Daawitanne Saaꞌoola

Daawiti Gooliyaada wori simmin, Kawuwaa Saaꞌooli a ba ola gadaawaa oottiis. Daawiti daro olan xooniis; qassi i keehi dosettiya asa gidiis. Daawiti olaappe soo simmiyo wode ubbatoo maccaasay, ‘Saaꞌooli shaꞌaa woriis; Daawiti tammu shaꞌaa woriis!’ yaagidi duriiddinne yexxiiddi mokkanawu kiyees. Saaꞌooli Daawita qanaatidi a woranawu koyiis.

Daawiti diittaa loyttidi diixxees. Issi gallassi Daawiti Saaꞌoolawu diittaa diixxishin, kawoy ba tooraa a bolli xonggiis. He wode Daawiti tooraappe halin, tooray godaa caddiis. Hegaappe simmin, Saaꞌooli Daawita woranawu darotoo maliis. Wurssettan, Daawiti baqatidi bazzon qosettiis.

Saaꞌooli 3,000 olanchata ekkidi Daawita koyanawu biis. I Daawitinne aara deꞌiya asati qosettido gonggoluwaa geliis. Daawita asati saasukkidi, ‘Hagee neeni Saaꞌoola woriyo gallassa’ yaagidosona. Daawiti Saaꞌoolakko loddan biidi a maayuwaappe qanxxi ekkiis. Saaꞌooli eribeenna. Hegaappe simmin, Daawiti Yihoowi tiyido kawuwaa bonchibeenna gishshawu, keehi azzaniis. I ba asay Saaꞌoola worennaadan diggiis. Ubba qassi i Saaꞌoola xeesidi, he wode Saaꞌoola worana danddayiiddi aggidoogaa yootiis. Saaꞌooli Daawitaara gayttidaagan qoppiyo qofaa laammanee?

CHii. Saaꞌooli Daawita koyiyoogaa aggibeenna. Issi galla qammi Daawitinne a michee naꞌay Abishaayi Saaꞌoola dunkkaaniyaakko lakkiiddi biidosona. Haray atto Saaꞌoola naagiya Abaneerikka xiskkiis. Abishaayi, ‘Hagee nuuni a woriyo gallassa! Taani a worana’ yaagiis. Daawiti, ‘Yihoowi a worana. Ane a tooraanne haattaa otuwaa ekkidi boos’ yaagidi zaariis.

Daawiti Saaꞌooli dunkkaanidosaa beꞌana mala matan deꞌiya deriyaa kiyiis. I, ‘Abaneeraa, neeni kawuwaa naagennay aybissee? Saaꞌoola otoynne tooray awan deꞌii?’ yaagidi waassiis. Saaꞌooli Daawita qaala gidiyoogaa eridi hagaadan giis: ‘Neeni tana worana danddayaasa; shin worabeykka. Neeni ta sohuwan Israaꞌeelan kawo gidanaagaa taani erays.’ Saaꞌooli ba kawo keetti guyye simmidi biis. SHin Daawita ixxiyay Saaꞌoola soo asaa ubbaa gidenna.