Yihoowa Markkati Timirttiya Waati Xeelliyonaa?
Nuuni timirttiya Geeshsha Maxaafay yootiyo maaraadan xeelloos. Xoossay yootiyo kaallidi deꞌiya maaratudan waati oottanaakko issi Yihoowa Markki Geeshsha Maxaafan loohida ba kahan maacana koshshees.a
Timirttee koshshiyaba
Geeshsha Maxaafan keehi nashettida “lo77o aadhdhida eratettaanne adussi [qoppiyo]” eeshshati issi urawu deꞌanaadan timirttee maaddees. (Leemisota 2:10, 11; 3:21, 22) Qassi Yesuusi I azazidobaa tamaarissanaadan bana kaalliyageetussi yootiis. (Maatiyosa 28:19, 20) Hegaa gishshawu, nu galchchan deꞌiyageeti nabbabiyogaa, xaafiyogaa, haasayiyogaa,b hara haymaanootiyabaanne wogaabaa eriyogaa mala dumma dummabaa tamaaranaadan minttettoosinne maaddoos.—1 Qoronttoosa 9:20-22; 1 Ximootiyosa 4:13.
Kawotettatikka timirttiya goꞌꞌaa akeekidi, naati koyro xekkaanne naaꞌꞌantto xekka timirttiya tamaarana bessiyogaa yootoosona. “Asay ubbay ayssiya asatuyyo” woy kawotettatuyyo haarettanaadan Xoossay azazidoogaa maaran, hegaa mala higgiyawu azazettoos. (Roome 13:1) Hegaa bollikka, nu naati kifiliya pinniyogaa xallay gidana geennan, minnidi tamaaranaadan zoroos.c Xoossaa Qaalay yootiyogaadan, “intte oottiyo ooso ubbaa asau gidennan Godau oottiyoogaadan, wozanappe oottite.”—Qolasiyasa 3:23, Wolayttatto Geeshsha Maxaafaa.
Timirttee nu soo asawu koshshiyabaa demmanawu maaddees. Geeshsha Maxaafay yootiyogaadan, “koshshiyaban baageetuyyo, ubbaappe aaruwan ba soo asaayyo qoppenna asi ammanuwa aggida asa, qassi ammanenna asappekka iita.” (1 Ximootiyosa 5:8) Koshshiyaban nu soo asaa kaafana bessiyogaa Xoossay yootidobaa oottanaadan timirttee nuna maaddana danddayees. Asay oosanchcha gididi deretettawu maaddiya ura gidanaadan oottiyogee timirttiyawu waanna halchcho gidiyogaa Ze World Buuk Insayklopidiya giyo maxaafay yootees. Loytti tamaarida qara oosanchchi tamaaribeennanne qara oosanchcha gidenna urappe aaruwan metootennan ba soo asawu koshshiyabaa demmees.—Leemisota 22:29.
Naati gasttiyo wode deꞌuwan etawu koshshiyabankka yelidaageeti maaddoosona, qassi timirttee hegawu keehi maaddees. (2 Qoronttoosa 12:14) Tamaaranawu miishshi koshshin, hegee metiyaba gidin woy woga phalqqiyaba gidinkka, yelidaageeti bantta naata tamaarissanaadan minttettoos.d Qassi yelidaageeti naatu timirttiyara gayttidaagan oottana bessiya maaddiyabaa yootoos.e
Timirttiya yiggi xeellana koshshees
Nuuni tamaarana danddayiyobaa akeekan yiggi xeelloos. Geeshsha Maxaafay, “Eeyya asi ubbabaa ammanees; shin cinccai akeekidi tanggees” yaagees. (Leemisota 14:15) Nuuni tamaarana danddayiyo gujo (naaꞌꞌantto xekkaappe bolla) timirttiya, hegawu koshshiya miishshaanne hegaa goꞌꞌaa he maaraadan akeekan yiggi xeelloos. Leemisuwawu, ooso hiillaa loohiyogee wodiya coo wurssennaadan darotoo maaddees.
Ayyaanaabaa timirttee hara timirttiyappe aaruwan maaddees. Geeshsha Maxaafaappe ayyaanaabaa tamaariyogee Xoossaa erin shemppoy attanaadan oottees; hara timirttee hegawu maaddenna. (Yohaannisa 17:3) Ayyaanaabaa timirttee likkebay aybakkokka, hegeekka, “xillotettaa, suure pirddaa, suuretettaanne lo77o ooso ubbaa” tamaarissees. (Leemisota 2:9) Kiitettida Phawuloosi ha wodiya Yuniversttiyagaa mala timirttiya tamaarikkonne, ‘Kiristtoos Yesuusa eriyogee aybippekka aadhdhiyogaa’ akeekiis. (Piliphphisiyusa 3:8; Oosuwa 22:3) Hegaadan ha wodiyankka, daro Yihoowa Markkati xoqqa timirttiya tamaaridaba gidikkonne, eti ayyaanaaban tamaariyobay aaruwan maaddiyogaa akeekoosona.f
Ayyaanaabaa timirttee likkebay aybakko tamaarissees
Xoqqa timirttee kandduwa moorananne ayyaanaaban qohana danddayees
Geeshsha Maxaafan deꞌiya issi leemisoy, “Cincca asi iitaa be7idi, qosetti aattees” yaagees. (Leemisota 22:3) Issi issi Yuniversttetun woy xoqqa timirttiya tamaariyo hegaa mala sohotun deꞌiya hanotay kandduwa moorananne ayyaanaaban qohana danddayiyogaa Yihoowa Markkati akeekoosona. Hegaappe denddidaagan, daro Yihoowa Markkati eti woy eta naati hegaa mala hanotan gelennaadan dooroosona. Xoqqa timirttiya tamaariyo sohotun hagaa mala bala qofay odettiyogaa eti akeekoosona:
Bala qofaa: Miishshay ufayttanaadaaninne woppu gaanaadan oottees
Xoqqa timirttee daro miishshaa demmiyo ammanttiya oge geetettees; hegaa gishshawu, daro tamaareti sintta xeeran daro miishshaa demmanawu yuniversttiya geloosona. Issoti issoti miishshay ufaysseesinne woppu oottees giidi qoppikkonne, Geeshsha Maxaafay he qofay hada gidiyogaa bessees. (Shiishshiyagaa 5:10) Geeshsha Maxaafay “miishshaa siiqiyogee qohiyaba ubbawu gaaso,” qassi darotoo ammanuwa bashshiyaba gidiyogaakka tamaarissiyogee keehi qoppana koshshiyaba. (1 Ximootiyosa 6:10) Yihoowa Markkati “duretettaa cimoy” banttana piredan oyqqennaadan keehi baaxetoosona.—Maatiyosa 13:22.
Bala qofaa: Issi asi xoqqa timirttiya tamaaridi hayttatanawu woy bonchchettanawu koyana koshshees
Leemisuwawu, beni Jorjiya biittaa kiike moconay Nika Gilawuri, ba biittan daro asaa qofaabaa hagaadan giis: “Jorjiyan bonchchettanawu yuniversttiya digiree koshshees gaana danddayettees. . . . [Kase,] digiree baynna yelagatun eta soo asay yeellatees.”g Shin Geeshsha Maxaafay ha alamiyan hayttatanawu koyennaadan zorees. Yesuusi he wode haymaanootiya kaalettiya, bonchchettanawu koyiya asata, “Intte . . . issoy issuwa bonchchiiddi, waanidi ammanana danddayeetii?” yaagiis. (Yohaannisa 5:44) Yunivesttiyan deꞌiya hanotay Xoossay ixxiyo otoruwa minttettana danddayees.—Leemisota 6:16, 17; 1 Pheexiroosa 5:5.
Bala qofaa: Likkebawunne likke gidennabawu asi ubbi ba maaraa kessana koshshees
Yihoowa Markkati likkebawunne likke gidennabawu Xoossaa maaraa kaalloosona. (Isiyasa 5:20) Shin, Jornal of Alkohol end Dirag Ijukeshin giyo xuufiyan kiyidabay yuniversttiyan laggeti iisettiyobay daro tamaareti “likkebawunne likke gidennabawu eti eriyobaappe dummatiyabaa oottanaadan” denttettiyogaa yootiis.h Hegee Geeshsha Maxaafay, “Iita asatuura zuppetiyogee loꞌꞌo meeziya bashshees” giyo maaraara maayees. (1 Qoronttoosa 15:33) Mattottiyogaa, jallissiyabaa goꞌettiyogaanne aqo lagge gidenna uraara zinꞌꞌiyogaa mala, Xoossay ixxiyobay yuniversttiyan daroti oottiyobanne minttettiyoba.—1 Qoronttoosa 6:9, 10; 2 Qoronttoosa 7:1.
Bala qofaa: Alamiya laammanawu xoqqa timirtte malabi baawa
Daroti xoqqa timirttiya tamaariyoy banttawu laamettanaassanne alamiya laammanaasappe attin, duretanaassa, hayttatanaassa woy dajje allattaassa gidennaagaa akeekoos. Hegee loꞌꞌo halchcho gidikkonne, Yihoowa Markkati dummatiyabaa dooridosona. Nuunikka Yesuusadan Xoossaa Kawotettaa xallay alamiya giigissanaagaa ammanettoos. (Maatiyosa 6:9, 10) Gidoppe attin, Xoossaa Kawotettay alamiya metuwa qaaranaashin coo utti bayokko. Shin Yesuusadan ‘Xoossaa Kawotettaa mishiraachchuwa’ kumetta saꞌan yootoos; hegee layttan layttan daro xeetu shaꞌu asaa deꞌoy giiganaadan oottees.i—Maatiyosa 24:14.
a Xoossaa higgiya phalqqiyaba gidana xayikko, bantta soo asaara deꞌiya yelaga Yihoowa Markkati timirttiyaban banttana yelidaageeti koyiyogaadan oottoosona.—Qolasiyasa 3:20.
b Yaatanawu, Nabbabiyoogaanne Xaafiyoogaa Tamaaranau Minna giyo brooshuriya mala, nabbabuwawunne xaafuwawu maaddiya 11 miilooneppe dariya xuufeta attamida. Qassi kumetta saꞌan 120 doonatun nabbabiyogaanne xaafiyogaa asaa coo tamaarissida. Nuuni 2003ppe 2017 gakkanaashin, 70,000 gidiya asay nabbabanaadaaninne xaafanaadan tamaarissida.
c “Timirttiya Aggoo?” (Amaarattuwa) giya huuphe yohuwa xeella.
d Leemisuwawu, yelidaageeti bantta attuma naatanne macca naata tamaarissanaadan minttettoos. Laappune 15, 2003, Wochchiyo Keelan (Amaarattuwa) “Ta Naꞌaa Timirtte Keetti Gelissana Bessii?” giya huuphe yohuwa xeella.
e “Intte Naꞌi Timirttiyan Minnanaadan Waati Maaddana Danddayeetii?” giya huuphe yohuwa xeella.
f “Deꞌuwa Doomettaa Xeelliyagan Yootido Qofaa” giyagaa jw.org saytiyan xeella.
g Praktikal Ikonomiks: Ikonomik Transformeshin end Gavernment Riform in Jorjiya 2004—2012, sinttaa 170.
h Shaaho 61, paydo 1, Hosppune 2017, sinttaa 72.
i Xoossaa Qaalaanne Kawotettaa mishiraachchuwa wolqqaa bessiyabay hanidaagaa akeekanawu “Geeshsha Maxaafay Asay Laamettanaadan Oottees” giya huuphe yohuwa jw.org saytiyan xeella.