Daafabay Gakkiyo Wode

“Koyro nuuni hidootaa qanxxida. Woddaynne diꞌoy nuuyyo deꞌiya ubbabaa xayssiis.”—Andira, Seeraliyoone.

“He gotiyaappe simmin nu soo simmida. Attidabi aybinne baawa. Nuuni keehi dagammida. Ta naꞌiyaa gulbbatada yeekkaasu.”—Deevida, Verjin Haruuruwaa.

DAAFABAY ne bolli gakkidaba gidikko, hegaa malabay gakkido harata daganttiyaabaa, etawu kirqqi giyaabaa, eta hirggissiyaabaanne elunchchiyaabaa neeni akeekana danddayaasa. Daafabay gakkido daroti hidootaa qanxxiyoonne abbiyaa xayiyo gishshawu, zaarettidi minnanawukka koyokkona.

Daafabay gakkidi nebaa ubbaa xayssidaba gidikko, neenikka genccanawu metootana danddayaasa. Neeni deꞌuwan deꞌiyoogee goꞌꞌennabadan qoppana danddayaasa. Gidoppe attin, neeni deꞌuwan deꞌiyoogee goꞌꞌiyoogaanne loꞌꞌobaa hidootan naaganaadan oottiyaabi deꞌiyoogaa Geeshsha Maxaafay yootees.

GEESHSHA MAXAAFAA TUMAY NUUSSI HIDOOTAY DEꞌANAADAN OOTTEES

Eranchchaa 7:8y, “Ai yohuwaassi gidikkonne, doomettaappe wurssettai keha” yaagees. Neeni daafabaappe minettanawu baaxetiyo wode, deꞌoy hidooti baynnaba milatana danddayees. SHin ne deꞌuwaa danddayan zaaretta essiyo wode, giigana danddayees.

“Hagaappe sinttanau yeekkiyaabaa cenggurssainne un77ettidi waassiyaabaa cenggurssai . . . siyettenna” sinttanaa wodiyaabaa Geeshsha Maxaafay yootees. (Isiyaasa 65:19) Xoossaa kawotettay saꞌaa gannate oottiyo wode hegee polettana. (Mazamure 37:11, 29) Daafabay zaarettidi mule gakkenna. Iitabaa hassayiyoogeenne seelettiyoogee merinawu xayana; ayssi giikko Xoossay, “Kasebai ubbai hassayettennanne qofettenna” yaagiis.—Isiyaasa 65:17.

Ane qoppa: Medhdhidaagee “intteyyo sintta wodiyaanne ufaissaa” hegeekka Xoossaa haaruwan ufayssiya deꞌuwaa immanawu giigissiis. (Ermmaasa 29:11) He tumaa eriyoogee ne deꞌuwan neeni woppu gaada deꞌanaadan oottennee? Koyro huuphe yohuwan ibay odettido Saala, “Xoossaa Kawotettay sinttappe oottana ufayssiya ubbabaa qoppiyoogee kase aadhdhidabata aggidi haꞌꞌibaa qoppanaadan nuna maaddana danddayees” yaagaasu.

Xoossaa Kawotettay matan asa naatussi oottanabaa gujjada eranaadan minttettoos. Yaatiyoogan, nena gakkiya daafabay deꞌishinkka, hegee baynna wodiyaa yeemuwan naagaydda woppu gaada deꞌanaagaa ammanettana danddayaasa. Ha wodiyan, Geeshsha Maxaafay nuna gakkiya metuwaa genccanaadan maaddiya minttettiya maarata immana danddayees. Amarida leemisota beꞌa.

Maaddana Danddayiya Geeshsha Maxaafaa Xiqiseta

Loytta xiskka.

“Daafuraaninne carkkuwaa oiqqanau yedettiyoogaa mala jaaman daafuridi demmiyo naa77u kushebaappe, woppan demmiyo issi kushebai darees.”—Eranchchaa 4:6.

Xannaꞌiyaageeti deꞌuwan hanidabaappe akeekidoogaadan, “loytti xiskkennaagee . . . issi uri unꞌꞌettanaadaaninne garssa asatettan metoy merettanaadan oottiyoogaa” qonccissidosona. Hegaa gishshawu, loytti xiskkiyoogee eratettaa.

Neeyyo siyettiyaabaa haraatuyyo yoota.

“Hirggiyoogee asa ufaissaa diggees; shin shonggaara de7iya haasayai a ufaissees.”—Leemiso 12:25.

Neeyyo siyettiyaabaa ne so asawu woy ammanettiyo laggiyawu yoota. Neeyyo siyettiyaabaa etawu yootiyo wode so asay woy mata laggee ezggiyoogaa bollikka nena minttettananne maaddana danddayoosona.a

Sinttanaa keha wodiyaa qoppa.

“Nuuni Xoossai immana giido ooratta saluwaanne ooratta sa7aa xilloi de7anasaa naagoos.”—2 PHeexiroosa 3:13.

a Daro wodiyawu unꞌꞌettiya uri akkamettana koshshees.