Yihoowa Markkati Banttana Mootiyo Ubbabawu Zaarennay Aybissee?
Geeshsha Maxaafay asi mootiyonne qilliicciyo ubbabawu zaarenna mala zoriyogaadan Yihoowa Markkati oottoosona. Leemisuwawu, Geeshsha Maxaafan issi leemisoy, “Qilliicciya uraa seeriya asi bau cashshaa ekkees” yaagees. (Leemisota 9:7, 8; 26:4) Worddo mootuwan coo mela walaqettiyogaappe nuuni Xoossaa ufayssanawu koyoos.—Mazamure 119:69.
“Co77u gaanau wodee de7ees; qassi haasayanaukka wodee de7ees.” (Shiishshiyagaa 3:7) Nuuni tumaa eranawu wozanappe koyiya asatuyyo yootiyaba gidikkonne, coo mela palamettokko. Yaatiyogan, Yesuusinne beni Kiristtaaneti tamaarissidonne oottido ogiya kaalloos.
Yesuusi bana asay Philaaxoosa sinttan wordduwan mootido wode aynne zaaribeenna. (Maatiyosa 27:11-14; 1 Pheexiroosa 2:21-23) Hegaadankka, asay A yoratteesinne daro woyniya uyees giidi mootidobawu aynne zaaribeenna. Shin, “Issi asa hayyoy suure gidiyogee I ayfiyo ayfiyan erettees” giya maaraadan, I oottidobaappe asay maara akeekanaadan koyiis. (Maatiyosa 11:19, tohossa qofaa) Shin A sunttaa bashshiyageetuyyo zaarana koshshiyo wode yayyennan zaariis.—Maatiyosa 15:1-3; Marqqoosa 3:22-30.
Yesuusi bana kaalliyageeti worddo mootuwan dagammennaadan tamaarissiis. I hagaadan giis: “Ta gishshawu inttena asay boriyo wodenne naaqqiyo wode, qassi intte bolli iitabaa ubbaa wordduwan haasayiyo wode, intte ufaytteeta.” (Maatiyosa 5:11, 12) Shin, hegaadan mootiyo wode markkattanawu hanotay injjetikko, Yesuusi bana kaalliyageetuyyo, “Taani intte hayyottanaadaaninne woyganaakko eranaadan inttena maaddana; yaatin intte morkketi intteyyo aybanne zaarana danddayokkona” yaagidoogaadan oottanaagaakka yootiis.—Luqaasa 21:12-15.
Kiitettida Phawuloosi Kiristtaaneti gaaddetiya asatuura I ‘aynne maaddennabanne pattennaba’ giido coo mela palamaa palamettennaadan zoriis.—Tiita 3:9; Roome 16:17, 18.
Kiitettida Pheexiroosi Kiristtaaneti bantta ammanuwawu gaaso oychchiyageetuyyo danddayettiyo wode zaaranaadan minttettiis. (1 Pheexiroosa 3:15) Shin yaatiyo loꞌꞌo ogee oottiyobaappe attin haasayiyobaa gidennaagaa I akeekiis. “Loꞌꞌobaa oottiyogan, pattennabaa haasayiya akeeki baynna asata” sirphphi oottanaadan I zoriis.—1 Pheexiroosa 2:12-15.