Ubbatoo Hagaadan Oottite Godaa Kahoy Hosppune 5n Bonchettees
1. Godaa Kahuwaa bonchiyoogee keehippe koshshiyoy aybissee?
1 “Hagan tana hassayite.” (Luq. 22:19) Yesuusi hegaadan giyoogan, i yarshsho gididi hayqqido hanotaa hassayanaadan bana kaalliyaageeta azaziis. Wozuwaa baggaara polettidabay keehi daro gidiyo gishshau, Kiristtaanetuyyo layttan layttan bonchiyo Godaa Kahuwaappe aadhidi keehippe koshshiya woy alꞌꞌo gidida hara gallassi baawa. Ha laytti Hosppune 5n bonchiyo Godaa Kahoy matattiyo wode, Yihoowa galatiyoogaa waatidi bessana danddayiyoo?—Qol. 3:15.
2. Godaa Kahuwaa xoqqu ootti xeelliyoogaa xannaꞌiyoogaaninne wotti denttidi qoppiyoogan waatidi bessana danddayiyoo?
2 Giigetta: Nuuni keehippe koshshees giidi qoppiyoobau giigettiyoogee qoncce. Yesuusi saꞌan deꞌido wurssetta gallassan hanettidabaa so asaara issippe xannaꞌiyoogaaninne wotti denttidi qoppiyoogan, Godaa Kahuwau nu wozanan giigettana danddayoos. (Izi. 7:10) Hegau maaddiya amarida xiqiseti kalanddariyaaninne Geeshsha Maxaafaa Galla Galla Pilggiyoogan deꞌoosona; qassi kumetta xiqisetanne Asa Ubbaappe Aadhiyaagaa giya maxaafan he xiqiseta qonccissiya shemppota Wolayttatto Wochiyo Keelaa Laappune 1, 2011, sinttaa 31-32n beꞌana danddayaasa.
3. Kaseegaappe daro saatiyaa haggaaziyoogan Godaa Kahuwaa nashshiyoogaa waatidi bessana danddayiyoo?
3 Sabbaka: Nuuyyo danddayettida keena ubban loytti sabbakiyoogankka Godaa Kahuwaa xoqqu ootti xeelliyoogaa bessana danddayoos. (Luq. 6:45) Qeeraa galla Laappune 17ppe doommidi, alame yuushuwan asaa Godaa Kahuwau shoobbiyo zamachay deꞌees. Daro saatiyaa haggaazanau, geella kaafiya aqinye gidanau ne hanotaa giigissana danddayay? Kaalliya So Asaa Goynuwaa omarssan hegaa denttidi aybissi tobbekketii?
4. Godaa Kahuwaa bonchiyoogan nuuni ayba goꞌꞌaa demmana danddayiyoo?
4 Layttan layttan Godaa Kahuwaa bonchanau shiiqiyoogan keehippe goꞌettida! Yihooway ba mexi issi Naꞌaa wozo oottidi kehatettan immidoogaa wotti denttidi qoppiyo wode, keehippe ufayttiyaageetanne kaseegaappe aaruwan Xoossaa siiqiyaageeta gidoos. (Yoh. 3:16; 1 Yoh. 4:9, 10) Hegee nuuni nu huupheyyo deꞌennaadan oottees. (2 Qor. 5:14, 15) Hegee nuuni asaa sinttan Yihoowa galatanaadankka denttettees. (Maz. 102:19-21) Yihoowa wozanappe galatiya ashkkarati Hosppune 5n bochiyo Godaa Kahuwaa wode, ‘a hayquwaa yootanau’ yeemottidi naagoosona.—1 Qor. 11:26.