Haganaa Sugeetii?

Aybaassi? Xammaqettida Yihoowa Markkatussi giigida, Akkamettiyo Wodiyau Kaaletuwaa Oyqqida karddiyaa kunttiyoogaa xeelliyaagaana. “Wontto intte de7⁠oi ai hananaakkonne” erenna gishshau, qoppennan akkamettanaadan oottiyaabay gakkiyo wodiyau, intte koyiyo akkamo qommuwaa kaseti kuuyidi, xaafi wottiyoogee keehippe koshshees. (Yaaq. 4:14; Oos. 15:28, 29) Inttena maaddanau, Aakimeti Suuttaa Gishshaa Goꞌettiyo Hiillata—Harggiyaageetu Maataadaaninne Koshshaadan Oottiyoogaa yaagiya biidoy giigiis. He biiduwaa beꞌi simmidi, kaallidi deꞌiya oyshaa goꞌettidi, intte akeekidobaa zaarettite; qassi woossite.—Hassayissuwaa: Asaa shukkiyoogaa amarida ogiyan biidoy bessiyo gishshau, so asay biiduwaa guutta naatuura beꞌana koshshiya woy koshshennaakko akeekan kuuyana koshshees.

(1) Issi issi dottoretinne akkamo oosuwaa oottiya harati akkamuwau suuttaa goꞌettiyoogaa wotti yeggi qoppiyoy aybissee? (2) Akkamuwan suuttaa goꞌettennan wolqqaama shuhaa shukkidoogaa bessiya heezzu leemisota yoota. (3) Suuttaa goꞌettennan akkamanau woy shukkanau koyiyaageetu qooday alame yuushuwan aappunee? Eti hegaadan oottanau koyiyoy aybissee? (4) Suuttaa goꞌettiyoogaa xeelliyaagan mata wode hosppitaaletun oosettida xinaateti ay qonccissiyoonaa? (5) Akkamuwan suuttaa goꞌettiyoogan gakkiya metoy aybee? (6) Suuttaa gishshaa goꞌettiyo akkamuwaa goꞌꞌaa xeelliyaagan daro aakimeti ay kuuyidonaa? (7) Animiyaa (zoꞌo suuttaa seelee guuxxiyoogaa) giyo sahuwau gaasoy aybee? Hegee asa deꞌuwau yashshennan ay keena guuxxana danddayii? Hegaa mala asaa maaddanau ay oottana danddayettii? (8) Hargganchaa bolla giddon zoꞌo suuttaa seelee daranaadan oottana danddayiyoy ayba ogiyaanee? (9) SHukkiyo wode daro suuttay gukkennaadan goꞌettiyo hiillati awugeetee? (10) Suuttaa gishshaa goꞌettiyo akkamoy naatuyyo woykko keehi wolqqaama daafay gakkido asau goꞌꞌana danddayii? (11) Loꞌꞌo akkamuwau aakimeti kaallana bessiya waanna wogatuppe issoy awugee? (12) Kiristtaaneti suuttaa goꞌettenna akkamo qommuwaa kasetidi dooriyoogee keehippe koshshiyoy aybissee? Nuuni hegaadan waatidi oottana danddayiyoo?

Biidoy qonccissiyo issi issi akkamo hiillata dooriyoogee issi uri Geeshsha Maxaafan loohida ba zoriya wozanan baasettidi kuuyiyooba. Inttessinne intte naatussi goꞌettanau dooriyo akkamo hiillay awugaakko qoncce gidida hanotan qofaa qachidetii? Yaati simmidi, Akkamettiyo Wodiyau Kaaletuwaa Oyqqida karddiyaa kunttidetii? Ha allaalletun aaho qonccissuwaa demmanau, “Xoossaa Siiquwan” giya maxaafaa shemppo 7⁠nne yan qonccida hara xuufeta akeekan zaarettidi xeellite. Hidaare 2006 Nu Kawotetta Haggaazuwan gujettidi kiyida, “Suuttau Suuppa Kifiletanne Akkamettiyo Wode Ta Suuttaa Goꞌettiyoogaa Aybidan Xeelliyaanaa?” yaagiya huuphe yohuwaakka xeellite. Wurssettan, intte doorido dooruwaa Akkamettiyo Wodiyau Kaaletuwaa Oyqqida karddiyan xaafite. Akkamuwaara gayttidaagan inttena kalꞌꞌatanaadan intte dooridoogeetinne Yihoowa Markka gidenna intte soo asay intte dooruwaa loyttidi erana koshshees.

[Sinttaa 3n Deꞌiya Saaxiniyaa]

• Inttessinne intte naatussi goꞌettanau dooriyo xaleenne akkamo hiillay awugaakko qofaa qachidetii?

• Qoppennan gakkiya daafaa wode goꞌettanau, Akkamettiyo Wodiyau Kaaletuwaa Oyqqida karddiyaa kunttidi oyqqidetii?