Neeni Ha Injjiyaa Goꞌettanee?
Godaa Kahoy Nuuni Galatanaadan Oottees
1. Godaa Kahoy nuuni waatanaadan denttettii?
1 Hosppune 14n bonchiyo Godaa Kahoy nuuni Yihoowa loꞌꞌotettaa nashshanaadaaninne a galatanaadan oottiya loꞌꞌo injje. Luqaasa 17:11-18n deꞌiya taarikee Yihoowaynne Yesuusi galataa xoqqu oottidi xeelliyoogaa bessees. Inchirichaappe paxida tammu asatuppe galatanau yiidaagee issuwaa xalla gidiyoogee azzanttiyaaba. Wozuwaa yarshshoy asay sinttappe ubba qommo harggiyaappe paxidi merinau deꞌanaadan oottana. Nuuni he wode he anjjuwaa gishshau Yihoowa galla galla galatanaagee erettidaagaa. Kaalliya saaminttatun nu galataa waati qonccissana danddayiyoo?
2. Nuuni wozuwaa yarshuwaa nashshanaadan aybi maaddana danddayii?
2 Galatanau Maaddiyaabaa: Asi galatanaadan denttettiyay wozanaa. Nuuni wozuwaa yarshuwaa nashshanau maaddiya, Godaa Kahuwaa wodiyan nabbabiyo Geeshsha Maxaafaa xiqiseti Kaalanddariyan, Geeshsha Maxaafaa Galla Galla Pilggiyoogaa giya bukleetiyaaninne haraban deꞌoosona. Hegee Godaa Kahuwaa bonchiyo wodiyaappe kasetidi jw.org Weyb sayttiyankka kiyees. Hegaa so asaara issippe tobbana danddayeeta. Yihoowaynne Yesuusi nuuyyo oottidobaa wotti dentti qoppiyoogeenne haratuyyo yootiyoogee, nuuni wozuwaa yarshuwaa kaseegaappe loytti nashshanaadan maaddees. Hegee nuuyyo loꞌꞌo eeshshay deꞌanaadan oottees.—2 Qor. 5:14, 15; 1 Yoh. 4:11.
3. Nuuni galatiyaageeta gidiyoogaa ayba ogetun bessana danddayiyoo?
3 Galata: Galatiyoogee oosuwan qoncci beettees. (Qol. 3:15) Inchirichaappe paxida bitanee Yesuusa galatanau i awan deꞌiyaakko koyiis. Qassi i maalaalissiya ogiyan paxidoogaa haratuyyo ufayttiiddi yootidoogee qoncce. (Luq. 6:45) Wozuwaa yarshuwaa nashshiyoogee nuuni Godaa Kahuwau asaa mishettidi shoobbanau denttettanee? Godaa Kahuwaa wodiyan kaafiya aqinye gidiyoogee woy kaseegaappe loytti haggaaziyoogee galatiyoogaa oosuwan bessiyo hara oge. Nuuni nashshiyaageeta gidiyoogee, Godaa Kahuwaa bonchiyo galla omarssi shiiquwau yiya imattata mokkanaadaaninne eti oychiyo oyshaa zaaranaadan denttettees.
4. Ha laytti Godaa Kahuwaara gayttidaagan zilꞌꞌettenna mala waatana danddayiyoo?
4 Ha laytta Godaa Kahoy nuuyyo wurssetteeshsha? (1 Qor. 11:26) Erokko. SHin he wodee aadhikko, nuuni galatana bessiyo loꞌꞌo injjee aadhiyoogaa eroos. Neeni he injjiyaa goꞌettanee? Nu doonaappe kiyiya nashshiyo qaalaynne nu wozanaa qofay kehatettan wozuwaa yarshuwaa giigissida Yihoowa ufayssiyaagaa gido.—Maz. 19:14.