Dabloosi Ay Milatii?

Geeshsha Maxaafay yootiyobaa

Dabloosi ayfiyan beettenna ayyaana mereta; A bollay nuugaa mala gidenna.—Efisoona 6:11, 12.

Shukka malabaa oyqqida Dabloosa misiliya. Kaceenne goynay deꞌiyo deeshsha milatees.

Daroti Dabloosa shukka malabaa oyqqida, kaceenne goynay deꞌiyo deeshsha milatissidi misiliyan medhdhoosona. Dabloosa misiliya hegaadan koyro medhdhidaageeti 1,000 layttaappe kase deꞌida asata giidi amarida asay qoppees. Beni odettiya haysiya siyidi, he asati hegaadan medhdhennan aggokkona.

Geeshsha Maxaafay Dabloosa waati qonccissii?

Geeshsha Maxaafay Dabloosa dumma dumma ogiyan qonccissees. Hegee nuuni A meraa gidennan, A oonatettaa akeekanawu maaddees. Amarida leemisota beꞌa:

Pooꞌuwa kiitanchcha. Asay Xoossaa timirttiya gidennan, ba timirttiya kaallanaadan I issibaa loꞌꞌobaa milatissees.—2 Qoronttoosa 11:14.
Gudiya gaammo. I Xoossawu goynniyageeta keehippe qohees.—1 Pheexiroosa 5:8.
Gita miimmintte. I yashshiyagaa, wolqqaamanne qohiyagaa.—Ajjuutaa 12:9.

Dabloosabaa yootiya xiqiseta

2 Qoronttoosa 11:14: “Seexaanay pooꞌuwa kiitanchcha milatanawu maliyogaa aggenna.”

Birshshettaa: Seexaanay asay Xoossaa timirttiya gidennan, baagaa kaallanaadan cimmanawu loꞌꞌo milatees.
Efisoona 6:11: “Dabloosi balettanawu oottiyobaa eqettidi minni eqqanawu Xoossay immiyo kumetta ola miishshaa maayite.”

Birshshettaa: Dabloosi asay Xoossawu azazettennaadan oottanawu hiillaa goꞌettees.
Yaaqooba 4:7: “Xoossaayyo haarettite, shin Dabloosa eqettite; I intteppe baqatana.”

Birshshettaa: Issi asi Dabloosawu gidennan Xoossawu azazettikko, Seexaanaa xoonana danddayees.
1 Pheexiroosa 5:8: “Intte morkkee Dabloosi asa mittanawu koyiiddi, gudiya gaammodan yuuyees.”

Birshshettaa: Dabloosi Xoossawu azazettiyageeta ixxeesinne eti Xoossaara dabbotido dabbotaa mooranawu koyees.