Yelaga Ishatoo, Baaxetiiddi Deꞌeetii?
1. Issi yelaga ishay 1 Ximootiyoosa 3:1n deꞌiya zoriyaa oosuwan peeshshiyoogaa doommana koshshiyoy awudee?
1 “Ooninne . . . koyikko [“baaxetikko,” NW], lo77obaa amottiis.” (1 Xim. 3:1) Ayyaanaa kaaletuwan xaafettida ha qofay ishantti gubaaꞌiyan oottiyo maatau baaxetanaadan minttettees. Neeni hegaadan oottanau gastta asa gidana bessii? Neeni yelagatettan deꞌiyo wode hegau baaxetiyoogaa doommiyoogee keehi loꞌꞌo. Hegaadan oottiyoogan loohana danddayaasa; qassi gitatiyo wode gubaaꞌiyan oottiyaagaa gidada sunttettana danddayiyoogaa bessaasa. (1 Xim. 3:10) Neeni xammaqettida yelaga isha gidikko, baaxetana danddayiyoy ayba ogiyaanee?
2. Issi asi ba goꞌꞌaa aggibayanau koyiyoogaa bessiyoy ayba ogiyaanee, qassi hegaa oosuwan peeshshana danddayiyoy ayba ogiyaanee?
2 Goꞌꞌaa Aggiyoogaa: Neeni maatassi gidennan, loꞌꞌo oosuwau baaxetaydda deꞌiyoogaa hassaya. Yaatiyo gishshau, ishanttanne michontta ufayttada maaddiyaagaa gida. Hegaadan oottiyo issi ogee Yesuusa loꞌꞌo leemisuwaa wotti dentti qoppiyoogaa. (Maa. 20:28; Yoh. 4:6, 7; 13:4, 5) Neeni haratussi qoppiyaagaa gidanau maaddanaadan Yihoowakko woossa. (1 Qor. 10:24) Gubaaꞌiyan deꞌiya cima asaa woy abbee paccidoogeeta maaddana danddayay? Kawotettaa Addaraashaa gibbiyan mokkiya sharafaa shoddiyoogaa woy addaraashaa giigissiyoogaa malabaa ne dosan oottay? Tiꞌokiraase Haggaazo Timirtte Keettan kifiliyaa shiishshiya asi attiyo wode shiishshanau giigettay? Harata maaddanau ne goꞌꞌaa aggabayiyoogee neeni ufayttanaadan oottees.—Oos. 20:35.
3. Ayyaanaaban minniyoogee ay keena koshshiyaabee, qassi minnana danddayiyoy ayba ogiyaanee?
3 Ayyaanaaban Minniyoogaa: Gubaaꞌiyan oottiya urappe keehi koyettiyaabay erancha woy qara gidiyoogaa gidennan, ayyaanaaban mino gidiyoogaa. Ayyaanaaban mino asi Yihoowaynne Yesuusi xeelliyo ogiyan ubbabaa xeellanau baaxetees. (1 Qor. 2:15, 16) I ‘ayyaanaa ayfiyaa’ ayfees. (Gal. 5:22, 23) Qassi ba deꞌuwan Kawotettaabaa kaseyiya, mishettidi haggaaziya asa. (Maa. 6:33) Neeni aggennan buzo xinaatiyaa xannaꞌiyoogan ayyaanaa ayfiyaa ayfana danddayaasa. Hegee Geeshsha Maxaafaa ubba gallassi nabbabiyoogaa, Wochiyo Keelaanne Beegottite! maxeeteta ubbaa nabbabiyoogaa, qassi gubaaꞌe shiiquwau giigettiyoogaanne shiiqiyoogaa gujjees. (Maz. 1:1, 2; Ibr. 10:24, 25) Yelaga Ximootiyoosi ayyaanaaban diccanaadan PHauloosi minttettido wode, “Ne timirttiyaa naaga” yaagidi xaafiis. (1 Xim. 4:15, 16) Yaatiyo gishshau, Tiꞌokiraase Haggaazo Timirtte Keettan neeyyo kifilee imettiyo wode loytta giigetta. Haggaazuwau loytta giigetta, qassi ubbatoo haggaaza. Aqinye gidiyoogaa, Beeteelen oottiyoogaa woy Machibeenna Ishati Loohiyo Timirtte Keettan loohiyoogaa mala ayyaanaabaa halchuwaa kessada, hegau minna ootta. Ayyaanaaban minniyoogee neeni “wodallatetta amuwaappe” baqatanaadan maaddees.—2 Xim. 2:22.
4. Ammanettidaagaa gidiyoogaa goꞌꞌay aybee?
4 Ammanettiyaagaa Gidiyoogaa: Koyro xeetu layttan metootida Kiristtaanetuyyo qumaa yezanau sunttettida ishantti “lo77o geetettiyaageeta” woykko ammanettiyaageeta gidiyo gishshau, kiitettidaageeti he oosoy oosettaneeshsha giidi hirggibookkona. Hegee eti keehi koshshiya harabaa oottanaadan maaddiis. (Oos. 6:1-4) Yaatiyo gishshau, gubaaꞌiyan neessi issi oosoy imettiyo wode, danddayettida keenan minnada ootta. Markkabiyaa keexxanaadan imettida kaaletuwaa kaallidi akeekan oottida Nohe leemisuwaa kaalla. (Doo. 6:22) Ammanettidaagaa gidiyoogaa Yihooway xoqqu oottidi xeellees, qassi hegee ayyaanaaban kayma gidiyoogaa bessees.—1 Qor. 4:2; “Loohissiyoogaa Goꞌꞌaa” giya saaxiniyaa xeella.
5. Yelaga ishati baaxetana koshshiyoy aybissee?
5 Kasetidi odettidaagaadan Yihooway asaa eesuwan shiishshiiddi deꞌees. (Isi. 60:22) Layttan layttan amakaayiyan 250 shaꞌa gidiya asay xammaqettees. Daro ooratta asay xammaqettiiddi deꞌiyo gishshau, gubaaꞌiyan aawatettan oottana danddayiya ayyaanaaban kaymida attuma asay koshshees. Ha wodiyan awudeegaappenne aaruwan Yihoowayyo oottiyo darobay deꞌees. (1 Qor. 15:58) Yelaga ishatoo, baaxetiiddi deꞌeetii? Yaatikko, intte tumuppe loꞌꞌobaa amotteeta!
[Sinttaa 2n deꞌiya misiliyaa qonccissuwaa]
Daro ooratta asay xammaqettiiddi deꞌiyo gishshau, gubaaꞌiyan aawatettan oottana danddayiya ayyaanaaban kaymida attuma asay koshshees
[Sinttaa 3n deꞌiya saaxiniyaa]
Loohissiyoogaa Goꞌꞌaa
Gubaaꞌiyaa cimati etau oosuwaa immiyo wodenne eta loohissiyo wode mino yelaga ishati goꞌettoosona. Woradaa xomoosiya issi ishay shiiqoy wuri simmin madirakiyan uttidi issi ishaa minttettees. Issi yelaga naꞌay ba matan eqqidaagaa beꞌidi, bana haasayissanau naagiyaakkonne oychiis. He yelaga ishay shiiqoy wuri simmin ubba gallassi madirakiyaa pittiyoogee a ooso gidiyoogaa yootiis. A yelidaageeti baana hanoosona, shin i ba oosuwaa polennan baanau koyibeenna. Woradaa xomoosiya ishay ufayttidi he sohuwaappe harasaa shiiqiis. I hagaadan giis: “He gubaaꞌiyan deꞌiya cimati mino yelaga ishanttussi gubaaꞌiyan oosuwaa immiyoogan eta ubbatoo loohissoosona. Hegaappe denddidaagan, taani he gubaaꞌiyaa xomoosiyo wode ubban yelaga ishantti gubaaꞌiyau oottiyaageeta gididi sunttettanaadan cimati tau qofaa yootoosona.”