Qoppennan Akkamettanaadan Oottiyaabay Merettiyo Wodiyau Giigettadii?

Akkamettanaadan oottiyaabay qoppennan merettana danddayees. (Yaaq. 4:14) Hegaa gishshau, erancha gidida uri baassi danddayettida keena ubban giigetti uttees. (Lee. 22:3) Neeni koyiyo akkamo qommuwaa kuuyada, xaafa oyqqadii? Nena maaddanau, Aakimeti Suuttaa Gishshaa Goꞌettiyo Hiillata—Harggiyaageetu Maataadaaninne Koshshaadan Oottiyoogaa yaagiyaanne Aakimeti Suuttaa Gishshaa Goꞌettiyo Hiillata—Dokimenttari Siiriyes giya DVD giigiis. He DVD beꞌiyo wode, kaallidi deꞌiya oyshata zaarana danddayiyaakko qoppa. Asaa shukkiyoogaa amarida ogiyan biidoy bessiyo gishshau, so asay biiduwaa guutta naatuura beꞌana koshshiya woy koshshennaakko akeekan kuuyana bessees.

(1) Issi issi dottoretinne akkamo oosuwaa oottiya harati akkamuwau suuttaa goꞌettiyoogaa wotti yeggi qoppiyoy aybissee? (2) Akkamuwan suuttaa goꞌettennan wolqqaama shuhaa shukkidoogaa bessiya heezzu leemisota yoota. (3) Alame yuushuwan deꞌiya shaꞌan qoodettiya haakimetinne shukkiya dottoreti suuttaa goꞌettennan akkamana koyiyoy aybissee? (4) Suuttaa goꞌettiyoogaa xeelliyaagan mata wode hosppitaaletun oosettida xinaateti ay qonccissiyoonaa? (5) Akkamuwan suuttaa goꞌettiyoogan gakkiya metoy aybee aybee? (6) Suuttaa gishshaa goꞌettiyo akkamuwaa goꞌꞌaa xeelliyaagan daro aakimeti ay kuuyidonaa? (7) Animiyaa giyo sahuwau gaasoy aybee, hegaa mala asaa maaddanau ay oottana danddayettii? (8) Hargganchaa bolla giddon zoꞌo suuttaa seelee daranaadan oottana danddayiyoy ayba ogiyaanee? (9) SHukkiyo wode daro suuttay gukkennaadan goꞌettiyo hiillati awugeetee? (10) Suuttaa gishshaa goꞌettiyo akkamoy naatuyyo woykko keehi wolqqaama daafay gakkido asau goꞌꞌana danddayii? (11) Loꞌꞌo akkamuwau aakimeti kaallana bessiya waanna dambbetuppe issoy awugee?

Biidoy qonccissiyo issi issi akkamo hiillati issi uri ba zoriya wozanaa goꞌettidi dooriyooba gidiyo gishshau, akkamettanaadan oottiyaabay qoppennan merettiyo wode awugaa doorana bessiyaakko qoppana gakkanaashin naagoppa. “Xoossaa Siiquwan” giya maxaafaa shemppo 7⁠ninne yan qonccida hara xuufetun, qassi Hidaare 2006 Nu Kawotetta Haggaazuwan gujettidi kiyidaagan deꞌiya qofay neeni loꞌꞌo kuushshaa kuuyanaadan maaddana danddayees. Neeni xammaqettidaba gidikko, neeni kuuyidobaa Akkamettiyo Wodiyau Kaaletuwaa Oyqqida karddiyan xaafada, ubba wode oyqqa.

[Sinttaa 5n deꞌiya misiliyaa qonccissuwaa]

Neeni koyiyo akkamo qommuwaa kuuyada, xaafa oyqqadii?