Qoppidi Halchido Zamachay Loꞌꞌo Ayfiyaa Ayfiis

Mariya Isabela Tohossa Amarkkan deꞌiya CHile biittan, San Bernardo kataman Kawotettaabaa mishettada aassiya yelaga naꞌa. Anne eta soo asay mayzza maꞌꞌe wodiyaappe doommidi he biittan deꞌiya Mapuche sheeshsha. Mapudungun giyo Mapuche asatu qaalaa goꞌettiya ooratta gubaaꞌiyaa essanau oottiyoobaa, eta soo asay ubbay ufayttidi maaddoosona.

Kiristtoosa Hayquwaa Hassayiyo Baalaa bonchiyo wode haasayay he qaalankka shiiqanaagaanne he qaalan attamettida, he baalaa shoobiyaa woraqataa 2,000 asau immanau giigissi wottidoogaa erissidoogee Mariya Isabela qoppanaadan oottiis. A he oosuwan maaddanau ay oottana danddayay? A banttanaara tamaariyaageetussinne asttamaaretussi loytti sabbakida yelaga gidida hara Yihoowa Markkati oottidobaa hassayaasu. A hegaabaa bana yelidaageetuura haasayin, eti Mariya Isabela shoobiyaa woraqataa timirtte keettan haratussi waata immanaakko qoppanaadan kuuyidosona. A waatada immanau qoppadee?

Koyro, issi shoobiyaa woraqataa timirtte keettaa geliyoosan kaqqanau paqqadanaadan, Mariya Isabela timirtte keettaa alaafeta oychaasu. Eti iyyo paqqadidosona; qassi a ba huuphen qoppada oychido gishshau o galatidosona. Issi galla guuran sunttaa xeesiyo wode, timirtte keettaa dilekteree ubba he shoobiyaabaa pomppan erissiis!

Hegaappe simmin, Mariya Isabela ubba kifiliyaa gelanaadan paqqadana mala oychaasu. Asttamaareti paqqadin, a ubba kifiliyan Mapuche sheeshsha gidida tamaaree deꞌiyaakkonne oychaasu. A hagaadan gaasu: “Taani timirtte keettan deꞌiya tamaaretuppe so asay Mapuche sheeshsha gididoogeeti geella 10 woy 15 gidana gaada qoppaas, shin keehi daroti deꞌoosona; taani 150 shoobiyaa woraqataa immaas!”

“GASTTA URA NAAGAASU”

Timirtte keettaa geliyoosan deꞌiya shoobiyaa woraqataa beꞌida issi maccaasiyaa he baalaa xeelliyaagan oona haasayissana danddayiyaakko oychaasu. Tammu laytta naꞌeera gattin a ay keena garamettidaakko qoppa! Mariya Isabela moocu gaydda, “A gastta ura naagaasu” yaagaasu. Mariya Isabela iyyo shoobiyaa woraqataa immada, guuttaa qonccissa simmada, anne o yelidaageeti Xoossaa Kawotettaabaa maccaaseeyyo gujjidi yootanau zaarettidi oychana mala i adrashaa oychaasu. Mapudungun qaalan haggaaziya 20 aassiyaageeti he maccaasiyaa Mapuche sheeshsha gidida hara 26 asaara he Baalaa bonchiyoosaa yiidoogan ay keena ufayttidonaashsha. He citay haꞌꞌi dicciiddi deꞌiya gubaaꞌe gidiis!

Neeni naꞌa gidin gastta gidin, nenaara tamaariyaageeta woy nenaara oottiyaageeta Godaa Kahuwau, dere haasayau woy awuraajjaa shiiquwau shoobbana danddayay? Hegaa mala oosuwaa waatada loytta polana danddayiyaakko akeekanau maaddiyaabaa demmanau, nu xuufiyaa aybissi pilggikkii? Qassi, Yihooway neeni abaa xalan yootanau maaddan mala geeshsha ayyaanaa immanaadan woossa. (Luq. 11:13) Yaatikko, neenikka loytta qoppadanne halchada oottidobaa ayfiyan keehi garamettananne minettana danddayaasa.