Matasan Wottite
Ha Brooshureta Goꞌettaydda Deꞌay?
Geeshsha Maxaafaa—A Giddon Deꞌiya Waannaa Qfay Aybee?
Giigidoy Geeshsha Maxaafaabaa loytti erennaageetussa, ubba qassi Kiristtaane giyo haymaanootiyaa kaallennaageetussa
Asau immiyo ogiyaa: “Geeshsha Maxaafan deꞌiya ha xiqisiyaa xeelliyaagan intte qofaa eranau koyoos. [SHaaho 11n deꞌiya, Mazamure 37:11 nabbaba.] Ha hiraagay polettiyo wode biittay ay malatana giidi qoppeetii? [Zaaranaashin takki ga.] Hagee dumma dumma wogaaninne ammanuwan deꞌiya asay Geeshsha Maxaafaappe demmana danddayiyo hidootaunne minttettuwau leemiso.” Sinttaa 3 huuphessan deꞌiya qofaa nabbaba simmada brooshuriyaa imma.
Hagaadan mala beꞌana danddayaasa: Kiristtaane giyo haymaanootiyaa kaallenna uraa Geeshsha Maxaafay Tamaarissiyoy giya maxaafaa xannaꞌissiyaaba gidikko, xinaatiyaa doommiyo woy wurssiyo wode ubbatoo, guutta daqiiqaa goꞌettada Geeshsha Maxaafaa qofaa qanttan akeekana mala ha brooshuriyaappe issi shaahuwaa tobba.
Merinaa Deꞌuwau Efiya Ogiyaa—Neeni Demmadii?
Giigidoy daro haymaanootiyaanne kaayuwaa xeelliyaagan oychiya Afirkkan deꞌiya asaassa
Asau immiyo ogiyaa: “Daro asay Yesuusi naaꞌꞌu ogiyaabaa yootido ha qofaa erees.” [Maatiyoosa 7:13, 14 nabbaba. Yaatada, sinttaa 2n deꞌiya wurssetta qofaa qashuwaa yoota:] “Ha brooshuree giigido halchoy merinaa deꞌuwau kaalettiya ogiyaa neeni demmanaadan maaddanaassa.” Brooshuriyan ubba menttuwau oyshay deꞌiyoogaa yoota; yaatada Geeshsha Maxaafaa xannaꞌissiyo ogiyaa bessa.
Hagaadan mala beꞌana danddayaasa: Sinttaa 12 SHaaho 4n, “Nu Mayzza Aawati Awan Deꞌiyoonaa?” giya oyshaa tobba. Woy: Sinttaa 30ninne 31n deꞌiya, “Maalaalissiya Sinttanaa Wodiyaa!” giya sima huuphe yohuwaa kessada issi issi qofaa tobbiyoogan doomma.
Xoossaa Dabbo Gidana Danddayaasa!
Giigidoy loytti tamaaribeenna woy loytti nabbabenna asatussa
Asau immiyo ogiyaa: “Xoossaa dabbo gidana danddayoos giidi qoppeetii? [Zaaranaashin takki ga. Yaatada Yaaqooba 2:23 nabbaba.] Ha brooshuree nuuni Abrahaamaagaadan Xoossaa dabbo gidanaadan maaddanau giigiis.”
Hagaadan mala beꞌana danddayaasa: Koyro gallassi woy zaarettada oychiyo wode shaaho 1 muleera woy appe amaridaagaa tobbiyoogan Geeshsha Maxaafaa xannaꞌiyo ogiyaa bessa.
Intte Siiqoyo Asi Hayqqiyo Wode
Giigidoy siiqiyo uri hayqqido ubbatussa. Hegee haymaanootiyaa mintti kaalliyaageetanne mintti kaallennaageeta gujjees.
Asau immiyo ogiyaa: “Siiqiyo uri hayqqido miilooniyan qoodettiyaageeta minttettida ha brooshuriyaa nuuni hachi asau immiiddi deꞌoos. Hayqqidaageetussi ayba hidooti deꞌiyaakko qoppi ereetii? [Zaaranaashin takki ga. Yaatada, neeni Yohaannisa 5:28, 29 nabbabiyo wode i kaallanaadan shoobba. Sinttaa 27 kessada, mentto 3 bessana danddayaas.] Koyiyaaba gidikko, intte ha brooshuriyaa ekkana danddayeeta.”
Hagaadan mala beꞌana danddayaasa: Hagaadan oychana danddayaasa: “Siiqiyo uri hayqqido asa waati minttettanaakko qoppi ereetii?” Yaatada, sinttaa 20n “Harati Waati Maaddana Danddayiyoonaa?” giya huuphe yohuwaa garssan, Leemiso 17:17 xiqisee deꞌiyo menttuwaa tobbana danddayaasa.
Hayqqidaageetu Ayyaanati Nena Maaddanau woy Qohanau Danddayiyoonaa? Tumu Eti Deꞌiyoonaa?
Giigidoy iita ayyaanaa oosuwaa oottiyaageetussa
Asau immiyo ogiyaa: “Daro asay hayqqida asatuura gayttida gees? Issoti issoti hayqqida dabboti banttana daganttanau haasayissidoogaa yootoosona. Hegee tuma gidana danddayees giidi qoppeetii? [Zaaranaashin takki ga. Yaatada, neeni Eranchchaa 9:5, 10 nabbabiyo wode i kaallanaadan shoobba.] Geeshsha Maxaafay hayqqidaageeti paxa deꞌennaagaa yootiyoogaa akeekeeta. Hegaa gishshau, hegaa mala hanotaa ayba ogiyan akeekana danddayiyoo? Ha brooshuree hegaa intteyyo loytti qonccissana. Qassi etau deꞌiya maalaalissiya hidootaakka qonccissees.”
Hagaadan mala beꞌana danddayaasa: Keettaaway neeni yootiyoobaa maayiyaaba gidikko, he allaalliyaabaa gujja yootada brooshuriyaa imma. Zaarettada oychiyo wode, sinttaa 13-18n deꞌiya qofaa tobbana danddayaasa.