Geeshsha Maxaafay Saꞌay Pidda Gii?
Geeshsha Maxaafay yootiyobaa
Akkay, Geeshsha Maxaafay saꞌay pidda geenna.a Geeshsha Maxaafay saynisiya tamaarissiyo maxaafa gidenna. Gidoppe attin, saynisee demmido naqaashaa phalqqiyabi aybinne Geeshsha Maxaafan baawa. Geeshsha Maxaafay yootiyobati “meri merinau eqqidi de7iyaageeta.”—Mazamure 111:8.
Geeshsha Maxaafay ‘saꞌaa oyddu zooziya’ giyogee woygiyogee?
Geeshsha Maxaafay ‘saꞌaa oyddu zooziya,’ qassi “biittaa gaxaappe gaxaa” giyobay saꞌaa qottaa woy ayyo gaxay deꞌiyogaa bessiyaba gidennan, kumetta saꞌaa qonccissiyo leemiso. (Isiyaasa 11:12; Iyyooba 37:3) Hegee saꞌaa bollaa kumettaa bessiyaba gidiyogee qoncce. Geeshsha Maxaafay saꞌaa oyddu ginaakka hegaadan gees.—Luqaasa 13:29.
“Zooziya” woy “gaxaa” geetettidi birshshettida Ibraawetto qaalay “qefeta” giyogaara gayttida leemiso milatees. Ze Internashinal Istandard Baybil Insaykilopidee yootiyogaadan, “kafoy ba marata qefiyan kammiyo gishshawu, piddi giidaba aybanne qonccissanawu [ha Ibraawetto qaalay] gelees.” Iyyooba 37:3ninne Isiyaasa 11:12n “he qaalay saꞌawu bolla baggaara deꞌiya zawa woy gaxaa qonccissiyaba” gidiyogaa he maxaafay gujjidi yootees.b
Dabloosi Yesuusa paaccido paaciyabay shin?
Yesuusa paaccanawu, “Dabloosi A issi gita deriya xeeraa kessidi, saꞌaa kawotetta ubbaanne eta bonchchuwa bessiis.” (Maatiyosa 4:8) Geeshsha Maxaafay yootiyo ha qofay pidda saꞌan issi sohuwappe kumetta saꞌaa beꞌana danddayiyogaa qonccissees giidi issoti issoti qoppoosona. Shin hagan “gita deriya” geetettidaagee leemisoppe attin issisaa bessiyaba milatenna. Hegaadan qoppana koshshiyo gaasuwa beꞌa.
Saꞌan deꞌiya kawotettata ubbaa yaappe beꞌana danddayiyo deree saꞌan baawa.
Dabloosi kawotettatu ubbaa xalla gidennan, ‘eta bonchchuwakka’ Yesuusa bessiis. Haahosaappe he ubbabaa beꞌana danddayettenna gishshawu, Dabloosi ajjuutan Yesuusa hegaa bessennan waayi aggana. Hegee issi asi saꞌan deꞌiya dumma dumma sohotu pootuwa projekteriyan woy iskiriiniyan bessiyogaa mala.
Luqaasa 4:5n he qofay xaafettido sohuwan Dabloosi Yesuusa “saꞌan deꞌiya kawotettaa ubbaa issi kutti” bessidoogaa yootees; asi hegaa beꞌana danddayenna. Hegee Dabloosi Yesuusa asi beꞌiyogaappe dumma ogiyan paaccidoogaa bessees.
a Geeshsha Maxaafay Xoossaa, “I biittaa irzzuwaappe bolla baggan ba araatan uttees” yaagees. (Isiyaasa 40:22) Eranchchati ubbay maayettiyo qofa gidana xayikkonne, issi issi xuufeti ha sohuwan “irzzuwa” geetettida qaalay kuwase malabaa bessana danddayiyogaakka yootoosona. Ay gidinkka, Geeshsha Maxaafay saꞌaa pidda geenna.
b Zaarettidi Giigidaagaa, Paydo 2, sinttaa 4.