Geelaꞌo Mayraamo—Geeshsha Maxaafay Ibaa Woygii?

• Geeshsha Maxaafay yootiyobaa

• Geelaꞌiya naꞌa waana yelana danddayay?

• Yesuusi geelaꞌeeppe yelettidoy aybissee?

• Mayraama geelꞌo gidada deꞌa bayadee?

• Yesuusi nagari baynna geelaꞌeeppe yelettidee?

• Nuuni Mayraamo waati xeellana koshshii?

Geeshsha Maxaafay yootiyobaa

Geelaꞌiya Mayraama Yesuusa yeliyo dumma maataa demmidoogaa Geeshsha Maxaafay yootees. Geeshsha Maxaafay ha malaaliyabay hananaagaa Isiyasa maxaafan kasetidi yootees, qassi hegee polettidoogaa Maatiyosanne Luqaasa Wonggeletun qoncciis.

Masiya yeletaabaa Isiyasi daro wodeppe kase, “Geela7iyaa shahaarada attuma na7aa yelana” yaagiis. (Isiyaasa 7:14) Wonggeliya xaafida Maatiyosi Isiyasi giidobay Mayraama Yesuusa shahaaridoogan polettidoogaa Xoossay kaalettin yootiis. Maatiyosi Mayraama shahaarido malaaliya ogiyabaa yooti simmidi, hagaadan giis: “Hagee ubbay tumuppe hanidaba; qassi Yihoowi ba erissidobaa yootiyagaa baggaara kasetidi hagaadan gi uttiis: ‘Geelaꞌiyaa shahaarada attuma naꞌaa yelana, qassi eti A Amaanuꞌeela giidi sunttana’; he sunttaa birshshettay, ‘Xoossay Nunaara Deꞌees’ giyogaa.”—Maatiyosa 1:22, 23.

Wonggeliya xaafida Luqaasikka Mayraama shahaarido malaaliya ogiyabaa yootiis. I Xoossay “Daawita zeretta gidida Yooseefa giyo bitanee giigissido issi geelaꞌeekko” kiitanchchaa Gabreela kiittidoogaa, qassi “he geelaꞌee sunttay Mayraamo” gidiyogaa xaafiis. (Luqaasa 1:26, 27) Mayraama geelaꞌo gidiyogaa yootaasu. Masiya, Yesuusa yelanaagaa kiitanchchay Mayraamiyyo yootin, A, “Taani attuma asaara inddan gaytta erenna gishshawu, hegee waanidi hananee?” yaagada oychchaasu.—Luqaasa 1:34.

Geelaꞌiya naꞌa waana yelana danddayay?

Xoossay ubbabaa oottiyo wolqqan, hegeekka, geeshsha ayyaanan Mayraama shahaaraasu. (Maatiyosa 1:18) Kiitanchchay Mayraamiyyo hagaadan giis: “Geeshsha ayyaanay ne bolli wodhdhana, qassi Ubbaappe Xoqqa Xoossaa wolqqay nena kammana. Hegaa gishshawu, neeni yelana naꞌay Xoossaa Naꞌaa,b geeshshaa geetettana.” (Luke 1:35) Xoossay ba Naꞌaa deꞌuwa Mayraami uluwawu aattidi malaaliyabaa oottidi, A naꞌaa shahaaranaadan oottiis.

Yesuusi geelaꞌeeppe yelettidoy aybissee?

Yesuusi asaa nagaraappenne hayquwappe ashshana mala wottiyobi baynna bollay ayyo deꞌanaadan, Xoossay I geelaꞌeeppe yelettanaadan oottiis. (Yohaannisa 3:16; Ibraawe 10:5) Xoossay Yesuusa deꞌuwa Mayraami uluwawu aattiis. Yaatiyo gishshawu, uluwan naꞌay dicciyo wode nagaray A bolli aybinne deꞌenna mala Xoossaa geeshsha ayyaanay naagiis.—Luqaasa 1:35.

Hegaa gishshawu, Yesuusi wottiyobi baynnaagaa gididi yelettiis; Addaameekka nagaraa oottanaappe kase hegaa mala. Geeshsha Maxaafay Yesuusabaa, “I nagaraa oottibeenna” yaagees. (1 Pheexiroosa 2:22) Yesuusi wottiyobi baynna asa gidiyo gishshawu, asaa nagaraappenne hayquwappe wozanawu bessiyabaa qanxxana danddayees.—1 Qoronttoosa 15:21, 22; 1 Ximootiyosa 2:5, 6.

Mayraama geelꞌo gidada deꞌa bayadee?

Geeshsha Maxaafay Mayraama geelꞌo gidada deꞌa bayasu geenna. Shin iyyo hara naatikka deꞌiyogaa yootees.—Maatiyosa 12:46; Marqqoosa 6:3; Luqaasa 2:7; Yohaannisa 7:5.

Yesuusi nagari baynna geelaꞌeeppe yelettidee?

Akkay. Issi issi haymaanooteti I nagari baynna geelaꞌeeppe yelettiis giidi tamaarissoosona. Leemisuwawu, Niyu Katolik Insaykilopidee yootiyogaadan, Shahaaray Attiiddikka Geeshsha giyo timirttee “Geelaꞌo Mayraama ba deꞌuwa doomettaappekka, hegeekka, aayee uluwan shahaaray attiyo wodekka nagaraappe laꞌa kiyaasu giyo ammanuwa.” He maxaafay hara asay nagaraa laattidaba gidikkonne, Mayraama Xoossaa aaro kehatettan nagaraa laattabeenna dumma asa gidiyogaa yootees.c

Gidoppe attin, Geeshsha Maxaafay awaaninne Mayraama nagaraappe laꞌa kiyaasu geenna. (Mazamure 51:5; Roome 5:12) Aayoti Muuse Higgiyan gattana koshshiyo nagaraa kammiyo yarshshuwa Mayraama yarshshidogee A nagaranchcha gidiyogaa bessees. (Wogaabaa 12:2-8; Luqaasa 2:21-24) Niyu Katolik Insaykilopidee hagaadan gees: “Geeshsha Maxaafay Shahaaray Attiiddikka Geeshsha giyobaa tamaarissenna . . . [Hegee] Woosa Keettay maacido qofa.”

Nuuni Mayraamo waati xeellana koshshii?

Mayraama ammanuwara, azazettiyogaara, ziqqqi giyogaaranne Xoossaa wozanappe siiqiyogaara gayttidaagan nuuni O milatana danddayiyo loꞌꞌobaa oottaasu. Nuuni I leemisuwa kaallana bessiyo ammanettida asatuppe A issinno.—Ibraawe 6:12.

Shin Mayraama Yesuusa aayo gidiyo dumma maatay imettidooro gidikkokka, nuuni iyyo goynnanaadan woy O woossanaadan Geeshsha Maxaafay tamaarissenna. Yesuusi ba aayyiyo dumma ogiyan bonchchibeenna, woy bana kaalliyageeti yaatanaadan yootibeenna. Wonggeletuuninne Oosuwa maxaafan issi sohuwanaappe attin, Ooratta Maachchaa giyo maxaafatun deꞌiya hara 22 maxaafatun Mayraami suntti baawa.—Oosuwa 1:14.

Beni Kiristtaaneti Mayraamo dumma ogiyan bonchchiyogee atto shin, dumma ogiyan xeellidoogaa bessiyabi Geeshsha Maxaafan baawa. Shin Geeshsha Maxaafay Kiristtaaneti Xoossaa xallawu goynnanaadan tamaarissees.—Maatiyosa 4:10.