Paraman Shaahettiyogaa Yihoowa Markkati Waati Xeelliyonaa?
Aqo deꞌuwaranne paraman shaahettiyogaara gayttidaagan Geeshsha Maxaafay yootiyobaa baqqi oyqqoos. Xoossay attumaageenne maccaara issippetettan deꞌi bayanaadan aqo deꞌuwa medhdhiis. Paraman shaahettiyo gaasoy pokkiya tuna nagaraa oottiyogaa xalla gidiyogaa Geeshsha Maxaafay yootees.—Maatiyosa 19:5, 6, 9.
Yihoowa Markkati shaahettana haniya azinatanne machchota maaddiyonaa?
Ee, dumma dumma ogetun maaddoosona:
Xuufeta. Aqo deꞌuwa, haray atto giigana danddayennabaa milatiyagaakka minttana danddayiyabay xuufetun darotoo kiyees. Leemisuwawu, 2018 Beegottite! Maxeetiyan “Murttiyoogaa,” qassi “Atto Giyoogaa” giya huuphe yohota xeella.
Shiiqota. Nuuni nu galchchaa shiiqotuuninne gita shiiqotun aqo deꞌuwaban Geeshsha Maxaafay zoriyo maaddiyabaa tamaaroos.
Cimata. Efisoona 5:22-25 mala xiqiseta qoppanaadan galchchaa cimati azinatanne machchota maaddoosona.
Issi Yihoowa Markkay paraman shaahettikko galchchaa cimati maayettana koshshii?
Akkay. Aqo deꞌuwan wayssiyabay merettido azinaynne machchiya maado oychchiyo wodekka waatana koshshiyakko cimati etawu yootokkona. (Galaatiya 6:5) Shin Geeshsha Maxaafay yootiyo gaasoy baynnan paraman shaahettiya uri hara ura ekkennaadan woy gelennaadan Geeshsha Maxaafay diggees.—1 Ximootiyosa 3:1, 5, 12.
Shaahettiyogaa Yihoowa Markkati waati xeelliyonaa?
Geeshsha Maxaafay aqo deꞌoy giigana xayikkokka azinaynne machchiya issippe deꞌanaadan zorees. (1 Qoronttoosa 7:10-16) Mintti woossiyogan, Geeshsha Maxaafaa maaraadan deꞌiyogaaninne siiqiyogan wayssiya darobay giigana danddayees.—1 Qoronttoosa 13:4-8; Galaatiya 5:22.
Gidoppe attin, keehi wayssiyabay merettin issi issi Kiristtaaneti shaahettidosona; he hanotati:
Eriiddi maaddennaagaa.—1 Ximootiyosa 5:8.
Keehi kobattiyogaa.—Mazamure 11:5.
Xoossaara dabbotaa mooriyabaa oottiyogaa. Leemisuwawu, Yihoowa Markki Xoossay azazido issibaa kanttanaadan aqo laggee giddana danddayees, yaatin naaqettida izaawu ‘asawu gidennan haariya Xoossawu azazettanawu’ shaahettiyogaappe kehiyabi baawa giidi doorana danddayees.—Oosuwa 5:29.