‘Ubba Asau’ Sabbaka
1. Sabbakiyoogan gooba gidida uri kushe hiillancha mala gidiyoy ayba ogiyaanee?
1 Kushe hiillancha gidida urau daro miishshati deꞌoosona; he miishshata i awude, qassi waati goꞌettanaakko erees. Hegaara issi mala hanotan, nuuni wonggelaawe gidiyoogaadan loytti sabbakanaadan maaddiya dumma dumma miishshati deꞌoosona. Leemisuwau, ‘ubba asau’ sabbakanaadan nuna maaddana mala dumma dumma huuphe yohotun daro brooshureti giigidosona. (1 Qor. 9:22) Ha aginaa Nu Kawotetta Haggaazuwan gujettidaagan issi issi brooshureti oossi giigidaakko, qassi asau eta waati immanaakko maaddiya qofay deꞌees.
2. Brooshureta haggaazuwan awude goꞌettana danddayiyoo?
2 Brooshureta Awude Goꞌettana Koshshii?: Kushe hiillancha gidida uri issi miishshaa koshshiyo wode ubban goꞌettees. Hegaara issi mala ogiyan, asau brooshuriyaa immiyo agina xallan gidennan, issi urau brooshuriyaa immana koshshiyo wode ubban immana danddayoos. Leemisuwau, Geeshsha Maxaafay Tamaarissiyoy giya maxaafaa asau immiiddi deꞌiyaaba gidikko, Geeshsha Maxaafaabaa eranau darin koyenna, Kiristtaane giyo haymaanootiyaa kaallenna asay deꞌiyo heeran sabbakiyo wode, he asau haniya brooshuriyaa immi simmidi, eti koyiyaaba gidikko, Geeshsha Maxaafay Tamaarissiyoy giya maxaafaa erissana danddayoos.
3. Nuuni sabbakanau goꞌettiyo miishshata hiillan goꞌettana koshshiyoy aybissee?
3 Geeshsha Maxaafay bantta oosuwaa cinccatettan oottiya asatubaa yootees. (Lee. 22:29) ‘Geeshsha gidida wonggeliyaa mishiraachuwaa yootiyoogaappe’ aadhiya hara oosoy ha wodiyan baynnaagee qoncce. (Roo. 15:16) Xoossaa “oosuwaayyo yeellatenna oosanchcha” gididi oottanau, nuuyyo deꞌiya miishshata hiillan goꞌettanau baaxetoos.—2 Xim. 2:15.