Ne Huuphiyaa Kawushshiyaagaa Gida

1, 2. Yesuusi ba kiittidoogeeta ay zoridee, qassi aybissi zoridee?

LAYTTAY 32 M.L. He wode Yesuusinne i kiittidoogeeti Galiilaa awuraajjan deꞌoosona. I kiittidoogeetuppe amaridaageeti bantta giddon ooni aadhiyaakko palamettidosona. Wonggeliyaa xaafee Luqaasi hagaadan giis: “Erissiyo ashkkarati, ‘Nu giddon aadhdhiyaagee oonee?’ yaagidi palamettidosona. Yesuusi eti qoppiyoogaa eridi, guutta na7aa ehiidi, ba matan essidi, ‘Ha guutta na7aa ta sunttan mokkiya ooninne tana mokkees; qassi tana mokkiyaagee tana kiittidaagaakka mokkees; aissi giikko, intte ubbaa giddon guuxxiyaagee ubbaappe gitatees’ yaagiis.” (Luq. 9:46-48) Yesuusi i kiittidoogeeti bantta huuphiyaa kawushshana koshshiyoogaa danddayan tamaarissiis.

² Issi uri haratuppe guuxxiyaabadan qoppanaadan Yesuusi zorido zoree koyro xeetu layttan deꞌiya daro Ayhudatu qofaara maayettiyaabeeyye, eta qofaappe dummatiyaabee? Tiꞌoloojikal Dikshineeri of zi Niwu Testtament yaagiyo maxaafay, Ayhudati issuwaa issuwaara gattiyaaban bonchettana bessiya uri oonakko eriyoogee keehi koshshiyaaba, qassi ubba uraa bessiyaagaadan bonchiyoogee eta qofissiyaaba gidiyoogaa yootees. Yesuusi i kiittidoogeeti hara daro asaappe dumma gidanaadan zoriis.

3. (a) Ba huuphiyaa kawushshiyoogaa giyoogee woygiyoogee, qassi hegee nuussi metiyaaba gidana danddayiyoy aybissee? (b) Ba huuphiyaa kawushshiyoogaa xeelliyaagan denddiya oyshati awugeetee?

³ “Guuxxiyaagee” geetettidi birshshettida Giriiketto qaalay bana kawushshiyaagaa, ashkke woy ebeli mannau geenna urau goꞌettiyo qaala. Yesuusi i kiittidoogeeti bantta huuphiyaa kawushshana koshshiyoogaa akeekanaadan guutta naꞌaa goꞌettiis. Ha wodiyan deꞌiya tumu Kiristtaaneti Yesuusi i kiittidoogeeta zoridobaappe tamaarana koshshees. Issi issi hanotan nuuni haratuppe guuxxiyaabadan qoppanau metootana danddayoos. Nuuni nagarancha gidiyoogee otorettanaadaaninne haratuppe leqqanau koyanaadan oottana danddayees. Qassi Seexaanaa alamee nuuni yaaretiyaageeta, harshshuushiyaageeta woy huqqunniyaageeta gidanaadan oottana danddayees. Nuuni nu huuphiyaa kawushshanaadan aybi maaddana danddayii? ‘Nu giddon guuxxiyaagee gita’ gididoy ayba ogiyaanee? Nu deꞌuwan aybin aybin nu huuphiyaa kawushshana bessii?

‘XOOSSAA HAYYOYNNE ERATETTAY KEEHI XOQQA’

4, 5. Nu huuphiyaa kawushshanaadan aybi maaddana danddayii? Leemisuwan yoota.

⁴ Kaseegaappe aaruwan nu huuphiyaa kawushshanau maaddiya issibay, Yihooway nuuppe keehi dariyoogaa qoppiyoogaa. “Ooninne a qofaa eranau danddayenna.” (Isi. 40:28) Kiitettida PHauloosi, “Xoossaa duretettai ai keena daroo? A hayyoinne a eratettai ai keena xoqqee? A pirddaa yootanai oonee? I ba oottiyoogaa i aissi oottiyaakko, oonee akeekiyai?” yaagidi, Yihoowa gitatettaa xeelliyaagan issi issibaa yootiis. (Roo. 11:33) PHauloosi hegaa xaafoosappe 2,000 gidiya layttay aadhiis; he wodiyan asaa naati darobaa eridabaa gidikkonne, i giidobay haꞌꞌikka tuma. Nu eray ay keena gidikkokka, nuuni Yihoowabaa, a oosuwaabaanne a ogiyaabaa tamaarana darobay deꞌiyoogaa eriyoogee nu huuphiyaa kawushshanaadan maaddees.

⁵ Leꞌoya Xoossaa ogiyaa erana danddayennaagaa akeekidoogee, ba huuphiyaa kawushshanaadan a maaddiis. I yelagatettan saynisiyaa keehi dosees. I salo gufantto saꞌa micettaabaa bau danddayettida ubbabaa eranau koyido gishshau, hegaa tamaaranau qofaa qachiis. Salo gufantto saꞌa micettan deꞌiya ubbabaa asaa naati eranaadan saynise xallay maaddana danddayennaagaa i akeekiis. Yaatiyo gishshau, i higgiyaa xannaꞌiyoogaa doommiis. Guyyeppe, i issi awuraajjan abukaato gidiis, qassi hegaappe simmin daanna gidiis. Wurssettan, inne a machiyaa Yihoowa Markkatuura Geeshsha Maxaafaa tumaa xannaꞌidi ammanidosona, qassi xammaqettidi Xoossau oottiyaageeta gididosona. Leꞌoy keehi erancha gidikkonne, i ba huuphiyaa kawushshanaadan maaddidabay aybee? I issi uri “Yihoowabaanne salo gufantto saꞌa micettaabaa ay keena erikkonne, biron erana koshshiyo darobay deꞌiyoogaa” akeekidoogee bana maaddidoogaa yootiis.

6, 7. (a) Bana ziqqi oottiyoogan Yihooway maalaalissiya leemiso gidiyoy ayba ogiyaanee? (b) Xoossay bana ziqqi oottiyoogee issi uraa ‘gitayana’ danddayiyoy ayba ogiyaanee?

⁶ Nu huuphiyaa kawushshanaadan nuna maaddiya harabay Yihooway bana ziqqi oottiyoogaa. “Nuuni Xoossaara issippe oottiyaageeta” gidiyoogaa qoppa. (1 Qor. 3:9, NW) A gitatettau zawi baynna Xoossay Yihooway, nuuni a Qaalaa, Geeshsha Maxaafaa goꞌettidi mishiraachuwaa sabbakanaadan oottiyoogan i nuna bonchiis. Nuuni tokkiyoonne haattaa ushshiyo zerettaa dichiyaagee Yihoowa gidikkonne, i nuussi banaara oottiyo boncho maataa immiis. (1 Qor. 3:6, 7) Xoossay bana ziqqi oottiyoogan maalaalissiya leemiso. Yihooway nuussi leemiso gidido hanotay nuuni ubbay nu huuphiyaa kawushshanaadan keehi minttettiyaaba.

⁷ Xoossay bana ziqqi oottiyoogee mazamuraawiyaa Daawita keehi maaddiis. I Yihoowayyo, “Tana ashshiya ne gonddalliyaa neeni taayyo immadasa; ne lo77o ohettai [“neeni nena ziqqi oottiyoogee,” NW] tana gitayees” yaagidi yexxiis. (2 Sam. 22:36) Daawiti Israaꞌeele biittan gitabaa oottidoy Yihooway bana ziqqi oottidi a maaddido gishshataassanne akko xeellido gishshaassa gidiyoogaa eriis. (Maz. 113:5-7) Nu hanotaykka hegaa mala. Eeshshaa, eraanne maataa xeelliyaagan nuuni Yihoowappe ‘ekkibeennabay’ aybee? (1 Qor. 4:7) Ba huuphiyaa kawushshiya uri Yihoowayyo keehi koshshiya oosancha gidiyoogan ‘gitatees’. (Luq. 9:48) Hegaadan waanidi haniyaakko ane beꞌoos.

‘INTTE GIDDON GUUXXIYAAGEE GITA’

8. Yihoowa dirijjitiyaa yarati bantta huuphiyaa kawushshana koshshiyoy aybissee?

⁸ Nuuni Xoossaa dirijjitiyan ufayttidi deꞌanaunne gubaaꞌiyaara hashetidi oottanau nu huuphiyaa kawushshiyoogee keehi koshshiyaaba. Leemisuwau, Yihoowa Markka gidida keettan diccida Petiro giyo yelageebaa qoppa. Petira ba koyidobaa oottanau gubaaꞌiyaappe shaahettaasu. Amarida layttappe guyyiyan, a zaarettada gubaaꞌiyaa yiyoogaa doommaasu. Haꞌꞌi a Yihoowa dirijjitiyan deꞌiyoogan ufayttausu; qassi gubaaꞌiyaara hashetada oottanau wozanappe koyawusu. A ba qofaa laammanaadan maaddiday aybee? A, “Xoossaa dirijjitiyan ufayttada deꞌanau keehippe koshshiya naaꞌꞌu eeshshata akeekananne hegaadan deꞌana koshshiis; hegeeti ta huuphiyaa kawushshiyoogaanne kiphatancha gidiyoogaa” yaagaasu.

9. Ba huuphiyaa kawushshiya uri ayyaanaabaa qumaa ayba ogiyan xeellii, qassi hegee a maaddiyoy ayba ogiyaanee?

⁹ Bana kawushshiya uri ayyaanaabaa qumaa gujjin, Yihooway giigissidobaa wozanappe nashshees. Yaatiyo gishshau, hegaa mala uri Geeshsha Maxaafaa loyttidi xannaꞌees, qassi Wochiyo Keelaanne Beegottite! maxeete loytti nabbabees. Yihoowan ammanettidi ayyo oottiya daroti ooratta xuufeta nabbabennan wottiigokkona. Geeshsha Maxaafaa baaso oottidi giigissido xuufeta nuuni nabbabiyoogaaninne xannaꞌiyoogan nu huuphiyaa kawushshiyoogaa bessiyo wode, ayyaanaaban kaymidaageeta gidoos, qassi Yihoowa oosuwan darobaa oottana danddayoos.—Ibr. 5:13, 14.

10. Nu huuphiyaa kawushshiyoogaa gubaaꞌiyan waati bessana danddayiyoo?

¹⁰ Ba huuphiyaa kawushshiya uri hara ogiyankka ‘gita.’ Ubba gubaaꞌetun Yihoowa ayyaanaa kaaletuwan sunttettida cimati deꞌoosona. Eti gubaaꞌe shiiquwaara, haggaazuwaaranne Yihoowa wudiyaa heemmiyoogaara gayttida issi issibaa giigissoosona. Nuuni nu huuphiyaa kawushshidi etaara hashetidi oottikko, gubaaꞌiyan ufayssay, sarotettaynne issippetettay deꞌanaadan maaddoos. (Ibraawe 13:7, 17 nabbaba.) Neeni cima woy gubaaꞌiyau oottiyaagaa gidikko, Yihooway neeyyo he maataa immido gishshau, ne huuphiyaa kawushshada a galatikkii?

11, 12. Yihoowa dirijjitiyan nuuni keehi goꞌꞌiyaageeta gidanau aybi maaddii, hegee koshshiyoy aybissee?

¹¹ Ba huuphiyaa kawushshiya uri Xoossau wozanappe oottiyo gishshau, Yihoowa dirijjitiyan keehi goꞌꞌiya ‘gita’ asa gidees. Yesuusi erissiyo ashkkaratuppe amaridaageeti he wodiyan daro asay qoppiyoogaadan qoppiyo gishshau, i eta zoriis. Luqaasa 9:46y, “‘Nu giddon aadhdhiyaagee oonee?’ yaagidi palamettidosona” yaagees. Nuunikka geella nu ishanttuppe woy haratuppe leqqiyaabadan qoppiyooshsha? Alamiyan daro asay otoretteesinne ba xallaa siiqees. Nuuni etappe dummatidi nu huuphiyaa kawushshana bessees. Nuuni hegaadan oottikko, qassi Yihoowa sheniyaa kaseyikko, nu ishanttanne michontta minttettiyaageeta gidoos.

¹² Nu huuphiyaa kawushshanaadan Yesuusi zorido zoriyaa akeekiyoogee, nu deꞌuwan ubbaban nuna ziqqi oottanaadan denttettees. Hegaadan oottana danddayiyo heezzubaa ane beꞌoos.

NE HUUPHIYAA KAWUSHSHANAU BAAXETA

13, 14. Azinay woy machiyaa banttana waati ziqqi oottana danddayiyoonaa, qassi hegee aqo deꞌuwau maaddiyoy ayba ogiyaanee?

¹³ Aqo deꞌuwan. Ha wodiyan daro asay ba maata xallau qoppees; haratu maataabay eta qofissenna. SHin ba huuphiyaa kawushshiya ura qofay PHauloosi Roome Kiristtaanetussi deꞌanaadan zoridoogaa mala. I, “Ane nuuni sarotetta ehiyaabaanne nuna issuwaa issuwaara minttettiyaabaa ubbaa koyoos” yaagiis. (Roo. 14:19) Ba huuphiyaa kawushshiya uri ubba asaara, ubba qassi ba siiqo aqo laggiyaara sarotettan deꞌees.

¹⁴ Wodiyaa aattiyoobaara gayttidabaa ane beꞌoos. Machiyaanne azinay wodiyaa aattanau koyiyoobay dumma dumma gidana danddayees. Geella azinay son woppu giidi maxaafaa nabbabiiddi wodiyaa attanau koyana danddayees. SHin maccaasiyaa hooteeliyan qumaa maanau woy laggeta oychanau koyana danddayausu. Azinay baagaappe aattidi ba maccaasiyaa dosiyoobaa kaseyiyoogan ba huuphiyaa kawushshiyo wode, a ba azinaa bonchanau metootanee? Qassi machiyaa ba qofaappe aattada a qofaa kaseyiyoogaa azinay akeekiyo wode, i ba machiyo keehi siiqeesinne nashshees. Aqo laggeti banttana kawushshiyo wode, eta laggetay minnees.—Piliphphisiyuusa 2:1-4 nabbaba.

15, 16. Mazamure 131n Daawiti harati ay oottanaadan zoridee, qassi nuuni i zoridoogaadan gubaaꞌiyan oottana danddayiyoy ayba ogiyaanee?

¹⁵ Gubaaꞌiyan. Alamiyan daro asay ba amottiyoobaa sohuwaara demmanau koyees. Eti danddayancha gidokkona; aybanne danddayan naaganau koyokkona. Nu huuphiyaa kawushshiyoogee nuuni Yihoowa hidootan naaganaadan maaddees. (Mazamure 131:1-3 nabbaba.) Nu huuphiyaa kawushshidi Yihoowa hidootan naagiyoogee woppu gaanaadan, anjjuwaa demmanaadaaninne ufayttanaadan maaddees. Daawiti ba mala Israaꞌeelati Xoossaa hidootan naaganaadan minttettidoy hegaassa.

¹⁶ Yihoowa hidootan naagiyaaba gidikko, neenikka hegaadan woppu gaana danddayaasa. (Maz. 42:5) Geella neeni ‘loꞌꞌobaa amottiyo’ gishshau, gubaaꞌe cima gidanau baaxetana danddayaasa. (1 Xim. 3:1-7) Gubaaꞌe cima gidanau koshshiya eeshshay neeyyo deꞌanaadan geeshsha ayyaanay maaddana mala, neeni danddayiyo ubbabaa oottana koshshees. Neeni sunttettanau haratuugaappe daro wodiyaa naagana koshshikko shin? Haggaazo maataa demmanau danddayan naagiya, ba huuphiyaa kawushshiya uri Yihoowau ubbatoo ufayssan oottees, qassi bau imettiya ay oosuwaaninne ufayttees.

17, 18. (a) Nuuni harata maarotaa oychiyoogeenne maariyoogee ayba ogiyan goꞌꞌii? (b) Leemiso 6:1-5y ay oottanaadan zorii?

¹⁷ Haratuura gayttiyo hanotan. Ha wodiyan daro asay hara uri bana maaranaadan oychanau metootees. SHin, Xoossau oottiyaageeti bantta mooruwaa ammanidi atto gaanaadan oychiyoogan bantta huuphiyaa kawushshiyaageeta gidoosona. Harati mooridi atto gaanaadan oychiyo wodekka eti atto goosona. Otoroy ooyettanaadaaninne shaahettanaadan oottees; shin atto giyoogee gubaaꞌe giddon sarotettay deꞌanaadan oottees.

¹⁸ Nuuni oottanau qaalaa gelidobaa polennaadan diggiyaabay merettikko, wozanappe maarotaa oychiyoogankka nu huuphiyaa kawushshana danddayoos. Hegaa mala hanotan, mooriday nu xalla gidana xayikkonne, nuuni mooridobaa qoppananne nu mooruwaa ammanana koshshees.—Leemiso 6:1-5 nabbaba.

19. Nu huuphiyaa kawushshanaadan Geeshsha Maxaafay zoriyo zoriyau Yihoowa galatana koshshiyoy aybissee?

¹⁹ Geeshsha Maxaafay nu huuphiyaa kawushshanaadan zoriyo gishshau, Yihoowa keehippe galatoos! Issi issitoo nu huuphiyaa kawushshiyoogee metana danddayees. SHin, Yihooway nuuppe keehi xoqqa gidiyoogaanne i bana ziqqi oottiyoogaa hassayikko, nuuyyo he ufayssiya eeshshay deꞌanaadan koyoos. Yaatiyo wode, Yihoowa oosuwan keehi koshshiya oosancha gidoos. Yaaniyo gishshau, ubbatoo nu huuphiyaa kawushshiyaageeta gidoos.