Yesuusi Yihoowa Sunttaa Xoqqu Ootti Xeellidoy Aybissee?

1-2. (a) Yesuusi hayqqanaappe kase qammi waatidee? (b) Ha huuphe yohuwan nuuni beꞌana oyshati awugeetee?

YESUUSI Hamuusa Niisaana 14, 33 M.L., omarssan ba kiittido ammanettidaageetuura Godaa Kahuwa Baalaa bonchchiis. I matan Yihuday A kaddanaagaa, A morkketi A barchcheyanaagaanne woranaagaa eriis. Qassi eti kahuwa mi simmin minttettiya darobaa ba kiittidoogeetuyyo yootiis. Eti ubbay appe shaahettidi baanaappe guuttaa kasetidi Yesuusi keehi koshshiya woosaa woossiis. Nuuni he woosaa Yohaannisa shemppo 17n demmoos.

² Yesuusa woosay he wode A qofissiyabaa xeelliyagan ay qonccissii? Yesuusi ha saꞌan haggaazido wode ubban keehi xoqqu oottidi xeellidobaa he woosay waati qonccissii? Ha oyshatu zaaruwa ane pilggoos.

“TAANI ETAWU NE SUNTTAA ERISSAAS”

3. Yihoowa sunttaa xeelliyagan Yesuusi giidobay aybee, qassi hegee woygiyogee? (Yohaannisa 17:6, 26)

³ Yesuusi ba woosan hagaadan giis: “Taani etawu ne sunttaa erissaas.” Qassi I bana kaalliyageetuyyo Yihoowa sunttaa erissidoogaa naaꞌꞌutoo yootiis. (Yohaannisa 17:6, 26 nabbaba.) I woyganawu koyidee? Eti erenna sunttaa I etawu yootidee? Yesuusa kaalliyageeti Ayhuda gidiyo gishshawu, Yihoowa sunttaa kasekka eroosona. Ibraawettuwan xaafettida Geeshsha Maxaafan shaꞌan qoodettiya sohuwan he sunttay deꞌees. Yaatiyo gishshawu, Yesuusi Xoossaa buzo sunttaa gidennan, he sunttay qonccissiyobaa yootiiddi deꞌees. Yihooway ha saꞌawunne asawu halchchidobaa, oottidobaa, oottanabaanne awu deꞌiya eeshshatubaa gujjin, Yihoowabaa bana kaalliyageeti loytti eranaadan maaddiis. Yesuusaagaa keenaa Yihoowabaa ooninne erenna.

4-5. (a) Issi izaawu sunttay nuuni xoqqu ootti xeelliyoba waani gidana danddayii? (b) Yesuusa kaalliyageeti Yihoowa sunttaabaa loytti eridoy ayba ogiyanee?

⁴ Leemisuwawu, dottore gididi oottiya Deevida giyo cimay intte galchchan deꞌiyabadan qoppa. Neeni daro layttawu he ishaa eraasa. Shin issi gallassi neeni eesuwan akkamettanaadan oottiyabay merettiis. Neeni he ishay oottiyo hosppitaaliya eesuwan bin, I ba akkamo eraa goꞌettidi ne shemppuwa ashshiis. Haꞌꞌi kaseppe aaruwan ha ishaa siiqaasa, qassi A sunttaa siyiyo wode I neessi oottidobaa hassayaasa. Hagaappe simmin Deevidi neeni eriyo cima xalaala gidennan, ne shemppuwa ashshida dottore.

⁵ Hegaadankka Yesuusa kaalliyageeti Yihoowa sunttaa kasekka eroosona. Shin eti Yihoowabaa kaseegaappe aaruwan eranaadan Yesuusi maaddido gishshawu he sunttaa xoqqu ootti xeellidosona. Nuuni hegaadan giyoy aybissee? Haasayiyonne oottiyo ubbaban Yesuusi ba Aawaa milatido gishshataassa. Yaatiyo gishshawu, Yesuusi kiittidoogeeti I tamaarissiyobaa ezggiyogaaninne I asaa oyqqiyo ogiya xeelliyogan kaseppe aaruwan Yihoowa ‘eridosona.’—Yoh. 14:9; 17:3.

“NEENI TAAYYO IMMIDO NE SUNTTAA”

6. Yihooway ba sunttaa Yesuusawu immiis giyogee woygiyogee? (Yohaannisa 17:11, 12)

⁶ Yesuusi bana kaalliyageetubaa hagaadan giidi woossiis: “Neeni taayyo immido ne sunttaa gishshawu eta naaga.” (Yohaannisa 17:11, 12 nabbaba.) Hegaa giyogee Yesuusi haꞌꞌi Yihoowa sunttan xeegettees giyogee? Chii, gidenna. Yesuusi Yihoowa giyo sunttaabaa yootiyo wode “ne sunttaa” yaagiis. Yaatiyo gishshawu, Yihoowa sunttay Yesuusa suntta gidibeenna. Yaatin, Yesuusi Xoossaa sunttay baayyo imettidoogaa yootido wode woyganawu koyidee? Koyruwan, Yihooway ba gishshaa haasayanaadan Yesuusa kiittiis. I ba Aawaa sunttan yiidi malaalissiyabata he sunttan oottiis. (Yoh. 5:43; 10:25) Naaꞌꞌanttuwan, Yesuusa sunttaa birshshettay “Yihooway ashshiyagaa” giyogaa. Yaatiyo gishshawu, Yesuusa sunttaa birshshettay Yihoowa sunttaakka qonccissees.

7. Yesuusi Yihoowa gishshaa haasayana danddayidoy aybissakko qonccissiya leemisuwa yoota.

⁷ Yesuusi Yihoowa gishshaa haasayana danddayidoy aybissakko akeekanawu ha leemisuwa qoppa. Haariya issi izaawu ba gishshaa haasayanaadan hara ura kiittana danddayees. Yaatiyo gishshawu, he uri haasayiyo wode haariyagaara issi mala maatay ayyo deꞌees. Hegaadankka, Yesuusa Yihooway kiittido gishshawu A gishshaa haasayiyo maatay awu deꞌees.—Mat. 21:9; Luq. 13:35.

8. Yihooway Yesuusi ha saꞌaa yaanaappe kasekka ba sunttay “a bolli” deꞌees yaagidoy aybissee? (Kessaabaa 23:20, 21)

⁸ Kiitanchchatinne asay eranaadaaninne oottanaadan Yihooway koyidobaa Yesuusa baggaara yootido gishshawu, Geeshsha Maxaafay A, “Qaalaa” yaagees. (Yoh. 1:1-3) Israaꞌeelati bazzuwan deꞌiyo wode etayyo koshshiyabaa kunttanaadan Yihooway kiittido kiitanchchay Yesuusa gidennan aggenna. Israaꞌeelati he kiitanchchawu azazettanaadan Yihooway yootido wode, eti yaatana koshshiyo gaasuwa etawu yootiis. I hagaadan giis: ‘Ta sunttay A bolli deꞌees.’a (Kessaabaa 23:20, 21 nabbaba.) Yihooway hegaadan giidoy Yesuusi A gishshaa haasayiyo gishshataassanne Yihooway oottiyo ubbabay suure gidiyogaa, qassi I geeshsha gidiyogaa qonccissiya waannay Yesuusa gidiyo gishshataassa.

“AAWAWU, NE SUNTTAA BONCHCHA”

9. Yesuusi Yihoowa sunttaa ay keena xoqqu ootti xeellidee? Qonccissa.

⁹ Nuuni beꞌidoogaadan, Yesuusi ha saꞌaa yaanaappe kasekka Yihoowa sunttaa keehi xoqqu ootti xeelliis. I saꞌan deꞌiyo wodekka Yihoowa sunttaa ay keena xoqqu ootti xeelliyakko ba oottiyo ubbaban bessiis! Yesuusi ba haggaazuwa wurssettaa heeran “Aawawu, ne sunttaa bonchcha” yaagidi woossiis. Yaatin sohuwarakka A Aaway gita cenggurssan saluwappe hagaadan giis: “Taani bonchchaas, qassi zaarettadakka bonchchana.”—Yoh. 12:28.

10-11. (a) Yesuusi Yihoowa sunttaa waati bonchchidee? (Misiliyakka xeella.) (b) Yihoowa sunttay geeyana koshshidoy aybissee?

¹⁰ Yesuusikka ba Aawaa sunttaa bonchchiis. Waatidi? Issi ogee, malaalissiya ba Aawaa eeshshatubaanne oosotubaa haratuyyo yootiyogaana. Shin I he sunttaa bonchchissanawu harabaakka oottiis. Yihoowa ooso ubbay suure gidiyogaanne A sunttay geeshsha gidiyogaa Yesuusi bessana koshshiis. Yesuusi bana kaalliyageeti waati woossanaakko tamaarissido wode hegee keehi koshshiyogaa yootiis. I hagaadan giis: “Saluwan deꞌiya nu Aawawu, ubbay ne sunttaa geeshsha oottidi xeello.”—Mat. 6:9.

¹¹ Yihoowa sunttay geeyana koshshiyoy aybissee? Edene ataakiltte sohuwan Seexaanay Xoossaa Yihoowabaa wordduwa yootido gishshataassa. Seexaanay Yihooway worddanchcha, qassi Addaamanne Hewano loꞌꞌobaa diggiis giidi yootiis. (Doo. 3:1-5) Qassi Seexaanay Yihooway oottiyobay likke gidenna giidi yootiis. Seexaanaa worddo mootoy Yihoowa sunttay bayanaadan oottiis. Guyyeppe, Iyyooba wodiyan Seexaanay Yihoowayyo haggaaziyageeti hegaadan oottiyoy appe maaduwa demmiyo gishsha xallaassa yaagidi yootiis. Ha sunttaa bashshiyagee ooninne Yihoowa tumuppe siiqenna gishshawu metoy gakkiyo wode awu haggaaziyogaa aggees yaagidi yootiis. (Iyy. 1:9-11; 2:4) Worddanchchay Yihoowakkonne woy Seexaanaakkonne erettana mala wodee koshshiis.

‘TA SHEMPPUWA AATTADA IMMAYS’

12. Yesuusi Yihoowa sunttaa siiqiyo gishshawu ay oottanawu eeno giidee?

¹² Yesuusi Yihoowa siiqiyo gishshawu, Yihoowa sunttay geeyanaadan bawu danddayettida ubbabaa oottana koyiis. Yesuusi, ‘Ta shemppuwa aattada immays’ yaagiis. (Yoh. 10:17, 18) Ee, I Yihoowa sunttawu hayqqanawukka eeno giis.b Wottiyobi baynna koyro asati, Addaamenne Hewana Yihoowawu zokkuwa zaaridi Seexaanawu exatidosona. Shin, Yesuusi ha saꞌaa yaanawunne Yihoowa siiqiyogaa bessanawu eeno giis. Yesuusi oottidonne haasayido ubbaban Yihoowawu azazettiyogan hegaadan oottiis. (Ibr. 4:15; 5:7-10) I mittaa bolli waayettidi hayqqana gakkanawukka ba deꞌo laytta ubban Yihoowassi ammanettidi deꞌiis. (Ibr. 12:2) Yaatiyogan I Yihoowanne A sunttaa siiqiyogaa bessiis.

13. Seexaanay worddanchcha gidiyogaa Yesuusi loytti qonccissana danddayiyoy aybissee? (Misiliyakka xeella.)

¹³ Yesuusi oottido ubbabay worddanchchay Yihoowa gidennan, Seexaanaa gidiyogaa bessiis! (Yoh. 8:44) Deꞌuwan deꞌida ooppenne aaruwan Yesuusi Yihoowa loytti erees. Yihoowa xeelliyagan Seexaanay mootidobaappe tuma gididabi deꞌiyakko, Yesuusi hegaabaa erana. Shin Yesuusi Yihoowa sunttaayyo exatanawu murttidoogee Seexaanaa mootoy muleera worddo gidiyogaa I eridoogaa bessees. Yihooway A aggidaba milatiyo wodekka Yesuusi siiqiya ba Aawawu zokkuwa zaariyogaappe hayqqanawu eeno giis.—Mat. 27:46.c

‘NEENI TAAYYO IMMIDO OOSUWA WURSSAAS’

14. Yesuusi ammanettido gishshawu Yihooway A waati woytidee?

¹⁴ Yesuusi hayqqanaappe kase qammi woossiiddi hagaadan giis: ‘Neeni taayyo immido oosuwa ootta wurssaas.’ I ammanettido gishshawu Yihooway A woytanaagaa aynne siribeenna. (Yoh. 17:4, 5) Qassi Yesuusi ba Aawan ammanettidoogee bessiyaba. Yihooway I duufuwan attanaadan coꞌꞌu giidi xeellibeenna. (Oos. 2:23, 24) I Yesuusa hayquwappe dentti simmidi keehi leqqiya maataa saluwan awu immiis. (Pili. 2:8, 9) Guyyeppe, Yesuusi Xoossaa Kawotettaa Kawo gididi haariyogaa doommiis. Ha Kawotettay ay oottanee? Yesuusi bana kaalliyageeta tamaarissido woosan ha oyshaa zaaruwa yootiis: “Ne Kawotettay yo. Ne [Yihoowa] shenee saluwan haniyogaadan saꞌankka hano.”—Mat. 6:10.

15. Yesuusi harabaa ay oottanee?

¹⁵ Matan Yesuusi Armmageedoona olan Xoossaa morkketuura olettidi iitata xayssana. (Ajj. 16:14, 16; 19:11-16) Hegaappe simmin sohuwara, I Seexaanaa ‘ciimma ollan’ olana; yan Seexaanay qashettiyo gishshawu, aynne oottana danddayenna. (Ajj. 20:1-3) Yesuusi ba Shaꞌu Layttaa Haaruwa wode asay zaarettidi sarotettan deꞌanaadaaninne wottiyobi baynnaagaa gidanaadan oottana. I hayqqidaageeta denttana. Qassi I kumetta saꞌaa gannate oottana. He wode, Yihoowa halchchoy polettana!—Ajj. 21:1-4.

16. Shaꞌu Layttaa Haaruwa wurssettan deꞌoy ay mala gidanee?

¹⁶ Shaꞌu Layttaa Haaruwa wurssettan deꞌoy ay mala gidanee? Nagaray xayana. Asay ba nagarawu wozuwa baggaara maarotaa oychchiyogee attana; qassi asawu gaannay woy kahine koshshenna. Hegaa bollikka, ‘wurssetta morkkee, hayqoy xayana.’ Hayqqidaageeti denddana. Saꞌan deꞌiya ubbay wottiyobi baynnaageeta gidana.—1 Qor. 15:25, 26.

17-18. (a) Shaꞌu Layttaa Haaruwa wurssettan aybi hananee? (b) Yesuusi ba haaruwa wurssettan waatanee? (1 Qoronttoosa 15:24, 28) (Misiliyakka xeella.)

¹⁷ Shaꞌu Layttaa Haaruwa wurssettan hanana harabay aybee? He wode keehi dummabay hanana. Yihoowa sunttaa geeshshatettaara gayttidaagan denddida mootoy kuuyettana. Waanidi? Seexaanay Edene ataakiltte sohuwan, Yihooway worddanchcha, qassi asaa siiquwan haarenna giidi mootiis. He wodeppe doommidi, Yihoowa bonchchiyanne awu azazettiya asati darotoo A sunttay geeyanaadan oottiiddi deꞌoosona. Hegaa gishshawu, Shaꞌu Layttaa Haaruwa wurssettan Yihoowa sunttay tooshiyappe muleera geeyana. I saluwan deꞌiya siiqiya Aawaa gidiyogaa boxooxissana.

¹⁸ Shaꞌu Layttaa Haaroy wuri simmin, paxa deꞌiya ubbay Seexaanay Yihoowa xeelliyagan yootido ubbabay worddo gidiyogaa erana. Yesuusi ba haaruwa wurssettay gakkiyo wode waatanee? Seexaanaa leemisuwa kaallidi Yihoowa bolli makkalanee? Mulekka! (1 Qoronttoosa 15:24, 28 nabbaba.) Yesuusi ba Aawawu Kawotettaa zaaridi sheedhdhana. I Yihoowa haaruwawu haarettana. Ee, Seexaanaappe dumma hanotan, Yesuusi Yihoowa siiqiyo gishshawu ba maata ubbaa ba dosan immees.

19. Yesuusi Yihoowa sunttaa ay keena xoqqu ootti xeellii?

¹⁹ Yihooway ba sunttaa Yesuusawu ba dosan immidoogee qoncce! Yesuusi ba Aaway ay mala Xoossakkonne wottiyobi baynna ogiyan bessiis. Yaatin, Yesuusi Yihoowa sunttaa ay keena xoqqu ootti xeellidee? I aybippekka aaruwan hegaa xoqqu ootti xeelliis. I he sunttaa gishshawu ba dosan hayqqiis; qassi Shaꞌu Layttaa Haaruwa wurssettan ba maata ubbaa ba dosan Yihoowawu sheedhdhana. Nuuni Yesuusa leemisuwa waati kaallana danddayiyoo? Ha oyshaa zaaruwa kaalliya huuphe yohuwan beꞌana.