GEESHSHA MAXAAFAA OYSHAA ZAARUWAA
Sinttappe Yesuusi ay oottanee?
Yesuusi 33 M.Ln hayqqidi hayquwaappe denddiis; denddidi saluwaa biis. Daro wodee aadhi simmin, Kawo gididi haaranaadan Yesuusayyo maatay imettiis. (Daaneela 7:13, 14) Yesuusi Kawo gidiyo gishshawu, sinttappe alamiyan sarotettay deꞌanaadan oottana; qassi hiyyeesatettaa xayssana.—Mazamure 72:7, 8, 13 nabbaba.
Yesuusi Kawo gidiyo gishshawu, saꞌan deꞌiya iitatettaa quccidi xayssana
Yesuusi asaa naata haariyo wode maalaalissiya darobaa oottana. A Aaway immido maataa goꞌettidi, i asaa naata polo oottana. He wode asaa naati ceeggennaaninne hayqqennan merinawu ufayttiiddi deꞌana.—Yohaannisa 5:26-29; 1 Qoronttoosa 15:25, 26 nabbaba.
Yesuusi ha wodiyan ay oottii?
Yesuusi ha wodiyan, bana tumuppe kaalliyaageeti kumetta saꞌan sabbakiyo oosuwaa kaalettiiddi deꞌees. Eti Geeshsha Maxaafay Xoossaa Kawotettaabaa yootiyoobaa asaa tamaarissoosona. Xoossaa Kawotettay asaa haaruwaa xayssana gakkanaashin, Yesuusi ba erissiyo ashkkarati he oosuwaa oottiyo wode i eta ubba wode maaddanaagaa yootiis.—Maatiyoosa 24:14; 28:19, 20 nabbaba.
Yesuusi tumu Kiristtaanetu baggaara asay loꞌꞌo deꞌuwaa deꞌanaadan maaddiiddi deꞌees. Qassi ha alamiyan gakkiya bashshaappe eta ashshidi Xoossay qaalaa gelido ooratta alamiyan eti deꞌanaadan oottana.—2 PHeexiroosa 3:7, 13; Ajjuutaa 7:17 nabbaba.