Xoossaappe Yiya Mishiraachuwaa! Giya Brooshuriyaa Goꞌettiyo Ogiyaa Zaarettidi Oychanaunne Geeshsha Maxaafaa Xinaatiyaa Doomissanau Nuna Maaddana Mala Giigida Brooshuriyaa
1. Zaarettidi oychanaunne xinaatiyaa doomissanau nuna maaddana mala, “Ne Wozanaa Minttada Naaga!” giya Awuraajjaa SHiiquwan kiyida ooratta brooshuree awugee?
1 “Ne Wozanaa Minttada Naaga!” yaagiya Awuraajjaa SHiiquwan zaarettidi oychanaunne xinaatiyaa doomissanau nuna maaddiya ooratta brooshuree kiyidoogan keehippe ufayttida. Xoossay Nuuppe Koyiyoy giya brooshuriyaagaadan, a sohuwan kiyida Xoossaappe Yiya Mishiraachuwaa! giyaagaa timirttetikka qantta. Ha brooshuree nuuni issi uraa a penggen xannaꞌissanau maaddees. Gidoppe attin, Xoossay Nuuppe Koyiyoy giya brooshuree Kiristtaanetuppe koyettiyaabaa yootees; qassi hegaappe amaridaagaa oorattati ammananau metootana danddayoosona. SHin ha ooratta brooshuree yootiyo waanna qofay Geeshsha Maxaafan deꞌiya mishiraachuwaa.—Oos. 15:35.
2. Mishiraachuwaa giya brooshuree giigidoy aybissee?
2 He brooshuree giigidoy aybissee? Geeshsha Maxaafay Tamaarissiyoy giya, nuuni xannaꞌissanau goꞌettiyo waanna maxaafaappe kase xannaꞌissiyo, asay akeekanau metootennan tumaa ufayttidi siyanau maaddiyaabaa, alame yuushuwan deꞌiya ishantti oychiiddi takkidosona. Maxaafaa xannaꞌanau yayyiya asay darotoo brooshuriyaa goꞌettidi Geeshsha Maxaafaa xannaꞌanau ufayttees. Hegaa bollikka, issi brooshuriyaa daro qaalan birshshiyoogee metenna.
3. Ha brooshuree xannaꞌissanau goꞌettiyo hara xuufetuppe dummatiyoy ayba ogiyaanee?
3 Giigido Ogiyaa: Nuuni xannaꞌissanau goꞌettiyo xuufetuppe daroti, ooninne maaddennan issi uri barkka nabbabidi tumaa akeekanaadan giigidosona. Ha brooshuree dumma. I giigidoy Geeshsha Maxaafaa xannaꞌissanau kaaletodan goꞌettanaadaana. Yaatiyo gishshau, ha brooshuriyaa issi urau immiyo wode, issi woy naaꞌꞌu menttuwaa tobbiyoogee loꞌꞌo. Menttoti qantta gidiyo gishshau, issi ura penggen woy a ooso sohuwan tobbanau danddayoos. Timirtte 1ppe xinaatiyaa doommiyoogee loꞌꞌo gidikkonne, awugaappenne doommana danddayoos.
4. Ha brooshuree nuuni Geeshsha Maxaafaappe tamaarissanaadan waatidi maaddii?
4 Nu xuufetuppe darotun deꞌiya oyshatu zaaruwaa menttotun demmana danddayettees. Gidoppe attin, ha brooshuriyan deꞌiya oyshatu zaaruwaa demmiyoy daro baggi Geeshsha Maxaafaana. Daro asay nu xuufetuppe gidennan, Geeshsha Maxaafaappe tamaaranau koyees. Yaatiyo gishshau, ha brooshuriyan daro xiqisetu qofay xaafettibeenna. He xiqiseta Geeshsha Maxaafaappe nabbabana koshshees. Hegee, tamaariiddi deꞌiyoobay Xoossaappe yiidoogaa tamaareti akeekanaadan maaddees.—Isi. 54:13.
5. Asttamaaree xannaꞌissanaappe kase ubbatoo giigettana koshshiyoy aybissee?
5 Ha brooshuree xiqiseta ubbaa qonccissenna. Aybissi? Hegee oyshaa oychanaadan tamaariyaa minttettana malanne asttamaaree tamaarissiyo hiillaa goꞌettana mala giigiis. Yaatiyo gishshau, xannaꞌissanaappe kase ubbatoo loyttidi giigettiyoogee keehippe koshshees. Haasayaa darissennaadan naagetta. Nuuni Geeshsha Maxaafaa qofaa qonccissiyoogaa dosoos. SHin xiqisiyaa qofaa tamaaree qonccissanaadan oychiyoogee darotoo keehippe maaddees. Oyshaa hiillan oychiyoogan tamaaree xiqisetu ubbaa qofaa yootanaadan maaddana danddayoos.—Oos. 17:2.
6. (a) Asay Xoossaabaanne Geeshsha Maxaafay yootiyoobaa siriyo heeran, (b) sooppe soo haggaaziyo wode, (c) Geeshsha Maxaafaa xannaꞌanaadan shoobbiyo wode, (d) zaarettidi oychiyo wode, nuuni ha brooshuriyaa goꞌettana danddayiyoy ayba ogiyaanee?
6 Aginan asaayyo immiyoy aybanne gido, xannaꞌissanau goꞌettiyo hara xuufetuugaadan ha brooshuriyaa awudenne asau immana danddayoos. Daroti issi uri Geeshsha Maxaafaa xannaꞌanaadan a penggen shoobbidi, xinaatiyaa doomissanau ha brooshuriyaa goꞌettiyoogan ufayttana. Hegaa bollikka, awuraajjaa shiiquwan odettidaagaadan koshshay deꞌiyo ura zaarettidi oychiyo wode ha brooshuriyaa goꞌettiyoogee, “tumuppe . . . nuuni zaarettidi oychiyoogan ufayttanaadan maaddana!”—Sinttaa 4-7n deꞌiya saaxineta xeella.
7. Ha brooshuriyaa goꞌettidi Geeshsha Maxaafaa waati xannaꞌissana danddayeetii?
7 Xannaꞌissiyo Ogiyaa: Borxxu giidi xaafettida, paydoy deꞌiyo oyshata nabbabidi tobbiyoogaa doommana danddayoos. Hegaappe simmin, menttuwaanne geddi gi xaafettida xiqisiyaa nabbabite. Keettaaway xiqisiyaa qofaa akeekanaadan maaddanau hiillan oyshaa oychite. Yaatidi, kaalliya shaahuwau baanaappe kase keettaaway qofaa akeekidaakkonne eranau borxxu gi xaafettida oyshaa oychite. Koyro heeran, borxxu giidi xaafettida oyshatuppe issuwaa xallaa tobbiyoogee loꞌꞌo gidana danddayees. Guyyeppe, kumetta timirttiyaa tobbana danddayoos.
8. Nuuni xiqisiyaa ayba ogiyan erissana koshshii, qassi aybissi?
8 Borxxu gi xaafettida oyshau zaaro gidiya waanna qofay deꞌiyoy “nabbaba” geetettidi xaafettida xiqisetuuna. Xiqisiyaa erissiyo wode, “Kiitettida PHauloosi woygi xaafidaakko ane beꞌoos,” woy “Ermmaasi hananabaa yootidobaa akeeka” gooppite. Keettaaway nuuni nabbabiyoy asa qofa giidi qoppana danddayees. “Xoossaa qaalay hagaadan gees,” woy “Geeshsha Maxaafay yootiyoobaa akeeka” giyoogee loꞌꞌo.
9. Xannaꞌissiyo wode ubba xiqisiyaakka nabbabana koshshii?
9 Nuuni nabbabana koshshiyoy xiqise ubbayiyye woy “nabbaba” geetettidi xaafettida xiqise xallay? Hegee hanotaadaana. Issi qofay Geeshsha Maxaafan awan deꞌiyaakko bessana xallau xaafettida xiqisee baa. Ubba xiqisiyankka tobbana koshshiya qofay deꞌees. SHin, issi issitoo xannaꞌiya urau wodee baynna gishshau, i koyenna gishshau woy nabbabiyoogaa danddayenna gishshau, “nabbaba” giya xiqise xallaa nabbabana danddayoos.
10. Geeshsha Maxaafay Tamaarissiyoy giya maxaafaa doomissana danddayiyoy awudee?
10 Geeshsha Maxaafay Tamaarissiyoy Giya Maxaafaa Doomissanay Awudee? Darotoo tobbi simmidi, ubbatoo xannaꞌissiyoogaa doommikko, Geeshsha Maxaafay Tamaarissiyoy giya maxaafaa doomissana danddayoos; woykko kaseegaadankka Mishiraachuwaa giya brooshuriyaa wurssana gakkanaashin xannaꞌissana danddayoos. Geeshsha Maxaafay Tamaarissiyoy giya maxaafaa awude doomissanaakko aassiyaageeti loytti qoppidi kuuyana danddayoosona. Yaatikko, Geeshsha Maxaafay Tamaarissiyoy giya maxaafaa koyruwaappe doommana koshshii? Asay issoy issuwaappe dumma gidiyo gishshau, hagaappe doommana koshshees giyaabi baawa. Gidikkokka, daro xinaateti Geeshsha Maxaafay Tamaarissiyoy giya maxaafan zaarettidi issibaa aahuwan xannaꞌiyo wode goꞌettoosona.
11. Nuuni ha ooratta brooshuriyaa loyttidi goꞌettana koshshiyoy aybissee?
11 Mishiraachoy baynna ha alamiyan, Xoossaa Kawotettay haariyoogaanne xillotettay kumana ooratta alamiyaa mata wode ehaanaagaa qonccissiya, laggetiyaabi baynna mishiraachuwaa yootiyo gita maatay nuussi deꞌees! (Maa. 24:14; 2 PHe. 3:13) Nuuni yootiyo mishiraachuwaa siyiya daroti geeshsha ayyaanay kaalettin xaafettida ha qofaa maayettanaagaa ammanoos: “Lo77o mishiraachchuwaa ehiya, sarotettaa yootiya, ufaissiya mishiraachchuwaa yootiya, atotettaa yootiyaanne, Xiyoonekka, ‘Ne Xoossai kawotees’ giiddi deretu bollaara yiya bitaniyaa tohoti aiba lo77iyoonaa!” (Isi. 52:7) Nu heeran deꞌiya saamettidaageetussi Xoossaappe yiya mishiraachuwaa yootanau ha ooratta brooshuriyaa goꞌettiyaageeta gidoos!
[Sinttaa 7n deꞌiya misiliyaa qonccissuwaa]
Asay Xoossaabaanne Geeshsha Maxaafay Yootiyoobaa Siriyo Heeran:
● Issi issi heeran, “Xoossaa” woy “Geeshsha Maxaafaa” giya qaalaa goꞌettiyoogee, harati nunaara haasayiyoogaa agganaadan oottiyoogaa aassiyaageeti akeekidosona. Yaaniyo wode, heeran deꞌiya asaa qofissiyaabaa, giishin loꞌꞌo haaruwaabaa, so asay goꞌꞌiya zoriyaa awuppe demmanaakko, qassi sinttappe aybi hananaakko koyro gallassi yootiyoogee loꞌꞌo gidana danddayees. Xoossay deꞌiyoogaa nuuni waati erana danddayiyaakko, qassi Geeshsha Maxaafay ammanttiyaaba gididoy aybissakko amaridabaa tobbi simmidi, Mishiraachuwaa giya brooshuriyaa erissana danddayoos.
[Sinttaa 8n deꞌiya misiliyaa qonccissuwaa]
Sooppe Soo Biyo Wode:
● “Taani yiidoy Xoossay asaa naatussi sinttappe oottanau qoppidobay akeekanau metennaba gidiyoogaa nena bessanaassa. Xoossay nu bollappe metuwaa qaaraneeshsha gaada qoppa eray? [Zaaranaashin takki ga.] Neeni he oyshaa zaaruwaa Geeshsha Maxaafan demmana danddayiyo sohuwaa ha brooshuree yootees. [Assi brooshuriyaa immada, timirtte 1n koyro menttuwaanne Ermmaasa 29:11 nabbaba.] Yaatin, nuuni sinttappe loꞌꞌobaa demmanaadan Xoossay koyees gaada qoppikkii? [Zaaranaashin takki ga.] Koyikko, ha xuufiyaa ekkana danddayaasa. ‘Asaa naati metootanaadan oottiyaabaa Xoossay waatidi xayssanee?’ giya oyshaa zaaruwaa Geeshsha Maxaafaappe beꞌanau, haroode naaꞌꞌantto menttuwaa tobbana danddayoos. Keettaawau wodee deꞌiyaaba neeyyo milatikko, koyro gallassi naaꞌꞌantto menttuwaanne an deꞌiya heezzu xiqiseta nabbabidi tobbana danddayeeta. He timirttiyan deꞌiya naaꞌꞌantto oyshaa hara galla tobbanau wodiyaa keera.
● “Daro asay metoy gakkiyo wode woossees. Neeni issi issitoo woossay? [Zaaranaashin takki ga.] Xoossay ubba woosaa siyees gaada qoppayiyye, issi issi woosay a ufayssenna gaada qoppay? [Zaaranaashin takki ga.] Ha oyshatuyyo Geeshsha Maxaafaappe zaaruwaa demmanau maaddiya brooshuriyaa hagaa beꞌa. [Brooshuriyaa ayyo imma; yaatidi timirtte 12n koyro menttuwaanne “nabbaba” giya xiqiseta tobbite.] Xoossay nuuni oychiyoobaa siyanau koyiyoogee maalaalissennee? SHin woosan daro goꞌettanau, nuuni Xoossaa loyttidi erana koshshees. [Timirtte 2 kessada sima huuphe yohota bessa.] Neeni koyikko, ha brooshuriyaa neeyyo immana danddayays; qassi ha oyshatu zaaruwaa Geeshsha Maxaafaappe hara gallassi nabbabana danddayoos.”
● Ha alamiyan hananabay asaa qofissiyo gishshau tobbanau yaas. Alamiyaa hanotay giigana gaada qoppay? [Zaaranaashin takki ga.] Geeshsha Maxaafay nuussi hidootay deꞌanaadan oottiya mishiraachuwaa yootiyoogaa eriyo wode, daro asay garamettees. Geeshsha Maxaafay zaariyo oyshatuppe amaridaageeta beꞌa.” Brooshuriyaa ayyo immada, wurssetta sinttan deꞌiyaageetuppe i eranau koyiyo oyshaa dooranaadan shoobba. Yaatada, i doorido timirttiyaa kessada, waatidi xannaꞌanaakko bessa. He timirttiyan deꞌiya kaalliya oyshaa tobbanau, hara gallassi yaanau keera.
[Sinttaa 9n deꞌiya misiliyaa qonccissuwaa]
Xannaꞌanaadan SHoobba:
● “Geeshsha Maxaafaa xannaꞌanau mata wode giigida timirttiyaa neeyyo yootanau yaas. Neeni waanna oyshatuyyo ne Geeshsha Maxaafan zaaruwaa demmana danddayiyo, 15 timirtteti ha brooshuriyan deꞌoosona. [Koyro sinttaanne wurssetta sinttaa a bessa.] Geeshsha Maxaafay yootiyoobaa akeekanau mala eray? [Zaaranaashin takki ga.] Ha timirtteti akeekanau metennaageeta gidiyoogaa ane nena bessays. [Timirtte 3n deꞌiya 3tto oyshau koyro menttuwaa tobba; qassi Ajjuutaa 21:4, 5 nabbaba. Koshshiyaaba gidikko, kaalliya menttuwaanne “nabbaba” giya xiqiseta tobbite.] Neeni koyiyaaba gidikko, ha brooshuriyaa neessi immana danddayays. Neeni Geeshsha Maxaafaa xannaꞌanau issitoo ha timirttiyaa tamaaranaadan zoroos. Neeni dosiyaaba gidikko, ubbatoo xannaꞌana danddayaasa. Hara galla, koyro timirttiyaa tobbana danddayoos. He timirttee issi sintta xallan deꞌiyoogaa akeeka.”
[Sinttaa 9n deꞌiya misiliyaa qonccissuwaa]
Zaarettada Oychiyo Wode Brooshuriyaa Erissa:
● Eranau koyiya ura zaarettidi bi oychiyo wode, “Saro takkadii? Qofissiya daro oyshatuyyo Geeshsha Maxaafay zaariyo zaaruwaa oyqqida ha brooshuriyaa neessi ekkada yaas. [Brooshuriyaa ayyo immada, wurssetta sinttaa beꞌanaadan shoobba.] Ha oyshatuppe neeni eranau keehi koyiyoogee awugee? [Zaaranaashin takki ga. Yaatada i doorido timirttiyaa kessa.] Geeshsha Maxaafan deꞌiya zaaruwaa demmanau ha brooshuriyaa waatidi goꞌettana danddayiyaakko ane nena bessays.” Xannaꞌiyo ogiyaa bessanau, issi woy naaꞌꞌu menttuwaanne “nabbaba” giya xiqiseta tobba. Hagaadan oottiyoogan, metootennan Geeshsha Maxaafaa xinaatiyaa doomissadasa. Brooshuriyaa keettaawaassi immada, zaarettada yiyo wodiyaa keera. Doommido timirttiyaa wurssiyo wode, keettaaway doorido hara timirttiyaa woy brooshuriyaa koyruwaappe doommada tobbana danddayaasa.