Daawiti Kawo Gidiis

AAꞌOOLI zaarettidikka Daawita oyqqanau koyiis. Ba wotaaddaratuppe doorettida 3,000ta ekkidi, Daawita koshshaa kiyiis. Daawiti hegaa siyido wode, Saaꞌoolinne a asati qammi awan shemppiyaakko eranau xomoossiya asata kiittiis. Hegaappe Daawiti ba asatuppe naaꞌꞌata: ‘Intte giddoppe tanaara Saaꞌooli deꞌiyoosaa baanay oonee?’ yaagidi oychchiis.

Abishaayi: ‘Ta baana’ yaagidi zaariis. Abishaayi Daawita michchee Xaruuyi naꞌaa. Saa⁠ꞌoolinne a asati xiskkidaashin, Daawitinne Abishaayi leddaara asati shemppidosaa biidosona. Eti Saaꞌoola huuphessan deꞌiya, a tooraanne haatta gombbuwaa ekkidosona. Eti ubbay xiskkuwan kayro gishshau, ooninne siyibeenna woykko eta beꞌibeenna.

Haꞌꞌi Daawitanne Abishaaya beꞌa. Haakki biidi issi deriyaa huuphiyaa saruwan gakkidosona. Daawiti ba qaalaa xoqqu oottidi Israaꞌeele olanchchatu halaqaa: ‘Abaneeraa, kawuwaa ne godaa aybissi naagikkii? A tooraynne haatta gombboy awan deꞌiyaakko ane xeella!’ yaagiis.

Saaꞌooli xiskkuwaappe beegottiis. Hegee Daawita qaalaa gidiyoogaa i eridi: ‘Daawitaa, hegee nenee?’ yaagidi oychchiis. Saaꞌoolanne Abaneera ziqqasan deꞌiyaageeta beꞌay?

Daawiti zaaridi Saaꞌoolassi: ‘Ee kawuwau ta godau’ yaagiis. Qassi Daawiti: ‘Ayssi ne tana oyqqanau koyay? Ta ay iitabaa oottidanaa? Kawuwau, ne tooray hageeho. Ne asatuppe issoy yiidi ekko’ yaagiis.

Saaꞌooli: ‘Taani mooraas. Taani eeyyabaa hanaas’ yaagiis. Hegaappe Daawiti ba ogiyaa biis; Saaꞌoolikka soo simmiis. SHin Daawiti ba wozanan: ‘Issi gallassi Saaꞌooli tana worana. Taani Pilisxxeema biitti baqatana koshshees’ yaagidi qoppiis. I oottidoykka hegaadaana. Daawiti Pilisxxeemata cimmidi, i eta bagga gididabadan eti ammananaadan oottiis.

Amarida wodiyaappe guyyiyan, Pilisxxeemati Israaꞌeeletuura olettanau kiyidosona. He olan Saaꞌoolinne Yonaataani naaꞌꞌaykka hayqqidosona. Hegan Daawiti keehippe azzaniis. Hegaappe i: ‘Ta ishaa Yonaataanaa, taani neeyyo azzanayis; ne taayyo daroppe alꞌꞌo!’ yaagi zilaalidoogee deꞌiyo issi qarettiya zilaassaa xaafiis.

Hegaappe Daawiti Israaꞌeelen deꞌiya Kebroona katamaa simmiis. Saaꞌoola naꞌay Yaabusttee kawotanaadan doorida asatunne Daawiti kawotanaadan koyiya asatu giddon olay denddiis. SHin wurssettan Daawite asay xooniis. Daawiti kawotiyo wode ayyo layttay 30. Laappun layttanne baggaa Kebroonan uttidi haariis. Ayyo yan yelettida attuma naatuppe amaridaageetu sunttay Aminoona, Abeseloomanne Adooniyaa.

Daawitinne a asati Yerusalaame geetettiya loꞌꞌiya katamaa kiyidi oyqqiyo wodee gakkiis. Daawita michchee Xaruuyi hara naꞌay Yooꞌaabi he olan sintta xeera gididi olettiis. Hegaa gishshau, Daawiti a ba olanchchatu halaqa oottiis. Haꞌꞌi Daawiti Yerusalaame kataman uttidi haariyoogaa doommiis.