Yihoowa Markkati Dumma Dumma Haymaanootetuura Walahettidi Oottiyonaa?

Nuuni Yihoowa Markkati ammanuwara gayttidabaa haymaanoote ubbaa asaara haasayikkonne, harabaa ammaniya asaara goynniyogaa malabaa walahettidi oottokko. Geeshsha Maxaafay tumu Kiristtaaneti issippe ‘gaytti ohettidoogaa’ yootees, qassi hegaadan maayettiyogaa bessiya issibay ammanuwan issuwa gidiyogaa. (Efisoona 4:16; 1 Qoronttoosa 1:10; Piliphphisiyusa 2:2) Hegee siiquwa, qaretaanne atto giyogaa mala eeshshatu goꞌꞌaaban maayettiyogaa xalla gidenna. Nu haymaanootiyan Geeshsha Maxaafaappe geeshshi eridoban ammanoos; he eray baynnan nu ammanoy hada.—Roome 10:2, 3.

Geeshsha Maxaafay hara haymaanootiya asaara issippe goynniyogaa issi Kiristtaaniya ammanuwa qohiya, bixe gidenna waattan leemisees. (2 Qoronttoosa 6:14-17) Hegaa gishshawu, Yesuusi bana kaalliyageeti dumma dumma haymaanootiyara walahettidi oottennaadan yootiis. (Maatiyosa 12:30; Yohaannisa 14:6) Hegaadankka, Muuse baggaara imettida Xoossaa Higgee beni Israaꞌeelati shooro biittaa asatuura goynnennaadan diggees. (Kessaabaa 34:11-14) Guyyeppe, haymaanootiyan dummatiya asati maaddanawu oychchin, ammanettida Israaꞌeelati hegee haymaanootiya issippetetta gidiyo gishshawu ixxis giidosona.—Izira 4:1-3.

Yihoowa Markkati ammanuwabaa hara haymaanootiya asaara haasayiyonaa?

Ee. Kiitettida Phawuloosaagaadan, nu haggaazan “danddayiyogaa keena daro asaa” qofaanne ammanuwa akeekanawu koyoos. (1 Qoronttoosa 9:19-22) Nuuni etaara haasayiyo wode Geeshsha Maxaafay ‘wozanappe bonchchana’ mala zoriyogaadan oottanawu wozanappe baaxetoos.—1 Pheexiroosa 3:15.