Yihoowa Markki Haymaanootiya Aggana Danddayii?

Ee danddayees. Issi asi naaꞌꞌu ogetun nu dirijjitiyappe kiyana danddayees:

• Oychchiyogan. Issi asi Yihoowa Markka gidiyogaa agganawu maacidoogaa xaafidi woy yootidi erissana danddayees.

• Oottiyoban. Issi uri Yihoowa Markka gidennaagaa bessiyabaa oottana danddayees. (1 Pheexiroosa 5:9) Leemisuwawu, I hara haymaanootiyan gelida ura gidana danddayees.—1 Yohaannisa 2:19.

Issi asi inttenaara mishiraachchuwa yootiyogaa woy shiiqiyogaa aggikko shin? Izaawa haymaanootiya aggida asadan xeelleetii?

Akkay, xeellokko. Haymaanootiya aggiyogee woy dirijjitiyappe kiyiyogee ammanuwan shuggiyogaappe dummatees. Guutta wodiyawu shuggidaageeti woy goynuwa aggidaageeti azallidosonappe attin, ammanuwa aggibookkona. Nuuni hegaa mala asatuppe duuxxiyogaappe eta minttettoosinne maaddoos. (1 Tasalonqqe 5:14; Yihudaa 22) Izaawu maaduwa koyikko, galchchaa cimati sintta xeeran ayyaanaaban maaddoosona.—Galaatiya 6:1; 1 Pheexiroosa 5:1-3.

Shin issi ura Yihoowa Markka gidiyogaa aggennaadan giddiyo maati cimatussi baawa. Ooninne koyiyo haymaanootiya bawu doorees. (Yaasa 24:15) Xoossawu goynniyageeti banttawu koyidi wozanappe goynnana bessiyogaa ammanoos.—Mazamure 110:3; Maatiyosa 22:37.