaallana danddayiyoy ayba ogiyaanee?

⁷ Metuwaa xooniyo abbiyaara gayttidaagan nuna Yihoowaara geeddarssana danddayennaagee tuma. Gidikkokka, nuna metoy gakkiyo wode Yihoowa leemisuwaa kaallana danddayoos. Metoy gakkiyo wode azzaniyoogee meretan deꞌiyaaba gidikkonne, azzaniiddi deꞌana koshshenna. Nuuni Yihoowa leemisuwan merettido gishshau, nuussi qoppiyo abbeenne goꞌꞌiya eray deꞌees; hegee nuuni nu metuwaa akeekanaadaaninne koshshiyo wode tangguwaa ekkanaadan maaddees.

⁸ Deꞌuwan nuna gakkiya metuwaa danddayanau maaddana danddayiya, keehippe koshshiya issibay, issi issibay nu abbiyaappe aadhiyaaba gidiyoogaa akeekiyoogaa. Hegaa malabaa qoppiyoogan sheekkiyoogee, hidootaa qanxxissananne tumu goynuwaara gayttida daroban ufayssaa demmennaadan oottana danddayees. Metuwaa xoonanau bessiya tangguwaa ekki simmidi, metuwaabaa qoppiyoogaa aggidi, loꞌꞌobaa oottiyoogan xeelaa wottiyoogee daro loꞌꞌo. Kaallidi deꞌiya Geeshsha Maxaafaa taariketi hegaa loyttidi qonccissoosona.

Bessiyaagaadan Qoppiyoogee Keehippe Koshshees

9. Haanna bessiyaagaadan qoppiyoogaa waata qonccissadee?

⁹ Hananabaa yootiya Sameela aayyiyo gidida Haanni leemisuwaa qoppa. A naꞌa yelanau danddayennaagaappe denddidaagan keehippe azzanaasu. A mayne gidido gishshau, cayettaasunne borettaasu. Issi issitoo, Haanna keehippe azzanada yeekkaasunne qumaa meennan ixxaasu. (1 Sameela 1:2-7) Haanna gayttiyo dunkkaaniyaa biido wodetuppe issuwan, “keehi mishettada, camo yeehuwaa yeekkada GODAA woossaasu.” (1 Sameela 1:10) Haanna ba wozanaabaa Yihoowayyo yoota simmin, qeesetu ubbaa halaqaa Eeli o: “Sarotettan ba; neeni a woossidobaa Israa7eela Xoossai neeyyo immo” yaagiis. (1 Sameela 1:17) He wode, Haanna ba danddayiyoobaa ubbaa oottidoogaa akeekaasu. Mayne gidiyo hanotaa a laammana danddayukku. Haanna bessiyaagaadan qoppaasu. Hegaappe simmada, “ba ogiyaa baada, qumaa maasu; hegaappe simmin mulekka azzanabeikku.”—1 Sameela 1:18.

10. PHauloosi qaarana danddayenna metoy bana gakkido wode, bessiyaagaadan qoppiyoogaa waati qonccissidee?

¹⁰ Kiitettida PHauloosi metoy gakkido wode hegaa mala xeelaa bessiis. I keehippe unꞌꞌettanaadan oottiya metoy gakkiis. I hegaa ‘tana caddi oyqqiyaagaa’ yaagiis. (2 Qoronttoosa 12:7) Hegee ayba gidikkonne, PHauloosi woppaa demmanau Yihoowakko woossiyoogan, he metuwaappe kiyanau bau danddayettidabaa oottiis. He allaalliyaa xeelliyaagan PHauloosi Yihoowakko aapputoo woossidee? Heezzutoo woossiis. Heezzantto woosaappe simmin, he “caddi oiqqiyaagee” appe shaahettennaagaa Xoossay PHauloosau qonccissiis. PHauloosi hegaa ammani ekkidi, kumetta wozanaappe Yihoowayyo oottiyoogan ba xeelaa wottiis.—2 Qoronttoosa 12:8-10 nabbaba.

11. Minttidi woossiyoogee metuwaa danddayanaadan waatidi maaddana danddayii?

¹¹ Unꞌꞌissiya metuwaa xeelliyaagan Yihoowakko woossiyoogaa aggana koshshiyoogaa ha leemisoti bessokkona. (Mazamure 86:7) Hegaappe dumma ogiyan, Xoossaa Qaalay nuussi: “Xoossaa intte woossiyo woosa ubban a keehi galatiiddi, inttena koshshiyaabaa ubbau woossiteppe attin, issibaukka hirggoppite” yaagidi yootees. Hegaadan mintti woossiyo woosaa Yihooway waatidi zaarii? Geeshsha Maxaafay: “Asa eratettaa ubbaappe aadhdhiya Xoossaa sarotettai intte wozanaanne intte qofaa Godaa Yesuus Kiristtoosa baggaara naagana” yaagees. (Piliphphisiyuusa 4:6, 7) Ee; Yihooway nu metuwaa qaarennan aggana danddayees; shin nu qofaa naagiyoogan nu woosaa zaarana danddayees. Issi allaalliyaa xeelliyaagan woossi simmidi, qofan sheekkiyoogee gattiyo qohuwaa akeekana danddayoos.

Xoossay Koyiyoogaa Oottiyoogan Ufaytta

12. Adussa wodiyau azzaniyoogee qohana danddayiyoy aybissee?

¹² Leemiso 24:10y: “Neeni metuwaa gallassi laafikko, ne wolqqai guutta giyoogaa” yaagees. Qassi hara leemisoy: “Wozani azzanikko, he aawu siiddees” yaagees. (Leemiso 15:13) Issi issi Kiristtaaneti keehippe azzanidi, Geeshsha Maxaafaa buzo nabbabiyoogaanne Xoossaa Qaalan wotti denttidi qoppiyoogaa aggidosona. Eta woosay wozanappe gidenna; qassi hara Kiristtaanetuppe haakkana danddayoosona. Adussa wodiyau azzaniyoogee qohiyoogee qoncce.—Leemiso 18:1, 14.

13. Azzaniyoogaa agganaadaaninne amarida ogiyan ufayttanaadan maaddana danddayiya issi issi oosoti aybee?

¹³ Hara baggaara, loꞌꞌobaa qoppiyoogee nu deꞌuwan ufayssaa demmana danddayiyooban xeelaa wottanaadan maaddees. Daawiti: “Abeet ta Xoossau, taani neeni koyiyoogaa oottanau dosais” yaagidi xaafiis. (Mazamure 40:8) Nu deꞌuwan metoy gakkiyo wode, goynuwaara gayttidaagan ubbatoo oottiyoobaa aggana koshshenna. Azzanttiyaabaa xooni kiyanau maaddiya loꞌꞌobay, ufayssiya oosuwaa oottiyoogaa. Nuuni a Qaalaa nabbabiyoogaaninne ubbatoo xeelliyoogan ufayssaa demmana danddayiyoogaa Yihooway yootees. (Mazamure 1:1, 2; Yaaqooba 1:25) Geeshsha Maxaafaappenne Kiristtaane shiiquwaappe nuna minttettiyaanne nu wozanaa ufayssiya, ‘shonggaara deꞌiya haasayaa’ siyana danddayoos.—Leemiso 12:25; 16:24.

14. Nuuni ha wodiyan ufayttanaadan oottiyay Yihooway waatanau gelido qaalee?

¹⁴ Nuuni ufayttanaadan oottiya darobaa Xoossay nuussi immiis. I nuna ashshanau gelido qaalay ufayttanaadan oottiya gitaba. (Mazamure 13:5) Ha wodiyan nu bolli gakkiyaabay ayba gidikkokka, Xoossay wozanappe bana koyiyaageeta wurssettan anjjanaagaa eroos. (Eranchchaa 8:12 nabbaba.) Hananabaa yootiya Imbbaaqoomi hegaadan ammaniyoogaa kaallidi deꞌiyaagaadan loytti qonccissiis: “Balasiyaa giyo mittai aifana xayikkokka, woiniyaa turan aifee xayikkokka, wogarai aifennan ixxikkokka, gadee kattaa mokkennan ixxikkokka, birddiyan dorssi xayikkokka, qassi aqon mehee xayikkokka, hegee ubbai xayikkokka, taani GODAN ufaittana; tana ashshiya Xoossan taani ufaissaa po[o]cu gaana.”—Imbbaaqooma 3:17, 18.

‘Eta Xoossay Yihoowa Gidido Asati Ufayttiyaageeta!’

15, 16. Sinttappe demmana hidootaa naagiyo wode, nuna ufayssana danddayiya Xoossaa imotata yoota.

¹⁵ Nuuni wodeppe demmana maalaalissiya hidootaa naagiyo wode, i nuuyyo immiyo loꞌꞌoban ufayttanaadan Yihooway koyees. Geeshsha Maxaafay: “Asi ba de7ido laittan lo77iyaabaa oottiyoogaappenne, ufaittiyoogaappe aadhdhiyaabi aibinne bainnaagaa taani akeekaas. Qassi, asassi au a daafurau waaga gidiyaabi muussaaninne ushshan bana ufaissiyoogaa; hegeekka au Xoossaappe imettida imota” yaagees. (Eranchchaa 3:12, 13) ‘Loꞌꞌobaa oottiyoogee’ haratuyyo kehabaa oottiyoogaa gujjees. Yesuusi ekkiyoogaappe immiyoogee daro ufayssaa demissiyoogaa yootiis. Aqo laggiyaassi, nu naatussi, nuna yelidaageetussinne hara dabbotussi kehabaa oottiyoogee keehi ufayssees. (Leemiso 3:27) Ayyaanaaban nu ishatussinne michotussi qarettiyoogee, imatuwaa mokkiyoogeenne eta mooruwaa atto giyoogeekka nuna, qassi Yihoowakka keehippe ufayssiyaaba. (Galaatiyaa 6:10; Qolasiyaasa 3:12-14; 1 PHeexiroosa 4:8, 9) Nu goꞌꞌaa yarshshiyoogan nu haggaazuwaa poliyoogee tumuppe ufayssiyaaba.

¹⁶ Eranchchaa maxaafaappe ekettida, qommoora deꞌiya qofay miyoogaanne uyiyoogaa mala ufayssiyaabata yootees. Ee; nuna metoy gakkiyo wodekka, Yihoowappe demmiyo, deꞌossi koshshiyaabatun ufayttana danddayoos. Hegaa bollankka, away wulliyo wode merettiya loꞌꞌiya hanotay, beꞌanau ufayssiya deree dembbay, mehiyaa woykko doꞌaa maray buraaqiyoogeenne meretan hara maalaalissiyaabay aynne qanxxennan beꞌiyooba gidikkonne, nuuni keehi maalaalettanaadaaninne ufayttanaadan oottiyaabata. Nuuni hegaa malabaa qoppiyo wode, Yihooway loꞌꞌobaa ubbaa Immiyaagaa gidiyo gishshau, a keehippe siiqoos.

17. Nuna gakkiya metuwaappe muleera woppaa demmanaadan oottiyaabay aybee? Hegee gakkanaashin nuna aybi minttettii?

¹⁷ Nuuni Xoossaa siiqiyoogee, a azazuwaa naagiyoogeenne wozuwaa yarshshuwan ammaniyoogee, polotettaa pacan gakkiya metuwaappe muleera woppaa demmanaadaaninne merinau ufayttanaadan oottees. (1 Yohaannisa 5:3) Hegee gakkanaashin, nuna gakkiya meto ubbaa Yihooway akeekiyoogaa eriyoogan minettoos. Daawiti: “Ta metuwaa neeni be7ido gishshaunne ta tuggaa neeni erido gishshau, taani aggenna ne siiquwan ufaittananne ufaissau poocu gaana” yaagidi xaafiis. (Mazamure 31:7) Yihooway nuna siiqiyo gishshau, nuna gakkiya metuwaappe ashshees.—Mazamure 34:19.

18. Xoossaa asaa giddon ufayssay qonccidi beettana koshshiyoy aybissee?

¹⁸ Ufayttiya Xoossaa, Yihooway gelido qaalay polettanaagaa naagiiddi, a leemisuwaa kaalliyaageeta gidoos. Qohiya qofay ayyaanaaban oottiyoobaa digganaadan paqqadennageeta gidoos. Nuna metoy gakkiyo wode, qoppiyo abbeenne goꞌꞌiya eray deꞌiyoogeeta gidoos. Metoy kaalettiyo iitabay darennaadan nuuyyo danddayettidabaa oottanaadaaninne nu qofaa naaganaadan Yihooway maaddees. Deꞌuwau koshshiyaabaunne ayyaanaabau Yihooway immiyo loꞌꞌoban ufayttiyaageeta gidoos. ‘Eta Xoossay Yihoowa gidiyo asati ufayttiyaageeta’ gidiyo gishshau, nuuni Xoossaakko shiiqiyoogan ufayttana!—Mazamure 144:15.

Ay Tamaaradii?

• Metoy gakkiyo wode, Yihoowa leemisuwaa nuuni kaallana danddayiyoy ayba ogiyaanee?

• Bessiyaagaadan qoppiyoogee metoy gakkishin danddayanau waati maaddana danddayii?

• Meto wode Xoossaa sheniyaa poliyoogan waanidi ufayttana danddayiyoo?

[Sinttaa 14n deꞌiya misiliyaa]

Yihooway hanettiiddi deꞌiya iitaban keehippe azzanees

[Sinttaa 14n deꞌiya misiliyaa]

© G.M.B. Akash/Panos Pictures

[Sinttaa 16n deꞌiya misiliyaa]

Nuuni ufayttidi deꞌanaadan oottiyaabaa Yihooway immiis