XANNAꞌIYO HUUPHE YOHUWA 17
MAZAMURE 99 Daro SHaꞌu Ishantta
Nuuni Mule Nurkka Gidokko
“Taani nena maaddana.”—ISI. 41:10.
TAMAARANABAA
Yihooway nuussi qoppiyogaa bessiyo oyddu ogeta beꞌana.
1-2. (a) Metoy nuna gakkiyo wode nuuni nurkka deꞌennaagaa ammanettana danddayiyoy aybissee? (b) Nuuni ha huuphe yohuwan ay beꞌanee?
NUNA wolqqaama metoy gakkiyo wode, nuuni woraa giddon nurkka deꞌiyabadaaninne he woraappe kiyiyo ogiya demmana danddayennabadan qoppana danddayoos. Shin nu nurkka deꞌokko. Saluwan deꞌiya nu siiqo Aaway nu metuwa beꞌiyogaa xalaala gidennan, I nuna maaddanawukka qaalaa geliis. Yihooway ammanettida ba ashkkaratussi hagaadan giis: “Taani nena maaddana.”—Isi. 41:10.
2 Yihooway (1) nuna kaalettiyogan, (2) nuussi koshshiyabaa kunttiyogan, (3) nuna naagiyogan, qassi (4) nuna minttettiyogan waati maaddiyakko ha huuphe yohoy qonccissees. Nu deꞌuwan nuna ay metoy gakkikkokka, Yihooway nuna mule dogennaagaa yootiis. I nuna mulekka aggenna. Hegaa gishshawu, nuuni mule nurkka deꞌokko.
YIHOOWAY NUNA KAALETTEES
3-4. Yihooway nuna waati kaalettii? (Mazamure 48:14)
3 Mazamure 48:14 nabbaba. Yihooway nuuni nurkka nuna kaalettana danddayennaagaanne A kaaletoy nuussi koshshiyogaa erees. I ha wodiyan bawu ammanettidi goynniyageeta waati kaalettii? I yaatiyo issi ogee nuna Geeshsha Maxaafaa baggaara kaalettiyogaa. (Maz. 119:105) Yihooway ba Qaalaa baggaara nuuni loꞌꞌobaa kuuyanaadan, qassi ha wodiyan keehi ufayttanaadaaninne sinttappe merinaa deꞌuwa demmanaadan oottiya eeshshati nuussi deꞌanaadan nuna maaddees.a Leemisuwawu, nuuni uluwan lancciya oyqqennaadan, nu oottiyo ubbaban tumanchcha gidanaadaaninne issoy issuwara wozanappe siiqettanaadan Yihooway nuna tamaarissees. (Maz. 37:8; Ibr. 13:18; 1 PHe. 1:22) Nuuni ha eeshshata bessiyo wode loꞌꞌo aawa, aayo, azina, machcho, qassi lagge gidoos.
4 Yihooway metoy gakkidonne nuugaadan siyettido asatubaa Geeshsha Maxaafan xaafissiis. (1 Qor. 10:13; Yaaq. 5:17) Nuuni he asatu deꞌuwan hanidabaa nabbabiyonne etappe tamaaridobaa oosuwan peeshshiyo wode, baa giishshin naaꞌꞌu ogetun goꞌettoos. Koyruwan, metoy gakkiyoy nu xalaala gidennaagaa akeekoos. Nuugaa mala metoy gakkido harati Yihooway maaddin he metuwa xoonidosona. (1 PHe. 5:9) Qassi naaꞌꞌanttuwan, nu metuwa waati xoonana danddayiyakko tamaaroos.—Roo. 15:4.
5. Yihooway nuna O baggaara kaalettii?
5 Yihooway nuna ishanttunne michchonttu baggaarakka kaalettees.b Leemisuwawu, woradaa xomoosiyageeti nuna minttettanawu galchchata ubbatoo xomoosoosona. Eti haasayiyo haasayati nu ammanuwa minttoosonanne ufayssiya nu issippetettaa naagidi deꞌanaadan maaddoosona. (Oos. 15:40–16:5) Galchchaa cimatikka nuuni ubbay Yihoowara dabbotaa minttidi deꞌanaadan maaddanawu baaxetoosona. (1 PHe. 5:2, 3) Yelidaageeti bantta naati Yihoowa siiqanaadan, loꞌꞌobaa kuuyanaadaaninne loꞌꞌo meezee etayyo deꞌanaadan tamaarissoosona. (Lee. 22:6) Qassi kayma michchontti yelaga michchonttussi loꞌꞌo leemiso gidiyogan, eta zoriyogaaninne minttettiyogan maaddoosona.—Tii. 2:3-5.
6. Yihoowa kaaletuwan goꞌettanawu nuuni waatana koshshii?
6 Yihooway nuuni loꞌꞌobaa kuuyanaadaaninne ufayttanaadan maaddiya kaaletuwa nuussi immees. I nuussi oottido ubbabaa gishshawu A nashshiyogaa waati bessana danddayiyoo? Leemiso 3:5, 6y hagaadan gees: “Ne polo wozanan GODAA ammanetta; ne akeekan zemppoppa.” Nuuni yaatiyo wode, “i [nuna] likke ogiyaa kaalettana.” Hegaa giyogee nuuni daro metotuppe naagettanaadaaninne ufayssiya deꞌuwa deꞌanaadan I nuna maaddana giyogaa. Yihooway nuna loytti eriyonne siiqiyo gishshawu, koshshiya zoriya nu ubbaa zorees, qassi nuuni hegawu A keehi galatoos!—Maz. 32:8.
YIHOOWAY NUUSSI KOSHSHIYABAA KUNTTEES
7. Yihooway nuna ayba ogiyan maaddii? (Piliphphisiyusa 4:19)
7 Piliphphisiyusa 4:19 nabbaba. Yihooway nuna ayyaanaaban kaalettiyogaa xalla gidennan, nuussi koshshiya qumaa, maayuwanne deꞌiyosaa demmanawu nu baaxetiyo baaxiyakka anjjees. (Mat. 6:33; 2 Tas. 3:12) Nuuni hageeta demmanawu hirggiyogee wottin deꞌiyaba. Shin hageetussi nuuni keehi hirgganaadan Yihooway koyenna. (Mat. 6:25) Aybissi? Nu Aaway bawu ammanettidi goynniyageeta maadoy koshshiyo wode mulekka aggenna gishshataassa. (Mat. 6:8; Ibr. 13:5) I nuussi koshshiyabaa kunttanaagaa yootidoogan wozanappe ammanettoos.
8. Yihooway Daawitawu oottidobay aybee?
8 Yihooway Daawita waati maaddidaakko beꞌa. Daawiti Kawuwa Saaꞌoolappe baqatido he metiya layttatun Yihooway awunne A asatussi deꞌuwawu koshshiyabaa immiis. Daawiti he meto wodiyan Yihooway awu koshshiyabaa waati kunttidaakko loytti qoppidi hagaadan giis: “Taani kase yelaga; ha77i simmi cimaas; shin xillo asi coo attin, woikko a naati miyoobaa woossin, taani mulekka be7a erikke.” (Maz. 37:25) Daawitaagaadan neenikka meto wodiyan neeyyo woy ne ishanttuyyonne michchonttuyyo koshshiyabaa Yihooway siiquwan waati kunttidaakko beꞌennan aggakka.
9. Daafabay gakkiyo wode Yihooway ha wodiyan ba asawu koshshiyabaa waati kunttii? (Misiliyakka xeella.)
9 Daafabay gakkiyo wodekka Yihooway ba asawu koshshiyabaa kunttees. Leemisuwawu, koyro xeetu layttan koshay denddido wode dumma dumma biittan deꞌiya Kiristtaaneti metootida bantta ishanttanne michchontta maaddanawu koshshiyabaa kiittidosona. (Oos. 11:27-30; Roo. 15:25, 26) Ha wodiyankka Xoossaa asati metootida bantta ishanttanne michchontta maaddoosona. Daafabay gakkiyo wode, qohettida heeran deꞌiya ishanttussi qumaa, haattaa, maayuwanne xaliya mala koshshiya harabata kunttanaadan Yihooway ba asaa siiquwan denttettees. Keexuwa oosuwa oottiya citay qohettida keettatanne Shiiquwa Addaraashata zaarettidi giigissees. Qassi Yihoowa ashkkarati Geeshsha Maxaafaa goꞌettidi bantta keettaa xayidaageetanne siiqiyogeeti hayqqidoogeeta sohuwara minttettoosonanne maaddoosona.c
Daafabay gakkiyo wode Yihooway nuna waati minttettii? (Mentto 9 xeella)e
10-11. Boorisa hanotaappe ay tamaariyoo?
10 Yihooway bawu goynniyogaa doommibeenna asatussikka kehatettan koshshiyabaa kunttees. Hegaadankka nuuni ammanennaageetussi kehatettaa bessiyo injjeta koyoos. (Gal. 6:10) Hegee darotoo loytti markkattanaadan maaddees. Issi timirtte keettan dilektere gididi oottiya Yukireenen deꞌiya Boorisa hanotaa ane beꞌa. Boorisi Yihoowa Markka gidana xayikkokka, Yihoowa Markka gidida tamaareta ubbatoo kehatettan oyqqiisinne eta ammanuwa bonchchiis. Boorisi deꞌiyo heeran olay denddido gishshawu, I olay baynna heeri baqatanawu kuuyido wode ishantti A maaddidosona. Guyyeppe, Boorisi Kiristtoosa hayquwa Hassayuwa baalaa bonchchiis. Boorisi ishantti awu oottido ubbabaa qoppidi hagaadan giis: “Yihoowa Markkati tana loytti maaddidosonanne tawu koshshiyabaa kunttidosona. Taani Yihoowa Markkata keehi galatays.”
11 Ammaniyageeta gidin aggin metootidaageetussi siiquwa bessiyogan nuunikka saluwan deꞌiya, maariya nu Aawaa milatana danddayoos. (Luq. 6:31, 36) Nuuni etawu bessiyo siiqoy eti Yihoowabaa loytti tamaaranawu koyanaadaaninne nunaara Yihoowawu haggaaziyogaa doommanaadan eta denttettanaagaa hidootoos. (1 PHe. 2:12) Shin eti Yihoowawu haggaazanawu doorin aggin nuuni ufayttana; ayssi giikko, ‘immiyogee aaruwan ufayssees.’—Oos. 20:35.
YIHOOWAY NUNA NAAGEES
12. Yihooway ba asaa aybippe naaganawu qaalaa gelidee? (Mazamure 91:1, 2, 14)
12 Mazamure 91:1, 2, 14 nabbaba. Ha wodiyan Yihooway ba asaa ayyaanaaban naaganawu qaalaa geliis. Seexaanay tumu goynuwa mooranaadan Yihooway mule paqqadenna. (Yoh. 17:15) Qassi ‘gita waayiya’ wode Yihooway nu ammanoy minnanaadan oottiyogaaninne nuna ashshiyogan ba gelido qaalaa polanaagaa ammanettana danddayoos.—Ajj. 7:9, 14.
13. Yihooway nuna issuwa issuwa naagiyoy ayba ogetuunee?
13 Yihooway nuna issuwa issuwa waati naagii? Likkebaanne likke gidennabaa shaakkidi eranaadan I nuussi Geeshsha Maxaafaa immiis. (Ibr. 5:14) Nuuni Xoossaa Qaalay yootiyo maaraadan deꞌikko, ayyaanaabankka asatettaabankka qohuwappe attana danddayoos. (Maz. 91:4) Yihooway nuna galchchaa baggaarakka naagees. (Isi. 32:1, 2) Galchchan deꞌiya nu ishanttinne michchontti Yihoowa siiqoosonanne awu azazettoosona. Nuuni etaara shiiqotun, haggaazuwaninne allaxxiyosan wodiya aattiyogee nuna minttetteesinne nuuni iitabaappe naagettanaadan maaddees.—Lee. 13:20.
14. (a) Xoossay metoy nuna gakkanaadan paqqadiyoy aybissee? (b) Mazamure 9:10y ay qonccissii? (Tohossa qofaakka xeella.)
14 Beni wode Yihooway ba asay qohettennaadan woy hayqqennaadan issi issitoo naagiis. Shin I ubbatoo hegaadan oottibeenna. Qoppibeenna metoy ubba asaa bolli gakkana danddayiyogaa Geeshsha Maxaafay yootees. (Era. 9:11) Hegaa bollikka, Seexaanay worddanchcha gidiyogee qonccanaadan Yihooway amarida ba ashkkaratu bolli naaqoy gakkanaadan woy eti hayqqanaadan eeno giis. (Iyy. 2:4-6; Mat. 23:34) Ha wodiyankka hegaa mala. Yihooway nu metuwa qaarennan aggana danddayees; shin I bana siiqiyageeta mule yeggennaagaa ammanettana danddayoos.d—Maz. 9:10.
YIHOOWAY NUNA MINTTETTEES
15. Woosaa, Xoossaa Qaalaanne nu mala Kiristtaanetu baggaara nuuni minttettuwa waati demmiyoo? (2 Qoronttoosa 1:3, 4)
15 Naaꞌꞌantto Qoronttoosa 1:3, 4 nabbaba. Issi issitoo nuuni azzanoos, hirggoos, woy unꞌꞌettoos. Geella haꞌꞌi nena metoy gakkiiddi deꞌiyogee nerkka attidabadan neessi siyettanaadan oottana danddayees. Yaatin neessi siyettiyabaa ooni akeekanee? Yihooway akeekees. I nu metuwa akeekiyogaa xalaala gidennan, “nu waaye ubban nuna minttettees.” Waatidi? Nuuni nuussi siyettiya ubbabaa Yihoowayyo woosan yootiyo wode, ‘asi akeekana danddayenna sarotettaa Xoossay nuussi immees.’ (Pili. 4:6, 7) Qassi Yihooway nuussi yootidobata Geeshsha Maxaafaappe nuuni nabbabiyo wode minttettuwa demmoos. Geeshsha Maxaafay Yihooway nuna keehi siiqiyogaa, nuuni akeekanchcha gidanaadan I nuna tamaarissiyogaanne I nuussi hidootay deꞌanaadan oottiyogaa yootees. Qassi shiiqotun Geeshsha Maxaafaappe minttettiyabaa tamaariyogaaninne nuna siiqiya ishanttuuranne michchonttuura gayttiyogan minttettuwa demmoos.
16. Neeni Naataananne Phirisqqili hanotaappe ay tamaaray?
16 Yihooway ba Qaalaa baggaara waati minttettiyakkonne maaddiyakko akeekanawu Amarkkan deꞌiya Naataananne Phirisqqili hanotaa beꞌa. Amarida layttaappe kase, eti Kawotettaa mishiraachchuwa aassiyageeti keehi koshshiyosaa biidi haggaazanawu kuuyidosona. Naataani hagaadan giis: “Yihooway nu baaxiya anjjanaagaa ammanettida.” Gidikkonne, eti yaa gakki simmidi qoppennan sahettidosonanne miishshaa metootidosona. He azinaynne machchiya wurssettan soo simminkka miishshaa metoy attibeenna. Naataani hagaadan giis: “Xoossay nu qoppidoogaadan nuna anjjibeennay aybisseeshsha gaada qoppaas. Taani oottido balabay deꞌiishsha gaada qoppiyogaakka doommaas.” Shin Naataaninne Phirisqqila waayissiya wodiyan Xoossay eta aggibeennaagaa guyyeppe akeekidosona. Naataani hagaadan giis: “He metiya wodetun Geeshsha Maxaafay nuussi minttettuwanne kaaletuwa immiyogan akeekanchcha lagge mala gidiis. Nu metotun gidennan, hegeeta xoonanaadan Yihooway nuna maaddido ogiyan xeelaa wottidoogee Yihooway sinttappekka nuna maaddiyogaa aggennaagaa nuuni ammanettanaadan oottiis.”
17. Helggo giyo michchiya minttettuwa awuppe demmadee? (Misiliyakka xeella.)
17 Nu ishanttinne michchonttikka nuna minttettoosona. Waatidi? Hanggaariya biittan deꞌiya Helggi hanotaa beꞌa. Daro layttawu A unꞌꞌettanaadaaninne bana pattenna asadan xeellanaadan oottiya daro metoy O gakkiis. Shin A he layttatubaa qoppiyo wode, galchchan deꞌiya ishanttunne michchonttu baggaara Yihooway O minttettidoogaa akeekaasu. A hagaadan gaasu: “Oosuwa, sahettiya ta naꞌaa xeelliyogaanne hara metotuppe denddidaagan taani unꞌꞌettidoogaa Yihooway beꞌidi ubbatoo tana maaddiis. Aadhdhida 30 layttatun, ubba gallassi I tana minttettanawu gelido qaalaa naagiis. Harati yootiyo minttettiya qofaa baggaara I tana darotoo maaddiis. Tawu keehi koshshiyo wodiyan kiitay, karddee, woy galatay tana darotoo gakkees.”
Neeni harata minttettanaadan Yihooway nena waati goꞌettana danddayii? (Mentto 17 xeella)
18. Nuuni harata waati minttettana danddayiyoo?
18 Nuuni harata minttettiyogan Xoossaa milatiyo maataa demmida. Nuuni harata waati minttettana danddayiyoo? Eti yootiyobaa loytti ezggiyogan, eta zoriyogaaninne koshshiyaban eta maaddiyogan minttettana danddayoos. (Lee. 3:27) Xoossawu haggaaziyogaa doommibeennaageeta gujjin, waayettiya ubbaa minttettanawu baaxetoos. Nu shooroti azzaniyo, sahettiyo woy unꞌꞌettiyo wode nuuni biidi eta oychchoos, eti yootiyobaa siyoosinne Geeshsha Maxaafaappe minttettiyabaa etawu yootoos. Nuuni minttettiya Xoossaa Yihoowa milatiyogee nu mala Kiristtaaneti waayiya genccanaadan maaddiyogaa xalaala gidennan, Xoossawu haggaazennaageeti abaa eranawu koyanaadankka maaddana danddayees.—Mat. 5:16.
YIHOOWAY UBBATOO NUNAARA DEꞌEES
19. Yihooway nuussi oottiyobay aybee, qassi nuuni A waati milatana danddayiyoo?
19 Yihooway A siiqiya ubbawu keehi qoppees. Metoy gakkiyo wode I nuna aggenna. Issi aaway woy aayyiya ba naꞌassi koshshiyabaa siiquwan kunttiyogaadan, Yihooway ammanettidi bawu goynniyageeta koshshiyaban maaddees. I nuna kaalettees, nuussi koshshiyabaa kunttees, nuna naagees, qassi nuna minttettees. Meto wodiyan nuuni harata maaddiyonne minttettiyo wode saluwan deꞌiya, siiqiya nu Aawaa milatoos. Ha alamiyan metoynne azzanoy nuna gakkana danddayikkokka Yihooway nunaara deꞌiyogaa ammanettana danddayoos. I nuussi hagaadan giidi qaalaa geliis: “Taani nenaara de7iyo gishshau yayyoppa.” (Isi. 41:10) Yaatiyo gishshawu nuuni mule nurkka deꞌennaagaa ammanettana danddayoos!
MAZAMURE 100 Eta Mokki Ekkite
a Hosppune 1, 2011 Wochchiyo Keelan kiyada “Xoossaa Bonchissiya Kuushshaa Kuuyite” giya huuphe yohuwa xeella.
b Usuppune 2024 Wochchiyo Keelan “Yihoowa Kaaletuwa Ubbatoo Kaalla” giya huuphe yohuwan mentto 11-14 xeella.
c “Daafaban qohettidaageeta maaddiyo oosuwa” gaada jw.org saytiyan xaafada mata wode leemisuwa koyana danddayaasa.
d Usuppune 2017 Wochchiyo Keelan “Nabbabiyageetu Oyshaa” xeella.
e MISILIYA QONCCISSUWA: Maalaawen deꞌiya ishantti meretay gattiyo daafaban qohettido wode asatettaabaaninne ayyaanaaban maaduwa demmidosona.