Xoossaa Siiqoy Merinaagaa

1-2. Metoy gakkiyogee issi Kiristtaanee waananaadan oottana danddayii?

ISSI wolwoloy abban biishin wolqqaama beetay denddiis gaada qoppa. Wolqqaama beetay he wolwoluwa keehi qaattees. Issi uri markkabiya techchaa malaa abba giddo olana xayikko, beetay he wolwoluwa ba koyidosaa efaana danddayees. He markkabiya techchay wolwoloy minni eqqanaadaaninne beetay efeennaadan maaddees.

² Wolqqaama metoy nena he wolwoluwadan oottana danddayees. Qassi, neeyyo siyettiyabay eesuwan eesuwan laamettana danddayees. Yihoowi nena siiqiyogaanne maaddiyogaa hachchi ammanettana danddayaasa; wonttetta gallassi qassi nena gakkiiddi deꞌiyabaa I akeekiyakkonne sirana danddayaasa. (Maz. 10:1; 13:1) Issi laggee neeyyo minttettiyabaa yootin guutta wodiyawu ne minettana danddayaasa. (Lee. 17:17; 25:11) Shin zaarettadakka siriyogaa doommaasa. Ubba qassi Yihoowi nenan hidootaa qanxxidabadan qoppana danddayaasa. Hegaa mala hanotan deꞌaydda leemiso hanotan markkabiya techchaa duge waata olana danddayay? Qassi Yihoowi nena siiqiyogaanne maaddanaagaa neeni ubbatoo waata ammanettana danddayay?

3. (a) Mazamure 31:7ninne 136:1n odettidaagaadan ‘aggenna siiquwa’ giyogee woygiyogee? (b) Hegawu Yihoowi ooppenne aadhdhiya leemiso nuuni gaana danddayiyoy aybissee? (Misiliyakka xeella.)

³ Metoy gakkiyo wode neeni minna eqqanaadan maaddana danddayiya issibay aggenna Yihoowa siiquwa hassayiyogaa. (Mazamure 31:7; 136:1 nabbaba.) ‘Aggenna siiquwa’ giyogee naaꞌꞌu ura giddon deꞌiya mino siiquwanne duuxxenna dabbotaa qonccissiyaba. Aggenna siiquwa bessiyogan Yihoowi ooppenne aadhdhiya leemiso. I ‘aggenna siiqoy daridoogaa’ gidiyogaa Geeshsha Maxaafay yootees. (Kes. 34:6, 7) Geeshsha Maxaafay Yihoowabaa hagaadankka gees: “Nena xeegiya ubbaayyo aggenna ne siiqoi dariyoogaa.” (Maz. 86:5) Hegee woygiyogaakko qoppa: Yihoowi ammanettida ba ashkkarata mulekka yeggenna! Yihoowi ammanettidaagaa gidiyogaa ne hassayiyogee wolqqaama metoy nena gakkiyo wode neeyyo markkabiya techchaa mala gidana danddayees.—Maz. 23:4.

YIHOOWA SIIQOY GEESHSHA MAXAAFAA KOYRO TIMIRTTE GIDIYOGAA HASSAYA

4. Geeshsha Maxaafaa koyro timirttetuppe amaridaageeta yoota, qassi hegeeta nuuni mintti ammaniyoy aybissee?

⁴ Metoy nena gakkiyo wode Geeshsha Maxaafaa koyro timirttetuppe issuwa gidida, Yihoowi nena siiqiyo siiquwabaa qoppiyogeekka neeni minna eqqanaadan maaddana danddayees. “Geeshsha Maxaafaa koyro timirtteta” giyagaa siyiyo wode neeyyo aybi hassayettii? Geella neeni Xoossaa Qaalaappe tamaarido koyro timirtteta hassayennan aggakka. Leemisuwawu, Xoossaa sunttay Yihoowa gidiyogaa, Yesuusi Xoossawu dumma Naꞌa gidiyogaa, hayqqidaageeti aybanne erennaagaa, qassi saꞌay gannate gidin asay merinawu deꞌanaagaa tamaaradasa. (Maz. 83:18; Era. 9:5; Yoh. 3:16; Ajj. 21:3, 4) He timirtteta tamaara simmada neeni mintta ammanadasa. Ayssi giikko, he timirttetussi ammanttiya naqaashay deꞌiyogaa neeni akeekadasa. Neeni Yihoowi nena siiqiyogaa Geeshsha Maxaafaa koyro timirttetudan xeelliyogee, I neeyyo qoppiyogaa woy nena gakkiya metuwa akeekiyogaa ne ammanettanaadan waati maaddiyakko ane beꞌoos.

5. Worddo timirtteta waati ixxana danddayiyakko qonccissa.

⁵ Geeshsha Maxaafaa xannaꞌiyogaa neeni koyro doommido wode, worddo timirtteta ixxanaadan nena maaddidabay aybee? Ne haymaanootiyan neeni tamaaridobaa Geeshsha Maxaafay tamaarissiyobaara geeddarissidoogee nena maaddennan waayi aggana. Ane issi leemisuwa beꞌoos. Neeni Yesuusi Ubbaa Danddayiya Xoossaa gaada kase ammanaasa giidi ane qoppoos. Shin Geeshsha Maxaafaa xannaꞌaydda, ‘Ha timirttee tumuppe likkee?’ gaada qoppadasa. Geeshsha Maxaafaa naqaashaa pilgga simmada, Yesuusi Ubbaa Danddayiya Xoossaa gidennaagaa eradasa. Yaatada neeni kase ammaniyo worddo timirtteta aggada Yesuusi, “merettida ubbabaappe bayra,” qassi “Xoossawu dumma Naꞌaa” giidi Geeshsha Maxaafay tamaarissiyogee tuma gidiyogaa ammanadasa. (Qol. 1:15; Yoh. 3:18) Shin worddo timirtteti laalanawu metiya “mino qato” mala gidiyogee qoncce. (2 Qor. 10:4, 5) Gidoppe attin, neeni hegaadan ootta simmada kase aggido timirttetukko guyye simmakka.—Plp. 3:13.

6. “Aggenna a siiqoi merinaagaa” giya qofay Mazamure 136n darotoo odettidoy aybissee?

⁶ Yihoowi nena siiqiyogaa xeelliyagan Geeshsha Maxaafay tamaarissiyobaara gayttidaagankka hegaadan oottana danddayaasa. Nena metoy gakkiyo wode Yihoowi nena siiqiyogaa neeni siriyogaa doommikko, nena hagaadan oychcha, ‘Ta qofay likkee?’ Yaatada Yihoowi nena siiqiyogaa ne siriyogaa ha huuphe yohuwawu waanna xiqise gidida Mazamure 136:1n deꞌiya qofaara geeddarssa. Yihoowi ba siiquwa ‘aggennaagaa’ giidi qonccissidoy aybissee? “Aggenna a siiqoi merinaagaa” giya qofay ha mazamuriyan 26to zaari zaaridi odettidoy aybissee? Hagaappe nuuni akeekiyogaadan, Yihoowi ba asaa siiqiyo aggenna siiqoy Geeshsha Maxaafaa koyro timirtte; hegee Xoossaa Qaalaappe neeni tamaarada sohuwara ammanido hara timirttetuura issi mala. Yihoowi nena pattennabadan xeellees woy nena siiqenna giyo qofay worddo. Hara worddo timirtteta minttada ixxiyogaadan hagaakka minttada ixxa!

7. Yihoowi nena siiqiyogaa neeni ammanettanaadan oottiya amarida xiqiseta yoota.

⁷ Yihoowi nuna siiqiyogaa bessiya daro naqaashati Geeshsha Maxaafan deꞌoosona. Leemisuwawu, Yesuusi bana kaalliyageetuyyo hagaadan giis: “Intte he qeeri kafotu ubbaappe aadhdheeta.” (Mat. 10:31) Qassi Yihoowi ba asawu hagaadan giis: “Taani nena minttana; qassi taani nena maaddana. Taani nena ta xooniya ushachcha kushiyan kaafada oiqqana.” (Isi. 41:10) Ha qofati ay keena qonccekko akeeka. Yesuusi, ‘geella intte aadhdhana’ gibeenna; qassi Yihoowi ‘geella taani inttena maaddana’ gibeenna. Shin eti, “Intte aadhdheeta” qassi “taani inttena maaddana” giidosona. Metoy gakkiyo wode Yihoowi nena siiqiyogaa neeni siriyaba gidikko, he xiqiseti neeyyo loꞌꞌobay siyettanaadan oottiyogaa xalaala gidennan, Yihoowi nena siiqiyogaa neeni mintta ammanettanaadankka maaddoosona. He xiqiseti ammanttiyabaa yootoosona. Neeni siriyogaa xeelliyagan Xoossaa woossiyabanne he xiqiseta wotta dentta qoppiyaba gidikko, 1 Yohaannisa 4:16n odettidaagaadan, ‘Xoossay tana siiqiyo siiquwa eraasinne ammanaas’ gaana danddayaasa.a

8. Yihoowi nena siiqiyakkonne neeni issi issitoo sirikko, waatana danddayay?

⁸ Shin, Yihoowi nena siiqiyogaa neeni haꞌꞌikka siriyaba gidikko waatana danddayay? Neessi siyettiyabaanne Yihoowa xeelliyagan neeni eriyobaa geeddarssa. Neessi siyettiyabay laamettiyaba; shin Yihoowi nuna siiqiyogee Geeshsha Maxaafay tamaarissiyo tuma. Yihoowi nuna siiqiyogaa nuuni ammanana xayikko, Geeshsha Maxaafay “Xoossay siiqo” giidi yootiyo qofay worddo giyogaa mala.—1 Yoh. 4:8.

YIHOOWI ‘NENA SIIQIYOGAA’ LOYTTA QOPPA

9-10. Yesuusi Yohaannisa 16:26, 27n “Aaway inttena siiqees” giido wode woyganawu koyidee? (Misiliyakka xeella.)

⁹ Yesuusi bana kaalliyageetuyyo “Aaway inttena siiqees” giidi yootido qofaa pilggiyogan Yihoowa siiquwabaa darobaa tamaarana danddayoos. (Yohaannisa 16:26, 27 nabbaba.) Yesuusi bana kaalliyageeta ufayssana xalaalawu ha qofaa yootibeenna. Qassi yuushuwan deꞌiya qofaappe akeekiyogaadan, Yesuusi yootiiddi deꞌiyo waannabay he wode etawu siyettidabaa gidenna. I harabaa yootiiddi deꞌees; hegeekka woosaabaa.

¹⁰ Yesuusi bana kaalliyageeti A baggaara woossana koshshiyogaa yootiisippe attin, A woossanaadan yootibeenna. (Yoh. 16:23, 24) Hegaa eriyogee etawu keehi koshshiyaba. Yesuusi hayquwappe denddi simmin A kaalliyageeti A woossanawu paacettana danddayoosona. Qassi, Yesuusi etawu lagge. Yesuusi eta siiqiyo gishshawu, eta woosaa siyidi eti oychchidobaa Aawawu yootana giidi qoppana danddayoosona. Shin, eti hegaadan qoppana koshshennaagaa Yesuusi yootiis. Ayssi giikko, I etawu hagaadan giis: “Aaway inttena siiqees.” Yesuusi yootido ha qofay Yihoowi ba huuphen eta woosaa siyanawu koyiyogaa bessees. Hagee woosaa xeelliyagan Geeshsha Maxaafay tamaarissiyo timirttetuppe issuwa. Hegee nena waati maaddiyakko qoppa. Geeshsha Maxaafaa xannaꞌiyogan Yesuusa eradasanne siiqadasa; yaatada A kaalliyagaa gidadasa. (Yoh. 14:21) Koyro xeetu layttan deꞌida Yesuusa kaalliyageetuugaadan, neenikka Yesuusi yootidobaa ammanananne laꞌatettan Yihoowa woossana danddayaasa.—1 Yoh. 5:14.

NEENI SIRANAADAN OOTTIYABATA AKEEKA

11. Yihoowi nuna siiqiyogaa nuuni siriyaba gidikko, Seexaanay ufayttiyoy aybissee?

¹¹ Yihoowi nuna siiqiyogaa nuuni siranaadan oottana danddayiyabay aybee? Nuuni siranaadan oottiyay Seexaanaa giidi zaarana danddayoos; qassi hegee amarida ogiyan tuma. Dabloosi nuna “mittanawu koyiiddi” deꞌees; qassi Yihoowi nuna siiqiyogaa nu sirikko, Seexaanay ufayttana. (1 Phe. 5:8) Yihoowi nuna siiqiyogee wozuwa giigissanaadan A denttettiis; shin hegaappe goꞌettanawu bessenna asadan nuuni qoppanaadan Seexaanay koyees. (Ibr. 2:9) Yihoowi nuna siiqiyogaa nuuni siriyogaa doommikko, ufayttanay oonee? Seexaanaa. Qassi nuuni hidootaa qanxxidi Yihoowawu haggaaziyogaa aggikko ufayttanay oonee? Haꞌꞌikka Seexaanaa. Seexaanay Yihoowi nuna siiqennabadan nuuni qoppanaadan koyees; shin hegee worddo. Yihoowi siiqennay nuna gidennan, Seexaanaa. Shin, Seexaanay nuna ‘balettanawu oottiyo’ issibay Yihoowi nuna siiqennabadaaninne ixxiyabadan qoppanaadan oottiyogaa. (Efi. 6:11) Nu morkkee oottanawu maliyobaa nuuni akeekiyo wode ‘Dabloosa eqettanawu’ kaseegaappe aaruwan murttana danddayoos.—Yaq. 4:7.

12-13. Nu laattido nagaray Yihoowi nuna siiqiyogaa nuuni siranaadan waati oottana danddayii?

¹² Yihoowi nuna siiqiyogaa nuuni siranaadan oottana danddayiya harabaykka deꞌees. Hegee ayba gidana danddayii? Nuuni laattido nagaraa. (Maz. 51:5; Rom. 5:12) Nagaray asay Xoossaappe haakkanaadan oottiis. Qassi, nagaray nu qofaa, nu wozanaanne nu payyatettaa qohiis.

¹³ Nagaray nuuni iitabaa qoppanaadan, nuna mooranchchadan xeellanaadan, unꞌꞌettanaadan, woppaa xayanaadaaninne yeellatanaadan oottees. Nuuni nagaraa oottiyo wode, nuuyyo hegaadan siyettana danddayees. Shin nuuni nagaranchcha gidiyogaa eriyo gishshawukka nuussi hegaadan siyettana danddayees. Gidoppe attin, Xoossay asaa koyro medhdhidoy hegaadan halchchidi gidenna. (Rom. 8:20, 21) Goomay moorettido kaamee suure baana danddayennaagaadan, nuunikka nagaranchcha gidiyo gishshawu koyro merettido halchchuwadan suure oottana danddayokko. Hegaa gishshawu, Yihoowi nuna siiqiyakkonne issi issitoo sirikko, malaalissiyaba gidenna. Nuuni sirikko, Yihoowi ‘bana dosiyageetussinne ba azazuwa naagiyageetussi aggenna siiquwa bessiya gitanne bonchchettida Xoossa’ gidiyogaa hassayana koshshees.—Nah. 1:5.

14. Wozuwabaa wotti dentti qoppiyogee Yihoowi nuna siiqiyogaa nuuni ammanettanaadan waati maaddana danddayii? (Roome 5:8) (“‘Nagaray Balettiyo Wolqqaa’ Eqetta” giya saaxiniyakka xeella.)

¹⁴ Yihoowa siiqoy nuussi bessennabadan issi issitoo qoppana danddayiyogee tuma. Qassi tumaa yootanawu A siiqoy nuussi bessenna; shin I nuna keehi siiqees. Nu baaxiyan Yihoowi nuna siiqanaadan oottana danddayokko. Shin Yihoowi nuna siiqiyo gishshawu nu nagaraa atto gaanawu wozuwa giigissiis. (1 Yoh. 4:10) Yesuusi saluwappe yiidoy nagarancha asaa ashshanaassappe attin, polo asaassa gidennaagaa hassaya. (Roome 5:8 nabbaba.) Nuuppe ooninne issibaa wottiyobi baynna ogiyan oottana danddayenna; qassi Yihoowikka nuuni yaatanaadan koyenna. Nu laattido nagaray Yihoowi nuna siiqiyogaa nuuni siranaadan oottana danddayiyogaa akeekikko, hegaa agganawu kaseegaappe aaruwan murttana danddayoos.—Rom. 7:24, 25.

AMMANETTADA DEꞌANAWU DOORA

15-16. Nuuni Yihoowawu ammanettidi deꞌikko, ay ammanettana danddayiyoo? (2 Sameela 22:26)

¹⁵ Yihoowi nuuni ‘aara ohettiyogan’ suurebaa dooranaadan koyees. (Zaa. 30:19, 20) Nuuni yaatikko, I nuussi ubbatoo ammanettanaagee aynne sirissenna. (2 Sameela 22:26 nabbaba.) Nuuni nuussi danddayettida keenan, Yihoowawu ammanettidi deꞌikko, nu deꞌuwan gakkiya ay metuwanne genccanaadan I nuna maaddanaagaa ammanettana danddayoos.

¹⁶ Nuna metoy gakkiyo wode, nuuni minni eqqanaadan oottiya daro gaasoti deꞌiyogaa beꞌida. Yihoowi nuna siiqiyogaanne maaddiyogaa eroos. Geeshsha Maxaafay tamaarissiyobaykka hegaa. Nuuni A siiquwa sirikko, nuuyyo siyettiyabaa gidennan, Yihoowi nuna siiqiyogaa xeelliyagan nu eriyobaa wotti dentti qoppana danddayoos. Simi yaakko, Geeshsha Maxaafay yootiyogaadan aggenna Yihoowa siiqoy merinawu deꞌiyogaa ubbatoo ammanettiyageeta gidoos.