Daawiti Baqatido Gaasuwaa

DAAWITI Gooliyaada wori simmin, Israaꞌeele olanchchatu halaqay Abaneeri a Saaꞌoolakko efiis. Saaꞌooli Daawita keehi dosiis. Saaꞌooli ba olanchchatu giddon a halaqa oottidi, kawo keettan deꞌanaadan ekki efiis.

Hegaappe guyyiyan, olanchchati Pilisxxeematuura olettidi simmiyo wode, maccaasay: ‘Saaꞌooli shaꞌaa woriis; shin Daawiti tammu shaꞌaa woriis’ yaagidi yexxidosona. Daawitassi Saaꞌoolaagaappe daro bonchchoy immettido gishshau, hegee Saaꞌooli a qanaatanaadan oottiis. SHin Saaꞌoola naꞌaa Yonaataani qanaatibeenna. I Daawita keehippe siiqees, qassi Daawitikka a siiqees. Yaatiyo gishshau, eti naaꞌꞌay audekka gidin issoy issuwaayyo lagge gididi deꞌanau qaalaa gelidosona.

Daawiti diittaa loytti diixxiyo gishshau, Saa⁠ꞌooli i diixxishin siyiyoogaa dosees. SHin issi gallassi qanaatee issi keehippe iitabaa Saaꞌoola oottisiis. Daawiti diittaa diixxishin Saaꞌooli: ‘Taani a godaara gattada sikkana!’ yaagidi ba toora akko xonggiis. SHin Daawiti deshidi aattin, tooray a haliis. Hegaappe takkidi, Saaꞌooli naaꞌꞌanttuwaakka tooraa xonggidi Daawita haliis. Yaatiyo gishshau, haꞌꞌi Daawiti keehippe naagettana koshshiyoogaa eriis.

Saaꞌooli gelido qaalaa hassayay? Gooliyaada woriya uraayyo ba naꞌiyo machcho oottidi immanau qaalaa geliis. Wurssettan Saaꞌooli ba naꞌiyo Miikaalo Daawiti ekkana danddayiyoogaa yootiis shin, Daawiti koyro, morkke Pilisxxeematuppe 100ta worana koshshees. Ane hegaa qoppa! Saaꞌooli Pilisxxeemati Daawita woranaagaa qoppidoogee qoncce. SHin eti Daawita woribookkona; yaatin Saaꞌoli ba ­naꞌiyo assi machcho oottidi immiis.

Issi gallassi Saaꞌooli Yonaataanassinne ba ashkkaratu ubbaassi Daawita worana koyiyoogaa yootiis. SHin Yonaataani ba aawaassi: ‘Daawita qohoppa. I neeyyo aybanne balabaa oottibeenna. Hegaappe ubba i oottido ubbabay nena keehi maaddidaba. I Gooliyaada worido wode ba shemppuwau qarettibeennaagaa beꞌada, neenikka ufayttadasa’ yaagiis.

Saaꞌooli ba naꞌay giidobaa siyidi, Daawita qohennaagau qaalaa geliis. Daawita simmanaadan oottin, i Saaꞌoolassi a son kase oottiyoogaadan zaarettidi oottiis. SHin issi gallassi Daawiti diittaa diixxishin, Saaꞌooli zaarettidikka ba tooraa Daawitakko xonggiis. Daawiti deshidi aattin, tooray godaa caddiis. Hagee heezzantto! Haꞌꞌi Daawiti baqatanau bessiyoogaa eriis!

He galla qammi Daawiti ba soo biis. SHin Saa⁠ꞌooli amarida asata Daawita woranaadan kiittiis. Miikaala ba aaway ay oottanau qoppidaakko eraasu. Yaatiyo gishshau ba azzinaayyo: ‘Hachchi qammi neeni baqatana xaykko, wontto hayqqaasa’ yaagaasu. He galla qammi Miikaala, Daawiti maskkootiyaara kiyidi baqatanaadan maaddaasu. Saaꞌooli bana demmennaadan, Daawiti laappun layttau issisaappe harasan qosettidi deꞌiis.