Abrahaama—Ammanuwan Erettidaagaa

Abrahaami omarssan karen eqqiis. Xoolinttiyan kumida, pooꞌiya saluwaa xeelliyoogee, a zerettay he xoolinttetudan corattanaagaa Xoossay gelido qaalaa qoppanaadan a denttettiis. (Doo. 15:5) Xoolintteta beꞌiyoogee Abrahaami Yihooway gelido qaalaa hassayanaadan oottees. Xoolintteti i ammanettanaadankka oottoosona. Yihoowayyo salo gufanttuwaanne a giddon deꞌiya ubbabaa medhiyo wolqqay deꞌees shin, woni Abrahaaminne Saara naꞌa yelanaadan oottana danddayennee? Abrahaama ammanoy hegaa keena mino.

AMMANOY AYBEE? Geeshsha Maxaafay yootiyoogaadan, ‘ammanoy’ beꞌana danddayennabaa mintti ammaniyoogaa. Hegaa mala ammanuwau baasoy mino naqaashaa. Xoossan ammaniya uri Yihooway gelido qaalay polettiyoogan xeelaa wottees; he qaalay polettidabadan ammanettees.

ABRAHAAMI AMMANIYOOGAA AYBA OGIYAN BESSIDEE? Abrahaami Xoossay gelido qaalaa ammaniyoogaa bessiis. Abrahaami Yihooway hara biittaa a bessanau gelido qaalaa polanaagaa ammanettidi, ba yelettido biittaa aggidi kiyidoy ammanuwaana. Abrahaami ba zareti guyyeppe Kanaane biittaa laattanaagaa ammanidi, he biittan yuuyidi deꞌidoy ammanuwaana. Abrahaami, koshshiyaaba gidikko Yihooway Yisaaqa hayquwaappe denttanaagaa ammanettidi, a yarshshanau azazettidoogee ammanuwaana.—Ibr. 11:8, 9, 17-19.

Abrahaami aadhidaban gidennan sinttanaaban xeelaa wottiis. Abrahaamanne Saari deꞌoy Kanaaneegaappe Uuran ishalo gidennan aggenna, shin “he yeggidi kiyido biittaa simmanau” qoppibookkona. (Ibr. 11:15) Hegaappe, Xoossay etanne sinttappe eta zerettaa anjjanaagan xeelaa wottidosona.—Ibr. 11:16.

Abrahaama ammanuwau mino naqaashi deꞌii? Ee deꞌees. Yihooway ba gelido qaalaa ubbaa poliis. Abrahaama zerettay guyyeppe corattidi Israaꞌeela geetettiya dere gidiis. Guyyeppe, Israaꞌeelati Yihooway Abrahaamayyo qaalaa gelido Kanaane biittan deꞌidosona.—Yaas. 11:23.

NUUNI HEGAAPPE TAMAARIYOOBAY AYBEE? Yihooway ba gelido qaalaa polanaagaa nuuni ammanettana danddayoos. Hegeetuppe issoti issoti asa xeelan danddayettiyaaba milatana xayikkokka, ‘Xoossau ubbabay danddayettiyoogaa’ ammanettoos.—Maa. 19:26.

Abrahaama leemisoy nuuni aadhidaban gidennan sinttappe demmanaban xeelaa wottanaadan tamaarissees. Jasena giyo issi bitanee hegaadan oottanau baaxetiis. Jaseni a bollay muleera silanaadan oottida iita harggiyan waayettees. Jaseni, “Issi issitoo taani aadhida wodiyaabaa qoppiyoogee tuma” yaagiis. I gujjidikka, “Taappe attidoogan ta keehippe qarettiyoobati qeeribata, giishin ta keettaayyiyo Amanddo qoommiyoogaa malabata” yaagiis.

Gidikkokka, Yihooway matan saꞌaa gannate oottanau, qassi ammanettida asaa naatuyyo polo payyatettaanne merinaa deꞌuwaa immanau gelido qaalaa gujjin, i yootidobaa ubbaa polanaagaa Jaseni minttidi ammanees.a (Maz. 37:10, 11, 29; Isi. 35:5, 6; Ajj. 21:3, 4) Jaseni, “Matan ha ubbabay, giishin unꞌꞌoy, azzanoynne issi uri ba mooruwan seelettiyoogee merinau attana” gi qonccissidi, “Sinttappe keehi loꞌꞌo wodee yaanaagaa hassayanau baaxetays” yaagiis. Hegee Abrahaameegaa mala keehippe loꞌꞌo leemiso gidiya ammano!

[Tohossa qofaa]