Xoossay Hayttay Siyennaageetuyyo Qoppees

Ha wodiyan kumetta saꞌan 70 miiloone gidiya hayttay siyennaageeti deꞌoosona, qassi etappe daroti 200​ppe dariya malaata qaalatuppe issuwa goꞌettidi asaara gayttoosona. Azzanttiyabay, hayttay siyennaageeta darotoo asay qohees; hegaa bessiyabati kaallidi odettidosona:

• “Kumetta saꞌan, hayttay siyennaageetunne sissaa dooggiyogeetu maatay darotoo naaqettiis.”—Hayttay Siyennaageetu Deretettaa Maabaraa (Amarkkaa).

• “Dicciiddi deꞌiya biittatun hayttay siyennaageeti bessiyagaa keena timirttiya, oosuwanne naqaashaa demmana danddayenna gishshawu, eti alamiyan keehi hiyyeesa geetettiya asatuppe issota.”—Salo Gufantto Hayttay Siyennaageetu Federeeshiniya.

Hayttay siyennaageeta xeelliyagan Xoossawu aybi siyettii? Hayttay siyennaageetubaa Geeshsha Maxaafay woygii? Qassi ha wodiyan Yihoowa Markkati eta waati maaddiiddi deꞌiyonaa?

Xoossay Hayttay Siyennaageeta Waati Xeellii?

Geeshsha Maxaafay Xoossaa Yihoowaya hayttay siyennaageetuyyo qoppiyogaa qonccissees. I asay eta loꞌꞌo hanotan oyqqanaadaaninne eti I tamaarissiyo timirttiyappe goꞌettanaadan koyees.

Xiqisiya: “Tulliyaa qanggoppa.”—Wogaabaa 19:14.

Xiqisiya: ‘Xoossay asaa ubbaa issi ayfiyan xeellees.’—Oosuwa 10:34.

Xiqisiya: ‘Yesuusi baanawu denddiis; yaatidi, Kawotettaa mishiraachchuwa yootiis.’—Maatiyosa 9:35.

Xiqisiya: Yesuusi “haray atto tulletikka siyanaadaaninne duudetikka haasayanaadan” oottiis.—Marqqoosa 7:37.

Xiqisiya: ‘Tulletu hayttay siyana.’—Isiyaasa 35:5.

Hegaa birshshettaa: Yihooway hayttay siyennaageeti siyanaagaa yootiis.—Isiyaasa 29:18.

Yihoowa Markkati Hayttay Siyennaageeta Ha Wodiyan Waati Maaddiyonaa?

Yihoowa Markkati Xoossay qaalaa gelido hidootaa kumetta saꞌan deꞌiya hayttay siyennaageetuyyo yootoosona. Yaatanawu nuuni ay oottiiddi deꞌiyoo? Nuuni Geeshsha Maxaafaanne Geeshsha Maxaafaabaa tamaarissiya biidota 100​ppe dariya malaata qaalatun giigissoos. Qassi, Geeshsha Maxaafaa xannaꞌanaadan shoobboosinne malaata qaalan Kiristtaane shiiqoti deꞌanaadan oottoos. Xoossaa maaduwa koyiya ooninne hegeeta miishsha qanxxennan demmanaadan hanotaa giigissoos. Aybissi? Yesuusi, “Intte coo ekkideta, coo immite” giidi azazido gishshataassa.—Maatiyosa 10:8.

Intte kaallidi odettida sohotuppe hegeeta intternneetiyan deꞌiiddi beꞌana, woy elektronike miishshan dawunlodana danddayeeta:

JW.ORG. Issi malaata qaalaa giddon deꞌiyabata demmanawu, web saytiyan ubba sinttatun bolla baggan deꞌiya, qaalaa laammiyo malaataa bochcha.

JW Library Sign Language appiya. Miishsha qanxxennan demmiyo ha appiya ne elektronike miishshan wotta; yaatikko, malaata qaalan giigida biidota dawunlodana woy yan deꞌishin beꞌana danddayaasa.

Nuuni Geeshsha Maxaafaa Tamaarissanawu Giigissiyobati Aybee?

Malaata qaalan giigida Geeshsha Maxaafaa. Amarkkaa Malaata Qaalan giigida Ooratta Alamiya Geeshsha Maxaafaa Birshshettay alamiyan koyro wodiyawu malaata qaalan giigida kumetta Geeshsha Maxaafaa birshshetta. Ha wodiyan, Ooratta Alamiya Birshshettay kumettay woy appe amaridaagee daro malaata qaalatun deꞌees; hegaa bolli, layttan layttan daro malaata qaalatun giigiyagee gujettees. (Qaalata ubbaa beꞌanawu woy intternneetiyan Geeshsha Maxaafaa nabbabanawu, “Malaata Qaalan Giigida Ooratta Alamiya Geeshsha Maxaafaa Birshshettaa” giya saaxiniya xeella.)

• Malaata qaalan Geeshsha Maxaafaa giigissanawu nuuni oottiyobaa eranawu, Kumetta Ooratta Alamiya Birshshettay Amarkkaa Malaata Qaalan Giigiis giya biiduwa beꞌa.

• Geeshsha Maxaafaa kaseegaappe aaruwan loytta nabbabanawu, JW Library Sign Language giyo appiya dawunloda. Ha appee, malaata qaalan giigida Geeshsha Maxaafan deꞌiya xiqiseta doorada beꞌanaadan maaddees.

• Dimitiroynne Viita hayttay siyenna yelidaageeta, qassi etayyo hayttay siyiyo naati deꞌoosona. Eta so asay malaata qaalan giigida Geeshsha Maxaafaa ubba galla beꞌiyogan waani goꞌettidaakko akeeka.

Geeshsha Maxaafaabaa tamaarissiya biidota. Asay Geeshsha Maxaafaa zoriya akeekanaadaaninne oosuwan peeshshanaadan maaddanawu, Yihoowa Markkati malaata qaalan biidota giigissidosona. Hegeeti maaddiyoy . . .

• Aqo laggetanne so asaa

• Panttatettan deꞌiya naatanne yelagata

• Naata

Issi uri maaddin Geeshsha Maxaafaa tamaariyogaa. Nena issi uri maaddin, Geeshsha Maxaafay yootiyobaa malaata qaalan neeni koyidoogaa keenaa tamaara. Hegaadan Geeshsha Maxaafaa miishsha qanxxennan xannaꞌanawu oychcha.

Jesen Senahoneni Pilippinssen deꞌees. Geeshsha Maxaafaa xannaꞌidoogee I Xoossaara mino dabbotettaa medhdhanaadan waati maaddidaakko beꞌa.

Maariyo Anttuneezi Hondduraasen kase woosa keettaa pasttere. “Taani Zaaruwa Demmabeenna Daro Oyshati Deꞌoosona” giya huuphe yohuwan I ba deꞌuwan hanidabaa qonccissidoogaadan, Geeshsha Maxaafaa oyshatussi I zaaruwa waati demmidaakko akeeka.

Shiiqotanne giigissota. Hayttay siyennaageeti tamaaranawunne goynnanawu saaminttan saaminttan malaata qaalan shiiqiyo galchchatinne citati nuuyyo deꞌoosona. Qassi, layttan layttan malaata qaalan Geeshsha Maxaafaa tamaarissiyo gita giigissoti deꞌanaadan oottoos. Nu shiiqotuuninne giigissotun, siyanawukka xeellanawukka danddayennaageeti tamaaranaadan, eta kushiya oyqqidi birshshiyageeti maaddanaadan oottoos. Qassi, miishsha qanxxennan demmana danddayiyo bireeliyan giigiya xuufetakka giigissoos.

• Ne heeran shiiqiyo sohuwa koya.

• Layttan layttan shiiqiyo woradaanne killiliya shiiqotubaa era.

• Layttan layttan bonchchettiya nuuni xoqqu ootti xeelliyo, Yesuusa Hayquwa Hassayuwa bonchchanawu shiiqa.

Jose Luyis Ayali Mekisiikon deꞌees. I yelettiyo wodeppe doommidi awu hayttay siyenna, qassi guyyeppe ayfeekka xeellennan ixxiis. I mino Geeshsha Maxaafaa asttamaare gidanaadan aybi maaddidaakko beꞌa.