Godaa Kahuwaa Bonchanau Ufayssan Giigettite
1. Godaa Kahuwaa baalaa bonchiyo wode nuuni waaniyoo?
1 Laappune 26n Masqqaynno gallassi bonchiyo Godaa Kahoy, Xoossay nuna ashshanau oottidoban ufayttanaadan oottiyaaba. (Isi. 61:10) Matattida he baalaa bonchanaappe kase ufayttiyoogee, nuuni loyttidi giigettanaadan maaddees. Ayba ogiyan?
2. Nuuni Godaa Kahuwaa bonchanau giigettanaadan denttettiyay aybee?
2 Baalaa Bonchanau Giigettiyoogaa: Godaa Kahoy gita baala gidikkonne, gibiraa giigissiyo wode gidenna. Gidoppe attin, keehippe koshshiyaabay dogettenna mala kasetidi giigettana bessees. (Lee. 21:5) Bonchiyo saatiyaanne giiga sohuwaa kasetidi kuuyana koshshees. Baalau bessiya oyttaanne woyniyaa giigissana bessees. SHiiqiyo sohuwaa geeshshidi giigissana koshshees. Haasayanaadan doorido ishay akeekan giigettana koshshees; qassi oyttaanne woyniyaa yuushshiyaageetussinne asaa mokkiyaageetussi qoncce kaaletuwaa yootana bessees. Hageetuppe darobay giigi uttidoogee qoncce. Koshshiyo gishsha xalla gidennan, nuuni wozuwaa nashshiyo gishshau, ufayssan hegaadan giigettoos.—1 PHe. 1:8, 9.
3. Godaa Kahuwau nu wozanaa giigissana danddayiyoy ayba ogiyaanee?
3 Wozanaa Giigissiyoogaa: Godaa Kahuwaa baalaabaa loytti akeekanau nu wozanaa giigissiyoogeekka keehippe koshshees. (Izi. 7:10) Yaatanau, nuuni Godaa Kahuwaa wodiyan nabbabiyo Geeshsha Maxaafaa xiqiseta nabbabanaunne Yesuusi ha saꞌan wurssetta heeran deꞌido deꞌuwaabaa yereranau wodiyaa bazzana koshshees. Yesuusi ba goꞌꞌaa aggibayidi oottidobaa wotti dentti qoppiyoogee nuunikka a leemisuwaa kaallanaadan maaddees.—Gal. 2:20.
4. Wozoy demissiyo goꞌꞌaappe neeni keehi ufayttanaadan oottiyay awugee?
4 Kiristtoosa hayqoy ubbabaa haarana bessiyay Yihoowa gidiyoogaa qonccissees. A hayqoy nuna nagaraappenne hayquwaappe naxa kessees. (1 Yoh. 2:2) Yesuusa hayqoy nuuni Xoossaara dabbotanaadaaninne merinaa deꞌuwaa demmanaadan maaddees. (Qol. 1:21, 22) Nu huuphiyaa Yihoowayyo geppidoogaadan deꞌanau murttidi, ubbatoo Kiristtoosi erissiyo ashkkara gididi deꞌanaadankka hegee maaddees. (Maa. 16:24) Intte mata wode bonchana Godaa Kahuwau giigettiyo wodenne shiiqiyo wode, keehippe ufayttanaadan amottoos!