Xillotunne Iitatu Dummatettaa Akeeka

1, 2. Ha wodiyan Xoossaa asaa gakkiya metoy aybee? (Doomettan deꞌiya misileta xeella.)

DARO dottoretinne narsseti asaappe asaa oyqqiya harggiyan sahettiyaageeta akkamoosona. Eti hegaadan oottiyoy sahettidaageeta maaddanawu koyiyo gishshataassa. Gidoppe attin, yaatiyo wode eti akkamiyoogeetuppe banttana harggee oyqqenna mala naagettana koshshees. Hegaadankka, nuuppe daroti Xoossaa eeshshaappe muleera dummatiya, qohiya qofaynne eeshshay deꞌiyo asatuura deꞌoosinne oottoos. Hegee nuussi metiyaaba gidana danddayees.

² Ha wurssetta gallassay asay kandduwan keehi moorettido wode. Kiitettida PHawuloosi Ximootiyoosawu xaafido naaꞌꞌantto dabddaabbiyan, Xoossaappe haakkida asaa eeshshaa yootiis; he eeshshay wurssetta gallassan meeze gididaba. (2 Ximootiyoosa 3:1-5, 13 nabbaba.) Hegaa mala eeshshay keehi daridoogee nuna daganttana danddayiyaaba gidikkonne, hegaa mala eeshshaynne qofay deꞌiyoogeeti nuna qohanakka danddayoosona. (Lee. 13:20) Ha huuphe yohuwan, nuuni wurssetta gallassan deꞌiya asati bessiyo eeshshay Xoossaa asay bessiyo eeshshaappe waani dummatiyaakko beꞌana. Nuuni ayyaanaaban harata maaddiyo wode, he iita eeshshatun qohettennaadan nu huuphen waani naagettana danddayiyaakkokka beꞌana.

3. Naaꞌꞌantto Ximootiyoosa 3:2-5n odettida eeshshati deꞌiyoogeeti oonee?

³ Kiitettida PHawuloosi “wurssetta gallassi waissiya wodee” yaanaagaa xaafiis. Yaatidi, I wurssetta wodiyan deꞌiya asay bessana 19 iita eeshshata yootiis. Hegan odettidabay Roome 1:29-31n odettidabaara issi mala; shin, PHawuloosi Ximootiyoosawu xaafido dabddaabbiyan Giriiketto Geeshsha Maxaafan hara sohuwan qonccibeenna qaalatikka deꞌoosona. PHawuloosi “asati . . . gidana” yaagidi doommiis. SHin, ha eeshshati deꞌiyoy ubba asaassa gidenna. Kiristtaanetuyyo deꞌiya eeshshay hegaappe keehi dumma.—Milkkiyaasa 3:18 nabbaba.

NUUNI NU HUUPHIYAA WAATI XEELLIYOO?

4. Otoruwan sugettiyaageeta neeni waata qonccissuutee?

⁴ Daroti banttananne miishshaa siiqiyaageeta gidanaagaa yooti simmidi, PHawuloosi asati ceeqettiyaageeta, ayyiyaageetanne otoruwan sugettiyaageeta gidanaagaakka yootiis; ha eeshshati asay bawu deꞌiya eraa, qottaa, duretettaa woy aannisaa gaasuwan haratuppe aadhdhiyaabadan darotoo qoppiyoogaa bessiyaaba. Hegaa mala eeshshay deꞌiyo asati nashettanawunne sabettanawu keehi koyoosona. Issi eranchchay hegaa mala asa xeelliyaagan, “A wozanaa giddon I A sinttan goynniyo guutta yarshsho sohoy deꞌees” yaagiis. Likkiyaappe aattidi otorettiyoogee sheneyiyaaba gidiyo gishshawu, otorettiya uraykka harati otorettiyo wode dosennaagaa issoti issoti yootoosona.

5. Yihoowayyo ammanettida ashkkaratikka waanidi otorettidonaa?

⁵ Otoroy Yihoowa sheneyiyaaba gidiyoogee qoncce. I “karidi xeelliya aifiyaa” ixxees. (Lee. 6:16, 17) Otoroy issi uri Xoossaakko shiiqennaadan diggees. (Maz. 10:4) Hegee Dabloosa eeshsha. (1 Xim. 3:6) SHin, Yihoowayyo ammanettida ashkkaratuppe amaridaageetikka otorettidoogee azzanttiyaaba. Yihudaa kawoy Ooziyaani daro layttawu ammanettiis. “SHin Ooziyaani minnido wode otorettiis; otoroi A kunddettau kaalettiis. Ooziyaani GODAA ba Xoossaa naaqqiis; I ixaanaa cuwayiyo saaxiniyan ixaanaa cuwayanau GODAA Beeta Maqidasiyaa geliis” yaagidi Geeshshaa Maxaafay yootees. Guyyeppe, Kawuwaa Hizqqiyaasikka guutta wode xallawu gidikkonne, otorettiis.—2 Odi. 26:16; 32:25, 26.

6. Daawiti otorettanaadan oottana danddayiyaabay aybee, shin I ayssi otorettibeennee?

⁶ Issoti issoti meraa loꞌꞌo, daro asay dosiyoogeeta, yettan gooba, wolqqaama woy nashettidaageeta gidiyo gishshawu otorettoosona. Daawitayyo hegeetuppe issuwaa xalla gidennan, ubbaykka deꞌikkokka, I ba deꞌo laytta ubban ba huuphiyaa kawushshidi deꞌiis. I Gooliyaada wori simmin Kawuwaa Saaꞌoola naꞌiyaa assi machcho gidanaadan imettin, Daawiti hagaadan giis: “Kawoora bollotanau taani oonee? Ta so asaikka aibee? Woikko ta aawaa yaraikka Israa7eela asaa giddon aibee?” (1 Sam. 18:18) Daawiti ba huuphiyaa kawushshidi deꞌanaadan aybi maaddidee? He eeshshata, he eraanne he maataa Daawiti demmidoy Xoossay ‘duge hokkidi’ woy ba huuphiyaa kawushshidi, A xeellido gishshataassa gidiyoogaa I eriis. (Maz. 113:5-8) Daawiti baassi deꞌiya loꞌꞌoba ubbaa Yihoowappe ekkidoogaa akeekiis.—1 Qoronttoosa 4:7⁠ra gatta xeella.

7. Nu huuphiyaa kawushshanaadan nuna aybi maaddanee?

⁷ Daawitadan, Yihoowa asay ba huuphiyaa kawushshanawu ha wodiyan baaxetees. Saluwaaninne saꞌan Ubbaappe Xoqqiya Yihooway ‘ba huuphiyaa kawushshiyoogaa’ eriyoogan nuuni maalaalettoos. (Maz. 18:35, NW) “Maarotettaa, qaretaa, kehatettaa, intte huuphiyaa kaushshiyoogaa, ashkketettaanne danddayaa maayite” giya zoriyaa nuuni oosuwan peeshshanawu baaxetoos. (Qol. 3:12) Nuuni siiqoy ‘ceeqettennaagaakka otorettennaagaakka’ eroos. (1 Qor. 13:4) Harati nuuni nu huuphiyaa kawushshiyoogaa akeekiyo wode, eti Yihoowa eranawu koyana danddayoosona. Ammanenna azinaa A machchee loꞌꞌo eeshshay Yihoowakko shiiqanaadan oottana danddayiyoogaadan, Xoossaa ashkkarati bantta huuphiyaa kawushshiyoogee asay akko shiiqanaadan oottana danddayees.—1 PHe. 3:1.

NUUNI HARA ASAA WAATI OYQQIYOO?

8. (a) Yelidaageetuyyo azazettennaagaa ha wodiyan issoti issoti waati xeelliyoonaa? (b) Geeshshaa Maxaafay naati waatanaadan zorii?

⁸ Wurssetta gallassan deꞌiya asay issoy issuwaa waati oyqqanaakko PHawuloosi qonccissiis. I wurssetta gallassan naati banttana yelidaageetuyyo azazettennaageeta gidanaagaa yootiis. Ha wodiyan, daro maxaafati, pilimetinne televizhiiniyaa prograameti naati banttana yelidaageetuyyo azazettennaagee suurenne ekettiyaaba milatissidi qonccissoosona. SHin yelidaageetuyyo azazettennaagee deretettawu denddo gidida so asay shugganaadan oottiyoogee tuma. Asay he tumaa beniisappekka erees. Beni Giriiken, issi naꞌi ba aawaa woy ba aayyiyo shocikko, deretettan ayyo maati baawa; Rooma higgiyan, aawa shociyoogee woriyoogaa keena wolqqaamaba. Ibraawetto Geeshshaa Maxaafaykka Giriiketto Geeshsha Maxaafaykka naati banttana yelidaageeta bonchchanaadan zorees.—Kes. 20:12; Efi. 6:1-3.

9. Yelagati bantta aawaassinne bantta aayeessi azazettanaadan aybi maaddanee?

⁹ Naati banttana yelidaageeti etawu oottidobaa wotti dentti qoppiyoogan azazettennan ixxiyoogaappe banttana naagana danddayoosona. Nu ubbaa Aaway, Xoossay nu awu azazettanaadan koyiyoogaa eriyoogee nashshiyaageeta gidanaadan maaddees. Yelagati banttana yelidaageetubaa loꞌꞌobaa haasayiyoogan, eta laggeti banttana yelidaageeta loytti bonchchanaadan maaddoosona. Yelidaageeti bantta naata siiqennaba gidikko, naati etayyo wozanappe azazettanawu metootana danddayiyoogee erettidaba. Hara baggaara, issi yelagay ba aaway woy ba aayyiyaa wozanappe siiqiyoogaa akeekikko, azazettennan ixxanawu paacettiyo wodekka I eta ufayssees. Osttiini hagaadan giis: “Taani tabaa ekkada sooppe kiyanawu darotoo malikkonne, ta aawaynne ta aayyiyaa bessiya maaraa kessoosona, hegaa kessido gaasuwaa qonccissoosona; qassi qoncce gidida ogiyan tanaara ubbatoo haasayoosona. Hegee taani azazettanaadan maaddiis. Taani eti tawu qoppiyoogaa akeekaas; qassi hegee taani eta ufayssanawu koyanaadan oottiis.”

10, 11. (a) Issoy issuwaa siiqenna asay bessiyo iita eeshshati awugeetee? (b) Tumu Kiristtaaneti hara asaa ay keena siiqiyoonaa?

¹⁰ PHawuloosi asay issoy issuwaa siiqennaagaa bessiya hara iita eeshshatakka odiis. Galatennaageeta giyaagee harati kehidobawu nashshennaageeta qonccissiyo gishshawu, hegee “banttana yelidaageetuyyo azazettennaageeta” giyaagaappe kaallidi odettidoogee bessiyaaba. Asay geeshshatetti baynnaagaa woy ammanettennaagaa gidana. Eti sigettennaageeta giyoogee hara asaara sarotettaa medhdhanawu koyennaageeta giyoogaa. Eti asaanne ubba qassi Xoossaakka cayiyaageetanne kashi erikke giyaageeta gidana. Qassi eti haratu sunttaa iitaban denttiya zigirssanchchata woy sunttaa mooriyaageeta gidana.a

¹¹ Yihoowa ashkkarati harata tumuppe siiqiyo gishshawu, alamiyan deꞌiya daro asaappe keehi dummatoosona. Hagee awudenne tuma. SHooruwaa siiqiyoogee (agape) Muuse Higgiyan, Xoossaa siiqiyoogaappe kaallidi ubbaappe aadhdhiya naaꞌꞌantto azazo gidiyoogaa Yesuusi yootiis. (Maa. 22:38, 39) Issoy issuwaa siiqiyoogee tumu Kiristtaaneta erissiya eeshsha gidanaagaakka Yesuusi yootiis. (Yohaannisa 13:34, 35 nabbaba.) Tumu Kiristtaaneti bantta morkketakka siiqoosona.—Maa. 5:43, 44.

12. Yesuusi harata siiqiyoogaa waati bessidee?

¹² Yesuusi asaa tumuppe siiqiis. I Xoossaa Kawotettaa mishiraachchuwaa asawu yootanawu katamaappe katamaa biis. I qooqeta, wobbeta, inchchirichchay oyqqidoogeetanne hayttay siyennaageeta pattiis. I hayqqidaageeta denttiis. (Luq. 7:22) Yesuusi daroti A ixxishinkka, ba shemppuwaa asaassi aattidi immiis. Yesuusi ba Aawaa siiquwaa wottiyoobi baynna ogiyan kaalliis. Kumetta saꞌan, Yihoowa Markkati Yesuusa kaalloosona; qassi harata siiqoosona.

13. Nuuni haratuyyo bessiyo siiqoy eti Yihoowakko shiiqanaadan waati maaddana danddayii?

¹³ Nuuni harata siiqiyoogee asay saluwan deꞌiya nu Aawaakko shiiqanaadan oottees. Leemisuwawu, Taylande biittan deꞌiya issi bitanee killiliyaa shiiquwaa shiiqida ishantti siiqettiyoogaa beꞌidoogee A denttettiis. I soo simmido wode, saaminttan naaꞌꞌutoo Geeshsha Maxaafaa xannaꞌanawu oychchiis. I ba dabbo ubbaassi sabbakiis; he shiiquwaappe usuppun aginay aadhdhi simmin, assi koyro imetida Geeshsha Maxaafaa nibaabiyaa SHiiquwaa Addaraashan nabbabiis. Nuuni harata ay keena siiqiyaakko eranawu, nuna hagaadan oychchana danddayoos: ‘Taani soo asaa, gubaaꞌiyan deꞌiyaageetanne haggaazuwan demmiyoogeeta maaddanawu baaxetiyaanaa? Harata Yihooway xeelliyoogaadan xeellanawu baaxetiyaanaa?’

WANGGIREELLOTANNE DORSSAA MARATA

14, 15. Daroti bessiyo iita eeshshay aybee? Issotu issotu eeshshay waani laamettidee?

¹⁴ Wurssetta gallassan, nuuni haakkana koshshiyo hara iita eeshshatakka asay bessees. Daroti loꞌꞌobaa dosennaageeta, woy issi issi birshshettati giyoogaadan, “loꞌꞌobaa ixxiyaageeta” woy “loꞌꞌo gidida ubbabaa dosennaageeta” gidana. Eti banttana naagennaageetanne kehennaageeta gidana. Issoti issoti eesotiyaageeta woy zozzu giyaageeta. Eti oottiyoobay harata waati qohiyaakko qoppennaaninne etassi qarettennan oottoosona.

¹⁵ Doꞌaagaa mala iita eeshshay deꞌiyo daroti bantta eeshshaa laammidosona. Hegaadan laamettanaagee Geeshsha Maxaafaa hiraagan kasetidi odettiis. (Isiyaasa 11:6, 7 nabbaba.) He xiqisee wanggireellotinne gaammoti dorssaa maraaranne miizzaa maraara sarotettan deꞌiyoogaa yootees. Eti sarotettan deꞌiyoy aybissee? Geeshsha Maxaafay, “Sa7ai GODAA eriyoogan kumana” yaagidi qonccissees. (Isi. 11:9) Doꞌati Yihoowabaa tamaarana danddayenna gishshawu, ha hiraagay asaa eeshshay laamettanaagaa leemiso hanotan yootees.

16. Asay ba eeshshaa laamanaadan Geeshsha Maxaafay waati maaddidee?

¹⁶ Daroti wanggireellotudan kase iita; shin eti haꞌꞌi haratuura saruwan deꞌoosona. “Geeshsha Maxaafay Asay Laamettanaadan Oottees” giya, jw.org saytiyan deꞌiya huuphe yohuwan amaridaageetu deꞌuwan hanidabaa nabbabana danddayaasa. Yihoowa eridi awu haggaaziyaageeti bantta ammanuwaa bolla doonan ekkidaba milatiyaanne A tumu wolqqaa erikke giya asatu mala gidokkona. He asati Xoossawu goynniyaaba milatikkokka, eti oottiyoobay awu goynnennaagaa bessees. Kase iita asati “tumu xillotettaaninne geeshshatettan Xoossaa leemisuwan merettida ooratta asatettaa” maayidosona. (Efi. 4:23, 24) Asay Xoossaabaa tamaariyo wode, eti A maaraadan deꞌana koshshiyoogaa akeekoosona. Hegee eti bantta ammanuwaa, qofaanne eeshshaa laamanaadan maaddiis. Hegaadan laamettiyoogee deexxiyaabaa gidikkonne, Xoossaa sheniyaa oottanawu wozanappe koyiyaageeta Xoossa ayyaanay maaddiyo gishshawu eti laamettana danddayidosona.

“HEGEETU MALA ASATUKKO SHIIQOPPA”

17. Iita eeshshay deꞌiyo asati nuna qohennaadan nuuni waani haakkana danddayiyoo?

¹⁷ Yihoowawu haggaaziyaageetunne haggaazennaageetu giddon deꞌiya dummatettay dari dari biis. Xoossawu haggaaziya nuuni haratu iita eeshshay nuna qohennaadan naagettana bessees. Hegeetu mala asatukko shiiqoppa giya 2 Ximootiyoosa 3:2-5n odettida, geeshsha ayyaanaa kaaletuwan xaafettida zoriyaa nuuni oosuwan peeshshiyoogee loꞌꞌo. Nuuni iita eeshshay deꞌiyo asaappe muleera haakkana danddayennaagee qoncce. Nuuni etaara issippe oottiyaageeta, tamaariyaageeta, woy qassi deꞌiyaageeta gidana danddayoos. SHin nuuni etaagaadan qoppananne oottana bessenna. Nuna aybi maaddana danddayii? Nuuni Geeshsha Maxaafaa xannaꞌiyoogaaninne Yihoowa siiqiyaageetuura laggetiyoogan aara deꞌiya nu dabbotaa minttana danddayoos.

18. Nu haasayiyoobaynne nu eeshshay harata ayyaanaaban waati maaddana danddayii?

¹⁸ Nuuni harata ayyaanaaban maaddanawukka baaxetana bessees. Markkattanawu injje wodiyaa koya; bessiya wodiyan bessiyaabaa haasayanaadan Yihooway maaddana mala woossa. Nuuni Yihoowa Markka gidiyoogaa harati eranaadan oottana bessees. Yaatiyoogan, nu loꞌꞌo eeshshay nuussi gidennan, Xoossaassi bonchchuwaa ehaana. “Nagara oosuwaanne ha sa7aa amuwaa nuuni agganaadaaninne nu huuphiyaa naagidi, ha sa7an Xoossaa milatidi, xillotettan de7anaadan” nuuni tamaarida. (Tii. 2:11-14) Nuuni Yihoowa milatidi I koyiyoogaadan oottikko, harati hegaa akeekana. Ubba issoti issoti hagaadan gaana danddayoosona: “Xoossai inttenaara de7iyoogaa nuuni siyido gishshau, ane nuunikka [inttenaara] boos.”—Zak. 8:23.