MUUSEPPE TAMAARIYOOBAA
Muusee Oonee?
Neeni Muusebaa qoppiyo wode ay hassayay? Geella . . .
a aayyiyaa keeshiyan yeggada Nayle SHaafan wottido gacino naꞌaa hassayay?
Paaroona naꞌiyaa Gibxxen ishaluwan dichidaba gidikkokka, Israaꞌeela asa gidiyoogaa dogibeenna naꞌaa hassayay?
Miidiyaame biittan 40 layttau dorssaa heemmiiddi deꞌida bitaniyaa hassayay?
eexxiya buuraa matan Yihoowaaraa haasayida bitaniyaa hassayay?
Israaꞌeelata yeddanaadan Gibxxe kawuwaa xalan oychida bitaniyaa hassayay?
Gibxxe kawoy tumu Xoossau azazettennan ixxido gishshau, he biittan Tammu Boshay gakkanaagaa Xoossay kiittin yootida bitaniyaa hassayay?
Gibxxeppe kiyida daro Israaꞌeelata kaalettida bitaniyaa hassayay?
Xoossay azazin Zoꞌo Abbaa shaakkida bitaniyaa hassayay?
Xoossay immido Tammu Azazota Israaꞌeelatussi yootida bitaniyaa hassayay?
MUUSEE hageetanne hara darobaa oottiis. Ammanettida ha bitaniyaa Kiristtaaneti, Ayhudatinne Isilaamati keehippe bonchiyoogee garamissiyaaba gidenna!
Muusee “gita wolqqan maalaalissiyaabaa” oottidaagaanne hananabaa yootidaagaa gidiyoogee qoncce. (Zaarettido Wogaa 34:10-12) Xoossay a baggaara wolqqaamabaa oottanaadan i eeno giis. Gidikkokka, Muusee nu mala asa. Yesuusi saꞌan haggaaziyo wode ajjuutan Muuseera qonccida, hananabaa yootiya Eelaasaagaadan, Muuseekka “nu mala asa.” (Yaaqooba 5:17; Maatiyoosa 17:1-9) Nuna gakkiyaagaa mala daro metoy Muuse bolli gakkiis; qassi i he metuwan genccidi xooni kiyiis.
I hegaadan oottidoy ayba ogiyaanakko eranau koyay? Muuse loꞌꞌo eeshshatuppe heezzata, qassi nuuni a leemisuwaappe ay tamaarana danddayiyaakko akeeka.
a Yihoowa giyaagee Geeshsha Maxaafan qonccida Xoossaa sunttaa.