Neeni Xammaqettanawu Giigettadii?

1. Issi uri keettaa keexxanaappe kase ay oottana koshshii?

ISSI asi keettaa keexxanawu qofaa qachchiis gaada qoppa. I ay mala keettaa keexxanawu koyiyaakko erees. I eesuwaara suuqiyaa biidi koshshiya amaridabata shammidi keexxiyoogaa doommana koshshii? CHii. I doommanaappe kase, oottana bessiya keehi koshshiyaabay deꞌees. Ay keena miishshan keettaa wurssanaakko I kuuyana koshshees. Aybissi? Keettaa wurssanawu gidiya miishshay deꞌiyaakkonne I erana koshshiyo gishshataassa. Keexxanaappe kase I ay keena miishshaa kessanaakko loytti qoppikko, I ba keettaa keexxidi wurssana danddayees.

2. Luqaasa 14:28-30y yootiyoogaadan, neeni xammaqettanaappe kase ay loytta qoppana koshshii?

² Yihooway neessi oottidobaa gishshawu neeni Yihoowa siiqiyoogeenne A galatiyoogee xammaqettanawu qoppanaadan nena denttettidee? Yaanikko, keettaa keexxanawu koyida he bitaniyaagaadan neeni kuuyana koshshees. Hegaadan giyoy aybissee? Yesuusi yootido Luqaasa 14:28-30n deꞌiya qofaa beꞌa. (Nabbaba.) Ba erissiyo ashkkara gidiyoogaa giyoogee woygiyoogaakko Yesuusi yootiis. Nuuni A kaallanawu koyikko, metota genccanawunne issi issibata aggi bayanawu eeno gaana bessees. (Luq. 9:23-26; 12:51-53) Hegaa gishshawu neeni xammaqettanaappe kase, Kiristtoosi erissiyo ashkkara gidiyo wode gakkanabaa loytta qoppana koshshees. Yaatiyo wode, xammaqettida Kiristtaane gidada aggennan Xoossawu ammanettada haggaazanawu loytta giigettaasa.

3. Nuuni ha huuphe yohuwan ayba oyshata beꞌanee?

³ Metuwan genccidinne issi issibata aggi bayidi, Kiristtoosi erissiyo ashkkara gidiyoogan xammaqettiyoogawu goꞌꞌi deꞌii? Ee deꞌees! Xammaqettida issi uri ha wodiyankka sinttappekka daro anjjota demmana. Xammaqettiyoogaa xeelliyaagan keehi koshshiya amarida oyshata ane beꞌoos. Yaatiyoogee, “Taani xammaqettanawu giigettidanaa?” giyo oyshaa zaaranaadan maaddana.

BANA SHEEDHDHIYOOGAANNE XAMMAQETTIYOOGAA XEELLIYAAGAN NEENI AY ERANA KOSHSHII?

4. (a) Bana Yihoowawu sheedhdhiyoogaa giyoogee woygiyoogee? (b) Maatiyoosa 16:24n qonccidaagaadan, ‘bana yeggi bayiyoogaa’ giyoogee woygiyoogee?

⁴ Bana Yihoowawu sheedhdhiyoogaa giyoogee woygiyoogee? Neeni xammaqettanaappe kase nena sheedhdhana bessees. Neeni nena Yihoowawu sheedhdhiyo wode, akko wozanappe woossaasa; qassi merinawu ayyo haggaazanawu ne deꞌuwaa goꞌettanaagaa assi yootaasa. Neeni nena Xoossawu sheedhdhiyo wode nena ‘yegga bayaasa.’ Yesuusi ba erissiyo ashkkarata hagaadan yaagiis: “Tana kaallanawu koyiya uri deꞌikko, bana yeggi bayo; ba barchchiyaa mittaa tookko; aggennan tana kaallo.” (Maa. 16:24, NW) Neeni haꞌꞌi Yihoowabaa, hegee gita maata. (Roo. 14:8) He gallassaappe doommidi neeyyo aybippenne aadhdhiyaabay nena ufayssiyoogaa gidennan, Yihoowawu haggaaziyoogaa gidiyoogaa ayyo yootaasa. Nena Xoossawu sheedhdhiyoogee ayyo qaalaa geliyo gitaba. Yihooway nuuni ayyo nuna sheedhdhanaadan wolqqanttenna. SHin nuuni nuna Yihoowawu sheedhdhiyo wode, gelido qaalaa polanaadan I nuuppe koyees.—Maz. 116:12, 14.

5. Bana sheedhdhiyoogee xammaqettiyoogaara waani gayttii?

⁵ Bana sheedhdhiyoogee xammaqettiyoogaara waani gayttii? Neeni nena Yihoowawu sheedhdhiyo wode ooninne erenna. Darotoo issi woradaa woy killiliyaa shiiquwan asaa sinttan xammaqettaasa. Neeni xammaqettiyo wode, Yihoowawu nena sheedhdhidoogaa harata bessaasa.b Hegaa gishshawu, xammaqettiyoogee neeni ne Xoossaa Yihoowa ne kumetta wozanaappe, ne kumetta shemppuwaappe, ne kumetta qofaappenne ne kumetta wolqqaappe siiqiyoogaanne awu merinawu haggaazanawu murttidoogaa harati eranaadan oottees.—Mar. 12:30.

6-7. Koyro PHeexiroosa 3:18-22y yootiyoogaadan, xammaqettana koshshiyo naaꞌꞌu gaasoti aybee?

⁶ Xammaqettana koshshii? Koyro PHeexiroosa 3:18-22n deꞌiya qofaa beꞌa. (Nabbaba.) Markkabee Nohe ammanuwaa bessiyoogaadan, neeni xammaqettiyoogee Yihoowawu nena sheedhdhidoogaa bessees. SHin xammaqettana koshshii? Ee, koshshees. PHeexiroosi hegee koshshido gaasuwaa yootiis. Koyroogee, xammaqettiyoogee nuna “ashshees.” Nuuni Yesuusa ammaniyoogaa oosuwan bessikko, qassi I nu gishshawu hayqqidoogaa, denddidi saluwaa biidoogaanne ha wodiyan “Xoossaappe ushachcha baggan” uttidoogaa erikko, xammaqettiyoogee nuna ashshana danddayees.

⁷ Naaꞌꞌanttoogee, xammaqettiyoogee nuussi ‘loꞌꞌo zoriya wozanay’ woy loꞌꞌo kahay deꞌanaadan oottees. Nuuni nuna Xoossawu sheedhdhidi xammaqettiyo wode aara dumma dabbotaa dabbotiyoogaa doommoos. Nuuni nagaraappe simmido gishshawunne wozuwan ammanido gishshawu Xoossay nu nagaraa atto gees. Hegaa gishshawu, Xoossaa sinttan nuuyyo loꞌꞌo kahay deꞌana danddayees.

8. Xammaqettanawu neeni kuuyanaadan denttettiyay ayba gidana koshshii?

⁸ Xammaqettanawu neeni kuuyanaadan denttettiyay ayba gidana koshshii? Neeni Geeshsha Maxaafaa loytta xannaꞌiyo gishshawu Yihoowabaa, hegeekka A eeshshaabaanne A ogiyaabaa darobaa eradasa. Neeni abaa tamaaridobay nena denttettiisinne A keehi siiqanaadan oottiis. Xammaqettanawu neeni kuuyanaadan denttettiya waanna gaasoy Yihoowa siiqiyoogaa gidana koshshees.

9. Maatiyoosa 28:19, 20y yootiyoogaadan, Aawaa sunttan, Naꞌaa sunttaaninne geeshsha ayyaanaa sunttan xammaqettiyoogaa giyoogee woygiyoogee?

⁹ Neeni xammaqettanawu kuuyanaadan oottiya hara gaasoy Geeshsha Maxaafan deꞌiya tumaa ammanido gishshataassa. Erissiyo ashkkara oottanaadan Yesuusi azazido wode yootidobaa qoppa. (Maatiyoosa 28:19, 20 nabbaba.) Yesuusi giidoogaadan, xammaqettiyaageeti “Aawaa sunttan, Na7aa sunttaaninne Geeshsha Ayyaanaa sunttan” xammaqettana bessees. Hegee woygiyoogee? Yihoowabaa, A Naꞌaa Yesuusabaa, qassi geeshsha ayyaanaabaa Geeshsha Maxaafay yootiyo tumaa ne kumetta wozanappe neeni ammanana bessees giyoogaa. Ha tumay keehi maaddeesinne ne wozanaa denttettana danddayees. (Ibr. 4:12) Ane hegeetuppe amaridaageeta beꞌoos.

10-11. Aawaabaa neeni tamaaridonne ammanido tumay aybee?

¹⁰ Aawaabaa ha tumaa tamaarido wodiyaa hassaya: A sunttay “Yihoowa,” I ‘Ubbaappe Xoqqiya, saꞌaa ubbaa haariyaagaa,’ qassi A xalaalay “tumu Xoossaa.” (Maz. 83:18, NW; Erm. 10:10) I nuna Medhdhidaagaa, qassi Yihooway ‘ashshiyaagaa.’ (Maz. 3:8; 36:9) I nagaraappenne hayquwaappe nuna ashshanawu hanotaa giigissiis; qassi merinaa deꞌuwaa hidootaa nuussi immiis. (Yoh. 17:3) Neeni nena sheedhdhiyoogeenne xammaqettiyoogee Yihoowa Markka gidiyoogaa bessana. (Isi. 43:10-12) Neeni Xoossaa sunttan xeesettiyoogan ceeqettiyaanne he sunttaa harati eranaadan oottiya kumetta saꞌan awu goynniya so asaa yara gidana.—Maz. 86:12.

¹¹ Aawaa xeelliyaagan Geeshsha Maxaafay tamaarissiyoobaa akeekiyoogee gita maata! Neeni ha alꞌꞌo tumaa ammanido wode, nena Yihoowawu sheedhdhada xammaqettanaadan ne wozanay nena denttettiis.

12-13. Naꞌaabaa neeni tamaaridonne ammanido tumay aybee?

¹² Neeni Naꞌaabaa kaallidi deꞌiya tumaa tamaarido wode neeyyo aybi siyettidee? Yesuusi Yihoowappe kaallidi saluwaaninne saꞌan ubbaappe xoqqiyaagaa. I nuna woziis. I nu gishshawu ba deꞌuwaa immiis. Wozuwan ammaniyoogaa nuuni oosuwan bessiyo wode nu nagaray atto geetettees, Xoossaara dabbotay nuussi minnees, qassi merinaa deꞌuwaa demmoos. (Yoh. 3:16) Yesuusi Qeese Ubbatu Halaqa. Wozuwaappe goꞌettanaadaaninne Xoossaara dabbotidi deꞌanaadan nuna maaddanawu I koyees. (Ibr. 4:15; 7:24, 25) Yesuusi Xoossaa Kawotettaa Kawo gidiyo gishshawu, Yihooway A baggaara ba sunttaa geeshshana, iitatettaa xayssananne Gannatiyan merinawu anjjuwaa ehaana. (Maa. 6:9, 10; Ajj. 11:15) Yesuusi nuuyyo leemiso. (1 PHe. 2:21) Xoossaa sheniyaa polanawu minni oottiyoogan I nuuyyo leemiso gidiis.—Yoh. 4:34.

¹³ Yesuusabaa Geeshsha Maxaafay tamaarissiyoobaa neeni ammaniyo wode, Xoossaa alꞌꞌo Naꞌaa siiqaasa. Yesuusi oottidoogaadan, he siiqoy neeni ne deꞌuwan Xoossaa sheniyaa polanaadan denttettees. Hegee, neeni nena Yihoowawu sheedhdhada xammaqettanaadan denttettiis.

14-15. Geeshsha ayyaanaabaa neeni tamaaridonne ammanido tumay aybee?

¹⁴ Neeni geeshsha ayyaanaabaa kaallidi deꞌiya tumaa tamaarido wode neeyyo aybi siyettidee? Geeshsha ayyaanay sillaasiyaa shaaho gidennan, Xoossaa wolqqa. Yihooway Geeshsha Maxaafaa xaafissanawu geeshsha ayyaanaa goꞌettiis; qassi he ayyaanay nuuni nabbabiyoobaa akeekanaadaaninne oosuwan peeshshanaadan nuna maaddees. (Yoh. 14:26; 2 PHe. 1:21) Yihooway ba ayyaanaa baggaara ‘ubbaappe aadhdhiya wolqqaa’ nuussi immees. (2 Qor. 4:7) He ayyaanay mishiraachchuwaa sabbakanaadan, paaciyaa xoonanaadan, hidootaa qanxxennaadaaninne metota genccanaadan nuussi wolqqaa immees. He ayyaanay ‘ayyaanaa ayfe’ gidida loꞌꞌo eeshshata ayfanawu nuna maaddees. (Gal. 5:22) Xoossay banan ammanettiyaanne ayyaanaa demmanawu wozanappe oychchiya asatussi he ayyaanaa darissidi immees.—Luq. 11:13.

¹⁵ Yihoowawu goynniyaageeti awu haggaazanaadan geeshsha ayyaanay eta maaddanaagaa eti ammanettana danddayiyoogaa eriyoogee keehi minttettiyaaba! Geeshsha ayyaanaabaa tamaarada ammanidoogee neeni nena Xoossawu sheedhdhada xammaqettanaadan denttettees.

16. Hanno gakkanawu nuuni xannaꞌidoban ay tamaaridoo?

¹⁶ Nena Xoossawu sheedhdhada xammaqettanawu kuuyiyoogee keehi gitaba. Nuuni tamaaridoogaadan, metota genccanawunne issi issibata aggi bayanawu eeno gaana bessees. SHin, neeni demmana anjjoti ne agga bayiyoobatuppe keehi aadhdhoosona. Xammaqettiyoogee nena ashshana danddayees; qassi Xoossaa sinttan neessi loꞌꞌo kahay deꞌanaadan oottees. Xammaqettanawu neeni kuuyanaadan denttettiya waanna gaasoy Xoossaa Yihoowa siiqiyoogaa gidana koshshees. Qassi neeni Aawaabaa, Naꞌaabaanne geeshsha ayyaanaabaa tamaarido tumaa ne kumetta wozanaappe ammanana koshshees. Nuuni hanno gakkanawu tamaaridobaa qoppada, “Taani xammaqettanawu giigettidanaa?” giya oyshaa woyga zaaruutee?

NEENI XAMMAQETTANAAPPE KASE AY OOTTANA KOSHSHII?

17. Issi uri xammaqettanaappe kase oottana bessiyaabati aybee?

¹⁷ Neeni xammaqettanawu giigidabadan qoppikko, Yihoowaara dabbotaa minttanawu darobaa oottidoogee qoncce.c Geeshsha Maxaafaa ubbatoo xannaꞌiyo gishshawu, Yihoowabaanne Yesuusabaa darobaa eradasa. Ne ammanoy minniis. (Ibr. 11:6) Geeshshaa Maxaafan qonccida, Yihooway immanawu qaalaa gelidobatun keehi ammanettaasa, qassi Yesuusa yarshshuwan ammanidoogee nagaraappenne hayquwaappe nena ashshana danddayiyoogaa ammanadasa. Ne nagaraappe simmadasa; neeni oottido iitabawu wozanappe zilꞌꞌettadasanne Yihooway atto gaanaadan woossadasa. Ne deꞌuwan laamettadasa; neeni kase deꞌiyo iita deꞌuwaa ixxada Xoossaa ufayssiya ogiyan deꞌiyoogaa doommadasa. (Oos. 3:19, 20) Ne ammanuwaabaa haratussi yootanawu keehi koyaasa. Xammaqettibeenna aassiyaagaa gidanawu neeppe koyettiyaabaa kunttada gubaaꞌiyaara issippe sabbakiyoogaa doommadasa. (Maa. 24:14) Neeni ha koshshiyaabata oottido gishshawu Yihooway nenan ceeqettees. Neeni A keehi ufayssadasa.—Lee. 27:11.

18. Neeni xammaqettanaappe kase oottana bessiya harabay aybee?

¹⁸ Neeni xammaqettanaappe kase oottana bessiya hara amaridabati deꞌoosona. Nuuni kase tamaaridoogaadan, nena Xoossaassi sheedhdhana koshshees. Nerkka wozanappe akko woossa, qassi ne deꞌuwan A sheniyaa oottanawu koyiyoogaa minttada yoota. (1 PHe. 4:2) Yaatada neeni xammaqettanawu koyiyoogaa cimata shiishshiya ishaassi yoota. I amarida cimati nena haasayissanaadan oottana. Etaara haasayanawu yayyoppa. He keha ishantti nena eriyoogaanne siiqiyoogaa hassaya. Neeni tamaarido ayfettiya Geeshsha Maxaafaa timirtteta eti nenaara zaarettana. Neeni he timirtteta akeekidaakkonne qassi nena sheedhdhada xammaqettiyoogee keehi koshshiyaaba gidiyoogee neessi gelidaakkonne eti shaakki eranawu koyoosona. Eti neeni xammaqettanaadan maayettikko, kaalliya gita shiiquwan xammaqettana danddayiyoogaa neeyyo yootana.

NEENI XAMMAQETTA SIMMADA AY OOTTANA KOSHSHII?

19-20. Neeni xammaqetta simmada ay oottana koshshii, qassi waatada hegaadan oottana danddayay?

¹⁹ Neeni xammaqetta simmada ay oottana koshshii?d Bana sheedhdhiyoogee caaqo gidiyoogaanne Yihooway neeni he caaquwaa polanaadan koyiyoogaa hassaya. Hegaa gishshawu, xammaqetta simmada nena sheedhdhiyo wode gelido qaalaa naagada deꞌa. Hegaa waata naagana danddayay?

²⁰ Ne gubaaꞌiyaakko shiiqada deꞌa. Neeni xammaqettida Kiristtaane gidido wode ‘ishanttu’ yame gidadasa. (1 PHe. 2:17) Gubaaꞌiyan deꞌiya ne ishanttinne michchontti neeyyo ayyaanaaban so asa. Ubbatoo shiiquwaa shiiqiyoogan etaara dabbotaa minttada deꞌaasa. Galla galla Xoossaa Qaalaa nabbabanne hegaa wotta dentta qoppa. (Maz. 1:1, 2) Neeni Geeshsha Maxaafaappe amarida qofaa nabbaba simmada, amarida wodiyaa hegaa takki gaada loytta qoppa. He wode ne nabbabidobay ne wozanaa denttettana. Ubbatoo ‘woossa.’ (Maa. 26:41) Neeni wozanappe woossiyoogee Yihoowakko kaseegaappe aaruwan shiiqanaadan maaddana. ‘Kasetada Xoossaa Kawotettaa koya.’ (Maa. 6:33) Sabbakiyo oosuwaa ne deꞌuwan sinttayiyoogan hegaadan oottana danddayaasa. Ubbatoo sabbakiyoogee ne ammanoy minnidi deꞌanaadan oottana; qassi harati merinaa deꞌuwaa hidootaa demmanaadan maaddana danddayees.—1 Xim. 4:16.

21. Xammaqettiyoogee neeyyo ay demissanee?

²¹ Nena Yihoowawu sheedhdhada xammaqettanawu kuuyidoogee ubbabaappe aadhdhiyaaba. Neeni agganabay deꞌiyoogee tuma. Aggiyoogawu goꞌꞌay deꞌii? Ee deꞌees! Ha ceega alamiyan nena gakkana danddayiya ay metoykka “ha77issau” gakkiya ‘guuttaba.’ (2 Qor. 4:17) SHin, neeni xammaqettiyoogee haꞌꞌi loꞌꞌo deꞌuwaa deꞌanaadan, qassi sinttappe “tumu de7uwaa” demmanaadan oottana. (1 Xim. 6:19) Yaatiyo gishshawu, “Taani xammaqettanawu giigettidanaa?” giya oyshaa zaaranawu woosan loytta qoppa.