Xoossay Yootiyoobaa Siyanaadan Asaa Maaddite
1. “Xoossaa Kawotettay Yo!” giya Awuraajjaa SHiiquwan kiyida brooshureti awugeetee, qassi eti keehi goꞌꞌiyaaba gididoy aybissee?
1 “Xoossaa Kawotettay Yo!” giya Awuraajjaa SHiiquwan naaꞌꞌu ooratta brooshureti kiyidosona; hegeeti Xoossay Yootiyoobaa Siya Yaatada Merinau Deꞌa yaagiyaagaanne akeekanau metenna, Xoossay Yootiyoobaa Siya yaagiyaagaa. He brooshuretun xaafettidabay darenna gishshau, eta sohuwaara birshshana danddayettees. Xoossay Yootiyoobaa Siya Yaatada Merinau Deꞌa giya brooshuree Inggilizettuwan kiyiyo wode 431 qaalan birshshettanaadan paqqadettiis.
2. Ha brooshuretun goꞌettanaageeti oonee?
2 Ha brooshureti keehippe goꞌꞌiyo asati oonee? Saꞌa ubban darotoo hanettiya kaallidi deꞌiyaabata qoppite:
• Issi ura haasayissiya, Kawotettaabaa aassiya uri koyro gallassi woy zaarettidi oychiyo wode, i haasayissiyo uri tamaaribeennaagaa woy loyttidi nabbabennaagaa akeekees.
• Aassiya uri nuuni amarida xuufeta birshshido woy mule ay xuufenne birshshibeenna qaalaa haasayiya asau sabbakees. Woy qassi moottan deꞌiya daroti issi qaalaa loyttidi haasayoosona, shin nabbabana danddayokkona.
• Aassiya uri moottan deꞌiya, hayttay siyenna asatussi malaata qaalan sabbakees.
• Yelida uri nabbabiyoogaa danddayibeenna ba guutta naꞌaa tumaa tamaarissanau koyees.
3. Xoossay Yootiyoobaa Siya giya brooshuree giigidoy ayba ogiyaanee?
3 Brooshureti Giigido Ogiyaa: Xoossay Yootiyoobaa Siya giya brooshuriyan xaafettidabay keehi guutta, daro sinttatun tohossa baggan waanna qofaa qonccissiya qantta qofa qashoynne issi xiqisee deꞌees. Aybissi hegaadan giigidee? Ane issi uri intteyyo intte nabbabenna qaalaaninne beꞌi erenna pitaletun xaafettida brooshure immidobadan qoppite. Ubba he brooshuriyan daro loꞌꞌiya misileti deꞌiyaaba gidikkonne, intte hegaa eranau koyanee? Koyennan aggana danddayeeta. Hegaadankka, nabbabenna urau xaafettidabaa immiyo wode yeellatees. Hegaa gishshau, kasiyaa kaallidi tobbanau maaddiya malaatay deꞌiyo, borxxu giidi beettiya, akeekan giigida misileti ubba sinttatun deꞌoosona.
4. Xoossay Yootiyoobaa Siya Yaatada Merinau Deꞌa giya brooshuree ayba ogiyan giigidee?
4 Xoossay Yootiyoobaa Siya Yaatada Merinau Deꞌa giyaagan deꞌiya misileti Xoossay Yootiyoobaa Siya giyaagan deꞌiyaageetuura issi mala. Ha brooshuree loytti nabbabennaageeta woy nabbabiyoogaa tamaariiddi deꞌiyaageeta xannaꞌissanaadan giigiis. Issi ura Xoossay Yootiyoobaa Siya giyaagaa xannaꞌissiya uri, xannaꞌissiyo wode baayyo ha brooshuriyaa goꞌettana danddayees. Daro timirtteti naaꞌꞌu sinttan xaafettidosona; eta ubbaayyo huuphessa baggan haddirssa gaxan oyshay deꞌees. He oyshaa zaaroy he sinttatun deꞌees. Misiletu matan amarida qofay, qassi xiqisetu shemppoynne paydoy xaafettiis. Daro sinttatuyyo tohossa gaxan, tamaariyaa abbiyaadan tobbana danddayiyo gujo qofaynne xiqiseti xaafettido saaxinee deꞌees.
5. Ha brooshureta asau immana danddayiyoy awudee, qassi ayba ogiyaanee?
5 Eta Goꞌettiyo Ogiyaa: Intte sooppe soo haggaaziyo wode asau immana koshshiyoobadan qoppiyo wode ubban, he aginan imettiya xuufe gidana xayikkonne, ha brooshuretuppe issuwaa immana danddayeeta. (“Brooshureta Asau Immana Danddayiyo Ogiyaa” giya saaxiniyaa xeellite.) Eranau koyiya ura zaarettidi oychiyo wode, issi brooshuriyaa ayyo immiiddi intte a bessanau koyiyoobi deꞌiyoogaa yootana danddayeeta.
6. Nuuni ha brooshureta goꞌettidi Geeshsha Maxaafaa xannaꞌissana danddayiyoy ayba ogiyaanee?
6 Xoossay Yootiyoobaa Siya giyaagan oyshati baynna gishshau, Geeshsha Maxaafay Tamaarissiyoy giya maxaafaa xannaꞌissiyoogaadan oyshaaninne zaaruwan tobbana koshshenna. Ubba wogan diccida asay taarikiyaa siyiyoogaa dosees. Yaatiyo gishshau, misileta goꞌettidi, ayyaanaa kaaletuwan Geeshsha Maxaafan xaafettida taarikiyaa yootite. Misilee qonccissiyoobaa odite. Ammaniyoogaa bessiya ogiyan yootite. Tamaaree ba akeekidobaa yootanaadan oychite. Sinttau tohossa baggan deꞌiya xiqiseta nabbabidi he xiqisetu qofaa qonccissite. He urikka haasayana mala, qassi i akeekidaakkonne shaakki eranau oychite. I goꞌettiyoy Xoossay Yootiyoobaa Siya Yaatada Merinau Deꞌa giya brooshuriyaa gidikko, misiletu ubban tobbiyo wode xaafettida qofaanne xiqiseta aara issippe nabbabite.
7. Nuuni xannaꞌissiyo uri xinaatiyan sinttau suganaadan waatidi maaddana danddayiyoo?
7 Tamaaree Xinaatiyan Sinttau Suganaadan Maaddite: Intte tobbidobay xannaꞌiya uri ba huuphen Yihoowa loyttidi eranau nabbabiyoogaa tamaaranaadan denttettana danddayees. (Maa. 5:3; Yoh. 17:3) Yaatiyo gishshau, intte xannaꞌissiyoy Xoossay Yootiyoobaa Siya giyaagaa gidikko, xinaatiyaa doommoosappe guuttaa takkidi tamaaree waati nabbabanaakko tamaarissana danddayeeta; yaatidi qassi Xoossay Yootiyoobaa Siya Yaatada Merinau Deꞌa giyaagaa xannaꞌissana danddayeeta. Intte goꞌettiyo brooshuree awugaa gidikkonne, tamaaree brooshuriyaa xannaꞌi wurssidi xammaqettana danddayenna. Hegaappe simmin, Geeshsha Maxaafay Tamaarissiyoy giya maxaafaa woy i Geeshsha Maxaafaa loyttidi eranaadan maaddiya hara maxaafaa intte a xannaꞌissana koshshees.
8. Haggaazuwau ha ooratta brooshureta demmido gishshau intte Yihoowa galatiyoy aybissee?
8 Asay merinaa deꞌuwaa demmanau ubbabaa Haariyaagee yootiyoobaa siyana bessees. (Isi. 55:3) Yihooway nabbabana danddayennaageeta gujjin, “asai ubbai” i yootiyoobaa waatidi siyanaakko eranaadan koyees. (1 Xim. 2:3, 4) Xoossay yootiyoobaa waatidi siyanaakko asaa tamaarissanau ha ooratta miishshata demmido gishshau Yihoowa keehippe galatoos!
[Sinttaa 3n deꞌiya saaxiniyaa]
Brooshureta Asau Immana Danddayiyo Ogiyaa
Sinttaa 2-3n deꞌiyaagaa haasayissiyo uraa bessada hagaadan ga: “Hagaa malatiya alamiyan deꞌanau koyeetii? [Zaaranaashin takki ga.] Xoossay mata wode saꞌaa hiyyeesi woykko sahettiya asi baynna, loꞌꞌiyaanne sarotettay kumido soho oottanaagaa Geeshsha Maxaafay yootees. Nuuni yan deꞌanau ay oottana bessiyaakko akeekite. [Sinttaa 3 huuphessan deꞌiya Isiyaasa 55:3 nabbaba.] Ha xiqisee nuuni Xoossaakko ‘yaanaadaaninne’ i yootiyoobaa ‘siyanaadan’ odees. SHin nuuni Xoossay yootiyoobaa siyiyoy ayba ogiyaanee? Sinttaa 4-5 kessada hegaa zaaruwaa aara tobba. Ayyo wodee baynnaba gidikko, brooshuriyaa immada, simma yaada hegaa zaaruwaa tobbanau wodiyaa keera.