Geeshsha Maxaafay Asay Laamettanaadan Oottees

Sloveeniyan deꞌiya issi bitanee keehi daro ushshaa uyiyoogaa agganaadan aybi maaddidee?

“Taani kase daassa barmmeele mala”—LUKA SHUTIS

YELETTIDO LAYTTAA: 1975

YELETTIDO BIITTAA: SLOVEENIYAA

KASE TAARIKIYAA:

KASE DEꞌUWAA: Taani Sloveeniyaa waanna kataman Liyubliyanan yelettaas. Tawu layttay oyddaa gidanaashin ufayssiya deꞌuwaa deꞌaas. He wode ta aaway bana barkka woriis. He daafaappe simmin, taayyoonne ta bayra ishawu koshshiyaabaa kunttanawu ta aayyiyaa minna oottaasu.

Taayyo layttay 15 gidido wode, ta aaye aayeera deꞌanawu baas. Ta laggetuppe daroti I shooron deꞌiyo gishshawu, iira deꞌiyoogan ufayttaas. Nu soogaappe aaruwan ta koyoogaadan hanaydda iira deꞌaas. Tawu layttay 16 gidido wode, Qeeraanne Woggaa gallassi ushshaa uyiya asatuura gayttiyoogaa doommaas. He wode ta huuphiyaa dichchays, shori baynna maayuwaa maayaysinne sijaaraa uyays.

Taani jallissiya dumma dummabaa goꞌettikkonne, mattoyiya ushshaa uyiyoogaa keehi dosays. Daro takkennan, amarida burccukko ushshaa uyiyoogaa aggada, issi xaramuseppe daruwaa uyiyoogaa doommaas. Taani daro ushshaa uyikkonne, mattottidaba milatikke. Taani uyidoogee darotoo ushshaa peenuwan erettees. SHin, taani daro woyniyaa, biiraanne vodikaa uyidoogaa ooninne erenna.

Taaninne ta laggeti darotoo duriiddinne uyiiddi aqoos. Taani etaagaappekka daruwaa uyikkokka, eti soo baanaadan maaddays. Issi gallassi ta laggetuppe issoy tana daassa barmmeele mala giishshin siyaas. Sloveeniyan keehi daro ushshaa uyiya asa hegaadan goosona. Hegee tana keehi azzanttiis.

Taani ta deꞌuwaabaa qoppiyoogaa doommaas. Taani aynne pattikke gaada qoppiyoogaa doommaas. Ta deꞌuwan maaddiyaaba aybanne oottennabadan qoppaas.

TAANI LAAMETTANAADAN GEESHSHA MAXAAFAY MAADDIDO OGIYAA: He wode, tanaara tamaariya issi naꞌay ba kase eeshshaa laammidoogaa akeekaas. I laamettidoogaa beꞌada tanaara tukkiyaa uyanaadan A shoobbaas. Nuuni haasayishin, I Yihoowa Markkatuura Geeshsha Maxaafaa xannaꞌiyoogaa doommidoogaa yootiis. I tamaaridobaa tawu yootiis. Qassi taani woosa keettaa ba erenna gishshawu woy Geeshsha Maxaafaa nabbaba erenna gishshawu, I yootido ubbabay ta erennaba. Taani Yihoowa Markkatuura shiiqiyoogaanne etaara Geeshsha Maxaafaa xannaꞌiyoogaa doommaas.

Taani ta deꞌuwan laamettanawu koyanaadan oottiya darobaa Geeshsha Maxaafaappe tamaaraas. Leemisuwawu, Geeshsha Maxaafay ‘wurssetta gallassa’ giyo wodiyan nuuni deꞌiyoogaa eraas. (2 Ximootiyoosa 3:1-5) Xoossay iita asata xayssanaagaanne loꞌꞌo asati gannatiyan merinawu deꞌanaadan oottanaagaakka tamaaraas. (Mazamure 37:29) Hegee taani he loꞌꞌo asatun qoodettanawu, kase oottiyo iitabaa agganawu koyanaadan maaddiis.

Taani Geeshsha Maxaafaappe tamaaridobaa ta laggetussi yootiyoogaa doommaas. Taani yootidobaa gaasuwan daroti tana qilliiccikkonne, eti yaatidoogee taani qoppabeenna ogiyan tana maaddiis. Hegee eti tawu tumu lagge gidennaagaa akeekanaadan oottiis. Ta ushshaa amaliyawu issi gaasoy he asatuura laggetiyoogaa gidiyoogaa akeekaas. Eti Qeeraanne Woggaa gallassi mattottanawu kumetta saaminttaa yeemuwan naagoosona.

Taani he asata aggada, Yihoowa Markka gidida ta ooratta laggetuura wodiyaa aattiyoogaa doommaas. Eti Xoossaa siiqiyoonne I kessido maaraadan deꞌanawu koyiyo gishshawu, tana keehi minttettidosona. Guyyeppe, ushshay tawu amale gidiyoogee attiis.

TAANI GOꞌETTIDO HANOTAA: Haꞌꞌi ufayttanawu taassi mattoyiya ushshay koshshenna gishshawu, Yihoowa galatays. Taani kaseegaadan deꞌidaakko ta deꞌoy ay keena moorettanaakko erikke. SHin haꞌꞌi ta deꞌoy kaseegaappe loꞌꞌidoogaa ammanettays.

Aadhdhida laappun layttawu Sloveeniyan Yihoowa Markkatu macara biiruwan haggaaziyo bonchcho maataa demmaas. Taani Yihoowa eridoogeenne ayyo haggaaziyoogee ta deꞌuwan tumuppe ufayttanaadan oottiis.